رواية نيشان للكاتبة روز الفياض الفصل الأربعون
كلما اشوفه يمشي ويعرج كلبي ينعصر واموت من القهر.
صح يعرج شي بسيط مو مثل الاول بس هم مقهوره مو سهله اشوفه هيج.
جنت اسولف ويه ميس بس عيني عليه شلون فرحان بعلاوي وكل شويه يبوسه وبناته واكفين يمه يركصون.
حسيت مالي مكان بهالصوره الحلوه.
ميس: مو احجي وياج اشو حاكرتني؟
مسحت دمعتي قبل لتوكع.
مريم: اسمعج. بس اباوع لعلاوي حبيبي طالع حلو مو؟
ميس: ايييي. علاوي لو ابو علاوي؟
مريم: لا علاوي??.
ميس: هاا مدام بس علاوي معناها اي يخبل طالع حبيبي عين الله عليه ماشاءالله نسخه من ابوه حتى الغمازه إلى بحنجه يطلع صاك على ابوه.
مريم: ??اكول احترمي نفسج لا اهفج بالتليفون.
ميس: شبيج شحجينه??توه مسويه نفسج ممهتمه بس لعلاوي.
مريم: اي طبعا.
ميس: تصدكين من دخلت شفته واكف بره وبنات دخلوا كدامي يمكن من اهل العروس وحده تكول للثانيه هذا اخوه الصاك شوفيه شلون يخبل.
مريم: عليييييج الله؟
ميس: اي والله شبيج اصلا احلى واحد باخوانه هو وثكيل ومؤدب حقهم البنات يتخبلون عليه مشفتي من دخل شلون اخت العروس تباوعله وكل شويه تروح تحاجيه؟
مريم: جذابه??؟ مشفت شي شوكت هالحجي شسوت المعزايه؟
ميس: دباوعيلها شلون تتموع وراقبيها شلون تباوعله.
ظليت اباوعلها صدك تتموع: عابت لهالخلقه وهالشكول صدك تتموع متستحي متشوفه شايل ابنه وبناته وياه؟ كرهتها وكرهت حتى اختها??.
وين هاي العوبه نورس خل تروح تسوي شي.
ميس: شتسوي مثلا انتو مو اتطلكتوا خلص شلج علاقه بعد باللي تتموع والي تباوع خليه يشوف حياته خوما يبقى وحده رجال وسيم الف وحده تتمناه فرصه متتفوت.
مريم: وبعدين بقلة الادب هاي لتتغزلين بي كدامي لااكص لسانج??بعدين طلاكنه باطل مو كتلج لان جان عصبي.
ميس: يمه يمه معرفتج من شوكت باطل لحد قبل دقايق جان تمام??.
مريم: قابل بكيفي الشرع هيجي يكول??.
ميس: اييي الشرع نسيت??.
كمت رحت للحمام رجعت مالكيت ميس وامها سألت امي كالت راحوا.
كلت لنورس روحي جيبي علاوي.
طلعت التليفون اتصلت بميس: الو؟
ميس: الو؟
مريم: شوكت طلعتي؟ غير تنتظريني؟
ميس: شاانتظر تأخرنه بعدين بيني وبينج ضجت من اخت العروس مصختها واخذتني الغيره على زوج اختي قيس ردت اروح اضربها بس كلت عيب??.
مريم: شسوت قليلة الادب عديمه الربايه؟
ميس: خير من الله.
مريم: والله كرهتها والله كرهتها??. بس مو صوجها صوجه هو شعنده واكف هناك صار ساعه؟ رجال متزوج يجي يكعد يم زوجته مو يم البنات شعنده.
ميس: شيسوي مسكين زوجته زعلانه ومتحجي وياه اتطلكوا بعد ميصير يكعد يمها.
مريم: مااتطلكوا مااتطلكوا كتلج اسم الله طلاكهم باطل.
ميس: منو همه إلى طلاكهم باطل؟
مريم: لج احنه اني وقيس طلاكنه باطل.
. احم. احم.
التفتت عالكرسي إلى بصفي شفته كاعد يمي وبيده علاوي واافشلاته بس لا سمعني.
مريم: يالله ميس اروح اني.
ميس: اي حبي براحتج بس سلمينه على ابو علاوي وكليله شويه خل يدني الكرسي شدعوه هلكد لازك بيج?? يالله باي.
مريم: ??
ظليت اباوع هاي وينها معناها مرايحه للبيت وكفت اباوع شفتها يم الباب طلعت واشرتلي باي ايا خبله بس فضحتني.
حسيت خدودي اشتعلت نار مديت ايدي على علاوي اخذه منه لزم ايدي استحيت وكلبي ظل يدك.
قيس: مريم اكعدي شويه.
حسيت كلبي راح ينفجر من كدما يدك بسرعه استحيت عبالك ديسمع دكات كلبي.
كعدت بس مباوعتله.
قيس: شلونج ام علاوي؟
مريم: الحمدلله.
حسيت صوتي كوه يطلع خررب شبيه هيج مستحيه ومكيفه مو اني الكتله طلكني عابتلي شهالخفه ثكلي شويه??.
قيس: شدعوه صار ساعه واكف كبالج حتى مااجيتي سلمتي؟
مريم: وين واكف مشفتك ممنتبهه.
قيس: هاا هناك جنت واكف احجي ويه اخت العروس خوش بنيه حبابه.
مريم: عابتلها وعابت شكلها شكد تتموع عبالك مشايفه رجال يعني مشافت علاوي بيدك مشافت البنات وياك؟ شدعوه هيج مجلبه بيك؟ ??
قيس: لا كلش ممنتبهه ولاشايفتني اصلا.
مريم: مو قصدي اباوع عليك بالصدفه انتبهتلها.
قيس: اكيد اكيد عموما هي الظاهر عبالها ممتزوج سألتني على علاوي اتفاجأت من كتلها ابني وسألتني عن زوجتي.
مريم: وهي شكو تسألك متزوج لو لا؟ وشنو هالميانه توها شافتك وانت هم شنو هالميانه جنك مشايفه بنات قبل؟ وشدعوه هيج كبل حجيتوا بأشياء خاصه؟
قيس: بعد هيج صار الظاهر انعجبت بعلاوي.
مريم: اييي. بس مو صوجها.
قيس: اي اكيد مو صوجها صوج مرتي إلى حاكرتني وكاعده تدك سوالف ولاعبالك موجود.
مريم: محاكرتك??.
قيس: لعد شنو؟ شتسميها؟
مريم: انت مو طلكتني بعد شنو؟
قيس: طلاكنه باطل.
مريم: منو يكول؟
قيس: الشرع??.
مريم: ??عيب تتسمع على حجيي واصلا مو عنك جنت احجي.
قيس: هاا بس اني سمعتج كلتي اني وقيس.
مريم: شتريد هسه؟
قيس: اريدج ترجعين اريد مرتي.
مريم: ماارجع قيس صعب.
اتنهد شويه.
قيس: مريوم ادري اني ضوجتج وضغطت عليج بس مو بيدي مريم احبج بس من اشوف نفسي حتى مشي مثل الناس طبيعي مااكدر امشي ماادري شيصير بيه انقهر واحس شي ناقص بيه واظل افكر يمكن انتي هسه متحبيني لو تنظريلي نظره مختلفه عن الاول وخصوصا من اشوف اخو ميس هذا ماادري ليش مااطيقه مااتحمله افكر هسه يمكن هذا معجب بيج يمكن انتي هسه هم تعجبين بي انسان كامل.