رواية صراع الجبابرة للكاتبة روز الفياض الفصل العاشر

رواية صراع الجبابرة للكاتبة روز الفياض الفصل العاشر

ظليت الوم بنفسي ليش اني وياها غير. ليش احجي وياها باسلوب مو حلو؟
اتصلت عليها متجاوب.
اباوع بالكاميرا هذا السايق إلى وياها بعده كاعد بالريسبشن وهي دخلت للحسابات.
رحت للمياء كتلها: لمياء هذا منو الكاعد هنا؟
لمياء: السايق مالت التكسي الجاب شمه منتظرها لان كالت اجرت تكسي يجيبني ويرجعني للبيت حتى مااتأخر.
طلعت فلوس من جيبي وكتلها: هاج حاسبيه خليه يروح.
لمياء: وشمه؟

ايوب: راح تتأخر. حاسبيه بسرعة وخليه يروح.
رحت وراها للحسابات دخلت شفتها واكفة وتحجي من شافتني سكتت.
ايوب: شمه تعالي.
مشيت قبلها باتجاه المكتب بس بخطوات بطيئة لحدما تأكدت اجت وراي.
دخلت للمكتب وبقيت واكف انتظرها.
اجت كالت: نعم استاذ؟
ايوب: فوتي وسدي الباب.
سدت الباب وبقت واكفة تباوعلي بس احسها متباوعلي. فد نظره غريبة جانت. او يمكن هو احساسي بالذنب.
ايوب: كعدي شمه.

شمه: مااكدر السايق ينتظرني بره تأخرت عليه حيل.
ايوب: السايق راح
رفعت راسها باوعت لشاشة الكاميرا كالت: وين؟
ايوب: راح حاسبته وراح
شمه: ليش راح اني متفقة وياه ينتظرني حتى يرجعني.
ايوب: اني كتله يروح. واذا عالرجعة اني اوصلج.
شمه: ليش خليته يروح؟
ايوب: اتصلت بيج مجاوبتي زعلتي مني. كلت خل اتخلص من السايق حتى متطلع.
بقت ساكته.

ايوب: والله مااعرف شكول. شمه اذا عندج تفسير لتصرفاتي واسلوب كلامي وياج كولي. لان اني ماعندي تفسير؟
شمه: ماعندي
ايوب: كولي الصدك.
شمه: قبل جان الوضع اسهل. من جنت تتعمد تضوجني اكدر ارد عليك بس هسه مااكدر زحمه.
ايوب: ليش؟
شمه: لان موقفك ويايه البارحة كاسرلي عيني.
ايوب: انسيه إلى صار البارحه انسيه. هذا تصرف طبيعي. بس تصرفاتي وياج مو طبيعيه اريد نحجي بصراحه؟
شمه: ماادري ماعندي حجي. انت صحتني مو اني.

ايوب: مو مال اعتذار مو؟ مصختها هالمره؟
شمه: يمكن لان ارمله دائما تتصور انه ممكن اي واحد احجي وياه معناها عندي وياه شي؟ يجوز تتصور انه اني ممكن امشي ويه اي واحد علمود كم فلس. بس تره اني ارمله مو مكديه ولا وحده ماعدها اخلاق.
بقيت ساكت معرفت شجاوبها بس مو هذا جان تفكيري.
ايوب: حشاج.
شمه: يالله اترخص اني تأخرت.
ايوب: لا اوكفي اني اوصلج.
شمه: لا شكراً
طلعت واني بقيت اباوعلها بالكاميرا لحدما اختفت.

ظليت اليوم كله متنكد.
منا امي منا منى منا شمه.
بالليل دزيتلها مسج كتبتلها ( آسف ).
شافته بس مجاوبت.
---
شمه..
كلما اكول خوش انسان يسوي موقف يخليني اكره نفسي لان اصدك انه الناس المثله خوش ناس.
كلما احترمه يخليني اكرهه اكثر.
غير حظ فكر مصدكت خلصت منه وطلعلي مدير ابن اوادم انوب طلع يعرفه ويوميه هسه طالعي هنا.
رجعت للبيت مكسور واهسي.
امي: هاا عجبه الاكل؟
شمه: اي ماما عجبه وكلي اتشكريلي من الوالده تعبتها.

امي: بالعافية
اتذكرت من كتله بالعافية عالزلاطة الحامضة. ضحكت.
بالليل جنت جاي اكوي ملابس خاف لازم اداوم باجر. وصلني مسج من استاذ ايوب: ( آسف ).
مجاوبته.
اخلص من وائل يطلعي ايوب كل يوم مسج. هسه مادام شايفني مو زينه شعندك مراسلني؟
ثاني يوم رحت للدوام على سنكة عشرة لبست طقم تنورة وقميص القميص زيتوني والتنورة قصيرة بس مو كلش لونها اوف وايت
ورفعت شعري وعجبني اكص كذله.
خليت شووية كحل خفيف بداخل عيني بس.

طلعت بعدما رمشلي السايق واول مشافوني بقية الموظفين كالوا: وااو
شهالكشخه اليوم؟
شهالاناقة؟
اليوم شطالعة.
استحيت رغم ادري بيهم يتشاقون وعينهم مو وصخه.
جنت اريد ابين مو مهتمه لحجي ايوب مال البارحة اريد اغير نفسيتي واصير اقوى كلام هبه صحيح لازم اصير قوية شبيه كل كلمة اسمعها ومتعجبني تكلب كياني وتنرفزني وتخليني متضايقة يوم كامل ويجوز اكثر.
داومنه عادي للساعة تسعة اجه استاذ ايوب سلم وفات للمكتب.

رديت السلام عادي وكملت شغلي.
بقى بالمكتب واجوا زبائن وكعدوا وياه وضحك وسوالف منا للساعة ب ( 12) الظهر.
طلعوا.
طلع كال: تعبت من الكعده.
التفتت عليه كتله: الله يساعدك.
بقى واكف واني غلست.
حسيته واكف يباوعلي كانما لاحظ التغيير بشكلي اليوم.
من راد يدخل كلي: شمه بلازحمه استكان جاي.
فتحت عيوني هذا شبي يخبث.
رحت جبتله استكان جاي امري لله.

خليته على مكتبه: اكو جرس بطرف المكتب هذا يدك بالمطبخ اذا تريد جاي. مي. كهوه.
ايوب: ادري
هزيت راسي اي معناها متعمد يخبث.
شمه: اكو شي بعد؟
ايوب: اي. شمه كعدي شوية اريد اخذ رأيج بموضوع.
شمه: شنو؟
ايوب: موضوع يخص الشغل لتخافين.
كعدت. كال: شقصتج ويه الباب كلما تدخلين تخلين الباب مفتوح؟
شمه: ماكو قصة. انتو شنو قصتكم كلما ادخل تكلولي سدي الباب؟
ايوب: منو كلج غيري؟
استحيت اكوله ابوك.
هزيت راسي ماكو
شمه: محد.

كعد عدل باوعلي كلي: اذا واحد غلطان بحق واحد وغلطته جبيره. واعتذر بس ماكو فايده. شلون يكدر يرضيه؟
بقيت ساكته اعرفه يقصدني.
ايوب: عندج فكره؟
ردت استغبي عليه وابرد كلبي كتله: يعتمد على نوع الغلط. بسبب صفقه لو شراكة لو شنو؟
ايوب: صفقتيش؟
شمه: ماادري مو انت كلت الموضوع يخص الشغل؟
ايوب: اممم. اي. صح. بس مو صفقه
شمه: لعد شنو؟

جان يحجي وهو مبتسم بس غلست وبقيت مصره على موقفي اتصرف كأنما فعلا الموضوع يخص الشغل ومااعرف شيقصد.
بقى ساكت شوية بعدين كلي: ماادري. شي مختلف.
شمه: شراكة؟ يعني شريكك يجوز؟
دنك وكلي بصوت ناصي: اتمنى يصير شريك.
حسيت عركت. وانخرست. هذا شبي؟!
هذا مثل وائل.
لا مثل ابوه، وجاي يمثل علي دور الحنون وصاحب افعال الخير اثاريك مثل ابوك، تتمسكن لحدما تتمكن.

شمه: مااشوفك محتاج شريك الحمدلله شغلك ماشي جان مو صح؟ واذا عالغلط غلس اذا معاتبك. لتدوخ راسك بتفاصيل زغيره.
رفع راسه باوعلي كلي: منو كلج شغلي ماشي ومااحتاج شريك. ومااكدر اغلس حتى لو هو معاتبني اني ضميري يأنبني والبارحة كله منمت بسببه. دزيتله مسج كتله أسف بس بقى زعلان.
شمه: اني اكول اليزعل خلي يزعل مو مهم.
ايوب: مااكدر.
شمه: والله استاذ ماعندي حل لمشكلتك.

كمت وكفت حسيت الوضع صار ماصخ كتله: تحتاج شي مني بعد لو اروح؟
اشرلي براسه اروح.
طلعت واني العن الساعة إلى داومت بيها بشركته وعرفته هو وابوه.
جانت جيرانه مرات تمر تشوف امي وتسأل عليها.
جان عدها بنية جبيره بالعمر ممتزوجه من زمان مريضة بس محد يعرف مرضها شنو. ناس تكول مخبله وناس تكول مسحوره وناس تكول متلبس بيها جن.
جانوا دائما ياخذوها لاي شخص يسمعون بي يكدر يساعد إلى مثل حالتها بس ماكو نتيجة.

بيومها اجتنه بالليل ووياها بتها.
البنية تبين طبيعيه بس متحجي.
اجوا جنه توه متعشين واني اغسل المواعين وامي تنوم آدم.
استغربنه من شفناها جايبه بتها وياها.
كعدت تسولف هي وامي واني كمت سويتلهم عصير ورجعت كعدت.
امي: شعجب اليوم مريتوا عليه صار فتره ماكو؟
ام علي: والله تلاهي هالدنيا بس اليوم كلت لازم اجيكم واجيب ساره وياي.
امي: هلا بسارونه. مصار عدها شويه تحسن؟
ام علي: ماكو شي والله.
امي: نحمد الله.

كاعده واباوع لساره كاعده مقابيلي. فجأة كامت وكعدت يمي.
اتدنت يمي كلتلي: عندج تليفون؟
شمه: اي عندي.
كلتلي بصوت ناصي: هسه توصلج رساله.
باوعتلها كتلها واني مبتسمه على اساس جنت آخذها على كد عقلها: منين؟
ساره: من عنده.
شمه: منو هو؟
سكتت مجاوبتني بعدين كالت: منو هذا ايوب؟
جفلت. خفت. بقيت بس صافنه بوجها كالت: لتخافين منه. راح يتعبج ويسويلج مشاكل بس لتخافين منه. الله يساعدج عالمشاكل.
شمه: مشاكليش؟!

هم مجاوبتني بس وره شويه كلتلي: هو هسه ديفكر بيج.
شمه: هاا؟! منو؟
ساره: سمعي كلامه. يريد مصلحتج
شمه: هو؟ يريد مصلحتي؟
ظليت ارجف.
هاي منين تجيب هذا الحجي؟ وين تعرف ايوب؟
باوعت لامي هي وام علي ملتهيات بالسوالف الحمدلله.
بقيت مخلوسه وساره صافنه بوجهي بعدين امها كالت: صارلها يومين ذابحتني شمه. شمه.
اليوم كلت اخذها تشوف شمه هههه.
ابتسمت جذب. هاي منين اجت منين طلعتلي.
مباشرة بس طلعوا دك تليفوني مسج.

رحت شفته. مسج من استاذ ايوب!
ايوب.
بقيت افكر هاي الجفصة الماادري شكد رقمها.
شبيك ايوب اتخبلت؟
اتمنى يصير شريك!
من كل عقلك؟
بالله هذا رد؟ قبل كم يوم توصي مؤيد عليها اشوفك انت هسه مترصدلها.
شنو فلمك؟
متوقع تتجاوب وياك يعني؟
واذا اتجاوبت؟ وبعدين؟ شراح يصير؟
عوفها..
بالليل جنت طالع ويه صاحبي وماادري ليش. ماادري شنو إلى مر بعقلي نسيت كل الحجي الحجيته ويه روحي وراسلتها: آسف.
سرمد: ادري احجي ويامن اني؟

ايوب: هاا هاا شبيك ثبرتني؟
سرمد: احجي وياك وانت عينك بالنقال خوماكو شي؟ المن طلعتنه اذا مكابل التليفون وعاقج وجهك.
ايوب: ضايج.
سرمد: شبيك. متعارك ويه المدام ههه؟
ايوب: لا ياصخام.
سرمد: هسه مادام صخام شجابرك عليها؟
ايوب: انت تعرف كل شي فلا تسأل.
سرمد: والله اني منك اتزوج وطز بيها هي مو آدميه شسويلها يعني. هي متريد تجي للطريق خلص عوفها شوف راحتك شوف حياتك. لشوكت يعني تبقى هيج؟
ايوب: بهالبساطة؟

سرمد: اي بهالبساطة واذا تريد اني اجيبلك العروس والله العظيم بس كول.
سكتت بعدين كتله: وتطلع العروس مثلها هههههه
سرمد: زين انت شوف مادام تخاف تطلع مثلها.
ايوب: مااعرف بنات
سرمد: جيرانكم كرايبكم اصدقائكم موظفه عدكم ماعدكم موظفة حلوة وبت اوادم. تره ماطلعت.
تأفففت وخليته يحجي واني ساكت ومنتظرها تشوف المسج..
بس ماكو.
غلقت التليفون واترخصت من سرمد ورجعت للبيت.
وصلت للبيت بس الحجي موجود ونايم.

اتصلت على خواتي سألت على امي وحجيت وياها.
بقيت كاعد اباوع عالاخبار وكل شويه اشوف النقال يمكن وصل رد.
بس ماكو.
ضجت اكثر.
شمه.
خبلني حجيها هاي سارة.
هاي اكيد براسها جن ممسوسه مو طبيعيه منين تعرف ايوب؟
منين عرفت راح يدزلي مسج!
يمه اسم الله، تف تف تف.
اللهم اسكنهم في مساكنهم.
بقيت كاعدة طول الليل. امي نامت واني طار النوم من عيني.
شتقصد من كالت يسببلي مشاكل؟

هو اصلا من شفته ماسببلي غير المشاكل شتوقع مثلا يجي خير من وراه.
حسبي الله على ابليسك هم وراي بعد مشاكل ودوخة بسببك انوب تكولي لتخافين منه.
زين منين عرفت يفكر بيه؟
معقولة يفكر بيه؟
شيريد بعد مني؟
اكيد يفكر بطريقة جديدة يدوس ابطني بيها..
بقيت اتكلب الليل كله بعدين اتذكرت وصلني مسج منه بس مشفت شنو مكتوب بي.
طفرت من مكاني للتليفون.
فتحت المسج كاتبلي: آسف.
وبعدين وياه هذا. زحف من نوع جديد هذا.

لا اعتقد يريد يختبرني اجاوبه لو لا يريدني آخذ وانطي وياه حتى يلزك ويكول مو زينه بطلوها.
حامض على بوزك تبطلني عبالك بكيفك هنا هم لاعيني اني هنا جايه بواسطة وتوصيه ناس عرف.
اتذكرت حجيه اليوم، نفس حركات ابوه
قبل لاانام اتذكرت من رزله الدكتور عباله ابو آدم ههههههههههههه شبعت ضحك والمصيبه يكله جنت بالشغل ماادري بيها ماخذته للمستشفى ههههههههه.
والله هذا الرجال نكته.
الصبح كعدت نعساانه لان منايمه البارحه.

اتمنيت لو عندي مخده بالمكتب حتى انام.
جان عدنه بيومها مشاركة بمعرض مال مواد بناء ولازم والمفروض واحد من الموظفين يروح.
جهزت النماذج ورتبت الصور والاوراق وانتظرت الافندي يشرف حتى انطيهيا ويروح هو ومحمد.
كلت خل اشرب نسكافيه حتى اصحصح. عندي غلاية زغيرة بمكتبي خليت بيها مي وشغلتها وكعدت انتظر المي يغلي.
صفنت.
اتذكرت ساره وحجي ساره. متعجبه من وضعها وماكو تفسير للكالته. اكيد بيها جني.
راح اتخبل. اريد تفسير؟

جنت اصب المي بالكوب وكمزت من سمعت صوته وراي كلي بهدوء: صباح الخير
وكع المي الحار على ملابسي وعلى حذائي الحمدلله مااحتركت رجلي. بس نقاط شويه طفرت علي.
اتحنطت من الخوف حتى مطلعت صوت عبالك اذا حجيت لو صرخت راح احترك ا.
ايوب: دير بالججج. الله الله الله. ع
شال الغلاية وكلي: احتركتي؟
هزيت راسي لا. بس تنورتي وكع عليها المي واكيد اذا تحركت راح تلامس جلدي واحس بحرارة المي.

بقيت محتاره لااكدر اكعد ولااكدر ابقى واكفه.
بعدين كتله: بس اذا سمحت تفتح المروحة حتى ملابسي تنشف او المي يبرد لان مااكدر اكعد هيج.
فتح المروحه ودار كلي: وكع عليج مي حار؟
شمه: لا عادي بس ملابسي.
ايوب: هسه تكولين هذا كلما اشوفه لازم اتأذه لو يحجي حجايه تغثني لو اوكع بالشارع لو المي الحار يحركني.
شمه: لا غلطتي اني جنت ممنتبهه.
ايوب: ليش؟
شمه: ماكو شي بس اتذكرت شغله.
ايوب: اممم، يصير اعرفها؟

بهالاثناء دخل محمد كال: السلام عليكم. ها استاذ نروح؟
ايوب: وين؟
محمد: غير اليوم المعرض.
ايوب: اهوو والله راح من بالي. غير تذكرني..
لا خلص منروح يولي.
راح محمد لمكتبه درت عليه كتله: هذا المعرض فرصة حرامات. لو استاذ مؤيد موجود ميفوته.
التفتت علي قبل ميدخل للمكتب كلي: معناها جهزي نفسج حتى نروح.
شمه: هاا؟
ايوب: سمعتنيني.
طلع كلي: يالله.

شمه: مااكدر اروح مااعرف شي هناك واستحي محمد احسن او اي واحد من البقية لان عدهم خبرة
ايوب: هاي فرصة تتعلمين وتصير عندج خبرة.
شمه: مااكدر
ايوب: هذا شغل مو لعب شمه.
شمه: خلي احد ثالث يجي ويانه.
بقى واكف يباوعلي بعدين كال: جيبي لمياء وتعاي.
طلع للسيارة واني بقيت واكفة حايرة. اخذت جنطتي ورحت حجيت ويه لمياء.
طلعنه وراه للسيارة جان يحجي بالتليفون.
اشرت للمياء تكعد كدام واني اكعد وره.

كعدت وره ولمياء كدام يمه واحسها متحمسه وفرحانه على شنو ماادري.
واخذت الطريق تحجي هي وايوب وتضحك واني حاطة السماعات بأذني جذب لان حتى اغاني مابي تليفوني.
ايوب: لمياء اريد اخذ رأيج بموضوع.
لمياء: كول اوستاذ
ايوب: اذا اكو شخص غلطتي بحقه واعتذرتي وهو رفض الاعتذار بهيج حاله شتسوين؟
لمياء: اي يطبه مرض اني سويت العلي واعتذرت بعد اذا رفض شسويله.
اتمنيتها كاعده يمي جان خنكتها الخبلة.

ايوب: لا حشاه. زين اذا انتي مو اول مره تغلطين بحقه يعني حقه يزعل ويرفض اعتذارج هنا شتسوين؟
لمياء: مادام اني غلطانه واكثر من مره معناها استاهل يرفض اعتذاري بس ابقى اعتذر لحدما يقبل ويسامحني.
ايوب: انتي شايفه هيج؟
لمياء: اي هذا الصح
ايوب: هذا الصح
رفع راسه باوعلي بالمراية كأنما يكلي الكلام عنج.
بقيت مغلسه. هذا اليشوفه يحوفه ومسوي نفسه شخصيه تالي طلع زاحف مثل ابوه..

معقوله صدك يريد مصلحتي؟ مااكدر اصدك. حاولت بس كل شي يكول لا مثل ابوه ويجوز اكثر.
ابن البط عوام.
بالطريق وكف ونزل جابلنه ريوك.
ايوب: هذا تعويض عن النسكافيه مالت شمه.
وصلنه لمكان المعرض ونزلنه وبدينه نرتب مكانه بدت الناس والشركات تجي ولمياء ترحب بيهم وتشرحلهم واني اباوعلها شلون تحجي وشلون تشرح كلها ثقه.
ايوب اختفى.
وره شويه وصلني مسج فتحته لكيته هو هم كاتبلي: آسف.
مجاوبته بس ضحكت الظاهر سمع نصيحة لمياء.

شويه ورجع كعد عالكرسي يمي يباوع بعدين كلي: محجيتيلي وين جنتي صافنه الصبح؟
اترددت احجيله الحجي إلى كالته ساره بس بعدين كلت هو شي ماممكن احد يصدكه فخل احجيله.
شمه: البارحة. اجت جيرانه هي وبتها..
التفت علي كلي: تريد تخطبج؟
شمه: لا
ايوب: زين انت ليش لهسه متزوجتي؟
شمه: مصارله هواي من اتوفى ابو آدم.
ايوب: حلو اسم ابنج
شمه: شكرا
سكتنه شويه. بقيت كاعدة بس ممرتاحة واحس جيتي هاي غلط لان مراح يجوز مني.

لمياء راحت تريد تروح تشوف باقي المعرض.
فجأة كلي بصوت ناصي بدون ميباوعلي: هواي افكر بيج هاليومين.
سمعته كلش زين. بس مصدكت إلى سمعته.
غلست.
كأني مسمعت اي شي.
ايوب: شمه؟
لااكدر اجاوبه ولااكدر اغلس نفس الموقف ويه وائل من لزك.
آخر شي كلت لنفسي مااريد إلى صار ويه وائل يتكرر.
شمه: نفس الموقف ويه وائل صار. ومن كتله لا اجاني للشركة ذاك اليوم من شفتني واكفة وياه.
بقى ساكت بعدين صار كبالي كلي: آسف
شمه: على شنو؟

ايوب: على كلامي وياج قبل يومين. مو قصدي إلى فهمتيه بس اني من حجيت جنت رايد مصلحتج. خفت يشوفج ارملة ووحيده ومالج احد ويحاول..
شمه: ويحاول يضحك علي.
ايوب: احس اني مسؤول عن كل شي يصير وياج. لذلك احس انتي مسؤوله مني.
اتذكرت سالفة ساره كتله: جيرانه البارحة سألتني عنك.
ايوب: عني اني؟ وين تعرفني؟
شمه: ماادري اجتنه هي وامها بس هي مريضة بعقلها اسم الله من زمااان. بس كعدت يمي كلتلي منو ايوب.

ايوب: تردين تغيرين الموضوع؟
شمه: لا والله جديات. كلتلي راح توصلج رساله من ايوب هسه وفعلا انت وراها دزيتلي رساله وكلتلي ديفكر بيج هسه.
ظل يباوعلي عباله اتشاقه بعدين كلي: شمه اني مااحب العب على بنات الناس. من كتلج افكر بيج. مو جذب ممجبور اجذب. ولا طالب منج شي بس اني اريد اعرف ليش افكر بيج ليش اضوج من متجاوبين عالمسج؟ ليش احس نفسي اراقبج لاشعوريا ويامن تحجين وويامن توكفين وويامن تضحكين.
مو جذب هذا.

انتي جربتيني وعرفتي اني اللي افكر بي اكوله. زين او مو زين اكول مباشرة.
شمه: واني هم مجذبت البنيه صدك والله العظيم هيج كالت.
حسيته ضاج. سكتت شسويله.
ظل رايح جاي يتمشى يمي.
اجت لمياء وكعدت تسولف شنو شافت بالمعرض واني ساكته بعدين كلتلي: شبي گيمر السده ضايج؟
شمه: اني؟
لمياء: لا اقصد اوستاذ ايوب.
شمه: عابتلج. منيله كيمر السدة؟
لمياء: شبي مو جان كاعد عاقل وهادئ
شمه: يدورله طريقه يرزلني بيها.
لمياء: ليش شسويتي؟

شمه: كل شي مسويت بس هو هيج كلما يشوفني لازم يسمعني حجي يغث من الاول.
لمياء: يا اول؟ اول ابتدائي لو اول متوسط؟
شمه: هههه عابتلج. اقصد من جنت اشتغل عدهم بشركتهم.
لمياء: اشو مكايلتلي هالحجي؟ واني اكول من اتغده ويانه يكول متعود على حجيها. ايا ملعونه.
شمه: اشش ليروح يسمعنه
لمياء: هسه معرفنه منو بيكم إلى يسمع الثاني حجي ومغثه هو يكول متعود على حجيها وانتي تكولين متعوده يسمعني حجي ويرزلني؟!.
ايوب: شمه؟

التفتنه عليه كال: كومي خل اوديج يم صديقتج.
ماذا تريد الحياة مني؟
اما كفاها مافعلت بي؟
جعلتني لقمةً سهلة لكل من لايشبع.
ترجيتها مرارا ان تتركني بحالي.
اريد فقط ان اربي صغيري. ولكنها تأبى التنازل عن حقها في تعذيبي.
فماذا افعل.
ماذا افعل وقد انهكتني بضرباتها.
ضربة تلو الضربة. وألم يلي ألم.
ولم تكتفي بعد.