رواية صراع الجبابرة للكاتبة روز الفياض الفصل الثالث عشر

رواية صراع الجبابرة للكاتبة روز الفياض الفصل الثالث عشر

وها هو صراع جديد يبدأ.
مابين جبابرة المال. ومامن ضحية فيه غيري.
---
وصلني للبيت بس من وصلنه بقيت كاعدة بالسيارة خفت انزل.
ايوب: شرفي ست.
بقيت متحنطة بمكاني شلون انزل بحالتي هاي بالله امي شافتني شكوللها شبيه؟
همزين الدنيا بدت تصير ظلمه والشمس غابت عالاقل محد من الجيران ينتبه ويشوفني جايه بهاي حالتي وجماله واحد غريب موصلني بالظلمه..
طلع جكارة وبدا يدخن.

بديت اكح. فتح الشبابيك وهو ساكت ومد ايده بره السيارة وبيده الجكارة. ساكت منتظرني انزل.
شمه: لوما انت جاي الله يعلم جان شصار بيه..
ايوب: ميصير شي.
لتخافين، اليوم انتي ضيفة شرف بس..
يجرون رجلج للطريق مو اكثر.
شمه: ردت اموت.
رجليه انشلت من الخوف. لو باقية دقيقة اكثر يمكن جان متت.
ايوب: اتصلت بيج ردت اكولج ابتعدي عن هبة لان سمعت عنها مو خوش حجي بس انتي لو متجاوبين لو من جاوبتي كلتي بالبيت.
عجبج الصار هسه؟

شمه: مااصدك، مااكدر اصدك إلى صار. هبه صديقتي صار سنين اعرفها من جنه بالمدرسة هيجي تسوي بيه. تبيعني علمود الفلوس.
ايوب: لا صدكي. اريد افتهم انتي شعاجبج بيها؟ سنين تعرفيها يعني متعرفين اخلاقها؟
شمه: والله مجانت هيجي. والله جانت فقيرة مشفت شي عليها بيوم من الايام..

ايوب: الثقة الزايدة والعمية هاي بطليها. اذا انتي متعرفين الناس شلون صايرة سألي غيرج واتعلمي واخذي النصيحة لان غيرج يجوز اعرف منج وافهم. اتوقعي من الناس كل شي.

شمه: شلون متصير عندي ثقه عميه بيها واني اعرفها من جنت بالمدرسة واعرف خواتها واهلها. وبايته عندي ونايمه على فراشي وماكله من ماعوني. شلون اتوقع هيج شي من وحده صاحبة فضل علي بعدما بعت كل شي علمود العيشة حتى حلقتي بس هي وكفت وياي وشافتلي شغل. وحتى من بطلت من شركتكم هم هي اتوسطتلي يم استاذ مؤيد وقبلني..
صيح علي كلي: مااااالها فضل عليج..
مالها فضل..

وكتلج ولمحتلج بيوم اللي لكيتجن بالمطعم وجنتي عازمتها. تتذكرين؟
تتذكرين شكتلج من كتيلي ليش دفعت الحساب بقت هبه تطلبني عزيمه؟
كتلج مالها عندج شي متطلبج شي واذا سألتج كليلها ايوب كلي، كتلج لو لا؟
شمه: اي. كتلي.
ايوب: معناها افتهمي مالها فضل عليج لان مو هي إلى شغلتج ولاهي إلى اتوسطتلج.
بقيت ساكته وصافنة هذا شيريد يكول؟ شيقصد؟
بس لاا؟!
شمه: لعد منو؟
كلي بهدوء وهو يشعل جكارة ثانية: آني..

بقيت صافنة ماادري شفكرت وشحسيت بلحظتها.
كحيت مره ثانية من دخان الجكارة.
ايوب: يالله نزلي. خليني اروح اشوف شغلي.
نزلت كتله: شكراً..
ايوب: اذا اتصلت بيج هالكلبة لتجاوبيها وانطيها حظر.
شمه: ان شاءالله.
ايوب: ولتحجين لاحد اي شي عن إلى صار. مفهوم؟
هزيت راسي اي.
ايوب: وهذا، وائل، هم انطيه حظر.
شمه: حاظرته اصلا.
ايوب: احسن
دخلت للبيت يالله اتحرك وراح.

بقيت واكفه بالحديقة وادعي كون امي نايمه لو بالحمام لو بأي مكان حتى من افوت للبيت متشوفني وتشوف حالتي.
امشي على كيف اريد اسمع صوت منو عدنه.
دخلت من باب المطبخ باوعت ماكو احد فتت كبل للحمام.
اسمع صوت ام علي جيرانه يم امي تسولف. الحمدلله مصادتني واني داخلة.
سبحت وغسلت ملابسي وقبل لااطلع باوعت لوجهي بالمراية.
اتذكرت إلى صار.
عبالك إلى صار شي بس بخيالي مااكدر استوعب إلى صار.
الله نجاني من بيت دعارة.

الف الحمدلله والشكر. الف الحمدلله والشكر.
هذا دعاء امي..
خلصت وصحت على امي انطتني ملابسي.
امي: شوكت اجيتي ودخلتي للحمام.
شمه: قبل شوية.
امي: ام علي هنا ووياها سارة تكول اليوم تسأل عنج.
طلعت من الحمام كبل لغرفتي دخلت وسديت الباب.
اتمددت بفراشي اريد ارتاح.
اريد استوعب. اريد اغمض عيوني وانام بلكي انسى إلى صار.
معقولة هبة هيجي تسوين بيه. هاي وانتي صديقتي واختي؟
معقولة تردين شرفي ينداس واصير وحدة مو زينه؟

اهون عليج ينكال عني حجي مو زين؟
اهون عليج ينگال عني مو شريفة؟
وهذا العجوز الشايب حسبي الله عليك. ويكولولك حجي. الله لايوفقك على سوايتك هاي.
لوما ايوب جاي جان اني هسه بخبر كانَ.
آخ ياربي. مابيه حيل المصايب وماشيه بطريقي عدل وانت تدري. ربي اذا مو لخاطري لخاطر امي وابني. اكفيني شرهم.
طلعت تليفوني حظرت هبة.
اتذكرت حجاية ايوب. طلع هو متوسطلي يم يم استاذ مؤيد.

كلما اكرهك تسوي شي وتنقذني من موقف اصعب من إلى قبله.
كل مره تكسرلي عيني.
اتذكرت حجي سارة من كلتلي يريد يساعدج مدري يريد مصلحتج.
كعدت..
رحت يم امي وام علي. سلمت وصحت لسارة.
جبتها وياي للغرفة كتلها انطيج حلويات.
طلعتلها حلويات من حلويات آدم وكعدتها يمي.
ردتها تحجي شي.
ماكو!
كتلها: سارونه. منو كلج على ايوب؟
باوعتلي كلتلي: شفتي شسوه اليوم.
اتحنطت.
بقيت اباوعلها وهي تباوع على صورة مصطفى الله يرحمه معلكة عالحايط.

شمه: ساره اني تعبانه.
سارة: ادري.
شمه: زين شوكت ارتاح؟ شراح يصير؟
سارة: هاي الصوره مالتمن؟
باوعت للصورة كتلها: زوجي.
ساره: الله يرحمه.
شمه: متعرفين شراح يصير؟
هزت راسها لا. بعدين كلتلي: شيليها هاي الصورة.
شمه: شبيها؟
سارة: راح وكتها.
بقيت ساكته واباوعلها. مدري هي العاقلة مدري اني مدري اثنين بلا عقل.
اتمنيتها تكول اي شي مثل المره الفاتت بس مكالت.
بعدين راحت واول مطلعوا وكعت صورة مصطفى واتكسرت.
---
---
ايوب.

شفتهن نزلن ودخلن للبيت.
هذا البيت والي بي شوكت الله يخلصنه منه.
اتذكرت قبل من كبرت وفهمت وعرفت ابوي شنو وشبي هو وامي يومية مشكلة وعركة وقصة.
بديت اراقب ابوي وين يروح ومنين يجي.
لحدما اكتشفت هذا الوكر.
وحدة عجوز ولامه حواليها شكو وحدة ماعدها اخلاق امثال هبة وغيرها واتاجر بيهن علمود الفلوس والسهر والسكر والعربده.
بقيت كاعد بالسيارة انتظر يطلعن بس محد طلع. الى ان اجه الحجي.
مثلما اتوقعت.

الظاهر الحجي بعد المشكلة الاخيرة متاب منها.
اذا عرفت امي هالمره يصير شي جبير.
بعدما دخل الحجي. شكيت انه هذا اتفاق بينه وبين هبه على انه تجيب شمه هنا.
ردت مااتدخل بس ضميري مسمحلي ابقى اتفرج لان يمكن تكون ضحية واني عندي خوات بغض النظر عن مشاعري.
رحت دكيت الجرس بس محد فتحلي الباب اكيد شافوني بالكاميرا. اتسلقت الباب وطفرت.
كبل رحت للباب الداخليه جانت مفتوحة واكو خدامات بالمطبخ واكفات.

اجت بعدين الام القائدة مال هذا الفريق. كلتلي: اتفضل عيني؟
ايوب: اريد البنات إلى دخلوا قبل شوية.
كلتلي: يابنات؟
ايوب: هبه وشمه.
كالت: ماعدنه وحده اسمها هبه ولا شمه.
ايوب: تره اني واكف بره من دخلوا وصار اكثر من ساعة منتظر ومحد طلع.
كالت: غلطان. طلعوا.
ايوب: توه كلتي ماعدنه بنات بهيج اسماء هسه تكولين طلعوا واني اكولج محد طلع.
كالت: اذا متصدك بكيفك.
ايوب: تعرفيني اني منو؟

ابتسمت كالت: طبعا اعرفك انت ابن الحجي هههه. ايوب.
ايوب: معناها روحي للحجي كوليله خل يطلع شمه لان تخصني.
ضحكت كالت: هااا يعني السالفة هيجي؟ هههههه.
ايوب: وينها؟
رجعت كالت: طلعت عيني طلعت
دفعتها وفتت كل الابواب مفتوحة الا هذاك الباب.
ظليت اضرب عالباب وادك اريده يفتح الباب بس مفتحه.
ماجان كدامي حل غير اكول مرتي حتى يفتح الباب، مو معقولة تظل اله نفس بيها من يعرف مرت ابنه.

سمعت صوت شمه جوه تبجي استمريت اضرب الباب.
بعدين طلعت هاي العجوز هي إلى قافلة الباب عليهم.
اخذتها وطلعنه بعدما صار بيني وبين الحجي غلط وصياح.
مو جديد هالوضع ومو اول مره بس هالمره كان مع البنية إلى شغلت تفكيري صار مدة.
مع البنية الغلط هالمرة هاي البنية جانت ضحية بريئة متعرف شي عن الحياة برا بيت اهلها شلون صايرة.
طلعتها بس انهارت بره وطول الطريق تبجي.
من حركت كلبي حجيت وياها بقسوة.

يمكن حجيت حجي ميصير احجيه وميحقلي.
بس جنت مضطر حتى بعد متعيدها.
انقهرت اكثر شي لان جذبت وكالت بالبيت وهي مو بالبيت هالشي خلاني افكر انه اني لازم ابتعد عنها وامسحها من تفكيري.
وعرفت إلى بينها وبين وائل مثل مكالت هي. او يمكن هي مكالت شي بس بوقتها نهرتني عن التلميح لاي شي بينها وبينه.
وطلع اكو شي. بس من جانبه هو.
اممم، بس هو مفكر مثل تفكيري. هو مفكر اكو شي بيني وبينها ههههه والله شي يضحك.

خطيه شمه. ماادري هي فعلا متعرف تتصرف وعلى نيتها لو اني إلى ماادري شبيه ادورلها اعذار ومبررات حتى صورتها متتغير بنظري.
وتبقى الرياح تأبى ان تجري بما تشتهي سفننا.
ونبقى نحن ندور في مكاننا كالرحى.
وتأبى الاقدار ان تسوقنا الى اسهل الطرق. ويأبى القلب ان ينصاع لكل امرلا يناسب مبتغاه.
شمه.
بقيت بذيج الليلة كلما اتذكر ابجي واظل ادك على وجهي.
شلون لو احد ثاني لاكفني هناك؟
شلون احد يعرفني شايفني؟ يمه وانفضح؟

لج هو انتي هسه يعني عبالج هاي مو فضيحة.
شنو ايوب ابن عمج ابن خالج وعبالج يستر عليج ويسكت.
رجال غريب هذا. وانتي هسه بنظرة وحده مو زينه. مو شريفة. واكيد هسه يروح لصاحبه ويحجيله ويكوله بطلها.
عزاا العزااج وصخام الصخمج شمه..
انتي هسه بنظر الناس، ياويلي ياويلي مااكدر اكول الكلمة..
شافتني امي ابجي كتلها مريضه ماادري شبيه.

صار عندي رعب ظليت كاعده واتخيل الناس شلون تحجي عليه وشلون ابني من يكبر ويعرف امه سمعتها مو زينه وشلون وشلون وشلون والف شلون مرت بعقلي لدرجة حسيت نفسي بغير عالم حتى ابني مشفته ومسألت عنه.
امي مسويتلها عشا ولاادري بيها شربت علاجها لو لا.
مااحس بشي. عبالك بغيبوبة بس كل شويه اكعد ادك وابجي وبعدين ارجع لوضعي واتخيل اشكال والوان القصص المأساوية بمخيلتي.
للفجر يالله حسيت نفسي وعيت وانتبهت.

باوعت شفت امي خطيه فارشه فراش يمي بالغرفة ونايمه ويمها قرآن يمكن جانت تقرا على راسي واني ماادري.
كمت رحت شفت آدم نايم.
رحت اتوضيت وصليت محتاجه اصلي هسه واحجي ويه ربي.
محتاجه اشتكيله من نفسي. ليش اني ضعيفة؟ ليش اني مو مثل البنات افتهم واستوعب واقرأ الناس بسرعة؟ ليش مااخلي احتمال انه هالانسان يطلع مو زين ولازم اخذ حذري منه؟ ليش؟

ربي انت تعرف إلى بكلبي بدون مااكول واحجي. اليوم نجيتني من مصيبه بس انت تعرف شنو تاليتها الك الحمد والشكر اللهي.
ربي مااريد غير الستر والرزق الحلال وتخلي امي وابني يارب.
ربي لاتفضحني دخيلك.
خلصت وبقيت كاعدة مااكدر انام اكو نار بكلبي اكو شي مشتعل.
غلطتي غلطة جبيرة لاتغتفر.
ابد لاتعيديها بعد. ممنوع ترحين مع احد لاي مكان بعد. فهمتي شمه؟
ممنوع تثقين بإحد بعد. ممنوع تتعمقين بصداقتج مع احد.

روحي بطريقج ورجعي بطريقج. لان هاي الناس مو ثقة مو مثلج ولامثل تفكيرج. انتي تفكرين بعقلية ناس قبل. وهاي الناس كل عقل ماعدها.
اريد شي يخليني انسى إلى صار حتى اكدر اعيش. شلون اكدر اداوم بعد؟
بيا عين؟
هسه يطردوني. شاشتغل اذا طردوني وين اروح؟
صار الصبح وطلعت الشمس واني مثل المخبلة اروح وارجع.
كل شويه انهار وابجي. اني هيج تاليتي!
شلون بيه لو ايوب حجه إلى صار؟ يافضيحتي.

فات الوقت ومرحت للدوام وغلقت التليفون خاف السايق يتصل.
مااكدر اروح مااكدر.
استمر وضعي هذا يومين حتى الاكل مااكدر اكله. امي اتخبلت عبالها سارة سوت بيه شي.
على شفا حفرة من انهيار عصبي جنت او يمكن صار عندي بس امي مره جبيرة ومتعرف تروح وتجي واني بغير عالم ومتعرف شتسويلي غير انو هي راحت للجيران واجو اخذوني للمستشفى فحوصات وتحاليل ودوخة وابر ومغذيات لان صار عندي هبوط بالسكر.

اشوف امي تبجي يم راسي وبحضنها ابني كاعد يباوعلي واريد اكوللها مابيه شي لتخافين بس مااكدر احجي لان نفسيتي جانت زفت ردت اكوللها مابيه شي بس خايفة من نفسي ومن إلى سويته.
رجعت للبيت وحالتي مثلما هي.
ثالث يوم اندك الباب واجت امي كلتلي: شمه حبيبتي ماما كومي شوية كعدي هناك بالصالة وياي وهاي زملائج بالدوام اليوم اجوا يسألون عليج يكولون تليفونج مغلق ومجاي اتداومين.
كعدت مسحت عيوني كتلها: منو اجه؟

امي: سرى ولمياء والولد برى بقوا مقبلوا يدخلون.
استحيت اغلس. كمت غسلت وجهي وغيرت ملابسي واخذتني امي للصالة.
بس دخلت حسيت بنظرات تدل عالصدمة بوجه لمياء وسرى بس انتبهت لامي اشرتلهم من وراي ميحجون شي.
لمياء اجت حضنتني رإساً: ياعوبه. اشتاقيتلج شككدد ليش هيجي خليتينه بقلق تليفونج مغلق.
شمه: مريضة مالي خلك.

لمياء: اسم الله عليج حبيبتي والله المكتب بدونج مينطاق واني بقيت بقلق كلت شنو بطلت؟ اليوم اوستاذ مؤيد كال روحوا شوفوها وسلموا عليها.
شمه: الله يسلمه
اجت سرى هم حضنتني وكعدت يمي كالت: ليش متاكلين شمه شوفي وجهج شصاير بي عبالك صارلج سنه مماكلة. خالة جيبي غداها احنه نوكلها.
صاحت على امي.
رغم رفضي بس اصرت هي ولمياء انه اكل حتى لو قليل وامي من فرحتها طلعت للبقية إلى بالسيارة ونزلتهم گوه حتى يتغدون ويانه.

رغم حالتي ونفسيتي بس فرحت بوجودهم ووكفتهم وياي حسيت عندي اهل وعزوه.
كاموا البنات ساعدوا امي وصبوا الغدا وكعدنه كل احنه اكلنه سوه.
شكرتهم وطلبت منهم يشكرون استاذ مؤيد لان طلعهم اليوم من الدوام قبل الموعد علمودي.
بقيت محتارة اداوم لو لا.
بس من كلام لمياء استاذ مؤيد ميعرف اي شي عن إلى صار.
رحت باوعت بالمراية كلت معقولة لهدرجه مبين علي مريضة وضعفانه لدرجة البنات حسيتهم انصدموا من شافوني؟
اكيد.

وجهي جان شااااحب عبالك ميته.
مسكينه امي صار كم يوم تتوسل بيه عالاكل والشرب.
ضميري انبني وقررت ارجع اداوم امي كافي عليها القهر الفات والمصايب الفاتت.
كافي عليها شايله هم اخوي إلى من راح لليوم يتصل يسأل علينه بالسنة حسنة وهم تعبان بالغربة.
كافي قهر شمه بجيتي ودكيتي ولطمتي شراح يتغير إلى صار صار وانتهى المهم ميتكرر.
اليوم إلى بعده داومت.

بس احتاريت شنو اطلعلي من عذر كدام استاذ مؤيد شكوله وين جنت غايبة صار كم يوم؟
بديت يومي كالمعتاد وسط ترحيب وسلام من زملائي.
ومثلما توقعت اول مااجه استاذ مؤيد كلي: صباح الخير. يابه منين طالعة الشمس اليوم؟
ابتسمت كتله: صباح الخيرات
مؤيد: وينج عمي عبالنه انخطفتي من ذاك اليوم من رجعتي وحدج ولليوم
ابتسمت جذب كتله: هو اني انخطفت الا شوية ههه.
مؤيد: هسه نريد نعرف شبيج تليفونج مغلق.

شمه: جنت مريضة وتليفوني وكع وانكسر.
مؤيد: يالله فدوه. المهم الحمدلله على سلامتج بس مبين عليج تعبانه جان لااجيتي اليوم.
شمه: اشكرك استاذ بس اني اصلا محتاجه اداوم واطلع من البيت.
مؤيد: براحتج واذا حسيتي بتعب روحي كولي لاي واحد من السواق يوصلج.
شمه: شكرا جزيلا استاذ.
مر اليوم سلامات الحمد لله بدون اي مشكلة.
اليوم إلى بعده قبل لانطلع للبيت اجه ايوب.
بس شفته ارتبكت وخفت وظليت انطي الوان.

يافشلتي هسه شيكول عني.
هاي الطلعتها من بيت مشبوهه. اويلي عليج شمه. الله لايوفقج هبه.
انوب المصيبة والكارثة طلع هو المشغلني هنا.
ايوب: السلام عليكم
شمه: هاا. وعليكم السلام
حسيته يباوعلي استحيت ماادري هسه شيفكر. اتمنيت الكاع تنشك وتبلعني.
شويه وكلي: شلون صرتي؟
هزيت راسي زينه بدون مااباوعله وكتله: الحمدلله
ايوب: منو جوه يم مؤيد؟
شمه: بس ابو حيدر
دخل للمكتب يالله كدرت اجر نفس.

شلون اكدر اشتغل واني كلما اشوفه اتذكر إلى صار.
صفنت واني افكر بمواقفه وياي.
يعني حاول يبطلني مناك بس شغلني بمكان احسن وراتب افضل وحتى الموظفين احسن. عالاقل ماكو وحده مثل هبه ولااكو احد مثل الحجي.
وركض بأبني للمستشفى ودفع حتى مصاريف العلاج.
وآخر شي جان يريد ينصحج ويكولج ابتعدي عن هبه لان هبة بلا اخلاق.

بس انتي ثوله وعبالج الكل معجب بيج ويزحف عليج وحكرتي الرجال وتالي هم كشفج من جذبتي وانقذج من ابشع موقف ممكن تمر بي اي انسانة شريفة.
هذا الشخص زين بس مشكلته متقلب ومزاجي ومتناقض كل ساعة بحال بس هو بالنهاية طيب.
بعدني افكر وسمعت احد حاجاني التفتت شفت ايوب كتله: نعم؟
ايوب: استكان جاي.
ابتسمت لاول مره حسيته يطلب الجاي بلطف مو بخباثة.
رحت جبت الجاي لكيته كاعد بمكتبي اتفاجأت بس غلست وخليت الجاي كدامه.

ايوب: شكرا
شمه: العفو
شرب الجاي بدون كلام وبعدين دار علي كلي: بعدج تعبانه؟
شمه: لا. مو تعبانه منو كلك تعبانه؟
ايوب: آثار الابر بأيديج. ووجهج شاحب متغيرة.
دمعت عيوني حسيته يلمح للي صار.
شمه: حسبي الله الله ونعم الوكيل
ايوب: على منو؟
شمه: على إلى جان السبب
سكت يمكن ضاج لان ابوه هم مشمول بالاسباب مو بس هبة.
بعدين كلي: انسي إلى صار دفع الله ماكان اعظم.

شمه: مااكدر انسى. ياريت اكدر انسى موتني التفكير حتى بالليل ماانام اكل ماآكل ابني ماادري عنه وامي تعبتها وياي.
ايوب: آني آسف
باوعتله كتله: على شنو؟
ايوب: الظاهر مكتوب علي ابقى اتأسفلج ههه. بس هالمره على إلى سواه الحجي.
بقيت ساكته ماعرفت شرد عليه بعدين كتله: واني هم آسفة
ابتسم كلي: على شنو؟

شمه: لان جذبت وكتلك اني بالبيت مو قصدي إلى فهمته بس اني لان مااحب احد يحجي عني ومااحب احد يعرف اشياء عن حياتي الخاصة وانت اتصلت بالوقت إلى اجت بي هبة فخفت اكولك بعدني بالشركة وتجي وتشوفك هبه او ترجع تتصل بوجود هبه. لان هي قبلها بيوم اتصلت بيه وحلفتني احجيلها اذا بيني وبينك شي.
كلت هالكلمة واستحيت وارتبكت واريد اعرف اكمل حجيي بجملة مفيدة معرفت.
كتله: هي. يعني. عبالها. لان قبل. ذيج المره تتذكر؟

ايوب: شنو؟
شمه: ذيج المره.
ايوب: شصار؟
شمه: انت طالب رقمي منها فهي عبالها اكو شي.
محجه شي ولا علق بالبداية. بعدين كلي: وهو اكو شي؟
بلعت ريكي ودرت وجهي.
ايوب: شمه؟
شمه: نعم استاذ؟
ايوب: كاعدين بصف احنه؟
شمه: لاء
ايوب: المهم قبل كل شي ردت اعتذر هالمره عن الجملة والحجي إلى حجيته كله بذاك اليوم.

اعرف انتي مو مثل هبه ومتأكد بس من عصبيتي حجيت بدون وعي كتلج قبل اني احس انتي مسؤوله مني لذلك مو قصدي كل الكلام إلى كلته جدا آسف.
شمه: ماله داعي تعتذر اني استحقيت كل الحجي اني غلطانه، اني جانت ثقتي بيها عمية.
ايوب: يعني طاح الحطب؟
شمه: لاا
ايوب: ليش؟

شمه: كل إلى كلته إلى وقصدتني بي آني شخصيا ممكن اتقبله واكول استحقاقي واسامحك لان لوما انت جان اني ميته هسه لان لو صار شي بذاك اليوم ولو بسيط اكيد اني راح اموت نفسي. بس إلى مااكدر اسامحك عليه هو من كتلي ماعندج عشيرة.
هاي مااكدر انساها ولااتغاضى عنها.