قصص و روايات - قصص رومانسية :

رواية صراع الجبابرة للكاتبة روز الفياض الفصل الحادي عشر

رواية صراع الجبابرة للكاتبة روز الفياض الفصل الحادي عشر

رواية صراع الجبابرة للكاتبة روز الفياض الفصل الحادي عشر

شمه: اي صديقة؟
ايوب: هبه.
شمه: جايه هنا؟
مجاوبني مشى كدامي واني رحت امشي وراه وبقت لمياء وحدها. ب
المكان جان ازدحام هوايه ناس.
جان يمشي كدامي فجأة اختفى.
بقيت واكفه بمكاني بنص المعرض بوسطة الناس لااندل ارجع وااندل اروح.
ماادري وين اختفى.
شوية وطلع من بين الناس كلي: تهتي؟ خفتي؟
شمه: لا بس انت اختفيت فجأة.
ايوب: يالله لاتضيعين
شمه: بس على كيفك امشي حتى الحك عليك.
دار علي كلي: شرايج نوكف هنا؟
شمه: ليش؟

ايوب: ماملاحظة طريقة كلامنه اني وياج مو مثل اي مدير وموظفة.
شمه: ليش؟ بالنسبة إلى انت مديري. وماكو شي ثاني.
ايوب: بس اني اسلوبي وياج مختلف. اني حباب تره بس ماادري ليش احب اضوجج
ضحكت كتله: حباب! هههه
ايوب: والله العظيم. بس احب اضوجج
شمه: هذا هم حظي
ايوب: بس انتي هم مو هينه.
شمه: شلون؟
ايوب: يعني هم تردين متسكتين اذا حاجيتج. تهجمين علي.
شمه: والله تريد الصدك. بس وياك لساني هيجي واحجي وارادد هههه.

ايوب: ها هههه يعني هم طلعتي مثلي حبابه
شمه: اني حبابة دائما بس قوية وارد وقت اللزوم.
ايوب: امشي خل نتمشى.
شمه: وين؟ ولمياء؟
ايوب: شبيها لمياء كاعده هسه وخابصه الامة تلكيها اوستاذ اوستاذ.
طكيتها ضحكة بصوت عالي لان طلع منتبهلها..
اشرلي اسكت.
شمه: سكتت.
مشينه شويه كال: شمه خلي الرسميات على جهه. خل نحجي بصيغة اصدقاء. ممكن؟
شمه: بس ماكو صداقة بين الرجل والمرأة.

ايوب: منو يكول. اكو طبعا. مادام النوايا طيبه معناها اكو.
شمه: مااؤمن بهيج شي.
ايوب: ليش؟
شمه: لان تبدي صداقة بعدين تتحول لشي ثاني.
ايوب: لا اذا الطرفين كبار وواعين ومثقفين راح تكون عدهم حدود وتكون عدهم سيطرة على مشاعرهم.
شمه: يجوز
ايوب: يعني هسه احنه اصدقاء على الاقل من جانبي.
بقيت ساكته لان هذا راح يخبلني ساعة افكر بيج وساعة اريد شريك مدري شنو وساعة خلينه نكون اصدقاء وين يريد يوصل.

ايوب: عندج صديقات مقربات؟
شمه: اي عندي
ايوب: تحجيلها خصوصياتج؟
شمه: ممكن بس بحدود مااحب احجي لاحد عن حياتي الخاصة.
ايوب: اني هم عندي صديق مقرب بس تقريبا يعرف كل شي عني بس اكو حدود احس اكو شغلات مااكدر احجيها اله.
شمه: زين دقيقة، وين صارت هبه مو على اساس رايحين لهبه؟
ايوب: جذب ماكو هبه.
رفعت حاجبي كتله: وليش هالحركات؟
ايوب: هيج. ماكو.
بقينه ساكتين ونمشي هو يباوع ويسلم على هذا وذاك واني اطرش بالزفة.

حسيته ضاج. بقى ساكت.
بنهاية الدوام كال: تحبون اوصلكم للبيت لو ارجعكم للشركة وترحون ويه البقية؟
شمه: للشركة
لمياء: للبيت طبعا
باوعتلها اشرتلها بعيوني بس غلست.
لمياء: للبيت للبيت.
وصلوني للبيت وراحوا.
صار فتره هبه مختفيه واني هم ماعندي مجال اراسلها واسأل عنها.
ووائل اختفى لامسج لااتصال الحمدلله.
بعدما رجع استاذ مؤيد من السفر ارتاحيت.
حسيت بعد ماكو ضغط ولا احس نفسي اكو احد يراقبني وممكن يرزلني على اقل زله.

ولا اكو زحف.
ورجعنه مثلما جنه دوام عادي.
مر شهر تقريبا وكل شي طبيعي وهادئ.
---
ايوب.
طلعت امي للبيت الحمدلله وخواتي كل يوم وحده تجي تداريها.
وره طلعت امي بأسبوعين تقريبا منى جابت ولد.
صار عندي أمير. مااحجيلكم عن شعوري من شلته اول مره كل جسمي يرجف وينتفض.
اول مره بحياتي اجرب هيج شعور. مخلوق زغير. انسان زغيره.
غمضت عيوني حسيت نفسي بحلم.
لزمت اصابيعه الزغيرونه الدافية، من كدما هي دافية قشعر جلدي.

نظراته. حركاته اللارادية. عيونه. جفوف رجليه. كلها شي عجيب ماله تفسير ولا اله تشبيه. سبحان الخالق المصور.
منى بقت عد اهلها حتى يهتمون بيها واني جنت يومياا باليل امر اشوفها واشوف امير واشوف شمحتاجين.
امي جانت فرحتها جبيره لان اول طفل إلى. جانت تتمنى هاليوم يجي من زماان.

امي: اووف اتمنيت اني صاحيه مو مكسوره هسه. يمه ياايوب جنت اتمنى اني اسبحه اول سبحه اله. واني بالليل اكعدله وسهرله واشربه الحليب وانام يم راسه.
ايوب: لاتستعجلين عالتعب حجيه بس تصيرين زينه ان شاءالله شبعيه سباحة ونومي يمج هههه.
جنت ماخذله صورة بالنقال وشوفتها لامي: صلاوات على محمد. صلاوات على النبي. يمه ايوب الزغيرون هذا.
نور: ههههه شوف امي متنطي بأبنها الا يشبهه ههههه.

امي: يااا دشوفيه العيون الحلك الخشم. ايوب وكاعد.
ايوب: هههه قفلت بعد
ترجع تبوس الصورة وتكولي: آخ ياايوب يايمه. هسه صدك فرحت. من صرت ابو أمير.
مابين البيت والشغل وامي ومنى والخطار إلى يباركولنه بولادة امير والي يتحمدون السلامة لامي جان اكو شي مفتقده بيومي.
يوميا افتح النقال اكول يمكن. يمكن. تحاول تسأل عني.
رغم اعرف مستحيل تسويها.
جنت اقاوم نفسي اشد المقاومه حتى لااضعف واراسلها او اتصل بيها.

اثكل شويه ايوب. شجاك؟ شبيك هيجي انكلب كيانك بيوم وليلة.
شنو اول مره تشوف بنيه؟
لو اول مره تحجي ويه بنيه؟
هاي التصرفات مو الك. انت مو مراهق، انتبه.
ارجع لعقلك حتى لاتخلي نفسك بموقف مو حلو.
جربت وضحتلها مشاعرك وشفت ردها. اتجاهلت الموضوع تماماً
اذن، خلي نقطة وانهي السطر.
اعرف مشاعري اتجاها اتغيرت.
اتغيرت بشكل جبير. وجنت احاول اغالط نفسي واكول يمكن هذا تعاطف.
لكن الحقيقة انه اني..

صعبة اكول هالكلمة واعترف بيها.
اعرف وضعها واعرف وضعي..
لذلك لازم انتبه لتصرفاتي وكلامي وياها.
لازم ارجع استاذ ايوب.
سرمد: انت ابد معاجبني.
ايوب: ليش؟ شنو شفتني شاك هدومي؟
سرمد: ياريت.
ايوب: والله انت الوضعك ميعجبني.
سرمد: احجي الصدك. انت تحبها؟
ايوب: منو هي؟
سرمد: المخربطه احوالك ومخليتك كالب خلقتك.
سكتت مجاوبته.

سرمد: ادري هسه شجابرك عالبهذله، مو الله محللك اربعة وانت عدك بعد تلث اختيارات وتكدر تستعين بصديق. من باجر اروح اخطبلكياها بس كولي فلانه.
ايوب: فلانه.
صفن سرمد بوجهي بعدين كلي: يااخي شكد بارد. يطبك طوب اذا انت قابل بوضعك وساكت اني شبيه كاتل نفسي علمودك ومحترك دمي.
ابقى هيجي احسن. ابقى.
سكتنه شويه بعدين كتله: لو ادري بيها تقبل بيه جان حجيتلك.

باوعلي كلي: وليش متقبل بيك؟ شناقصك؟ يابه بشرفي بس أشر وهن يجن يكللك شبيك لبيك..
ضحكت كلي: لتضحك. ايوب شبيك هاي عود انت النجر. شنو لو ادري بيها تقبل بيه. غصباً ماعليها تقبل. انت خليها تقبل.
تريد اخطفلكياها؟
ايوب: ههههههههههههههههههههههههههه قوية.
سرمد: شسويلك. غير انت مظلمها.
ايوب: هي ظلمه اصلا
سرمد: اتزوجها بالسر.
باوعتله كتله: يا سر ياعلن. هي متريد تتزوج. البنية رافضة فكرة الزواج.
سرمد: منو هي؟

ايوب: مو شغلك.
سرمد: والله غير لو اني احب وحده على نرجس الا اتزوجها حتى لو بالسر خوما اخليها تروح من ايدي.
ايوب: افتهمنه نعرفك ميحتاج تستعرض عضلاتك بس افتهم البنية متريد تتزوج.
سرمد: اي ليش؟
ايوب: هيجي بدون سبب
سرمد: مو بكيفها. اخليها تحبني غصباً عليها وعلى عشيرتها.
ايوب: اهووو غير يكعد راحة جون سينا.
سرمد: زين انت تحبها؟ لو اعجاب؟
ايوب: ماادري
سرمد: لعد منو يدري امي.
ايوب: مو مهم.

سرمد: لامهم، انطيني رقمها عنوانها واني اخليها تحبني خلال شهر.
ايوب: تحبك انت شكو؟
سرمد: غير انت تخاف تحاجيها والله متريد تتزوج. جيبها اني اطبكها واتزوجها اذا حلوه.
مجاوبته اخذت السويج من الطاولة والنقال وطلعت..
رجعت للبيت لفيت راسي ونمت.
---
منى.
جبت الحمدلله بس عملية مو ولادة طبيعية.
صار عدنه امير فدوه لاسمه.
جنت تعبانه حيل فبقيت عند اهلي اصلا لازم ابقى لحدما اطلع الاربعين لان هناك منو يداريني ويخدمني.

عمتي اصلا مريضة وبعده كسرها ماالتئم وخطار وناس رايحة جايه عدهم واني احتاج واحد يكابلني لان مااعرف للاطفال.
وره كم يوم من ولادتي امير طلع بي ابو صفار ولازم كل فتره ناخذه يفحصه الدكتورويشوف شكد النسبة.
كل فتره جانت نوارس تاخذه هي ومؤيد لان اني مااكدر اطلع واتحرك بسبب العملية.
ايوب جان يوميه يجي يشوفه وعمي اجه مرتين شافه.
عماته عشتوا اجوا مره وحدة بحجة ملتهيات ويه عمتي لان مريضة.

جنت منتظره اطلع الاربعين حتى افتح موضوع البيت ويه ايوب لان هسه ماله خلك علمود امه.
مااريد استبق الاحداث.
هو هالايام يجي ويروح بس ميحجي شي ساكت ماادري شنو قصته بس اني مغلسه بمزاجي.
يعرفني هو من اتخبل.
---
شمه.
وره مده وبيوم من الايام جنت اشتغل بالمكتب ويمي لمياء تساعدني بشغلة مااعرفها.
دخل استاذ مؤيد مستعجل الصبح سلم وفات للمكتب وره شوية صاح علي: شمه؟
رحتله كتله: نعم استاذ؟

مؤيد: اكولج جان اكو كارت هنا لونه اصفر مال دكتور مشايفته؟
شمه: لا
مؤيد: زين اي كارت مال دكتور مشايفة هنا؟ مو الا اصفر؟
شمه: لا. اني اصلا ماافوت لمكتبك اذا انت مموجود ولا الزم اي شي من اوراقك.
بقى شويه يبحوش ويدور وماحصل شي كلي: تعال هسه الزم سره وانتظر رقمك بالحجز لحدما تفوت للدكتور ولو عالدكتور نتحمل بس تعال اتحمل دوخة المره ودردمتها طول هالفتره هههههه.

ضحكت على كيف كتله: هههه الله يعينك. بس تره الشخص العصبي ويدردم كلبه طيب.
مؤيد: ندري بيجن طيبات ياعمي ندري بس بطلن حجي ههههه.
قبل مااجاوبه سمعت صوت وراي: هاا تأخرت؟
التفتت شفت بنية سمره شابة طويله محجبة وبيدها طفل كللش زغير يمكن توه صاير.
باوعتلي كالت: مرحبا
شمه: اهلا وسهلا.
مؤيد: محصلت الرقم يجوز نلكاه جاي قبلنه نروح ونشوف.
ردت هي عليه: يالله.

مؤيد: شمه اني طالع وان شاء ماأتأخر ساعة ساعة ونص ان شاءالله وراجع اي احد يجي اتصلي بيه. اوك؟
شمه: ان شاءالله
طلع وهي طلعت وراه بس حسيتها كصتني كص من جنت واكفة.
ظليت طول اليوم صافنه ماادري وين شايفتها؟
او يجوز مشبهه عليها؟
من رجع استاذ مؤيد جان عصبي شوية ماادري شبي.
مؤيد: شمه؟
شمه: نعم استاذ؟
مؤيد: اريد جرد للمبيعات كلها بسرعة.
شمه: مال اليوم؟

باوعلي بعصبيه كلي: شمه شغلي مخج شويه وبطلي فهاوه شنو مال اليوم؟ مال اليوم شسوي بي؟ اريد مال شهر كامل افتهمتي؟
شمه: ان شاءالله.
رجعت لمكاني واني مقهوره شبي يصيح علي؟ وشنو يكولي بطلي فهاوه مااقبل يحجي وياي هيج منو انطاه الحق..
كعدت اسويله الجرد رغم اعرف مراح الحك اكمله منا لنهاية الدوام.
كعدت اشتغل حتى غدا مااتغديت ضجت وهو هم خلص اليوم يصيح
عالموظفين وحتى مطلع بريست الغدا.

خلص الدوام واني بعدني مكدرت اكمل الجرد وحدي.
هو يمكن حس على نفسه صاحلي بمكتبه حتى نشتغل سوا.
كعدت عادي بس محجيت اي شي بقيت ساكته وهو هم ساكت بعدين دخلت لمياء كالت: اوستاذ؟ طالبين غدا من المطعم؟
مؤيد: اي اني طلبت.
جابت لمياء الاكل واني كمت وشلت الاوراق والفايلات اريد ارجع اكمل الشغل على مكتبي وزحمة هو ياكل واني كاعده يمه.
مؤيد: وين؟
شمه: اكمل بمكتبي لحدما تخلص.
مؤيد: لا لا عوفيه يولي. تعالي اتغدي.

شمه: مشكور. اتغديت
مؤيد: شوكت اتغديتي؟
شمه: مساع قبل شوية.
مؤيد: مااتغديتي. اصلا اني طلبت للكل لان اليوم ضغطت عليكم وتعبتكم.
شمه: اتغديت. ويه لمياء مشكور استاذ
مؤيد: لمياء. لمياء.
صاح على لمياء.
اجت لمياء كلتله: نعم اوستاذ؟
مؤيد: شنو اتغديتوا انتي وشمه؟
لمياء باوعتلي كلتله: ماادري اني جايبه ويايه لفات بس شمه ماادري.
مؤيد: روحي صيحي للكل وتعالوا خلونه نتغدا سوا بس مو بمكتبي خاف احد يجي بالوقت الضايع.

لمياء: لا الاحسن اوستاذ انت وشمه ترحون يم الجماعة بغرفتهم مو احسن؟
مؤيد: اي احسن. عشتي لمياء لو ماانتي جان ماادري شصار بينه بدونج.
كللها وهو يضحك
لمياء: جان عزلتوا الشركة لو مااني موجوده ههههه.
مؤيد: اخرتكم اليوم.
لمياء: ميخالف اوستاذ مادام راح تعوضنه وتغدينه موافقين.
رحنه اتغدينه ويه بقية الموظفين وضحك وسوالف.

بقيت ساكته وجنت متقصده ابين انه اني بعدني مستاءه. حتى ميعيدها مره ثانية ويتعود يتجاوز علي بالكلام.
محمد: شمه اليوم ذابتها عالصامت.
ابتسمت.
مؤيد: شمه زعلانه اليوم
محمد: منين؟
مؤيد: مني صيحت عليها.
استحيت من كال هيج فكتله: لا على شنو ازعل.
بعدنه نسولف دخل ايوب.
ايوب: السلام عليكم
كل احنه ردينه السلام.
ايوب: هاا شنو اليوم مطالعين للبيت؟
مؤيد: لاوالله جان عدنه شغل ولهسه مخلصناه راح يبقى لباجر.
ايوب: هاا.

مؤيد: اكعد اكعد اتغده ويانه.
ايوب: شطالبين؟
مؤيد: شنو تريد موجود. بس جيبلك كرسي وتعال.
راح جاب كرسي وكعد.
جان كاعد مقابيلي فأتجنبت اباوعله.
وره شويه كال: شمه شلونج؟
شمه: الحمد لله بخير استاذ
ايوب: آدم شلونه؟
شمه: زين الحمدلله
حسيت بنظرات الموظفين وياي.
خلصنه وطلعنه.
جاي اصعد بالسيارة وصاح علي ايوب.
ايوب: شمه؟
التفتت شفته واكف كتله: نعم استاذ؟
ايوب: من رختصج دقيقتين.
شمه: اي.
رجعت كتله: نعم استاذ؟

باوعلي كلي: اريد احجي وياج بشغلة ضرورية.
شمه: شنو؟
ايوب: لا مو هسه. هسه انتو متأخرين. على باجر ميخالف؟
هزيت راسي كتله: ان شاءالله
هز راسه كلي: اتفضلي تكدرين ترحين.
باوعتله كلت بكلبي هسه شحاجي هذا بالله كلما حجه وياي وكلي تكدرين ترحين.
احسها طرده.
شمه: مع السلامة.
رحت لمكاني بالسياره واني محرجه حسيت الكل نظراتهم بيها تساؤلات.
شيريد منها؟
شعنده وياها؟
شنو بيناتهم؟
سرى: شبيج؟ شكلج؟

شمه: هاا. لا ماكلي بس يسألني على صديقتي مجازه صار كم يوم تشتغل عدهم بشركتهم.
هزت راسها وسكتت.
بعدني بالطريق دك تليفوني.
طلعته. وائل.
كلت بكلبي يمه.
يامحاسن الصدف شنو هاي اليوم بوجهمن مصبحه ايوب اجه ووائل اتصل.
شنو متفقين.
ظل يتصل كل شوية انحرجت بالسياره كلها تباوعلي اكيد يكولون ليش متجاوب.
خليته صامت.
بليلتها جان عدنه خطار اقارب امي من البصرة.
سويت عشا وبعدها غسلت المواعين وبعدها اشتغلت الجايات رايحة جايه.

خالة امي وبتها ووياهم وزوج بتها. بس زوج بتها راح بات عد ناس اقاربه.
خالة امي وامي وآدم ناموا من وكت بس بقت بتها كاعده يمي تباوع عالتلفزيون وتسولف.
كل شوية التليفون يدك.
احلام: تليفونج هوايه يدك.
شمه: صديقتي
احلام: صديقتتتتج لو صديقج
كلتلي وهي تضحك.
كتلها: صديقيش؟ لا حبيبتي اني مو من جماعة الاصدقاء
احلام: اتشاقه وياج شبيج.

بقت كاعده وتسولف على ايام شبابها هيجي حبت مدري منو وهيجي مدري منو جان ذابح نفسه عليها وهيجي هي مؤدبه ومتدينه.
واني كاعده على اعصابي لان تليفوني صح صامت بس كل شويه تشتعل الشاشة وتباوع هي تريد تعرف منو.
احلام: خل اروح للحمام وارجع اكملج هاي القصة. هههههه.
شمه: اوك.
راحت للحمام فتحت التليفون شفت مسج من استاذ ايوب. اتعجبت.
كاتبلي: السلام عليكم
شمه شلونج؟ شخبارج؟
كاعده؟
اكدر اتصل بيج؟

ردت اجاوبه واكتبله لا رجعت احلام. غلقت التليفون حتى لايتصل.
رجعت احلام خانم تكمل مغامراتها على راسي وسطرتني لحد الساعة بالثنتين.
كاعده وعيوني تدمع من النعاس وظلت تحركني. ياربي وراي دوام الصبح ولازم اكعد من الساعة بالسته.
واخيرا كالت: يالله خيه الصبح اكملج هسه تعبت ونعست يالله تصبحين على خير.
شمه: وانتي من اهله حبيبتي.
مصدكت انام.
كعدت الصبح مثل السكران كوه كمت للدوام.

صعدت بالسيارة ورحنه للدوام بس الطريق كله اتثاوب ميته من النعاس.
بده دوامنه عادي بعدين وصلني مسج من استاذ ايوب: صباح الخير
ممكن تجاوبين من ادزلج مسج؟
كلت فشله خل ارد عليه: صباح النور استاذ هاي جاوبت
ايوب: صلاوات. واخيراً تنازلتي وجاوبتي علينه.
شمه: البارحة جان يمي ناس مكدرت اجاوب
ايوب: وقبلها موجنتي متجاوبين؟
شمه: قبلها شوكت؟
ايوب: الف مره دزيتلج اسف ومجاوبتي مو صح؟ تتعمدين لو شنو فلمج؟

شمه: هاي الاسف القديمه؟ هاي قبل الف سنة شذكرك بيها؟ لا ليش متعمده؟
ايوب: هي فعلا عبالك الف سنة. ماادري احسج متردين تحجين وياي. احس فارض نفسي عليج من احجي وياج.
شمه: مو صحيح
ايوب: اكيد؟
شمه: اكيد.
ايوب: ماشي. المهم شوكت عندج مجال حتى نحجي؟
شمه: بشنو؟
ايوب: مو كتلج البارحة اكو موضوع مهم ولازم احجي وياج بي؟
شمه: لعد والحجي الحجيناه هسه شنو؟
ايوب: هذا موضوع مهم يعني؟
شمه: مااعرف
ايوب: لعد شتعرفين؟

شمه: مااعرف شي.
ايوب: اوك شمه. مااريد اعطلج اذا صار عندج مجال اتصلي بيه او دزيلي مسج حتى نلتقي.
بقيت افكر شعنده ايوب افندي؟ شيريد بعد؟
عوفج من ايوب فكري بالبلوه وائل بس لايجي لهنا ويفشلني كدام الموظفين واستاذ مؤيد.
شلون بهاليوم الاسود المو ناوي يخلص على خير.
غلست مرجعت اتصلت على استاذ ايوب ولا دزيتله مسج استحي.
للساعة بتلاثة اتصلت امي: ها شمتي شلونج ماما؟
شمه: هلو ماما شلونج؟

امي: اكولج من ترجعين للبيت خالتي تريد تحجي وياج على ابنها انتي سوي نفسج متعرفين بس كوليلها اكو ناس حاجين علي واني موافقه عليهم ومنتظرين السنويه مال بابا ويجون يخطبون رسمي.
شمه: منو همه؟
امي: لج محد بس جذبي هيجي كوليلها لان من الصبح لهسه تحلف بيه اوافق على ابنها.
شمه: ياابن؟
امي: عدها ولد معوق شويه عقله مو تمام وتريدج اله.

شمه: ياا! هو هذا حظ شمه واحد مو بعقله شبي حظي تره كلش مصخها شبي كلما جايه يطيح اكثر.
امي: هههههه عابتلج. مو تنسين
شمه: وهو هذا شي ينسي. لتخافين هسه اجيب الخطابه وياي وافاجئها هههه.
سديت التليفون ويه امي صاحلي استاذ مؤيد وهم جان عصبي ماادري شبي صارله يومين ماخذنه صياح ورزاله؟
وبعدين يتحسف ويرجع يتعذر.
تصرفاته هاليومين ذكرتني بسوالف فد واحد هم جان هيجي يسوي وياي.
دك تليفوني هبة!
شمه: الو.

هبه: ياكلبة ياحقيرة
شمه: يمه.
تحملنا الحياة على جناحها لتحط بنا في اماكن لم نتخيلها يوما.
لكننا لسنا طيورا لنهاجر في فصل الخريف لنعود الى اماكننا القديمة في الربيع.
نحن نهاجر ولا نعود.
لاننا ماهاجرنا الا لاننا لم نعد نستطيع العيش في تلك القلوب.

الفصل التالي
جميع الفصول
روايات الكاتب
روايات مشابهة