رواية نيشان للكاتبة روز الفياض الفصل الخامس والعشرون
طلعت انوب رحنه للممرضه ضمدت رجلي لان مجروحه ويطلع منها دم حسيت ضغطي كولش ارتفع من العصبيه اني اريد بس ارجع وهمه كل دقيقه يطلعولي شغله.
بعدني احجي ويه الممرضه وسمعت صوته سلم دخل للغرفه.
كلبي يمه كلبي من الفرحه ماادري شبي مااكدر اوصف شعوري بس يشبه من واحد يصعد بلعبه بمدينة الالعاب والعبه تكون عاليه ومن تصعد لو تنزل ينخمش كلبه هيج اني جنت بلحظتها كلبي انخمش??.
راسأ اجه يمي باس راسي اني حضنته وبجيت هو ضحك خله ايده وره ظهري محاجاني يحجي ويه امه وامي يسألهم شصار؟ وشكالت الدكتوره؟
الممرضه سألتني: هذا زوجج؟
مريم: اي زوجي??
الممرضه: ياا خطيه ميدري بيج واكعه؟
مريم: لا ميدري توه راجع من الموصل.
الممرضه: جان بالموصل؟ شنو بالجيش لو بالحشد؟
مريم: لا بالامن بس يداوم بالموصل وميدري اني هنا رجع وملكاني بالبيت واجه ورانه لهنا.
الممرضه: يااعيني شكد حلو الله يخليكم لبعض ياربي شلون حلو اجه وراج ماانطاه كلبه فدوه يحبج. متزوجين عن حب؟
باوعت لقيس يحجي ويه ليث لزمت ايده.
مريم: قيسان؟
متلهي يحجي وياهم جريت ايده: قيساان؟
قيس: نعم؟
مريم: احنه متزوجين عن حب؟
قيس: ها؟ ليش؟
مريم: البنيه دتسأل.
قيس: اي طبعا عن حب شلون مو عن حب غير بت عمي.
دنك باس راسي وضحك.
الممرضه: الله يسعدكم شكد حلو شكلكم اكيد هذا اول طفل؟
قيس: اول طفل.
الممرضه: مبين يالله ان شاءالله تكومين بالسلامه.
اني وقيس: الله يسلمج تسلمين.
رجعنه للبيت طول الطريق اني عيني عليه هو كاعد كدام واني وامه وامي وره.
ماادري من لزمني ونزلني شصار بيه تمنيت احضنه بالشارع.
دخلت للبيت عبالك داخله للجنه مو للبيت على كدما مشتاقه احضنه واحجي وياه براحتي.
ياياااابه شكد مشتاقتله دخلوا كلهم وكعدنه بالديوانيه كعد هو وحضن امه منا وبيبي منا رحت اني كعدت يم عمي فرحانه بس حسيت اغار حتى من امه ومن بيبي كافي هلكد حضن مصخها اني هم إلى حصه هم اريد حصتي.
عمي عبالك قرأ افكاري حضني اني هم حضنته قيس يباوعلي ويسولف ويه ليث وامي.
كام حتى يبدل ويغسل كمت ركض وراه دخل للغرفه استحيت ادخل بس منيلي كلب اصبر فتحت الباب ودخلت لكيته واكف منتظرني بس دخلت حضني.
اني طاحت دموعي بقى حاضني واني حاضنته ودموعي تصب بعدين باس كصتي كعدت وكعد يمي.
استحي اباوعله لزمت ايده بستها وحضنته ضحك كال: لج على كيفج انطيني مجال اني احضنج ابوسج هههههه.
مريم: لاعفيه قيسان بس احضني لتحجي اي شي مصدكت ترجع ??
غمضت عيوني من حضني ودموعي شلال.
قيس: مريومتي شبيج؟
هزيت راسي ماكو شي.
قيس: حبيبتي ليش تبجين؟ شكو؟
مريم: اشتاقيتلك??
قيس: بس؟
مريم: عفيه بعد لتروح.
بقى حاضني هو ساكت واني ساكته بس دموعي تحجي.
بعدين كلي: تعورتي من وكعتي؟
هزيت راسي لا ومسحت دموعي.
قيس: رجلج تأذت؟
هزيت راسي لا
قيس: علاوي تأذه؟
ضحكت كتله: انت كول خايف على علاوي.
قيس: هههه لا والله موقصدي بعدين حتى لوخايف عليه شبيها هاي؟ تزعلين يعني متقبلين؟
مريم: لا بس اضوج تره لاعبالك ابنك اهم مني.
قيس: هيج يعني؟
مريم: عندك اعتراض؟
قيس: اتجرأ اني اعترض؟ طبعا مو اهم منج انتي ام علاوي حبيبة كلبي مريومتي.
مريم: اي عفيه بالحباب.
قيس: زين ليش عصبيه؟
مريم: منو اني؟
قيس: كلهم يكولون هالايام عصبيه وتضوج بسرعه من اقل شي وتبجي. شكو؟ همم؟
اتنهدت وظليت ساكته.
قيس: مريوم علمودي ضايجه وتبجين؟
طاحت دموعي هزيت راسي اي.
باس راسي كلي: لتضوجين حبيبتي ولتعصبين مو زين عليج ولا على عليوي.
ضحكت كال: إلى يضوجج بس كوليلي عليه واني اخذه للموصل واذبه هناك.
مريم: اسم الله لتجيب هالطاري فدوه.
قيس: هههه صايره بيج خوفه.
اندك الباب دخلت مرت عمي: شنو مناوين اتطلعون من الغرفه اليوم كوموا اتغدوا كوم يمه غسل وبدل وانتي عمه كومي اتغدي انتي اليوم تعبتي وتعورتي.
مريم: مابيه شي عمه الحمدلله ليظل بالج.
مرت عمي: ميخالف كومي اتغدي هاي زوجج رجع مالج حجه بعد متشتهين الاكل.
باوعلي قيس كال: هااا متاكل؟ بعد بعد كولي يمه شمسويه وراي غير سالفة الاكل؟
مرت عمي: خير من الله انت بس غسل واتغده واني احجيلك.
مريم: هههههه.
قيس: شمسويه هههه؟
مريم: كوم غسل وبدل حبيبي وبعدين اعترفلك.
راح سبح وبدل وكعدنه اتغدينه وكعدنه نسولف هو يسولف عالوضع واني ومرت عمي وبيبي كل شويه ننهبط ونبجي من نسمع احد وياهم استشهد.
بالليل من دخلنه للغرفه كتله: قيساان متت وراك والله.
قيس: اسم الله عليج ماكو شي لتخافين المكان إلى احنه بي زين اقل خطوره من باقي الاماكن.
مريم: اقل خطوره بس مو معناه ماكو بي خطوره اني يوميه اموت الف موته من تسد التليفون وياي لحدما ترجع تتصل والليل ماادري شلون اخلصه من التفكير والله اجيت اموت والله??.
حضني وباسني: الله لايحرمني منج ولايحرمج مني ان شاءالله. كل شي بيد الله لتفكرين حبيبتي التفكير يتعبج وليقدم وليأخر بس تأذين نفسج.
مريم: الحجي سهل.
قيس: لا مو سهل لان اني هم معاجبني اروح واشتاقلج وهم مشلوع كلبي مثلج واكثر منج بعد بس شسوي هذا قدري.
مريم: يعني شنو هذا قدري??؟
قيس: يعني قسمتي السوده.