رواية معشوقتي المجنونة الجزء الأول للكاتبة ابتسام محمود الصيري الفصل الأول
الشمس تشرق في انحاء العالم، والعصافير تزقزق بنشاط وحريه وسعاده ع شجره جنب عماره جديده، شاب ينزل من عربيته الچيب بهيبه لابس بدلة، و بيشتغل رائد في القوات الخاصه، مشى بطوله اللى بيفزع اي حد يمشي جنبه، بملامحه الجاده القاسيه الحزينه وحواجبه العريضه، دخل عماره وقف امن العمارة بسرعة من مكانه يفتح ليه باب الاسانسير بسرعة: صباح الفل يا باشا.
اكتفى بهز راسه و ابتسامه صغيره و دخل الاسانسير وأول ما الباب قفل سند راسه ورا ع المراية من كتر ارهاق الشغل، وقف الاسانسير عند الدور بتاعه فتح الباب ودخل شقته، وقف ثواني في الصاله وهو مغمض عينه بيفتكر ذكريات مؤلمة، وبعدها اخد نفسه طويل ودخل ع اوضته من غير اي امل في الحياه، اتفاجأ ب بنت نايمه ملامحها رقيقه قصيره جدا وشعرها كان مفرود ع المخده و دمها مالي السرير، وقف اتسمر مكانه من الصدمه و قال بصدمه: دينا! انتى عرفتي ترجعي ازاي؟!
دينا تفتح عينها و مصدقتش نفسها ان حبيبها اخيرا جه وشفته قدام عينها، قامت بفرحه من ع السرير و الدم فضل ينقط من رقبتها و تقول بحب: مهيمن. تدخل امه اللي في الخمسينات عليهم الاوضه و تقول حنان بحب اللى شخصيتها اخدت جزء كبير من اسمها: مهيمن؟
دينا بصوتها الرقيق: مهيمن.
مهيمن كان متنح و فاتح عينه بعدم تصديق من اللى بيشوفه و يبص ع كل واحده فيهم شويه.
حنان تحط ايدها ع كتفه بعطف: يابنى الساعه عشره.
مهيمن يغمض عينه و يركز في صوت امه و يقوم بفزع من ع السرير اللي نايم عليه يبص ل نفسه لقى نفسه لابس شورت قطن اسود بس، سند راسه ع ايده يفوق بعد ما اتأكد انه كابوسه اللى بيطارده ع طول.
حنان: حبيبي مالك؟
مهيمن ينزل ايده و بجديه: الساعه كام يا امي؟
حنان بزعل ع حال ابنها: عشره.
مهيمن يقوم بسرعة من على السرير يفتح دولابه و ياخد هدوم كاجول: ليه مصحتنيش بدرى يا امى؟
حنان: حبيبي انت رجعت امبارح تعبان اووي و بقالك كام يوم مطبق في الشغل اكيد مانمتش سبتك ترتاح.
مهيمن بهدوء: امي لو سمحتى لما اقولك صحينى بدري تبقى صحيني بدري.
حنان: حاضر يا بنى.
و تسكت ثواني و تقول، مهيمن انت لسه مش ناوي تتجوز؟
مهيمن اول ما سمع كلام امه قعد ع اقرب كرسى و الدنيا بقت تلف بيه.
حنان بقلق عليه: مهيمن انت تعبان؟
مهيمن بوجع في قلبه: امى بالله عليكى ماتجبيش سيرة الموضوع ده تانى.
حنان بحزن: يابنى نفسى اشوفك مرتاح و اشوف عيالك.
مهيمن بحده: انا لو تعبك اووي كده، ممكن امشى و اقعد في شقتي.
حنان بحزن: مضايقنى! ليه يابني بس بتقول كده انت عارفه انى ببقى مبسوطه و انت جنبي، و انا و اختك مش لينا حد غيرك.
مهيمن يتحكم في اعصابه ويقوم بيوس راس امه: امي سامحينى مقصدش ازعلك بس لو سمحتي انا مش هقدر اتجوز تانى، مش هقدر و الله غصب عنى، اللى شوفته كان صعب اووي.
(قال كلامه وعينه مرغرغه بالدموع، بس هو دايما بيظهر انه قوي و صعب دموعه تنزل قدام حد حتى امه )
حنان تطبطب عليه: عارفه والله يابنى بس نفسى تنسى، هي اكيد شهيده و في مكان احسن.
مهيمن يقعد بحزن: والله نفسى انسى حتى ماتت ازاي، بس مش قادر ادعيلي يا امى انتى عارفه هي اتعذبت قد ايه عشاني.
حنان بلوم نفسها: اخس عليا انا اسفه يا بني اني فكرتك حقك عليا يارتني ما كنت قلت اتجوز.
مهيمن بوجع جوه قلبه: امي انا مش بنسى اصلا.
حنان بحنان: ربنا يجعلك من الصابرين.
مهيمن يقوم و يخبي وشه: اللهم امين، بعد اذنك هدخل اخد شور.
حنان: اتفضل...
(قلب حنان بيوجعها قوى كل ما بتشوف ابنها و هو قلبه محروق ع مراته او حتى ع اخته مريم اللى بيتكسف يرفع وشه فيها او عينه تقابل عنيها).
مهيمن دخل الحمام و هو تحت الدش
فلاش باك...
حنان بفرح: مهيمن اخيرا نزلت اجازه.
مهيمن: معلش يا امي كان عندى شغل كتير.
حنان: حبيبي عايزه اتكلم معاك في موضوع
مهيمن: اتفضلي يا امي
حنان بشوق: نفسى اشوف عيالك قبل ما...
مهيمن يقوم بسرعه يحضن امه: بعد الشر عليكي
حنان بأبتسامه: حبيبي طيب ممكن تتجوز
مهيمن يبتسم ابتسامه خفيفه: امى مفيش وقت ادور ع عروسه
حنان بفرحه: العروسه موجوده.
مهيمن بأبتسامه تملى وشه: و انا موافق و من غير ما اشوفها، كفايه انها عجبت ست الكل اكيد هتعجبنى
حنان بفرحه: بجد يابنى
مهيمن قعد تحت رجلها مسك ايدها باسها: بجد يا اغلى ما ليا و حط راسه ع رجلها
باااك...
مهيمن تحت الدش: يارتني ما اتجوزت، يا رتنى قولت لا، و ياخد نفس طويل و يطلعه بوجع و يقول ا ا ا ا ا ا اه الوجع جوه قلبي نار بتولع فيا وكل يوم بتزيد مش بنسى.
بره في الصاله
مريم برقه و عين حزينه: صباح الخير
حنان بحب: صباح الهنا
مريم: ماما هو ابيه مهيمن نزل
حنان: لا لسه بياخد دش، خدي الاكل طلعيه ع السفره
مريم برقه: حاضر
طلع مهيمن بيحاول يتجاهل عين اخته وده دايما اللى بتلاحظه امه: صباح الفل ع احلى بنوته
مريم بأبتسامه رقيقه: صباح الخير
مهيمن بتهرب: انا هنزل عايزين حاجه
حنان: افطر معانا قبل ما تنزل
مهيمن: معلش مش هقدر.
مريم قامت: ابيه مهيمن انت هتمشى و هتسيبنا تانى لوحدنا
مهيمن يمسك وش اخته: يا مريم يا حياتى انا عندى شغل اول مايخلص هرجع ع طول
مريم بخوف: ابيه انا عايزاك معايا
مهيمن: انتى لسه بتخافي
مريم تحضنه و تعيط: انا بخاف طول ما انت مش معايا انا مش عايزاك تسيبنا بليز يا ابيه خليك معانا
مهيمن يحضن اخته جامد و قلبه يتقطع
فلاش باااك
ظابط مخابرات: مهيمن الحق اختك مختفيه من الصبح و والدتك قالبه عليك الدنيا.
مهيمن يقوم مفزوع: و هي متصلتش بيا ليه
الظابط: تليفونك مقفول
مهيمن مسك الفون و اتأكد انه مقفول ورماه في الارض وطلع يجري و هو بيجري، صوت في الاسلكي: مهيمن باشا انت بتتحدانى انا، ده انا هندمك ع اليوم اللى جيت فيه وش الدنيا
مهيمن ركز مع الصوت: الضو. شكلك ما بتفهمش لما تبقى عايز تصيب صيب هدفك ع طول مش تفضل تهدد و تلك كتير زي الحريم
الضو بضحك: كويس اووي انك لسه فاكر صوتي. بس انا اتعلمت من درسك كويس اووي.
مهيمن بعصبيه: انت عايز ايه و ازاي الجهاز وصل ايدك
الضو ببرود و ضحكه مستفزه: مش بقولك مهما تبقى شاطر بردو غبي زي ما اختك في ايدي الجهاز في...
مهيمن قاطعه: اختى عندك! اقسم بالله هيبقى اخر يوم في عمرك لو لمست شعره منها
الضو بضحك: مش بقولك غبي لسه بتهدد و اختك معايا، نسيت درسك ليا صيب ع طول
مهيمن بضعف: خليك راجل و اتعامل معايا راجل ل راجل
الضو بضحك: سبق و قلت عليا مره و انا مره.
مهيمن يحط ايده ع شعره و يقعد في الارض بقلة حيله: طيب انت عايز ايه دلوقتى
الضو: ايوه كده نتفاهم، تعدي شحنة السلاح
مهيمن بنرفزه: انت مجنون
الضو ماسك شعر مريم جامد
مريم بوجع: ااااااه
مهيمن يحاول يمسك اعصابه يغمض عينه جامد و يقفل ايده و يقول بهدوء: هعمل اللى انت عايزه بس بلاش تإذيها لو عايز اركع تحت رجلك انا موافق بس اختي لأ
الضو ضحك بشر و قفل.
مهيمن قام عمل كل حاجه عايزها الضو في وقت قصير و اتصل عليه: عملت كل اللى انت عايزه اختي فين
الضو ببرود و ضحك: هتلاقيها مرميه ع الدائري، بس سامحنى بقى البت مزه و صحت الشباب اللى مدفون جوايه من تانى
مهيمن بحده: و الله لو لمست اختي هموتك اوسخ موته
الضو بستهزاء: سلام يا نانوس و افتكر كلامك انك بتنفذ و بتصيب ع طول و مش عندك وقت تهدد و يضحك ببرود.
مهيمن رمى الفون و امر بتغير كل اشارات اللاسلكي و نزل و لقى اخته بس للأسف مش عليها قطعة هدوم واحده
مهيمن في الوقت ده كان نفسه يموت و ماكنش حصل ل اخته كده، ستر اخته شالها حطها ف العربيه، اخته كانت فاقده الوعي مهيمن كان اول مره في اليوم ده تنزل دموعه و مش اي دموع دموع زي المطر من الحرقه اللي كانت في قلبه.
باااك
فاق مهيمن ع ايد امه ع كتفه
حنان تطبطب عليه و تبص لمريم: ايه يا مريم ما انا معاكي
مريم بدموع: ماما انا خايفه ع ابيه اكتر ما اكون خايفه من اي حاجه تانية
مهيمن بحنان: مريم يا قلبي ماتخفيش عليا. انتى بس ادعيلي و انا هرجعلك بالسلامه ان شاء الله و يمسحلها دموعها ويهرب ينزل بسرعه.
حنان اخدت مريم في حضنها
مهيمن في العربيه يحط ايده ع راسه و يغمض عينه
فلاش باك
مريم تفوق و تصوت و كانت في مستشفى و الكل حاول يهديها لكن كان عندها حاله هستريه من اللى شافته
مهيمن مقدرش يقف و يتفرج ع اخته طلع بره الاوضه و الدكاتره حاولوا يدوها مهدئ
فون مهيمن يرن
يرد بسرعه: عرفت مكانه؟
: ايوه يا باشا بعد ساعه هيكون في المطار
مهيمن قفل و نزل يجري بس صاحبه قابله ع السلم
محمد: انت رايح فين و بتجري كده ليه.
مهيمن: من هنا للمطار ياخد وقت قد ايه
محمد: تقريبا نص ساعه او اكتر لو في زحمه
مهيمن بحده و عصبيه: انا لازم الحقه نزل يجري
محمد نزل وراه
مهيمن ركب العربيه وكان زي المجنون شويه الطريق يقف و شويه يمشي و عدي من الوقت ساعه الا ربع.
و ع بوابة المطار الطريق كان واقف خالص نزل مهيمن من العربيه و فضل يجرى و كانه بيسابق الوقت و محمد وراه
دخل مهيمن القاعه و كان زي المجنون لمحه عند شباك التحقيق من الشخصيات
موظف الجوازات: نتمنالك رحلة سعيدة تقضي وقت ممتع ان شاء الله و بيرفع ايده عشان يختم الجواز
مهيمن بسرعة البرق يشد الباسبور و يقطعه: من جهة هيقضي وقت ممتع هو هيقضي و ضربه بالراس و فضل يضرب فيه.
محمد يحاول يبعد: كفايه كده اقبض عليه و يالا
مهيمن يزق محمد: انا لازم اقتله
الضو بضحك مستفز: اضرب كمان بس عمرى ما هنسي نعومة جسم اختك
مهيمن في الوقت ده نسي كل حاجه و ضربه تحت الحزام بكل قوته
الضو فضل يصوت لحد ما طلعت روحه
محمد بحده: انت مجنون ازاي عملت كده
مهيمن بوجع: مجنون! كل النار اللى جوه قلبي دي وتقولي مجنون، ع العموم معايا اذن بالقبض عليه و احضاره ميت او حي
بااك
يفوق مهيمن ويتحرك بالعربية.
اما في بيت نايا بيت مكتمل و شيك جدا بنت دايما تلبس فساتين كاجول و بيتها في مكان راقي
هاله ام نايا تدخل ع نايا الاوضه و تفتح الشبابيك: اصحي يا نايا اصحي بقى كفايه نوم حد في اول يوم شغل ليه ينام لحد العصر يا بت قومي، اشوف فيكي يوم زي ما انتي مطلعه عيني
نايا بنوم ترفع ايدها للسما: يارب يارب اقول ايه بس، انتي ام انتي حرام عليكى حد بيصحي حد كده اعتبريني بنتك.
هاله بنرفزه: يا بت هتشلينى قومي، صحيتك اربع مرات زي ما الناس بتصحى و انتي ولا انتي هنا
نايا تقوم تربع رجلها و بمشاكسه: ان شالله عشره، بس ماتفتحيش الشباك كده، و تقوم ترفع صباعها السبابه في وش مامتها و تقول شكلك عايزه ابن الجيران يشوفني، انتي ام انتي ها ها
هاله كانت بترجع بضهرها و تقول بنرفزه: يااااااالهوي منك يا بت اسكتي هتشلينى.
نايا تمثل الزعل: لا اوعي تقولى كده يا ماميتو بعد الشر عليكي. و تقول بهزار انتي جميله و زي الحصان اهو و ركبتها الهوا و طلعت تجري
هاله بعصبيه: ماشى يا نايا، يا رب خليها تتجوز و تمشى من قدامي البت دي يارب ابعدها عني شويه اخد نفسي ياااارب
نايا ترجع الاوضه: ماميتو انتي بتدعيلي، يا حبيبتى يا ماميتو
هاله بصويت: اااااه يا فرستي منك يا رب ادعي عليها ب ايه دي.
نايا بضحك و تغني: امايا ياما، بحبك ياما، ادعي اتجوز ياما
هاله تمسك ازازه و ترميها بيها
نايا تطلع تجري و تدخل التواليت و تاخد شور و تخرج تقعد ع السفره: ماما الساعه كام
هاله تقول بقرف و ضحكه صفرا: الساعه واحده، كده كويس معاكى ولا تدخلي تكملي نوم
نايا بخضه: يالهوي الشغل
هاله بتريقه: يا فرحتى بيكى اول يوم شغل وصاحيه الضهر
نايا بتمثيل الزعل: ماميتو ليه مصحتنيش بدري ليه ها.
هاله تحط ايدها ع دقنها بغيظ: لا والله، ده ع اساس اني كنت بلعب جولف، ترفع ايدها للسما و تقول يارب يا نايا يا بنت بطني اشوفك في الجيش و تصحي من الفجر و تتمرمطي و يطلع عينك زي ما مطلعه عيني
نايا بمشاكسه وضحك: جيش مين يا حاجه انا وحيده، اقصد بنت قولي بس اتجوز و انا همشي من قدامك خالص و مش هخليكي تشوفيني
هاله بتصميم: لا جيش، جيش يا نايا.
كرم اخو نايا يطلع من اوضته و بضحكته اللى مش بتفارق وشه و جماله الرجولي: ايه صوتكم واصل لاخر الشارع مالكم يا بشر
هاله بصوت عالي: اختك الهانم لسه فاكره تنزل الشغل
كرم بضحك: مش معقول دي منظر واحده اول يوم ليها شغل
نايا تعوج و ترفع شفتها اللى فوق: خليك في حالك يا لذيذ
كرم بهزار: و انا مش هخلينى، يارب يرفدوكي و تتعقدي و تجيلي اعالجك.
نايا بحده: انت يا عم الدكتور النفسي ارحم نفسك انت جاي تطلع عليا عقدك. والله ده انت مجنون مش عارفه ازاي واحد مجنون بيعالج مجانين
كرم يشاور ع نفسه: انا مجنون و الله ما انا سايبك
هاله بغيظ: يالهووووي جتها نيله اللى عايزه خلف زيكم
نايا تقف عند باب الشقه و تقول بضحك طااااه اسيبك تدعيلي و اروح ع الشغل اللى مش عارفه هروحه ازاي دلوقتى
قفلت الباب و نزلت ركبت الاسكوتر (نوع موتيسكل ).
في بيت نضال ملازم اول في الشرطه و مطلوب للقوات خاصه
ساره ام نضال: نضال يالا الفطار
نضال متوتر بيفكر ازاي يستعد للمرحله الجديده
ساره: نضال بكلمك يلا
نضال يبصلها: بتكلمينى يا حاجه
ساره: اه يلا الفطار
نضال: لا مش عايز انا هنزل عشان اتأخرت و قام سرحان وماشي
ساره تضرب ايد ع ايد: الباب من الناحيه التانيه
نضال يخبط راسه ب ايده: اه صح ده من الناحيه التانيه، دعواتك ياما
ساره: ربنا يقويك يابني.
نزل نضال و هو ساكن في قريه زراعيه قريبه من اسكندريه.
في مقر مركز القوات الخاصه في اسكندريه
اللواء يحيى: ازيك يا مهيمن
مهيمن بجديه: تمام سيادتك
اللواء يحيى: مهيمن انا مقدر اللى انت فيه بس فيه فرقه جديده جايه تتدرب و انت اكتر واحد بتعرف تدرب انا محتاج الرجالة دي قريب اووى، و عايز اسد زيك يدربهم
مهيمن بجديه: و انا تحت امر سيادتك، تؤمر بأي حاجه تاني
اللواء يحيى: لا اتفضل
مهيمن قام: بعد اذنك.
نايا كانت راكبه ع الاسكوتر و وراها صاحبتها دانيه و فريده
دانيه كانت لابسة بنطلون و تشيرت: يا بت اهدى شويه هنعمل حادث
نايا بثقه: انتى مش عارفه انتي راكبه مع مين
دانيه بخوف: ما النصيبه اني عارفه، اهدى بقى عبووو شكل اللى يركب معاكي تاني
فريده لبسه فستان كاجول واسع: وااااو سرعي يا نونه ماتسمعيش كلامها
دانيه بخوف: يا مجنونة منك ليها ايه اللي ركبني معاكم.
نايا توقف الاسكوتر: انتي هتعيطي، خلاص وصلنا حصلك حاجه، انزلي بقى اقفى هنا انتى و فيفي عقبال ما اشوف هيحصل فوق ايه
دانيه تميل تسند ع ركبتها بتعب: لا براحتك خالص، هروح اقعد في الجنينه اروق اعصابي اللى ادمرت.
فريده تشوف شاب عضلات جسم رياضي طويل و داخل بنظاره
فريده تشد نايا: اوووبا انتى كل يوم بتشوفي طبق الرز ب لبن ده
نايا ترفع شفتها اللي فوق و تشاور عليه بقرف: ده رز ب البن!
فريده بتوهان: يبقى بسبوسه بالقشطه
و تغني تعاكسه يا جامد انت اه يا واد يا معدي
الشاب بصلهم و ال3 بنات بصو الناحيه التانيه و كملو الاغنيه: خلتنى اجى عندك و اهدي و فضلو يغنو لحد ما مشي
نايا زقت فريده: وسعى كده عطلتينى و مشيت.
طلعت المختبر اللى بيعملو فيه اختراعات.
دانيه بنرفزه: ايه قلت الادب اللى انتى فيها دي عجبك كده لما بص علينا
فريده بهزار: انتى هتفضلى تزعقيلى و تعملى عليا الكبيره لحد امتى، وسعيلى اروح ل امي
دانيه تكلم نفسها بغيظ: واحده هتموت ع كل رجالة العالم و التانيه بجنانها هتقضى ع كل العالم يارب لا اسألك رد القضاء لكن اسألك اللطف فيه.
نايا تدخل للمدير بابتسامه مصطنعه وبهزار: صباح الخير يا دوك
المدير يقلع النظاره الطبيه: نعم
نايا بهزار: صباح الخيرات يا دكتور
المدير بحده: خيرات من فين يا انسه، ايه اللى جايبك
نايا بهزار: اكيد حضرتك مش واخد بالك انا الدكتوره نايا
المدير بجديه: لا واخد بالى، بس الظاهر ان انتى مش واخده بالك من الساعه، انتى يا انسه جايه دلوقتى تعملى ايه
نايا تمثل الجديه: اشتغل يا دكتور.
المدير: جايه بعد الظهر و عايزه تشتغلى
نايا بمشاكسه: يا دكتور ده انا شطوره و بخلص الشغل في منت
المدير بضيق: لا انا شايف ان حضرتك تروحى ترتاحي النهارده و نشوف وشك بكره ان شاء الله ما المعمل مش هيطير خدى راحتك خالص
نايا بهزار: و الله كلك ذوقك فعلا عندك حق هو المعمل هيطير
المدير بعصبيه: امشى اطلعي بره.
نايا بلامبالاه: ع فكره انا طالعه من غير ما تتحايل عليا و تبص بره المكتب اهلا دوك زيزو فينك يا راجل و تطلع من المكتب
زياد بضحك: نايا انتى مشكله حتى هنا هتفرسى المدير يا بنتى انتى ماينفعش تقعدى في مكان غير لما تشلي كل اللى فيه انتى فاكره نفسك لسه في الكليه وده محاضره
نايا: ايه لوكلوك لوكلوك لوكولك اهدا شويه هما اللى بيحبكوها اووي و انا مالى ايه يعنى اجي الشغل متأخره.
زياد بضحك: ايه يعني! و الله احنا خلصنا الكليه خلاص هي دي محاضره كمان ولا ايه، نايا انا مش مصدق انك طلعتي بامتياز
نايا بتريقه: لا صدق و صدق قوى المكان ده محدش بيدخله غير اللى جايبين امتياز يعنى صدق يا عسل و وسع كده امشى
زياد: مجنونه بس حتة عسلية
نايا بأبتسامة ثقه: عارفه و تديله ضهرها
زياد بحب: نايا
نايا تبصله
زياد بتردد: انا، معجب بيكى، و عايز اخطبك.
نايا تقلب الموقف هزار لان هي بتعتبره اخوها: معجب ولا عايز تخطبنى
زياد بحب: الاتنين
نايا بجديه: بص يا زياد انا و انت مجانين ماننفعش نتجوز ولا يبقي بينا اي حاجه اكتر من صداقه حاول تركز مع و بصت ع بنت رقيقه
زياد بص للبنت و رجع بص ل نايا و قلبه مكسور: ده اخر كلام
نايا: زيزو لازم كنت اقولك الصراحه ولا كنت تحب اقولك افكر و لسه مفكرتش طيب ادينى فرصه و افضل اعلقك.
زياد بتهرب من الكلام في الموضوع: شكل الجو بيقلب نكد، خلاص انسي يا صديقتى المجنونة
نايا: حبيبي يا زيزو اخلع انا احسن الدوك لو شافنى هيعلقني
زياد: ماشي يا مجنونة
نزلت نايا و ركبت ع الاسكوتر و دانيه ركبت وراها
دانيه: ها عملتي ايه
نايا بتفاخر: اول ما شافني المدير فضل يرحب بيا و اد ايه انا هنفع المكان و مبسوطين جدا انى هبقى معاهم و قالي لو تحبي ترتاحي النهارده ارتاحي
دانيه تنحت و فتحت بقها.
نايا بصت عليها: اقفلى بقك ده لاحسن جراده تدخل فيه
دانيه: بجد عمل كده
نايا بغيظ: راجل رخم طردني
دانيه بشماته و ضحك: احسن هو حد بيروح الشغل دلوقتى لا و كمان اول يوم
نايا: نفسي اعرف هي فين المشكله و زودت السرعه و طلعت ع الدائري.
عند نضال
كان راكب مع خاله ع حنطور و طالع من وسط الاراضي الزراعيه
نضال: باااااس كفايه اووى لحد هنا يا خال انا مش عارف لو حد شافني هيبقى وضعي ايه
خاله: اوصلك قدام شويه كمان
نضال: لا كفايه اوووي كده تشكر
نزل و طالع من بين الزرع و واقف مستني اي حاجه معديه يركب فيها
نايا كانت معديه ب اقصى سرعه
دانيه بصويت: هدى شويه
نايا تبص وراها: يا بت خلى عندك ثقه فيا
وفجأه نايا تخبط نضال ب الاسكوتر و تنطره.
وقفت نايا الاسكوتر: يا نهار بنفسج
دانيه تنزل و تجرى ع نضال: كابتن يا كابتن
نايا بخوف: احيه ده شكله مات يا لهوووى هنعمل ايه
دانيه بخوف و دموعها نزلت: بس مش تقولي كده هو عايش عايش ان شاء الله يا كابتن رد عليا يا كابتن
نايا خوفها سيطر عليها: انتى هتفضلى تعيطي كتير عليه ده مات قومى اخلصي نهرب.
دانيه بدموع و عصبيه: انتى مش بتاعة مشاكل و بس لا كمان قلبك ميت، و هتهربي فين يا نصيبه ده لابس لبس ظباط احنا ممكن نتنسف و مسكت الشنطة اللي جنبه فتحتها لقت سي في (السيرة الذاتية) و بتقرأ
يا لهووى يا نايا ده مش ظابط عادى لا ده كمان رايح قوات خاصه ده احنا هنتعلق لا هنطحن لا هنتفحت.
نايا اخدت من ايدها الورق و فضلت تعيط: تعالى نسحب الاستاذ ده جوه شويه بعيد عن الطريق و شده ورا حجر كبير و فضلو هما الاتنين يعيطو
نايا تبص ل دانيه: دانيه انا مش حمل ادخل السجن
دانيه: نعم يا ختى بتبصيلي ليه
نايا بعياط: ماقصدش تدخلي بدالي بس ممكن نسلم نفسنا و تشهدي ان هو اللى رمى نفسه قدامنا
دانيه: لا انتي مش طبيعيه واحد زي الاخ ايه اللى يخليه ينتحر.
نايا تعيط اكتر: لا اصل انا مش هدخل السجن مستحيل و فضلت تعيط اكتر
و بعد عياط لمدت ساعتين و فجأه تضحك ضحكه شريره
دانيه باستغراب: لا اكيد مش اتجنيتي اكتر ما انتي مجنونة
نايا تغمزلها: لقيتها. بصي الظابط ده مطلوب في قوات خاصه و اول يوم يعني محدش يعرفه هناك
دانيه بغيظ: و عرفتى من فين بقى.
نايا ورتها جواب: من ده مكتوب ان اول يوم ليه هو تاريخ النهارده و المكان اللى هيتجمع فيه الظباط و كمان مكتوب هما تعمدو ان محدش يعرف حد لاسباب خاصه
دانيه بعدم فهم: ما المشكله انه مش هيروح في معاده يا ناصحه
نايا بكل ثقه: و مين قال انه مش هيروح في ميعاده؟
دانيه بعصبيه: يالهوى عليكى و هيروح ازاي و هو ميت
نايا بكل ثقه: هروح انا.
دانيه بخوف من نايا: لا لا اكيد انتى اتجنيتى و مش طبيعيه اه ما الكل قال عليكى كده و انا مكنتش مصدقه
نايا بجسم مرتعش: بت انتى اهدى هفهمك
دانيه: هسمع كلامك لحد ما اعرف انتى بتفكرى في ايه
نايا سرحت
دانيه خبطتها: اتفضلى قولى بتفكرى في ايه
نايا: اسمعى ده اول مره يروح المكان ده و اللى فهمته من الورق ان كل ظابط مايعرفش اي ظابط تاني و فيه كتير هيروحو من مدن مختلفه يعنى محدش يعرف حد هناك.
دانيه: اه و بعدين بقى يا فريكيكو
نايا: و بعدين بقى انا هاخد كل حاجه تخص الظابط و تبص في الكارنيه بتاعه نضال و هاخد لبسه و هروح مكانه
دانيه بصدمه: لا انتى مجنونة فعلا
نايا: قديمه اتقالتلى كتير. و سبينى في حالى انا خايفه اكتر منك
دانيه: نايا انتى عارفه ده اسمه ايه
نايا: اللى انا اعرفه ان لما حد يشوف الجثه دي محدش هيعرفه بما ان كل حاجه تخصه معايا.
دانيه بغيظ: طب محدش هيعرف الاخ ده هناك و محدش هيعرفه هنا طب يا ذكيه الصوره اللى في الكارنيه و بتقرب الكارنيه عند وش نايا في اختلاف السما م الارض
نايا ببرود: دي بقى اسهل حاجه
دانيه: ازاي بقى
نايا: هتعرفى بعدين و اخدت كل حاجه تخص نضال و قلعته البدله و مشيت و سابته
دانيه فضلت تعيط
نايا ع الاسكوتر: بت انتى بطلى عياط هتخلينى اعمل حادثه تانى
دانيه: ايه انا اللى هخليكى لا لا لا انتى مش طبيعيه خالص نزلينى.
نايا: عارفه لو ماسكتيش هوديكى عند نضال و اصوت و اقول انتى اللى خبطيه
دانيه: بس يا رخمه اسكتى و امشى ساكته و انا هخرس خالص و هسكت رفعت ايدها حطتها ع بقها
نايا وصلت مكان غريب: انزلى
دانيه: انزل فين احنا هنا فين
نايا: تعالى ورايا و هتعرفى
طلعت نايا و دانيه و خبطت ع باب شكله مخيف و دانيه خايفه جدا و اللى فتح شكله مخيف اكتر
الراجل: اهلا نايا
نايا: اهلا يا راجل يا طيب عايزه منك خدمه
الراجل: اؤمرينى.
نايا تطلع السى في: عايزه تصورنى صوره دلوقتى حالا و تحط صورتى بدل الاخ ده
دانيه: انتى يا نصيبه بتقولى ايه ده راجل و مش ينفع تروحى المكان ده بتاع رجاله هتروحي ازاي
نايا تبص للراجل: سيبك منها انت فهمتنى صح
بندق: فهمتك ده مقلب جديد منك، البسى البدله و تعالى و انا هبهرك
دانيه بخوف: يا رب استر يا رب انا ايه اللى خلانى اشوف وشك النهارده استر يارب صدقت امي لما قالت عليكى نصيبه و مجنونة.
نايا دخلت لبست البدله بتاعة نضال و لمت شعرها و لبست الكاب و كشرت
دانيه اول ما شفتها: ايه ده ياخربيت عقلك
نايا: كده بقى انفع و لا مانفعش ادخل
دانيه: اوباااااا يخربيت شيطانك نصيبه نصيبه
و صورها عم بندق و طلع الصوره و زور الورق كله و حط صورة نايا بدل صور نضال
عم بندق: تؤمر بأي خدمه تانى يا نضال بيه
نايا بصوت ذكرى: لا خلاص حلو اووى كده و ضحكت
قامت اخدت كل الورق و نزلت
دانيه: تعالى هنا لسه في مشكله.
نايا: و ايه هيا
دانيه: هتقولى ايه ل امك و اخوكى
نايا: امي دي بقى اسهل حاجه، تعالى نروحلها
نايا من جواها كانت خايفه جدا من اللى بتعمله لكن خوفها من السجن هو اللى خلاها تتصرف بجنون و من غير تفكير.
في فيلا فوزي هو راجل ديمقراطي و بيحب بناتو
ويزو تنزل ع السلم بجسمها المليان و تقول: ماما انا هنزل اقابل احمد و هندور ع ديزاينر تعملى فستان الفرح
رانيا: ماشى يا حبيبتى
في اوضة رنا بتتكلم في الفون: حبيبي عامل ايه
مدحت: الحمدلله يا حببتي وحشانى
رنا بحب: انا هتجنن عليك، عملت ايه بقى في فرنسا من غيري
مدحت: و الله كنت زهقان طول ما انتى مش معايا مش بعرف افرح
رنا بفرحه: حبيبي منحرمش منك ابدا.
مدحت: ايه يا قلبي اختك خلاص هتتجوز
رنا: اها عقبالنا
مدحت: طيب ما تكلمى باباكى و قوليله نعمل الخطوبه في يوم فرح اختك
رنا: تصدق فكره انا هقوله يارب يوافق
مدحت بضيق: و ميوفقش ليه مش هو قال لما اختك الكبيره تتجوز و اهي هتتجوز خلاص
رنا: نفسي اكون في حضنك انهارده قبل بكره
مدحت: مش اكتر منى ماتعرفيش قد ايه بتعذب لما اي حد يبصلك او لما افكر انك تضيعى مني
رنا: حبيبي انا ليك انت و بس.
رانيا تدخل الاوضه بتاعت رنا: رنا يالا الفطار
رنا: اووكى يا مامى، هقفل دلوقتى و هكلمك بعدين
مدحت: ماشى يا حبيبتي بااي
رانيا بحده: بتكلمى مين
رنا: ده مدحت
رانيا بضيق: و بعدين معاكى مش باباكي قالك مافيش جواز من اللي اسمه مدحت ده
رنا بنرفزه: انا مش عارفه بابي رافض مدحت ليه مع انه شاب امور و غني و حنين اووي عليا
رانيا بعصبيه: ع فكره بابا مش بيفرق معاه الامور و الغني.
رنا بصوت عالي: بدل ده كله مش فارق امال ايه اللى فارق معاه
رانيا بهدوء: ممكن اعرف فين اهل مدحت هو ليه مش باينله اهل
رنا: والده و والدته مسافرين ع طول و يوم الفرح هيجو
رانيا: ع العموم الكلام في الموضوع ده مع باباكى يالا اتفضلى الفطار
رنا بنرفزه: اوكي.
نايا وصلت بيتها تخبط جامد
هاله بغيظ: يارب الصبر من عندك و فتحت، انتى يابنتى لحقتى تروحى و ترجعى
نايا: طبعا احنا في عصر السرعه
كرم: اكيد اتكرشت و انتى الصادقه
نايا: اشوف فيك يوم يا ابن امى و ابويا
كرم بضحك: ما تتكسفيش قولى الصراحه
هاله بحده: جيتى بدرى ليه
نايا بجديه: ما انتى لو تبطلى تدعى عليا كنت بقيت احسن واحده في العالم
هاله: ربنا يهديكى يا بنتى و يصلح حالك، حلو كده يا فرساني.
نايا ترفع شافتها: بعد ايه خلاص اللى حصل حصل
كرم بضحك: اترفدتى
هاله بقلق: حصل ايه
نايا تضرب اخوها: بس يا رخم، يا ماميتو انا اقصد ان المدير و دانى فرع تانى امسكه كله لوحدى في الواحات
كرم: انا مش مطمنلك
هاله بجديه: بس يا كرم، و تبص ل نايا ليه؟ ده مكان بعيد اووي
نايا تمثل الزعل: ما انا وافقت عشان اريحك منى شويه
هاله: اه انا عايزه ارتاح منك، بس يوم يومين، كده هتاخدى وقت طويل اوووى عقبال ما تنزلى.
نايا بهزار: بجد يا ماميتو مش عايزانى اروح
هاله بحب: صحيح انتى مطلعه عينى بس بردو انتى بنتى حبيبتى
نايا تحضنها: ربنا يخليكى ليا يا ماميتو مش هتأخر عليكى، معلش بقى لازم انزل حالا
دخلت الاوضه و عملت نفسها بتلم
هدوم عشان هي اصلا مش محتاجه هدوم بنات هتلبس هدوم نضال
كرم دخل عندها و بجديه: ممكن افهم في ايه بالظبط
نايا: ما انا قولتلك عايز تفهم ايه تانى.
كرم بحده: ازاي اول يوم شغل و ازاي ينقلوكى و وافقتى ليه تروحى
نايا تحاول متتوترش: نقلونى عشان انا اكتر واحده بتفهم في القسم اللى طالبينه هناك و وافقت ليه بقى عشان ده هيفدنى
كرم يحضنها: خلى بالك من نفسك يا مجنونة
نايا بحب: حاضر و انت خلى بالك من نفسك و من ماميتو
كرم: دي في عنيا
نايا: يالا سلاموز يا رخم
طلعت سلمت ع مامتها
هاله حضنتها: ربنا معاكى يا بنتى خدى بالك من نفسك.
نايا بحب: بالله عليكى يا ماميتو ادعيلى الايام دي و بلاش تدعى عليا تانى خالص
هاله: نايا حبيبتى انا لما بدعى عليكى بيبقى من ورا قلبي، انا بدعيلك دايما من جوايا
نايا بجديه: بس ممكن ابواب السما تكون مفتوحه في الوقت اللى بتدعى عليا فيه و ربنا يستجيب لازم دايما تدعي و تقولى الخير
هاله بزعل من نفسها: معلش بس انتى بتفرسينى
نايا بهزار: الجو قلب نكد فجأه ليه، اضحكى بقى و اتبسطى محدش هيفرسك تانى غير المجنون ده.
كرم: انا مجنون و لسه هيمسكها
جريت و قفلت الباب وراها و نزلت ل دانيه: يالا يا دانيه
دانيه تسلم عليها: يالا ربنا معاكى، الحق اخلع انا
نايا تمسكها من هدومها: تعالى هنا تخلعى فين انتى هتوصلينى
دانيه تتنح: ايه
نايا تشدها: زي ما سمعتى كده انتى شريكتى فالجريمة ماليش فيه و هتبقى تزرونى كمان ع طول هناك.