رواية نيشان للكاتبة روز الفياض الفصل الحادي والعشرون
رحنه للبيت اتعشينه وخلصنه وغسلت الماعين ونظفت المطبخ بعدين اخذتلهم الكيك والمكسرات وكعدنه نباوع عالتلفزيون بعدين رحنه لغرفتنه.
قيس: مريومتي كل عام وانتي بخير.
انطاني هديه باوعتله: عبالي متتذكر شكرا.
قيس: عفوا. شلون مااتذكر.
فتحته جايبلي تراجي حضنته وبسته: شكرا حبيبي.
قيس: هاي بدل التراجي إلى بعتيهم علمودي.
مريم: شمدريك بالتراجي منو كلك هالحجي؟
قيس: العصفوره.
مريم: هي نورس البلبل الفتان مو العصفوره??.
قيس: استعنت بمساعدة صديق شكو بيها؟
مريم: زين قيسان اكو شي اريد اكوله بس طفي الاضويه اول حتى انام.
طفى الاضويه وتمددنه حضنته كال: كولي.
مريم: استحي.
ابتسم كال: تستحين مني؟ ليش تستحين كولي.
مريم: اخاف.
قيس: ليش؟ شكو؟ تخافين من شنو؟
شمسويه؟
مريم: مامسويه شي هههه. بس اخاف ميعجبك.
قيس: كولي حتى اعرف يعجبني ميعجبني بي مجال مابي مجال.
مريم: امممم.
اتنهدت اخاف اكول خاف يطلع ميريد طفل هسه عنده بناته الله يخليهم ويحتاجون مصاريف هوايه ونفقه وهالسوالف انوب بعد يجي طفل رابع وياهم. صح هو ميشتكي ولايحجي ونفسه حلوه ويحب الاطفال بس ماادري اخاف يكون رده بارد او عادي وانقهر لان اني هذا اول طفل بالنسبه إلى طبيعي افرح بي ظليت متردده احجي لو لا واذا محجيت لشكوت يعني.
قيس: احجي شبيج مبين موضوع خطير ههه.
مريم: مو خطير بس مااريد اضوجك.
قيس: احجي تره خوفتيني.
مريم: اني حامل??
ابتسم وباس خدي كال: بشرفج هذا شي يضوج؟ اكو احلى من هيج خبر؟
مريم: يعني فرحان؟
قيس: طبعا فرحان اكو احد ميفرح بهدية ربه؟
مريم: كول والله؟
قيس: لج اكو واحد ميفرح يصير عنده طفل؟
مريم: قيساان كول والله فرحان وما ضجت؟
قيس: والله فرحان ليش اضوج؟ شلون اضوج؟
مريم: مو انت عندك البنات ويمكن هسه مو وكته هالموضوع يعني يجوز بنظرك بعد وكت.
قيس: منو يكول مو وكته؟ ومنو كلج بنظري بعد وكت؟ البنات بناتي وهذا الطفل هم ابني معقوله يعني ماافرح بي والوقت مو مهم راح افرح بي بأي وقت. لو مااريد جان كتلج من الاول حسبي حسابج مااريد هسه اطفال.
مريم: معناها اريد شاميه??.
قيس: هاا ماادري السالفه هيج جان رحت دورت لحدما احصل. اروح اجيبلج هسه.
مريم: لا لا وين طالع هسه من كل عقلك امشي اموري هسه بالموالح بس باجر اريد.
قيس: لا هسه اروح اشوفلج بلكي احد كاعد.
مريم: قيساان مااريد باجر ان شاءالله جيبلي وياك متسوه بهالليل طالعين.
قيس: منو هم الطالعين اني اروح وحدي.
مريم: لا والله ماتطلع بهالليل وحدك رجلي على رجلك.
قيس: ههههه خاف اتيه.
مريم: لا بس خاف يطلعلك احد ابن حرام لو شي.
قيس: هههه وانتي شتسويله ابن الحرام اذا طلعلي؟
مريم: مااسوي بس عالاقل اصرخ ماادري اضربه بطابوكه.
قيس: هههههههه.
مريم: خلص خلص باجر جيب الشاميه هسه تعال نام.
قيس: خاف تطلع بأبني شاميه شسوي انوب؟
سكتت فكرت اذا طلعت بنيه شلون من هسه يحجي بالولد.
مريم: واذا بنيه؟
قيس: البنيه نفس الشي خطيه تطلع بخدها شاميه هههه.
مريم: يعني متضوج اذا طلعت بنيه؟
قيس: الله رزقني 3 وردات مااعترض ولا اضوج اذا صاروا 4. بس هالمره ولد مو بنيه.
مريم: شمدريك ولد؟
قيس: ماادري بس احساس.
مريم: احساس لو تتمنى؟
قيس: اثنينهم.
مريم: ان شاءالله.
على مادخلت بالشهر الرابع جان الموضوع رعب لان خايفه تطلع بنيه ويضوج.
مريم: ميس اخاف اروح اسوي سونار.
ميس: ليش؟ هسه حتى لو بنيه هم نعمه تره غيركم يتمنى لو حتى بزونه.
مريم: هههه اسم الله.
ميس: اني اروح وياج بس اول روحي حجزي ومن نخلص نروح.
مريم: مابيه حيل اروح.
ميس: هي العياده بصفنه بعد شنو مابيج حيل روحي ياجبانه.
رحت حجزت ومن خلصنه رحنه بس دخلت ظليت ابجي.
ميس: صدك لو شنو هذا إلى تسويه؟ شبيج اتخبلتي؟
مريم: مااريد اعرف مااريد اخاف.
ميس: تره والله حرام تصرفج هذا يعني اذا بنيه مترديها؟
مريم: اخاف ميحبني بعد يضوج مني.
ميس: صل على محمد كومي بابا كومي هو يكولج ولد خلص اعتمدي.
مريم: ياريت بالحجي.
ميس: يالله حبي صدكيني راح ترتاحين من تعرفين.
دخلنه للدكتوره هي تعرفنه لان عيادتنه بصفهم.
الدكتوره: انتي شنو متوقعه؟
مريم: ماادري??مااكدر اتوقع.
الدكتوره: زين شنو تتمنين؟
مريم: ولد.
الدكتوره: اول وحده اشوفها تتمنى اول طفل ولد كل البنات يردون بنيه.
مريم: زوجي يريد ولد واني اتمنى ولد لخاطره.
الدكتوره: معناها اليوم اذا رجعتي للبيت لازم تشبعين دلع ودلال لان هذا ولد شوفي.
مريم: ياربي الف الحمدلله والشكر??
رجعت فرحااانه بشكل مو طبيعي لدرجه احس نفسي ماامشي عالكاع احس رجليه طايره بالهوا احس نفسي خفيفه ومااكدر اسد حلكي من الابتسامه.
ميس: مريوم اول مره اشوف وحده مثلج.
مريم: شلون يعني؟
ميس: يعني انت شابه وزغيره ودكتوره وحلوه وعندج مستقبل حلو ان شاءالله شلون حبيتي واحد متزوج وعنده اطفال؟
مريم: هاي انتي دتكولين حبيت يعني مو بيدي ولا بأختياري انجبرت جنت احقد على كل وحده تتزوج واحد متزوج وافكر شلون تكدر تبني سعادتها على تعاسة غيرها شلون ضميرها يرتاح احقد عليها بمجرد مااسمع هي زوجه ثانيه. بس وضعي وياه غير لان اصلا زواجه جان فاشل من زمان وميهمني موضوع زواجه الاول ولابناته.