قصص و روايات - قصص رائعة :

رواية نيشان للكاتبة روز الفياض الفصل الأول

رواية نيشان للكاتبة روز الفياض الفصل الأول

رواية نيشان للكاتبة روز الفياض الفصل الأول

هلو شلونكم اليوم القصة عني اني مريم طالبه مرحله اخيره طب اسنان 2خوات واخوان2 زغار اختي نورس مرحله ثانيه علوم حاسبات واخواني سجاد وليث زغار بالمدرسه ابوي اتوفى قبل 10سنوات وامي بس عدنه حالتنه الماديه تعبانه بس مستورين الحمدلله امي جانت تسوي كل شي حتى منحتاج تخيط وتسوي معجنات ويشتروهن منها المحلات وتسوي شغلات كوشات وصواني مهر وهالسوالف رغم احنه ساكنين ويه بيت جدو اهل ابويه بالطابق الفوك لان امي ماعدها احد بس اخ واحد وهي وياه على خلاف علمود الورث. وجوه بيبي وبيت عمي ابو قيس جدو متوفي صار سنتين وعمي عنده 4 ولد قيس ضابط بالامن ومتزوج بنت خالته وعنده 3 بنات زغار.

ليث موظف بشركة اتصالات ومتزوج بنيه هو جان يحبها وساكنين بحدهم مو بيت جدو.
غيث مدير مدرسه وهم متزوج معلمه وياه وساكنين وحدهم.
وزيد الزغير اكبر مني ب3سنين يشتغل بتركيا صار سنه وللعلم هذا حبيبي احبه ويحبني ومحد يدري بس بيبي لان متفوتها فايته ولاطبيخه بايته.

بيت عمي مجانوا ممقصرين ويانه ابد بالعكس خصوصا من دخلنه كليه الولد جانوا متكفلين بأغلب احتياجاتنه اني ونورس وميقبلون امي تشتغل بس امي نفسها عزيزه حيل.
بيبي جانت تمثل الحكومه بالبيت حيل متسلطه صح حنونه بس شديده وكل شي بأمرها.
مرت عمي جانت زينه وتحبنه لان احنه مابينه اذيه ونساعدها بالبيت لان ماعدها بنات وزوجة قيس ابرار صح بنت اختها بس من النوع إلى لسانها طويل وعصبيه متتحمل حجايه من احد.

ولد عمي الله يحفظهم جانوا متدينين وحبابين وخدومين ويحبونه حيل ربينه وياهم فجنه خواتهم الزغار طبعا ماعدا زيد
اعترفلي يحبني من دخلت كليه راح ويايه للكليه حتى يراويني ويدليني وكلي احبج.
استحيت اكيد واتفاجأت رغم اني حاسه بي وبنظراته.
مرت السنين وهسه اني بآخر مرحله وزيد منتظرني اخلص حتى يخطبني ونتزوج واسافر وياه تركيا.

كلما ارجع من الدوام اسمع هوسه جوه يم بيت عمي ابرار وقيس لو ابرار ومرت عمي لو ابرار وبيبي.
طبعا احنه درج خارجي من الحديقه ونصعد منفصلين بحدنه يعني.
قيس حباب وخلوق وكولها تضغط عليه بيبي تريده يتزوج وحده ثانيه حتى يصير عنده ولد ومرت عمي تلمح بس على هالموضوع متكدر تحجي بالخط العريض لان بنت اختها.
وابرار تضغط عليه تريد بيت وحدها.

وقيس متحمل الكل وساكت لو بالدوام لو من يرجع ينام حتى يخلص من حنتهم لان ميكدر يتزوج وحده ثانيه هو هيج ممرتاح شلون اذا اتزوج ثانيه.
وميكدر يطلع ابرار بيت وحدها لان ميكدر يعوف امه وابوه وبيبي واحنه بس هو ويانه بالبيت وكل احنه مسؤوليته.
اليوم الصبح عمي ومرت عمي وابرار وبناتها راحوا لايران سياحه.
كعدنه الصبح نزلنه نتريك يم بيبي وقيس وجان زيد موجود جاي اجازه شهر يخلص اوراق ومعاملات ويرجع يروح لتركيا.

رحنه للدوام وصلنه قيس بسيارته اني ونورس وبعدين اخذ زيد يوصله.
جان اليوم بطيئ بس هادئ كالمعتاد جنت انعزاليه مااحب اختلط بالطلاب والطالبات لان اغلبهم جانوا سطحيين يدورون مظهر وكشخه وماركات صح اني مناقصني شي بس جنت بسيطه بلبسي بمكياجي بتصرفاتي مااحب اتكلف وابالغ شكلي جان مقبول سمرا وطويله وجسمي متروس وشعري حلو وطوله وسط وعيوني حلوه وكبار ملامحي حلوه بس جنت ظايجه من شكلي لان سمرا.

جان عندي صديقه وحده مقربه الباقيات صداقتي بيهم عاديه بس ميس جانت مقربه مني. هوايه جانوا يصارحوني بس اني احب زيد واريد اكمل دراستي مهما كان الثمن حتى ارفع راس امي واشيل عنها التعب شويه واخليها ترتاح من همي.
ميس: خرب يومج مريم هذا هم ينرفض شوفي الطول شوفي الكشخه شوفي سيارته تخبل وراح يموت عليج.
مريم: ادري بس ما يسوى ظفر حبيبي.

ميس: حبيبج المجهول حتى اسمه منعرفه بس نعرف ابن عمج لج هي إلى تحب ابن عمها هم تعتبر حابه بحياتها ومجربه الحب؟
مريم: كافي عليج هيج معلومه بعدين اهم معلومه هي هاي ابن عمي فديته ولعلمج الما تحب ابن عمها عمرها خساره هو هذا الحب الحلال الحب الصدوك الحب الحقيقي.
ميس: على كيفج ام الحب على كيفج ماعدنه ابن عم شنسوي؟ منين نجيب؟

ميس حبابه ومؤدبه وحلوه حيل رغم وابوها دكتور واهلها ناس محترمين وحالتهم الماديه كولش زينه بس متواضعه.
خلصنه دوام وطلعنه اني وياها وصلنه للباب هي وكفت تشوف سيارتهم واني شفت سيارتنه ورحت اريد اعبر الشارع حتى اصعد بس فجأه وكفت سياره مظلله ونزلوا منها 3 ولد ماشفت شكلهم ملثمين نزلوا جروني للسياره واني اصرخ ماادري شنو الفلم.
صرخت بجيت ردت افرغ نفسي بكل طريقه بس منين لي حيلهم.

محد اتدنه لاطلاب ولاسواق السيارات الواكفه محد فزعلي.
بس صعدوني ربطوا ايديه وشفت هذا الكاعد كدام بيده مسدس انرعبت كلي: اسكتي وبدون صوت حتى منأذيج.
اني من الخوف ماادري اذا جنت داحجي لو اصرخ لو ساكته مااعرف وضعي شنو شدو عيوني واني اتوسل بيهم.
مريم: شتردون مني عفيه شتردون؟ والله ممسويه شي شتردون مني؟ منو انتو؟
محد يجاوبني مشت بينه السياره مسافه تقريبا نص ساعه او ساعه ماادري من خوفي ورعبي ماعندي ادراك.

الفصل التالي
جميع الفصول
روايات الكاتب
روايات مشابهة