رواية صراع الجبابرة للكاتبة روز الفياض الفصل الثامن عشر
ايوب.
شمه مطيتني حظر.
جربت اتصلت بيها من غير نفس الشي.
سرمد يگول ممداومه. معقولة بطلت؟
خاف سوت بنفسها شي؟
شسوي هسه؟، لااكدر اروحلها للبيت ولااكدر ابقى كاعد ومنتظر.
مدمنه عليك جانت تكول بس الحقيقة انت مدمن صرت عليها.
تأخرت ايوب. تأخرت هواي.
كان المفروض من البداية تكون صريح حتى متنطي فرصة لاحد يدخل بينكم ويخرب علاقتكم.
بس منو الحقير إلى گللها؟
بسيطة.
اول وتالي راح اعرفك.
هو تليفون وكم فلس واخليهم يسحلونك كدامي.
اتصلت على مازن صديقي الضابط: مازن حبيبي شلونك؟
مازن: هلا والله هلا ايوب
ايوب: شلونك شخبارك؟
مازن: الحمدلله اسأل عنك
ايوب: مازن. محتاجك بشغله
مازن: حاضر وممنون گول شعندك؟
ايوب: اول شي شسويتلي على ذيج الشغله مال البنية الكتلك عليها؟
مازن: يابنيه؟
ايوب: الكتلك اريدك تخوفها؟
مازن: هاا. هاا. اي لا دزيتلها واحد خوفها كنالها مرة الثانية نسحلج للمركز انتي واهلج.
ايوب: تمام. تمام. هسه اني شريد منك؟
مازن: شتريد؟
ايوب: عندي رقم تليفون اريد اعرف منو صاحبه. بأسم منو؟
مازن: اهاا. هاي لازم امر من المحكمة ياالله نكدر نطلع المعلومات والمحادثات.
ايوب: اني مرايد محادثات اريد بس اسم صاحب الرقم. ومااريد دوخة لا امر قضائي ولا اذيه. انت من يمك شوفلي الموضوع شلون يخلص وشكد ياخذ وانطيني خبر.
مازن: اوك. خل اشوفلك عرف. واسطه من جماعتنه وسهلة تدلل.
ايوب: اليوم او باجر اريد الخبر. ،
مازن: مو مشكلة.
رجعت للبيت لكيت امي نايمه وامير يمها.
صعدت لكيت منى هم نايمه.
حاولت اتصل بشمه. بعده مغلق. شنو الحل شسوي؟
بقيت طول الليل افكر. شسوي هسه.
باجر اروح لسرمد واخليه يدز عليها وحده من الموظفات للبيت تسأل عنها.
---
---
شمه.
صارت الساعة ب ( 11 ) الظهر مباقي شي ونطلع للبيت احس نفسي نعسااانه الليل كله اخلصه كاعدة اكول هسه يتصل ويكولي هالكلام مو صحيح.
هسه يتصل ويكولي احبج.
آخ. آخ يالقهر. عود ردتي تحبين مثل البنات؟
انتي شغل مثل البنات محصلتي. كلها تداوم وتشتغل بهدوء الا انتي لازم كل كم شهر بشغلة جديدة.
انتي زواج مثل البنات متهنيتي بي.
عن اي حب تحجين بعد!
حظج وتعرفيه زين لتلومين احد.
جنت مستغرقة وتركيزي معدوم. شوكت اتعود على عدم وجوده واركز بشغلي وارجع لحياتي.
سرمد: هلوو شمه
رفعت راسي باوعتله كتله: هلو بيك او رتاج
سرمد: تعاي شوية
راح مشى كدامي للمكتب.
اهووو مالي خلكك والله.
رحت وراه كال: شلونج اليوم؟
شمه: الحمدلله
سرمد: شنطلبلج؟ جاي؟ كهوة؟
شمه: ولاشي شكرا بس عندي شغل.
سرمد: الشغل ينتظر شوية.
بهالاثناء سمعت صوته وراي كال: السلام عليكم
رد عليه سرمد.
بقيت ساكته دكات كلبي لو تنسمع جان فضحتني.
بلعت ريكي وحاولت استجمع شجاعتي وكلت لسرمد: ابو رتاج. اني اترخص بعدين نحجي ان شاءالله.
ايوب: ابو رتاج.
يمكن اشر لسرمد حتى يطلع لان سرمد طلع قبلي.
تحركت اريد اطلع لزمني من ايدي كلي: شمه. اوكفي شوية
شمه: نعم؟
بقى واكف يباوعلي. واني من خوفي من نفسي مباوعتله ولاحطيت عيني بعينه. خفت اضعف.
ايوب: هيج بهالبساطة تنهين كل شي؟
شمه: شنهيت؟
ايوب: نهيتي حياتي وحياتج
شمه: حياتك ماشية تمام ومثل متريد زوجة وبيت واولاد مااتغير بيها شي بس اني طلعت منها. بس اللعب انتهى
ايوب: جنت اريد اگولج بس خايف
شمه: خايف. صح خايف تخسر الغبية إلى صدكت وامنت بيك.
ايوب: خل نطلع منا حتى نكدر نحجي. خليني اشرحلج كل شي.
شمه: بعد هههه بعد هم نطلع؟
ايوب: احنه لازم نتزوج بعد ميصير نبقى هيج.
شمه: احنه منو؟ بعد ماكو كلمة احنه. وليش نتزوج شتغير هسه؟ انكشفت اوراقك واجيت تضحك على عقل شمه. كلت هاي تحبني وتصدك بكل شي اكوله.
ايوب: اني اصلا جنت ناوي بس ارجع انهي الموضوع لان طول وكتلج قبل مااسافر بس ارجع نشوف حل.
شمه: شنو هو الحل مثلا؟
ايوب: نتزوج بعد شنو هو الحل.
شمه: هيج؟ بهالبساطة؟ وشوكت اعرف انت متزوج وعندك اولاد؟
ايوب: اول وتالي راح تعرفين.
شمه: والله؟
ايوب: هسه اني جاي اريد اعرف منو إلى دزلج المسج؟
شمه: ماادري.
ايوب: تره اني اكدر اعرف منو وراح اجيبه فكولي قبل مااعرفه منوبطريقتي.
شمه: اوك عرفه بطريقتك.
ايوب: كولي شمه. منو دزلج المسج؟ تعرفيه منو؟
شمه: حتى لو اعرف مراح اكول.
ايوب: لتحاولين تختبرين صبري، مو وكت عنادج هسه.
جان يحجي بهدوء واني هم بس جنت كوه مقاومة عصبيتي.
شمه: خلص ايوب قصة وخلصت. هو من البداية إلى صار كله غلط وجان لازم بيوم ينتهي، وانتهى.
ايوب: كافي لعب جهال شمه. فتحي الحظر وكافي لعب.
شمه: خير بعد شكو؟ اكو تمثيلية او جذبه تريد جذبها؟
ايوب: انطيني مهلة.
شمه: ترتب وضعك مدري امورك. ادري هاي حفظتها. وبعدين؟
ايوب: وبعدين إلى تردينه يجرالج. تعرفين كلش زين وكتلج الف مره مشاعري تجاهج مو لعب فما اريد اسمع بيج متخبلة ومسوية شي والحظر شيليه. زين؟
بهالاثناء دك تليفونه.
ايوب: اني هسه رايح لان مستعجل عندي شغلة مستعجلة. ديري بالج على نفسج وشيلي الحظر حتى اعرف احجي وياج، ياالله مع السلامة.
عافني وطلع.
بمنتهى البرود والثقة شيلي الحظر!
شنو هالثقة العندك!
بسيطة ياايوب، نشوف منو يشيل الحظر.
بس طلع اجه سرمد كلي: هاا اتصالحتوا؟
شمه: ليش هي عركة حتى نتصالح؟
سرمد: اذا مو عركة شنو؟
شمه: ماكو شي. شغلة صارت وانتهت وطلعت غلطانه بيها والحمدلله بعدنه عالبر.
سرمد: حقج. ايوب غلط من ضم الموضوع عليج هيجي امور متنضم.
شمه: إلى صار صار بعد
سرمد: وانتي بهالسهولة نسيتي يعني؟
شمه: ليش ابقى اجذب على نفسي خلص صار كل شي واضح.
سرمد: هو شنو مكتوب بي المسج بالضبط؟
جبت التليفون وراويته المسج.
سرمد: كلام يخلي اكبر علاقة تنتهي. منو اله مصلحة يخرب علاقتكم؟
شمه: او احد يريد ينصحني مو قصده سوء، شخص يردني افتح عيوني.
سرمد: منو؟ عرفتيه يعني انتي منو.
شمه: عرفته.
سرمد: اذا عرفه ايوب منو ميتركه.
شمه: ميعرف منو.
سرمد: بس هاي مو صحيح مال يخاف من بيت عمه. اني ماالومج على تصرفج بس اني اعرف ايوب واعرف وضعه. ايوب ميعرف شيريد اصلا.
---
---
ايوب.
وصلت لسرمد دخلت مشفتها بمكانها معناها ممداوم. بطلت اكيد.
دخلت كبل لسرمد لمكتبه شفتها كاعده.
حتى السلام مجاوبت عليه.
ماعندي تبرير مقنع ومااريد احل الموضوع بجذبة جديدة ومردت تصير مشكلة كدام الموظفين وكلها تعرف.
لذلك مجادلتها ولا حجيت بتفاصيل بس ردت اتعامل وياها بهدوء حتى متعاند ولان ردت اعرف منها اذا تعرف منو صاحب الرقم إلى دزلها المسج بس مقبلت تكول.
بعدني احجي وياها اتصل علي مازن يجوز كدر يحصل احد ممكن يطلعي اسم صاحب الرقم.
طلعتله.
مازن: ابو امير.
ايوب: هلو مازن بشر؟
مازن: حصلتلك واحد يكدر يعرف الرقم المن بس يكول فد يومين.
ايوب: ماشي. وهديتك وهديته موجوده اذا جابه صدك.
بيومها جان امي عدها موعد للدكتور. اخذتها اني ونور وامل فتحت وياها موضوع الزواج بالطريق: يمه لتعبين نفسج بعد بالبيت خليه يولي انت تره بطريقتج هاي تخلين منى تزيد متنقص.
امي: خليها تولي. انساها انت ليش حاطها بعقلك؟
ايوب: انساها؟ مو محسوبه علي مره بعد شلون انساها وشلون بالله حاط عقلي وياها؟ بس لا تطلعين مثل امها تكول طفلة.
نور: منو هي الطفلة؟ منى؟
ايوب: اي والله
امي: هسه خلونه ساكتين بلا مغثه
امل: متنطي بيها. بختت.
ضحكت امي كلتلها امل: والله، هسه اريد افتهم انتي ليش اتدافعين عنها شمسويتلج خادمتج؟ مداريتج؟ اشو حتى من وكعتي وانكسرتي مجتي شافتج مكالت عيب عمتي وام زوجي وبيبية ابني.
سكتنه كل احنه.
بعدين استغليت فترة الهدوء والسكوت كتلهم: اني شفتلي بنية بت حلال واريد اخطبها.
بقى الكل ساكت يمكن تصوروني اتشاقه.
ايوب: محد يعلق يعني؟
نور: تحجي صدك؟
ايوب: اي والله ليش يعني متصوريني اتشاقه مثلا سعيد بحياتي؟ لو مرتاح؟
امل: عاشت ايدك. من زمان المفروض تتزوج ممجبور تتحمل هيج مره لادفع ولانفع.
نور: والله ماادري. بس وابنك شلون؟ وبيت عمك؟
ايوب: ابني شعليه. ابني يبقى ابني شنو إلى راح يتغير. وبيت عمي شعليهم. بتهم مو آدميه شسويلهم يعني.
امي بقت ساكته وحسيتها ضاجت. اكيد خاف على نوارس.
من رجعنه بالليل من الدكتور سألتني امي: صدك الحجي الحجيته مساع؟
ايوب: اي حجي؟
امي: تعرف وحده وتريد تخطبها؟
ايوب: اي صدك.
امي: وين تعرفها؟
ايوب: جانت تشتغل عدنه وبطلت.
امي: ليش بطلت؟
ايوب: اني بطلتها
امي: ليش؟
ايوب: هيجي
امي: شنو يعني هيجي؟
ايوب: يمه. البنية خوش بنيه لتحاولين تدورين على سبب حتى تقنعيني ابطل.
امي: غير اعرف شتعرف عنها يايمه.
ايوب: يمه البنية جانت تشتغل عدنه وبطلت ضوجها واحد من السواق.
امي: واحد من السواق؟ لو ابوك؟
ايوب: المهم بطلت
امي: امم.
هزت راسها كأنما عرفت ابوي إلى ضوجها ولزكلها.
ايوب: البنية يتيمة ابوها متوفي واخوها بالخارج بس امها وابنها
كأنما سمعت شي عجيب. باوعتلي وكلتلي بعدم تصديق: عدها ولددد؟
ايوب: اي شبيج هيجي فزيتي ارمله وعدها ولد.
امي: وملگيت غير الارملة؟
ايوب: لا لكيت بس هي هاي العجبتني
امي: يمه دعوف هاي السالفه حبيبي لتخرب بيتك بأيدك مرتك حلوه وبت عمك مو غريبة وعدكم ولد ليش تدوخ راسك بالنسوان لتصير مثل ابوك ايوووب.
ايوب: يوم عوفي بت عمي على صفحة فكري بيه اني مو بيها اني ابنج وتشوفيني مشلوع گلبي ومتعذب ممرتاح متنقهرين علي؟
بعدين اني لو مثل ابوي جان هاي الفوك كاعده اميرة صارتلي خدامة بس حتى ارضى عليها بس المشكلة اني مااحب الحرام.
امي: يعني اني هسه خدامة صايرة لابوك حتى يرضى علي؟ انعم الله عليك.
ايوب: حشاج بس هسه ابوي بكل سوالفة وفضايحة ومع ذلك انتي ممقصرة وياه بشي. بس اني لان ماشي مستقيم ومدللها تكمز على راسي.
بقت امي ساكتة.
---
---
منى.
رجعوني مؤيد وابويه گوه مجنت رايدة ارجع.
ياريتني مرجعت. هذا بس يتأمر علي سوي هيج وسوي هيج عبالك جايبيني خدامه.
هالمره حگرته فد مره. ولا احاجيه اصلاً.
من يجي ويعتذر عود افكر احاجيه.
وطول سكوته هالمره لاهو حاجاني ولااني حاجيته.
لاحظته صار فتره هواي يراسل وهواي يحجي بالتليفون مو من طبعه يراسل ويستخدم برامج التواصل.
انتبهتله اكثر شي بالليل تليفونه بيده ومخليله رمز!
اول تالي ايوب يخلي رمز لتليفونه!
لاااا..
السالفة بيها إنَ..
ظليت اراقبه فتره وهو على نفس الحالة.
معناها عنده شي هالايوب مو خالي.
ولازم اعرف شنو هو.
شلون اكدر افتح تليفونه؟
بقيت اراقبه بدون ميحس.
اني متعوده انام من وكت مو مثله ماابقى للوحدة والثنتين بس اكثر شي لثنعش.
ظليت اسوي نفسي نايمة حتى من يكعد بالليل يراسل احاول اعرف منو او اعرف رمز تليفونه.
ووصلت للي اريده.
عرفت الرمز.
بقى بس انتظره من يدخل للحمام يسبح حتى افتح التليفون واعرف يراسل منو.
دخل يسبح مثلما خططت وفتحت تليفونه كل الاسماء والارقام جانت عادية.
كل المحادثات عادية.
الا هذا الرقم ليش مكتوب عليه ( ايوب خاص )؟
شنو يعني ايوب خاص؟
عنده رقم ثاني سري مااعرفه اني مثلا؟
بس الصدمة جانت بالمحادثات.
هاي وحده واسمها شمه!
منو هاي؟ ووين عرفها؟ وشوكت؟
اشوفه ذبني عد اهلي اثاري يريد يخلص مني حتى يخلاله الجو.
المفروض مااتفاجأ هو منو ابوك؟ عمي شلونه حتى انت ابنه تطلع مختلف.
بقيت ساكته محجيت لاحد لان مااعرف شنو لازم اسوي وشلون اتصرف.
بس حسيت كرهته ولعبت نفسي منه.
دورت بالاستوديو بتليفونه لكيت صورة للسي ?ي مالتها بس صورتها مواضحة. بس سجلت العنوان ورقم التليفون.
خليني افكر عدل قبل مااتصرف اي تصرف ممكن ينحسب علي.
ماكدامي غير نوارس اروح احجيلها وهي تنصحني.
نوارس: متأكدة من هذا كلامج؟
منى: طبعا متأكدة حتى المحادثات صورتها شوفي.
نوارس: لامااصدك. ايوب يحجي ويه بنات؟
منى: حتى تلوموني من احجي لو ازعل واضوج.
نوارس: انتي قابل تزعلين علمود هالموضوع؟ انتي تزعلين على شغل البيت وهالسوالف التعبانه.
منى: هسه شسوي دبريني؟
نوارس: هسه صرتي تدورين نصائح شكد نصحناج وشكد علمناج وفهمناج وگولنالج اهتمي بي متاخذين الحجي.
منى: هسه شلون كفرت سألتج واخذت رأيج؟
نوارس: دسمعيني بلا لغوه. مادام اخذتي الرقم والعنوان معناها خلينه اول شي نتصل بيها ونهددها.
منى: لا شنو نتصل بيها ختولي هي مال اتصال وحده طايحة حظ اكيد من جماعة عمي تلكيها.
نوارس: انجبي شهالحجي.
منى: مو قصدي بس يعني قصدي هو وين يعرف بنات. هاي اكيد وحده من ذولي اليركضون وره المتزوجين حتى يصرفون عليها.
نوارس: اي يجوز.
---
---
شمه.
اكو ارقام جانت تتصل على رقمي القديم بس محد يحجي. بس لا هذا وائل!
حظرتهم وخلصت.
سرمد جان عنده مكتب طيران غير شركة السفر والسياحة.
مكتب الطيران هذا للي يريد يحجز ويسافر داخل او خارج العراق عند طريق الطائرة.
بيوم من الايام كلي: شمه ربحتي تذكرة مجانية.
شمه: تذكرتيش؟
سرمد: شركات الطيران مرات تسوي دعاية فتنطي لاصحاب مكاتب خطوط الطيران تذاكر مجانية.
شمه: واني شكو بخطوط الطيران؟
سرمد: مو اني كل مره من ينطوني تذكره انطيها لواحد من الموظفين حتى يسافر ويتونس بس هالمره خليتها الج.
شمه: ليش؟
سرمد: مو اني مسافر هواي ومال من لبنان وانتي عزيزة علينه ونريد ندللج.
نبرة كلامه واسلوبه بدت تتغير. شنو فلمك سرمد؟
رجعت للبيت حجيت لامي كلتلي: التذكره ابلاش بس المصرف الاكل والشرب منين؟ بعدين شلون ترحين وحدج؟ ميصير.
شمه: لا اني اكول اذا انطاني التذكره ابيعها شتكولين ونروح بفلوسها لاربيل ويه شركتنه حتى هم بعد يسوولي خصم لان موظفة عدهم.
امي: شيودينه لاربيل؟
شمه: شالقصة ماما إلى يسمعج يكول اربيل خارج العراق دخلينه نشوف الدنيا مثل الناس حتى لو مره وحده شيصير؟
امي: غير نريد نوفر. باجر عكبة صار شي منين نجيب.
شمه: ان شاءالله ميصير شي واصلا متكلف هواي روحة اربيل ومنصرف عود مصاريف مالها داعي.
امي: الله كريم هسه هو خل ينطيج التذكره بالاول وبعدين كعدي خططي.
ثاني يوم بالدوام اتصلت علي لمياء.
من زماان محاجيه وياها: يابذات. شدعوه يابه سألي كولي.
لمياء: سوكتي عفية لتسوين نفسج مشغولة واني الفارغة
شمه: هذا الصدك. العصر يخلص دوامكم مو مثلي.
لمياء: اي بس انتي تداومين بالتسعة وترجعين للبيت تلث ساعات ترتاحين قابل مثلنه.
شمه: بس بالنسبة إلى جان الشغل عدكم احلى.
لمياء: وشجابرج تبطلين اشو اوستاذ مؤيد وردة ماكو مثله.
شمه: اكو شغلات هواي انتي متعرفيها انجبرت ابطل.
لمياء: مثل شنو؟
شمه: مثلا زوجة استاذ مؤيد جانت فد مره مسويتله مشكلة لان متريدني سكرتيره.
لمياء: اي هي بالله متعودين على خبالها زوجته. بس انتي منو كلج؟
شمه: وصلولي حجي
لمياء: اممم قصدج ابو عيون گريئة ههههه.
شمه: عابتلج.
ذكرتني بالماناسيته ولالحظة واريد انساه كوه.
كل وقتي افكر بي هسه يجي
هسه يتصل
هسه يدز مسج حتى واني حاظرته عندي امل يتصل ويعتذر ويتمسك بيه اكثر من قبل.
لمياء: شوفي اني مو فضولية بس عيونكم فاضحتكم جانت.
شمه: منو؟ منو مفضوح؟
لمياء: انتي ورشدي اباضه.
شمه: هههه صدك ضحكتيني شذكرج برشدي اباضه.
لمياء: تحبيه شمه؟
شمه: لمياء انجبي شنو هالحجي.
لمياء: لا والله صدك تره اعرف بينكم شي واضحة يعني من كثر جياته عالشركة بسبب وبدون سبب ومن استكاين الجاي الرايحة جاية من ايد شمه. تره كلها منتبهه جانت مو بس اني.
سكتت معقولة كل هالاشياء معروفه ومفضوحة واني ولامنتبهه؟
شمه: شنو جياته قابل مجان يجي لشركتكم الا من اجيت اني.
لمياء: لا جان يجي بس من يسافر اوستاذ مؤيد.
شمه: زين اذا ملاحظة كل هالاشياء ليش مكلتيلي تره هو متزوج ياشمه؟
لمياء: واني شمدريني متزوج. تره هو ميحجي ويانه علاقته بينه رسمي سلام وعليكم السلام من اجيتي انتي مو كتلج من اجيتي اتغير.
شمه: اي تغير براسي.
لمياء: ليش شسوالج؟
شمه: مسوالي شي اني سويت لنفسي.
لمياء: تحبيه؟
دمعت عيوني كتلها: تصدكين اذا اگولج احس نفسي مخنوگه بدونه. تصدگين اذا اگولج حاظرته بس اتمنى يراسلني حتى لو غصبن عني.
لمياء: اوووف شمه قهرتيني، يضرب الخب شو بيزل.
عفطت من سمعت شگالت وبقيت اضحك لحدما تعبت: ههههههههههههههههههههههههههههههههههههههه ههههههههههههههه ههههههههههههههه هههههههههههههههه
لمياء: شدعوة عيني مسامعة بهالجملة؟
شمه: لا لا سامعة
لمياء: استفيدي مني استفيدي من خبرتي بالحياة.
شمه: اوك ام الخبرة اريد اخذ رأيج بفد موضوع.
لمياء: اي اخذي
شمه: شأخذ؟
لمياء: رأيي غير؟
شمه: خاف كلبي ناقص انوب انتي اجيتي زايده.
لمياء: شبيج غير انتي تكولين اخذ رأيج؟
شمه: ديالله يالله. اكولج اتمنى اروح لاربيل اذا رحت ترحين؟
لمياء: على حسابج؟
شمه: شكد بطرانه ياالله هو اني رايحة على حساب الشركة.
لمياء: ماادري. شوكت ترحين؟
شمه: خل اشوف شغلة اذا صارت اگولج ونتفق على موعد نروح بي سوه اني وياج وامي وأدومي.
لمياء: اوك
---
---
ايوب.
وره كم يوم اتصل بيه مازن: ابو امير جبتلك الاسم.
ايوب: تمام دزلياه بمسج اذا تكدر.
مازن: اوك.
وره دقايق دزلي مازن البيانات.
مصدكت من قريت الاسم.
معقولة انتَ.
ادري شجلبت شلزكت لخاطر ربك.
بس خلصت شغل اخذت السيارة ورحت لشمه.
شفتها توها طالعة من الدوام الظهر.
نزلت صحت عليها شافتني بس غلست.
رحتلها كتلها: متجاوبين هاا؟ ميخالف شمه سهلة.
شمه: شنو يعني سهلة؟ دتهددني يعني لو شنو؟
ايوب: مو ايوب إلى يهدد مره، المفروض انتي تعرفيني كللش زين.
شمه: شتريد ايوب مو حجينه وانتهينه؟
ايوب: لا محجينه ولاانتهينه مو على مزاجج هو. المهم اني جاي حتى اگولج بس هذا الكلب وائل گوليله ليراويني وجهه بعد بالشركة وخليه يختفي احسنله لان والله اذا الزمة الا اخلي يتربى من جديد.
شمه: شبي وائل؟
ايوب: شبي وائل؟ خفتي عليه؟ بسيطه شمه لخاطر خوفج هذا على قيس ابن الملوح الا اخليه عبره.
شمه: والله تسويه عبرة تسوي شوف شنو هذا شي بينكم مالي علاقة لا أگوله ولايگولي.
ايوب: على اساس ميتصل بيج، بس من دزلج المسج ايوب متزوج.
شمه: مو هو گلي.
صرت عصبي ظليت اصيح عليها بالشارع: لتجذبين، لتجذبين. لتدافعين عنه كدامي. طلعت رقمه واسمه وكل بياناته من شركة الاتصالات، تدافعين عنه كدامي بلا خجل تردين تختبرين ردة فعلي لو شنو؟ لتلعبين هيج وياي شمه لان اتعبج.
شمه: لا ادافع عنه. لان هو الوحيد إلى كشفك. وانت هسه جاي لهنا ومحترك دمك لان كشفك وكشف جذبك؟ على اي اساس تتحلفله؟ وليش اخجل؟ الولد مأذاني مثلك.
ضربت تلو الاخرى
ماان انزل يدي لارتاح حتى تصفعني الحياة صفعة اقوى من الاولى واشد.