رواية صراع الجبابرة للكاتبة روز الفياض الفصل الخامس عشر
ظليت اباوعله واني حايره شجاوبه..
ايوب: شمه انتي حاسه بيه صح؟ حاسه بتلميحاتي الج نظراتي تصرفاتي وياج كلها مختلفة وواضحه. لتكولين محسيتي. بس انتي تغالطين نفسج. يمكن علمود إلى صار إلى سواه الحجي؟
انتي خايفة مني تتصورين اني مثله مو صح؟
شمه: لا ادري بيك مو مثله.
ايوب: لا، بعدج خايفة. شوفي شمه، اني بحياتي مكعدت هالكعده ويه بنية ولاحجيت هالحجي ولاحسيت بهالمشاعر بس وياج. لتاخذيني بذنب الحجي.
بقيت ساكته شويه بس بعدين كتله: استاذ هذا الحجي عادي لو انت حاجيه لبنية عادية ممتزوجة او يجوز مطلقه او حتى ارملة هم نكول ميخالف بس ما عدها طفل.
ايوب: يعني انتي حسيتي بيه؟ زين ليش تنكرين؟ ليش متحجين مشاعرج؟
شمه: اذا اكو مشاعر راح ادوس عليها.
اني مو مثل باقي البنات اني شخص واقعي جدا اعرف حدودي كللش زين واعرف لاي حد مسموحلي بالحياة احلم واعيش.
مااكدر اتجاوز المجتمع علمود مشاعر.
ايوب: اي مجتمع؟ شعليه المجتمع؟
شمه: خل نفترض انت هسه تحبني واني احبك وبعدين؟ تكدر تتزوج وحده عدها ولد؟ طبعا لا لان اهلك مراح يوافقون وحقهم ماالومهم فلذلك ليش اتعب نفسي واضحك على نفسي والعب دور الحبيبة كم يوم حتى اتعذب لاخرعمري؟
ايوب: وانتي ليش مستسلمه لهدرجة للمجتمع واهلي واهلج؟ شمه اني مو زغير حتى اخاف من رد فعل اهلي لو اهلج اني احبج معناها اعرف وضعي ووضعج كلش زين وحاسب حسابي.
شمه: مو مستسلمه بس هذا الواقع. واني تعبت بحياتي ومرت على راسي بلاوي لذلك ماعندي طاقة اتحمل عذاب وقصة جديدة اني عندي ولد محتارة بعيشته مااكدر اجازف وانسى نفسي وانسى مسؤولياتي علمود مشاعري.
ايوب: يعني عندج مشاعر تجاهي بس متردين تعترفين. بس اني مااكدر اتراجع عن كلامي وموقفي لان اني من حبيتج حسيت بشعور مختلف لذلك صعب اتراجع عن كل هذا.
شمه: ماعندي اي شي لامشاعر ولاغيرها. استاذ الله يخليك سد هالموضوع اني مو كده.
كمت ردت ارجع للشركة وكتله: اني تأخرت لازم ارجع اعذرني.
مجاوبني..
---
---
ايوب.
كل كلامها وتصرفاتها تكول عدها مشاعر تجاهي بس متقبل تكول
خافت.
رفضت لان متصورة اني ممتزوج فأهلي شلون يقبلون اتزوج وحده ارملة وعدها ولد. حقها تفكر هيج.
اخاف اكوللها متزوج وتصر على موقفها اكثر؟
لا مراح احجي شي هسه عالاقل لحدما تصدكني.
شلون اكدر اخليها تصدك بيه وتأمنلي؟
رحت وراها للشركة لكيتها كاعدة بمكتبها وصافنه.
فتت كبل لمكتب مؤيد لان بعدني مكملت حجي وياها.
صحت عليها. اجت كالت: نعم؟
ايوب: كعدي
شمه: استاذ فدوه الله يخليك كافي
ايوب: اكو شغلة مهمة نسيت اكولج عليها.
شمه: شنو؟
ايوب: انتي بعد متكدرين تداومين هنا.
حسيتها انصدمت وظلت تباوعلي بس كلت خل العب بأعصابها شويه واشوفها شتكول ياالله بعدين احجيلها الموضوع.
شمه: يعني شنو؟ ليش؟
ايوب: هيج.
شمه: شنو هيج لعب هو؟
ايوب: لا مو لعب بس خلص متكدرين تبقين هنا بعد
شمه: ليش؟ شسويت؟
ايوب: مسويتي شي
شمه: انت كلت لاستاذ مؤيد يبطلني مو؟
مجاوبتها.
شمه: طبعا والله العظيم عرفتك كلت هسه يكوله بطلها. نحيس ماادري ليش تحب تأذيني.
ايوب: مو هيج الموضوع
شمه: مو هيجي؟ لا اني اكولك هيجي يجوز كتله وحده مو زينه لكيتها ابيت مشبوه بطلها. بعد انت جايبني ومشغلني هنا اكيد يسمع كلامك ويصدكك غير صديقك المقرب طبيعي يثق بيك.
ماادري اضحك ماادري ازعل من كلامها بس بالنهاية عذرتها كل كلامها وتصرفاتها وتفكيرها بخوف.
تخاف من الناس.
تخاف من الحاجه.
تخاف لان ماعدها احد.
انقهرت عليها.
بس من كالت صديقك المقرب ويثق بيك ضحكت.
من حسيتها راح تبجي كلت كافي خطيه: صديق منو؟ تره مؤيد ابن عمي.
شمه: جذب. مو نفس اسم الجد واللقب
ا
يوب: ابوي وعمي اخوان بس من جهة الام.
شمه: جذاب!
ضحكت على كيف كتلها: انعم الله عليج. بس والله ابن عمي. ولا كتله يبطلج ولاشي ولا يريد يبطلج هو اصلا بس اكو شي صار لذلك اني شفت انه الانسب متداومين بعد هنا.
شمه: اكو شي صار. شنو هو بالله؟ إلى صار قبل شويه بالمطعم؟
ايوب: تره طوختيها شمه.
شمه: طوختها!
ايوب: يعني مره تكولين حجيتله وكتله يبطلج ومره تكولين كتله هاي جايه من بيت مشبوه وهسه تكولين إلى صار بالمطعم؟ شقصتج؟
قبل شويه جنت خوش انسان اول ماحجينه بالمطعم هسه طلعت قطاع ارزاق وماعندي غيره احجي بسمعتج كدام الناس وابتزج؟
شمه: فسرلي انت معنى كلامك كولي ليش مااكدر اشتغل هنا بعد شنو السبب الغامض إلى تريد تبطلني علموده؟ هسه انت تحجي وتناقض نفسك تريد تطلعني غلطانه كوه.
كمت سديت الباب ورجعت كتلها كعدي. هزت راسها لا.
وكفت مقابيلها كتلها: مؤيد متزوج اختي. واختي من النوع العقلها زغير وتلح هواي وتسوي مشكلة على اقل شي.
رفعت حواجبها بس محجت شي.
ايوب: هي شايفتج قبل فتره من جايه وياه وصايرة بينهم مشكلة.
شمه: ليش اني شسويت حتى تصير بينهم مشكلة؟
ايوب: مسويتي شي هي هاي عقليتها متقبل يشغل سكرتيره الا اذا متزوجه او جبيرة بالعمر.
شمه: هو هذا حظي. وين اروح يعني؟ وين اولي حتى اكدر اعيش؟!
حسيتها راح تبجي كتلها: هو ميدري باقتراحي لان شخصية مؤيد مو من النوع إلى يسمع لمرته او لاحد يعني مادام شغلج زين ومقتنع بيج محد يكدر يأثر عليه بس اني اعرف اختي راح تطلع روحه واني مااريدج تتأذين لان هالشي هذا اكيد راح ينعكس بسلوكه بالدوام.
شمه: الله كريم.
ايوب: هذا الشي لمصلحتج
شمه: وينها مصلحتي واني يوميه بمكان لسبب مالي كل ذنب بي.
ايوب: لتفكرين اعتبري نفسج بأجازة كم يوم وراتبج كامل كلها كم يوم وراح اشوفلج غير مكان ان شاءالله.
شمه: اشكرك. ماله داعي اني ادبر نفسي.
رادت تروح لزمتها من ايدها كتله: شنو تدبرين نفسج شتسوي يعني؟ شمه انتي تفتهمين الكلام إلى كلته الج قبل شويه؟ تفتهمين يعني شنو احبج؟
سحبت ايدها وابتعدت شويه وكشت كالت: تحبني. تكطع رزقي؟ هاي شلون رهمتها؟ شتريد مني؟
ايوب: اريد افتهم انتي ليش تخافين مني؟ كل المواقف إلى مرت بينه على كولتج وبعدج تخافين؟
شمه: الكلام ماعليه ضريبة
ايوب: يابه اني جذاب مثلما كلتي. ابقي داومي لحدما احصلج شغل ثاني. ماشي؟
بقت ساكته.
ايوب: شمه شبيج؟ صدكي مااعوفج ولااتخلى عنج اني وياج لتخافين اعتمدي علي.
شمه: معتمده على الله
ايوب: ونعم بالله.
افضل حل انه تطلع منا متبقى تداوم هنا لان اذا بقت ممكن تعرف مو بس مؤيد متزوج اختي.
احتمال تعرف اني متزوج اخته هم.
---
---
شمه.
معقولة احبه؟
لا.
صحيح نحجي ونسولف بس لان ارتاحله.
وهو هذا الارتياح معناها تحبيه ياثوله، رجعي لعقلج عيب.
انوب شنو هاي قصة اخته المتزوجة استاذ مؤيد؟
يحجي صدك هذا لو بس يريد يسوي نفسه صاحب فضل عليه؟
او يمكن يريد يشغلني بمكان ثاني حتى يستفرد بيه؟
اووف والله عقلي تعب من التحليل والتفكير هذا منين طلعلي.
جان بقيت مغلس وساكت الا تحجي.
من كل عقله يكولي واذا ارملة وعندج ولد، اخاف تاليتها مثل ام وائل بس عرفت عندي ولد اتكهربت. اي صح بس لا هذا الثور مكايل لامه عندي ولد؟
وهذا الثاني هم جاي يحبني وبعدين من توصل للصدك اهلك ميرضون وحقهم ابنهم ممتزوج شلون يقبلون بوحده عدها ولد؟
هو هذا حظج شمه.
رجعت للبيت ضايجة علمود موضوع الشغل وألفت الف سيناريو ابالي.
وين اروح والمن اشتكي هسه؟
لليل فكرت اراسله واحلفه يحجي صدك لو يريد يشلع كلبي؟
بس مااتجرأت.
كعدي واسكتي شفتي تالي المراسلات شنو؟ وهم ماتبتي تردين تراسليه وتسأليه.
كافي شمه هسه يصير كلامه صدك منو يفيدج اذا حبيتيه؟
كافي رجعي شمه القديمه لتخلين الميانة بينكم تزيد.
تره بكل الحالات انتي الخسرانه.
بقيت افكر وافكر وماعندي احد احجيله. لاول مره احس محتاجه احجي لصديقة بس المشكلة مااحب احجي لاحد.
حتى الفلم اليوم مشفته. راسلتني لمياء مجاوبتها..
ايوب اليوم ماكو..
لا آسف لا شلونج.
نمت وكعدت مامشتهيه اروح للدوام مالي خلك بس لازم اروح.
مرت اربع تيام ايوب لااجه ولااتصل ولاحتى دز مسج.
الضوجة والكآبه فووول.
كل يوم اكول اليوم يجي اكيد بس ماكو. وارجع للبيت اتوقع بالليل يدز مسج بس هم ماكو.
هاا شمه شجرالج؟
حبيتي ايوب؟
اكليها هسه. شوفي شلعان الكلب على اصوله هسه.
تعرفين النتيجة شنو؟ يتزوج وحده ثانية وانتي تشوفين.
لمياء: شبيج ضايجة؟
شمه: مابيه
لمياء: علينه؟
شمه: سكتي لمياء مالي خلكج.
لمياء: ياا توه تكولين مابيه شي؟
شمه: ضايجة ماادري شبيه
لمياء: علييينه؟
شمه: اي عليج. شنو شبيج؟
لمياء: اخاف ضايجة علمود ابو عيون گريئة؟
شمه: منو؟
لمياء: الجو
شمه: غير تحجي خبيرة الانواء الجوية
لمياء: مااحجي
شمه: صدك خبله
راسي يوجعني سويت جاي إلى ولمياء ورحت كعدت يمها.
شمه: راح اموت من الضوجة
لمياء: اممم. من شوكت تضوجين بالدوام؟
شمه: شنو حرام نضوج؟
لمياء: لابس الفتره الفاتت ولامره كولتي ضوجه شتغير هسه؟
شمه: هو اني لو اعرف شتغير اجي اكعد واكابلج.
لمياء: انوب اليوم تشربين جاي؟
شمه: راسي يوجعني
لمياء: اممم. اي حقج
شمه: عوبه. اشوفج تلمحين شعندج كولي
لمياء: كل شي ماعندي
شمه: نشوف
شربنه جاي وكعدنه نضحك على الرومانسية بالافلام المصرية القديمة.
شمه: لاا لج وعبد الحليم حافظ ههههههه
لمياء: اني اصلا اسميه عبد الحليم حامض ههههههه
شمه: ههههههههههه عابتلج
لمياء: افلامه كلها نكد.
شمه: دومه مظلوم ويتيم وفقير وحالته حاله هههههههههههه
لمياء: افف اجه عبد الحليم
شمه: وين ههههه
لمياء: انتبهيلي هنا اجه رشدي اباضه
شمه: عود جانوا حلوين بذاك الوقت وسيمين هههههههههههه
لمياء: صخامه، انتبهي
شمه: ياا شبيج؟ كافي ضحك يالله خل ارجع لمكتبي.
كمت شفت ايوب بوجهي.
انخلست.
كلبي ظل يدك بسرعة وارتبكت.
دنكت استحيت سويت نفسي احجي ويه لمياء كتلها: رشدي اباضه هاا. بسيطة.
ايوب: السلام عليكم.
ردت لمياء عليه اني ماعرفت احجي، نسيت شلون ارد السلام.
ايوب: شلونكم؟
لمياء: الحمدلله أوستاذ انت شلونك؟
ايوب: الحمدلله
باوعلي كلي: شمه شلونج؟
ساكته؟
شمه: لا. زينه. زينه الحمدلله
لمياء: ضايجة. صارلها كم يوم ضااايجة
ايوب: خوماكو شي؟
كرصت لمياء.
شمه: لا ماكو شي
لمياء: الجو حار
باوعلها هو كللها: شغلي السبلت.
دار علي كلي: وين مؤيد؟
شمه: موجود.
لمياء: الجو حااار
باوعتلها كتلها: خبصتينه شغلي السبلت
ايوب: شبيج شمه؟
شمه: مابيه
ايوب: شمضوجج؟
لمياء: الجو
دار عليها وضحك كللها: شقصتج اليوم؟
لمياء: الجوو هووت
شمه: تأثرتي بعبد الحليم
كمت من مكاني كتله: اتفضل استاذ مؤيد موجود.
راح كدامي دخل للمكتب واني درت على لمياء كتلها: اصبريلي.
رحت لمكتبي كعدت.
بقيت كاعده وماادري شنو اتوقع.
من طلع كلي: شبيها لمياء؟
شمه: شبيها؟ ماادري.
بقى واكف ساكت بعدين كلي: وانتي ليش ضايجة؟
شمه: مضايجة.
ايوب: اممم.
جان واكف ظهره للباب ولمياء مكتبها مقابيل الباب والباب جان مفتوح.
اشوف لمياء تأشرلي بس ماادري شتكول وره شوية دزتلي مسج: الجو صار حار.
شمه: شبيها هاي الخبله؟
ايوب: منو؟
شمه: لمياء
ايوب: شبيها؟
شمه: مااعرف علكت عالجو حار.
ضحك هو ودار عليها كللها: تعاي كعدي يمنه.
شمه: قابل هنا السبلت غير؟
سد الباب.
رجعت لمياء دزت مسج: شلون الجو يمج؟
كتبتلها: ووجع شبيج اتخبلتي شخبصتينه بالجو؟
لمياء: الجو اليمج ياثولة.
شمه: ايااا عوووبه.
ايوب: ممكن تعوفين التليفون شوية؟
شمه: اوك
ايوب: هاا شقررتي؟
شمه: بشنو؟
ايوب: مو كلنه راح اشوفلج شغل بغير مكان لان مو بصالحج تبقين هنا ولا بصالح مؤيد؟
شمه: ولابصالح اختك؟
ايوب: شقررتي؟
شمه: وين اروح؟
ايوب: اني اشغلج بغير مكان
شمه: وهم بعد شهر شهرين او تلاثه تجي تكلي ميصير تبقين هنا؟
ايوب: ان شاءالله ماكو سبب بعد
شمه: لاحول ولاقوة الا بالله. شيخلصه العمر على هالحالة.
ايوب: يخلص
شمه: وهسه؟
ايوب: بالليل ارجعلج خبر منتظر بس صديقي يرد علي وان شاءالله خير.
شمه: ان شاءالله
طلع واني بقيت ساكته وضايجه.
شغلي مرتاحه بي شنو ذنبي ابطل علمود اخته تغار مااعرف متقبل الا سكرتيرة متزوجة.
دخلت لمياء تضحك.
شمه: يا خبله
لمياء: بشرفج مو جنتي ضايجة اشو هسه وجهج ورد؟
شمه: طلعي بره
لمياء: لان كلامي صحيح
شمه: روحي ولي لمكتبج.
راحت وهي تضحك..
بالليل جنت اسوي عشا وصلني مسج من ايوب: اشتاقيتلج.
لااراديا ابتسمت ابتسامة عريييضة.
المشكلة بعده متصل. مااكدر اجاوب شيكول عني؟
ولااكدر اغلس هسه يكول عاجبها الوضع.
ظليت افكر شسوي واني عين عالاكل وعين بالنقال.
بالاخير قررت مااجاوبه.
كملت الاكل وصبيته وكعدنه نتعشا بس بالي يم التليفون.
اتمنيت اسمع صوت مسج وصل.
بعدما نامت امي اخذت آدم آني انومه لان هي تعبانه.
رحت كالمعتاد لمكاني انتظر فلم حلو بس نسيت الفلم والتهيت ويه آدم.
وره شوية دك رقم غريب.
باوعت مااعرف رقم منو. خليت التليفون صامت.
بنص الليل كعدت اشرب مي وشفت تليفوني يدك نفس الرقم.
كطعته.
فتحت التليفون لكيت مسج من ايوب دازه من جنت نايمه: اليوم شنو فلم السهرة؟
ضحكت. باوعت للساعة بالثنتين ونص اكيد نايم هسه بس رديت عليه كتبتله: هلو استاذ مشفت المسج جنت نايمه.
دزيت المسج ونمت.
اول موصلت للدوام اتصل.
شمه: الو؟
ايوب: الوو. صباح الخير
شمه: صباح النور
ايوب: شلونج؟
شمه: الحمدلله
ايوب: انتي وين؟
شمه: هسه وصلت للدوام.
ايوب: شوكت تكدرين تداومين بالوظيفة الجديدة؟
شمه: ياوظيفة؟
ايوب: احنه شاتفقنه؟
شمه: اتفقنا على الا نتفق هههه
ايوب: شمه وجودج هناك بعد مينفع. خلص لتلحين.
شمه: مالحيت
ايوب: عفيه
بقيت ساكته كلي: احجي.
شمه: شحجي؟
ايوب: اي شي خل اسمع صوتج.
كلبي ظل يدك وحتى اخلص من هذا الاحراج حاولت اخذ للموضوع بضحك وكوميديا.
شمه: هههه بطلت من ارب آيدول.
ايوب: احجي اي شي.
شمه: شحجي؟ ماعندي شي احجيه.
ايوب: بما انه اني لاول مره اكعد من وكت يوميه اكعد بالتسعة او بثمانية ونص بس علمودج اليوم كاعد من الساعة سبعة، اعتقد استحق منج كلمة.
شمه: كلمة شنو؟
ايوب: مثلا اشتاقيتلك.
شمه: هاا؟ صباح النور.
اتخربطت من سمعته شكال وبنفس الوقت لمياء سلمت عليه فكتله صباح النور.
ايوب: صباح الخير ههههههههههه
شمه: يالله من رخصتك عندي شغل.
ايوب: اوك بس من ارمش عليج طلعلي.
شمه: وين؟
ايوب: بره.
شمه: شكو؟
ايوب: من اجي تعرفين.
احجي وياه وارجع بعدين الوم نفسي. اني ليش انطيه مجال مو اخلاقي هاي.
ليش؟
كعدت انتظر يجي والتليفون بيدي خاف يرمش علي من يوصل.
وخايفة احد يشوفني من اطلع.
زين وين طالعة وشيريد جاي؟
لتطلعين حتى لو اجه واتصل، لهنا وكافي شمه. انتي مو كد هاي الناس لو راد باجر يأذيج.
بعدين شلون بيج من يدوس على كلبج بحذائه ويروح؟
شتعرفين عنه انتي؟ كل شي متعرفين.
يصير اسأل لمياء عنه؟
لا انجبي اصلا هي تلمحلج لان حاسه اكو شي.
بعدني بأفكاري ودك التليفون. كمزت.
كمت واني ارجف ادري بروحي ماشية بطريق غلط بس جاي اعاند نفسي.
عبرت على لمياء كالت: وين؟
شمه: هسه اجي رايحة اجيب عصير اجيبلج وياي؟
لمياء: لا مااحب العصير من الصبح اريد جاي اريد اتريك.
شمه: كيفج.
طلعت واني اتلفت مثل الحرامية واحجي بكلبي: اوكفي. اوكفي. وين رايحة؟
وين راح الحجي التوه حجيناه؟
شفته كاعد بالسيارة ويباوعلي.
ارتبكت ماعرفت امشي. حسيت راح انجبح على وجهي.
وصلت يم السيارة وبقيت واكفة اتوقعته يفتح الجامه حتى يحجي وياي بس اتفاجأت مد ايده فتح الباب.
من شفته فتح الباب ماادري ليش استرخصت نفسي.
ضجت.
ماصعدت بالسيارة دنكت حاجيته من الشباك.
شمه: السلام عليكم
ايوب: وعليكم السلام. صعدي ليش واكفة؟
شمه: وين اصعد؟
كتله باستنكار.
ايوب: اريد احجي وياج
شمه: كول اسمعك
ايوب: يعني متصعدين؟
شمه: لا طبعاً مااصعد!
اصلا رايحة اجيب عصير وريوك من المطعم.
التفت باوع عالمطعم ورجع باوعلي كلي: اوكفي.
طفه السيارة ونزل واشرلي براسه كلي: يالله نروح سوه.
شمه: وين؟
مجاوبني راح عبر الشارع واني مثل الصنم متحنطه اباوعله.
بقى واكف عالجزره الوسطية منتظرني.
عبرت الشارع الاول وصلت يمه كلي: شنو تاخذين خيرة؟
شمه: تصرفاتك تخوفني.
عبرنه الشارع الثاني سوه كلي: افه. شسويلج حتى تصدكين بيه؟
شمه: لتسوي شي
ايوب: لا والله جد شنو اسوي حتى تصدكين احبج.
شمه: استاذ رحمه..
ايوب: رحمه لامواتج انتي. بلا استاذ شنو مدرس خصوصي اني؟
شمه: اوك ايوب شكو ليش اجيت شنو إلى الجاي علموده؟
دفع الباب ودخلنه للمطعم رأسا سحبلي كرسي وكعد كتله: لا مااكعد عندي دوام شنو هاللعب.
ايوب: لعب؟ مو جايه تردين ريوك وعصير؟
شمه: اي رايحه اطلب
ايوب: اوك نتريك على ذوقج يعني؟
باوعتله كتله: منو؟
ايوب: متردين تعزميني؟ شدعوه يابه هو ريوك.
احرجني. كعدت كتله: امري لله.
ضحك.
شمه: خل نحجي صدك كافي ضحك.
ايوب: احجي. اني اريدج تحجين
شمه: اني مااحجي شي. ماعندي شي احجيه انت كلت اكو شي وعلى هذا الاساس جذبت للمره الالف وطلعت من شغلي. شنو هو؟
ايوب: اشتاقيتلج
شمه: وبعدين؟
ايوب: يعني هذا شي بسيط؟
شمه: ايوب لاتلعب بأعصابي.
ايوب: اول مره اعرف اسمي لهدرجة حلو.
ضحكت. كتله: وبعدين؟ شنو نظل نلف وندور؟
ايوب: اني واضح وصريح
شمه: شنو الشي المكعدك من الصبح؟ مو تكول يومية تكعد بالتسعة؟
ايوب: اجيت اشوفج.
شمه: مراح احجي بعد ولاكلمة اذا يبقى هذا اسلوبك.
ايوب: ليش؟ شگلت؟ گلت شي غلط؟
بقيت ساكته.
اتنهد بعدين گلي: الوظيفة موجودة. شوكت تردين اتداومين بكيفج.
شمه: واستاذ مؤيد شگوله؟
ايوب: ماادري شوفيلج حجه.
شمه: شگول؟ اگول انخطبت وخطيبي ميقبل اداوم؟
ايوب: ماكو يعني عذر ثاني غير الخطوبة؟ المن انخطبتي بالله لوائل؟
شمه: شجاب وائل بالحجي هسه؟
الظاهر ماكو فايده من الحجي.
ردت اكوم وارجع للشركة لان ضايقني بكلامه.
ايوب: اي عفيه كلما نحجي سويلج قصة وزعلي مثل الاطفال.
شمه: اوك. اني طفله
جابوا الريوك سكتنه.
ايوب: زين منو يحاسب اذا انتي زعلتي؟
شمه: انت حاسب مثلما حاسبت ذيج المره لخاطر هبة.
ايوب: لخاطر هبة؟!
شمه: لو ذيج القبل ذابحني بيها انسام خانم.
ايوب: ياانسام؟
شمه: شمدريني. كل كلمة وكلت انسام سوت هيج وانسام كالت هيج.
ضحك على كيف كال: وانتي صدكتي هههه؟
باوعتله كتله: طبعا اصدك. مااعرف اجذب لذلك اتصور الناس مثلي.
ايوب: لعد منو اليوميه تجذب على لمياء امي؟ ههههههههههه
شمه: والله مو صوجك.
كألوان الطيف بدأ يلون أيامي.
كفراشة ارفرف بجناحي فوق لهيب النار.
كفارس من فرسان القصص ينتشلني في كل مره ويوصلني الى بر الامان..