رواية نيشان للكاتبة روز الفياض الفصل الثامن والعشرون
اتوسلت امي حتى اكل كتلها مااريد ومرت عمي مسويه البلبي علمودي لان مشتهيته بس مااكدر معدتي احسها بيها حراره اشتعلت نار.
امي: شبيج حبيبتي شنو هيج فجأه تغير مزاجج كعدي شربي حليب عالاقل حتى معدتج ترتاح شنو بس انتي حامل كل ساعه بحال؟
مريم: مااريد يمه عفيه لتلحين مالي خلك روحي لا اريد اكل ولااشرب.
مرت عمي: اسم الله شبيج عمه توه مابيج شي رجعتوا من بره تضحكون شصار هسه؟
مريم: ماصار عمه مابينه شي اصلا قيس راح لولد صديقه يشوفه قبل ميلتحق.
مرت عمي: لعد شبيج فهمينه؟
ياسمين: خاله جانت تبجي لان ماما كالت علاوي مو اخوكم.
مرت عمي: يااء اسم الله بيبي اخوكم شلون مو اخوكم بس ماما شاربه نفط.
مريم: هههههاي
امي: ههههه اي والله شاربه نفط.
ياسمين: لا مشاربه شي بس هي تكول مو اخونه بابا قيس ابونه احنه بس علاوي منعرف منو ابوه.
مرت عمي وامي: ??لا ياطايحت الحظ.
مريم: ??.
بجيت يالله ارتاحيت وبعدين رجعت اكلت ارتاحت نفسيتي من بجيت وطلعت قهري.
امي ومرت عمي تركوني والتهوا بموضوع ابرار وحجيها.
اتعشينه اني والبنات قيس تأخر يالله رجع البنات نعسوا ومااتصور هالحقيره راح تقبل يباتون هنا.
قيس: السلام عليكم.
مريم: وعليكم السلام.
قيس: شبيكم هيجي جنكم صور من المعركه.
مريم: نعسوا خطيه تعبوا تأخرت انت هوايه عليهم.
قيس: وين امي خل تخابرها تكوللها يباتون هنا اليوم.
راح كل لامه واتصلت بيها وطبعا مثلما اتوقعت مقبلت كومهم قيس حتى يوديهم.
كمت اني وراهم.
قيس: وين؟
مريم: وياك غير.
قيس: لاوين وياي مو ظهرج يأذيج بعدين شتسوين رايحه؟
مريم: لعد شلون تروح وحدك؟
مرت عمي: لا اني راح اروح وياه.
مريم: تمام.
قيس: شنو زفه هي حتى انتي يمه مترحين.
مريم: لو هي تروح لو اني؟ متروح وحدك لهاي النسره.
قيس: اتخبلتي انتي رسمي هههه.
مرت عمي: لا اني اروح وياك وين رايح بهالليل وحدك لهاي النسره صحيح.
قيس: هههه شعدكم؟
مريم: ماعدنه شي بس متروح وحدك بهالليل.
قيس: علمودي يعني؟ لو علمود النسره؟
هزيت راسي اي ضحك هو.
راحوا اني انتهزت الفرصه كمت سبحت بمي حار ارتاح ظهري شويه ورجعت نشفت شعري وسشورته واتمددت.
وره فتره رجعوا دخل قيس بدل وراح غسل ورجع يمي كال: شبيها ام علاوي ضايجه اليوم؟
مريم: مضايجه مابيه شي ليش اضوج اسم الله وانت يمي؟
قيس: اممم.
مريم: اممم شبيك؟
قيس: امي كالت ضايجه ومالج خلك.
مريم: لا والله هاي كدامك شبيه؟ همه بيهم سوله يطلعون عني اشاعات.
قيس: هههه. مريوم تدرين ليش احبج؟
مريم: لان اني انحب كل شي بيه حلو وينحب??.
قيس: لا مو هيج.
مريم: لعد شنو قصدك??؟
قيس: قصدي يعني شي غير الشكل احب تفكيرج باللي حواليج من الناس اهلج صديقاتج الناس إلى يهموج وتحبيهم متحبين تضوجيهم ولا تقصرين وياهم ولاتكلفينهم مو انانيه تفكرين بيهم قبل نفسج هاذي اكثر صفه احبها بيج.
مريم: كل هالحجي الحلو عني بس تره اني طالعه على ابن عمي مجايبه شي من غريب.
قيس: معناها كولي ليش ضايجه؟
مريم: والله مو ضايجه كوه تضوجني يعني.
قيس: يعني مو علمود الحجي إلى حجته ياسمين؟
مريم: ياحجي؟
قيس: حجي ابرار عن علاوي.
مريم: عمتي كلتلك؟ شبسرعه.
قيس: لا ياسمين كلتلي خاله ظلت تبجي اليوم من حجي ماما.
مريم: لا مابجيت من حجيها وحده حقوده ومريضه بس معدتي اذتني حيل وجنت جوعانه ومااكدر اكل بسبب الالم.
قيس: لتضوجين هي مثل ماكلتي وحده حقوده ومريضه واذا عالحجي خل تحجي منا لبعد سنه مو مهم. من غيرتها تحجي ومن سواد كلبها.
مريم: مو مهم حبي تعال نام وارتاح لو بعدك ممتعشي؟
قيس: لا والله الولد لزم بيه الا نتعشى سوه اكلنه بس اريد لبلبي.
كمت صبيتله لبلبي وكعدنه نباوع عالتلفزيون بعدين كال: شوكت يجي علاوي طولها.
مريم: هههه شيجي بعدني ممكمله الشهر الرابع كول يالله.
قيس: يالله بس هوايه عبالك صارله سنه.
مريم: ههههه حبيبي على اجازتك الجايه اكون اني بالشهر الخامس ان شاءالله بعده مطول وينك ووينه.
قيس: اريد وراه مباشرتا نسوي واحد ثاني.
مريم: يمه شنو خرعه عندك خير من الله 3 بنوتات وان شاءالله هسه ولد وبالمستقبل لو كبروا الله كريم عود نسوي واحد ثاني بس هسه لا كافي.
قيس: ليش شعدنه شورانه؟
مريم: ههههه شنو شعدنه عدنه دوامات واشغال والتزامات كول يالله الحمدلله احسن من غيرنه.
قيس: الحمدلله.
التحق قيس للموصل واني داومت بس حاولت مااتعب نفسي بالشغل وغيث باع السياره وعلى اجازة قيس الثانيه صرت شريكة بالنص بالعياده الحمدلله الفلوس العندي على إلى عند امي على فلوس السياره نقصوا شويه.
ظليت كل شهر اعصر نفسي عصر حتى مااصرف شي زايد منا منا حتى اسدد الفلوس وحتى فلوس امي خطيه هي واخواني اوله بيهم مني.
مرت الاربع شهور الحمد لله صح تعب ووحشه وقلق بس المهم خلص واليوم يرجع ان شاءالله من حجيت وياه البارحه كال الفجر نطلع لبغداد.
باوعت عالساعه الساعه 10الله اعلم شلون طريقهم وشكد بالضبط يحتاجون وقت حتى يطلعون مناك بأمان.
عندي شغل ماااكدر اتصل بي هسه واصلا هو ميقبل اتصل من يكدر ويكون عنده مجال هو يتصل.