رواية نيشان للكاتبة روز الفياض الفصل الحادي والثلاثون
مثل المره الفاتت عباله نسيت يريد يخوفني.
وصلت للبيت محد موجود كلها طالعه وين رايحين لابيبي لا مرت عمي لاعمي.
صعدت لامي فوك هم مالكيتها بس نورس واخواني.
مريم: هلو وينكم البيت فارغ؟
نورس: هسه يجون.
مريم: وين راحوا حتى بيبي ماكو؟
نورس: ماادري منو من كرايبهم مريض مدري شنو وراحوله.
مريم: منو؟ ياكرايب؟ اكو واحد يروح لمريض بهالظهريه الساعه 2ونص؟
ردت علي بعصبيه: ماادري دخلي غسلي ونامي وارتاحي وعوفيهم شوكت ميرجعون يرجعون المهم سالمين.
مريم: عابت شبيج هيج عصبيه؟
نورس: مالي خلك.
مريم: ومالج خلك تطلعين عصبيتج عالناس؟
اروح اغسل وارتاح قبل لايرجع قيساان.
نورس: هنا غسلي ونامي امي تكول.
مريم: ليش؟ شكو؟ شصاير؟ مااريد انام اريد اغسل وانتظر قيسان.
نورس: اي هنا محد جوه امي كالت لتبقى وحدها جوه خل تبقى هنا.
مريم: يالله معناها راح ادخل اسبح عالسريع حضريلي ملابس عفيه بالحبابه.
نورس: اوكي??.
دخلت سبحت وطلعت رحت سشورت شعري وكشخت وكعدت منتظره قيس ونورس عاقجه وجها.
مريم: استغفر الله ربي واتوب اليك شبيج عاقجه وجهج عابت ضوجتينه.
باوعتلي بطرف عينها ورجعت دارت.
مريم: اعوذ بالله الظاهر اليوم زايراتج؟
نورس: منو؟ ??
مريم: الطناكير ??.
نورس: اسكتي تره مالي خلك روحي نامي احسن من يجون اكعدج.
مريم: لاعيني لامااريد انام منتظره حبيبي ابو عيون السود??.
نورس: ان شاءالله يرجع سالم.
مريم: ياااارب الله يسمع منج.
نورس: ??
مريم: شبيج متفهميني شصاير؟
نورس: ماكو مصاير شي.
مريم: هاي مصاير شي وهيج مغندبه ومتتحاجين.
صحت على اخواني الزغاز كتلهم روحوا درسوا بالغرفه.
مريم: لج نويرس بس لاتحبين؟
نورس: شكد بطرانه??
مريم: احجي لج اني اختج اساعدج انصحج محد يحبج كدي اعترفي??.
نورس: لخاطر الله سكتي روحي نامي مو توج راجعه تعبانه.
مريم: عابت اي والله صوجي اني خل اروح انام احس مااكابل وجهج هذا وبعدين يطلع ابني عليج نكدي.
رحت للغرفه دخلت وسديت الباب واتمددت رجعت اتصلت على قيس ميجاوب بقيت متمدده بالفراش واغفي بس مقاومه خاف يجي.
شويه وسمعت الباب انفتح.
سمعت صوت امي بس بقيت متمدد مابيه حيل اكوم.
نورس: ها بشري؟
امي: شبشر؟
وظلت تبجي كعدت على حيلي ردت اسمع منو هذا المريض إلى راحوله وامي مقهوره عليه؟ معقوله خالي؟
نورس: شلونه وين متعور؟
استغربت معناها مو خالي اصلا امي حالفه حتى لو مات متروح لعزاه على كدما اذاها واذانه.
امي تبجي ونورس هم جنها بجت.
امي: الله لاينطيهم الله لايوفقهم طالعين عليهم بالطريق وظالين يضربون عليهم نار.
نورس: لتكولين مو زين؟
كلبي كرصني منو هذا صار بيها طريق واطلاق نار.
امي: بصدره وحده وبأيده وحده ورجله 6 رجله منتهيه بس لا يبتروها??.
وظلت تبجي حيل. كمت مااتحملت بس كلبي يخفك حسيت خطواتي صارت ثكيله خاف اروح وانصدم.
نورس: اششش صوتج مريم جوه.
امي: يبووي يبوووي غير تحجين وينها؟
نورس: نايمه نايمه بالغرفه بس لتحجين بصوت عالي.
المسافه مابين جربايتي والباب تقريبا مترين بس احسها صارت ميلين رجليه انشلت اريد بس اوصل للباب حتى الباب معرفت افتحه منين افتحه مااكدر اركز اجر يدة الباب اريده ينفتح ماكو.
من خوفي وعصبيتي والرعب إلى حسيت بي دكيت الباب حيل بكل قوتي اجت نورس تركض وراها امي فتحوا الباب.
امي: اسم الله يمه شبيج؟
نورس: شبيج؟
اشرتلها عالباب كتلها: مينفتح.
امي: اسم الله يمه شنو حلمانه؟
مريم: مارجع قيس؟
ظليت اتنفس كوه ودموع على باب عيني واكفه وشهكاتي وصلت حدها من الخنكه.
امي: لابعده خابر كال اليوم مينزلون. مكلج متصل بيج؟
مريم: جذب.
سكتت محجت ونورس باوعت لامي رغم اني ممتأكده الحجي إلى حجوا عن قيس لو عن غيره بس كتلهم: سمعتكم تحجون وتكولون متصوب.
هنا عاد دموعي اطلقت سراحها.
امي ونورس بجوا.
اني من شفتهم بجوا كلبي حسيته انوخذ مني ظليت اصرخ وادك على خدود.
لزموني بس اني عقل مظل براسي دفعتهم ونزلت اركض جوه فتحت الباب وشفت عمي وغيث وبيبي ومرت عمي تبجي.
مريم: ليش متكلولي ليش؟ ليش تخلوني على عماي؟ شمنتظرين حتى تكلولي من يموت يالله؟
بيبي: اسم الله يمه اسم الله عليه منو كلج مو كنالهم لتحجون هسه.
درت على غيث كتله: وين هو وديني اله بيامستشفى؟
غيث: وين اوديج شيوديج ينشلع كلبج وميدخلوج ابقي هنا مرتاحه.
ضربت خدي كتله: يااا تريدني ابقى هنا مرتاحه وهو هناك يموت؟ ياراحه هاي مااريدها الراحه وديني اله.
عمي: ميدخلوج بابا ميدخلوج.
مريم: ميخالف ميخالف ابقى بره ميخالف المهم يمه قريبه عليه.
بيبي: مو زين عليج يمه مو زين.
مريم: يطبني مرض يطبني مرض اريده اريد اروحله هسه تودودني.
غيث: لباجر صبري واوديج ان شاءالله.
مريم: هسه اروح ماكو باجر لو توديني لو اروح بتكسي والله.
احجي ودموعي تصب.
مجاوبني درت وجهي كتلهم: معناها اني رايحه.
مشيت خطوه صاح: اوكفي اوكفييي وين رايحه وحدج روحي لبسي يالله خل اوديج.
رحت بسرعه لبست اسمع بيبي وعمي يحجون وياه معترضين على روحتي.
طلعت نزلت امي كالت: وين؟
مريم: رايحه اشوفه بعد وين شلون طاوعكم كلبكم كلكم تعرفون واني لا؟