رواية صراع الجبابرة للكاتبة روز الفياض الفصل السادس عشر
بقيت كاعده على اعصابي.
اني ميته من الخوف خاف احد يشوفني كاعده وياه وخاف اتأخر على دوامي وهو ولاعبالك.
ايوب: شربي عصيرج عالاقل
شمه: لا اني تأخرت مااكدر ابقى اكثر.
كمت دفعت الحساب واخذت العصير كلي: اوكفي اني اوصلج.
شمه: لا وين توصلني من كل عقلك. لعد المن طالعه بالبوكه اني اذا عادي توصلني؟
ايوب: ولشوكت؟
شمه: للابد. يالله باي
ايوب: ديري بالج على نفسج.
شمه: اوك.
طلعت اركض لاكاني استاذ مؤيد جاي للدوام.
مؤيد: صباح الخير
شمه: صباح النور استاذ
مؤيد: وين جنتي؟
شمه: رحت جبت عصير
مؤيد: هاا
مشيت كدامه بسرعة كال: شنو استاذ ايوب هنا؟
من الرعب حسيت لساني انشل.
شمه: منو استاذ ايوب؟ هااا لا مو هنا؟
مؤيد: مااجاكم؟
شمه: لا
مؤيد: لعد وين راح شفت سيارته بره.
دخل للمكتب واني ركض طلعت رقم ايوب دزيتله مسج: استاذ مؤيد لاكاني واني جايه وسألني عنك لان شاف سيارتك بره.
ايوب: شنو كلتليله؟
شمه: كتله مااجه ولاشفته
ايوب: ماشي.
شمه: اكيد هسه يتصل بيك ويسألك
ايوب: مو مشكلة
شمه: شنو يعني مو مشكلة؟
ايوب: شبيج خوافه؟ خلص اني ادبرلي عذر.
شمه: اوك
ايوب: بس لازم تشوفيلج حل ميصير هيج كله خوف
شمه: حل بشنو؟
ايوب: لااكدر اتصل واحجي وياج ولااكدر اكعد وياج واشوفج.
شمه: تره انت دتتعامل مع الموضوع عبالك موافقتي تحصيل حاصل لعد وين الحجي الحجيته؟
ايوب: حجيج ميهمني. موافقتج فعلا تحصيل حاصل لان كتلج مشاعري تجاهج مو لعب وانتي تكابرين تخافين من حجي الناس كيفج بس اني رجال مااخاف.
شمه: زين عالاقل خاف على سمعتي. خاف على وضعي كدام الناس وكدام نفسي.
ايوب: شبيها سمعتج، شحده اليحجي عليج اكص لسانه.
شمه: اتمنى اصدكك
ايوب: صدكيني احبج والله العظيم احبج بيمن احلفلج بعد؟
شمه: والخوف؟
ايوب: لتخافين وايوب وياج. اني وياج مااتركج.
شمه: بس اني مااكدر ايوب افهمني.
ايوب: فاهمج واعرف كل مخاوفج ومقدرها بس كتلج لتفكرين اني احل كل شي انتي بس اهدأي ولتخافين من شي.
يالله مؤيد ديتصل بيه خل اجاوبه.
شمه: اوك باي
ايوب..
المشاعر إلى بصدري تجاه شمه تخليني اضرب كل شي بعرض الحايط.
كافي. اريد اعيش.
لكن اكو عقبات جبيرة بعلاقتنه.
ابوي.
امي.
مؤيد.
نوارس.
عمي ومرت عمي.
منى..
من غير خوفها هي.
اتصلت بسرمد ووصيته يشوفلها شغله محترمه.
سرمد: منو هي
ايوب: ميخصك يااخي انت ليش فضولي
سرمد: غير اعرف.
ايوب: مو ضروري تعرف
سرمد: اممم عرفت
ايوب: صلاوات. مادام فهمت دير بالك احد يدري واريدها بمكان مابي رجال.
سرمد: يايابه. ولك شمسوية بيك هاي لاعنه خير خيرك هههه اوك اعتمد بس تره ماكو مكان مابيه رجال.
ايوب: ماادري انت دبر الموضوع
سرمد: سهله. تدلل
رحت لبيت عمي حتى اشوف منى وامير يمكن الله هداها.
دخلت وسلمت وكعدت.
اجت مرت عمي جابتلي امير شفته بس منى مااجت ولاسلمت.
ايوب: عمه جهزيلي اغراض امير
مرت عمي: ليش؟
ايوب: خلص طلع من الاربعين امي تريد تشوفه هم حفيدها.
مرت عمي: اي بس شلون تاخذه؟
ايوب: والله بعد اذا امه ماعدها احساس شسويلها. ابني هذا ومن حقي اخذه.
مرت عمي: اي من حقك بس مو هيجي غير تكعدون تتفاهمون.
ايوب: بالنسبة إلى ماعندي مشكلة. هي إلى عدها مشكلة والله خواتك ووالله امك.
مرت عمي: لا مو قصدها
ايوب: لاقصدها. هي من تكول اريد بيت بحدي شنو معناها؟
مرت عمي: زين قسموا البيت اذا متريد تطلع من البيت.
ايوب: عمه شنو قسموا البيت؟ يعني اني مااكدر اطلعها ابيت؟، بس مااكدر اعوف امي. امي منو وياها بالبيت غيري ابوي وتعرفين وضعه يوم يجي وعشره مسافر بعد شلون يصير اعوف امي.
مرت عمي: والحل؟
ايوب: الحل بتج تعقل وتشيل هالافكار من راسها.
بعدني احجي ويه مرت عمي طلعت منى كالت: مااشيل هالافكار من راسي. وماارجع الا بيت وحدي.
ايوب: كيفج. ابقي هيج احسنلج. والله متعافية انتي بعد فوكما لاكيه ناس تخدمج؟ شنو شغلج انتي بالبيت طابخه منظفه؟ كاعده اميرة جنابج مدلله شتردين بعد؟
منى: والله هذا العندي.
ايوب: يالله عمه يالله. مستعجل اريد اروح ارتاح. انطيني شغلات اموري خل آخذه.
مرت عمي: لا عمه متكدرله. خل يجي عمك ونجيبه اني وياه الكم وخلي الحجيه تشوفه.
ايوب: ماشي. يالله مع السلامة.
طلعت واني متنرفز.
رجعت للبيت امي جان عبالها اجيب منى وامير وياي.
امي: هاا وينهم؟
ايوب: منو؟
امي: منى وامير
ايوب: مقبلت تجي.
جانت عدنه امل اختي من سمعتني كالت: شطلعت هاي؟ ادري غير طلعت من الاربعين بعد شمنتظره؟ سوتها طواله هاي صدك متستحي. ادري متكول عمتي مكسورة ومريضة متكول زوجي منو اله متكول ابني جدته تريد اشوفه شنو هالانانية العدها.
امي: كافي.
امل: لا يوم مو كافي محد خبلها عليه غيرج انتي. انتي مدللتها زيادة عن اللزوم وين اكو وحده تبقى عد اهلها هلكد حتى لو جايبه عملية.
ايوب: خل تولي. هسه من تشوف نفسها تنحكر ترجع وحدها.
امل: والله ياخويه اني اكول اتزوج.
امي: انجبي
امل: لا يمه ماانجب حرام عليكم شنو ذنبه متحملها.
امي: لا لتخلين هالافكار براسه
ايوب: اني بيوم إلى افكر اتزوج راح اتزوج لاراح تلزمني منى ولاراح يلزمني احد ثاني. هاي انتهى الموضوع.
امي: يااا
ايوب: والله وعيونج.
عفتهم وصعدت ارتاح وانام.
طلعت التليفون ودزيتلها: شمتي. تصبحين على خير
وره ثواني ردت: شمتي؟!
ايوب: منو سماج شمه؟
شمه: ابويه الله يرحمه
ايوب: الله يرحمه. عندج اخوان؟
شمه: عندي اخ واحد
ايوب: وليش انتي شايله هم البيت مادام عندج اخ؟
شمه: مو هنا. مسافر
ايوب: شلون يسافر ويعوف امه واخته بدون رجال؟
شمه: ماالومه. إلى عنده اطفال فالاولويه لاطفاله وهو يفكر بمستقبل اطفاله يكول العراق مابي مستقبل.
ايوب: اممم وانتي؟
شمه: شنو؟
ايوب: شوكت تفكرين بينه وبمستقبلنه؟
شمه: ماكو شي اسمه احنه ومستقبلنه. تره انت دتتصرف وتحجي بطريقة انسان غير مسؤول
ايوب: وشلون عرفتي اني غير مسؤول؟
شمه: اهلك مراح يوافقون على إلى دتلملحله.
ايوب: ماكو شي متعبني كد المسؤولية إلى شايلها ومتحملها. ماادري ليش انتي ماخذه عني نظره مو خوش نظره.
شمه: مو نظره
عفتها تكتب واتصلت عليها.
دك بس فصلته.
رجعت اتصلت هالمره جاوبت.
---
---
شمه.
اتصل علي ايوب بالليل بس كطعته.
خليت التليفون صامت وسديت باب الغرفة خاف امي تسمع الصوت.
رجع اتصل. ظليت ثواني اشجع نفسي وبعدين جاوبت بصوت ناااصي اخاف اعلي صوتي: الو
ايوب: الوو؟
شمه: هلو
ايوب: علي صوتج.
شمه: مااكدر
ايوب: شنو؟
شمه: ما. اكدر.
ايوب: ليش؟ اكو احد يمج؟
شمه: لا بس اخاف
ايوب: هههههه اوك. اوك. شلونج؟
شمه: زينه
ايوب: سهرانه تشوفين فلم؟
شمه: امم
ايوب: هاا؟
شمه: اي
ايوب: شمه؟
شمه: نعم؟
ايوب: كل ميمر يوم احبج اكثر. ليش؟
شمه: ايوب
ايوب: عيونه
انخلست!
ايوب: الو، شمه؟ تسمعيني؟
شمه: اسمعك
ايوب: ليش ساكته؟
شمه: شكول؟
ايوب: كولي اي شي بس لتسكتين
شمه: ليش ضميري يأنبني من احجي وياك؟
ايوب: لانج خوافه، زين ليش اني مااشعر بتأنيب الضمير؟
شمه: هههه ماادري
ايوب: لاني احبج، هم حبيتي قبل؟
شمه: لا
ايوب: شلون اتزوجتي؟
شمه: زواج عادي تقليدي يعني.
ايوب: وشلون جان؟
شمه: هادئ. هو الله يرحمه جان جدا هادئ واني هادئة شتتوقع يكون الزواج.
ايوب: انتي مو هادئة. اصلا جنت اسميج ام لسان ههههه.
شمه: ههههههههه ياظالم.
ايوب: هههه. حبيتيه زوجج بعد الزواج؟
جريت نفس وكتله: الحب بي انواع؟
ايوب: مااتوقع. شلون يعني بي انواع؟ وليش؟
شمه: لان جان شعور مختلف عن إلى حسيته.
ايوب: عن إلى حسيتيه وياي مو صح؟ افتهمج.
شمه: على كيفك وياي
ايوب: شسويت؟
شمه: ماخذني حاصل فاصل تحجي بكل اريحيه
ايوب: ههههههههههههههه ههههههههههههههه انتي تستحين حبيت اوفر عليج مجهود الشرح ههههههههه.
ضحكت وسكتت كتله: كلما تضحك يتخيلي تضحك علي. اظل افكر اباجر من انصدم ويطلع هذا كله مجرد كلام. اتخيل من اسمع بيك خاطب وحده ثانية ومجرد التفكير بالموضوع يخليني اعرف اني شكد داغلط بحق نفسي.
ايوب: اممم. بعد؟
شمه: شنو بعد؟
ايوب: تدرين من تحجين هيجي انت كلامج هذا يأذيني؟
شمه: هذا واقع ونعرفه كلش زين بس اني بمنتهى الغباء سمعت كلامك وعاجبني امشي بطريق نهايته بس أذيتي.
ايوب: كلامج يجرحني تره شمه. حاولت اكثر من مره اثبتلج اني مختلف مو مثل ابوي بس انتي مصره تهينيني كل مره.
شمه: الموضوع مابي اهانة انت رجال حتى لو قررت تسوي شي ميصير تسويه المجتمع راح يعذرك بس اني لا.
ايوب: ميهمني المجتمع. شمه. لاخر مره راح اگولج هالكلام اني حبيتج واعرف وضعي ووضعج شنو، زين؟ فلا تخلين هالافكار براسج. مو اني الاعشم بنات الناس بشي واسوي غيره. فهمتيني؟
اتنهدت وسكتت شويه بعدين كتله: كول والله؟
ايوب: واللي خلقج واللي خلق محمد نيتي وياج مو لعب. بس انطيني مجال شويه ارتب الامور.
نمت تلك الليلة وانا احلم احلاما وردية. احلم بزفاف ملكي واميري الوسيم يطوق خصري بذراعية..
كيف للانسان يحب شخصا آذاه يوما؟
كيف لنا ان نحب رغم علمنا ان هذا الحب ليس الا ابتلاء؟
كيف لقلبي ان يتعلق بك بسبب كلمات؟
هاا انا احبك مع سبق الاصرار. انا احبك رغم علمي بأني سوف اجني من الجراح مااجني.
احبك واعلم اني اتعلق بحبال من وهم. ولاول مره اتمنى ان لا اكون على حق. واتمنى ان تخيب ظنوني.
كعدت الصبح واني افكرلي بعذر اكوله لاستاذ مؤيد بس ماعندي حرامات اعوف شغلي. يعني الرجال ميريد يبطلني. ادري ايوب ليش يريدني ابطل؟ علمود اخته يعني؟ معقولة؟
واني شنو علاقتي بأخته شي غريب؟
رحت للدوام وحجيت ويه استاذ مؤيد: استاذ عندي ظروف
مؤيد: ادري ظروف بس اخذي اجازة ارتاحي وبعدين رجعي ليش تبطلين؟
شمه: بعد.
مؤيد: براحتج مااضغط عليج.
صرفلي راتب شهر كامل وفوكة مية الف زيادة وكلي اي شي احتاجه مااتردد لان اني مثل اخته الزغيرة.
رجعت للبيت بدون مااگول لاحد من الموظفين.
رجعت بتكسي وحدي.
نزلت براس الشارع اتمشى وافكر اني شسويت؟ بطلت من شغلي علمود وحده مااعرفها..
غركانه بأفكاري ماانتبهت للصوت وراي.
جنت امشي بصف الحايط وجنطتي على جتفي. محسيت الا من اندفعت عالحايط حيل وواحد جر جنطتي مني وراح.
وكعت بالشارع وانضرب راسي بالحايط. دخت وتأذيت مصرخت الا من حسيت اكو شي ينزل على كصتي.
مديت ايدي طلع دم!
صرخت واني اشوف الدراجة اتخطتني وراحت ابتعدت.
اخذوا جنطتي وبيها الراتب والتليفون..
وفوك هذا كله راسي يصب دم.
طلع جيرانه ابو تيسير من بيتهم وشافني مكومه بالشارع وابجي.
اجه يركض خطيه من بعيد كومني ووصلني لبيتنه.
ابو تيسير: شبيج بابا وكعتي شنو؟
شمه: لاعمو باكو جنطتي ودفعوني ووكعوني.
ابو تيسير: منو؟
شمه: مااعرفهم على دراجة.
ابو تيسير: لا ياطايحين الحظ
امي اتخلبت من شافتني بهاي الحالة.
امي: الله لاينطيهم منين طلعولج انتي عايزه.
شمه: راح الراتب وراح تليفوني.
امي: يولي فدوه شوفي راسج انتي.
شويه واجت ام تيسير وابو تيسير واخذوني للمضمد حتى يشوف راسي اذا يحتاج الجرح خياط.
وفعلا خيط راسي خياطين.
ظليت مقهوره على تليفوني. هسه ايوب يتصل لو يدز مسج ميدري تليفوني انباك.
حتى لو اريد اراسله من غير رقم مااكدر لان محافظه رقمه..
بقيت اسبوع كاعده بالبيت متت من الضوجة.
لو ادري باقيه اداوم ولا هالكعده هاي.
المصيبة بطلت قبل مااعرف وين راح اشتغل هسه.
وكلما تسألني امي اكوللها مجازه.
بعد الاسبوع جنت جاي اسبح آدم وامي طالعة للسوك واندك الباب.
طلعت صحت: منو؟
رد علي صوت طفل فتحت الباب كال: خالة الطيرة مالتي حطت على سطحكم لو تطيريها لو اصعد اني اطيرها.
باوعتله كتله: لا وين تصعد اني هسه اصعد بس انتظر دقيقه.
سديت الباب ودخلت.
صعدت للسطح وبيدي الماسحة حتى اطير الحمامة.
أشرتلها مطارت. اسويلهاا كش وهش هم مطارت يمعودة ام الغيرة بس طيري ماكو فايدة.
مديت راسي من السطح احاجي الولد: هاي متخاف متطير
كال: خاله خوفيها بعوده بحجارة
شمه: لا حجاره تعذرني بس العودة هاي اشرتلها بالماسحة ماكو فايده متخاف.
مديت الماسحة من السطح اشوفها اله واني مندمجه.
شفت وحده تمشي بالشارع عبالي لمياء.
شمرت الماسحة ونزلت اركض عالدرج.
رحت كبل للباب فتحته شفت الولد الزغير بعده واكف بس فتحت الباب كال: خاله بعدها مطارت.
شمه: روح خاله روح هسه هي وحدها تطير لتضغط عليها.
كلي: خاله شنو لتضغط عليها قابل جاي اخطبها.
شمه: اهووو قصدي هي تطير بحدها من الله يهديها هسه ليش مستعجل عليها دروح روح عندي شغل هسه.
كوه قبل يروح. ماشفت لمياء.
دخلت وسديت الباب. رجع اندك الباب.
فتحته واني عصبيه عبالي هذا الولد ابو الحمامه كتله: تره دوختني مطلعت حمامة ماانطيها بعد هسه اصعد انزلها واضمها.
فتحت الباب امي ووراها ايوب واكف وبيده علاليك المسواك.!
امي: اتفضل ماما اتفضل. شمه مديرج هذا الولد لاكاني خطيه بالطريق ومقبل الا يوصلني.
ظليت مفهييه بيا حاله شافني كلي مي لان جنت اسبح آدم وجماله سمعني اهدد المطيرجي اكوله ماانطيه الحمامة مالته!
دخل كال: السلام عليكم. هاا شمه الحمدلله عالسلامة.
شمه: الله يسلمك
ايوب: ظل بالنه عليج
شمه: الله يسلمك
ايوب: هسه خالتي حجتلي.
دخلت امي جوه تدخل المسواك مدري تفتح باب الصالة.
دار علي كلي: وينج؟
شمه: بالبيت اطير حمام.
ضحك.
ايوب: اسبوع كامل وانتي ماكو تليفونج مغلق وماكو احد يعرف اخبارج.
شمه: بعد تليفوني راح بالخسائر ومحافظة رقمك ولارقم اي أحد طبيعي ميعرفون أخباري.
ايوب: تدرين هسه جنت افتر بمنطقتكم اكول يمكن اشوفج ولوما شايف الحجية بالطريق جان اجيت دكيت عليكم الباب.
شمه: ايي شكو بيها ديمقراطيه.
ضحك.
طلعت امي سكتنه. كالت: ليش واكف بره ماما اتفضل.
ايوب: مشكوره يمه بس مستعجل غير مره ان شاءالله.
امي: حبيبي بيتك هذا ماما
ايوب: ماكو ورقة وقلم؟
سألني. كتله: ليش؟
ايوب: اكتبلكم رقمي خاف تحتاجون شي او يصيراي شي عالاقل احد يكون وياكم.
امي: فدوة اطولك حبيبي متقصر.
ايوب: خادم.
دخلت امي تجيب ورقة وقلم واني صافنه اشوفه هو امي ميانه اكثر مما اني وياه.
ايوب: شلونه راسج هسه؟
شمه: زين. باجر لازم اروح يشيلون الخيط
ايوب: لتروحين وحدج انتظريني اني آخذج.
شمه: لا لا
اجت امي جايبه ورقة وقلم وانطتهم اله كتب رقمه وسألني كدام امي: شلون صرتي هسه؟
شمه: الحمدلله
ايوب: شلتي الخيط؟
شمه: لا باجر ان شاءالله امي تاخذني.
دار على امي كللها: يمه تره عدها دوام اسبوع صارلها ممداومه.
امي: اي صحيح والله حقك.
دار علي كلي: ليش اتعبين الوالده داومي وبعدين مري عالمستوصف اليمنه.
شمه: يامستوصف؟ المستوصف ميكعد الصبح اتصور
ايوب: لايكعدون الصبح يوميه. ها شتكولين يوم؟
امي: بكيفكم بعد انت عندك شغل متعطل يجوز معناها لازم اتداوم.
ايوب: هاا شمه شكلتي؟ بس اذا بعدج تعبانه نسامحج هههه.
امي: لا تداوم تداوم كافي دلع.
شمه: دلع؟ اشكرج ماما لعد هذا الخياط البراسي شنو؟
امي: هههه اي كعدتي اسبوع بالبيت كافي.
دارت على ايوب كلتله: تره انت مدلعها هوايه ماكو مدير يسوي هيجي هههه.
ايوب: اي فعلا كلامج صحيح منا وهيج ممنوع الغياب مهما كان السبب هههه.
طلع بعدما سلم على امي وعلي.
راح واني بقيت بمكاني متحنطة ولازكة عبالك برغي.
معقولة إلى صار هسه؟
حتى امي لف دماغها بكلمتين!
بقيت بالليل افكر زين وين اداوم وين اروح؟
شلون يريدني اداوم واني مااعرف مكان شغلي الجديد؟
اهوو شهالدوخة ياربي. انوب يكول المستوصف؟ يامستوصف اليمنه؟
همزين مشافني واني فوك السطح واطير الحمامة.
الصبح طلعت بس ماادري وين اروح لشركة استاذ مؤيد لو وين؟
طلعت من فرعنا شفت سيارة ايوب.
فتح الجامه كلي: صباح الخير
ضحكت كتله: شتسوي هنا؟
ايوب: اوصلج.
شمه: لا مو من كل عقلك
ايوب: تندلين شغلج الجديد؟
شمه: لا
ايوب: يالله خلينه نروح تأخرنه.
شمه: مااصعد وياك
ايوب: مو كيفج.
بقيت واكفة كلي: صعدي قبل ميشوفج احد من الجيران.
صعدت بسرعة.
ايوب: وين تردين نروح بالاول؟
شمه: وين؟ للدوام غير؟
ايوب: تلحكين عالدوام مطاير.
شمه: غير لازم اعرف وين دوامي وشنو شغلي.
ايوب: نروح نتريك؟ بذاك المطعم؟
شمه: لا لا نروح اريد اروح للمستوصف بالاول حتى ميضيع الوقت.
ايوب: يامستوصف؟
شمه: مو البارحة كلت
ايوب: وانتي كل شي تصدكين؟
شمه: يعني جذب؟
ايوب: هههه شسويلج اسبوع كامل مااعرف اخبارج ولا اكدر اشوفج لا وتردين تبقين مختفية بعد، دمرتيني.
شمه: الله لايراويك الرعب. شلون اندفعت عالحايط من حيث لاادري. ولاسمعت صوت الدراجة من اقتربت.
ايوب: غلطتي طلعتي من الدوام وحدج. جان اتصلي بيه او خليتي التكسي يوصلج للباب.
شمه: بعد. شي يريد يصير
ايوب: اتصلت عليج مالايقل عن عشرين مره ودزيتلج يمكن خمسين مسج بس متوصل لان تليفونج مغلق.
كلت يمكن حظرتني. او غيرت رقمها حتى مااتصل بيها هههه.
شمه: اتوقعت تفكر هيج.
ايوب: ضجت حيل ضجت.
اول مكعدنه بالمطعم كلي: متتصورين شلون مر علي الاسبوع.
شمه: واني هم. فد ضوجة
ايوب: ضوجه؟ يعني مو اشتاقيتلك ولا افتقدتك ولاحياتي ظلمة بدونك؟
ضحكت كتله: تحب تحرجني؟
ايوب: حقج. مشايفة شيصير بوجهج من تستحين.
بلعت ريكي كتله واني اگلب بالمنيو جذب: بس كل إلى كلته حسيت بي.
ايوب: شنو حسيتي؟
شمه: افتقدتك. واشتاقيتلك.
ابتسم ابتسامة عريضة حسيتها من كل كلبه وكلي: هسه واحد انفتحت شهيته ويكدر يتريك مو؟ شتكولين؟
طلعنه من المطعم للمستشفى شالوا الخياط ورحنة للشركة الجديدة إلى راح اشتغل بيها.
بالطريق وكف كلي: هسه راجع مااتأخر خمس دقايق.
شمه: اوك
ايوب: مو ارجع الكاج مختفيه لو مخطوفة هههه.
شمه: لا لتخاف اخاف اتحرك من مكاني.
ايوب: ماشي.
نزل وبقيت بالسيارة وتأنيب الضمير ياكلني بس اني متجاهله كل شي وعايشة لحظات وسعادة كل عمري محاسة بيها ولامتخيلتها.
فعلا مااتأخر رجع وره عشر دقايق تقريبا.
صعد بالسيارة وكلي: هاج.
انطاني علاكة.
شمه: شنو هاي؟
ايوب: شوفيه
فتحت العلاكة جايبلي تليفون وشريحة جديدة.
شمه: ايوب هاي شيسموها؟
ايوب: يسموها حتى اكدر احجي وياج ومااريد احد غيري يعرف رقمج.
شمه: ليش بالله؟
ايوب: مااريد احد يشاركني بيج.
يسوق ويحجي بدون ميباوعلي.
شمه: بس اني وصيت يجيبولي تليفون
ايوب: وصيتي منو؟
شمه: جيرانه تبيع بالاقساط
ايوب: زين هذا هم اعتبريه بالاقساط.
شمه: وشلون اسدد اقساطه بالله تره لو اريد اشتري اشتري تليفون عادي على كد فلوسي مو هذا.
ايوب: لتخافين كل شهر اخليج تعزميني لحدما تسددين فلوسه. مو خوش حل هههه
شمه: معناها ابقى لحد التقاعد متورطه ههه.
ايوب: شمه انتي هسه بالنسبة إلى مو حبيبتي بس. انتي بنيتي.
احرقني لهيب العشق وبتُ انام لاحلم بك واصحو لاشتاق اليك.
مثلما اعتبرتني صغيرتك. انت بالنسبة لي أب وأخ وحبيب. انت طفل صغير آخر اعيش لاجله.
وأعيشُ به.