رواية نيشان للكاتبة روز الفياض الفصل السابع
بيبي: مدام شلت فكرت اختي الزغيره واختي الزغيره من راسك معناها امك وابوك يقبلون امك اصلا تكيف من تسمع بالسالفه تريدلك ولد بس تخاف تحجي علني خاف تزعل اختها. وابوك يكيف بت اخوه وين يلكه احسن منها. ومرتك يطبها مرض شتريد تسوي خل تسوي.
ردت الطف الجو وانطي حل سلمي مؤقت لكل الاطراف لان اعرف بيبي عنيده متتراجع عن كلامها وهالمره كلامها فاق كل التوقعات شلون اتزوج قيس هو اخوي التفتت على قيس بلكي يفهم الفلم ويسايرني ونقنعها بحل وسط: يعني خطوبه مؤقته لحد مااتخرج بس كدام الطلاب ومن اتخرج خلص يتنهي الموضوع اصلا فماله داعي عمي وعمتي وابرار يعرفون. قيس شدعوه عليك؟
قيس: هاا اي تمام.
بيبي: ومنين يجي الولد؟ شنو تردون تاخذوني على كد عقلي متستحون امكم الجبيره اني تحجون ويايه مثل الطفل عبالكم ماافتهم؟
كعدنه نتعذر ونبرر ونحاول نقنعها بس ماكو فايده بالاخير زعلت وطردتنه.
كام قيس كومني وصعدنه فوك يم امي.
خلصناها ضحك اني وقيس بس الموضوع محرج بليلتها امي منامت للصبح كلما افز الكاها كاعده انقهرت عليها.
محجينه بعد بالموضوع اصلا منزلت بعد حتى لااشوف زيد وره يومين داومت قيس كلي داومي هو وداني ودخل بالسياره جوه يم القسم سمحوله يدخل السياره من شافوا هويته مال الامن.
قبل لاننزل من السياره كلي: مريومه اذا سألوج عني ميخالف كولي خطيبي كولي ابن عمي جان حاجي عليه من الاول وهسه خطبني رسمي. مؤقتا على كولتج والله كريم.
هزيت راسي ان شاءالله.
نزلني قيس وسندني ودخلني للقسم وراح.
وكلها اجت تتحمدلي السلامه حتى الدكاتره وكلهم يسألوني شصار وليش وشلون وكل شويه احجي القصه لمجموعه شكل بس مكتلهم يردون وحده ابوها دكتور لان قيس محذرني.
بقيت ضايجه وكلبي ماكلني على ميس اخاف جانوا قاصديها هي.
وميس والبنات سألوني عن قيس بالبدايه اترددت اكول الحجي إلى اتفقنه عليه بس كتلهم خطيبي.
ميس: من شوكت لج؟ منين عرفتيه؟ شلون طحتي عليه؟ علواه انخطف حتى يخطبني هيج واحد مز. بس والحب وين صار؟
حصرتني البجيه ودمعت عيوني اتذكرت زيد وموقفه شكد كرهته كتلها: اسم الله الله ليكولها تنخطفين وهذا ابن عمي إلى احبه ويحبني هو هذا الحب.
ميس: الله عليج؟ يجنن لج هذا الشارب شنو الطول شنو من هيج منو يجي ترفضيه لخاطر هالبقلاوه ههههه.
ابتسمت كوه مخنوكه هي اقرب وحده إلى ومااكدر احجيلها لعد المن احجي واشتكي واطلع القهر إلى بكلبي.
كوه خلصت اليوم حسيته شطوله مقهوره ومحصوره بجيه كون ابجي لحدما اعمي عيوني ويمكن هم ماارتاح.
خصلنه محاضرات وبقيت كاعده منتظره قيس يجي ياخذني بس قيس يطول لان يطلع من الدوام ويروح للبيت يبدل ملابسه ويجي لابس مدني ميس كاعده يمي تحجيلي شلون خافت من شافتهم اخذوني وشلون ظاله تصرخ وبعدين شايله كتبي ودفاتري وداخله للامن مال الجامعه ظاله تصرخ بس طبعا فات الاوان.
واني صافنه عليها واسترجع الاحداث بعقلي واتذكر الرعب إلى عشته.
وصل قيس اتصل كتله اني بالقسم جوه لان طبعا مااكدر امشي بدون محد يسندني.
رادت ميس تروح بس لزمت بيها ردت قيس يشوفها حتى يعرف منو بت الدكتور إلى محتمل تكون هي المستهدفه.
اجه قيس شفته اشرتله اجه سلم وعرفتهم هو وميس على بعض وباركتله ميس على خطوبتنه الوهميه واتشكرت منها لان جابت كتبي ودفاتري وكاتبتلي المواد إلى فاتتني واترخصنه وطلعنه.
بس صعدنه بالسياره ضحكنه على شغلت خطيبي قيس بعدين كتله: هاي صديقتي إلى ابوها دكتور ومااعرف اذا اكو وحده ثانيه ابوها دكتور بس هي الوحيده إلى اعرفها اني ابوها دكتور.
قيس: اي اعرفها واحتمال جبير هي إلى يردوها بس راح ينتظرون اكيد فتره لحد ميهدأ الوضع وينسي الموضوع شويه.
رجعنه للبيت لكيت امي تنتظرني حتى تساعدني اصعد صعدنه اني وياها وبعدين نزلت هي لبيبي والولد نزلتلهم الغدا.
خلص هالاسبوع بملل وكآبه وبجي.
زيد مشفته بعد لا اني انزل ولاهو يصعد واني وقيس مستمرين بجذبتنه كدام الطلاب وامي حيل متضايقه وكاسره خاطري.
اليوم يرجعون الجماعه من ايران بس اني عندي امتحان مااكدر ابقى نورس تبقى ويه امي وبيبي تساعدهم واصلا اني ماافيدهم بشي مااكدر اتحرك براحه وسرعه.
داومت وامتحنت وخلصت محاضراتي واخر محاضره مااجه الاستاذ فاتصلت بقيس اذا يكدر يجي ياخذني فكلي: هلو مريومه مشغول شويه راح ادزلج زيد اوكي؟
من كلي زيد ضجت كتله: لا زيد لا خلص راح اتصل بأمي تجي تاخذني او ارجع ويه البنات.
قيس: لا لاماكو ويه البنات بعد وعمتي شيجيبها من البيت للكليه بهالظهريه بالحر والشمس.
سكت شويه بعدين كال: خلص انتظريني اني اجيج.
ظليت كاعده وحدي ميس راحت كلت فرصه ابجي براحتي بجيت وريحت كلبي.
وره تقريبا ساعتين يالله اجه قيس متت من الكعده وحدي.
قيس: هلو شلونج خوما تأخرت عليج هوايه؟
مريم: عادي مو مشكله بس ضجت لان وحدي ميس طلعت.
صعدنه بالسياره كتله: الجماعه وصلوا لو بعدهم؟
قيس: اي وصلوا من الصبح لهسه يمكن 5 مرات اتصلت ابرار وينك وينك ليش مااجيت وين انت شوكت تجي دوختني.
مريم: هههه الله يعينك يالله ميخالف تره كلهم المتزوجين نفس القصص ههه.