رواية صراع الجبابرة للكاتبة روز الفياض الفصل الثاني عشر
اتصلت هبه واستلمتني رزاله لان صار مدة مااسأل عنها: خلصتي حاجتج اشتغلتي بعد متحتاجين هبه يطبها مرض هبه بيش الكيلو قابل.
شمه: ثول صوتج بط طبلة اذني. لعد شبيج انتي متسألين جنابج بيمن مشغوله بالشركات والعقارات؟
هبه: مشغولة مثلما انتي مشغولة بالحب عيني لو عبالج بس انتي؟
شمه: ايبااه شوف الحب المشغولة بي اني ههههه هو اليشوفج يشوف حب يشوف بس حالات مستعصيه ههههه.
وين غاطه لج؟
هبه: لاحبيبتي لتغيرين الموضوع اريد اعرف كل شي من طأطأ لسلامو عليكو. انتظرت. انتظرت. كلت يمكن تستحي على نفسها وتجي تحجيلي اني اختها وصديقتها وبير اسرارها.
شمه: شكو شصاير؟
هبه: شمدريني انتي احجيلي شصاير؟
شمه: بشنو؟
هبه: بمديري؟
شمه: شبي صخيمج؟
هبه: ايوه، مشيهن علي هالحركات.
شمه: مال الثول هسه اسد التليفون بوجها. لج شكو فهميني شصاير؟ تره ماادري عن شنو تحجين.
هبه: حلفي بداعة آدم متعرفين؟
شمه: اي وربي ماادري بشي شكو؟
هبه: لعد ايوب شعنده قبل مده اخذ رقمج مني وبعدين اتصل بيج؟
شمه: الكبر. اي والله عبالي عندج شي بي حظ عبالي ابو ايوب مدري شبي مديري ومديري.
هبه: احجي بلا لف ودوران.
شمه: هو شيجي من وره مديرج غير كل خير متكوليلي. خابر كلي ابريني الذمه ماادري شصاير بعقله.
هبه: هي هاي؟
شمه: اي وروح ابويه.
هبه: اي مو اعرفج اني فاهيه ومطفيه مو مال تكدرين توكعين واحد مثل ايوب. ايوب ينرادله وحده ذكيه ودلوعه وشخصية حتى تلفت نظره.
شمه: شدعوه هسه اني ميته عليه.
هبه: اكولج نريد نطلع اني وياج نروح منا منا.
شمه: وين؟
هبه: ماادري بس اكو وحده صديقتي عازمتني على حفلة عيد ميلاد بتها ترحين وياي؟
شمه: لا شسوي رايحه ميعرفوني فشلة.
هبه: دنجبي. خلينه نشوف الناس نشوف العالم شلون عايشة. لج وحده طاكه وتعرف الدنيا كلها مسؤولين واعلاميين وممثلين يجوز نحتاجها باجر. عكبه بشغل بصخام خو منبقى طول عمرنه بهالوظيفه..
شمه: مو استحي زحمه هسه يكولون جايه بدون عزيمه.
هبه: لا ميكولون منو بحالنه حتى يشوفنه اجينه لو لا. خلينه نغير جو نغني. نركص نصخم.
شمه: شوكت؟
هبه: باجر
شمه: اوك اذا ماعندي شي اروح وياج بس هم اخذ هديه؟
هبه: لا اني اخذت هي طفلة اخذتلها لعابه قابل اثنينه ناخذ.
شمه: اوك يالله روحي راح اترزل من وراج.
من رجعت البيت استلمتني خالة امي: والله ادللج دلال.
شمه: خاله مو شغلة دلال ليش اني شناقصني هم الحمدلله مدلله نفسي بالاكدر عليه بس كتلج اكو ناس حاجين ويه ماما واني وافقت وماما انطتهم كلمه عيب بعد نتراجع والولد خوش ولد.
خالة امي: محد باالبيت وياج بس اني وابوه وهو فقير والله ولايحجي بس شوية هو نفسيته تعبانه لان اتزوج قبل وزوجته طلعت مو خوش انسانه.
شمه: كل شي قسمه ونصيب خاله. بعدين اني اذا اريد اتزوج مااتزوج بغير محافظة مااكدر اليتزوجني يكعد ويايه هنا ابيت اهلي خوما اعوف امي بعدين لازم يتكفل بأبني ويتعهد انه يربي ويكونله اب ولازم يقبل بشغلي ووظيفتي لان اني مااترك شغلي.
باوعتلي صفح كالت: ياا. خوش والله. جا المن ماخذج بعد كون تردين تشتغلين ياهو يداريه ويكابله؟ وتردين ابنج وياج هاي ياهو يقبل بيها؟ ووين صايره انوب يكعد وياج علمود امج؟ بعد التزوج تروح وره رجلها وتكعد ويه عيالها ولا جدب مال اكلج نخليج تشتغلين جا المن ماخذينج غيرحتى تدارينه تخدمينه خوما نجيبله خدامه تداريه.
شمه: والله خاله مادام لهدرجة مريض الافضل تجيبوله ممرضة لان حتى الخدامه مراح تفيده. وكتلج ماافيدكم والحمدلله الناس الخطبوني وافقوا على كل شروطي.
كالت: اي خوش. كون وافقوا الله يسعدج.
عفتها وكمت رحت لغرفتي وعفتهم هي وبتها يرتبون اغراضهم حتى يرحون.
دخلت لغرفتي وسديت الباب سمعت تليفوني يدك. وائل!
انطيته حظر. كافي مليت.
ظليت افكر. خاف فشلة غلست من استاذ ايوب لااتصلت بي ولادزيتله مسج ولا حاولت اطلعلي عذر.
ثوله صدك ثوله انتي شمه. هذا صاحب مؤيد واعتقد نفسه صديقة المقرب إلى كال عليه لذلك يخليه يجي بمكانه من يسافر، غبيه ظلي بثولج هذا هسه باجر يكله اطردها ويطردج.
اتحملي ايوب وخباله وجاوبيه اذا اتصل تره مابيها شي مكايلج صاحبيني.
بس خاف يريد يحجي ويلمح مثل ذيج المره ويحرجني؟
لا الافضل اغلس من عنده.
اففف شلون بلساني مااكدر الزم لساني من احجي وياه.
الله يعديها على خير هالفتره.
ثاني يوم اترخصت من امي حتى اروح ويه هبه لحفلة عيد ميلاد بت صديقتها بعد الدوام نروح.
اتوقعت ثاني يوم من اداوم يجي استاذ ايوب يرزلني او يعاتبني او يتصل او يدز مسج لان غلست بس ماكو شي.
خلص الدوام وكتلهم اني ماارجع وياكم انتظر صديقتي نريد نروح للسوك.
طلعوا واني واكفه يم باب الشركة بقيت منتظرة هبه تمر علي ونروح.
دك تليفوني. استاذ ايوب.
كلت لازم اجاوب مصلحتي وشغلي تستوجب اتحمل هالوضع.
شمه: الو؟
ايوب: انتي وين؟
شمه: بالبيت.
ايوب: لآخر مره راح اسألج شوكت اكدر اشوفج واحجي وياج عندي موضوع مهم؟
شمه: موضوع شنو؟
ايوب: مااكدر احجيه بالتليفون.
اجت هبه ومااريدها تسمعني احجي وياه عبالها بناتنه شي فكتله: كيفك استاذ باجر انتظرك بريست الغدا.
سديت التليفون بسرعة قبل مااصعد بالسيارة وهبه تسمعني. وظليت طول الطريق الوم بنفسي. شلون اتجرأت وكتله باجر انتظرك بريست الغدا. طاح حطج ثوله وغبيه هسه يعتبره موعد هسه سجل عليج نقطة.
خررب انوب كتله بالبيت عود صرت لوتيه حتى لايجي للشركة ولايتصل.
ضجت وكلبي انقبض حسيت نفسي مسويه مصيبه.
طول الطريق ساكتين اني وهبه.
هي بعالم واني بعالم ثاني وابو التكسي هم بعالم يباوعلنه بالمرايه ويسوي حركات.
كملت السبحة هسه.
---.
---
ايوب.
حاولت احجي ويه شمه واكوللها تبتعد عن هبه.
لان سألت عنها وسمعت مو خوش حجي، والي استنتجته عدها شي ويه الحجي بس من تحت الطاولة.
وحجيت ويه سلمان بالبداية اتردد خاف يحجي بس بعدين اكدلي شكوكي وكلي هو هم ملاحظ هالموضوع وحتى بقية الموظفين بس ساكتين لان يكولون مالهم علاقة.
خليني بس الزم عليج شي ياهبة واني الج.
الا اشوفج نجوم الظهر.
المشكلة هاي متجاوب كلما اتصل عليها لو ادزلها مسج تغلس.
هسه افتهمنه انتي ثكيلة بس افتهمي وشوفي صاحبتج شلون زباله.
جنت رايح لمؤيد للشركة لان نوارس خابرتني مؤيد زعلان وياها وميحاجيها صار يومين.
مؤيد حباب وطيب بس عصبي وميتحمل احد يتدخل بشغلة ونوارس لحوحة وتحجي هواي وتطلع روحه.
اكيد اتعاركوا اختي واعرفها زعلته وهسه تريده يرضى ويحجي وياها.
الله يعلم شمسويه هالمره تكول حجيت وياه عالشغل. شبي الشغل؟
اكص ايدي اذا طلعتي بريئة.
المهم وصلت للشركة شفت شمه!
جانت تصعد بتكسي!
قبل شوية اتصلت بيها كالت بالبيت؟!
لهدرجة اني فارض نفسي عليها؟
ضجت حيل من نفسي. حسيت رخصت نفسي.
بس مع هذا قررت اروح وراها اشوفها وين رايحة حتى اواجهها من اشوفها مره اللخ.
بقيت امشي وره التكسي اللي بي شمه بس شفت اكو بنية كاعده يمها.
حاولت اتقرب من السيارة بس بدون متنتبه.
بالبداية الطريق جان عادي.
بس بعدين حسيت هذا الطريق مو غريب علي.
كرصني گلبي.
اقربت اكثر من السيارة شفت هبة!
هذني وين رايحات؟
هاي شمه الغبية وين رايحة ويه هبه.
وجماله تكولي بالبيت.
كلما تمشي السيارة كلبي ينقبض اكثر.
هذا الطريق اعرفه كل زين.
لحدما وكفت السيارة..
واتأكدت كل ظنوني.
ردت انزل واروح اطيح حظها بس كلت لا. خليها
شمه الظاهر مو مثلما جنت متصور.
والدليل كلتلي اني بالبيت وهي طالعه ويه هبة ال..
نزلن من السيارة ودخلن للبيت.
مع الاسف عليج شمه اذا صدك.
---
---
شمه.
طريق طويل. قضيت وقتي بالسكوت ومراقبة المارة فهذا عجوز يتكأ على عصاه متوجها ربما الى صديق قديم.
وهذه امرأة تعبرالشارع حاملةً كيسا من الخضار.
وهنا اطفالٌ يتسابقون بينهم للوصول الى ذلك التل الصغير من الحصى.
ياترى ماذا يفكرون؟
ماذا يحملون من هموم؟
هل منهم من يشعر بالضياع مثلي.
اشعر بالتعب. احتاج جدار لاتك عليه. وما من جدار..
سرحت لدقيقة وانا احاول تذكر ملامح مصطفى زوجي رحمه الله.
لم اتذكر تلك الملامح كاملة؟
ماذا فعل التراب بتلك الملامح ياترى.
نزلت دمعة مني فأحسست بالحرج. مسحتها سريعا كي لا استرسل بمشاعري..
أفقت من افكاري على صوت السائق وهو يصرخ بأحد الاطفال وقد هرول امام السيارة مسرعاً.
هبه: يالله وصلنه.
شمه: وين. صارلنه ساعة بالطريق وين ماخذتنه.
هبة: نزلي نزلي وصلنه.
نزلنه من السيارة وردت احاسب السايق هبه اصرت هي إلى تحاسب.
التفتت وراي شفت بيت جبير وبناء حديث وجديد.
شمه: ماشاءالله هذا بيتهم؟
هبه: اي هذا.
شمه: حلو
هبة: دتعاي تعاي.
دكت الجرس وبقينه ننتظر.
هبه: اريدج تصيرين فري مو تبقين مبوزه.
شمه: اني مبوزه؟
هبه: اي انتي. ضحكي ركصي فرفشي مو بس ضاربه بوز.
شمه: على اساس انتي شلون فرفوشيه.
سمعنه خطوات جايه بأتجاه الباب سكتنه.
انفتح الباب طلعت الخدامة.
باوعت لهبه كتلها: كل منج مخليتيني اجيب هديه زحمه مبينين ناس مرتبين.
هبه: دتعاي هسه وكت هديه هو.
دخلنه للبيت هدووء.
دخلتنه الخدامه للصالة. صالة جبيره وفخمة واثاث فخم.
بقينه كاعدين شوية بس محد اجه.
اجت الخدامه قدمتلنه ضيافة واختفت.
اتدنيت على هبه كتلها: هبيه؟
هبه: ها؟
شمه: ووجعا اشو محد؟
هبه: شنو محد؟
شمه: محد اجه استقبلنه ولا سلم علينه؟
هبه: هسه يجون. قابل طايرين.
شمه: اشو عبالك ماكو حفلة. مو كلتي حفلة عيد ميلاد؟
هبه: تره بعد وكت هسه دنيا الظهر. منا لليل كل الجو يتغير.
شمه: يمه. ياليل؟ لا عيني ممتفقين نبقى لليل لا مااكدر غير امي تذبحني.
هبه: افففف. شكد تنگين وتدقين.
شمه: عابت.
بقينه يمكن ثلث ساعة كاعدين ضجت ومليت بعدين دخلت علينه بنية شابه يمكن بالثلاثينات. بداية الثلاثينات.
لابسه فستان مال مناسبة. وفاتحه شعرها ولابسة هواي ذهب.
وكعب مااعرف شلون تكدر تمشي بي.
سلمت علينه وكعدت يمنه تسولف هي وهبه وضحك ويتبسبسون سوا واني كاعده عبالك مزهريه.
بعدين باوعتلي وكلت لهبه: هي هاي صديقتج الحلوه؟
هبه: اي هاي شمه.
ظلت تباوعلي وتحجي بصوت ناصي هي وهبه بعدين دخلت وحده ثانية بس اصغر مبين عليها من الاولى.
لابسه فستان قصير حيل وكاشخه مكياج وعدسات.
سلمت وكعدت. وره شويه كامت ماادري وين راحت ورجعت كالت: يابنات تعالوا هنا.
كمنه رحنه كعدنه بصاله ازغر بس بيها مظاهر عيد ميلاد زينه وكيك وحلويات وترتيبات.
انفتح الباب دخلت مره جبيره بالعمر هم سلمت علينه وكعدت يمنه.
شويه وبدت تدخن.
ظليت اكح. لان عندي حساسية بالقصبات وهن يضحكن.
صاحت المره الجبيره عالخدامة وكلتلها: شغلي الاغاني.
شغلت الاغاني وهن كامن كلهن يركصن.
ركص مو طبيعي ظليت فاتحة عيوني.
دنكت على هبه كتلها: شنو هالركص هذا وين متعلمات هيجي ركص عبالك..
ضحكت هبه كالت: بعدج مشفتي شي خل تجي باقي الشله وشوفي. الا اخليج تطلعين منا مو شمه هههههههههه.
وره نص ساعة اجت مجموعة كلهن شابات زغار وكبار وكلهن لابسات ملابس فاضحة مو مال هيجي مناسبة.
بقيت لازكة بهبة احس المكان مو مكاني مااحب هيجي اجواء وخصوصا ناس مااعرفهم.
باوعت للساعة وكلت لهبه: شوكت نروح تأخرت.
هبه: دانجبي وين نروح بعدها الحفلة مابدت.
شمه: لعد هذا الركص صار ساعة شنو؟
هبه: هذا احماء.
شمه: هذا كله احماء!
شوية اندك الجرس.
اني صافنه عالركص والحركات واللبس والمكياج وفجأة دخل علينه واحد ولا متخيلة اشوفه. ولامتوقعة!
شجابه هنا؟
كامت العشيرة مال البنات كلها تركض تسلم عليه واني ظليت مفهييه..!
لزكت بهبة كتلها: لج شوفي صخامه.
هبه: ههههه شبيج متعجبه يعرفهم غير.
شمه: يااا شوفي شوفي!
هبه: اششش لتفشلينه. اتصرفي على اساس كل شي تشوفينه طبيعي ماكو شي خارج عن المألوف. بعدين اني قبل شكايلتلج؟
شمه: شكايلتلي؟
هبه: كايلتلج استفادي شوفي البنات شلون اخذنه بالاحضان والبوس وهو شلون فرحان وطاير..
شمه: صخم الله وجهه.
هبه: اششششش اشش ولاكلمة ضحكي ضحكي خاف يجي يكعد يمنه.
شمه: لا يمه مااريده يكعد يمي.
هبه: لج هذا الذهب واللبس والدلال هذا كله منه.
ظل الفار يلعب بعبي. شنو الفلم؟ شنو إلى جاي يصير؟
شيسوي هذا جاي هنا؟
كلبي ظل يدك بسرعة.
اجه سلم علينه: هلا. هلا. هلا بالجمال والدلال كله. هلا بهباوي الورد.
هبه: هلو بيك حجي نورت الحفلة بيك
ابو ايوب: لا لا لا. ازعل عليج لعد وهذا الگمر شنو وجوده هنا.
دنك علي ماادري راد يسلم لو راد يبوسني بس اني رأسا كمزت وطفرت من مكاني.
ابو ايوب: كعدي. كعدي شبيج طفرتي ههههه لعد عليمن احنه جايين هههه.
هبه: كعدي شمه شبيج؟
شمه: ها؟ لاا اني تأخرت حيل لازم اروح.
عفتهم ومشيت باتجاه باب الصالة صاح وراي: تعاي حبابة تعاي. وين رايحة؟ تعاي خل نتفاهم.
مجاوبته. صاحت وراي هبه: شمه؟ تعاي تعاي لتروحين هسه نروح سوا بس انتظري شويه.
بهالاثناء اندك الجرس.
التفتت على هبه كتلها: لا مااكدر بعد. غير مره ان شاءالله.
كلبي يدك حيل متت من الخوف اريد بس اطلع.
اجت الخدامة شاورت المره الجبيرة.
المره الجبيرة رأسا اشرت للبنات طفوا الاغاني وشاورت الحجي.
كامت طلعت وكالت: بلا صوت اكو خطار اجو عيب. لحد يفتح الباب.
اجيت اطلع وراها كلتلي: حبيبتي خمس دقايق بس خل يطلعون الخطار وبعدين طلعي.
شمه: مو تأخرت والله امي هسه تقلق علي.
مجاوبتني رأسا طلعت وسدت الباب وسمعت صوت مفتاح.
هنا بدا الخوف الصدك.
درت على هبه كتلها: لج هبه تأخرت.
طاحت دموعي من الخوف حسيت هذا بيت مشبوه مو اي شي ثاني.
اجت هبه لزمت ايدي وظلت تجرني حتى اكعد بس اني من الخوف اتهسترت ظليت اضرب عالباب بأيدي واصيح:.
فتحوا الباب. فتحيه. عفيه فتحي الباب تأخرت امي هسه تخاف.
هبه: شمه شبيج دصبري
شمه: عوفيني. هبة عوفيني.
ابو ايوب: جيبيها هبه جيبيها هنا. تعاي كعدي شويه وبعدين اني اوصلكم.
صاح على هبه.
اجت وحده ثانية لزمتني ويه هبة وابو ايوب كام من مكانه.
اني هنا انتهيت من الخوف.
ظليت اصرخ بعصبية: عوفونييي، عوفوونييي.
فجأة اندك الباب حيل بكل قوة كلها التفتت عالباب.
من وره الباب صوت واحد يصيح على المره الجبيرة: فتحيييه. فتحييييه بسرعة. فتحيه لا اجيب الشرطة.
وهي تكوله حفلة عيد ميلاد وبنات بدون حجاب عيب.
الصوت اعرفه بس من رجع ضرب الباب وكللها: حجيييي. افتح الباب. حجييي هاي مرتي. حجيييي..
شمه مرتي يابه افتح الباااب.
شمه: اييووورب؟ ايوووب عفيه اني هنا. ايووب.
بهاللحظة صار هدوء بس صوت ايوب كل شوية يضرب الباب لحدما استسلمت وفتحت الباب ودخل.
اني هنا رجليه بعد مكدرت تشيلني.
حسيت باب الجنه انفتح مو باب الصاله بس دخل دفعت هبه وركضت عليه.
لبدت وراه بس كوه واكفه رجليه مااحس بيها من الرعب.
كلبي احس مااكدر اسيطر عليه. حسيت كلبي راح يوكف.
اريد احجي مااكدر.
اسمعه هو يصيح على ابوه وابوه يصيح عليه بس ما افرزن شنو يحجون كل تركيزي شلون اكدر اقاوم اكثر وابقى واكفة مااحس برجليه. حسيت نفسي راح اوكع خلاص بس جلبت بأيوب واني ابجي.
مادار علي ولاباوعلي بس لزم ايدي واني متعلكه بقميصه من ظهره ومن ردنه وابجي واكوله: رجليه. مااكدر اوكف بعد. عفيه طلعني..
سمعت هبه تحاول تبرر وتكوله: عيد ميلاد صديقتي وجاييين.
ماادري الحجي شنو حجه بصوت ناصي بس هم جان عصبي. سمعت ايوب رد عليه: اي. اييي. متزوجها بالسر. بس اني عالاقل بالحلال مو مثلك.
شفت الحجي راد يهجم على ايوب يضربه بس البنات الواكفات دفعوه.
اجت المره الجبيرة دفعت ايوب ودفعتني حتى نطلع.
التفت ايوب علي لزمني كلي: امشي، امششي.
رجع التفتت عليهم كللهم: بسيطة. وهبه حسابج عندي.
بهاللحظات. ماادري شلون شالتني رجليه وكدرت اطلع..
وصلنه للسيارة راد يفتح السيارة بس اني لزمته: مااكدر بعد، مااكدر، مااكدر امشي.
كعدت عالرصيف وظليت ابجي بعلو صوتي. وهو واكف على راسي ويصيح: على شنو تبجين؟ هاا؟ على طيحان حطج؟ فهميني على شنو تبجين؟ تدورين حفلات وسهرات؟ تليفون متجاوبين تستحرمين بس ويه هبه وهذاك السايق وهيج شكول تطلعين وتركصين. ادب..
وسكت، يمكن سكت لان شافني انهاريت ومحجيت ولاشي.
دار وجهه فتح باب السيارة وكلي: كومي صعدي، بسرررعه.
صرخ علي بس اني الرجفه بجسمي مخليتني حتى حجي مااعرف احجي.
سحبني من مكاني وصعدني بالسيارة.
اخذت الطريق كله على بجيه وحده. هو جان ساكت..
ماادري وين رايحين بس مو طريق بيتنه، من رهبة إلى صار معدتي ماادري شبيها فجأة اتقيأت على نفسي رغم اني مماكله شي بس شربت بيبسي.
رأسا وكف السيارة والتفتت علي كلي: شصارلج؟ راح تخبليني..
ردت افتح باب السيارة بس جان مقفول. كلي: وووين؟ ووين نازله؟ وين تردين تروحين بعد؟ مو كافي الفضيحة مال اليوم؟ مكفتج هالفضيحة؟ تردين فضيحة ثانية؟
تردين ترجعين لصاحبتج ال..
مجاوبته ولاحجيت كلمة ولاطلع مني حرف. استاهل كل هالرزاله وهالاهانه. استاهل اكثر.
اني وين وحفلات هبه وجماعتها وين.
سكت شوية وسحب الكلينكس من الكشن الوراني وخلاه يمي.
بقى ساكت واني ابجي لدرجة استحيت من صوت شهكاتي المراضية تروح وتسكت..
ايوب: اتصلت عليج كتلج انتي وين كلتي بالبيت، طلعتي متواعده ويه هاي الكلبة ورايحة لبيت..
رجع سكت كلي: شتسوين رحتي؟
شمه: هي. هي. هب. هبه عزم. عزمتني.
ايوب: وانتي مصدكتي. رحتي تركضين مو؟ لج انتي شكد غبيه. شكد غبيه انتي.
كلي وهو يضغط على اسنانه.
بعدين اتنهد وسألني: شصار؟
هزيت راسي كتله: ما. ماا. ماكو. شي.
ايوب: واذا طلع اكو شي؟
رجعت بجيت كتله: والله. ما. ماكو شي. والله ال. العظيم.
سكتت..
وره شوية كلي: زعلتي من كتلج شعندج ويه وائل مدري شعنده هو وياج؟ نكرتي ويمكن جان سويتيها عشاير لو جان عندج..
وسكت..
عرفت الكلمة حتى لو مكالها ( وجان سويتيها عشاير لو جان عندج عشيرة ).
كتله بحركت كلب:
عن. دي، عشي. ره، ولتح. تحجي. وياي. هيج. ي.
استهضمت من كلي ماعندج عشيرة حسيت لو مخليني صاير بيه إلى صاير ولا هالكلمة..
مديت ايدي بجنطتي طلعت النقال.
طلعت المحادثة ويه وائل وخليتها كدامه: شوف، شووو. ف، مو وائل ولا انت ولا. ابوك يخليني اسوي هيج. مو اني.
ظليت اصيح. وهو سكت.
ردت افتح الباب نسيت الباب مقفول ضربت الجامه كتله: افتح الباب.
ايوب: اشش الناس تباوعلج
شمه: افتح الباب خليني انزل.
ايوب: بلا خبال. اني اوصلج لبيتكم كافي.
سكتت بس كل شوية اتذكر الصار وتظل دموعي تصب..
اتخيلت نفسي فريسه بين ايدين ابو ايوب او يجوز واحد ثاني. يمكن لو باقيه بعد شوية جان صارت كارثة. يمكن يخدروني يمكن يسوون اكثر..
اتخيلت نفسي مثل الافلام اكعد الاكي نفسي بدون ملابس وبدون شرف..
اتخيلت امي من تعرف بفضيحة بتها.
لاشعوريا ضربت خدي حيل ورجعت بجيت.
سمعت صوته يتحسر بعدين كلي: حتى تلوميني من طلعتج من الشركة..
كغزالة بين الضباع. اين تهرب والى اين تلتجأ. ومن يحميها من ضباع جائعة.
إما الضباع وإما رصاصة صياد.
اختاري طريقة للموت.