رواية نيشان للكاتبة روز الفياض الفصل الخامس والثلاثون
مريم: اعرف لو مااعرف شيهمك؟ شيفرق عندك؟ اني شكو اصلا اذا هو يحبني؟ اني متزوجه ومتزوجه اخوه تعرف يعني شنو؟
شفت مني شي معجبك؟ شفت مني تصرف بي قلة احترام الك او لوجودك ويه زيد لو ويه غيره؟ اني من لبست حلقتك صرت انت حبيبي وزوجي وخطيبي وابن عمي وابوي وكل شي. انت اهم شي بحياتي قيس اهم حتى من اهلي.
قيس: لج شلون شيهمني وشيفرق عندي؟ اخوي الزغير يحب مرتي شلون ترديني اتصرف؟
حاولت اهدأ مااريد ابين متوتره شهالمصيبه ياربي منين عرف بس لا زيد الحقير حاجيله.
مريم: منو كلك هالحجي؟
قيس: جاوبي تعرفين لو لا؟
عصر ايدي بكل قوته اذاني كتله: اي اعرف.
قيس: وليش ماكلتي؟
طاحت دموعي: واحد يحبني شسويله اني؟
بقى واكف يباوعلي ولازم ايدي حيل.
بعدين عاف ايدي ودار طلع بره.
دخلت اني للغرفه وبقيت بالغرفه اروح وارجع مثل المخبله مااعرف شسوي ولا المن احجي.
هو ماادري وينه بقيت كاعده منتظره لحدما صارت الساعه ب12رجع للبيت كلهم نايمين واني كاعده اغير لعلاوي.
دخل للغرفه وسد الباب بقى واكف يباوعلي محاجيته كال: من سافرنه للهند نسى تليفونه يمي وطلع ودك اكثر من مره بعدين فتحته وبدافع الفضول فتحت الرسائل ولكيت اكو رساله بينه وبين نورس قديمه.
باوعتله كتله: ومضمونها؟
قيس: مااعرف الحجي ناقص الظاهر هو ماسح الرسائل بس ناسي يمسح هاي الرساله.
طلع تليفونه وراواني الرساله من نورس كاتبتله( عوفهم زيد قيس يحبها وهي تحبه لتخرب حياتهم وانت هم عيش حياتك).
ارتاحيت من قريتها الحمدلله مابيها شي كتله: وليش مسألته؟ ليش تسألني؟
قيس: يعني اروح اسأله تحب مرتي لو لا؟
مريم: متكدر تسأله صعب وعيب بس تسألني عادي ماعندي احساس اني.
قيس: لتخبليني.
مريم: كافي قيس شلعت كلبي منين مااجيك ميعجبك شتريد مني اعرف بيك متريدني خلص طلكني وارتاح انت واخوك لتظل محتار وشارد من الغرفه صارلك شهرين عبالك بيه جرب.
ظل هو كاعد وساكت واني هم لحدما طلع الصبح احنه على كعدتنه بعدين كال: وهسه؟
باوعتله متعجبه كتله: شتريد؟ يعني شنو وهسه؟ هاا خلص فهمت.
اخذت ابني وصعدت لاهلي فوك.
منا للعصر شافوني منزلت جوه اتصلت بيبي تسأل تريد علاوي كتلها ماانزل خلص اني وقيس راح نتطلك.
وهي كبت العيطه والهوسه فوك وجوه.
بيبي اتخربطت وامي هم اتخربطت.
وكلها تسأل شكو وشبيكم وشصار وليش واني ماعندي جواب بس كتلهم مااريده ولا يريدني.
المهم عدت كم يوم بيبي اتحسن وضعها بس متحجي وياي ابد.
ومرت عمي نفس الشي والولد و عمي ميحجون ساكتين وقيس هم ساكت اكيد همه سألوه والله اعلم شجاوبهم.
امي موتتني على كدما تسأل وتستفسر وتلح ليش وشلون وشصاير بينكم وشسوالج؟
مر شهر وكلهم على وضعهم إلى ميحجي وياي والي حاكرني والي احسه مطايقني جنت انزل على اعصابي حتى اشوف بيبي واتطمن عليها رغم متلكيني وجه ولاتحاجيني بس مينطيني كلبي.
كطعت اجازتي وداومت الصبح بالمستشفى اريد بس اخلص من نظراتهم ولومهم.
حتى ميس متخليني تركض وراي تريد تعرف ليش.
مريم: خلص بعد وصلنه طريق مسدود.
ميس: اعرف بس شلون شصار؟
مريم: مصار اي شي متشوفينه شلون من رجع لحد الان مطايقني اكثر من هيج شنو تردين يصير؟
ميس: مريم تره كل المتزوجين يمرون بفترات برود. بعدين هاي اول مشكله تصير بينكم معقوله حب سنين يروح باول مشكله؟
مريم: لج كتله بصريح العباره انت متريدني طلكني لااعترض ولاحجه.
ميس: صبري عليه شويه مريم اعتقد هو بعده مصدوم من إلى صار وياه وشاف اصدقائه إلى وياه اغلبهم ماتوا تره كولها الها تأثيرات على نفسيته وهو نفسه كوه طلع من الموت. شنو هذا كل ماله حوبه؟
جنت اتجنب شوفته رغم شكد مشتاقتله بس مااريد احسسه بهالشي ادري بي مو مثلي مو مشتاقلي ولامتلهف لشوفتي.
ادري وصل لمرحله حس انو بناته اوله بناته اهم وعاذرته طول عمره شايل همنه هسه كافي يريد يرتاح حقه.
ومنا موضوع زيد لامن خيره ولامن كفاية شره.
زيد عرف واتصل بيه اكثر من مره مجاوبته ودزلي مسجات وهم مجاوبته.
اتصل على نورس يريد يعرف سبب المشكله واجت نورس سألتني حجيتلها بس كتلها متحجين لاحد بس طبعا حجتله لزيد.
وره تقريبا اسبوعين اني طالعه الصبح للدوام السايق مااجه مرت علي ميس واخوها وصلوني وياهم للمستشفى قيس جان هم ديطلع نزلوا ميس واخوها سلموا عليه ورحنه.
ثاني يوم نفس الشي بهالاثناء اني حاولت ادبر فلوس سيارته إلى انطانياهم حتى اشارك ميس بالعياده.
من رجعت بالليل انطيتهم لامي كتلها من تشوفيه وحده انطيهم اله. وفعلا امي انطتهم اله.
ثاني يوم الصبح واني نازله شفته جوه بالحديقه واكف سلمت وفتت مااكدر مااسلم عليه مو اي واحد هو.
قيس: اوكفي.
وكفت ودرت عليه باوعتله كلي: منين جبتي هاي الفلوس؟
مريم: يافلوس؟
قيس: إلى دزيتيهم بيد عمتي مال السياره.
مريم: فلوسك غير.
قيس: منين جبتيهم؟
مريم: عندي نعمه الحمدلله.
قيس: وفلوس العمليه؟
مريم: لتخاف مابكت احد.
قيس: ليش مكصيتي فلوس العمليه من هاي الفلوس؟
مريم: من شوكت بينه فلوس ونتحاسب؟