رواية نيشان للكاتبة روز الفياض الفصل الثلاثون
مريم: والله العظيم راح اكوم اطلع واخليك اذا متسكت.
قيس: لا لازم تسمعين كل شي يصير قابل اني مخلد يجوز اروح ماارجع.
مريم: وخر قيس وخر خليني اكوم والله تموتني انت ضغطي ارتفع يمكن مااكدر اسمع بعد.
كمت طلعت من الغرفه رحت يم بيبي نمت حست بيه هي كعدت.
بيبي: اسم الله يمه شبيج؟
مريم: مابيه شي بيبي نامي اريد انام يمج.
بيبي: ليش شعندج يمي رجلج وين؟
مريم: ماعندي شي بيبي اريد انام هنا شويه بس لحدما ينام مالي خلك.
كعدت عدل باوعتلي جرت شالها من جوه المخده وخلته على راسها.
بيبي: شبيكم؟ اتعاركتوا؟
تخزرني وتباوعلي بنظره مال قناص حصرتني الضحكه كتلها: نامي بيبي مو وكت استجواب هسه الساعه وحده ونص.
بيبي: خليتوا بيها نوم كعدي بالله شبيكم عليش اتعاركتوا؟
مريم: هههه مااتعاركنه اطمئني ونامي.
بيبي: لعد المن جايه يمي مو جنتي متخبله بس كون يرجع شسويتي هسه وطردج من الغرفه؟
مريم: ??
بيبي: يااا تضحك الفطيره المثلج هسه تدك وتلطم لان رجلها ميحجي وياها.
مريم: ??
بيبي: كومي احجيلي وبطلي فهاوه.
مريم: هههه بيبي والله ماكو شي لامتعاركين ولا طاردني ولا مسويه شي.
بيبي: لعد شكو؟ المن عايفه رجلج وتفترين بهالليل؟
ضحكت وسكتت مالي خلك احجيلها.
كامت هي طلعت من الغرفه شويه ورجعت فتحت الباب والضوه كتلها: لابيبي طفي الضوه خليني انام.
التفتت شفت قيس كال: اكو وحده تزعل يم بيبيتها بالغرفه الثانيه ههههه. كومي كومي تره تاكل راسي اذا بقيتي يمها لو احلف عالقران ماكو شي متصدك.
كعدت كتله: امري لله??.
بيبي: عفيه صيري خوش مره لتزعلينه منج مااقبل تره قيوسي هذا العزيز.
قيس: سمعتي هههه صيري خوش مره.
مريم: ??صار تدلل.
رجعت للغرفه تلفلفت ونمت.
من دخل قيس كال: عبالي رحتي للحمام طلعتي زعلانه يم بيبيتج ههههه.
ضحكت كتله: ساعة السوده الرحت بيها يمها الا شويه جان كتلتني.
كعد يمي كلي: ليش الانسان يخاف من الموت؟
مريم: اهووو هم رجعنه لنفس المغثه.
قيس: لا والله صحيح يعني ليش هالخوف اذا هو الانسان رايح لربه يعني اكيد لمكان احسن؟ ليش يخاف على اهله من بعده اذا هو خالقهم ورازقهم وحافظهم؟
مريم: قلة ايمان.
قيس: بالضبط قلة ايمان فخلي ايمانج قوي.
مريم: شجاب ايماني بالوسطه؟
قيس: مو صارلج ساعه تبجين وزعلتي وطلعتي.
مريم: هذا الشي ماله علاقة بالايمان قابل شي بسيط لو هين من يموتلك احد عزيز على كلبك اسم الله؟
قيس: يعني لو متت تزعلين؟ ??
مريم: لو ظاله يم بيبي احسن.
قيس: روحي بس اني مو مسؤول اذا قررت تبسطج ههههه.
مريم: اصعد لامي.
قيس: هم تنزلج ههههه مرجعج عندي ابقي بمكانج وحفظي كرامتج??.
مريم: ??.
قيس: حبيبتي انت مكانج هنا عندي بحضني اشو تعاي??لتعبين نفسج وتزعلين وين متروحين يرجعونج علي مالج غير قيساان لاقبل ولاهسه ولابعدين??.
مريم: اني قابله ميخالف بس متحجي بهالحجي اليغث وتقهرني??.
قيس: صار يدلل الحلو.
التحق قيس هالمره المفروض بس اسبوع ويرجع وهالاسبوع مو 7ايام عبالك 7شهور شطوله حسيته ماادري ليش هالاسبوع عشت بقلق بي اكثر من كل مره يمكن لان وصاني على بناته بس قلبي مقبوض.
جنت تليفوني بيدي 24 ساعه شوكت ماافرغ لو هو يفرغ نحجي.
من التحق لليوم اكثر كلمه استهلكتها مشتاقتلك وشوكت ترجع كلما حجيت وياه كتله: قيساان شوكت ترجع طك كلبي عليك اشتاقيتلك.
قيس: ماارجع المره هنا مجلبه بيه خطيه هالمره حصتها بس اسبوع??.
مريم: جلب بيها ملك الموت كول آمين.
والله والله اذا طلعت مسويها قيس مااتعب نفسي اكوم هسه اركب للموصل واسحلها من شعرها واخذها بيدي اسلمها للدواعش.
قيس: ??لا ابد مامتعبه نفسج.
مريم: انت جرب وشوف.
قيس: لا يمعوده عليمن خليك على مجنونك لايجيك الاجن منه?? عليمن هالتجارب.
مريم: قيساان متسويها مو؟
قيس: ماادري حسب الظروف مااضمن نفسي مو هاي انتي اتزوجتج على ابرار??.
مريم: عابت لهالاسم لتجيب طاريها بعدين اني غير يعني شحدك تتنفس مو تتزوج انت سويها وشوف اذا مااذبك بتهمه 4ارهاب.
قيس: ????كافي لج راح اموت من الضحك حتى تكولين مابيه شي بابا انتي الملف عندج تالف.
مريم: ياملف؟
قيس: مال عقلج?? الظاهر محترك.
مريم: شبيكم هيج وياي??.
انقهرت مااتحملت سديت التليفون فعلا صايره مااتحمل كلمه يمكن هاذي هرمونات الحمل.
ظل كل شويه يتصل بس اني قفلت مااريد احجي واصلا عندي شغل.
بالليل من خلصت دكيت علي: هلو حبيبي وينك اليوم؟
قيس: ??موجود.
مريم: باجر ترجعون ان شاءالله مو؟
قيس: ان شاءالله.
مريم: شوكت اتطلعون؟
قيس: كالمعتاد الفجر ان شاءالله نطلع حتى نوصل من وكت.
مريم: توصلون بالسلامه ان شاءالله.
حجينه لحدما غفينه ماانطاني كلبي اسد التليفون.
الصبح كعدت رحت للمستشفى بس قبل لااطلع كلت لمرت عمي ولامي مايطبخون اني راح اطلب من المطعم.
وفعلا اتصلت بالمطعم وماخليت شي مطلبته كل الاشياء إلى يحبها وحسيت براحه مو طبيعيه اليوم كلبي بارد خلص افتكينه من قصة الموصل وقلق الموصل.
خلصت شغلي ورجعت طايره للبيت طول الطريق اتصل عليه ميرد.
ضحكت يريد يخوفني.