رواية معشوقتي المجنونة ج2 للكاتبة ابتسام محمود الصيري الفصل العاشر
الدكتوره بعمليه: بصى يا مدام دانيه انا كتبتلك ع مغذي و برشام للترجيع و مسكن لانقبضات الرحم بس اهم شئ الراحه و الغذا الكويس و التعب اللى عندك بيحصل ل اي مدام حامل الترجيع الدوخه الم في الرحم ما تطقيش ريحه معينه كل ده عشان البيبي لسه بيتتكون و ان شاء الله بعد 3 شهور الوحم دول هتبقى زي كويسه
دانيه بصت للدكتوره: بس انا بقالى فتره متضايقه و مش بطيق جوزى مع اني بحبه و بتخانق مع اي حد.
الدكتوره بعمليه: الاعراض الاكتئاب اللى عندك بتحصل ل واحده ما بين عشر ستات
نايا: و ايه اسبابه
الدكتوره بعمليه: بيحصل اكتئاب الحمل لأسباب مختلفة، أحداث الحياة المجهدة، ومن يكون الحمل متعب بما فيه الكفاية لحدوث الاكتئاب، وممكن يكون الحمل بمثابة الزناد اللي يؤدي إلى اكتئاب أكثر خطورة عند النساء اللي عندهم تقدير منخفض للنفس،.
و ممكن اوقات كتير تكوني كارهه البيبي ذات نفسه عادى جدا و ماتقلقيش اول ما البيبي يشرف كل الاعراض دي هتروح و هتحبيه جدا
دانيه: طيب انا مش بحب الزاتون ولا الكبده خالص بس ريحتهم في مناخيري و نفسي فيهم.
الدكتوره بعمليه: برده عادى ده اسمه الوحم بيكون فيه مشيمه بتجمع دم الام و دم الطفل لكن مبيخطلتش دم الام ع دم الطفل و لو اختلط بيحصل وفاه في الحال لا قدر الله لان كل دم بيكون فصيله معينه، المهم المشيمه دي البيبي بياخد اللى هو عايزه منها و طبعا اي حاجه بتوصله من جسمك انتى، ف احيانا هو بيكون محتاج ماده معينه و دي مش موجوده في جسمك ف البيبي بيطلبه من المشيمه و المشيمه توصل الاوردر ل دمك دمك يوصله ل مخك حضرتك ف تتوحمي.
نايا ب ضحك: لا حلوه ف تتوحمي تاكلي و بكده البيبي يتسلطن، اتسلطن يا روح خالتو براحتك ده انا ههدك بس اشوفك
الدكتوره ابتسمت ليهم: في اي استفسار تانى
دانيه: ميرسي لحضرتك و قامه نزلو.
عند مهيمن
وصل البيت ملقاش نايا اخد باله من الدم اللى ع التسريحه و ع الحيطه و ع الارض و فضل ماشي مع اثار الدم لقاها لحد باب الاسانسير
مهيمن بقلق يقول ل نفسه حد عمل فيها حاجه و يحاول يتصل عليها تليفونها مقفول مهيمن خبط باب الاسنانسير جامد اعمل ايه دلوقتي انا.
عند المستشفى
نايا: بشويش ع اقل من مهلك
دانيه بهزار: انا بقولك كده برده و فضلت تمشى بشويش جدا نايا سابقتها و قعدت ع كرسى قدام الباب و بهزار: ع فكره انا قلت ع مهلك مش قلت امشى مشية النمله اخلصى شويه يا عم السلحفه كده هنوصل بعد بكره.
عند مهيمن
اتصل ع مامة نايا: السلام عليكم
هاله: و عليكم السلام يا حبيبي عامل ايه
مهيمن بهدوء بعكس اللى جواه: نايا موجوده
هاله: لا هي نزلت من بليل في شغل و اتصلت بيا الصبح اطمنت ع توتا و قفلت
مهيمن: ماشى يا امي شكرا
هاله: توتا عايزه تكلمك
مهيمن: معلش سلميلى عليها دلوقتي و شويه هجيلها بنفسي اخدها
هاله: ماشى يا حبيبي (و قفلت).
مهيمن قفل والدنيا بقت تلف بيه مش عارف قلبه فين ولا حصلها ايه و ايه سبب الدم ده كله دخل الاوضه تاني شاف الازاز مكسور كلم نفسه ممكن تكون هي اللى كسرته و ايدها اتعورت ف راحت المستشفى، طيب مستشفى ايه!؟ كان قلقان و مش عارف يفكر.
عند بيت هاله
توتا بطفوليه: انتى قفلتى ليه كنت عايزه اوري بابا اللعبه اللى جبهالي خالو كرم
هاله بضحك: هو هيجي كمان شويه يشوفها و بيقول هياخدك تفتكري بقى هياخدك فين
توتا بفرحه: هيفثحنى هيييييييييييه.
في المستشفى
نايا: اقسم بالله لو ماشيه مع انثى الكسلان كنا وصلنا اخلصى المسشفى خلاص هتقفل
دانيه بضحك: هو فيه مستشفى بتقفل يا نايا.
نايا: بلاش هتقفل الدكاتره غيرو النباطشيه بتاعتهم مرتين و انتى شكلك لسه بتتعلمي المشي في اليوم الابيض ده ولا ايه، ايوه استمرى بقى ع خطي التنين انا هقف بره المستشفى مش ناقصه فاقعة مرارة (و اول ما طلعت من المستشفى الفون بتاعها لقت شبكه وصل ل مهيمن رساله ان الفون اتفتح اتصل بيها )
نايا بصت ع اسمه افتكرت كل حاجه حست بسكينه بتدخل قلبها ردت بوجع: الو
مهيمن بقلق: نايا انتى فين؟
نايا: في المستشفى.
مهيمن بقلق اكبر: مستشفى ليه؟
نايا: سوري نسيت اتصل بيك اقولك اصل دانيه اتصلت بيا و كانت تعبانه نزلت بسرعه
مهيمن النفس رجعله: المهم انتى كويسه
نايا نفسها تقوله مش كويسه ولا هتبقى كويسه طول ما الكائن الحلزون اللزج في البيت لكن ما حبتش تضايقه: اه كويسه جدا يا مهيمن
مهيمن حاسس بيها و باللي في قلبها و مقدر انها بتعامله بعكس اللي حاسه بيه
نفسه ياخدها بعيد لكن هي دي الدنيا مابتديش كل حاجه
قطع الصمت صوت دانيه.
دانيه: اخيرا وصلتلك
مهيمن: هي عامله ايه؟
نايا بصوت فيه بحة حزن: الحمدلله
مهيمن: نايا عايز اقعد معاكي شويه نتكلم لوحدنا
نايا بعدت شويه عن دانيه تحاول تسيطر ع دموعها: اكيد كل حاجه اتقالت و وضحت
مهيمن: انا عارف و واثق انك نايا العاقله قلبي انا مش نايا اللى الناس تعرفها بس لازم نقعد نتكلم
نايا تمسح دموعها و تكلم نفسها: انا عاقله عشان مخسركش عندي استعداد اخسر اي حاجه الا انت، بس هخليك تطلقها قريب.
مهيمن: نايا اعدي عليكي امتى و فين؟
نايا: ماشي يا مهيمن بعد نص ساعه عند دانيه
مهيمن بحب: تمام يا قلب قلبى (قفل الفون اخد نفس طويل اووى كان فاكر هيرتاح بمجرد ما يسمع صوتها لكن تعب اكتر و قلق عليها بسبب نبرت صوتها المكسورلانه متعود ع نايا القويه المشاكسه اللي مابتقولش حاضر هو عارفها كده و حبها كده بس اتغيرت في ثانيه عشان ترضيه و جت ع نفسها عشان متزعلهوش منها).
بره المستشفى
نايا بنرفزه: ايه يا دانيه كل ده في خطوتين
دانيه باستغراب: مالك يا نايا؟!
نايا تحاول تهدى نفسها و تقول بهزار: مالى ياختى ولا عشان حامل هتشلي اهلنا بصي يا دانيه اقفى مكانك انا هجبلك كرسي ارميكى فيه عشان نخلص و نركب التاكسي (و راحت فعلا جابت كرسي متحرك )
نايا تشاورلها ع الكرسي: اقعدى
دانيه بضحك: لا طبعا اقعد ليه ما انا بمشي اهو.
نايا قعدتها غصب عنها و الاتنين بيضحكو ضحك رهيب: بتسمي ده مشي، ده شلل رعاش يا ماما و زقتها بسرعه لحد مكان التاكسي (نزلتها و راحو البيت).
عند مهيمن
حضر نفسه ينزل، ابو ديرو اتصل عليه
مهيمن رد عليه: اوامرك يا برنس
عزمى بحده: تعالى حالا
مهيمن بص في الساعه و طبعا لو راح ديرو هتنزل معاه و هو عايز يقابل نايا لوحده حاول يعتذر: عندى شغل حاليا خليها كمان ساعتين
عزمي: فضي نفسك يا مهيمن في خلال خمس دقايق الاقيك هنا (و قفل الفون)
ياترى مهيمن هيروح ل نايا ولا ل عزمي؟!
عند كرم
اتصل ع مريم: مريوم عامله ايه
مريم: الحمدلله مبسوطه اووي
كرم: يا رب دايما، بس ليه؟
مريم: نايا رجعت ل ابيه
كرم: ربنا يهديهم ع بعض
مريم: يارب.
مهيمن بقلة حيله هيروح ل عزمي و لسه هيتصل ع نايا يعتذرلها فونه فصل شحن اتنرفز و رمى الفون و كلم نفسه: هو ده كان وقتك انت كمان و اتحرك بالعربيه ع قصر عزمي.
تحت بيت دانيه
نايا: اخيرا وصلنا
دانيه: يا برده مش لازم اخاف ع اللى في بطني
نايا: ربنا يقومك بالسلامه اطلعي انتي هشتري اكل و اطلع اعملك فطار شكلك مافطرتيش
دانيه: فعلا بس اتوصي شويه يا نايا انا واحد في اتنين.
نايا بهزار: بصى يا دانيه انا اتعلمت في المدرسه اي حاجه في واحد بتبقى بنفس الرقم ده صحيح و الضرب عملية تبادلية اوكي لكن دلوقتي الوضع مختلف اسمها اتنين في واحد يعنى احترمي نفسك ل اروح و اسيبك ل واحد و اتنين
دانيه بهزار: طيب خلاص نمشيها اتنين في واحد
نايا: اطلعى يا دانيه شكلك فشله في الحساب
طلعت دانيه و هي فرحانه و بتفكر تقول ل فادى ازاي، فتحت باب الشقه و اول ما دخلت.
فادي قام بسرعه من ع الكنبه زي الطلقة وراح لها و بعصبيه وقف قدامها: لا انا كده اتأكدت انك بتستعبطي، اقسم بالله لاندمك ع اليوم اللى شوفتي وشي فيه
دانيه اتخضت و بترجع ل ورا و كانت هتقع من ع السلم و قالت بخوف: فادى استني هفهمك
فادي شدها من ايدها بسرعه دخلها: لا ما انا فهمت اني ابن كلب اني اتجوزت من الاساس
دانيه بصوت مرتعش من الخوف: يا فادي اسمع.
فادي بنرفزه و مسكها من شعرها جامد: اسمع ايه؟ انتي ليه بتعملي فيا كده! ليه بتخليني اعمل حاجات عمري ما فكرت اعملها
دانيه بوجع و دموع: اي فادي شعري، و النبي متخوفنيش منك.
فادي بعصبيه: و انا عايزك تخافي يا دانيه و متفكريش تاني مره تكسري كلامي انا اسامح في اي حاجه الا اللى يقف قصادي و رفع ايده يضربها ع وشها كانت نايا وصلت قدام الباب اول ما شافته جريت بسرعه و مسكت ايده قبل ما تنزل ع وشها وقالت بحزم: في ايه يا فادى؟
فادى كان لسه شعر دانيه في ايده لكن نايا واقفه في النص ما بنهم: اوعي يا نايا عفريت الدنيا كلها بتتنطت قدامي
نايا زقته عشان يسيب دانيه: اهدا و خلينا نتكلم.
فادى زق نايا جامد: و انا مجنون ومش عايز اتكلم ابعدي عن وشي
نايا كانت هتقع سندت نفسها و حطت ايدها ع كتافه بتبعده عنها و بتحاول تهديه: فيه ايه ل ده كله؟ اهدا و اسمعها هي عايزه تقولك ايه يا بني ادم انت، هي دي رجوله تستعفى ع بنات
فادي بنرفزه: اسمع ايه انا لازم اربيها عشان بعد كده تسمع كلامي
نايا مسكته جامد: مع اني كنت عايزه هي اللي تقولك و تكون ذكرى حلوه ما بينكم بس شكلها كده ذكرى هباب ع راسك.
فادى بعصبيه: احترمي نفسك و وسعي من وشي يا نايا انا لحد دلوقتي ماسك نفسي عنك زق نايا جامد وقعت ع الارض و راح ل دانيه
نايا دورت نفسها بسرعه و بصوت عالي: انت يا غبي اوعى تعمل فيها حاجه مراتك حامل
فادي وقف مكانه و بص ل نايا: ايه! قالها و هو نفسه يكون سمع غلط ازاي هيقدر يخليها تسامحه، ده اهانها و هي حامل، ازاي اول ذكرى مع البيبي تكون قسوه منه عليها.
نايا قامت بسرعه اخدت الفون بتاعه و راحت حضنت دانيه: هي ماكنتش عايزه تنزل من غير ما تقولك و فونك كان مقفول، انا لقيتها تعبانه و هتتصفى صممت انها تنزل و هي مردتش تنزل غير ما ابعت ليك رساله (و رمت الفون في وشه ) اتفضل شوف الرساله (و قومت دانيه و دخلتها الاوضه).
فادى وقف مكانه من الصدمه مش عارف يعمل ايه للدرجه بقى غبي و اعمى كمان، للدرجه الشيطان قدر يتملك منه يأذي حبيبته و كمان هتبقي ام ابنه دخل غسل وشه وطلع وقف قصاد باب الاوضه يرتب كلامه و مهما قالت ليه مش هيرد؟
عند قصر عزمي
مهيمن بجديه: معلش مش بقدر اكل بره البيت حتى اسأل ديرو
عزمي بحده: و انا مش هقوم عشان نتكلم اتفضل اقعد نتكلم و احنا بناكل
مهيمن بص ع السفره لقه مراته و مرات عزمي اتأكد الكلام مش هيكون ع الشغل ندم الف مره في الثانيه، لو يعرف الموضوع مش شغل ماكنش راحله و كان راح ل معشوقته
عزمي بحده: هتفضل واقف كتير اتفضل
مهيمن سحب كرسي و قعد بوش خالي من اي تعبير: خير يا برنس
عزمي: مزعل ديرو ليه؟
مهيمن بصلها و بص ع عزمي: هي قالت كده
ديرو بتبرير: لا مش قلت كده، قلت اللوكل مراتك هي اللى بهدلتني
مهيمن بصلها بصة فيها الف سهم و وقف
عزمي من غير ما يبص عليه: وقفت ليه يا جوز بنتى؟ انا موافقتش ع جوازكم غير بعد محايله منك متجيش بقى دلوقتي تبهدلها (خبط االمعلقه جامد في الطبق و بصله) ده انا انسفك.
مهيمن بصله وحاول يسيطر ع اعصابه: ع ما اظن ده بيتي و انا اعرف احكمه كويس و بنت حضرتك جبتلها حقها تالت و متلت و محدش بهدلها و ع ما اظن انتو تعرفو اني متجوز و هي طبعا تعرف، و نايا سمعت كلامي بعد ما حذرتها انها ماتغلطش فيها و قالت حاضر، انما بنت حضرتك قولتلها بالذوق مره و اتنين و تلاته ماتغلطش فيها و برده بتغلط، شوف طلبات بنت حضرتك ايه و انا موافق عليها
عزمي بصرامه: البت دي ماتدخلش بيت بنتي.
مهيمن بحده: و هي مادخلتش بيت بنتك دخلت بيتي انا و هتفضل فيه و اللى هترفض تروح البيت تبقى مش ع زميتي
مهيمن قال الكلام ده و هو واثق ان ديرو مش هتسيبه و هتوافق ع شرطه
عزمي بصرامه: طلقها.
عند فادي
استعد انه يدخلها و فتح الباب عليهم
دانيه اتخضت ف صوتت، نايا لفت بصت عليه
فادى بصلها و بهزار: فيه ايه خضتينى هو انا داخلت بيت الجيران
دانيه مسكت ايد نايا جامد: اوعي تسبيني انا خايفه اووي
فادى قلبه وجعه و قرب منهم: نايا عندنا وكمان مارحتش الشغل، اللوا كان بيسأل عليكي و مهيمن قاله اخدتي اجازه منه.
نايا بتحاول تكون طبيعيه و بهزار: خلاص بقى هقعد اربي توتة يا فادى و اخدم اهم حاجه مراتك الانبوبه دي
فادي: توتة مين؟
نايا: هبقى اقولك بعدين
فادى يغمز ل نايا: طيب انتي قولتلي هتخدميها طيب ماتروحي تجبلنا عصير
نايا: بس كده عيوني
دانيه مسكت ايدها جامد فادي قعد جنبها و اخدها في حضنه و مسك ايدها و خلها تسيب ايد نايا بشويش، نايا طلعت من الاوضه و دخلت المطبخ.
فادي نام جنبها بصلها بأسف و بفرحه حقيقيه توصف مشاعره: بجد بجد يا دندون كلام نايا صح، انتي فعلا حامل (ويشاور علي بطنها ) هنا في حته مني ومنك، هنا فيه شريك حياتنا، انا مهما اعتذرلك مش هيكفي اعتذار الدنيا كله ياحببتي ( يحط ايده يمسد شعرها ) انا اتجننت لما خرجتي وكسرتي كلامي، حقك عليا يا عيوني، شكلك لسه زعلانه مني ان شالله كانت ايدي دي اتقطعت قبل ما تتمد عليكي
دانيه بصتله بدموع: ماكنتش دي كانت دي.
فادي ضحك: ان شالله الاتنين المهم تكوني مبسوطه
دانيه رفعت وشها و بصوت فيه عياط: بعد الشر
فادي اخدها في حضنه وحشتيني و وحشني حضنك اووي.
في المطبخ
نايا بصت في الساعه ابتسمت ابتسامة حزن و كلمت نفسها: من امتى مواعيدك مش مظبوطه يا مهيمن؟ دموعها خانتها و نزلت و سرحت في ذكرياتها و هي بتعمل الاكل مسكت البراد ملته مايه و ذكريتها بتهاجمها زي العدو اللي مافيش في قلبه ذرة رحمه.
عند قصر عزمي
مهيمن بص ل ديرو و لسه هينطق ديرو قامت جريت عليه: لا يا مهيمن انا موافقه انها تقعد معانا بس ملهاش دعوه بيا
مهيمن بص ل عزمى: اي اوامر تانى يا برنس
عزمي بص ل ديرو: لو رجعتي تعيطي تانى انا اللى هزعلك
مهيمن مسك ايد ديرو: بعد اذنكم ا و اخدها و طلع ركب العربيه و كان ع اخره اتحرك بسرعه).
في اوضه فادي
فادي بندم: حقك عليه انا عصبي معلش استحمليني
دانيه بدموع: انا فضلت اقولك اسمعني و انت...
قاطعها: كنت غبي و متخلف اسف بقى مايبقاش قلبك شبه التيشرت ده
دانيه بصت ع التيشرت: انا قلبي بنك
فادي مسك التيشرت و بهزار: اه بس فيه نقطه سوده اهو
دانيه سكتت
فادي بهزار: سامحتيني ولا تحبي اقوم ارمي نفسي من ع السرير
دانيه بتريقه: لا و ع ايه ل يجيلك اوفه في صابعك الصغير.
فادي بيحرك ايده ع جسمها و قرب من رقبتها و فضل يطبع قبلات برقه: و الخبطه دي بتوجع اووي
دانيه بكسوف: فادي احترم نفسك نايا بره
فادي ب تسبيل: بقولك بتوجع مافيش معلش حتى و تبوسيني تصالحيني
دانيه طبعا ست مصريه اصيله هتعدي وقت رومانسي كده عادي طبعا لأ لأ و تقول بجديه: فادي هو انت خونتني زي ماقولتلي امبارح.
فادي يبعد عينه من عينها لان الحقيقه دايما بتكون في العين و الكذب ورا العين: عيوني خلينا في دلوقتى و سيبك من كلام امبارح خليه يروح ل حاله (و قرب من شفايفها)
دانيه بعدت: اخلص يا فادي و رد عليا
فادى بتركيز يعمل نفسه سامع صوت بره و رفع صابعه ناحية الباب: ايه ده نايا موجوده عندنا و احنا كده عادي و بتتحرشي حضرتك بيا كده عادي احترمي نفسك يا مدام خليني اروح اشوف الضيفه اللي مرميه بره دي.
دانيه باستغراب: والله! لسه فاكر
فادى قام: شكل موضوع اني هبقي اب جبلي زهايمر
دانيه بتريقه: طيب بطل نفخ في نفسك و حاسب تفور ياسفن اب
فاد قرب منها و ضربها بشويش ع وشها و ابتسم بقرف: حلوه (و شال الابتسامه بسرعه و رفعلها حاجبه و طلع)
دانيه تكلم نفسها: اهو شكله بيقول انه بيخوني ماشي يا عم السفن الاب وراك وراك لحد ماتفور ب كل حاجه قدامى.
مهيمن وقف العربيه و بصلها بحده لكن
سكت ثوانى وقال بعصبيه: مبسوطه من اللى حصل، ارتاحتي لما قولتي كل اللى حصل امبارح، ع العموم دي غلطتي انا اللى سمحتلك تطلعي و تروحي بيت اهلك بعد كده لما اروح الشغل هتفضلى في البيت تمام
ديرو بخوف هزت راسها ب اه.
عند فادى
دخلها المطبخ لقاها ماسكه السكينه و بتفتح العيش السكينه فلتت في ايدها و هي مش مركزه ولا حاسه و شغاله تقطع
فادى رفع السكينه: نايا مالك؟
نايا تفوق من ذكرايتها المؤلمه لفت بسرعه ادتله ضهرها مسحت وشها
فادى مسك ايدها وخلاها تبصله: نايا في ايه؟ و ايه الجرح اللي في ايدك التانيه ده اوعي يكون مني.
نايا بأبتسامه: مافيش سرحت شويه بس (و بصت ع ايدها اللي فيها جرح كبير من ازاز التسريحه ) شكلي اتخبط في حاجه مش منك
فادى بجديه ومسك ايدها يربطلها الجرح: ع فكره عدم وجودك النهارده في المركز يقول فيه، و نزول مهيمن بدرى من المركز يقول فيه، و من اول ما دخلت المطبخ و عينك اللى مش ثابته و مش بتخليهم يجو في عينى بيقول فيه
نايا بتحاول تتمالك نفسها: -.
فادى: نايا انا فاد اول من عرف انك بنت مش راجل جايه دلوقتى تخبي عليا
نايا قررت تتكلم مع حد تطلع جزء بس من اللى جواها: انا بموت يا فادى في وسط نار و لو بعدت انا هتحرق و لو قربت بتحرق نفس الحرق مش عارفه اعمل ايه.
فادى حس انها مش عايزه تتكلم اوضح من كده احترم رغبتها و قرر يرد عليها بنفس الالغاز: النار يا نايا بتحرق اللى قريب منها ابعدي عن النار خالص و لو المكان اللى فيه النار هو اللى بيريحك حاولى تطفيها الاول و ارجعي مكان ما بتحبي براحتك
نايا بوجع و صوت مبحوح: ما انا لو بعدت عارفه ان فيه حد غيري هتمسك فيه النار لازم اضحي انا و ابعد اعز ماليا عنها.
فادى: نايا انا حاسس ان فيه حاجه كبيره اووي مش هقدر اقولك غير خلي بالك من نفسك و لو حبيتي تتكلمي انا زمل برده
نايا هزت راسها ب ماشى: فادى معلش كمل الفطار و خلي بالك من دانيه دي بتحبك بس عندها اكتئاب حمل، ربنا يسعد قلبكم و يقومها بالسلامه
فادى بزعل ع حالها: هتروحى فين؟
نايا بأبتسامة حزن: مش عايزه حد يشوف دموعي مش عايزه اصعب ع حد كفايه عليا اشيل هم نفسي
فادي: طب قوليلي هتروحي فين و انتي كده؟
نايا بوجع: ماتقلقش يا زمل هنزل اتمشي ع البحر شويه و هطلع ع ماما
فادى يحاول يقعدها معاهم: هتنزلي و هتسبيني مع الحامل المكتئبة دي لوحدي
نايا: معلش فعلا مش قادره اقعد مع اي حد سلملي عليها و قولها مهيمن اتصل عليها نزلتله
فادى بقلة حيله: ماشى يا نايا
و نزلت.
ع البحر.
نايا نزلت من عند فادي وبتحاول تلملم نزيف قلبها قبل نزيف ايدها فضلت تتمشي لحد ما وصلت ل ملجئها و ونسيها الحقيقي البحر و قررت تحكي كل اوجاعها ليه هو الوحيد اللى هيكتم سرها هو الوحيد مهما تقول مش هيزعل من حبيبها القاسى، وتبص ع ايدها وتقول، ياريت كان نزيف قلبي يقف ويبطل ينزف، وتمشي ناحيه البحر وتبص عليه و تسرح مع امواجه اللى الكل بيرحله يصب في احزانه و كل الاحزان تنتهى عندما توصل البحر الا حزنها وجرح قلبها زاد البحر في اعتصار امواجه و فضلت موجه تاتى ورا موجه اعلى من اللى قبلها، تقعد جنبه وشريط ذكرياتها يمشي قدام عنيها، وتفتكر كل لحظاتها الحلوة مع مهيمن، وتبكي بحرقه، وتسال نفسها، ليه عملت كده فيا، ليه بعد كل الحب اللي بينا تسقيني عذاب ما بعده عذاب، مهما كانت مبرراتك، مهما عملت فيك من عنادي، ميخلكش تجرحني كده، (تحط ايدها ع قلبها و تميل جسمها) اااه ياوجع قلبي، شاهد يابحر الغرام، شاهد حبيبي عمل فيا ايه، (تسكت ثواني و تقول بحده، بس لا وحياة الحب الكبير اللي بينا يامهمين ما هسبها تاخدك مني، اكيد اللي حصل ده ربنا له حكمه فيه، اكيد عشان اعرف قيمتك واتمسك بيك و عمري ما اعندك تاني، ويقوي حبنا اكتر واكتر، لازم ادافع عن حبي، لاني واثقه في حبك يا حياتي، وانا وهي والزمن طويل، انت حبيبي انا، انت عمري كله، انا قلب قلبك، زي ما بعدت عنك هعرف ارجعك لحضني تاني، ومبقاش انا نايا اللي دوخت وجننت الكل ما رجعتك يامهيمن، مابقاش نايا لو خلتها تلمس شعره منك، تمسح دموعها وتمشي لتبدا الحرب بينها وبين الحيزبونه.
مهيمن وصل عند بيت فادي بعد نزول نايا ربع ساعة
مهيمن: خليكى هنا هطلع اجيب نايا
ديرو هزت راسها ب بالموافقه
طلع مهيمن خبط فتح فادى
مهيمن بأحراج: معلش جتلك من غير ميعاد
فادى بابتسامة: انت نورت و الله يا باشتنا اتفضل
مهيمن بابتسامة: معلش عايز نايا
فادى: نزلت من ربع ساعه
مهيمن بقلق: تعرف راحت فين؟
فادى: اه قالت هتروح بيتها
مهيمن: انهى بيت
فادى بهزار: هي ليها كام بيت؟
مهيمن اخد نفس بصوت عالى
فادى: بيت امها.
مهيمن سابه و نزل ركب العربيه و اتحرك فضل يتصل عليها لكن ماردتش عليه حس انها مش عايزه ترد عليه لانه اتأخر عليها
ديرو فرحت اووي انها منزلتش معاه و افتكرت كلامه لما قال اللى هترفض تروح البيت تبقى مش ع زميته و فضلت تكلم نفسها احسن احسن زمانه طلقها.
في بيت فادى
حضر الفطار و العصير بحب و دخله ل ام ولي العهد
دانيه بفرحه: كده هاخد ع الدلع ده
فادى: خدي براحتك يا عيوني و فضل يأكلها بأيده.
مهيمن راح عند بيت هاله نزل و طلع من غير ما يقول حاجه ل ديرو
ديرو كانت مستغربه: هو راح فين تاني؟ و انا مالي المهم طلقها
مهيمن طلع و فتحتله هاله
مهيمن: نايا موجوده يا ماما
هاله: لا يابنى لسه ماجتش
توتا اول ما سمعت صوته طلعت تجري عليه ميل شالها
توتا حضنته جامد
مهيمن بادلها الحضن و بص ل هاله: معلش ممكن تتصلى بيها
هاله: طيب ادخل يابني هتفضل واقف كده
مهيمن دخل قعد.
في العربيه
ديرو اتصلت ع مامتها: مامي انا فرحانه اووي شكل مهيمن طلق اللوكل بتاعته
شرين: احسن، مش عايزاكى تبقي رقيقه فوقى كده لنفسك و حافظي عليه
ديرو بحب امتلاك: ده بتاعي لوحدي.
عند بيت هاله
توتا: كنت فين وحثتني
مهيمن: و انتى كمان يا بسبوستي
توتا: انا توتا
مهيمن ابتسم: بس انا كده بدلعك بصي انا بحب البسبوسه و هي دي حاجه حلوه اووي عشان كده انا بقولها ليكي
توتا بطفوليه: اااه ماثي يا ثيبثي
مهيمن ابتسم: بتحبيه
توتا بطفوليه: اووى، تعالى نقف نستنى ماما في البلكونه
مهيمن: يالا يا بسبوستي (و بص ل هاله ) ردت عليكى
هاله: شكلها قافله صوت التلفون.
مهيمن: هدخل البلكونه استناها شويه و ع الله متتأخرش
هاله: البيت بيتك هعملك قهوه
توتا: وانا وانا
هاله: الاطفال ما تشربش قهوه
توتا بزعل تربع ايدها: انا عايزه قهوه بقى، قول ل انه يا بابا تعملي قهوه
مهيمن بمشاكسه بص ل هاله: اسمعي كلامها يا انه و اعمليلها لبن
هاله بضحك: بس كده من عنيه
توتا بضيق: ده اسمه كلام
مهيمن دخل البلكونه: امال اسمه ايه يا لمضه.
وصلت نايا بيتها شافت عربية مهيمن واقفه فبصت عليها لقت فيها ديرو بصت ليا بصه مرعبه، لبست الزونط ع راسها و فضلت تمسح وشها تمحى اي اثر ل دموع و طلعت
مهيمن بص في الشارع لقى نايا متنحه ع عربيته قلبه ارتعش ع شكلها.
عند ديرو في العربيه: مامي اللوكل طالعه نفس العماره اللى طلعها مهيمن شكله مش طلقها اعمل ايه انا هروح ازاي معاها اللوكل دي
شيرين: الكلمتين دول لازم تحفظيهم و تنفذيهم كديها بيه و افضلي ادلعي عليه قدامها هتتفرس و تمشي
ديرو: حاضر.
عند بيت هاله
مهيمن طلع من البلكونه و فتح الباب لقاها في وشه
مهيمن بعشق و شوق: وحشتينى
نايا اخدت توتا: عامله ايه يا توتة يا جميله
مهيمن سند ع الباب و بصلها: و انا ماليش عامل ايه
نايا ببرود: اكيد زي الفل مش محتاجه كلام يا عريس
مهيمن وقف كويس بوش خالى من اي تعبير و عين جامده: طيب يالا عشان نروح
نايا بسؤال: اروح فين؟
مهيمن بهدوء: طبعا مش هقول بيتنا بس هتروحي معايا
نايا بوجع: انت متأكد انك عايزني.
مهيمن هز راسه ب اه
هاله طلعت من المطبخ لقتهم واقفين ع الباب: انتي جيتى
نايا تحاول تبقى طبيعيه عشان مامتها متحسش بحاجه: لا لسه قدامي ربع ساعه
هاله بضحك: طيب اوعي تتأخرى
نايا تمثل ان الدنيا زحمه و حر: ع حسب الطريق الجو زحمه و نار (و دخلت باستها)
هاله: عامله ايه يا قلبي
نايا بأبتسامة: الحمدلله يا قمر انتى
هاله بصت ل مهيمن اللى واقف ع الباب: ايه يابنى ادخل اشرب قهوتك.
مهيمن دخل قعد جنب نايا و اخد القهوه و بص ل نايا اللى ماعرفتش حد عن وجعها و كمان قدرت تقنع امها انها مبسوطه اثبتتله انها اتعلمت كل حاجه صح في القوات الخاصه
هاله: هدخل اشوف الاكل اللي ع النار
مهيمن اتفضلى (و بص ل نايا) ليه ماقولتيش ليها ع اللى حصل
نايا بصتله: الكلام مش ليه لازمه
مهيمن: عاجبنى اووى انك بتقدرى تخفي مشاعرك.
نايا بوجع: تلميذتك يا كابتن، بس طبعا مش هقدر اوصل للدرجة الغموض اللى انت فيها دي، حتى مش سايب اي حرف في عينك، ليه عملت كده؟
مهيمن بهدوء: ممكن تتقبلي الوضع
نايا بصتله بوجع: عشانك هتقبل اي حاجه بس لو فعلا انت عايزني معاك
مهيمن بحب: طيب ليه كل الحزن اللى في عينك، ليه بحت الحزن اللى في صوتك مادام انتى بتحبيني
نايا: معلش اصل انا التلميذه من هقدر اخفي مشاعري كمان مع استاذي.
مهيمن مسك ايدها و باسها: عايزك تتأكدى انى مقدرش اتنفس النفس و انتي مش جنبي
نايا بتريقه: اه ما انا متأكده
مهيمن: طب يالا.
نايا سكتت و فضلت تفكر تروح ولا متروحش مادام بتحبه و هو بيحبها ليه يتجوز بس هو عايزها معاه بصتله كتير عشان تعرف سبب ل جوازه مقدرتش تاخد اي اجابه من عينه القويه الحاده اللى بيقدر يسيطر عليها قالت ل نفسها انا بحبه و هحافظ ع حبيبي و نشوف يا ست ديرو مين اللى هيكسب التحدى قامت: هحضر هدومي
مهيمن ابتسم
دخلت اوضتها و وعدت نفسها مافيش دمعه هتنزل من عينها تانى و هتبسط قلبها مع حبيبها لحد ما يبقى ليها لوحدها.