قصص و روايات - قصص رومانسية :

رواية صراع الجبابرة للكاتبة روز الفياض الفصل السابع عشر

رواية صراع الجبابرة للكاتبة روز الفياض الفصل السابع عشر

رواية صراع الجبابرة للكاتبة روز الفياض الفصل السابع عشر

قبل منوصل للشركة كلي: شمه اريد اطلب منج طلب
شمه: شنو؟
ايوب: بس اذا تحبيني صدك متعترضين.
شمه: شكو؟
ايوب: اريدج تلبسين حجاب
شمه: ليش؟
ايوب: حتى يرتاح كلبي. انتي شويه ملفته للنظر الحجاب احسن.
بقيت ساكته فاجأني.
---
ايوب.
سرمد مكدر يحصل لشمه مكان مابي رجال بس معلمة بمدرسة اهليه بس اني مقبلت لان الراتب تعبان.
اضطريت اخليه يشغلها عنده.
عنده شركة سياحة وسفر واكو هواي بنات موجودات بيها.

سرمد صديقي متزوج وعنده اثنين بنات.
وصلتها ورحت بعدما وصيت سرمد عليها: على كيفك وياها خاف الشغل جديد عليها
سرمد: لا تتعلم ميرادلها خبره
ايوب: دير بالك عليها
سرمد: لتخاف
ايوب: اوك اني رايح اذا اكو شي خابرني
سرمد: بس تره دوامنه يتأخر بالليل انت تعرف للساعة تسعة.
ايوب: لا لا خومتريد تطبق القوانين عليها.
لا تطلعها من وكت متكدر تتأخر اصلاً.

سرمد: يابه بثمانية لخاطرك اطلعها زين هيج؟ لان الصبح دوانه بالتسعة والظهر هم عدنه استراحه من الوحده للاربعة العصر تكدر تروح للبيت ترتاح وتتغدا وتنام وبعدين ترجع العصر.
ايوب: ماشي. بس مثل موصيتك دير بالك عليها.
سرمد: ان شاءالله
هسه ارتاحيت من بعدتها عن مؤيد ونوارس والحجي.

رجعت للبيت بالليل بس مريت على منى وهالمره صارت مشكلة اكبر لان لكيت امير عد بيبيته باقي وهي طالعة معزومة بزواج جيرانهم ولهسه ماكو والساعة جانت هدعش بالليل: طياح حظ هذا. اكيد رايحة من العصر ولهسه ماكو..
مرت عمي: هسه تجي خابرت كالت بالطريق
ايوب: ياطريق هذا ياطريق على اي اساس تطلع وتبقى لهيجي وقت واني ماادري؟ غير تتصل غير تكول طالعة؟
وهذا الطفل شنو ذنبه؟
مرت عمي: على كيفك عمه هسه جايه واحجي وياها.

ايوب: شحجي وياها؟ انتو يعني عاجبكم وضعها وكعدتها هنا لو شنو؟ عاجبكم طلعتها لهيجي وقت وتاركه ابنها؟
مرت عمي: تره هي طفلة اتعامل وياها بلطف مو بصياح انت هيجي تخليها تعاند.
ايوب: طفلة؟ شكد عمرها حتى طفله؟ عموما اني لاراح اصيح ولااحجي بلطف. اني رايح وباجر اذا مرجعت للبيت ورقة طلاكها توصلها.
مرت عمي: ياا شالقصة سويتها صدك وزعلت.
عفتها وطلعت..
ثاني يوم رجعت من الشغل لكيت عمي ومؤيد جايبيها.

مؤيد: اذا عادتها مره ثانية بس اتصل بيه والله اكسرلك عظامها ومااخلي بيها عظم صاحي.
عمي: لا اذا اتصرفت تصرف ميعجبك رجعها. رجعها واني اكولك طلكها لتحسب حسابنه تره احنه وياك مو عليك لان نعرفها شنو.
رجعت منى بس علاقتنه جانت متوتره لان عنادها زاد منقص وكسلها كذلك.
امي خطيه هي اللي تغسل ملابس ومهتمه بأمير تسبحه وتغسلة وتشربه حليب وتنومه. وشغل البيت متكدر عليه مثل قبل تخاف وصحتها مو مثل قبل.

وست الحسن والدلال لو نايمه لو تخابر لو بالسوك لو مدري وين.
قررت اعتبر نفسي ممتزوج..
جنت محتار شلون انهي الموضوع. شلون شمه تصير إلى بأقل الخسائر.
حتى لو قبلت منى وهذا شي مستحيل يبقى ابوي شلون اتزوج وحده ابوي جان يريدلها نفسه.
جان يريد ياخذ شرفها. هاي كللش واكفة ومالها حل.
علاقتي بمؤيد اكيد هم راح تتأثر لو عرف ومؤيد مو بس ابن عمي لا صديقي.
واحتمال زواجهم هو ونوارس هم يتأثر.
والحل ايوب؟

الحل الوحيد اتزوجها بدون علم احد.
گول گول. لتستحي تريد تزوجها بالسر شكله سرمد گدر يقنعك.
بس ياترى هي تقبل؟
---
---
شمه.
ارتديت الحجاب.
لم يكن شيئا صعباً.
لم استطع رفض طلبه. فهو حبيبي وحبيبي قد تمنى ويجب علي ان احقق له ذلك.
حسيت بغيرته علي من طلب مني البس حجاب ولبسته بدون اعتراض. فرحت من حسيته يخاف علي من عيون الموظفين والزبائن.
كل الموظفين وياي شباب تقريباً.

دوامي هالمره كان عالحاسبة بس كان ممتع لان مثلما كلت الكل شباب ومن النوع إلى يسولفون ويضحكون.
سرمد حسب ماعرفت صديق ايوب المقرب. جان حباب ومن النوع إلى ينكت ويحب يتشاقه هواي.
مر على دوامي بالشركة الجديدة تقريبا تلث شهور. وجان دوامي متعب لان شفتين الصبح والعصر.
سرمد جان يعرف إلى بيني وبين ايوب بس ابد ميعلق عالموضوع ولايحجي.
بالعكس جان مداريني لخاطر ايوب.

اغلب ايام الاسبوع جان يسمحلي اطلع للبيت قبل الموعد.
جان العيد صارله يومين مخلص وبالبيت جنه مسوين كليجة فعزلت صحن زغير لايوب وصحن للبنات والولد الوياي.
اجه ايوب للمكتب وكعد يم سرمد شويه وطلع بس قبل ميطلع اجه سلم علي عادي كدام الموظفين فانطيته الكليجة: هاي شنو؟
شمه: كليجة
ايوب: انتي مسويتها؟
شمه: اني وامي
ايوب: مايحلى العيد بدون الكليجة
شمه: مابقى من العيد وعاداته بس الكليجة
ايوب: والعيدية.

شمه: هههه مو ينطينه عيديه بهالعمر.
ايوب: اني. عيديتج موجوده بالسيارة بس شلون انطيجياها؟
شمه: يلوموني احبك ليش.
ايوب: منو يلومج؟
شمه: عقلي. ضميري.
ايوب: عقلج انطيه اجازة ضميرج اذا محبيتي ايوب معناها ماعندج ضمير.
شمه: ههههه. وبعد؟
ايوب: يعني شكد صارلنه سوه وبعدج تفكرين وتكولين ضميري.
شمه: المشكلة كل هالتحريض ماكو نتيجة هههه.
ايوب: هههه الحمدلله
من طلع سمعت سرمد كله: مع السلامة حبيبي ابو امير.

مااهتميت اتصورت يلقبونه بأبو امير.
نسيت الموضوع.
جابلي بوقتها ساعة ماركة.
كل يوم يمر اتعلق بي اكثر جنت مااكدر انام اذا مااحجي وياه واسمع صوته.
اذا سافر لمكان نبقى على تواصل بالدقايق.
صار جزء من يومي.
من داومت هنا صرت اشوفه اكثر لان سرمد يعرف كل شي.
احلى مابأيوب انه جان يعرف حدوده بعلاقته شنو.
بعد ماطلع ايوب قدمت كليجة للموجودين وآخر شي رحت قدمت لسرمد كلي: اه هاي شنو. عاشت ايدج.

مد ايده اخذ مني الصحن بس ايده صارت على ايدي.
او بالاحرى حسيته متعمد يلزم ايدي.
راساً سحبت ايدي.
هو غلس.
ظليت طول اليوم محرجة وافكر ياترى هذا متعمد لو اني يتخيلي.
لا يجوز بالغلط. انسي الموضوع.
بذاك اليوم بالليل من رجعت وللبيت دك علي رقم غريب استغربت.
مره ثانية من اتصل نفس الرقم جاوبت: الوو؟
الوو؟
الووو؟
بس محد حجه.
ثاني يوم الصبح من رحت للدوام اتصل علي ايوب: صباح الخير
شمه: صباح الجوري.

ايوب: المثلي هم يريد شي بعد من ربه
شمه: اي تريد
ايوب: لا مااريد شي غيرج
شمه: فدوه لعمرك اني.
ايوب: شلون غزل من الصبح اكيد امي داعيتلي هههه
شمه: حجزتلك على دبي على يوم الجمعة يعني عكب باجر ان شاءالله
ايوب: ماشي بالليل امر اخذ التذكره خليها يم سرمد.
شمه: راح تشتاقلي؟
ايوب: لا
شمه: والله؟
ايوب: كل مره من اسافر اكول يمكن هاي اخر مره اسافر بيها وحدي والمره الجايه يمكن انتي وياي. بس ماكو.

شمه: يالله شتريد بعد رايح لدبي هههه
ايوب: هي هم تنحسب روحه اذا واحد بحده.
حسيت من صوته ضايج رغم قبل شويه جان يضحك عادي مابي شي.
سكتنه بعدين كلي: شكد تحبيني شمه؟
شمه: اعتقد صرت مدمنه عليك. وماكو علاج لادماني هههه.
ايوب: وضعنه هذا لازم نشوفله حل. الى متى نبقى هيج. خل ارجع من السفر ونكعد ونحجي ان شاءالله.
سافر ايوب وطول الوقت وياي عالواتساب صور ومسجات.

اخر شي بالليل قبل ماانام دزلي: حب حياتي. تصبحين على خير.
لليل جنت نايمه دك تليفوني شفت رقم غريب رمش بس.
رجعت نمت وره شويه هم دك جاوبت: الو؟
سمعت صوت واحد يحجي بس بالبداية معرفت الصوت: هلو شمه؟، شلونج؟
شمه: الو منو؟
كلي: وائل، وائل..
ظليت متعجبه. باوعت للساعة ب ( 12 ).
كلته: منو وائل؟ يا وائل؟
وائل: وائل شدعوه جنت اوصلكم للدوام من جنتي بشركة النقاء.
اتذكرته كتله: هلو وائل؟ شكو؟ خوماكو شي؟

وائل: لا بس ردت احجي وياج
شمه: صدك جذب. الساعة ب( 12 ) وائل.
وائل: ادري الوقت متأخر بس والله موضوع ضروري واريد اوضحلج إلى صار.
شمه: شتوضحلي بهالوقت؟
وائل: من اجتكم امي
شمه: من اجتنه امك مجانت تعرف عندي طفل. ادري وبعد؟
وائل: مو هي جانت مموافقة لان انتي ارملة فاني فضلت مااكوللها على آدم لحدما تشوفج وتحبج.

شمه: وتحبني وتتقتنع. وائل الساعة هسه عبرت الثنعش واني جنت نايمه وهسه نعسااانه يعني ابد مو وكت افلام هندية، شنو وين كاعدين شنو هالحجي السخيف هذا؟
يعني شتريد هسه مخابرني؟ توك اتذكرت إلى صار؟
وائل: لا حاولت اتصل بيج هواي انتي متجاوبين ومرات يطلع مغلق طلعتي مغيره رقمج وهسه ياالله كدرت احصل رقمج الجديد.
شمه: منو انطاكياه؟
وائل: مو صعبه يعني واحد يحصل رقم
شمه: هسه المطلوب شنو؟

وائل: شمه اريدج تنطني فرصه. مجال حتى اقنع اهلي. امي تقريبا كدرت اقنعها بس اخواني معارضين.
شمه: اكولك انت عاقل لو مخبل لو شنو فلمك ههههه تحجي صدك انت؟

وائل: انت تره هذا ايوب مسويلج غسيل دماغ، ضال يضحك عليج وانتي مصدكه، ايوب يريد يلعب عليج بس مو نيته زواج لان مرته بت عمه يعني لايكدر يتزوج عليها ولايكدر يطلكها افتهمتي؟ وعنده ولد اجاه بعد مدري كم سنة يعني ميعوف ابنه علمودج افتهمتي شنو احجي؟ عرفتي ليش يلعب عليج؟ ليش تبيعين المشتريج علمود البايعج؟ شمه مثلي متلكين واحد يحبج ومتمسك بيج..
عفته يحجي وسديت التليفون..

خليت راسي عالمخده حتى ارجع اغفى. اريد اكعد اكتشف هذا الاتصال جان مجرد كابوس..
بقيت دقايق كلبي مقبوض حسيت نفسي اختنكت..
اكيد وائل يجذب. اكيد.
يريدني اترك ايوب لان يغار من عنده. يغار لان اختاريت ايوب ومااختاريته هو..
وصلني مسج كعدت بسرعة فتحته نفسه هذا رقم وائل: والله العظيم متزوج وعنده ولد واسمه امير اذا متصدكين سأليه ليش ميخطبج لعد؟ لان يخاف من بيت عمه. افتهمي هذا يلعب عليج بس وبعدين يعوفج.

ظليت ارجف من العصبية اتذكرت من كله سرمد ابو أمير.
معناها كلام وائل صحيح.
معناها ايوب يضحك علي. يلعب علي. معناها مثل ابوه واحد حقير.
كتبت لوائل: وشنو الدليل على كلامك؟
وائل: والله العظيم كلامي صحيح وسأليه وشوفي. واذا متصدكين روحي سألي عليه بشركتهم سألي الموظفين او اي واحد يعرفه وشوفي شكولولج.
اتصخم وجهج شمه. اتصخم وجهج شمه. ظليت ادك على خدودي.
صورت المحادثه البيني وبين وائل ودزيتها لايوب.

مجاوبني اكيد نايم لان فرق التوقيت بين العراق والامارات ساعة الامارات سابقه العراق بساعة. يعني هسه عدنه بالوحده الا ثلث يمه بالثنتين الا ثلث. اكيد نام.
ظليت افور.
احتاريت شلون اعاقب نفسي شلون اتصرف اذا طلع الحجي صدك؟
شسوي بروحي؟ انتحر؟ وامي وابني منو الهم، مصيبة ياشمه وطاحت على راسج.
تستاهلين. تستاهلين. على اي اساس تثقين بي وانتي تعرفين ابوه شنو وشسوالج؟

على اي اساس تصدكين بي وانتي صديقة عمرج شسوت بيج وشصخمت؟
ظليت مثل المخبله افتر بالبيت اريد الصبح بس يطلع..
المن اروح واسألمن عليه؟
من يجاوبني ويكولي الصدك؟
منو؟
---
---
ايوب.
باليوم إلى سافرت بي لدبي بالليل حجيت ويه شمه حسيت نفسي بعد مااكدر استغني عنها هالبنية.
قبل مااسافر جنت افكر اقنعها نتزوج بالسر بس هسه لا ليش اتزوجها بالسر من منو خايف وعلى شنو خايف؟

مو مهم عندي منو يقبل ومنو ميقبل كافي اريد اعيش حياتي منى تريد تبقى وياي خير على خير.
تريد طلاك ماعندي مانع. اصلا وجودها مثل عدمه بحياتي.
معناها بس ارجع احجي ويه امي بالموضوع.
نمت وخليتها على الله.
بس..
كعدت الصبح على كارثة.
شمه دازتلي مسج ممتوقعه.
هاي اللحظة إلى جنت خايف منها..
ماادري منو إلى دازلها هالمسج وكاتبلها ايوب متزوج وعنده ولد اسمه امير ويلعب عليج ومن هالحجي.
مكدرت ادزلها مسج لان شكتبلها بالمسج.

اتصلت عليها دك بس مشالته اول مره.
رجعت اتصلت عليها تليفونها مغلق..
ماادري شصار بيه من الصبح حتى ضغطي ارتفع واليوم عندي شغل واجتماع ضروري مااكدر افوته.
بيمن اتصل هسه يحل الموضوع لحدما ارجع.
هاي تتخبل هسه.
ارتاحيت ايوب. طلعت هسه واحد جذاب ولعبي. اكيد هسه تكول مثل ابوه. هي جانت متصورتك هيج لحدما امنت بيك وهسه رجعت اكدتلها ظنونها القديمة.
اتصلت على سرمد ميجاوب.
بيمن اتصل بالله.

اضطريت اروح اخلص شغلي واجتماعي ومخلصت الا الساعة بهدعش (11) الظهر.
رجعت اتصلت عليها مغلق.
اتصلت على سرمد هالمره جاوب.
---
---
شمه.
بقيت الليل كله كاعده منتظره الشمس تطلع اريد اروح للدوام ماكو غير سرمد اسأله.
حسيت نفسي مو بحلم ولابكابوس لا اسوأ.
كل شويه اعض ايدي لاشعوريا من الوم نفسي لان صدكته وحبيته.
ايدي صارت زركة وعيوني حمره من البجي.
بس صار الصبح شفت تليفوني دك ايوب اتصل.

مادام اتصل معناها الكلام صحيح، متزوج.
لو الكلام مو صحيح جان مااهتم ورد علي بمسج عادي لكن الكلام صحيح لذلك اتصل ميكدر يبرر بمسج.
غلقت التليفون.
لبست ورحت للدوام واحس الطريق صار سنة.
وصلت وجان سرمد بعده مواصل.
ظليت افتر بالمكتب عبالك وحده عدها ولاده. طلوك.
كل شوية واحد من الموظفين يسألني شبيج واكوللهم مابيه شي.
كعدت وطلعت التليفون وسويتله حظر. لااريدك تراسلني بعد ولااريدك تتصل.

اريد اغمض عيوني وافتحها الاكي نفسي بعدني لاداخله كلية ولامتزوجة ولامترملة ولامتيتمه ولا بركبتي مسؤولية ولا احبك ولااعرفك ولاتعرفني..
اريد الزمن يرجع حتى احذفك من ذاكرتي لان انت اكبر غلط بحياتي..
اني شمه. مااغلط هيجي غلط..
بس غلطت..
دخل سرمد واول مشفته رحتله لمكتبه. دكيت الباب وفتت: السلام عليكم
سرمد: وعليكم السلام هلو هلو شمه
شمه: عندي سؤال واريدك تجاوبني عليه ب إيه لو لا فقط.
سرمد: اوك سألي عيني.

شمه: مااريد لف ودوران اريد جواب بكلمة وحده لو اي لو لا؟
سرمد: اي كولي بالاول شنو سؤالج.
جنت طول الوقت احجي واني اتظاهر بالقوة بس من سألته بجيت: سرمد. صدك، صدك ايوب متزوج؟، اي لو لا الله يخليك جاوب.
ظل صافن بوجهي.
بعدين كلي: منو كلج هالحجي؟
من صفنته عرفت الجواب اي متزوج. ومن سؤاله اتأكدت.
درت وجهي ردت اطلع بس مخلاني سد الباب وكلي: كعدي وين طالعة وانتي بهالحالة كعدي.

شمه: ليش؟ ليش جذب علي؟ ليش عشمني بجذب؟ ليش شسويتله؟
سرمد: اهدي منا ناس وعالم وموظفين شبيج صدك جذب.
شمه: انت جنت تدري؟
سرمد: شمدريني هو مكايلج. لو ادري جان حذرتج وكتلج
بقيت ابجي.
حسيت بالغباء. شكد جنت غبية من صدكته.
هو هذا المثله هم يعرف يحب.
للظهر اجه سرمد كلي: ايوب اتصل يكول تليفونج مغلق.
شمه: وراح يبقى مغلق، سويتله حظر بعد ليحاول يتصل ولاحتى يدز مسج.
سرمد: زين احجي وياه شوفيه شيكول وبعدين قرري.

شمه: قررت وانتهى الموضوع مابيني وبينه حجي بعد.
بيومها مكدرت اكمل الدوام رجعت للبيت من وكت لان نفسيتي منهاره.
اسبوع بقى بدبي اني هذا الاسبوع خلصته بالمستشفيات.
يوميه اوكع وامي تحتار بيه.
كل يوم طبيب شكل وعلاج شكل.
صار عندي فقر دم.
حسيت نفسي ميته. بس النفس باقي بيه.
لااحس ولااحجي ولااكل ولااشرب ولاانام..
اخر شي اخذوني لناس كالوا سادة علويين.

دخلوني يم رجال جبير بالعمر ومره عجوز قرت علي وبعدين الرجال هم خله ايده على راسي وقره علي.
انطوا لامي مي كلوللها تسبح بي ومي اشربه.
حرمل ومثل البخور.
جانت جيرانه ام تيسير تجي تبات عدنه لان تخاف يصير بيه شي وبس امي يمي.
اتصلوا علي من الدوام امي كلتلهم هيجي وهيجي حالتها فحسبوني مجازه.
بعد الاسبوع شفت رقم غريب يتصل بس مجاوبته اكيد ايوب هذا.
لان حظرت رقمه القديم وحظرت حتى وائل.
بقيت بالبيت عشر تيام.

ماادري بيها بالدنيا طشت لو رشت.
ولوما الحاجه ومجبورة عالشغل فلا جنت اطلع بعد وابقى حابسة نفسي بالبيت لحدما اموت.
خجلانه من نفسي. خجلانه من تصرفاتي.
شلون سمحت لنفسي امشي وياه واحجي وياه واحبه؟
شلون سمحتله يلعب علي.
بعد مامرت علي اتعس عشر تيام بحياتي كلت لازم اداوم ميصير اني كل يوميه بشغل ووظيفة جديدة علمود ايوب واهله.
لازم اصير قوية واواجه. لازم اصير مثله صلفة.
عيني متنكسر.

الصبح لبست وكشخت وكعدت امي كتلها: ماما اني رايحة للدوام.
امي: هاا ماما. خاف توكعين يولي الدوام.
شمه: لا لتخافين مابيه شي.
امي: اوكفي خل اسويلج ريوك اول حتى تشربين علاجج لتطلعين بدون ريوك.
رغم العبره جانت خانكتني بس لخاطر امي كعدت واكلت وشربي علاجي كدامها وكتلها ادعيلي وطلعت.
مشيت بذلك الطريق الذي لطالما تأذيت منه.
بذلك الطريق الذي لم يهدي إلى سوى العذاب.
تمنيت لو انني رجل.

كي لا أُلام على غلط ارتكبته ولاعلى ذنب اقترفته.
تمنيت لو ان لي القدرة على حذف مااريد من الذكريات.
لكنت حذفت من ذاكرتي كل خيبات الامل التي مررت بها واولهم انت.
امشي وافكر هسه حياة مرته شلونها؟
اكيد حياتها جحيم بسببي.
ليش شمه ليش؟ هاي ذنبها بركبتج. انتي بنية وهي بنيه تقبلين وحده تجي تاخذ زوجج منج؟
متقبلين لو جان عندج زوج
وتموتين الف موته لو جان هو زوجج.
اوووف ياكلبي شكد تعذبت.
اتمنى مااشوفه بعد ولاالتقي بي.

كل هالعذاب بسببه.
امج وانتي وابنج وحتى الجيران متعذبين وياج بسببه.
شوفي حوبة مرته شسوت بيج. شوفي يوميه طبيب ويومية مستشفى.
اكيد تدعي عليج. اكيد.
بالدوام كلهم اتحمدولي السلامة والي جابلي علبة جوكليت والي جابلي بقلاوة والي جاب مدري شنو رغم علاقتي جانت بيهم مو قوية.
من اجه سرمد اتفاجأ من شافني كلي: توني ساد التليفون وياه. سألني عنج داومتي لو لا كتله لا.
شمه: منو؟
سرمد: ايوب بعد منو.

شمه: ايوب منو مااعرف احد اسمه ايوب.
ضحك. كلي: وعلى شنو مقهوره وصارلج ايام مريضه؟
شمه: لامقهوره ولاشي، غلطه واتصلحت.
سرمد: اف. بهالسرعة؟
شمه: ممكن منحجي بهالموضوع بعد مره ثانية؟
رفع حاجبه كلي: على راحتج.
جنت كاعدة اشتغل بس عيني عالباب متوقعه بأي لحظة يجي ايوب.
شكد حضرت حجي وشكد رتبت كلام.
وشكد اتخيلت الموقف واللقاء بينه من راح يجي واشوفه.

اتمنيت ابقى بنفس الشجاعة واحجي كل الحجي بدون بجي وبدون انفعال وبدون عصبية وصياح.
اريد ابين ممهتمه ولامعترفه بي وبحبه.
اريد ابينله انه مو مهم عندي وحبي اله مجرد تمثيل مثل حبه إلى.
خل يكول عني شميكول مو مهم.

الفصل التالي
جميع الفصول
روايات الكاتب
روايات مشابهة