رواية نيشان للكاتبة روز الفياض الفصل الرابع والثلاثون
كعد عالكرسي كبالي رغم مديتله ايدي حتى يكعد يمي.
قيس: لا هنا اريح.
دموعي متجمعه كل تصرف وكل نظره وكل حركه وكل رمشه منه جنت اراقبها بدقه حتى افسرها.
قيس: شلونج؟
ابتسمت بالكوه حتى ماباسني ولا سلم علي بالايد راسا كعد.
مريم: الحمدلله مدام انت زين اني بخير.
قيس: ليش هيجي ضغطج مينزل؟
مريم: شسوي.
قيس: مو زين عليج وعلى ابنج.
عاد هنا طاحت دمعتي من كلي ابنج.
سكتت مااعرف شنو احجي ضاع الحجي ظلت بس الدموع.
قيس: شوكت عمليتج؟
مريم: عكب باجر ان شاءالله.
قيس: ان شاءالله.
مريم: قيسان؟
التفت علي كلي: نعم؟
مريم: شبيك ضايج ومالك خلك؟
قيس: تعباان.
مريم: بس؟
اتنهد ودنك بعدين باوعلي كلي: مريم لتفكرين بشي هسه اهم شي صحتج وصحت ابنج.
هالمره اختنكت من حجايته حسيت عبالك واحد لازمني من بلعومي ويضغط عليه بكل قوته.
مجاوبته بقيت اباوعله وبقى كاعد شويه بس ساكت ومدنك واني ساكته بعدين كام اتدنه يمي باس راسي وراح.
واني بديت المناحه وراه من طلع لحدما حسيت راسي راح ينفجر.
امي جانت بالبيت تجيب احتياجات الولاده شويه واجت ومن شافتني لازمه راسي اتخبلت تروح وتجي بالمستشفى تدور عالدكتوره.
قاسوا ضغطي مرتفع حيل راسأ ركبولي مغذي بكل ايد.
اتصلت امي بمرت عمي واجت مرت عمي تركض هي وعمي.
بقوا يمي لليل لحدما نمت خلصتها بجي.
حسيت نفسي ثكل على كلبه وورطه طول عمره جانت مبتلي بيه بس هسه كبرت واكدر اعتمد على نفسي ماله داعي ابقى حمل عليه هذا اخر قرار.
ثاني يوم كلهم اجوني للمستشفى من عرفوا حتى هو لان قدموا موعد عمليتي مدام ضغطي انخفض شويه واستقر خاف يرجع يرتفع ومو زين علي ولا على ابني على كولته.
قبل ليدخلوني للولاده امي وبيبي ومرت عمي سووها مناحه بالبجي لحدما هو عاط بيهم يالله هدأوا.
كعد يمي وظل لازم ايدي كلي: لتخافين سهله ان شاءالله.
جنت محتاجه يحضني لو بس دقيقه حتى احس بالامان والراحه بس ماادري شبي ومااريد اضغط عليه اذا عدت العلميه سلامات ان شاءالله ذيج الساعه احجي هسه مو وكته بس بقيت افكر خاف اموت وهو هيج ضايج مني واريده يحضني مره اخيره خاف اشتاقله.
دخلوني لغرفة العمليات وظلت عيني عليه لحدما دخلت ردت اشبع منه شوف خاف مااشوفه بعد.
من كعدت وره العمليه سألت عنه كالت مرت عمي رجع للبيت تعب من الوكفه رجله ظلت تأذيه.
بقيت يومين بالمستشفى لان علاوي بالخدج جان شارب مي من الرحم.
وبس طلعوه واتطمنوا عليه طلعنه للبيت هو جان ويانه بس حسيته بارد رغم جان شايل علاوي بيده ويباوعله ومبتسم.
من وصلنه رادوا يدخلوني لغرفتي كتلهم لا اصعد يم امي حتى تهتم بيه وتسهر ويايه وويه علاوي مااعترض.
وبيت عمي كلولي براحتج.
صعدت وصعدت ويايه بيبي بقت ويايه كم يوم الا تنام يمي خطيه.
جانت امي تنزل علاوي لقيس جوه حتى يشوفه هو ميكدر يصعد.
بس جان يتصل يسأل اذا محتاجين شي.
خلصت الاربعين يوم كوه ردتها بس تخلص.
نزلت جوه لغرفتي هو بعده ينام بالديوانيه.
يجي مرات يمنه بالغرفه من يسمع علاوي يبجي رغم بيبي ممقصره متعجبه بابن قيس عبالك اول حفيد.
الى ان مره اجه واني جنت كاعده اصور علاوي وهو نايم.
دخل سلم وكعد عالجربايه وظل يباوع لعلاوي ومبتسم.
مريم: شلون صرت؟
قيس: الحمدلله احسن.
مريم: الحمدلله.
سكتت شويه ردت احجي بس ماادري شلون ابدي وشحجي وشكول اخر شي كتله: انت ليش تنام بالديوانيه؟
قيس: احسن.
مريم: احسن لمنو؟ احسن لو متريد تكعد يمي لو تنام يمي؟
قيس: يعني شنو مااريد اكعد يمج؟
مريم: يعني متريدني قيس انت متريدني.
حسيت كلبي انسلب مني بهالحجايه.
باوعلي كلي: ليش تكولين هيج؟
مريم: مو اني إلى اكول تصرفاتك إلى تكول. كل تصرفاتك مالها غير هالتفسير. محجه شي ظليت منتظره يكول شي ماكو اخر شي كتله: طلكني.
باوعلي هو وحواجبه معكوده كلي: نامي نامي.
كام يريد يطلع كتله: اوكف حاجيني لتروح.
طلع وطبك الباب.
بقينه على هالحاله شهر حتى الغرفه ظل ميدخللها.
اني ظليت بس العصر اداوم بالعياده مجازه من المستشفى.
جنت مأجره سياره توديني وتجيبني رجعت بالليل نزلت من السياره شفته واكف بالباب دخلت للحديقه صاح وراي كلي: تأخرتي؟
مريم: ماتأخرت نفس موعدي يوميه.
قيس: زيد اجه اليوم.
مريم: هلا بي.
قيس: بس؟
مريم: شنو بس؟ شتريد اكول هلا بي الحمدلله على سلامته. شنو المفروض اكول؟
قيس: فوتي فوتي.
مريم: يعني انت منتظرني بره حتى تكلي زيد اجه؟ زين واني شكو؟ شسويله مثلا؟
قيس: فوووتي مريم.
مريم: ماافوت قيس شبيك متفهمني اشو تتحجج هسه درينه متريدني اوكي موافقه وكتلك طلكني. طلكني يااخي شجابرك بعد اهلي واهلك؟ مو مهم اهم شي واحد يحط راسه وينام مرتاح مو مهم الناس. وشتريد تحجي عني كدامهم احجي مراح ادفع عن نفسي. بس اريد اعرف شبيك؟ ليش؟ ليش هيجي فجأه تغيرت. لاراح اتوسل بيك ولا اجلب بيك بس اريد اعرف.
دار وجهه محجه شي درت وجهي اروح لزم ايدي كلي: زيد يحبج.
حسيت الدم نشف بعروكي.
التفتت عليه كتله: شنوو؟
قيس: تعرفين لو لا؟
مريم: منين جبت هالحجي؟ منو كلك؟
قيس: تعرفييين لوو لاااا؟