رواية نيشان للكاتبة روز الفياض الفصل الثاني والثلاثون
ظليت اصيح والوم بيهم من قهري.
بعدين رحنه اني وغيث وامي اجت ويانه علمودي.
وصلنه للمستشفى بالبدايه مقبلوا يدخلونه وناس هوايه واكفه إلى يبجي والي تلطم والي تصرخ حسيت نفسي بفلم رعب خطيه اغلبهم جماعته إلى راجعين وياه ميتين مستشهدين الله يعين احبابهم على هالوجع بس هو ووياه 2 متصوبين بس حالتهم خطره.
دخل غيث يشوف واسطه حتى يدخلوني اشوفه واني مصدومه من المنظر اباوع عالناس وابجي وياهم الله ليكولها وابجيك...
اجه غيث ووياه دكتور شاب كال: والله ممنوع والله لو يصير جان دخلتج بس ممنوع وبيها مسؤوليه.
عصبت كتله: والله مااروح اذا ماادخل واشوفه لو تذبحوني مااروح اشوفه يعني اشوفه.
ظل يحجي هو غيث بعدين قبل ودخلنه للعنايه المركزه.
كال: ميصيركلكم تدخلون بس واحد ورجاءا بدون صوت مسوؤليه جبيره عليه واصلا ممنوع الزياره هسه.
وصلنه حسيت روحي مثل الرايح للاعدام قبل لااشوفه بجيت دخل ودخلت وراها فتح البرده وياريت مافتحها.
راسأ شهكت وضربت خدي: صخام بوجهي رحت يمه ركض وكفت على راسه اباوعله واباوع للدم إلى على جسمه ورجله مسويلها عمليه وايده وصدره وجهه اصفر وماكو بس النفس يصعد وينزل.
وعيوني مثل الحنفيه وحتى لاابجي بصوت عالي عضيت ايدي حيل وكعدت بالكاع يمه الله يساعد اليستشهد زوجها شلون شيصير بكلبها...
كمت باوعتله كتله: قيساان؟ حبيبي؟ يابعد عمري تسمعني؟ اني مريم حبيبي فدوه لعمرك اذا تسمعني جاوبني.
الدكتور: كافي هيج اختي نطلع؟
مريم: شويه والله بس شويه بس احاجيه.
رجعت باوعتله كتله: قيسان عمري الله عليك لتموت لتخليني وتخلي ابنك وبناتك مو إلى وراك ومنو لجهالك.
دنكت بست ايده وبست وجهه كتله: فدوه اروح لطولك ياريت اني بمكانك كون ولا اشوفك هيجي.
ظليت ابجي حيل بعد متحملت طلع الدكتور صاح لامي ولغيث طلعوني كعدت بره وظليت ادك على روحي.
امي وغيث يبجون ويكلولي ادعيله البجي ميفيد.
كمت رحت ادور عالدكتور مالكيته كالوا طلع واني اتخبلت ظليت اعيط واصرخ.
مريم: شنو يعني طلع؟ وين راح؟ شوكت يرجع؟ مو اكو ناس بين الحياة والموت جوه شلون يروح لبيته يرتاح ويخليهم.
ظلت امي تسكت بيه وغيث طلعني بره كتلهم اظل هنا اليوم مااروح مقبلوا كلولي اصلا هو ميدري بالدنيا بغيبوبه ووجودج مفيده بس تتأذين وتعبين وهسه ليث يرجع يمه يبقى هنا خاف يكعد.
رجعنه للبيت خلصت الليل كل بجي عبالك ميت مو مصاب والبيت كله كئيب وحزين ماغمضت عيونه للصبح.
ب7 لبست وكتلهم يالله نروح مقبلوا كلولي ميدخلوج البارحه دخلوج لان ليل ومحد موجود بس الصبح ممنوع يخافون.
خابرت على ميس وحجيتها وسألتها اذا ابوها يكدر يجي يدخلني.
شويه ورجعت اتصلت كالت روحوا قبلنه واحنه هسه جايين وراكم.
رحنه اني وعمي ومرت عمي وغيث واجوا ورانه ميس وابوها.
دخلونه من عرفوا وياه لان هو دكتور معرف ومن شفته شبعت بجي وميس خطيه انصدمت من شافته مكدرت تبقى طلعت بره تبجي.
كعدت يمه حاجيته: قيسان حبيبي شنو مناوي تكعد طولتها هواي احسب كم ساعه من البارحه لليوم والساعه بسنه بس افتح عيونك شويه احجيلك كلمه وريحني.
حسيت اصبعه تحرك بيدي كمزت ظليت اصيح عالدكتور من فرحتي بس كلي: هذا شي عادي العضلات مرات تتحرك بصوره لااراديه تنقبض وتتشنج يعني مو هو حرك اصبعه.
يافرحه ماتمت.
ابو ميس وصى الدكاتره على قيس واحنه يوميه رايحين راجعين وقيس بقى بغيبوبه لمدة اسبوع.
هالاسبوع جان عباره عن سبع سنوات من العذاب وماكو عذاب اكبر من الانتظار الليل يامطوله والنهار شيخلصه يوم يجر يوم وليله وره ليله الى ان خابرونه الساعه ب4 الفجر اتصل الدكتور بغيث وغيث اتصل بعمي.
اني جنت توني غافيه بس حسيت بحركه بالبيت وصوت واحد يكول للثاني بسرعه بسرعه.
خفت انرعبت كلت مات كمت بسرعه وبس مشيت جلبت رجلي باللحاف وانجبحت مرت عمي سمعت صوت الوكعه لان صرخت فتحت الباب واجت كومتني.
مرت عمي: اسم الله عمه.
كومتني وكعدتني عالجربايه.
مرت عمي: شبيج شطيحج اتعورتي؟ طحتي على بطنج؟
بيبي عبرت عالباب رايحه تصلي متدري شنو السالفه.
بيبي: صباح الخير.
اني ومرت عمي: صباح النور
بيبي: شكو شعدكم كاعدين؟
مرت عمي: طاحت على بطنها وجعصت الولد.
ضحكت كتلها: منو كلج على بطني؟ مابي شي الولد لاانعجص ولاانمرد شنو كوجايه هو؟
بيبي: اوي يالفطيره فاهيه مردت الولد وتضحك بيش الساعه هسه حتى ماكو طبيبه.
رجعت باوعت لمرت عمي كلتلها: وانتي وين لابسه من فجر الله لو تردين تاخذيها للمستشفى؟ تانيني اجي وياج.
مرت عمي: لا رايحين لقيس خابر الدكتور لغيث كله كعد فتح عيونه وسأل عنكم.
مريم: ياحبييي.
بيبي: صلاوات على محمد صلاوات على محمد كلللللللللللوش كللللللللللللوش.
دخل غيث: الناس نايمه شالقضيه وديأذن بره هو يكول الله اكبر وانتو كللوش؟
ضحكنه كتلها: عمه اروح وياكم فدوه لعينج.
مرت عمي: ديالله كومي بسرعه لبسي.
بيبي: يااا تانوني اخلص صلاتي.
غيث: بيبي ظلي ليث ياخذج انتي خاف ميدخلونه كل احنه ياخذج انتي وعمتي ام مريم يعني صلي واتريكي وانتظري.
بيبي: ها خوش لعد الله وياكم بس خابروا ليسرى(امي) خل تنزل يمي.