رواية نيشان للكاتبة روز الفياض الفصل الرابع والعشرون
مريم: تره اني يمكم واسمعكم مو طرشه.
نورس: عادي حبي ليس على المجنون حرج.
امي: ??
مريم: بالقران بعد ماابقى هنا الا انزل لغرفتي هسه.
امي: اوكفي اوكفي لج تعاي.
نورس: هاي صدك نص عقل باقي براسها نزلت روحي شوفيها لتروح توكع من الدرج بهاالليل.
امي: اتصلي على عمج يفتحلها الباب.
عفتهم ونزلت دكيت الباب جوه ماكو جواب يمكن نايمين ظليت كاعده بالحديقه صدك بارده بس الهدوء حلو ومريح.
شويه وانفتح الباب عمي طلع شافني كاعده.
عمي: ها بابا شبيج شعندج بهالليل كاعده هنا؟
مريم: لاعمو ماكو شي بس مخنوكه ومااكدر انام.
عمي: خير بنيتي شبيج قيس بي شي؟ حجه وياج اتصل عليج؟
مريم: ماكو شي عمو الحمدلله قبل ساعه يمكن حجيت وياه كل شي تمام.
عمي: الحمدلله. تعالي دخلي بابا لتستبردين.
دخلت رحت لغرفتي اتمددت ونمت.
فكرت شلون إلى يتعرضون للاغتصاب يجبروهم يتزوجون الشخص إلى اتزوجهم هذا عقاب ودمار الحمدلله على حظي الف الحمدلله والشكر.
جنت احسب الايام يوم يوم وساعه ساعه ولحظه لحظه واول ليله جانت اقسى واوحش واظلم ليله حسيتها مثل ليلة الوحشه اول ليله بالكبر من يحتاج الميت صلاة الوحشه حتى ميحس بالوحشه وحده بس اني بقيت بوحشتي.
ماكو صلاة وحشة للعدلين؟
ظليت بالوحشه 14 يوم حتى الميت ميحس بهلكد وحشه وماكو احد ممكن يونسني لو يرد عني الوحشه غيره.
على ماخلصت ال14 يوم كلبي خلص.
اخر يوم مداومت واخذت الاسبوع الجاي كله اجازه اريد ابقى بالبيت وياه بلكي ارتاح.
ثاني يوم الصبح صعدت لنورس: عوبه فهيمه تعاي فهميني شسوي من يجي؟
نورس: ??شكو؟ منو؟
مريم: امي.
نورس: قصدج الحب؟ ??يمعوده لتعبين نفسج وتسوين شي هو هسه يجي طاير لو شما يكون شكلج هو عنده حلو ويخبل صدكيني.
مريم: هيج رأيج؟ اي صح واصلا مالي خلك اريده بس يجي مو مهم شيكول راح اموت.
نورس: خلص بالطريق هو هسه بس صبري كم ساعه ويوصل ان شاءالله.
مريم: ياريت بهالبساطه??.
نورس: ليش شكو؟
مريم: مااصدك وماارتاح لحدما يدخلون بغداد حتى الطريق خطر.
نورس: الله كريم حبيبتي هم بس يطلعون من الموصل خلص زال الخطر ان شاءالله.
مريم: لا مو هيج وحتى لو هيج عقلي شسويله تفكيري كله مأساوي افكار ارهابيه تجي براسي??.
نورس: اي حقج طبعا اتعودتي واتعلمتي مصطلحات وخطط واجراءات كلها عسكريه وامنيه من زوجج??.
مريم: شتشوفينه يحبني؟
نورس: لا طبعا شيحب بيج بس اتزوجج حتى تصلحين اسنانه??.
مريم: بطرانه انتي تضحكين اني مفارغتلج هسه مالي خلكج بس خل ارتاح وافرغلج صدكيني ليجيج كف من حيث لاتعلم ولاتحتسب بس اصبريلي.
نورس: ??
رجعت نزلت نرفزتني هالقزمه.
انزل وادردم وماحسيت الا زلكت ووكعت عالدرج كعدت بمكاني يعني مو وكعه من الدرج ليجوه لا زلكت وكعدت بمكاني حيل وصرخت.
كلها طلعت تركض امي ونورس واخواني وبيبي وعمي ومرت عمي وليث جان عدنه كلهم اجوي.
امي ظلت تصرخ ومرت عمي تصيح وبيبي عوزها بس تشك الدشداشه.
وكلهم خايفين ويصيحون: الله الله اسم الله كوموها كوموها يوجعج شي تعورتي شوكعج...
مريم: ??.
بيبي: يمه البنيه مدري شبيها متحجي كوموها للمستشفى خاف الولد صار بي شي عضت لسانها اكيد متحجي عضت لسانها.
يجروني ويكوموني ويمسحون على ظهري وينزلوني على كيف ويصيحون ومقهورين وخايفين.
نورس: كله مني اني ضوجتها وخليتها تصير عصبيه وتنزل??.
امي: ????الف مره كلتلج اختج حامل متتحمل سوالفج عوفيها بحالها هي مقهوره على زوجها وانتي تدوسين ابطنها.
بيبي: اي حيل حيل ضربيها هالمتستحي.
مريم: تره اني زينه مابيه شي على كيفكم انطوني مجال احجي حتى اكوللكم ماكو شي بس زلكت رجلي وكعدت بمكاني يعني ماوكعت من الدرج.
عمي: يعني ماكو شي يأذيج بابا؟
مرت عمي: لا لاشتسألها متعرف شعرفها هي هذا اول طفل متفتهم خل نروح للمستشفى.
امي: اي صحيح كلامج ام قيس خيه نوديها للمستشفى احسن.
ليث: يالله معناها لبسوها ولبسوا اني انتظركم بالسياره.
بيبي: اي احسن المستشفى احسن.
مريم: عجيب والله مابيه شي بس رجلي يمكن انجرحت دتأذيني.
حاولت بالطيب بالغصب مقبلوا الا نروح للمستشفى.
لبسنه ورحنه طول الوقت بالي بالبيت خاف يجي قيس واني بعدني هنا ويروح من الوقت.
المفروض هذا الوقت مينحسب، وقت مستقطع يحسبوه مثل المباريات من ارجع يالله يرجع العداد يشتغل.
اخذولي اشعه لظهري ورجلي وامي ومرت عمي كلبوا الدنيا الا ادخل للدكتوره وتسويلي سونار خاف الولد بي شي قبل لاادخل للسونار دك تليفون ليث قيس اتصل وصل للبيت وعمي وبيبي حاجينله انو احنه بالمستشفى لان اني وكعت.
طمنه ليث وكله ماكو شي ان شاءالله وفد ساعه ونجي.
من عرفت بي وصل يمه مي بارد وكع على كلبي مقبلت ادخل للسونار مستعجله اريد ارجع للبيت بس العصابه الوياي مقبلوا امي ومرت عمي ظلوا يحجون دخلت كوه على اعصابي.
لكيت بنيه جوه بعدها ممخلصه انتظرت خلصت بعدين اني فحصت وشرحتلي وضع الطفل كتلها اني وكعت من الدرج وهالحجي فطمنتني ماكو شي الحمدلله والطفل ديتحرك وكل شي تمام وسمعتني النبض.
خلصت رجعت للدكتوره نفس الحجي بس كلتلي اذا حسيتي بالم او نزل عليج شي تعالي بسرعه.