رواية نيشان للكاتبة روز الفياض الفصل الثامن والثلاثون
مريم: شتردون؟ اريد انام ميصير انام تعبانه والله تعبانه رحموني.
صبت دموعي.
بيبي: خفنه عليج يابيبي.
امي: سوده عليه يايمه شمتعبج كولي؟
مريم: اني وقيس اليوم انفصلنه.
امي كمزت وبيبي كالت: يعني شنو انفصلتوا؟ تردون تطلعون تسكنون بيت بحدكم؟
مريم: لايعني اتطلكنه.
بيبي: يبوووي.
وامي وياها.
مريم: رجاءا مناقصه مناحه كلبي خلصان إلى يريد يبجي خل يروح يبجي بعيد عني.
رادوا يعرفون تفاصيل واني مالي خلك حتى اتنفس مو بعد احجي عفتهم ورحت لغرفة امي وقفلت الباب علي.
وره شويه طلعت ملكيت احد كلهم نازلين جوه اكيد يستفسرون من قيس.
شفت علاوي نايم اخذته يمي عالجربايه وخليت راسي وكلت ياربي اريد انام نومه كون مثل نومة اهل الكهف بس مااريد اكعد بعد ليوم الدين.
صدك نمت غفيت.
الصبح كعدت كالمعتاد لبست وكلت لامي رايحه للمستشفى.
امي: اوكفي يامستشفى؟ بيا حال هسه احنه؟ يطبه مرض الدوام اكعدي خلينه نتفاهم ونحجي.
مريم: مااريد احجي ومااريد اتفاهم ومااريد شي من احد بس عوفوني مع الاسف إلى خطفوني مذابحوني وريحوني.
عفتها ونزلت. صاحت وراي: لج انتي هسه مطلقه لازم تلزمين عده تعاي يادوام وين رايحه.
درت عليها: الزمها بالكبر ان شاءالله.
عفتها وطلعت اخذت تكسي لاول مره بحياتي اصعد تكسي وحدي بس مخفت ولافكرت شيريد يصير يعني؟
وصلت بديت بشغلي ودموعي على خدي وره شويه مكدرت اكمل بعد لزمني راسي رحت لوحده من السسترات قاستلي ضغطي كلتلي مرتفع.
رحت للدكتور حجيتله كلي: مو شرط يكون عندج مرض مزمن ومااريد استعجل واكتبلج علاج يمكن ماره بوضع نفسي مو تمام. بس هسه مؤقتا راح اخليهم يخلولج مغذي واذا تردين ابقي اليوم بالمستشفى حتى نطمئن عليج.
طلعت من يمه خابرت لامي طلبت منها تجي خفت كل شي يصير منو يكللهم اذا صار بيه شي حتى ميس ماكو.
بقيت كاعده لحدما اجت امي وكتلها رحت خلولي مغذي واتمددت وهي يمي تحجي وتدردم لان اجيت للدوام ومااخذت حجيها.
مريم: يمه اذا ابقى يمكم اموت كلكم تحجون وكلكم تنتقدون وكلكم تلحون عايفينه هو وتركضون وراي واني روحي طالعه ان شاء الله تطلع صدك واخلص.
امي: لج غير نحجي من حركت كلبنه غير نريد نفهم ونوصل لحل غير نريد نعرف شنتصرف.
مريم: لتتصرفون اي شي ابوس ايدج كافي عوفوني بحالي رحموني احسن اموت نفسي يالله؟
امي: يمه اسم الله شحدج غير اموتج بايدي.
باوعتلها ضحكت شكد فقيره امي.
هي هم ضحكت.
بقينه هيج بعدين نمت ومن خلص المغذي كعدتني رحنه للبيت.
دخلنه شفت مرت عمي واكفه يم باب المطبخ اجت علينه باوعت لايدي بيها الكانونه.
مرت عمي: سلامات شبيج؟
امي: ماكو شي ضغطها ارتفع واخذتها للمستشفى خلولها مغذي وهسه نزل الحمدلله وجبتها.
مرت عمي: اسم الله عليج عندج العافيه.
باستني من خدي ونزلت دمعتي هي من شافتني بجيت بجت وشبكتني.
مرت عمي: لج انتي بتي الماجابتج بطني اني ربيتج مو امج والله يعلم شلون مشلوع كلبي عليج.
مجاوبتها ظلت هي وامي تحجي اني رحت كعدت عالدرج وتجيت راسي عالحايط واباوعلهم يحللون ويسالون ويجاوبون ويستنتجون على هواهم.
سمعت صوت سياره بره شويه وانفتح الباب محد دخل بس شفت ايد انمدت عالسركي إلى بالكاع عرفته قيس الظاهر يريد يدخل السياره كمت وصعدت.
صعدت امي وراي جايبه علاوي نورس بالدوام واخواني هم دوامهم عصري رايحين للمدرسه.
سوتلنه امي غدا عالسريع واتغدينه ورحت نمت اني وابني حضنته يشبه قيس.
العصر سمعت صوت عمي شويه ودخل يمي بالغرفه سلم وكعد.
عمي: ها بابا شلون صرتي؟
مريم: الحمدلله عمو زينه.
عمي: ان شاءالله. اني هسه طالع ومن ارجع امر عليج اشوفج ونحجي. زين بابا؟
مريم: ان شاءالله عمو.
عمي: ها ام مريم اليوم عشانه يمكم شتكولين؟
امي: هلا بيك ابو قيس بيتكم هذا تدلل.
عمي: انعم الله عليكم. يالله رايح اني هسه مع السلامه.
اني وامي مع السلامه.
بالليل امي ونورس جهزوا العشا مقبلوا اساعدهم طلعت بره بسطح شقتنه كعدت اباوع للسما وافكر ليش الانسان من يكبر يظل يدور معوقات ويخلق من شغلات بسيطه مشكله.
حسيت نسمة هوا بارده مرت رجفت وكشيت اتذكرت من جنه كاعدين اني وياه بالحديقه من جنت حامل وكتله ليش الناس متعيش مثل المسلسلات التركيه؟
وهسه هم اسأل نفسي ليش؟
فكرت هي المسلسلات التركيه كولها مشاكل توصل المشكله لباب الحل وترجع من جديد تنعاد وتتعقد.
اتذكر من كلي احنه زواجنه مثل المسلسلات التركيه ضحكت كلت اي صح وهذا الوضع اكبر دليل.
صعدوا عمي ومرت عمي وبيبي صبينه العشا وكعدنه ناكل بدون حجي الكل متوتر بعدين اشتغلت وكاحة علاوي وظل يلعب بالاكل ويصيح وظلوا يلعبون وياه الحمدلله خف التوتر وشتت انتباهي من الوضع لان مليت من التفكير وكل شويه اعيد شريط الاحداث براسي.
بعد العشا كعدوا يشربون جاي ويسولفون بموضوع خطوبه زيد.
محددين موعد الحفله مالت المهر بعد اسبوعين.
من خلصوا حجي دار عمي كلي: مريم تره إلى صار البارحه منكم انتي وقيس مو حلو.
مجاوبت دنكت وضجت اتمنيت هالموضوع مينفتح.
بيبي: لعبتوا بينه لعب حسبي الله على ابليسكم همزين الطلاك مو شلون ماجان واله شروط؟