رواية العاصفة الجزء الثاني للكاتبة الشيماء محمد

رواية العاصفة الجزء الثاني للكاتبة الشيماء محمد

اقتباس من العاصفة الجزء الثاني

أنا ماقدرتش أقعد في البيت ونزلت طول الليل ألف في الشوارع يمكن ألحقها لو جرالها حاجة ! وطول الليل عمال أدعي ربنا يبعتلها حد يحميها لو محتاجة لحماية وهي في البيت عندك ! أنت ازاي عملت فيا كده ؟

طه اتوجع جدا: يا كريم أنا ماكنتش...
قاطعه كريم: مش عايز أسمع أي مبرر منك أنا مش هسامحك على فكرة !مش هسامحك يا طه لأني قدرتك ( صوته مهزوز ومش عارف يتكلم وباين الوجع في كل كلمة بينطقها ) أنا قدرتك وكلمتك عن مشاعري وقلتلك هاجي البيت بعد المشروع وللأسف صاحبتها عملت حادثة فكلمتك تاني وأنا في المستشفى وقلتلك بس مروة تخرج من المستشفى وهاجي .. أنا قدرتك وأنت ماقدرتنيش .

طه: كريم اسمعني أرجوك .
كريم زعق: مش عايز أسمع ومش هسامحك .
قفل السكة في وشه وطه بصلهم وصمت مسيطر عليهم كلهم ومتأثرين بكلام كريم خصوصا أمل اللي مابطلتش عياط...

اقتباس ثاني من العاصفة الجزء 2

كريم دخل عند وكيل النيابة اللي استقبله بذوق وقعد قصاده: خير يا افندم ! انا هنا ليه ! مش المفروض امبارح كان الموضوع دفاع عن النفس النهاردة ازاي بقى تعدي ؟
وكيل النيابة: البنت وامها شهدوا انك ضربته وعاكستها وكنت عايز تاخدها منه .
كريم كشر بذهول: وحضرتك مصدق الكلام ده !
وكيل النيابة بأسف: للاسف انا مش بحكم بأحاسيسي احنا لينا الشهود والادلة .

كريم هز دماغه بتفهم وسند على المكتب قرب من وكيل النيابة: ينفع اكلم البنت دي وامها؟
الباب خبط ودخل العسكري: في كذا محامي بره بيقولوا انهم حاضرين معاه !
وكيل النيابة شاورله يدخلهم ودخل المحامي مجدي فتح الله ومعاه ثلاثة تانين وراه ومجدي بص لكريم يطمنه وبص لوكيل النيابة: حاضر معاه يا افندم .
وكيل النيابه بصلهم: بصوا الموضوع بسيط ويتحل بسهولة مش محتاج اربع محامين ابدا .
كريم ابتسم: مش هيحتاج فعلا بس والدي بيقلق شوية .. المهم اقدر اكلمهم ! البنت و والدتها !

وكيل النيابة بصله: شوف يا باشمهندس حضرتك طبعا معروف ولك اسمك ووزنك واسم شركتك معروف فلو عايز نصيحتي لم الموضوع .. البنت واهلها غلابة .
كريم ابتسمله: انا فاهم حضرتك كويس بس برضه عايز اتكلم مع البنت .. لازم افهم منها مين ضغط عليها وخلاها تغير اقوالها وكلامها .
وكيل النيابة: عيلتها ؟ جوزها نفسه ؟ خوفها منه ! الناس دي بتحسبها غيرنا .. بس على العموم هدخلهم هنا .

كريم بص للمحامي مجدي: مش محتاج لكل ده كفاية حضرتك معايا واشكر الباقين وخليهم يشوفوا اشغالهم .. حضرتك كلمهم .
مجدي بالفعل مشى الكل وفضل هو فقط
وكيل النيابة نادى العسكري يجيب البنت ووالدتها واخوها اللي واقفين منتظرين بره.

دخلت البنت و وراها امها واخوها والبنت بصت ناحية كريم اللي قاعد باسترخاء
وكيل النيابة: ادخلي يا سامية تعالي ! وقوليلي هو ده اللي اتعدي عليكي انتي وجوزك وامك ؟
الام دموعها نازلة وباصة للارض واخوها اللي اتكلم: ايوه هو يا باشا !
وكيل النيابة: انت تخرس خالص .. انت كنت موجود علشان تعرفه !

الولد اتراجع وكشر: حاضر با باشا هخرس انطقي يا بت يا سامية قولي .
سامية بصت لاخوها بعياط وبصت لامها اللي باصة للارض ومش مبطلة عياط
وكيل النيابة: بقولك ايه احنا مش فاضين ومش هننتظرك النهار كله انطقي هو ولا مش هو ؟
سامية بعياط: هو !

وكيل النيابة: قوليلي يا سامية احكيلي تاني عملك ايه !
اخوها اتكلم: يا باشا ماهي قالتلك انه كان عايز يركبها العربية غصب عنها .
وكيل النيابة بصله: لو فتحت بوقك تاني هرميك في الحجز فاهم ولا افهمك يا اسمك ايه انت !
اخوها: اسمي ناصر يا باشا .. ناصر عرفة .

المحامي اتدخل: واضح يا افندم ان البنت وامها واقعين تحت ضغط وتهديد علشان يغيروا اقوالهم !
ناصر كشر: ضغط مين لا مؤاخذة دي امي ودي اختي ويهموني ! دول لحمي .
كريم رد عليه بهدوء: وعلشان هما لحمك بتبيع فيهم وتشتري صح ! بعدين انت بتتكلم ليه ! مش سبق واتطلب منك تسكت ! ( بص لوكيل النيابة ) هو ما ينفعش نخرجه بره الاخ ده !
وكيل النيابه ابتسم: ينفع طبعا .. خده يا عسكري بره .

ناصر بغيظ: طيب ليه كده يا باشا ! بت يا سامية انتي تقولي كل حاجة وتخرجي منصور يا بت سامعة !
العسكري شده لبره وقفل الباب وكريم هنا بص لسامية: اتكلمي يا سامية .
سامية بتوتر: انا ... انا ... ( بصت لوكيل النيابة ) هو ضرب جوزي والناس اتلمت علينا واتصلوا بالبوليس بس ده اللي اعرفه .

المحامي بتهديد: انتي عارفة ايه عقوبة الشهادة الزور !
كريم بهدوء: استاذ مجدي سيبها .. خليها تقول اللي نفسها فيه .
سامية بصتله ودموعها بتنزل: انا اسفة بس ده اللي عندي ومش هغير كلامي .
كريم ابتسم بتفهم: مفيش اي مشكلة عادي .. كلامك مش هيفرق معايا اصلا .
سامية هي وامها بصوله وسامية باستغراب: ازاي مش هيفرق !

كريم بهدوء: هيفرق في ايه ! هو لو هيفرق مع حد فالحد ده انتي بس لكن انا عادي جدا .
امها بصتله باستغراب: ازاي يا باشا .
كريم وقف وقرب منهم: افهمك .. سواء انا ضربت جوزك دفاع عنك او ضربته علشانك انتي كلتا الحالتين مش هتفرق لان جوزك سوري في الكلمة كلب فلوس .. لو رمتله الف ولا الفين هيسحب البلاغ ويرجعلك انتي يكمل مرمطة فيكي .. مش ده اللي بيحصل ! يعني اللي شوفته ده كان في الشارع ما بالك في بيته بيعمل فيكي ايه !

سامية بعياط: ده نصيبي وده قدري وخلاص رضيت بيه طالما تقدر تطلع منها اطلع وسامحني لاني مش هغير اقوالي دي ومش هقدر اغيرها اصلا .. انتو مش عارفين احنا عايشين ازاي ! منصور ايوه كلب ومش بس كلب فلوس ده كلب في كل حاجة ده انا كمان بظلم الكلب لما بشبهه بيه بس انا وامي عايشين في بيته علشان اخويا متجوز في بيت ابويا ويعتبر طردنا منه او باعني لمنصور فلو اطلقت هروح فين انا وامي !

كريم بصلها: غيري قدرك يا سامية .. اعملي قدر جديد .. اختاري .
سامية بصتله: مفيش اختيارات قدامي .
كريم ابتسم بيطمنها: لا في .. انا قدامك اختيار جديد .. ايد بتتمدلك .. بس خلي بالك الفرصة بتيجي مرة واحدة في العمر .

سامية بحيرة: تقصد ايه بالفرصة !
كريم وقف وبصلهم: انا مستعد اطلقك منه .
امها قاطعته: يا بيه نروح فين ؟
كريم كمل: يا حجة اسمعيني للاخر وبعدها قولي كلمتك .. مستعد اطلقك منه وهتكفل بيكي انتي و والدتك...