رواية نيشان للكاتبة روز الفياض الفصل الثاني عشر
قيس: زواجي فاشل بالله من الاول وكان ممكن بأي لحظه ينهار. وعائلتي انتو واهلي وبناتي ماكو شي راح يتغير. ومربيج صحيح وهذا احسن شي بالموضوع اعرفج زين مثل مااعرف نفسي. وماعندي خوات زغار بعد بس نورس انتي مترهم بعد اختي الزغيره.
فتحت عيوني على وسعها متعجبه من كلامه كتله: قيسان مو حجيك هذا. تره الموضوع مو بهالبساطه ولا بهالسهوله ولامجبور انت عليه مالك علاقه بحجي بيبي تحجي فتره وتنسى والناس هم تنسى.
قيس: مو سهل ولابسيط على كولتج بس هذا الموجود.
سكتت مافهمت ساعه احس من كلامه هو يريدني ويلمحلي وساعه احسه مجبور زواج والسلام.
قيس: مريم اسألج سؤال خاص ومحرج بس تجاوبيني بصراحه؟
باوعتله ظليت متردده بعدين كتله: اسأل.
قيس: اكو احد ابالج او احد حاجي وياج بموضوع خطوبه شخص معجب بيج او انتي معجبه بي مثلا؟
احرجني بس ضحكت كتله: لا ماكو ليش؟
قيس: واخو ميس؟
مريم: يااخو ميس؟
قيس: اخو دكتوره ميس صديقتج إلى شافج مره من رحنالهم وسأل عنج؟
مريم: اييي؟ ??
قيس: اي يعني محجت وياج بموضوع خطوبه او كلتلج معجب بيج او اي شي؟
مريم: لا.
قيس: اكيد؟
مريم: اكيدين. ليش؟
قيس: يعني مو علموده ولاعلمود احد ثاني انتي ممقتنعه بيه؟
مريم: ??
قيس: شبيج؟
مريم: بس اريد افهم اخو ميس شنو موقعه من الاعراب؟ شجابه على بالك؟ وشذكرك بيه اصلا؟
قيس: يعني كلت يمكن اكو شي او صار شي بعدها وهالشي هو إلى مخليج هيج يعني.
سكتت باوعتله مستحي مني حسيته.
انقهرت لان حبيت زيد النذل واتذكرت من خابرني ويكولي لتتزوجين اخوي وتموتيني احقر منه مشفت بحياتي لذلك قررت: ماكو شي من إلى ابالك لا وياه ولا ويه غيره انت تعرفني اني امشي سيده مااحب امشي اعوج. وحتى تتأكد فاني موافقه اذا انت مقتنع وموافق مو مجبور.
باوعلي شويه حسيته اتفاجأ مثلي من هالقرار بعدين كال: متأكد بدون متكولين بس قصدي اذا اكو شي حتى اساعدكم حتى تنخطبون لبعض يعني.
مريم: معناها هسه لازم تساعد نفسك.
ماعلق واني ظليت ساكته متفاجأه من نفسي وخانكتني العبره بس على عنادك زيد.
وره يومين قيس اجاني للعياده بقى ينتظر بره لحدما خلصت بعدين دخل يمي كعد بعدين طلع علبتين خلاهم عالطاوله.
مريم: شنو هاي؟
فتحهم بيهم حلقات حسيت حتى لوني انخطف مااعرف شحجي ظليت بس صافنه عليه صارت صدك.
قيس: انطيني ايدج.
حسيت نفسي مشلوله مااكدر اتحرك حتى ايدي مشلوله مااكدر ارفعها كوه رفعت ايدي ترجف حيل.
لزم ايدي هالمره عبالك اول مره يلزم ايدي وعبالك مو نفسه قيس ابن عمي المربيني وعبالك واحد غريب مااعرفه لزم ايدي حسيت جسمي كل ظل يرجف من الخوف وماادري شنو بعد.
لبسني الحلقه ومد ايده البسه حلقته اخذت الحلقه ردت البسه بس مكدرت ايدي ترجف حيل خليتها كتله: مااكدر. ??
اخذها هو ولبسها. اتنهد بعدين كال: ها نروح للبيت لو بعد عندج شغل؟
باوعت للساعه ردت اكوله لاخلصت بس مكدرت احجي شي بعدني تحت تأثير الصدمه بس هزيت راسي وكمت وشلت جنطتي وهو هم كام وطلعنه.
طول الطريق محجينه ولاكلمه ولاحرف هو مشغل الراديو عالقران.
اني جنت بعالم ثاني اباوع للحلقه بأيدي واحجي ويه نفسي بكلبي شنو هالحياة الغريبه اني هسه مخطوبه لقيسان صديقي الصدوق والي هو متزوج وعنده عائله واخو زيد إلى جنت احبه لان جذب هسه بعد مااحبه كرهته كره فضيع بكد حبي اله واتمنى انتقم منه وابرد نار كلبي.
بس هسه خلص راح يوصله انتقامي لهناك من يعرف لبسنه الحلقات وصرت خطيبة قيس اخوه.
وصلنه للبيت ونزلنه ردت اصعد بس قيس كلي: لا اول تعالي خل يشوفون الحلقات وبيبيتج ترتاح.
رحت وراه بدون كلام دخلنه وسلمنه بوست بيبي وكعدت يمها.
قيس: حجيه اليوم عندي الج خبر.
بيبي: يالله خير ان شاءالله.
سحب ايدي إلى بيها الحلقه وخلاها كدامها وخله ايده إلى بيها حلقه بصف ايدي.
باوعت بيبي مفهمت شي مرت عمي كاعده كالت: حجيه لبسها الحلقه صلوات على محمد
طكتها هلهوله.
بيبي فرحت وظلت تبجي من فرحتها وتبوس بيدينه اني وقيس اني هنا فرصتي حتى ابجي براحتي حضتها وبجيت وهي تبوس بيه وبقيس بعدين قيس كام باس راسها وايدها وبعدين دنك باس راسي.
ظليت مثل إلى بغيبوبه موجوده ومو موجوده اشوف واسمع بس مااكدر اتجاوب ويه كل هالاحداث ومره استوعب ومراات مااستوعب إلى ديصير.
باستني مرت عمي وباست قيس وعمي نفس الشي هالمره حاولت جهدي ارجع لوعيي واتجاوب وياهم دنكت بست ايد عمي وهو باس راسي ورحت بس ايد مرت عمي وهي هم بوستني وحضنتني.
رجعت يم بيبي كتله: بيبي راضيه؟
بيبي: يابعد عمري انتي اذا ماارضى عليج وعلى قيسان عليمن ارضى لعد؟ راضيه عنكم من كل كلب ولسان بالدنيا وبالاخره ان شاءالله الله يرضى عليكم ويوفقكم ويرزقكم بالذريه الصالحه والولد الصالح.
بست ايدها وراسها كتلها: الله يخليلنياج يارب ويطول بعمرج بصحه وعافيه.
رجعت صفنت وصلنه للذريه والولد الصالح شبسرعه.
بعدين بيبي كالت: يالله كومي بشري امج خل تفرح هي هم مسكينه.
كمت وقيس كام اجه وياي صعدنه لامي.
امي: ياهلا وينكم اتأخرتوا اليوم؟
قيس: جنه جوه يم الجماعه فرحناهم.
امي: ان شاءالله دوم فرحانين بس فرحونه وياكم.