رواية نيشان للكاتبة روز الفياض الفصل التاسع والثلاثون
مريم: عمو ماله داعي نحجي بهالموضوع هذا إلى صار صار وانتهى واني إلى كتله يطلكني مزعلانه منه مااكدر ازعل من قيس لو شيسوي مو اول وحده اني تتزوج ابن عمها وتتطلك.
مسحت دموعي قبل لاتوكع.
عمي: ميصير بابا الطلاق مثل الزواج اله شروط يالله يعتبر صحيح وهاي الشروط ممتوفره الحمدلله ابسط مابيها نطقها وحجاها بلحظة عصبيه فمعناها هالطلاق باطل.
باوعتله كتله: عمو شنو باطل؟ هو كلي طالك شيسموها هاي؟
عمي: يسموها جان عصبي اكيد مضغوط وانتي لحيتي عليه.
ظلوا يحجون وينصحون ويلومون ويجبرون ويكسرون.
من راحوا امي لبست عبايتها.
مريم: ها يمه وين؟
امي: رايحه لبيت الشيخ اريد اسأله صدك هالطلاك باطل؟
مريم: لاتسألين ولاهم يحزنون اني بكل الحالات ماارجع بعد.
امي: تاكلين تبن شنو هو الطلاك سهل لو حلو حتى مترجعين ماعندي بنات تتطلك اني افتهمتي؟
راحت رجعت وره ساعه مبتسمه عرفت الجواب بدون مااسألها واسمعها بغرفتها تحجي ويه مرت عمي اكيد تتناقش وياها بالموضوع مو نسوان حلف شمال الاطلسي اول مره اشوف نسوان حما هيج على كل شي متفقات.
رجعت ميس من السفر وحجيتلها اتخبلت.
ميس: مريم موضوعكم كله من اوله غريب يعني حبج اله بسرعه هيج شلون؟ بعدين خل نفرض انتي تحبيه من الاول وهو هم يحبج بس محاسين او ممفكرين ابعض بهيج طريقه بس بعدين صارت ظروف قسريه واتزوجتوا وجنتوا مثل طيور الحب شنو إلى اتغير معقوله بهالسهوله تتغيرون وتخلقون مشاكل مالها وجود اكعدوا سوه واحجوا اتصارحوا احجوا كل شي بصراحه حتى تحلون الموضوع صح لتستعجلون انطوا نفسك فرصه.
مريم: خلص كلبي.
ميس: ميخالف حبيبتي زوجج اتحمليه شويه امي وامج شلون تحملوا ابوي وابوج الله يرحمه وعاشوا كل العمر سوه.
مريم: المشكله احس نفسي ثكيله عليه حمل جبير ومخنوك منه.
ميس: حتى لو خليه هو يحجي مو انتي لتخلين الغلط منج حبيبتي اصبري عليه شويه اني متأكده يحبج مده يرتاح ويرجع طبيعي.
مريم: ماادري تعبت.
ميس: الله كريم واذا يغار من همام كليله تره غلطان همام يحب بنيه من اهلنه وان شاءالله عالاسبوع الجاي يخطبها ههههه.
مريم: ماادري على شنو يغار؟
ميس: حقه كل رجال يغار على مرته وهو من البدايه جان اكو مشاكل غامضه بينكم واجت سالفت همام حجه هههه.
مريم: على شنو تضحكين بس اريد افهم؟
ميس: على همام هههه هو همام هم ينغار منه?? بس صدك تره راح يخطبوله الاسبوع الجاي ان شاءالله جان كتلج تعالي وياي بس خاف الحب يهجم علينه ويخرب الخطبه??.
مريم: الحمدلله العقل زينه??.
بدوا يتحضرون لمهر زيد نورس امي اشتروا ملابس وجهزوا نفسهم اني قررت مااروح مالي خلك.
قبلها بيوم بالليل اجه زيد سلم اني جنت بالغرفه انوم علاوي دك الباب ودخل هو ونورس.
زيد: ها ليش نومتيه مشفناه اليوم.
مريم: لا احسن تعب كاعد من وكت.
زيد: مريم باجر مو متجين.
باوعت لنورس اكيد هي البلبل الفتان كلتله.
مريم: مااكدر اجي زيد مالي خلك.
زيد: بعدج زعلانه مني؟
مريم: لا.
زيد: زين؟
مريم: مالي خلك والله مو اكثر يعني وجودي ماله داعي اروح ضايجه واضوجكم شنو الفايده ابقى بالبيت اني وعلاوي احسن او يمكن اروح للعياده اذا راح علاوي وياكم.
زيد: كولي والله مزعلانه مني؟
باوعتله كسر خاطري كتله: والله مو منك ولا علمودك مااتصور بعدني زعلانه منك بس مالي خلك.
زيد: واذا كتلج لخاطري؟
سكتت كال: مريم ادري وضعنه غريب بس انتي نسيتي وعشتي واني هم نسيت واريد اعيش وفرحان واريدكم فرحانين وياي.
صفنت حسيت بالغرابه ماادري ليش.
هزيت راسي.
زيد: شنو؟
مريم: ان شاءالله يصير خير.
زيد: عفيه.
طلع حسيته فرحان رغم هو اكبر مني بس حسيت العكس حسيته زغير ومراهق وفرحان حسيته فعلا اخوي الزغير شكد غريبه الحياة.
ثاني يوم الصبح كعدتني نورس من الصبح حتى نروح للسوك.
رحنه عالسريع اشتريت فستان بدون ردن اوف وايت وبي ورد ماروني وكعب ماروني واشتريت لعلاوي قاط نيلي وحذاء ورجعنه للبيت.
نورس الظهر راحت للصالون اني سشورت شعري ولفيته للعصر لبست وفتحته وخليت مكياج ولبست علاوي القاط طلع يجنن عليه وهو هلكدوته قزم يضحك.
منزلت جوه كلهم جوه بس اني وعلاوي فوك خلصت اتصلت على نورس اجت اخذته.
نورس: يالله بعد امشي نزلي اجت السيارات راح نروح للقاعه كبل.
مريم: معناها انطيني علاوي وروحي خليه عندي احسن.
نزلنه جوه شفت قيس بالغرفه واكف عالمرايه يلبس هم لابس بدله مثل ابنه.
رحت كعدت يم بيبي وامي انطيتهم علاوي العريس الزغير كلهم متعجبين بي لان لابس بدله اخذوه ركض لقيس.
اسمعه يضحك واشوفهم يصوروهم سوا
طلعنه للسيارات بيبي ومرت عمي وزيد بسيارة قيس.
واني وغيث وعائلته بسيارته ونورس ويه عائلة ليث.
والبقيه بالسيارات الباقيه.
حلوه جانت الحفله اني معشت ولاجربت هيج اجواء خطوبه ولاحتى الزواج جان كل شي مختصر وعالكد.
فرحت لزيد من شفته فرحان وخطيبته حلوه ولايكتله.
خلصنه والناس راحت بقوا بس الاهل دخلوا الولد للقاعه ركصوا وغنوا شفت قيس وياهم واكف بدون عكازه لاول مره ويضحك وشايل علاوي يركصه.