رواية نيشان للكاتبة روز الفياض الفصل الخامس
زيد: مريم كلما اتذكر جنتي بمكان وحدج وسط مجموعه رياجيل عقلي يوكف مااتحمل مجرد الفكره تموتني.
طفرت دموعي ركض كتله: اني حجيتلكم وكتلكم مسوولي شي ولا اتدنوا يمي والله العظيم متدنولي ليش تكول هيجي؟
زيد: ادري ادري حتى لو صدك مااكدر اصدكج وحتى لو صدكتج مااتحمل الفكره بحد ذاتها.
حسيت عبالك واحد جاب فد شي ثكيل وضربني على راسي.
مريم: تحجي صدك زيد؟ لو تريد تختبرني خاف داجذب عليكم؟ تره اني إلى من اعترفتلي بحبك وردت تلزم ايدي مقبلت واني إلى كتلي اني ابن عمج وحبيبيج وبحكم خطيبج مابيها شي اذا لزمت ايدج لو بستج وكتلك مستحيل واذا حاولت تسويها اعتبر البينه منتهي واني إلى جنت تصعدلي فوك من تعرف محد بالبيت وتبقى تدك الباب وماافتحه وتتعب وتروح. اني مريم بت عمك وحبيبتك وبحكم خطيبتك. مو؟
مدنك ميحجي واني دموعي سد وانفتح دمرني بكلامه ودمرني اكثر بسكوته.
مريم: عجيب امرك والله عجيب ماادري شحجي وشكول هاي حب سنين وبأول موقف اتخليت عني.
زيد: مريم اهدي شويه يمكن اني مااستاهلج.
مريم: اي عفيه اي اكيد متستاهلني اكيد لك اني كم واحد بواحد بواحد رفضت علمودك واكللهم احب ابن عمي وابن عمي يحبني واحجيها بكل فخر مفكرت فديوم تغدر بيه وتخلي الناس تحجي عليه. بس فعلا متستاهلني اني استاهل واحد احسن منك بالالاف المرات. اذا انت ابن عمي وهيج تحجي معناها الناس لو حجت حقها لك حتى إلى خطفوني البارحه عدهم غيره وشرف اكثر منك.
راسا ضربني كف بصعدت امي وقيس ظلوا متفاجئين امي راسا اجت حضنتني محجت شي. وقيس صاح على زيد.
زيد كام راد ينزل وقيس لزمه كله: ليش ضربتها؟
مجاوب بجى رجع سأله قيس: ليش ضربتها؟
هم مجاوب دار علي سألني: ليش ضربج؟
اني من قهرتي منه وصدمتي بي كلت: لان كتله إلى خطفوني عدهم شرف وغيره اكثر منك.
امي صرخت علي: ايا قليلة الادب ياعديمة الربايه شلون هيج تحجين ويه اخوج مو بس ابن عمج هو اخوج وتاج راسج.
مريم: صحيح مو بس ابن عمي اخوي. بس اخوي اجه حتى يكولي مااكدر اتزوجج لان جنتي بايته ابيت كل رياجيل.
ظليت ابجي بصوت عالي.
امي سكتت قيس سحبه من ياخته وامي كامتله دفعت زيد كلتله انزل وسحبت قيس من ايده كعدته.
قيس: لتبجين والله اجيبهم والله واذا ماندمتهم مااطلع اني. بس انتي لازم تداومين طبيعي.
مريم: مااكدر هسه مااكدر اخاف.
قيس: لتخافين اني اوديج وارجعج مدام هم يردون بت الدكتور معناها اكيد حيرجعون عليها واحنه راح نراقب اذا اكو بنيه ابوها دكتور لحدما نصيدهم.
مريم: ميس صديقتي ابوها دكتور وجانت وياي البارحه من طلعت.
كعدنه وحجينه شويه وقيس اصر لازم اداوم طبيعي بأسرع وقت ووصاني مااحجي شي لاحد وخصوصا ميس بس اني خايفه وخفت حيل على ميس ليطلعون رايديها هي صديقتي واحبها بس شلون شسوي اخاف احجي قيس حذرني.
نزل قيس ونزلت امي وراه خاف يتعاركون هو وزيد والظاهر زيد من نازل حاجي ويه بيبي وماادري شصاير من نزل قيس لان امي من صعدت جانت مقهوره وتبجي بس مقبلت تحجي شي.
اني طبعا جنت شابعه بجي بسبب زيد وامي اجت زادت الطين بله من شفتها تبجي متت من القهر.
نمنه والحمدلله على الحبوب إلى انطونياه لوما هي ماانام وماتغمض عيني.
الصبح كعدت متأخره امي جوه تريك بيبي والولد واخواني بالدوام انتظرت امي تجي حتى تساعدني اروح للحمام.
الظهر اتصلت بميس وكتلها تركوني مسوولي شي طلعوا مشتبهين عبالهم غير وحده فرحت خطيه بس حسيتها مصدكتني.
الظهر نفس الشي امي طبخت ونزلت الغدا لبيبي وزيد قيس بالدوام.
وبالليل نفس الشي بس خلصت اليوم بجي كلما اتذكر موقف زيد اموت قهر واشبع بجي.
بالليل تقريبا الساعه10 بيبي اتصلت بأمي كلتلها تعالوا انتي ومريم.
مقبلت انزل مااريد اشوف زيد نزلت بس امي رجعت بيبي اتصلت كتلها: مااكدر بيبي مااريد اشوف زيد انتي تدرين.
بجيت هي يمها امي وقيس متكدر تحجي كدامهم كلتلي: ادري ادري نزلي يالله بسرعه يالله حبيبتي.
مريم: مااريد بيبي فدوه لعينج. واصلا مااكدر بالكوه انزل اخاف اوكع.
بيبي: لا هسه ادزلج قيسان ينزلج متوكعين.
فعلا اجه قيس سندني ونزلت.
قيس طول عمره حبيبي واخوي الجبير حنان الدنيا كولها بي ولان رابين ويه ولد عمي من زغرنه فعادي من جان يسافر ويرجع نحضنه اني ونورس ونبوس خده وهو هم لان على اعتبار خواته الزغار.
نزلت كعدت يم امي قيس كعد يم بيبي وزيد كاعد بالاخير ومدنك ميريد يشوفني اكيد واني هم مااشتهي اشوفه.
بيبي: ام مريم حجي البارحه ننساه علينه بحجي اليوم.
امي ساكته مافهمنه شي بس اني اتوقعت زيد حس بغلطه واتراجع عن كلامه بس هالمره اني مااريده بعد لو يموت.
تسرسحت دموعي بهدوء بيبي باوعتلي كلتلي: مسحي دموعج ميستاهلج. انتي تستاهلين الاحسن منه.
انعصر كلبي معناها بعده على موقفه وكلامه.
امي: ماله داعي هالكلام يبقى اخوها وتبقى عزيزه عليه بس ميريد يتزوج الولد قابل بالكوه ومريم هم باجر ان شاءالله يجيها واحد يعرف قيمتها وتربيتها الحمدلله والشكر الله دفع عنها البلاء.