قصص و روايات - قصص رومانسية :

رواية مر العمر للكاتبة الشيماء محمد الفصل الثاني والعشرون

رواية مر العمر للكاتبة الشيماء محمد الفصل الثاني والعشرون

رواية مر العمر للكاتبة الشيماء محمد الفصل الثاني والعشرون

سيف: ايه السلسله دي؟دي حريمي
ادهم: دي سلسله ليلي؟
سيف: وانت سلسلتك فين؟
ادهم: رجعتهالها
سيف: كل واحد رجع سلسلته للتاني؟
ادهم: لأ ليلي مرجعتهاش
سيف: امال وصلتلك ازاي؟
ادهم: لقيتها مع سلمي بتتخانق عليها هيا واخوها ولما سألتها قالتلي انها لقتها في الارض لما كانت في النادي
سيف: يعني وقعت من ليلي
ادهم: او هيا رمتها، لو وقعت منها كانت دروت عليها او سألت عليها
سيف: ما يمكن تكون سألت عليها؟

ادهم: قلت لكل عمال النادي حد سأل على سلسله ضايعه قالو لأ المهم سيبك انت
هما سهرانين وبيتكلموا ويهزروا، وليلي في بيتها هتجنن من التفكير هومشي ليه ولما لسه بيحبها ما اتكلمش ليه؟ومن كتر الاسئله اخدت قرارها، قامت لبست هدومها وخرجت ومهمهاش ابدا ان الساعه 3 الفجر ومشيت لحد ما طلعت على الطريق ووقفت عربيه معديه
ليلي: لو سمحت تاخدني في طريقك يا اسطي؟
السايق: خير يا بنتي الساعه 3و ربع الفجر، عايزه تروحي فين؟

ليلي: اروح المعسكر بتاع الجيش القريب مننا
السايق: معسكر الجيش دلوقتي؟دول ممكن يضربوا علينا نار لمجرد اننا هنقرب منهم؟
ليلي: لا ما تخافش ممكن لو سمحت توصلني؟ارجوك لازم اروح ضروري
السايق: طيب يا بنتي اركبي بس مش هستناكي
ليلي: لا عايزاك توصلني بس، ويبقي كتر خيرك قوي،
ادهم وسيف لسه ساهرانين لقي العسكري اللي على البوابه جي ناحيتهم
سيف: خير في ايه؟
العسكري: في واحده على البوابه
سيف: واحده؟تايها دي ولا ايه؟

العسكري: لا مش تايهه
سيف: امال عايزه ايه ما تنطق يا واد انت هتنقطنا ولا ايه؟
العسكري: عايزه سيادتك(وبيبص لادهم)
ادهم: عايزاني انا؟
العسكري: ايوه يا افندم
سيف: هنيالو
ادهم: اخرس يا يلا، قولها مبقابلش بنات اخر الليل
سيف: استني يا عسكري، هيطلع يشوفها
ادهم: وانت قررت عني؟
سيف: واحده جايالك الساعه 3 ونص الليل لو مش حاجه خطيره مش هتيجي، هتستني للصبح ولا ايه؟ اطلع شوف مين مش هتخسر حاجه
ادهم: ماشي طالع.

طلعوا الاتنين مع بعض واتفاجأ لما لقاها ليلي
ادهم: انتي اتجنيننتي؟انتي ازاي تيجي هنا؟وجيتي ازاي هنا؟
ليلي: وقفت عربيه وجيت
ادهم: وقفتي عربيه من الطريق الساعه 3 الفجر وركبتيها
ليلي: اه فيها ايه؟
ادهم: طيب اقولها ايه دي؟انتي مجنونه رسمي، مش ممكن يكون مبرشم ولا سكران ولا حد مش مظبوط ولا اي نيله.؟ انتي مجنونه؟ ازاي تركبي عربيه الفجر ومع حد ما تعرفيهوش؟
ليلي: ركبت واللي حصل حصل واديني وصلت اهوه.

ادهم: وعايزه ايه دلوقتي؟
ليلي: انت سيبتيني ليه من عشر سنين وبعدت؟
ادهم: تاني؟
ليلي: تاني وتالت ومليون لحد ما تجاوبني
ادهم: قلتلك معدش من حقك تسألي، خلصتي كلامك؟اتفضلي روحي بقى، وريني هتروحي ازاي؟
ليلي: انا مخلصتش كلامي
ادهم: انا خلصت اتفضلي
سابها ومشي وسيف وراه
سيف: انت مجنون هتسيبها تروح كده؟
ادهم: ماهي جت كده
سيف: لا يا ادهم مش ادهم اللي يسيب بنت في الفجر تمشي كده ابدا
ادهم: عايز مني ايه؟

سيف: عايزك تتصرف صح، روح وصلها ما تتكلمش معاها بس وصلها، لو جرالها حاجه هتعمل ايه؟
هنا ادهم وقف وتخيل فعلا لو جرالها حاجه، بص لسيف، سيف اداله مفتاح عربيته
سيف: راكنه بره عند البوابه خده وروح الحقها
اخدها وراح كانت ليلي مشيت وهو راح وراها لحد ما حصلها وقف جنبها وفتح الباب
ادهم: اركبي
ليلي: جيت ليه؟
ادهم: اركبي.

ركبت ليلي وهو ساق بيها واخدها مكان وسط الصحرا ووقف وهيا كل اللي بتعمله بتعيط وبس، وقف العربيه وطفاها
ادهم: لما تخلصي عياط اندهيلي
سابلها العربيه وطلع بره قعد على الأرض قدام العربيه وفضل يبص للقمر والنجوم اللي كانت من وسط الصحرا باينه قوي وواضحه قوي خرجت ليلي من العربيه
ليلي: انت عارف ان ممكن يكون في عقارب في الارض دي؟
ادهم: عقارب ولا تعباين، مش مهم.

ليلي: من عشر سنين كنا المفروض بنحب بعض جدا، بس فجأه تتطلب مني نتقابل في فندق وفعلا نتقابل تقوم تصورني وتبعت الصور لاصحابك وتكسب رهان رخيص متراهنه عليا، ده تسميه ايه؟
ادهم: انا ما صورتكيش، الصور اللي بتتكلمي عنها دي هيا السبب اللي اتجبرت بيه ابعد عنك، ولو ما بعدتش الصور هتتنشر وعلشان كده بعدت اما الرهان الوحيد اللي راهنته عليكي هو انك هتفضلي مستنياني بعد خمس سنين بس للاسف خسرت الرهان ده.

ليلي: لا يا ادهم اولا ماكانتش صور كانت فيديو، فيديو لينا مع بعض في الفندق من ساعه ما دخلنا لحد ما خرجنا.

ادهم: قلتلك ما صورتكيش، اللي صورنا كان واحد ابويا باعته لما سمع بعلاقتنا وعرف ان سنك صغير قوي ماكنش مصدق فبعت حد يراقبني ويجيبله دليل فصورنا واحنا في الفندق مع بعض، وواجهني بالصور دي وساومني اني ابعد عنك والا هيبعت نسخه لمدرستك ونسخه لبيتك ونسخه للنادي، يا اما ابعد عنك خمس سنين، وبعدها انا حر بس من غير ما اكلمك او ابعتلك رساله او اشوفك، ده كان شرطه وعلشان بحبك وافقت اني ابعد عنك الخمس سنين دول.

ليلي: وابوك كان يعملها؟
ادهم: يعمل ايه؟
ليلي: يبعت الصور دي؟
ادهم: لا مكنش هيبعت ولا المدرسه ولا النادي لانه مش النوع اللي ممكن يفضح حد، بس كان ممكن يبعت نسخه لابوكي علشان يجبرنا نبعد عن بعض
ليلي: طيب ماكنتش بعدت وبعدين ابويا كان هينسي وهيسامحني وهتعدي
ادهم: مش بقولك مجنونه، الصور دي كنا في السرير مع بعض صوره منهم كنتي في حضني واحنا عريانين، لو اي حد شاف الصور دي كانت هيتهمك في شرفك.

ليلي: بس انا فضلت محتفظه بشرفي
ادهم: وكان ايه دليلك ساعتها انك محتفظه بيه؟
ليلي: اي دكتور هيعرف لو بنت ولا لأ.

ادهم: وانتي عايزاني احطك في موقف تضطري ثثبيتي فيه انك محتفظه بشرفك؟ولما تثبتيه، ابوكي هيثق فيكي تسافري كليه لوحدك وتكملي تعليمك؟ساعتها كانت ثقته فيكي هتنتهي ومكانش هيسمحلك تخرجي بره البيت ومش بعيد يجوزك اي حد يتقدملك، كنتي عايزاني اخاطر بمستقبلك كله؟ولا ابعد خمس سنين تكوني دخلتي كليتك وحطيتي رجلك عي الطريق الصح وتكوني كبرتي وعرفتي عايزاه ايه؟كان اختياري هو الصح، طول الخمس سنين بحلم باللحظه اللي هشوفك فيها؟هضمك؟ لاهحضنك؟لأ هاخدك اي مكان نكون وحدنا، هاعمل اي شيئ. لكن اللي ما عملتش حسابه ابدا اني اجي وتعرفيني على واحد تقولي انه خطيبك من سنتين، سنتين بحالهم ما افتكرتينيش حتى، كملتي حياتك وواصلتي من غيري، ده اللي معملتش حسابه ابدا، والخمس سنين بعدها كانو قمه في العذاب وانا كل شويه اتخيلك في حضن واحد، اتجوزتيه او ارتبطي بيه، ده كان العذاب بعينه.

ليلي: انا وصلي فيديو مش صور، فيديو لينا مع بعض في الفندق واتقالي انك انت صورت الفيديو ده علشان تثبت لاصحابك اني بقيت خاتم في صباعك وبعدها مشيت
ادهم: بقولك صور مش فيديو مفيش فيديو
ليلي: وانا شفته بعيني، شفت الفيديو بعيني
ادهم: شوفتيه ازاي ومين وراهولك؟ومين قالك اني متراهن عليكي؟ومتراهن مع مين اصلا؟

ليلي: احمد صاحبك هو اللي وراني الفيديو وهو اللي قالي انك متراهن عليا وهو اللي قالي انساك افضل واكمل حياتي
ادهم: احمد؟احمد صاحبي انا؟انت اكيد بيتهيألك يا اما بتألفي؟

ليلي: انا عارفه انا بقول ايه، بعد ما انت سافرت كل يوم كنت بروح النادي واسألوه عليك ويقولي مايعرفش عنك حاجه، لحد في يوم قالي انساك واكبر دماغي منك واحمد ربنا انك ما غلطتش معايا ولما رفضت كلامه ده قالي انك كنت بتتسلي بيا ولما برضه ما صدقتوش وراني الفيديو، فديو متصور لينا في الفندق بكل اللي حصل وقالي ان هو لما حاول يكلمني وانا فضته والجرسون بتاع النادي قالكم ان انا مش بكلم اولاد ساعتها انت راهنت الشله كلها انك هتخليني خاتم في صباعك والفيديو كان دليل نجاحك.

ادهم: ومكملتش معاكي ليه للاخر لما انتي كنتي مجرد رهان؟
ليلي: لانك مش عوايدك تنام مع بنات فسيبتني احتفظ بعذريتي، لكن بعتلي رساله معاه
ادهم: وايه هيا بقى الرساله؟
ليلي: اني يوم ما افقد عذريتي لاي سبب وعايزاك ابلغك وانت هتكون اكتر من سعيد انك تنام معايا.

ادهم: الرساله الوحيده اللي طلبتها من احمد يوصلهالك هيا انك تفتكري ديما وعدي ليكي اني مهما ابعد هرجعلك ديما وانك تفتكري ديما اني بحبك دي الرساله اللي طلبت من احمد يوصلهالك
ليلي: وده اللي احمد وصلهولي
ادهم: وبعدها حصل ايه؟

ليلي: جالي انهيار عصبي وفضلت في المستشفي فتره ولما خرجت قررت اني انساك واكمل حياتي بس طبعا معرفتش انساك، ولما شفتك في الكليه خفت ولقيت عمر قدامي هو وايناس فقلتله يمثل انه خطيبي وده اللي حصل وبعدها جريت وراك علشان اسألك جاي ليه بس كنت مشيت.

ادهم: طيب ما اتكلمتيش معايا ليه الاول؟شوفيني جاي ليه وبعدها اتصرفي، بس ازاي؟انتي بتتصرفي الاول وتفكري بعدها ديما غبيه، تحبي الاول وبعدها تفكري، كنتي عارفه عمري لما حبيتيني المفروض تعرفي من الاول اني مش مناسب بس لأ تحبيني وبعدها تفكري، تضحكي عليا وتقوليلي مخطوبه وبعدها تجري ورايا علشان تسأليني، تشوفي معايا عيال تفترضي انهم عيالي تروحي تتخطبي، تشوفيني بلعب معاهم تروحي كاتبه كتابك، تتطلعي من البيت الفجر تركبي عربيه وبعدها تفكري، لحد امتي هتفضلي تتصرفي قبل ما تفكري لحد امتي؟

ليلي كانت بتعيط
ليلي: انا مش عارفه اعمل ايه يا ادهم، سكتت شويه وكأنها افتكرت حاجه مهمه، ادهم انا اتجوزت، هنا انفجرت في العياط جامد وحطت راسها على صدره وهيا بتعيط واستنت منه يضمها او يطمنها او يقول اي حاجه بس ادهم كان تمثال واقف
ليلي: ادهم؟
ادهم: عايزه مني ايه؟
ليلي: خدني في حضنك وطمني.

ادهم: مش من حقي، مش من حقي اضمك او اطمنك، للاسف انتي متجوزه راجل محترم، وانا عمري ما كنت خاين ابدا، ومش هخون واحد مديونله بحياتي، انقذ حياتي مرتين، انتي وقعتي نفسك في الورطه دي وانتي خرجي نفسك منها بس لو سمحتي خليني بره حساباتك
ليلي: يعني ايه؟
ادهم: يعني انا تعبت منك واكتفيت يا ليلي، لو كملتي مع عماد لنفسك لو انفصلتي لنفسك ما تستنيش مني اي حاجه
ليلي: ادهم،.

ادهم: النهار بدأ يطلع يدوب اوصلك قبل ما حد ياخد باله من غيابك
اخدها وروحها بيتها وهو ساكت تماما.

ادهم روح ليلي بيتها وهو راح المعسكر واول ما شافه سيف
سيف: ها ادهم عملت ايه؟
ادهم: معملتش
سيف: طيب اتأخرت ليه؟
ادهم بزعيق: هو تحقيق ولا ايه؟وانت مالك انا عملت ايه؟
سيف بصله باستغراب مش فاهم هو ماله
ادهم: انا حاليا مش قادر اتكلم فلو سمحت محتاج اكون لوحدي، معلش يا سيف
سيف: لا يا ادهم عادي.

سابه ومشي ودخل اوضته وقفل على نفسه وافتكر كل حاجه عملها في يوم من الايام لاحمد صاحبه، كام مره انقذه من كام ورطه؟كام مره ساعده؟كام مره اتحرم من اجازته في الكليه علشان خاطره؟كام مره وقف جنبه؟واكتر حاجه وجعته قوي يوم ماعرف ان ليلي اتخطبت وراحله بيته يفرشهوله ورد وراح يغنيله في فرحه وهو موجوع وبسببه، طيب ليه؟ليه احمد يعمل فيه كده؟طيب غلط وغار منه في لحظه، يقوله بعدها، يقوله في اي وقت، لو قاله، لو قاله كان ممكن يسامحه، لو حتى قاله قبل ليلي ما تقوله بدقيقه واحده كان برضه هيسامحه بس كان يقوله، مايسبوش كده، فجأه قام لم هدومه وطلع.

ادهم: سيف، سيف(بينادي عليه)
سيف: ايوه يا ادهم
ادهم: انا راجع مصر دلوقتي
سيف: ادهم ايه اللي حصل؟انا مش قصدي ادخل انا بس عايز اتطمن عليك مش اكتر
ادهم: انا كويس، كل الحكايه اني عرفت مين اللي فرقني عن ليلي السنين اللي فاتت دي كلها
سيف: مين؟
ادهم: بعدين هحكليك بعدين، سلام دلوقتي
وصل القاهره على العصر كده وطلب من امه انها تعزم احمد ومراته على العشا عندهم وبعدها راح لابوه الشغل
ادهم: ممكن ادخل.

ابوه: ادهم ادخل طبعا، حمدلله على السلامه جيت امتي؟
ادهم: حالا
ابوه: اقعد، مالك؟
ادهم: عايز اسألك سؤال بس تجاوبني عليه
ابوه: طبعا اسأل
ادهم: عرفت منين بعلاقتي بليلي من عشر سنين؟مين قالك انها صغيره؟
ابوه: ياه عشر سنين، مش فاكر يا ادهم ده موضوع قديم
ادهم: انا لسه عايش فيه، يبقى مش قديم، وانا متأكد انك فاكر فبلاش الحركات دي.

ابوه: وعدت اني مقولكش خلاص وانا عمري ما برجع في وعدي ابدا، وبعدين هيفرق معاك في ايه دلوقتي؟
ادهم: طيب حافظ على وعدك ما تقوليش مين، انا هقولك حد وانت تقولي اه ولا لأ؟ولو لأ مش هسألك اسئله تانيه ابدا
ابوه: ماشي
ادهم: احمد هو اللي قالك؟
ابوه: ايوه هو، بس هو كان عايز مصلحتك وخايف عليك مش اكتر، ما تزعلش منه، وزي ما سامحتني يبقى تسامحه
ادهم: انت مش عارف حاجه
ابوه: طيب عرفني
ادهم: بالليل هتعرف.

سابه ومشي وهو دماغه هتنفجر من التفكير، سيف اتصل بيه وقاله ان ليلي سألت عليه واتضايقت جامد لما عرفت انه سافراخيرا وقت العشا والكل قاعد اتعشوا وادهم في منتهي الهدوء بيبص لاحمد كأنه بيشوفه لاول مره، بيدرسه من بعيد ويدرس ملامحه، ويسأل نفسه ازاي هو ظابط من اكفأ ظباط المخابرات وواحد عرف يكدب عليه الفتره دي كلها وازاي هو عمره ما اكتشف كدبه
احمد: ايه يا ادهم مالك بتبصلي كده ليه؟
ادهم: غريبه يا اخي.

احمد: ايه هيا اللي غريبه؟
ادهم: انك تفضل مع حد اكتر من 20 سنه وتكتشف بعد كده انك ما تعرفش الشخص ده نهائي
وفاء: ادهم انت غريب النهارده خالص يا حبيبي
عبير: تلاقيه بيحب جديد ولا حاجه
ادهم: لا يا عبير مش بحب جديد، عارف يا احمد انا ليه ما اتجوزتش لحد دلوقتي؟عارف لو كنت اتجوزت من خمس سنين مثلا كان ممكن يكون عندي عيل زي كريم ابنك مثلا، عارف ليه ما اتجوزتش؟

الفصل التالي
جميع الفصول
روايات الكاتب
روايات مشابهة