رواية مر العمر للكاتبة الشيماء محمد الفصل السادس
فريق سيف شافوا اللي بيحصل وحاولو يقلدوهم بس للاسف اتخانقوا مين يريح الاول ومقدروش يتفقوا لحد ما وقعوا المركب وخسروا، فريق ادهم كملوا التتابع والكل بيريح حسب رأي ادهم
وطبعا خلي نفسه للاخر، واخيرا خلصوا الساعتين ورموا حملهم واترموا هما نفسهم على الارض...
ارتاحوا عشر دقايق وبعد كده جمعوا الكل علشان يعلنوا مين فاز في اول جوله ومين الفرق اللي هتمشي ومين هيكمل السباق المجنون ده.
لو اتحسبت بالدرجات فريق سيف هو الاول، وبعدها فريق ادهم والمفروض ان فرقه واحده هيا اللي هتكمل تدريبها
والباقي هيمشي ويتعينوا كظباط شرطه عاديين،
اللواء رياض: طبعا بناءا على الدرجات فريق سيف هو الاول والمفروض ناخدهم كظباط مخابرات...
فريق سيف فرح جدا وبدؤا يتنططوا.
اللواء: لكن، لكن في اعتبارات تانيه اهم من الدرجات يا ملازم سيف، اولا انت كشخص كويس لكن كقائد فانت فاشل جدا لان فريقك مش بينفذ اوامرك، الحياه كظابط مخابرات مش بتخلوا منالمخاطر وفي اوقات بتحط حياتك بين ايدين ناس تانيه وساعات بتكون مسؤل عن حياه ناس تانيه ومينفعش في الحياه العمليه انك تكون لوحدك لانك هتحتاج حد يأمن ضهرك او حد هيحتاج منك تأمنه وده مش هيحصل غير بالثقه وانت مش اهل للثقه دي لانك اناني بتفكر في نفسك ومصلحتك وبس، عمرك ما ساعدت حد من فريقك فبالتالي عمر ما حد فيهم هيساعدك، فريق ادهم في المركب كمل للاخر عارف ليه؟ لانهم بيثقوا في قائدهم وسمعوا كلامه من غير مجادله لكن فريقك جادلوك ومحدش سمع كلمه منك وبالتالي المركب وقعت، لو بدلنا المركب بارواح ناس كان هيكون ايه العمل دلوقتي؟ انت عندك مهارات لكن للاسف مش كفايه.
الكل سكت ومحدش عارف ايه اللي هيحصل دلوقتي وفريق سيف فاز ولا لأ
اللواء: انا كنت بتابع النهارده من اول اليوم وبدرس فيكم واحد واحد ولقيت فيكم فعلا ناس تستاهل انها تكون ظباط وناس لأ، شفت اللي بيهمه فريقه اكتر من انه يفوز واللي بيهمه انه ينقذ حياه اكتر من انه يوصل خط النهايه شفت اللي بينظم امور فريقه وبيعدي بيهم لبر الامان، شوفت قائد عظيم وفريق اعظم لانهم بيثقوا في قائدهم وبيمشوا وراه.
بس للاسف القوانين واضحه احنا محتاجين فريق واحد والاختيار صعب وهضطر للاسف اختار بينكم لكن لو بايدي هختاركم انتو الاتنين بس سامحوني لاني مش عارف اختار بينكم فبالتالي هتكملوا انتو الاتنين وهتستمروا شهر كمان وهتفضل اللجنه موجوده هنا وهنحدد خلال الشهر ده مين في الفرقتين هيكمل ومين هيمشي، بالتوفيق جميعا، اما بالنسبه للباقي فهتتعينوا كظباط في الاماكن اللي تختاروها مع كمان ترقيه استثنائيه لمجهوداتكم واتمنالكم جميعا التوفيق.
وهو ماشي وقف مع فريق ادهم
اللواء: اتمني انك تشتغل معايا ملازم ادهم هستناك تجيلي هناك
ادهم: باذن الله يا فندم
اللواء: صاحبك محمود انت متمسك بيه ليه؟مش شايف انه هيعطلك، ليه مصر انه يكمل؟
ادهم: انا متمسك بيهم كلهم لان كل واحد فينا متخصص في حاجه وبارع فيها
اللواء: وصاحبك ده بارع في ايه؟
ادهم: في الكمبيوتر، حطه قدام اي جهاز، قدام اي شبكه مهما كانت حمايتها، في مجال الكمبيوتر هو رقم واحد، عندك على خبير في المتفجرات ممكن من شويه حاجات في البيت يعملك قنبله احسن من اي مصنع واحمد خبير في وسائل المواصلات او بمعني تاني يعتبر اشطر حرامي عربيات,هههه مفيش اي شيء بيمشي على الارض مش بيعرف يسوقه جميع وسائل المواصلات هو محترف فيها من الطياره للعجله، حمدي: خبير في الاتصالات والاختراعات الغريبه، جيهان بتتكلم 6 لغات حيه مع قدرات تانيه كلنا طبعا عندنا المهارات القتاليه، فلو واحد فينا مش بيعرف يدافع عن نفسه في خمسه هيحموه، ولا ايه راي حضرتك؟
اللواء: وانت مهارتك ايه؟
ادهم: مهاراتي عاديه
اللواء: متواضع مش بتتكلم عن نفسك بس من اللي قريته في ملفك انك بتتكلم 7لغات حيه انجليزي والماني وفرنساوي وايطالي واسباني وعبري وصيني صح؟وحاليا بتتعلم هندي، ده غير مهارتك في الكمبيوتر ووسائل المواصلات برضه وطبعا مهاراتك القتاليه لان على حد علمي سيادتك بتتقن الجود والكارتيه والتايكوندو والكونغفو وحاجات تانيه كتير مكتوبه في ملفك، اتمني ان فريقك يفوز.
سابهم ومشي واخيرا اليوم الطويل ده خلص والكل هيرتاح الا ادهم كان بيلبس وخارج
محمود: انت رايح فين؟
ادهم: مشوار ضروري ومش هتأخر
حمدي: انت فيك نفس لمشاوير؟
احمد: سيبوه يمكن المشوار ده بيردله روحه ولا حاجه
ادهم بصله بنظره تجمد النار
ادهم: المشوار اللي انا رايحه ما يخصش حد فيكم. بعد اذنكم
محمود: ادهم استني
ادهم: ايه تاني؟
محمود: ممكن تجيبلي فرخه مشويه معاك ممكن؟
ادهم: ههههههه حاضر يا محمود هجيبلك.
طار ادهم على معاده اللي اتأخر عليه وراح لقي ليلي مولعه من تأخيره
ادهم: استر يا رب عنيها خضرا
ليلي: بتهزر سيادتك وانا مستنيه من بدري كل شويه اخترع للاستاذ حجه علشان اشوفك وصلت ولا لسه؟
ادهم: سوري يا قلبي بس غصب عني النهارده كان يوم طويل وصعب
ليلي: عملت ايه؟
ادهم: فريق سيف فاز
ليلي: ايه وانتو؟
ادهم: مش عارف اقولك ايه
ليلي: ادهم اوعي تكون هتمشي من البلد
ادهم: خايفه؟
ليلي: انت شايف ايه؟
ادهم: شايف عنيكي اغمقت تبقي خايفه
ضمها لصدره وطمنها
ادهم: متخافيش معانا شهر كمان احنا الفرقتين نثبت فيه من الافضل، ليلي انا تعبان جدا ومش قادر احرك اي حاجه في جسمي ممكن تقعدي معايا شويه
ليلي: نقعد فين؟
ادهم: هنا في الارض
وفعلا سابها وقعد ورقد كمان على الارض
بصتله بحب وضحكت
ادهم: اعمل ايه؟مش قادر
ليلي: طيب كنت ريحت وما جيتش
هيا قعدت جنبه فعدل نفسه وقرب منها وحط ايده على خدها الناعم.
ادهم: واتحرم من اجمل عنين ده لا يمكن ابدا، انتي راحتي، انتياللي خلتيني اعدي اليوم، كل ما اتعب اتخيل عنيك مستنياني بتديني قوه غريبه بكمل بيها، انتي متعرفيش انا حبيتك قد ايه؟
ليلي: مهما تكون درجه حبك عمرها ما هتوصل قدي
نام ادهم تاني على ظهره وشبك ايديه تحت راسه
ادهم: مش هجادل معاكي مين بيجب مين اكتر
قربت ليلي منه ورفعت راسه وقالتله
ليلي: حط راسك على رجليا هترتاح اكتر
ادهم: بس هتعبك؟
ليلي: انا عايزاك تتعبني، ابوس ايدك اتعبني
ابتسم ادهم وفعلا نام على رجليها والغريبه انه نام فعلا وهيا فضلت تلعب في شعره وحاسه انها لو بعدت عنه تموت، وفجأه قلبها اتقبض هيا ممكن الحياه تبعدها عنه؟
دموعها نزلت غصبا عنها ونزلت على وشه فصحته
ادهم: ليلي في ايه حبيبتي مالك؟
ليلي: لا مفيش
عياطها بيزيد وهو مش عارف مالها فضمها لصدره وبيحاول يسكتها
ادهم: ليلي ارجوكي في ايه؟علشان خاطري قولي
ليلي: خايفه يا ادهم خايفه.
بتمسح دموعها بايديها وبتبصله
ليلي: خايفه في يوم اصحي من الحلم ده ومتكنش موجود جنبي
ادهم مسح دموعها بايديه ومسك وشها بايديه وبص في عنيها
ادهم: اليوم اللي قلبي يبطل ينبض بحبك هو اليوم اللي قلبي هيبطل ينبض نهائي يا ليلي. واوعدك اني هفضل احبك لاخر لحظه في عمري واوعدك اني عمري ماهسمح لاي حد يشاركك قلبي، عارفه حتى لو افترقنا او الدنيا بعدتنا هتفضلي انتي وبس في قلبي
ليلي: بجد هتحبني ديما؟
ادهم: لاخر لحظه في عمري هحبك
ليلي: انا بحبك قوي( ايده كانت على وشها فمسكت ايده وحطتها على شفايفها وباست ايديه وهو ضمها جامد قوي، زي ما يكون عايز يدخلها جوه صدره ويحميها من العالم ده)
رجع لاصحابه بس قلبه هو كمان مقبوض وحاسس ان في حاجه هتعكر الصفو ده
محمود: فين الفراخ؟
ادهم: يوه نسيت يا محمود معلش
محمود: نسيت؟ودي اصرفها منين دي، انا جعان حرام عليك
ادهم: سوري بجد يا محمود نسيت.
عدي كام يوم والحال زي ماهو تمارين طول اليوم واخرالنهار بيقابل ليلي
وكل يوم ادهم يلاحظ ان سيف بيضايق جيهان كل شويه
كان قاعد مع فريقه وجه سيف عليهم
سيف: ازيكم جميعا
الكل: الحمد لله
سيف: بعد اذنك جيهان تسمحي
جيهان: لا مش هسمح يا سيف مش هتعشي معاك ريح نفسك بقى
سيف: طيب جربي يا جيهان
ادهم: مش قالتلك لأ مستني ايه تاني اتفضل بقى
سيف: اعتقد ان محدش وجه لسيادتك كلام ومحدش عينك وصي عليها.
ادهم: لحد هنا وكلامك خلص اتفضل وبعدين عيب عليك كده
سيف: عيب؟وحضرتك اللي هتعرفني العيب؟انت اخر واحد تتكلم عن العيب، اللي بيته من زجاج ميحدفش الناس بالحجاره
قام ادهم واصحابه كلهم وقفوا ومسكوا ادهم ليتخانق معاه
ادهم: قصدك ايه بقى؟انا بيتي مش من زجاج ابدا
سيف: قصدي انت عارفه كويس
ادهم: لا مش عارف قول قصدك ايه؟
سيف: بلاش
ادهم: طالما اتكلمت يبقى تكمل والا مش هيحصلك كويس.
سيف: قصدي على السنيوره اللي بتروحلها كل يوم ولا هو حلو ليك وكخه لغيرك
ادهم اتصدم للحظه بس سيطر على نفسه بسرعه
ادهم: اممم. وايه العيب بقى في ده؟معمركش شوفت اتنين بيحبوا بعض قبل كده؟ ولا سيادتك شايفني بفرض نفسي عليها؟
سيف: لا شفت كتير بس قبل ما حضرتك تيجي تكلمني عن الاخلاقيات بص لنفسك، انا لما اعجبت. اعجبت بزميله في سني مش عيله بفيونكات ومعدتش ال 15 سنه
ادهم حس ان الدنيا كلها بتلف بيه.
ادهم: مين دي اللي معدتش 15 سنه؟هاه؟
سيف بابتسامه خبيثه
سيف: اوه شكلك ما تعرفش؟ انت عار على الظباط يا سياده الملازم مش عيب لما عيله تضحك عليك، امال هما بقالهم قد ايه بيعلمونا على جهاز كشف الكدب وازاي نعرف نكشف الكدب من العيون. اه سوري نسيت انت لما بتبص في عنيها بتغرق في الوانها
هنا ادهم ضرب سيف ضربه وقعته على الارض وخلته ينزف
ادهم: اخرس مش هسمحلك تزود كلمه.
سيف: مش مصدقني روح الصبح الساعه 7 ونص وشفها قدام المدرسه واهي المدرسه جنب النادي، شوفها بالمريله الكحلي والفيونكات البيضه والضفرتين، شوف حبيبه قلبك على حقيقتها وبعد كده تعال وكلمني ده لو ليك عين اصلا تتكلم سابهم ومشي والكل واقف مصدوم من اللي سمعه
محمود: ادهم
ادهم: مش عايز حد يكلمني نهائي، بعد اذنكم
احمد: هتروح فين؟
ادهم: في داهيه سيبوني لوحدي.
ادهم طلع في الصحرا العريضه ومع كتر اتساعها حس انها ضيقه عليه قوي وبتخنقه قوي. هو عمره ما سألها عن عمرها. هو لاحظ انها صغيره بس تخيلها 18 او 19 سنه مش 15 ابدا، هو ممكن يكون بيحب عيله؟
احمد: ادهم
ادهم: قلت عايز اكون لوحدي
احمد: انا بس عايز اطمن عليك
ادهم: انا كويس مالي يعني؟، انت كنت تعرف؟
احمد: عارف انها صغيره عننا بس مش للدرجه دي، هتعمل ايه؟
ادهم: مش عارف، هتأكد الاول
احمد: ولو الكلام صح؟
ادهم: انا مش هعمل علاقه مع عيله انا اكبر منها بعشر سنين ادهم استني النهار يطلع وفضل الليل كله في الساحه بره المعسكر مستني النهار يطلع زي ما تكون حياته واقفه على طلوع النهاراصحابه راحوا التدريب
احمد: ادهم الساعه 6 مش هتيجي التدريب هيبدأ؟
ادهم: لا مش جاي روحوا انتو
شويه وصلت اخيرا الساعه 7 ولسه ادهم هيتحرك لقي المدرب بينادي عليه
رأفت: ملازم ادهم تقدر تقولي حضرتك مش في التدريب ليه؟
ادهم: اسف ورايا مشوار مهم
رأفت: افندم وراك ايه؟ اتفضل على تدريبك
ادهم: قلت لحضرتك اسف ورايا مشوار مهم. بعد اذنك
رأفت بصوت عالي: لو خرجت بره يا سياده الملازم مش هيحصلك كويس.
ادهم ما ردش عليه وسابوه ومشي كل تفكيره في ليلي، وصل اخيرا المدرسه ووقف قدامها من بعيد شويه بحيث يشوف البنات و هى داخله وعمال في كل لحظه يدعي انه ما يشوفهاش لانه مش متخيل انه ممكن يبعد عنها، اخيرا شافها ومصدقش عنيه بس اهيه مع صحباتها بالمريله الكحلي والضفاير والفيونكات البيضاء، وقف مصدوم مش عارف يتحرك ولا ينطق ولا يفكر، ليلي شافته فابتسمت واستأذنت من صاحباتها ومشيت من قدامه وراحت لورا المدرسه علشان يروح وراها فضل واقف مكانه مش عارف يمشي ولا يعمل ايه؟بس راح وراها ووقف قدامها وهو مصدوم.
ليلي: ايه يا حبيبي في ايه؟مقدرتش تستني لاخر النهار للدرجه دي وحشتك؟
ادهم: ...
ليلي: ادهم في ايه مش بترد ليه؟مالك حبيبي؟
ادهم: حبيبك؟ اسمي الملازم ادهم والزمي حدودك وانتي بتكلميني انا مش عيل بلعب معاكي
ليلي: ادهم في ايه مالك؟
ادهم: مالي؟ مش عارفه مالي؟
ليلي: لا مش عارفه في ايه؟
ادهم: انتي كدبتي عليا ليه؟
ليلي: انا عمري ما كدبت عليك، كدبت في ايه؟
ادهم: في عمرك، انتي مقولتيش انك عندك 14 سنه.
ليلي: انت مسألتنيش علشان اقولك وبعدين انا هبدأ في ال 15 قريب
ادهم: والنبي بجد؟هتبدأي في ال15 والمفروض انا اعمل ايه؟ ارقص؟انت ازاي ما تقوليليش عمرك هاه؟مين قالك ان انا عايز ارتبط بعيله هاه؟.