رواية نيشان للكاتبة روز الفياض الفصل الحادي عشر
مريم: لزموهم؟ كول والله؟
قيس: وربج.
مريم: زين هم نفسهم؟
قيس: ماندري بعدنه بس راح احتاجج تجين فديوم حتى تتعرفين عليهم شتكولين؟ تكدرين؟
مريم: لا قيس لا مااكدر اخاف.
قيس: اني وياج شنو تخافين.
مريم: اخاف اني لهسه اشوف كوابيس بسببهم واكعد مرعوبه جانت اول فتره الحبوب تخليني انام واصلا اني مااعرف اشكالهم شتعرف عليهم.
قيس: اعرف بس بلكي من تسمعين اصواتهم تكدرين تميزين صوت واحد منهم.
مريم: ماادري اخاف ماادري.
قيس: الله كريم من ارجع للبيت نتفاهم.
سديت التليفون وكلبي يدك من الخوف ومن الفرح ان شاءالله يطلعون نفسهم إلى خطفوني حتى ياخذون عقابهم.
اتصلت بميس حجينه وسولفنه واتحمدتلها السلامه واتفقت وياها باجر اروحلها بالليل بعد العياده ان شاءالله.
بالليل قيس صعدلنه فوك حتى يقنعني ويقنع امي نروح نتعرف على العصابه بالبدايه امي مقبلت واني هم جنت خايفه بس بعدين امي قبلت لخاطر قيس متريد تفشله وتحرجه.
ثاني يوم طلعت من العياده من وكت اني وامي رحنه لبيت ميس نتحمدلها السلامه وقيس راح ويانه وصلنه وراح بقينه كاعدين يمهم ساعه وبعدين اتصلت بقيس رجع علينه لان ميقبلون نرجع بتكسي وحدنه وبالليل.
قبل ميجي قيس طلعنه كعدنه بالحديقه شويه ودخل اخو ميس شافنه واجه سلم علينه ودخل.
اجه قيس وطلعنه سلمنه ونريد نروح واجت ام ميس جابت صحن كيك وعصير لقيس والتفتت على ميس كلتلها: همام يكلي منو هاي الحلوه العدنه كتله مريم صديقة اختك الدكتوره الوياها بالعياده يكلي معقوله بنتج عدها هيج صاحبات حلوات ههههه.
ضحكنه وسلمنه ورحنه.
ثاني يوم جمعه العياده الصبح والعصر ماعندي مجال جنت متفقه ويه نورس نروح للسوك اريد اجيب لامي محبس ذهب شي بسيط ميعوض تعبها ويايه اني بالذات.
وموبايل لقيس مو من مقامه ولاقيمته بس إلى هذا إلى اكدر عليه حاليا.
وفعلا رحنه بالكوه امي قبلت نروح بحدنه للسوك.
اشتريت المحبس ورحنه نشتري الموبايل نقصنت الفلوس.
اني لابسه تراجي زغااار من قديم الزمان بأذني فكلت لنورس: خل نروح نبيعهم حتى نكمل الفلوس.
نورس: لج لا حرامات تراثيات من ايام ابوي الله يرحمه خليهم ذكرى.
مريم: يمعوده على جمالهم بالمستقبل ان شاءالله اذا الله رزقني اجيب غيرهم زوج إلى وزوج الج.
بعنه التراجي وكملت فلوس الموبايل ورجعنه للبيت بس طبعا اكلنه رزاله معدله عالتأخير من امي.
بالليل انطيتها المحبس اتفاجأت وحيل فرحت وظلت تبجي وبجتنه وياها.
مريم: وجبت لقيس تليفون شتكولين؟
امي: يستاهل اكثر منجازيه ابد.
مريم: معناها نزلي وياي خل انطيهيا.
نزلنه لكيناهم يتعشون كعدنه شويه لحدما خلصوا وجابوا جاي امي كلت لقيس: قيسان عمه حبيبي مريومه اليوم جابتلك هديه شي بسيط مو من قيمتك ولا يوفي جزء من تعبك ويانه ووياها هي بالذات.
هو باوعلي ابتسم كال: هديه إلى؟ شنو المناسبه؟
كمت انطيته التليفون كتله: حلاوة الشغل.
فتحه عجبه حيل كلي: مريوم اخذ منج هديه؟
مريم: ليش متاخذ مني يعني؟ بعدين كله انت تجيبلنه شيصير لو مره احنه جبنالك حاجه؟
قيس: لج هذا غالي هوايه عليج.
مريم: مايغلى عليك اني حاسبه حسابي وان شاءالله كل شخص بالعائله اله هديه بس كل شهر واحد مو كولكم سوا هههه.
قيس: شكرا جزيلا احلى هديه اول مره احد يجيبلي هديه غاليه يمكن اغلى هديه محصلها بحياتي هههه.
امي: بالعافيه.
مريم: بالعافيه.
بيبي: اني هديتي من تلبسون الحلقات وتتزوجون ان شاءالله وتجيبون الولد.
مريم: ????????.
ظل وجهي ينطي الوان احسه ماحجيت ولاعلقت ولا كدرت ارفع عيني اصلا.
قيس هم محجه شي بس عمي ومرته وحتى امي كلهم كالوا: ان شاءالله.
اني هنا التفتت على امي باوعتلها.
ردت اكوم بس استحيت كلت هسه يكولون استحت ماادري شيكولون احتاريت شفكر المهم اريد اكوم من يمهم.
ضغطت على نفسي شويه حتى ابقى كاعده بعدين سويت نفسي رايحه للمطبخ وطلعت للحديقه اختنكت شلون اتزوج قيس مثل اخوي وهم متزوج وهم عنده بنات 3 وهم اخو زيد شلون ارهمها ياربي.
اتذكرت زيد وحقارته بجيت.
واصلا قيس مثل تفكيري اخته الزغيره على كولته مترهم الشغله ابد صعبه حيل.
طلع قيس كال: انتي هنا؟ شتسوين؟
مسحت دموعي كتله: ماكو كاعده. ليش اكو شي؟
قيس: لا بس ردت اسألج النقال بي ضمان؟
مريم: اكيد. ليش معجبك؟ تريد تبدله تره عادي.
قيس: لا مجرد سؤال.
بعدين سألني: شبيج؟
مريم: ضوجه.
قيس: ليش ضوجه وقتج كل بالدوام المفروض متحسين بالضوجه.
هو صحيح مااحس بالضوجه بس ماعندي حجي احجيه ومااريد ابين مرتبكه ومتأثره من حجي بيبي.
مريم: ماادري ملل روتين.
قيس: يمكن ضجتي من حجي بيبيتج؟
دمعت عيوني حاولت اشويه اهدأ نفسي حتى ماابجي كتله: ليش هو حجيها ميضوج؟
قيس: حقج والله انتي حلوه وزغيره وتعبانه على نفسج كون تتزوجين واحد دكتور مثلج وممتزوج مو مثلي.
استغربت من حجيه حسيت كلامه مو مثل الاول اول منفتح الموضوع.
مريم: مو قصدي هيجي. اقصد هالموضوع ميرهم من كل الجوانب اولا زواجك انت وابرار ممكن ينتهي بسبب هالموضوع وعائلتكم تتفكك بسببي وثانيا على كولتك اني اختك الزغيره وثالثا انت مربيني.