رواية نيشان للكاتبة روز الفياض الفصل التاسع عشر
قيس: شنو شكو؟ كافي مليت من هالدوخه.
مريم: والبنات؟
قيس: عادي يتعودون بس بالبدايه بعدين يتعودون.
رجعت درت بقيت ساكته فتره بعدين حسيت بي هم دار وانطاني ظهره.
مريم: قيس؟
قيس: نعم؟
مريم: لتطلكها. بناتك حرام يتأذون خطيه.
قيس: معناها اطلكج. لو انتي لو هي اختاري مااكدر عليكم انتو الاثنين سوه.
الشي إلى حسيت بي بلحظتها مااعرف اوصفه من شخص يحس بالخيبه والخذلان من يحس بالفشله من يكون متوقع شي وينصدم بشي ثاني عكس توقعاته تماما بس المار بهيج مواقف راح يعرف هالشعور إلى تحس روحك ماادري شصار بيها وكلبك خوه مابيه حيل يدك بعد.
من تحب شخص فجأه بدون مقدمات وتحسه يكملك مخلوق الك كل شي بي مفصل علمودك فاهمه من قبل ليحجي تعرف نظرات عيونه ونبرة صوته وبحة صوته شنو معناها وتتمنى هو يبادلك نفس الشعور بس فجأه تنصدم بالعكس.
حاولت بكل قوه عندي بكل ذرة باقيه من كرامتي وكبريائي انو ماابجي بس بجيت مقهوره هو سوه إلى عليه بنظره اسمي كدام الناس اتزوجت واتطلكت حتى اذا جنت مو بنيه عادي بعدين مو مشكله.
لتحاولين تستجدين حبه ولتذلين نفسج اكثر حافظي على الباقي من كرامتج اذا اكو باقي لان انتي مناقصج شي الحمدلله مديت ايدي على كيف مسحت دموعي بسكوت وظليت اخذ شهيق وزفير حتى من احجي صوتي ميرتعش ويبين باجيه.
مريم: اكيد اني. طلكني اني احسن.
حسيت بي تحرك وصار قريب يمي حضني على كيف وباس جتفي.
قيس: والله؟
مريم: والله.
قيس: حجي جبير هذا.
مريم: حجي مفيد هذا.
قيس: شنو الفايده البي بالله فهميني؟
مريم: بناتك وزوجتك اهم.
قيس: امم زوجتي؟ وانتي شنو؟
مريم: المفروض هم زوجتك.
قيس: وليش المفروض؟
سكتت خاف ابجي.
قيس: مريم احجي وياج؟
مريم: لان هذا زواج مع وقف التنفيذ.
قيس: وبعد؟
مريم: وبس. احنه جنه مقررين نساير بيبي ومنفع الموضوع وصار صدك واتصور هذا اكثر من المطلوب.
قيس: مافهمت؟
مريم: انت بالاصل ليش اتزوجتني؟ مو لان محد يمكن يتزوجني اذا يعرفون انخطفت؟
بس من اتزوج حتى لو بس شكل ومنظر كدام الناس لو بس شهر كافي يفي بالغرض بعدين عادي اذا تزوجت مره ثانيه ماكو مشكله سترت على بت عمك يعني ومقصرت.
قيس: ياغرض يامشكله؟
وصلت مرحله مااكدر احبس دموعي اكثر من هيج بجيت كتله: اني مااعتب على الناس اذا مصدكوني من اكول محد اتدنالي من إلى خطفوني وبعدني بنيه مااعتب حقهم لان انتو اهلي وممصدكين زيد يكول حتى لو مسوولج شي مااكدر اتزوجج لان جنتي بايته ابيت كله رياجيل غرب عبالك جنت رايحه وياهم سياحه لو رايحه بكيفي.
وانت صح مو مثله وسويت إلى غيرك ميسويه بس هم تفكيرك مثله.
قيس: مو صحيح هالكلام. ولا كلمه بي صحيحه منو كلج تفكيري مثل زيد؟ منين جبتي هالحجي؟
مريم: لا صحيح.
قيس: عندج دليل على هالاتهام ههه.
مريم: اي عندي النيشان على كولت بيبي.
سكت شويه بعدين كال: الموضوع ابد مو هيج.
ماحجيت ظليت امسح بدموعي بعدين
درت ضميت راسي بحضنه حضني كال: انتي تعرفين بيبيتج موديلها قديم وتريد كل شي مثل ماجانوا على ايامها نيشان وهالسوالف.
واني ماردت اضغط عليج ادري الموضوع صعب لان جنت اخوج على كولتج ماردتج تضوجين مني او تنفرين مني وسويت شغلة النيشان حتى نسكتها يعني لحدما تتعودين علي بالتحديث الجديد مو اكثر.
سكت واني هم ماحجيت صار هدوء بس صوت شهكاتي ملوث الجو.
قيس: مريومه؟ على كيفج وياي لتصيرين انتي وابرار عليه تره تعبان ومابيه حيلكم اثنينكم كل وحده منكم تنتقم مني بطريقتها.
باوعتله هو باوعلي كال: مو هيج.
مريم: شنو؟ ??
قيس: تنتقمين.
مريم: يعني شنو؟
قيس: انتقامج قوي.
مريم: ياانتقام؟
قيس: هذا ??
حضني وباس راسي كلي: هذا مو زواج مؤقت ولا هالخرابيط إلى كلتيها ولا تفكيري مثل زيد ولا ممصدكج ولا اكو زواج ثاني بعد.
غمضت عيوني وبقيت ساكته.
قيس: لج اني كوه متحمل ولازم نفسي كلما اوصلج اضغط على نفسي كوه حتى اتراجع كلما احس بعد مااتحمل اسحب نفسي لان اخاف عليج.
بقيت مغمضه وساكته واكو دموع مرات تنزل مالها طعم خصوصا بعد الصلح مالها معنى من تتصافى الكلوب نزلت منهم كم وحده مسحها هو: خلص كافي بجي مااتصورت راح تفهميها هيج جان المفروض افهمج من الاول واشرحلج حتى ميصير سوء فهم.
كمت رحت غسلت وجهي واجيت خليت راسي عالمخده وانطيته ظهري ونمت.
قيس: هاي شنو بعد؟
التفتت عليه: شنو؟
قيس: ادري غير شرحنه وفسرنه واعترفنه.
اشو رحتي هناك؟ غير انتهى الموضوع وصار واضح وتم اخذ الموافقه؟
مريم: اريد انام نعست.
قيس: يعني حرمتيني من النوم وهسه تردين تنامين؟
مجاوبته ماادري ليش بس حسيت نفسي احرجته ويمكن احرجت نفسي.
سحبني بحضنه كلي: زين نامي هنا.
حضني وباس خدي كلي: بعدج زعلانه؟ ادري غير تصالحنه.
ماحجيت غمضت عيوني ردت انام مدام الله هاديه ومخليني بحضنه اخاف يرجع بكلامه بعدين ويتصرف مثل الايام الفاتت خليني هسه بحضنه انام بهدوء بدون تفكير اريد احس هو ويايه دوم من زغري لحدما اموت شايل عني الهم وحاسبلي خطواتي خطوه خطوه ومهدلي مستقبلي وفرحان بتعبه ويايه وممنون من راحتي إلى هو دافع ثمنها من راحته.
قيس: مريوم؟
مريم: امم؟