قصص و روايات - قصص رائعة :

رواية نيشان للكاتبة روز الفياض الفصل التاسع والعشرون

رواية نيشان للكاتبة روز الفياض الفصل التاسع والعشرون

رواية نيشان للكاتبة روز الفياض الفصل التاسع والعشرون

رجعت للبيت اول ماطبيت سألت مرت عمي: اجه قيس؟
مرت عمي: لا اتصل ولا اجه.
ضجت وخفت ظليت ساكته محتاره شسوي
ظليت كاعده بالمطبخ حسبه تاخذني وحسبه تجيبني مرت عمي تصب غدا كالت: كومي بدلي وغسلي حتى تتغدين على ماتتغدين يكون وصل ان شاءالله.
مريم: منين اشتهي بعد؟ مو معقوله هذا كله طريق اول مره هيج يتأخر وميتصل.
مرت عمي: صل على محمد.
مريم: عليه افضل الصلاة والسلام بس اكتئبت ماادري ليش.

مرت عمي: اسم الله ماكو شي ان شاءالله.
مريم: ان شاءالله.
راحت مرت عمي بقيت اني كاعده خفت يكون صارله شي بالطريق الله ليكولها اتعوذت من الشيطان طلعت تليفوني ردت اتصل بي بس خفت اتصل ميقبل بعدين.
ظليت افكر اتصل لو مااتصل اتصل لو مااتصل اخر شي قررت اتصل ماعندي صبر بعد اتصلت عليه ميرد بعدين انكطع رجعت اتصلت هم انكطع رجعت دكيت بس هالمره اسمع صوت قريب عقلي صار ميجمع كمت من مكاني اتمشى بالبيت انكطع الاتصال.

اتخبلت شنو التليفون بي جني شنو القضيه امشي واسولف ويه روحي بصوت عالي وصلت لغرفتي واتصلت من جديد ردت افتح الباب سمعت تليفون يدك بس حسيت اتخبلت شنو هالصوت صوت تليفونه يدك هنا يدك بالغرفه يمكن فتحت الباب بسرعه الغرفه ظلمه بس دخلت حسيت واحد حضني كلبي اجه يوكف من الخوف.
حتى لساني من الخوف احسه انشل بس من عرفت هو حضنته وغمضت.
قيس: ههههه كشفتيني جنت اريد اخوفج شويه بعد بس استعجلتي.

من حضنته حسيت براحه شلون لو صارله شي الله ليكولها معناها راح افقد هالشعور بالراحه والامان والاستقرار والحمايه.
مريم: قيسان ليش هيجي والله الا شويه وكف كلبي ادك عليك مترد حرام عليك كلت صار بي شي وانوب هيجي تخلسني وتخبلني كلت طلعلي حرامي لو جني من الكنتور??.
قيس: هههههههههه شيسوي الجني بالكنتور بعدين انتي مخبله يعني دتسمعين تليفوني يدك هنا من تتصلين ماانتبهتي يعني؟

مريم: هو اني بقى براسي عقل حتى افكر لو انتبه قابل انت بمكان عادي حتى احلل وافكر انت بجبهه يعني شتتوقع يجي ابالي??؟
قيس: ههههه خلص يالله بعد عليمن تبجين خربتي الخطه كلها ولو ضحكيتني شلون جبانه??.
اجت مرت عمي ظلت تضحك من شافتني ابجي وهو يضحك كالت: ها شلوني خوش امثل؟
مريم: اني اكول عمتي بارده اشو مخايفه طلعتي متفقه ويه ابنج ??حرام عليكم والله زين ماانجلطت لو صار بأبني شي.
قيس: هههههههه اسم الله.

مريم: اي اسم الله والله كلبي لهسه يرجف ورجليه بادت.
سد الباب وكعد يمي حضني وباس خدي كلي: اشتاقيتلج واشتاقيت لخبالج.
مريم: خبالي??هو منو المسؤول عن خبالي؟ الله عليك هاي سالفه واحد عاقل يسويها بزوجته وهي حامل؟ بالله ارتفع ضغطي؟ بالله صدك تخبلت؟
قيس: ??اسف والله موقصدي حقج علي متوقعت هيج حتخافين.
مريم: اخاف بس اني دمي نشف والله يعني مو كافي مترد عالتليفون صدك اجه يصير بعقلي شي انوب هيج تخلسني??.

قيس: خلص اسف والله بس ردت اشوف رد فعلج من ترجعين ومتلكيني راجع ومن تتصلين وماارد عليج.
خليت راسي جتفه كتله: شتشوف تموتني غير.
اتنهد كال: قل لن يصيبنا الا ماكتب الله لنا.
مريم: يمه اسم الله لتكول هيج قيسان لتخوفني ماصدكت رجعت وطلعت منها سالم الحمدلله.
قيس: شكلت اني حتى اسم الله؟ شبيج هيج خوافه وماعندج ايمان؟
مريم: الايمان ماله علاقه بالموضوع الايمان مو معناتها ماعندي مشاعر ومااحس ومااضوج واخاف.

قيس: بعدين ماخلصت بعد كلولنه تعالوا اسبوع لحدما نشوف.
وخرت منه باوعتله ضحكت: هههه شوف غيرها بعد متخوفني. كافي شنو اليوم ناوي تقضي عليه.
سكت كال: يالله هسه كومي بدلي وغسلي حتى نتغدا ميت جوع منتظرج مااتغديت.
مريم: اي هسه دقايق حبي بس ابدل واغسل واصب الاكل سوده عليه لو متغدي وياهم ليش انتظرت.
كمت بدلت ورحت غسلت وصبيت الاكل.

جنت فرحانه وحاسه بنفسي مرتاحه عالاخر لان خلص ميروح بعد والحمدلله انتهت على خير وسلامه.
مر4 ايام على رجعته كتله: قيساان خل نسافر امنيتي اسافر لفد مكان ولامره مسافره ولا صاعده بطياره خل نروح للشمال نغير جو ونرتاح شويه مدام رجعت بالسلامه.
قيس: مااكدر ماالحك الخميس ارجع.
مريم: وين ترجع؟
قيس: التحق.
مريم: تحجي صدك؟
قيس: اي والله الخميس لازم ارجع التحق.

راسا دمعت وانعصر كلبي كتله: مو خلصتوا الاربع شهور شنو بعد؟
قيس: والله ماادري هي الاوامر هيج شنسوي بعد بس هالمره اسبوع ان شاءالله ونرجع.
مريم: والاسبوع قليل يعني؟
قيس: شبيدي متكوليلي بس عالاقل هالمره مو 14يوم بلكي وراها نرتاح.
مريم: زين ميصير تسوي اجازه مرضيه اي حجه يعني علمود متروح؟
قيس: شلون يصير بعدين شلون اعوف جماعتي يرحون واني كاعد بالبيت؟
مريم: واني؟ تفكر بجماعتك واني هنا يوميه اموت علمودك؟

قيس: ادري شفتيهم شالوا جنازتي؟
مريم: اسم الله لتكول هيج وتخوفني اسم الله عليك.
قيس: مريوم اريدج تديرين بالج على نفسج وعلى علاوي اريدج تاكلين زين اريده يطلع راسه مصلبخ مااريد واحد مايع. الاعمار بيد الله بس اريدج تسألين على بناتي اذا صارلي شي وتخليهم يشوفون اخوهم وتعلميه من الزغر يحبهم ويسأل عنهم زين حبي؟

الفصل التالي
جميع الفصول
روايات الكاتب
روايات مشابهة