رواية نيشان للكاتبة روز الفياض الفصل السادس
بيبي: ان شاءالله كل احنه نعرف تربيتها وقيمتها بنيتنه ماكو مثلها الحمدلله والشكر على سلامتها واريدها تصير شاطره وتكمل دراستها وتاخذ شهادتها وتفرح كلبي وكلب ابوها بكبره.
امي وقيس كالوا: ان شاءالله.
بيبي: ان شاءالله. بس احنه منريد احد يحجي عليها بجامعتها. وهذا طلع مابي خير.
زيد التفت وعصب كال: يعني شنو بالكوه هو الزواج لو اتزوج لو اطلع مو خوش آدمي.
بيبي: لاماكو زواج بالكوه وهي تستاهل واحد احسن منك.
زيد: خوش الله يوفقها واني هم اتمنالها واحد احسن مني.
بيبي: قيس يتزوجها.
كل احنه عبالنه سمعنه غلط امي تباوعلي واني اباوعلها والتفت على بيبي ممصدكين وقيس جان منتجي ويلعب بالتليفون كعد عدل وباوعلي وبعدين لبيبي وزيد نفس الشي.
قيس ضحك واني هم ضحكت على ضحكته وراها زيد ضحك.
امي ساكته تباوع لبيبي.
قيس: خوماكو شي حجيه هههه.
بيبي: لاماكو شي. هذا احسن حل الها والك.
ضحكت واستحيت من حجي بيبي زيد يضحك حيل.
بيبي التفتت على زيد: وقز القرط ليش تضحك شنو حاجيه شي يضحك اني.
ضحك قيس حيل واني هم وزيد وامي ابتسمت.
بيبي: احترموا نفسكم تره مجاي اضحك وياكم احجي صدك اني.
قيس: هههههه على كيفج بس لتتهورين ههههه مريومه اختي الزغيره اولا وثانيا اني رجال متزوج وعندي 3 بنات هههههه على بختج بس ههه.
زيد سكت حس الموضوع صدك مو ضحك.
اني بقيت مبتسمه رغم مالي خلك بسبب زيد بس ضحكت من كل كلبي على كلام بيبي.
بيبي: اختك قبل هسه بت عمك وخطيبتك. متزوج وعندك 3بنات صحيح بس ماعندك ولد يشيل اسمك.
قيس: هههههه يعني اتزوج علمود الولد؟
بيبي: وعلمود بت عمك محد يجيب طاريها بكلمه مو زينه.
اني ساكته عبالك بلعت لساني بس عيوني تتنقل مابين بيبي وقيس وزيد.
امي لاحس ولانفس إلى راح يقرروا تنفذه بسكته وبدون اعتراض حتى لو معاجبها.
قيس: ههههه شحده اليحجي عليها اكص لسانه.
بيبي: اول واحد اخوك. شلون لعد بالناس والطلاب الوياها.
زيد معجبه الحجي يمكن غار من اخوه ممتوقع يتركني غصبن عنه بس يتزوجني اخوه صعبه مو سهله وصعبه حيل.
زيد: ومالكيتي غير قيس يتزوجها؟
انقهرت امي من حجايته كلتله: لو علي ماازوجها لحدما تتخرج ويجيها واحد يقدرها.
اني فهمت قصده هو مستصعبها حبيبته تتزوج اخوه توجع حيل بس هو إلى اتخلى عني وبأبشع صوره.
قيس التفت عليه ماادري شفهم من كلامه بالحالتين اهانه لو لقيس لو إلى.
بيبي: قيس احسن منك وارجل منك هو يستاهلها مابيها شي اذا متزوج. واصلا هاي مرته ام لسان هم تنحسب مره طاح حظها لاخلقه ولا اخلاق بس صوج امك جلبت بيها.
اني ولاحجيت حرف ولانطقت معتمده على رفض قيس بالنهايه هو متزوج مستحيل يقبل يهدم زواجه علمودي اني طفله بالنسبه طفله بالتفكير رغم بيني وبينه فرق عمر 10 سنوات هم كلهم يعتبروني عاقله بس الزواج شي والحياه العاديه شي ثاني.
بعدين اصلا من يرجعون من الزياره ويعرفون بهالحجي ابرار تشرني عالحبل بلسانها وراح تصير معارك طاحنه بين بيبي وابرار وبين قيس وابرار وقيس راح يكون الضحيه بسببي.
قيس: ههه كلامج مو منطقي ويضحك هههه.
بيبي: احترم نفسك قيسان مو عبالك كبرت عليه ومااكدر عليك.
قيس سكت امي كامت صعدت معجبها الحجي اكيد وراحت تشوف اخواني فوك بحدهم.
زيد هم كذلك معجبه الحجي كام طلع ويدردم بصوت عالي: اخته شلون يتزوج اخته الله يقبل؟
بقينه كاعدين اني وقيس وبيبي.
بيبي: من تداومين تكولين مخطوبه لابن عمي.
قيس: اوكفي اوكفي شنو هو بس حجي.
بيبي: لا مو بس حجي. والله العظيم اغضب عليك اذا متقبل. اني اريدلكم الزين.
قيس: زينيش هههه زينيش هذا من كل عقلج؟
بيبي: تخاف من مرتك؟ كول تخاف من مرتك؟
قيس: يابه مااخاف منها ليش اخاف بس ممخلي ابالي اتزوج وحده ثانيه هي وحده ونسره متنجرع انوب اتزوج وحده ثانيه غير تتخبل وتخبلني وياها.
بيبي: هو لان نسره ومامرتاح وياها لازم تتزوج وبت عمك انت اوله بيها من الغريب ليش تروح لواحد غريب وانت تتزوج وحده غريبه. هالكيك من هالعجين انت مربيها وتعرفها منك وبيك.
قيس: ههههه على كيفج مو هيج اني مربيها صح مو داكولج اختي الزغيره بس متصدكين.
ضحكت اني على كيف.
بيبي التفتت خزرتني كالت: تأدبي الحجي مو وياج هسه بعدين دورج.
دارت على قيس كلتله: مرتك مدام ممتربايه زين ولسانها طويل ويستاهل الكص ومتحترم احد وممرتاح وياها وبس بنات خلفتها معناها لازم تتزوج وحده تريحك وتداريك ومؤدبه وعلى هواك وتستاهلك. ان شاءالله تجيبلك الولد إلى يشيل اسمك.
اني هنا ابتسمت خفت اضحك واترزل كتلها: بيبي تره جنس الطفل ولد لو بنيه مو من المره من الرجال المره بس حاضنه تعتبر ومصدر للغذاء.
التفتت علي كالت: انجبي اشوف. الرطن مالج هذا مال الجامعه مااريد اسمعه. وماافتهم منه شي.
ضحكت وقيس ضحك هي عصبت هالمره صدك وظلت تصيح علينه.
قيس: والحل شنو؟ انتي من تردين شي تسوينه يامسهله بس تره هالمره غلطانه شكول لابوي وامي شكول لابرار غير تتخبل وتكلب الدنيا ههه.