رواية نيشان للكاتبة روز الفياض الفصل الثاني
وصلنه لمكان مااشوف شي بس وكفت السياره نزلوني اتوقعت حيكتولني ويذبون جثتي بفد مكان.
سمعت صوت واحد طلعهم وكلوله افتح الباب.
دخلوني ماادري وين امشي واتعثر بخطواتي وكعدوني على كرسي ايديه مربوطه وعيوني.
بس اني مابطلت بجي وتواسيل.
بعدين حسيتهم المتوا علي داير مداير متت من الخوف كلت حيعتدون عليه مابيها مجال.
سألني واحد منهم عن اسمي واسم ابوي جاوبته.
ظلوا يضحكون بينهم ويقلدون علي واحد يكول للثاني: على اساس دتغشنه منعرف هي منو ههههه.
مريم: والله والله والله مااغشكم والله والله اسمي مريم عبد الرحمن والله العظيم اسمي مريم.
ابجي وميته من الخوف كل خوفي يعتدون علي دموعي مابطلت.
هم ضاجوا مني خلوا وطلعوا وسمعت الباب انقفل وصوتهم صار بعيد.
ظليت ادعي الله ينجيني منهم.
مريم: ياربي انت العدل ماترضى بالظلم ياربي اني يتيمه ومالي غيرك لخاطر امي مسكينه اذا سوولي شي تموت والله تموت انت تدري ياربي ياحبيبي خلصني لا اله الا انت اني كنت من الظالمين ظليت ارددها لحدما حسيت لساني نشف صار خشبه عبالك من الخوف والعطش.
ظليت ماادري شكد بمكاني ابجي وادعي وافكر بأمي شنو وضعها هسه شمسويه بروحها من سمعت اكيد تتصل متحصلني ويجوز ميس خابرتها وكلتلها الله يعلم بحالها هسه.
ماادري شكد مر وقت بس هواايه يمكن صار ليل هسه سمعت صوت اثنين يسولفون وصوتهم يقترب وفتحوا الباب اني جفلت اتدنوا يمي ويسولفون بيناتهم.
الاول: ها شرايك بيها حاته مو سمرا بس تموت شوف الجسم.
اني هنا انتهيت كلت خلص ميرحموني.
الثاني: اي والله مو مهم سمرا بيضا نكضي وياها ليله نتونس والله وياها.
واحد منهم خلى ايده خدي لعبت نفسي ودرت وجهي وظليت ابجي واتوسل بيهم.
مريم: عفيه الله يخليكم لتأذوني الله يخليكم اني مثل خواتكم عفيه ليش هيج تسوون عفيه لتدنون يمي الله يستر على خواتكم عفيه عوفوني والله يتيمه واذا سويتولي شي امي تموت والله.
هم يضحكون وواحد منهم مد ايده لزم ركبتي واني كمت من مكاني امشي بدون شوف وظليت ابجي واصرخ مااشوف اني وين رايحه لحدما دعمت بالحايط وظليت واكفه وابجي واتوسل.
سمعت صوت واحد ثالث اجه وصاح عليهم وصوته صار قريب الظاهر دخل للغرفه شافني ابجي واصرخ وهم يضحكون كللهم: شبيها الدكتوره بت الدكتور ههه؟
اني صرخت من يمي كتله: عفيه الله يخليك الله يستر على عرضك اعتبرني اختك لتخليهم يسوولي شي فدووه اروحلك والله يتيمه وبس امي عندي واذا سويتولي شي تموت والله والله.
هو يمكن استغرب من حجيي وره شويه كللهم: عوفوها لحد يتدنالها مالكم علاقه بيها.
الاول: يابه شالسالفه تريد تخلينه يابسه وتمن.
رد علي: لحد يتدنالها. احنه شغلتنه ناخذ الفلوس وبس لانكتل ولانخرب بنات العالم.
ضحكوا هم ماعجبهم الحجي كللهم: شبيكم شنو إلى يضحك؟ ماعجبكم الحجي؟
تره هالحجي حجي ابو محمود مو حجيي والماعاجبه يروح يعترض.
طلعوا وقفلوا الباب اني بعد رجليه متشيلني كعدت بمكاني متت من الخوف.
ماادري بيش الساعه هسه صارت هوسه بره وشويه وفتحوا الباب ودخلوا ماادري كم واحد هم 4 ماادري 5 او اكثر الله اعلم بس اني مفرزنه صوت 3 وسمعتهم يكولون عن واحد ابو محمود يعني لحد الان 4.
سألني واحد منهم: شسمج انتي شسمج؟
مريم: مريم عبد الرحمن.
كلوله مو كلنالك كللهم: وين جنتطها كتبها؟
كلوله: كتبها وكعن من صعدناها بس جنطتها جانت بجتفها هسه نجيبها.
راحوا جابوا جنتطي الظاهر طلعوا الباج وتأكدوا من الاسم.
طلعوا وسدوا الباب وصارت هوسه بره وصياح بينهم ورجعوا كلي واحد منهم: يعني انتي مو بت الدكتور؟
مريم: لا والله اصلا ابوي متوفي صار 10 سنين والله العظيم وبس امي والله واذا سويتولي شي تموت والله تموت.
اني احجي وابجي.
وهم اسمع واحد منهم يضحك بعدين واحد كال: معناها مو هي هاي متفيدنه لازم نرجعها.
ومثل ماهي ها من هسه اكلكم إلى يتدنالها ميلوم الا نفسه.
سكتوا هم محد اعترض اني ابجي كلي: كافي دوختينه تسكتين لو اسلمج الهم واخليهم يكضونج كضيان اليوم.
مريم: سكتت سكتت سكتت والله مااحجي ولا ابجي بعد الله يستر على عرضك.
كللهم: ودوها للحمام خل تقضي حاجتها وتغسل وانطوها لكمه وباجر قبل الفجر تاخذوها تذبوها عالسريع.
اجه واحد كومني واخذني الحمام اني ارجف خاف يسويلي شي لو يدخل علي للحمام لو يمد ايده على جسمي.
دخلني للحمام وفتح ايديه غسلت وقضيت حاجتي وخلصت دكيت الباب حتى يفتحه طفى الضوه اول حتى مااشوف وجهه ورجع شد عيوني وايديه ورجعني للغرفه كعدني عالكرسي وراح.
وره شويه جابلي اكل خله بأيدي صمونه بس مافتح ايديه.
مريم: الله يخليك اريد مي متت من العطش الله ينطيك.
شربني مي بكلاص ماادري شنو وراح.
ظليت الليل كل ابجي مااكلت بياحال واشتهي الاكل.
ظليت كاعده بمكاني واردد الذكر اليونسي (لا اله الا انت سبحانك اني كنت من الظالمين).
مر وقت طويل بعدين سمعت صوتهم قريب فتحوا الباب كلولي: يالله كومي راح نعوفج لان طلعتي مو انتي إلى نريدها بس اذا طلعتي صوت تره متكلفين بس طلقه.