قصص و روايات - قصص رومانسية :

رواية صراع الجبابرة للكاتبة روز الفياض الفصل الرابع عشر

رواية صراع الجبابرة للكاتبة روز الفياض الفصل الرابع عشر

رواية صراع الجبابرة للكاتبة روز الفياض الفصل الرابع عشر

سكت بعدين كلي: وتتصورين العشيرة تفيد؟
شمه: لوما تفيد جان ماعيرتني بيها.
ايوب: مو قصدي اعيرج. اعيرج واني اعرف وضعج وظروفج؟ وماكو انسان ماعنده عشيرة بس كتلج ساعة عصبيه ويمكن لان مالي حق عليج ردي عليج كان بس كلام لو انتي مرتي صدك جان الله يعلم شسويت بيج.
فتحت عيوني صار بيها مرتي عركت وسحبت ورقة وظليت اهفي على وجهي هذا اليوم ماخذه الواهس..
شمه: حصل خير.
غير هالكلمتين مكدرت احجي من المستحه.
سلم وراح.

وره مطلع يمكن بدقيقتين دك تليفوني مسج فتحته شفته هو كاتبلي: آسف.
ضحكت، ادري بي متعمد لكن هالمره فشلة اغلس لازم اجاوبه كتبتله: على شنو؟
رجع دزلي: ماادري
شمه: اكو واحد يتأسف على شي ميدري شنو هو؟
ايوب: هو احنه حجينه كله أسف واعتذرات لو تتعاركين وياي.
شمه: آني؟! مو انت يعني إلى تطلع مشاكل من جوه الكاع؟
ايوب: قابل متقصد؟ انتي تستفزيني.
شمه: صحيح حقك علي والدليل كل مااشوفك اريد جاي!

ايوب: ههههههههههههههههههههههههههههههه جرسكم ميشتغل شسوي يعني.
شمه: صحيح يحتاج بصمة بس ويه استاذ مؤيد يشتغل!
ايوب: ههههههه ماادري بي عالبصمة محد كلي بس هم غلطتج مو انتي السكرتيرة المفروض تكوليلي تره هيجي وضعه هههههه.
شمه: هسه بعد عرفت مالك عذر.
---
ايوب.
بعد اللي صار الحجي اختفى. سافر.
طبعا لان بآخر مشكلة وفضيحة سواها امي شرطت عليه ميرجع للبيت بعد لو لا تدخل عمي واني حجيت وياها.

هالمره اذا عرفت مستحيل تقبل برجعته.
خطية هي وينها ووين هيجي اخباار وهي بهالحالة.
رحت لبيت عمي اشوف اموري بس لكيت منى كالبة خلقتها.
مسألتها شبيج مالي خلكها.
من ردت اطلع كتلها: شوكت تطلعون من الاربعين؟
منى: ليش؟
ايوب: حتى اجي عليكم آخذكم للبيت.
منى: يابيت؟
ايوب: القصر الرئاسي. بيتنه بعد يابيت.
منى: منرجع. لتجي علينه.
ايوب: امي تريد تشوف اموري
منى: منرجع.
ايوب: يعني شنو منرجع؟
منى: يعني منرجع.

ايوب: ليش يابه مترجعين؟
منى: ايوب اني تعبت. اريد اسكن وحدي اريد بيت خاص بيه.
ايوب: يايابه. تعبت وتريد بيت وحدها. ومنين تعبتي بلا زحمة؟
منى: يااخي اريد مكان خاص بيه اريد ارتاح اريد انام براحتي ميصير خواتك يومية وحده جايه هي وجهالها فيلق.
ايوب: وانتي شمسويتلهن خادمتهن؟ طابختلهن؟
منى: ماارتاح.
ايوب: هسه؟ شوكت اجي عليكم؟ خلصيني.
منى: كتلك لتجي. من تلكه بيت تعال.
ايوب: معناها ابقي هنا عد اهلج لان بعد مااجي.

عفتها وطلعت.
هذا الناقصني شوفلي بيت تعبت. وامي شلون اعوفها؟
يعني اعوف امي وحدها بالبيت علمود انتي ترتاحين؟
طاح حظج.
رجعت للبيت افكر هاي هبة شراح اسوي بيها؟
اتذكرت ولد صديقي ضابط شرطة.
دكيت عليه: الو مازن. شلونك؟
مازن: هلوو. هلوو حبيبي ايوب شلونك؟
ايوب: محتاجك بشغلة
مازن: كول
ايوب: بس مااريد احد يعرف بيها ابد
مازن: صار. شنو كول؟
ايوب: اكو وحده ادب سز اريدك تخوفها.
مازن: سهلة. شمسوي؟

ايوب: جانت تشتغل عندي بس عرفت عنها سوالف طايح حظها.
تجر رجلين الموظفات لوحدة عجوز عدها بيت وتشغلهن بالسوالف ذيج.
مازن: هاا. سهلة انطيني اسمها ورقمها. تريدني بس اخوفها لو آخذ الجماعة واروح اسحلها هي وجماعتها؟
ايوب: اني الاريده تخوفها اريدها بعد متطلع من باب البيت.
مازن: اعتبره تم.
سديته من مازن اتنهدت.
دزيتله اسمها ورقمها وحتى العنوان.

رحت مريت على مؤيد لان مالحكت احجي وياه علمود نوارس دوختني بأتصالتها لان ميحجي وياها.
بس مكدرت احجي وياه لان يمه زبون.
بس اول مفتت المكتب شفت شمه.
مبين عليها مريضة. جانت غايبة صار كم يوم.
حقها إلى صار مو شي عادي.
اتعمدت مااسأل عنها من جانت متداوم. مااريد افرض نفسي عليها وكافي البلوة إلى سواها ابوي.
وحتى من شفتها دخلت كبل لمؤيد بس ماادري ليش مكدرت اطلع قبل مااحجي وياها واخذ مابخاطرها.

كاعدة تكتب ايديها بيها أثر ازرك اكيد اثر ابر او مغذي.
اي طبعا لان وجها شاحب اكثر من قبل واحسها ذبلانه.
حبيت الطف الجو ادري بيها تضوج من اطلب منها جاي لذلك طلبته.
هالمره معلقت.
حجيت وياها واعتذرت بس بقيت احس بالخجل من ابوي وسوايته.
كلما اتذكر من حجتلي على هبه اضحك.
استحت واحتارت شلون تكول هبه عبالها اكو شي بينه هههههه واحلى شي من غلست من سالتها اكو شي؟ هههههه
هالبنية مثل الطفلة تزعل بكلمة وترضى بكلمة.

المشكلة كلما احجي ويه نفسي وانهر نفسي عن التواصل وياها الاكي نفسي رأساً مطلع التليفون ومراسلها.
---
شمه.
ذلك الالم الذي يسكن في صدري ويحرق انفاسي.
بدأ يتبدد بعد ان تكلمت مع ايوب. احسست بالطمأنينة والامان. فربما هو مختلف عن والده؟ بل ذلك اكيد. انه مختلف تماماً لقد انقذني من براثن تلك الصديقة التي لطالما كانت اختاً لم تلدها امي.
بعد ان اوضح لي انه مختلف وانني مسؤولةٌ منه.

احسست بالراحة فلا مبرر لخوفي منه ولامن غيره.
اعتقد انني بدأت افهمهُ.
وربما هو ايضا بدأ يفهمني. فأنا لستُ سيئة.
أنا فقط اجد صعوبةً في التعامل مع العالم الخارجي.
بالليل نومت آدم وكعدت اكوي ملابسي سمعت تليفوني دك.
خلصت كوي وعلكت ملابسي وأخذ تليفوني ورحت اباوع عالتلفزيون.
فتحت تليفوني لكيت مكالمة فائتة من ايوب.
دزيتله مسج: مرحبا استاذ. متصل علي؟
مجاوب.

رحت للمطبخ جبت صحن فاكهة ورجعت كعدت كالمعتاد ادورلي فلم عربي قديم حتى اعيش الماعشته بالواقع.
وصلني مسج من ايوب: هلو شمه
لا بالغلط اتصلت
شمه: اوك
ايوب: شلونج؟
شمه: الحمدلله زينه
ايوب: شلون الحجية؟
شمه: الحمدلله زينه
ايوب: شلون صرتي؟
شمه: شنو شلون صرتي؟
ايوب: مو مريضة انتي؟
شمه: جنت
ايوب: يعني صرتي زينه؟
شمه: الحمدلله احسن
ايوب: شنو جان عندج؟
شمه: تيفوئيد
ايوب: لا والله؟
شمه: هههه لا جذب. هبوط بالسكر.

ايوب: اُفف. سلامتج ديري بالج على نفسج.
شمه: الله يسلمك. الله كريم
ايوب: شمه بما انه احنه اصدقاء اريد اخذ رأيج بموضوع.
شمه: مو كلنه ماكو صداقة بين الرجل والمرأة.
ايوب: ماعندي احد آخذ رأيه غيرج
شمه: افحمتني هههه اوك كول.
ايوب: اكو بنية وياكم اني معجب بيها واريد افاتحها بموضوع اعجابي بيها بس محتار شلون احجي وياها.
بلحظتها كلت شوف هذا هو هذا هم موضوع تريد تاخذ رأيي بي. شانصحك بالله؟

منو هاي المعجب بيها سرى متزوجة معقولة لمياء؟
اي هي حلوة وكشخة..
كتبتله: ميخالف احجي بصراحة يعني؟
ايوب: اي طبعاً
شمه: يعني اذا انت قصدك شريف مابيها شي حاجيها كبل وكوللها اريد اتقدملج بس اذا انت تريد يعني..
ايوب: اريد شنو؟
شمه: تقضي وقت وتسولف وتضحك وياها وبعدين تعوفها فأني اكول عوفها واصرف نظر احسن لان اللعب على بنات الناس حرام.
ايوب: اني مااريد العب عليها. اني فعلا معجب بيها بس اريد اتعرف عليها اكثر.

شمه: والله ماادري استاذ انت اعرف بنفسك.
ايوب: وهي؟
شمه: منو؟
ايوب: البنية
شمه: لمحلها اذا قبلت كان بها واذا لا بعد انت صاحب القرار.
ايوب: يعني اتبع نصايحج واروح؟
شمه: لا. هو اني لو اعرف انصح جان نصحت نفسي.
ايوب: ههههههههه لعد صار ساعة تفتين بشنو؟
ضحكت صدك اذا اني مااعترف بنصايحي المن صار ساعة انصحه وافتي بالموضوع هههههه.
شمه: يعني على اساس اسوي نفسي خبيرة بالعلاقات هههههه.
سكت مجاوب.
اشوفه متصل بس مكيتب شي.

وره كم يوم اتصل بيه اني جنت طالعة للسوك اني وامي فخليت التليفون صامت.
رجعنه للبيت جنت اعزل المسواك واندك الباب.
امي طلعت شوية ورجعت كالت: شمه اكو مره بالباب ووياها ولد شاب تكول جايتكم خطار ركضي فتحي باب الصالة.
شمه: يامره؟
امي: مااعرفها. روحي بسرعة فتحي الباب عيب.
رحت فتحت باب الصالة ورجعت للمطبخ اباوع من الشباك اريد اشوف منو اجه.
شفت مره جبيرة دخلت بس محد وياها.
رحت كملت غسل الفاكهة والخضروات.

اجت امي كالت: شمه ماما عصير فد شي عيب المره غريبة.
شمه: هسه.
صبيت العصير واخذته. دخلت سلمت وقدمت العصير كلتلي: انتي شمه؟
اتعجبت وين تعرفني؟
ابتسمت كتلها: اي اني شمه.
كالت: حلوه اللهم صل على محمد وآل محمد
امي: صليتي على نبيج.
استحيت شنو الفلم؟
ردت اطلع اروح اكمل شغلي كلتلي: وين رايحة لعد اني المن جايه غير حتى اشوفج.
باوعت لامي مستغربه وامي هم نفس حالتي متعرف شنو القصة؟
كعدت بصف امي.
امي: اهلا وسهلا.

كالت: اهلا بيكم. والله صار فترة ناويه اجي بس الظروف. عاد اليوم كلت مابيها مجال لازم اروح واشوف الحلوة.
امي: كل الهلا بيج نورتينا.
باوعتلي كالت: اني ام وائل.
كلت بكلبي: يمه.
امي تباوع متعرف شنو القصة.
شمه: اهلا بيج خالة
ام وائل: ذابحني بيج وائل ياشمه وياشمه. خطبيلي شمه واحب شمه.
امي: وائل منو؟
ماادري ارد على امه ماادري ارد على امي.

امه جايه حامية شنو هالحجي كدام امي شنو هالميانه وامي احسها راح بالها لوييين.
ظلت تمدح بوائل واخلاقه فوك النص ساعة واني وامي ساكتين ونهز راسنه.
آدم جان نايم وكعد يبجي.
امي: ابنج كعد كوميله.
كمت لآدم جبته ورجعت.
ام وائل: هذا ابن اخوج؟
باوعت لامي متعجبه مو توها امي كالت كدامها ابني؟
شمه: لاخالة ابني هذا.
امي: هذا أدومي حبيبي بيبي.
ماادري شصارلها المره ظلت بس ساكته لاحجت بعد ولانطقت.

بقت كاعده وتباوعلنه وتالي سلمت واترخصت.
بعدما طلعت امي نزلت بيه تحقيق: منو وائل؟
شمه: السايق الجان يوصلنه من جنه بالشركة القديمه.
امي: ليش محاجيتلي عنه؟
شمه: شحجي ماكو شي احجيه.
امي: اجه خطبج هيجي بدون علمج وموافقتج؟
شمه: هههه اصلا بس حاول يفتح الموضوع كتله لا بعد ياموافقة.
امي: وشبيها امه؟
شمه: شبيها؟
امي: اشو حجت بالبداية وبعدين طلعت فجاة بدون كلام ولافهمتنه الموضوع إلى جايه علموده؟

شمه: شمدريني. بعد احسن
امي: خاف يجي ويحاول يحجي وياج كوليله لا زوجي توه متوفي. عيب شتكول علينه الناس.
شمه: ماما اعرف هالحجي اعرف عيب واني اصلا ممفكره بعد اتزوج لتخافين.
ظليت اليوم كله افكر بالله وائل من كل عقله؟
فشلني ويه امي. امي على كدما هي طيبه وحنونه بس هي على كولت المصريين دأه أديمه من الطراز القديم كللش تهتم للعيب والاصول وكلام الناس.
بالليل بقيت كاعدة بفراشي وافكر هبة هسه شخبارها؟

ياترى اتحسفت وندمت لو عادي عدها خسرت صديقتها؟
جنه متواعدين اني ولمياء نشوف فلم سوه بالتلفزيون. باوعت للساعة ب( 10 ) ونص معناها بدا الفلم خل ادزلها مسج.
شمه: أُوستاذه لمياء تره بدا الفلم
لمياء: يالله هسه ادور القناة
شمه: احلى مابالفلم هو البطل
لمياء: وععع محلو.
بهالاثناء شفت مسج وصلني من استاذ ايوب.
فتحته شفت كاتبلي: هلو
شمه: هلو بيك استاذ
ايوب: ست شمه خو منايمة؟
شمه: لا.

رجعت كتبت للمياء: طيري. شوفي شلون عضلات شلون شخصية شلون خلقة
لمياء: اكره المعضلين
شفت مسج من استاذ ايوب فتحته بس مقريت شنو مكتوب جنت اضحك على لمياء ومركزه وياها فرأساً كتبت: هو انتي هسه حاصلج هيجي واحد وعنده هيج عضلات.
ملتهيه اضحك واكرر بصوت عالي واتخيل لمياء من تصير عصبية بس انصدمت بالرد: منو هذا ابو عضلات الصعب المنال؟
باوعت كلت هاي شتخربط؟
يمه.!
اني المن دزيت المسج؟ لايوب!

يافشلتي يافضيحتي، هسه يكول تدور معضلين صخام!
ظليت مخلوسه من فشلتي.
رجعت على لمياء كتلها: خرب يومج سويتلي مصيبه
لمياء: شسويتي؟
شمه: كتبتلج هو هسه انتي حاصلج هيجي واحد وعنده عضلات ودزيتها لاستاذ ايوب..

سكتت لمياء بعدين دزتلي: ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه حل بيج هههههه تحجين صدوك؟
شمه: شوفي هاي بالله هسه وكت شقه واني ميته من الفشلة وماادري شنو ارد عالرجال، دبريني لج شسوي؟
لمياء: وعلى شنو الفشلة كوليله بالغلط.
شمه: والفشلة؟
لمياء: شبيها؟

شمه: هسه يكول تدور معضلين. خرررب خرررب.
رجعت لمحادثة استاذ ايوب كتبتله: هاا استاذ بالغلط دزيت المسج جنت احجي ويه لمياء وانت راسلتني فخربطت بينكم.
ايوب: اممم. ومنو هذا ابو عضلات؟
شمه: بطل الفلم.
خررب. خررررب. الفشلة الزينه.
ايوب: اممم. زين بس مجاوبتيني.
شمه: على شنو؟
ايوب: اقري فوك.
رجعت قريت شنو كاتبلي بأول المحادثة.
كاتبلي: هلو شمه باجر راح امر عليكم بالشركة واريد احجي وياج.
رجعت كتبتله: بشنو؟

ايوب: محتاج مساعدتج
شمه: بشنو؟
ايوب: بشغلة باجر من امر على مؤيد ان شاءالله اكولج.
شمه: اوك استاذ. ان شاءالله
ايوب: اتصلت عليج العصر بس مجاوبتي؟
شمه: جان عدنه خطار
سكتنه شوية بعدين كتبلي: شسمه الفلم إلى تحجون عنه؟
ضحكت. كتبتله اسم الفلم وكتبتله: هسه طالع حلو خوش فلم.
ايوب: منو الفلم لو البطل ابو عضلات؟
ضحكت بس من فشلتي غطيت وجهي بايدية.

لمياء تدز تعليقات عالفلم واني مغلسه مااجاوبها اخاف اغلط واجفص مره اللخ بينها وبين ايوب.
شمه: لا الفلم هههه.
ايوب: شنو قصته؟
شمه: انت بالبيت؟
ايوب: اي. ليش؟
شمه: حتى تخلي على قناة، وتابع ويانه.
ايوب: ماشي.
شمه: لكيته؟
ايوب: اي. طلعته. احجيلي قصته بالله.
كعدت احجيله قصة الفلم وماانتبهت للوقت لحدما خلص الفلم وراح واحنه نسولف عن افلام هذا الممثل وادواره.
باوعت للساعة شفتها بالوحدة وثلث!

كتبتله: الساعة بالوحدة وثلث.
ايوب: ادري. نعستي؟
شمه: يعني لان اني انام من ارجع من الدوام. بس لازم انام لان ورانه كعده الصبح بالسته.
ايوب: صحيح. حقج. سهرتج اليوم لان اني متعود اسهر بس عالاقل اليوم شفت فلم بدل مااكعد يومية وحدي ادخن.
شمه: معناها يومية راح اذكرك عالفلم حتى متدخن بعد.
ايوب: على ايدج. بس صعب إلى يدخن يبطل.
شمه: نحاول
ايوب: نحاول. يالله تصبحين على خير
شمه: وانت من اهله.
بس منمت.

ظليت افكر شنو إلى جاي يصير؟
ليش اني احجي وياه عادي؟
اني مو كتله ماكو صداقة بين الرجل والمرأة؟ لعد شنو هذا؟
شمه انتبهي لتصرفاتج يبقى رجال ويبقى غريب لتطوخيها وياه ضحك وسوالف.
تره هسه يكول عليج خفيفة.
والله بلوه ارد اتورط ماارد هم اتورط.
لالا فعلا انتي مو طبيعية. لعد اشمعنه وائل حظرتيه وجنتي تتضايقين من يراسلج لو يتصل بيج؟
بس وائل لزكة. واتجاوز علي بالكلام.
هذا ثكيل مؤدب وساعدني هوايه.
اكول انجبي انجبي.

على اساس مااتجاوز عليج مو هذا إلى داس ابطنج وهم كلج شعندج ويه وائل.
لايكون؟ احترمي نفسج ولزمي حدودج سمعتي امج شكالج من اجت ام وائل.
بعده زوجج مصارله هواي من اتوفى. عيب عليج.
اتنهدت واتعوذت من الشيطان ونمت.
بالدوام جنت كاعده اتغده ويه لمياء ودخل استاذ ايوب كال: السلام عليكم
ردينه السلام
ايوب: ها لمياء شلونه بطل الفلم؟
لمياء: هههههه محبيته بس هاي شمه انعجبت بي.
وكفت اللكمة على كلبي من سمعتها كالت هيج.

شمه: الله ياخذج.
لمياء: لتستحين من اوستاذ ايوب هذا اخونه.
ضحك ايوب على كيف وبعدين كلي: مؤيد موجود؟
شمه: اي بالمكتب.
فات جوه للمكتب واني رحت اغسل.
رجعت لمكتبي وره تقريبا نص ساعة طلع كلي: شمه فارغة هسه؟
شمه: جاي؟
ضحك شوية بس شكلة جان ضايج كلي: لا مااريد بس ردتج بموضوع؟
شمه: اي اي نسيت.
ايوب: معناها انتظرج بالمطعم المقابليكم.
وراح.
ياا؟ هذا من كل عقله اروح وراه للمطعم؟
عبالي راح يحجي هنا.
هسه شسوي؟

شلون اطلع شكول لاستاذ مويد؟ وين رايحة بوقت الدوام؟
ظليت كاعده بمكاني وافكر محتارة.
بعدين كلت خل اتصل بي احسن.
طلعت التليفون واتصلت بي.
اول مادك شاله: هلو شمه؟
شمه: هلو استاذ
ايوب: شكو؟
شمه: استاذ يعني شلون اطلع من الدوام؟ شكول لاستاذ مؤيد؟
ايوب: لتكوليله شي هو هسه شوية وراح يطلع بعدما يطلع تعاي.

بقيت ساكته حسيت هاي مثل خطط الحراميه فعلا خلال دقايق طلع استاذ مؤيد وكلي: اي احد يجي كوليله على باجر لان احتمال اليوم مااكدر ارجع عندي شغلة خاارج بغداد وراح اتأخر.
شمه: اوك استاذ.
بعدما طلع رحت على لمياء كتلها: لمياء صديقاتي اليوم مجتمعات بهذا المطعم راح اروح اشوفهم مادام ماعدنه شغل واستاذ مؤيد طلع اوك؟
لمياء: اوك
طلعت واني خايفة احد يشوفني وافكر شلون اذا رجع استاذ مؤيد؟

هسه يكول طلعت بدون علمي وموافقتي.
لا ميرجع.
دخلت للمطعم شفت استاذ ايوب كاعد رحت واني مستحيه سلمت وبقيت واكفة كلي: ليش واكفة؟
شمه: مو زحمة كعدتنه هنا؟
ايوب: محد يشوفنه كعدي دنيا الظهر محد يطلع كلمن بشغلة.
كعدت بس احس عبالك الكل يدري بيه طالعة من الدوام والكل يعرفني ويعرف هذا رجال غريب عني.
ايوب: نتغدا؟
شمه: لاشكراً هسه اتغديت.
ايوب: معناها عصير لو جاي؟
شمه: لا ولاشي اني طالعة من الدوام ومااريد اتأخر.

ايوب: ادري.
أشر للگرسون وطلب اثنين عصير.
ايوب: اي شمه؟
شمه: اي استاذ؟
ايوب: شمه كتلج قبل يومين اكو بنية وياكم عاجبتني.
هزيت راسي اي.
ايوب: كلتيلي احجي وياها وشوف شتكول.
شمه: صح
ايوب: شمه؟ شنو رأيج بيه؟
شمه: رأي منو؟ اني؟
ايوب: رأيج انتي بيه؟
شمه: من اي ناحية؟
ايوب: انتي هسه اتصور احنه صرنه قريبين من بعض مؤخراً مو صح؟
هزيت راسي اي
ايوب: يعني اذا انتي صديقتها البنية وسألتج عني لو سألتج شنو رأيج بيه شتكولين؟

شمه: والله. يعني الصدك الصدك. جنت اكرهك.
ابتسم. كتله: بس يعني موخراً على كولتك صرنه اصدقاء فأحس جنت ظالمتك يعني انت خوش انسان صح تصيح وعصبي وتحب ترزل بس يعني بعدين تتحسف وتعتذر وهاي من صفات الانسان الطيب.
ضحك عالى كيف كال: يعني تشجعيها ان توافق على الارتباط بيه؟

شمه: بصراحة. اني مااحب اتدخل بهيج مسائل بس لو صديقتي وطلبت نصيحتي اكيد راح ازكيك كدامها اتصور اني اكثر وحده اعرفك من بين بقية الموظفين بحكم المواقف إلى صارت بينه.
هز راسه كال: جيد.
جابوا العصير وسكتنه.
بعدها كتله: خلص؟ اكدر اروح؟
ايوب: لا. ليش مستعجلة بعدنه لاشربنه العصير ولا حجينه.
شمه: ماحجينه؟
ايوب: لاا. شربي العصير بالاول.
شربت شويه واني اهز برجلي من التوتر اريد ارجع قبل ميشوفني احد.

ايوب: شمه انتي خوش بنيه.
شمه: شكرا
ايوب: مؤدبه وخلوقة
شمه: امم؟
جنت اشرب عصير.
ايوب: اتصور اني حبيتج.
وخرت العصير قبل لااغص كتله: هااا؟!
يباوعلي كأنما منتظر مني رد. يارد هذا واني احس نفسي في برنامج الكاميرا الخفية.
ايوب: اشوفج سكتي؟
شمه: تحجي وياي؟
ايوب: اكو شمه غيرج؟
شمه: لاء.
بقى ساكت واني ساكته. بعدين كتله: المطلوب شنو؟
ايوب: ماكو مطاليب. واحد معجب بوحده وصارحها بمشاعره شنو لازم يكون الرد؟
شمه: ماادري.

ايوب: ليش خفتي وانرعبتي؟ مو انتي كلتلي حاجيها وشوف شتكول؟
شمه: اتصورتك تقصد لمياء
ايوب: اشمعنه لمياء؟
شمه: لان سرى زوجة محمد واني ارملة وعندي ولد.
ايوب: وشنو يعني؟ واذا ارملة وعندج ولد؟
شمه: انت دتضحك مو صحيح؟ تريد تختبرني لو شنو؟ لو هي إلى يتوفى زوجها لو تطلك معناها تكفر؟ شنو قضيتكم فجأة صارت الارملة حلوة وعادي تحبون وتتزوجون ارملة وجماله عدها ولد؟

مصدكت الحجي إلى سمعته كلت هذا حاله حال الكل شافني ارملة كلك العاب عليها يومين. واتذكرت فلم وائل البارحة نفس الشي وماادري امه ليش اجت وحجت وبعدين طلعت تركض.
صرت عصبيه من الخوف وحاولت ابين شجاعة.
ايوب: منو تقصدين؟ يعني هو غلطي لان حجيتلج الصدك؟ منو فاتحج بموضوع زواج؟
شمه: كلكم
ايوب: كلنه منو؟ واحد من الموظفين؟
هزيت راسي لا
ايوب: لعد منو؟ مؤيد؟
شمه: لااا
ايوب: معناها وائل مو صح؟

سكتت. كال: شمه. انتي حره بأختيارج سواءاً اختاريتني او اختاريتي غيري بس اقسم بالله مو لعب مشاعري تجاهج مو لعب.
مراح افرض نفسي عليج اكثر اني كلت كل إلى عندي.

الفصل التالي
جميع الفصول
روايات الكاتب
روايات مشابهة