رواية صراع الجبابرة للكاتبة روز الفياض الفصل العشرون
اصواتٌ لاتُنسى.
منها مايثير الحزن ومنها مايثير الخوف.
كأصوات الدبابات والطائرات. اصوات الصواريخ والغارات.
واصوات الرصاص.
كصوت سقوط امي.
يثير كل شيء سيء في روحي من خوف ورعب وحزن.
شمه..
سمعت صوت وراي وگف كلبي.
كل احنه درنه نشوف شنو هالصوت.
شفت امي واكعة..
هذا الصوت جان صوت ارتطام راس امي..
لثواني بقيت متحنطة جمدت بمكاني.
بعدين ركضت على امي: ماااما..
ماما. ماما. حبيبتي ماما. تسمعيني. ماما جاوبيني. ماما.
حسيت كلبي راح يوكف من الرعب.
ظلت دموعي تتجمع واني احاجيها.
درت على زوجة ايوب والبنية الوياها اريدهم يساعدوني، بس ملكيتهم. اختفوا.
ظليت ادك على روحي امي راح تموت واني وحدي.
بيمن اتصل ووين اروح.
رحت اركض على بيت ام تيسير واني اصرخ من الباب: لحكوووني، لحكوووني، خااالة. خاالة امي ماتت لحكيني.
طلعوا بيت ام تيسير كلهم يردون يعرفون شكو كتلهم: امي ماتت وماادري وين اروح..
امي مااتت..
ركضوا ابو تيسير وتيسير كدامي لبيتنه واني رحت وراهم والرعب ماليني..
اسمع ام تيسير تگولي: اسم الله خالة اسم الله..
لابسه عباتي وجايه وراكم.
اباوع على تيسير خله ايده على گلب امي ودار على ابوه گله: عدله. عدله.
انوب دار علي گلي: لتخافين عدله مو ميته.
ابو تيسير: اركض جيب السيارة خل ناخذها للمستشفى.
ركض تيسير يجيب السيارة واني ركضت جبت عبايتها.
اجت ام تيسير ساعدتني لفيناها بالعباية وشالوها صعدوها بالسيارة.
تيسير وام تيسير وياها.
واني ركضت وديت آدم يم بناتهم ورحنه وراهم اني وابو تيسير بتكسي.
وصلنه كبل دخلناها للطوارئ. قاسوا ضغطها كال الدكتور: هااي شنووو ضغطها معلگ. زين جبتوها بسرعة جان صارت عدها جلطة.
رأسا خلولها مغذيات اثنين بكل ايد واحد.
بقينه بالمستشفى لساعة ثنعش يالله فتحت عيونها، محجت شي بس تون.
بقينه اني وام تيسير يمها وابو تيسير وتيسير بقوا بره ينتظرون.
شمه: ماما حبيبتي. شلون صرتي؟
محجت شي.
ام تيسير: شجاج خيه. ام سلام حبيبة تسمعيني شبيج شنو إلى رفع ضغطج.
بعاللحظة امي دارت علي باوعتلي وبجت.
هي بجت واني هم بجيت.
بقينه نبجي اثنينه وامي تيسير عالواهس تبجي ويانه بدون متعرف شي عن جريمتي بحق نفسي وبحق امي.
دنكت على رجلين امي وهي نايمه عالسديه مال المستشفى وبستهم وكتلها واني ابجي: سامحيني ماما. فدوه سامحيني.
مجاوبتني.
رجعنه للبيت شتا باردة الدنيا وليل والشوارع ظلمه والدنيا بدت تمطر.
رذاذ خفيف بدا ينزل من السما.
وصلنه للبيت دخلوا امي وراحوا وبقينه بس اني وياها حتى آدم بقى عد بيت ام تيسير نايم.
نامت امي مسكينة. وبقيت اني طول الليل كاعده اخاف انام وهي تموت.
بقيت كاعده اراقب حركت صدرها تنتفس لو لا.
عيوني احسها طفت من البجي، بدا النعاس ياخذني بس مااكدر انام امي منو يراقبها.
كافي ابوي ومصطفى راحوا مبقالي احد غيرها ياربي.
اذا ماتت امي اموت اني هم وراها.
الصبح كعدت بس راحت للحمام ورجعت.
اتوسلت بيها اسويلها ريوك اي شي تاكله مقبلت.
رجعت نامت.
ماادري ليش من يطلع الصبح نحس بالامان..
هسه اكدر انام.
غفيت شوية وحسيت تليفوني يدك لان حاطته عالاهتزاز.
كعدت باوعت عالتليفون.
شفت المتصل لمياء.
اخذت التليفون ورحت بغرفتي احجي وياها مااريد اكعد امي.
شمه: الوو
لمياء: الوو. هاا شمه وينج تأخرتي مبقى الشي الباصات راح تطلع.
شمه: هلو لمياء. مااكدر اجي.
لمياء: ياا ليش؟ خبله انتي؟ ليش متجين؟
شمه: امي البارحة بالليل اتخربطت ووكعت ولنص الليل احنه بالمستشفى.
بجيت كالت لمياء: لاااا. شبيها؟
شمه: ضغطها ارتفع حيل ووكعت.
لمياء: وهسه شلونها؟
شمه: نايمه متدري بالدنيا.
لمياء: تردين ارجع ابقى وياج؟
شمه: لاحبي مشكوره، يمي الجيران ممقصرين. انتي روحي واتونسي عني وعنج..
---
ايوب.
بعد معرفت انه هبة وره موضوع المسج مالت وائل هالمره كلت لازم اعاقبها عقاب اقوى.
وبدون ماااحجي مازن من يمه اتصرف ودز امر استدعاء الها و لولي امرها. اكيد اهلها ميعرفون بسوالفها التعبانه.
مازن حاجي لاهلها عن سوالفها ومشيها ويه الشلة التعبانه.
حسب ميگول مازن: كون خلصناها من بين ادين ابوها وامها.
جنت اعرف انه هي قريبة من لمياء ولمياء جانت تعرف اكو شي بيناتنه من تلميحاتها.
لذلك مكان كدامي حل غير احجي ويه لمياء واطلب منها تطمئن عليها وتجيبلي اخبارها كل فترة وتعرفلي بشنو تفكر وشنو مشاعرها.
خفت يكون وائل كدر يأثر عليها وتقبل بي.
مؤخرا عرفت من لمياء انه شمه تريد تروح هي وامها لاربيل سياحة ويه شركتهم. استغربت ليش سرمد مگلي بهالشي؟
يجوز نسى.
المهم اتفقت ويه لمياء حتى تروح هي وعائلتها وياهم واني راح ادفع تكاليف سفرهم.
وبنفس الوقت حجزت وياهم إلى ولامي.
ردت امي تشوف شمه وتتعرف عليها هي وامها بدون متعرف هاي نفسها البنية إلى اني رايدها حتى لتاخذ منها موقف مسبقاً.
امي جانت نفسيتها شويه تعبانه لذلك جنت اريد اخليها تغير جو وبهالطريقة اضرب عصفورين بحجر.
او خل نكول تلاثه.
العصفور الثالث هو اني راح احصل فرصة احجي وياها واصالحها.
رحنه اني وامي الصبح عالموعد وامي تتذمر لان متريد تروح وتعوف امير تدري بمنى مو كفو تهتم بي.
اتفقت ويه مؤيد يمر ياخذ منى لبيت عمي لحدما نرجع.
وصلنه وشفت لمياء واهلها بس شمه ماكو.
بقينه ننتظر بس تأخرت حيل.
طلبت من لمياء تتصل عليها وعرفت امها واكعة وداخلة مستشفى ومحد وياها بس الجيران.
بقيت محتار شلون اروح واعوفها وشلون ارجع امي واني اريدها تغير جو.
بس بالنهاية منطاني گلبي اروح واخليها واني اعرف هي تمر بظرف صعب وممكن يصير وياها اي شي لاسمح الله ومحد وياها.
لذلك گلت لامي: يوم تردين نرجع؟
امي: اي والله يمه. مااكدر اتحمل هذا الطريق الطويل اتعب واتأذه خاف، واموري منو اله مااكدر على فراكة تعودت عليه ينام يمي. وامه انت تعرفها بعد.
اتنهدت وكتلها: صار. نرجع. ولد صديقي هم مريض بالمستشفى وبالي مشغول عليه. معناها خل نرجع.
ورجعنه..
---
منى.
رحنه لبيت صاحبة ايوب وحجينه وياها بس فجأه هاي المره العجوز إلى طلعت من البيت وكعت والبنية ظلت تبجي وتصرخ، طلعت هاي العجوز امها..
ماادري شصارلها.
نوارس خافت سحبتني من ايدي وكلتلي: امشي. امشي خل نروح قبل متصير مصيبه وتوكع براسنه.
صعدنه بالسيارة ورجعنه للبيت.
الحمدلله ايوب جان بعده مراجع للبيت.
نوارس اخذت جهالها وراحت لبيتها: عود من توصلين خابريني.
نوارس: هاي اذا مؤيد بعده مراجع للبيت.
منى: لا ان شاءالله بعده.
من وصلت خابرتني: بعده الحمدلله
منى: اي خوش.
نوارس: بس لاهاي المره ماتت.
منى: موتتهم احنه شكو بيها.
نوارس: لا انوب احنه نصير مسؤولين عن موتها. اشو خفت اني.
منى: انتي لسانج بس يمي. مثلما سويتي نفسج عنترابن شداد بالطريق واحنه رايحين هيجي اسوي وهيجي احجي وتالي انخرستي خليتيني بس اني احجي.
نوارس: لج اني انصدمت من شفتها طول الوقت افكر وين شايفتها بعدين اتذكرت وين.
منى: وين؟ احجي.
نوارس: جانت تشتغل عد مؤيد.
منى: اخوي؟
نوارس: اي جانت سكرتيرته بس جانت متلبس حجاب..
منى: يعني مؤيد يعرفها؟
نوارس: اي طبعا كتلج جانت تشتغل سكرتيره عنده. بس اني قريت براس ايوب حتى يقنع مؤيد يبطلها.
منى: طاح حظج بطلتيها من مؤيد وخليتها لزكت لايوب.
نوارس: انجبي لج قابل ترديها تلزك لمؤيد؟ همزين خلصت منها طلع خوفي بمحله.
منى: يالله ان شاءالله خلصنه منها ومن شرها.
نوارس: ان شاءالله
---
---
شمه..
امي بقت يومين متحجي وياي.
حسيتها سنتين مو يومين، اعرف غلطي كللش زين ومعترفة بي حسيت روحي تطلع لان متحجي وياي.
الى ان اجت كعدتني من النوم باليوم الثالث كلتلي: شنو بينج وبينه؟
كعدت عدل واستحيت احجي شكول وشحجي.
امي: احجي وياج جاوبي؟
هم بقيت ساكته كالت: يعني الحجي إلى كالته زوجته صحيح؟
شمه: لاء، والله لا
امي: لعد شنو؟
شمه: والله العظيم حظرته بس عرفت بي متزوج
امي: يعني جان اكو شي بينج وبينه؟
شمه: لا لا ماكو شي مجرد اصدقاء وبس.
امي: اصدقاء؟ بعد طيحان الحظ شلون يصير. عالاقل جان احترمتي زوجج مصارله هواية من مات.
بقيت ساكتة كالت: علموده جنتي يومية واكعة ومخبلتني مااعرف شبيج؟
شمه: لا
امي: لا علموده لتحاولين تنكرين بتي واعرفج من تجذبين. هذا الحصلناه من الشغل. عبالج اني ممنتبه على تصرفاتج انتي حتى صديقاتج اتغيروا، وينها هبة حتى مااشوفها تجيلج وتسأل عنج بس تركتج متريد تصادق وحده مثلج صايرة علج بحلك الموظفين.
بجيت حيل كتلها: لتحجين هيج. اني مو هيج هبة اصلا اني إلى مااحجي وياها وحظرتها.
امي: ليش متحجين وياها؟ مو من طيحان حظج
شمه: لا من طيحان حظها هي.
عافتني وراحت.
رجعت اتغطيت كملت بجي جوه البطانية.
يالله خليها تحجي براحتها وتغلط حتى لو تضربني مراح اعترض اهم شي كامت سالمة.
استاهل كل الحجي فعلا اني الخليت نفسي علج بحلك اليسوه والميسوه.
ثاني يوم الصبح كعدتني من الفجر لان جانت تصلي كلتلي: كعدي. كعدي. احجيلي شصاير بينج وبين هبة.
كعدت نعسانه وعيوني مورمه من البجي.
شمه: شنو؟
امي: شصاير بينج وبين هبة؟
شمه: شصاير؟
امي: مااعرف انتي احجيلي بالله.
شمه: شحجيلج مصاير شي اتعاركنه وخلص
امي: شمه، اني لتشوفيني مره جبيرة تتصوريني ساذجة وماافتهم تحجيلي شنو صاير بينج وبين هبة لو اروحلها لبيتهم واسألها؟
شمه: ماما شبيج شنو تحقيق هو؟ طفله اني لو مااعرف اتصرف؟
امي: اي تحقيق. تحقيق وطفلة اي وكل شي متعرفين تتصرفين.
شمه: خلص هي هاي اتعاركنه وزعلنه وانتهى.
كامت امي وراحت لغرفتها عبالي زعلت، وره ثواني شفتها لابسه عبايتها.
دارت علي كلتلي: اني رايحة لهبة اسألها اريد اعرف شمصخمه من وراي ياشمه.
عبالي تريد تخوفني او تختبرني بس صدك طلعت ومن خوفي عليها ليروح يصير بيها شي طلعت اركض وراها للباب. لان اعرف هبة مستحيل تحجي وتعترف باللي سوته.
ركضت وراها وعثرت. وكعت حيل على وجهي.
دارت علي شافتني وكعت بقت واكفة تباوعلي.
عضيت لساني واحس روحي طلعت حتى طعم الدم بحلكي حسيته. وحسيت بألم بحنجي.
رفعت نفسي وكعدت. خليت ايدي على حنجي شفت دم رجعت امي بأتجاهي.
كمت دخلت للبيت اجت وراي. رحت كبل للحمام اغسل شفت حنجي كله مزلغ. وحلكي لان عضيت لساني حيل كله يصب دم.
بجيت.
بجيت حيل بس مو من الالم بجيت من القهر.
بقت واكفة وراي يم باب الحمام تباوعلي منتظرة مني اجابه كلتلي: شفتي شلون؟ بعدني مغضبانه عليج بس ضجت وشوفي شصار بيج.
راحت كعدت بالصاله واني رحت كعدت عالدرج محتاره شجاوبها كل عقل مضل براسي اريد جذبه اجذبها ماكو كل شي طار من عقلي.
آخر شي كلت خل احجيلها لان آني مغلطانه بشي بالعكس.
رحت وراها للصالة وكعدت واني محتارة شلون ابدي الموضوع وشلون احجيه.
بعدين كتلها: تتذكرين من رحت مره ويه هبة لعيد ميلاد صديقتها ماادري بت صديقتها؟
امي: امم شبيها؟
بديت احجيلها القصة إلى صارت بذاك اليوم.
اتخبلت ووظلت تصيح وتضرب خدودها: صخمتي وجهنه..
فضحتينه حسبي الله عليج.
هاي تاليت شغلج المنعرفه شنو هو. فضحتينه الله اكبر عليج. فضحتينه شمه.
ظلت تصرخ. خفت كلت هسه يرتفع ضغطها وتموت امي.
امي: شوفي لج هالشغل بعد مااريده تفتهمين؟
بقيت ساكته رجعت صرخت علي: تفتهمين؟
شمه: اي. اي. اي.
امي: كون اني الميته مو ابوج حتى اخلص من فضايحج، هو رجال يتحمل. يذبحج يكتلج يكدر، يكدر، بس اني مااكدر..
ظلت تبجي.
واني دموعي تنزل خرز..
مالي ذنب بالي صار ليش انوخذ بذنب غيري.
بقت امي للظهر كاعده تبجي وتحجي.
ذاك اليوم لااكلنه ولاشربنه..
العصر كلتلي: شوفي ولج شغل ماكو بعد، طلعه من هالباب ماكو، وهاي الشريحة العندج تكسريها، واذا عرفت لو حسيت هو متواصل وياج لو انتي متواصله وياه معناها لاانتي بتي ولاني امج.
شمه: وشغلي شعليه، هو بالشغل القديم جان مو هنا.
مجاوبتني طلعت. يمكن راحت لبيت ام علي..
هذا الحصلته منك ايوب.
هاي المشاكل إلى كالت عليها سارة يمكن..
اتمنيت اموت واخلص. عيشتيش هي. مصطفى مات واني لازم اندفن بالحيا وراه.
اتصلت بيه لمياء بس مجاوبتها مالي خلك..
ثاني يوم الصبح امي كعدتني كلتلي: مو عندج دوام؟
كعدت مستغربة شعجب غيرت رايها البارحة كلتلي متداومين بعد..
بس اكيد فكرت منين نعيش.
رحت للدوام شافني سرمد: هاا شمه؟ شلونج؟ الحمدلله على سلامة الوالده كالوا مريضة.
شمه: الله يسلمك
سرمد: شلون صارت هسه؟
شمه: الحمدلله احسن
مالي خلك اخذ وانطي وياه بالحجي واستغربت وين يعرف امي جانت مريضة؟ بس مردت اسأله لان مالي خلك.
امي بهالفتره خبلتني يوميه صياح وحجي ورزاله.
حتى الدوام كرهته رغم هو جان المتنفس الوحيد إلى بس لان مالي خلك.
آخر شي وره اسبوعين رجعت من الدوام كالت: جهزي نفسج وره يومين راح نشيل منا؟
باوعتلها كتلها: نشيل؟ ليش؟
امي: لان بعد ماعندي ثقة بيج، ترحين للدوام الف فكره تجي براسي..
شمه: وين نروح؟
امي: نروح يم خوالي يم اي احد بس منبقى هنا، اني مره جبيره وتعبانه مااكدر اركض وراج لو صارلج شي.
شمه: خوالج؟ ياخوال؟ خوالج بالبصره ماما.
كتلها بعصبية كالت: اي احسن. عالاقل عدهم زلم تلزمج مو بكيفج، بعده الرجال توه ميت وانتي حبيتي شمممه..
تردين تفضحينه. تردين الناس تاكل وجهنه..
شمه: ماما شسويت اني حتى افضحكم؟ والله كل شي ممسويه.
امي: انجبي، كل هالعمايل وتكولين ممسويه شي تردين تموتيني انتي ياالله ترتاحين. تردين تموتيني.
حاولت اقنعها حاولت احجي وياها بس امي مو من النوع اليقتنع بسهولة. دائماً تحط حجي الناس ونظرة الناس قبلنه وقبل حياتنه.
كعدت الصبح اريد اروح الدوام لكيتها قافله الباب كلتلي: ماكو دوام بعد ولا شغل.
وباجر رايحين البصرة عجبج لو معجبج.
بجيت صيحت لطمت وهي ولايمها.
بالليل كلت خل اطاوعها واروح وياها يومين وتهدأ ونرجع قابل لشوكت نبقى يم خوالها.
وفعلا ثاني يوم سافرنه.
قفلنه بيتنه واخذنه ملابسنه ورحنه للبصرة.
امي جان عدها بيت خالتها إلى خطبتني لابنها المريض قبل وخالها.
خالها جان جبير بالعمر وساكن وحده بالبيت.
قبل جانت تسولفنه عنه تكول اتزوج وزوجته خانته فطلكها بس بقى كل عمره بدون زواج وكره النسوان.
رحنه لبيت خالها.
نزلنه عنده سكنه. رحب بينه بس جان اسلوبه غريب او خل نكول ماعنده اسلوب.
قبل لانسافر امي كسرت الشريحتين إلى عندي بقيت بدون خط.
حتى بالدوام مكتلهم لابطلت ولااخذت اجازة.
مجرد اختفيت هيجي فجأة.
مر يوم ويومين وعشره وامي بعدها متقبل نرجع لبيتنه ومااكدر إلى عليها اخاف نتعارك اني وياه وتزعل.
مر شهر واحنه هناك وامي عايشة طبيعي بس اني إلى جنت اريد اموت.
خالها جان مخبلني اذا لبست بجامه كال: ماتستحين شكبرج وشكدج لابسه هاللبس.
واذا ضحكت كل لامي: بتج بلا تربية
واذا حجيت كلي: لتحجين من نحجي. شدخلج بحجي الكبار.
واذا سبحت كال: خلصت الماي
يتخبل لو كعدت يمهم يحتار شيسوي حتى اكوم واطلع.
بالمختصر جان معقد ومريض، حاقد على البنات.
امي جانت تشوف وتسمع بس متحجي.
جنت اخلص نهاري اشتغل بالبيت اذا هو مموجود واذا موجود ادخل للغرفة واسد الباب.
جنت عايشه بعذاب مو بسببه. بسبب اشتياقي لايوب.
اكيد هسه عايش حياته عادي. رجال ماعنده مشكلة مو مثلي اتحاسب حتى على ذنب غيري.
جنت بالليل من ينامون اخلص عيوني بجي.
عبالك اول وحده حبت ويصير بيه هيج. امي اذتني ماادري هو خوف علي لو هو خوف من كلام الناس.
جنت اتمنى اعرف اخباره جنت افكر اتصل بلمياء واسولف وياها جنت اريد بس صديقة اشكيلها.
اتذكر من يكلي انتي بنيتي..
ياترى بعدك تتذكر هالحجي لو بس اني اتذكر.
بيوم امي كلتلي: جيبي تليفوني ودكيلي على ام تيسير. خل اسألها بيتنه شخباره.
رحت جبته واتصلت بس يطلع خارج نطاق التغطيه.
رجعت دكيت نفس الشي.
امي: هاي صديقتج شسمها؟
شمه: منو؟
امي: صديقتج ام لسان الثكيل
شمه: منو ام لسان ثكيل؟ لمياء قصدج؟
امي: اي لمياء
شمه: شبيها؟
امي: اتصلي عليها گوليلها بلكي تمر تشوف بيتنه. الدنيا مو أمان.
فرحت من كلتلي اتصلي على لمياء مشتاقتلها ومشتاقة لسوالفها.
دكيت عليها متجاوب فدزيتلها مسج كتلها اني شمه يالله شالته.
اكلتني بالسلام والحجي بس امي كاعده يمي تراقب عبالك اني طفله.
محجيت وياها هواي بس كتلها: مسافرين احنه للبصرة من نرجع انطيج خبر. بس هسه محتاجه منج خدمه.
لمياء: كولي حبي شنو؟
شمه: امي تكول اذا تكدرين تمرين تشوفين بيتنه لان مقفول صارله شهر وخاف كل شي يصير الدنيا مو امان.
لمياء: اي ان شاءالله باجر امر اشوفه تدللين.
سديت التليفون ودخل خال امي كللها: انتي شلون تسمحيلها تحجي بالتليفون؟
امي: ليش غير اني كاعده يمها واني كتلها تتصل دتحجي ويه صديقتها.
سكت بعدين المغرب جنت اتوضا لاكاني واني راجعة للغرفة وكف باوعلي كلي: بنات دايحات.
وفر ايده وراح.
امي جانت تصلي بس سمعته.
خنكتني العبره بس اتماسكت. بس بالصلاة من سجدت مكدرت اسيطر على دموعي.
طولت بسجودي واني ابجي واتشتكي لربي واگوله هذا حظي.
احسب يوم يوم للرجعة وامي مصره متقبل نرجع.
ثاني يوم اتصلت لمياء كالت: مريت على بيتكم مابي شي مقفول مثلما هو.
امي جانت طالعة هي وآدم رايحة لبيت خالتها.
خالها جان طالع ورجع شافني كاعده بالصالة واحجي ويه لمياء بقى واكف يباوعلي يريد يعرف ويامن احجي..
من شفته اني هيج كلت للمياء: يالله حبي غير يوم نحجي ان شاءالله.
سديت التليفون وبس سديته حسيت خدي انشلع.
ضربني كف!
شمه: ليش خالو؟
خال امي: ياسر، ية ياطايحت الحظ، يادايحة، مامتربية.
استلمتي غلط انواع واشكال وكل شوية يرجع يريد يضربني.
رحت دخلت للغرفة وقفلت الباب انتظر امي تجي تشوفلي حل مااكدر اتحمل بعد هالمخبل هذا..
على مااجت امي اشتعلت وطفيت الف مره.
لاعدها تليفون واتصل بيها لان تلفونها بقى يمي بالبيت ولا اعرف رقم احد من بيت خالتها واتصل عليهم.
ظليت مكابله المراية واباوع لخدي احمر مشتعل نار. طبع اصابعه باقي على خدي.
وعيوني المابقى منهن شي راح يعمن من كد البجي صار اكثر من شهر على هالحال ليش يايمه بهذلتيني..