رواية نيشان للكاتبة روز الفياض الفصل السادس والثلاثون
قيس: زين مدام مابينه فلوس ومابينه حسابات ليش رجعتي الفلوس؟
مريم: اني متأخره هسه مو وكته غير وكت نحجي ان شاءالله.
مشيت خطوتين كال: ماكو غير وكت بعد.
انبهتت روحي من حجايته كتله بدون ماادور: كيفك قيسان كيفك.
طلعت لكيت ميس واخوها منتظريني صعدت ورحنه وهو طلع ورانه يباوع اخذت الطريق كله امسح دموع بسكوت.
بيومها مرجعت للبيت الظهر ميس جلبت اروح وياها للبيت نتغدا سوا.
خلصتها بجي وميس تلح اخر شي قررت احجيلها كل الحقيقه.
من حجيتلها ظلت تباوعلي مصدومه كلتلي: هذا كله صار وياج ومحجيتيلي؟ شلون اتحملتي وحدج؟ لج شلون اصلا تتزوجين هيج من الاول وين اكو هيج زواج بعد؟
مريم: ليش إلى يردون يسترون عليها شيسوولها؟
هاي حالي حال اي وحده تنخطف واهلها يخافون من الفضيحه لو رجعت سالمه. المشكله اني حبيته صدك من كل كلبي.
ميس: اكيد تحبيه زوجج وعلى موقفه هذا اني حبيته مو بس انتي??.
مريم: بدينه باكلان التبن??.
العصر رحنه للعياده وبدينه نشتغل شويه ودخلت الموظفه مال الريسبشن كالت: دكتوره زوجج بره اخلي يدخل؟
ظليت صافنه بعدين كتلها: لا وين يدخل عندي شغل.
اترخصت من المريضه وطلعتله لكيته كاعد ويكلب بالتليفون وصلت يمه رفع راسه باوعلي كلي: ها خلصتي؟
مريم: لا ليش؟ شكو؟ صاير شي؟
قيس: لا
مريم: لعد ليش اجيت؟ علاوي بي شي؟
قيس: لا ماكو شي شبيج اجيت اخذج للبيت.
مريم: ليش؟ شكو؟ ابني بي شي؟
قيس: لج بابا ماكو شي شبيج واحد واجه ياخذ مرته شنو الغريب؟ مو جنت اني اجيبج وارجعج قبل؟
رجعت اخلص شغلي وبالي يمه بعدين طلعت لكيته يحجي بالتليفون بقيت واكفه انتظره يخلص ميس طلعت من غرفتها باوعتلي باستفسار رفعت جتفي مااعرف.
قيس: اي هي هاي البيضا الحلوه. حلوه مو؟
اني شدني كلامه منو هاي البيضا.
قيس: اي والله عجبتني حيل خوش وحده. شرايك اخذها؟
باوعتله شنو هالحجي عينك عينك ولاجني واكفه واسمعه.
قيس: اي والله ياريت جسلي النبض اذا بيها مجال اريدها. إلى بعد المن؟ تستاهل دخلت كلبي اول ماشفتها عجبتني.
انقهرت هاي بعدنه مااتطلكنه وهو يدور عروس ماعرفتك قيسان مو انت يمكن لو مرجع ابرار ومطلكني مااضوج ولاانقهر عالاقل ام بناتك.
خلص وطلعنه اخذنه تكسي وصلنه للبيت الطريق جبته صفنات من نزلنه كلي: الصبح تنتظريني اني اوصلج مترحين مره ثانيه ويه اخو ميس.
مريم: متسوه كلها كم يوم واحصل سياره.
قيس: سمعي الحجي وماله داعي العناد.
مريم: زين هسه توصلني وبعدين منو يوصلني؟
قيس: روحي صعدي لابنج هسه.
انقهرت وضجت وطكت روحي كتله بعصبيه: لتكول ابنج كل كلمه والثانيه وكلت ابنج عبالك ابني من غير رجال.
محسيت الا??.
بقيت واكفه ومصدومه ممستوعبه قيس مد ايده عليه.
قيس: من شوكت تعلين صوتج علي؟
مجاوبت لان فعلا عليت صوتي وعصبت لاول مره طول عمره من يصير عصبي نبقى ساكتين اني ونورس وعمره مامد ايده على وحده بينه.
ظلت دموعي مثل الخرز تنزل.
قيس: ومره ثانيه اذا سمعت منج هالجمله متلومين الا نفسج.
دخل للبيت وبقيت اني واكفه بمكاني ابجي.
صعدت للبيت احس روحي رايحه مني اتمنيت اشرد من البيت كله لكيت بيبي يم امي شافتني ابجي اشرت لامي اني هم سلمت ودخلت للغرفه وسديت الباب مالي خلك بعد احجي واتوسل.
دخلت امي وراي تريد تعرف شكو حجت سألت مجاوبتها كتلها تعبانه ومالي خلك.
بدلت ملابسي ونمت يم علاوي اباوعله مبتسم وهو نايم فكرت ليش من نكبر تتغير حياتنه ومنبقى بنفس البراءه والبساطه واكبر همومنه اكلنه والعابنه.
مو جنه نتزاعل ونتعارك ونرجع ثاني يوم نلعب سوا مو جان ماكو شي اسمه كرامه بيناتنه ولا كبرياء.
ليش من كبرنه اتغيرنه؟
وره ايام...
نورس: اكول زيد يريد يحجي وياج يكول اتصل بيها متجاوب.
مريم: شيريد خ، كل اللي صار من جوه راسه مكفاه إلى صار؟
نورس: تره الولد ماله ذنب ناسي الرساله محاذفها شيسوي يعني بعدين تره اصلا الرساله عاديه مابيها اي شي بس قيساان مصخها.
باوعتلها بطرف عيني كتله: عندج عاديه بس هي مو عاديه.
نورس: اصلا يكول هاي سوالف قديمه واني نسيت وعايش حياتي واتعرفت على بنيه واريد ارجع اخطب واتزوج.
مريم: عكبيش.
نورس: ليصير كلبج اسود.
مريم: تسكتين مني لا قسم بالله اطلع كل القهر إلى بكلبي بيج. ليصير كلبي اسود راح نتطلك تفتهمين شنو يعني نتطلك بسببه وانتي جايتني ليصير كلبج اسود؟
الايام البعدها قيس اشترى سياره ظل يوصلني ويرجعني بس كلمه وحده منحجي سوا ماادري ليش يوصلني واحنه منتحاجه بس مااكدر اعترض.
بعدها اجتنه فرصه نسافر لقطر لمؤتمر طبي اني وميس ويه ابوها.
فرحت اول مره بحياتي راح اسافر وسفره تخص مستقبلي رجعت للبيت فرحانه حجيت لامي هم فرحت: اي شكو بيها خلي علاوي عندي وروحي المهم تستفادين. بس كلي لرجلج.
مريم: ان شاءالله??.
ظليت محتاره شلون اكوله نزلت بالليل اكوله واخذ الاوراق حتى اسوي جواز.
نزلت مجان موجود بالغرفه كعدت ادور الاوراق الرسميه ودخل هو.
بدل ملابسه وراد يطلع كتله: قيس اريد احجي وياك.
قيس: من ارجع هسه مستعجل.
مريم: شوكت من ترجع؟ هي5دقايق.
قيس: شكو؟
مريم: اني وميس عدنه سفره لمؤتمر طبي بقطر.
سكت ظل يباوعلي: اوكي.
وطلع لاسألني شلون شوكت ويامن شكد تبقون ولاسؤال.
صح فرحت لان قبل بس ضجت اكثر من لامبالاته.
ثاني يوم الصبح كلت لامي كليله مااداوم.
من طلع اخذت امي ورحت سويت جواز.
للظهر يالله خلصنه دخلنه بدخلته سلمت امي واني فتت وراها.
قيس: مريم؟
التفتت كتله: نعم؟
قيس: وين جنتي؟
مريم: بالجوازات.
قيس: شتسوين بالجوازات؟
مريم: اسوي جواز.
قيس: ليش؟