رواية صراع الجبابرة للكاتبة روز الفياض الفصل التاسع عشر
تتوالى الصباحات صباح يتلو صباح وكلها متشابهه الا منكِ فانتِ كشمة عطر الياسمين.
تنعشين كل مشاعري بمجرد رؤيتي لطيفك.
صغيرتي.
بكِ اكتملت حياتي. واكتمل ذلك الشعور الذي كان ينقصني.
وبكِ اكتمل.
ايوب.
طلبت من مازن يجيب وائل يمهم ويحققون وياه.
جنت حاس اكو احد وراه مو من نفسه اتحرك واتصل بشمه وين جان ذيج الفتره وليش هسه يالله حجه؟
اريده يخاف حتى يحجي.
بعد يومين اتصل بيه مازن كلي: ايوب تره الولد طلع مدفوع.
ايوب: مثلما اتوقعت يعني مو من نفسه اتحرك.
مازن: هسه شنو تريد؟
ايوب: سلامتك خل يروح مااريد منه شي بس منو دافعه؟
مازن: بنية. دزيتلك اسمها برسالة.
ايوب: ماشي.
شفت الرسالة إلى دازها مازن وطلع توقعي صحيح.
بسيطة.
نخلص من بلوة نوكع بوحده ثانية.
---
هبة..
بعد إلى صار ذيج المره ويه شمه وايوب مشفتهم.
بس وراها بكم يوم جنت طالعة وطبكت علي سيارة شرطة بيها شرطيين.
واحد نزلي والثاني بقى كاعد بالسيارة بس يباوعلي كلولي: تره نعرف كل شي عنكم انتي وجماعتج ذنيج الحلوات.
هالمره راح نعوفج سماح بس اذا شفت لو سمعت ماخذه وحده لذاك البيت اطين عيشتج. امحيج من الوجود. اعتبريه هذا انذار. المرة الجاية ناخذج انتي واهلج.
رجع صعد بالسيارة وراحوا وبقيت بمكاني ارجف.
منو كايللهم علي؟ معقولة مراقيبن البيت؟
رجعت للبيت ركض. بقيت شهر كامل حابسة نفسي بالبيت واخاف اطلع.
شوية شوية بديت ارجع اطلع بس بقيت بدون شغل.
حاولت ودورت ماكومكان مناسب. بقيت كاعده بالبيت منتظره الحجي يشوفلي شغل على عرفه.
وره فترة اتصل بيه وائل.
هذا البطران. بعده لهسه متيم بشمه.
خابر يسألني عليها. غير مطفي هو اني وين اعرف اخبارها لو عندي تواصل وياها.
الحقيرة حظرتني رأسا فوك مشغلتها وعلمتها.
اكيد هذا ايوب حشا راسها علي، انوب يكول مرتي ومتزوجها بالسر.
هسه جذب جذبه معقولة. بس هذا ابوك المخرف صدك وعافها.
هو انت جنت يومية طاردها.
بس انت كول انعجبت بيها.
وائل: يعني متعرفين اخبارها. اتصلت عليها كم مره بس طلع مغلق تليفونها.
هبة: مغلق لو حاظرتك؟
وائل: لاهذا رقمي جديد متعرفه ماعليه حظر.
هبه: والله مااعرف اخبارها لان هذا ايوب الكلب لاحس مخها واكيد كللها تحضرني.
وائل: يعني احنه منخلص من ايوب؟ ادري شنو علاقته هو بيها؟
هبة: يضحك عليها مثل ابوه واحد فاسد.
وائل: فعلا يضحك عليها بس هي متفتهم وغرتها الفلوس.
هبة: اي تلاكي يجذب عليها يكوللها احبج ومن هالحجي البلا فايده.
وائل: ادري هر مو متزوج؟
هبة: اييي متزووج وجان ميصير عدهم اطفال وهسه يالله قبل فتره صار عنده ولد وسموه امير.
وائل: ليش لازكة بي اذا متزوج؟
هبه: تلاكي مكايللها متزوج. لان اعرفها اني هاي الغبية تدور مثاليات.
وائل: زين شلون نخليها تعرف؟
هبه: انت. ظل اتصل بيها لحدما تجاوب وانصحها. گوللها متزوج تره وعنده واد واسمه امير وحتى مرته تصير بت عمه.
دخلت لوائل من باب النصيحة انصحها وهي ثولة ومتعرف وهذا مقشمر عليها ومشت عليه السالفة. كون بس يحصلها.
حرامات ياشمه. خسرتيني. خسرتي الوحيدة الجانت تعلمج وتنصحج.
جنت اريد افيدج. لو موكعه الحجي احسنلج من هالبهذلة.
اكليها هسه.
اذا مخليتج تجين ترجعين تتوسلين.
جنت متأملة اوكع ايوب بس مااعرف شعجبه بيج.
بطلني من شغلي علمودج. بسيطة ايوب
---
---
شمه.
صاح علي ايوب واني طالعة من الدوام غلست مشيت واجه وراي.
فشلني يصيح علي بالشارع. اتخبل من دافعت عن وائل.
صحيح وائل ضوجني وغثني لان دز امه وغثني اكثر لان مكايل لامه عندي طفل بس مع هذا يستحق ادافع عنه لان نبهني وفتح عيوني.
قهرني لان يتصور ادافع عن وائل علمود اثير غيرته، لو من يكلي على اساس ميتصل بيج. وكم مره حجيتله عن موضوع وائل وكتله حظرته بس الظاهر يشك بيه. ليش؟
شنو شاف علي. او يجوز هي حجه حتى يطلع الغلط مني ويبرأ نفسه..
بديت اكرهك ايوب.
هاي حجه اكيد حتى تخلص مني. يمكن جنت مال مني واجتك فرصة تخلص. بحجة وائل واتصال وائل، بس شلون عرف هذا رقمه؟
عزاا هذا بس لا صدك يسوي شي لوائل؟
شلون شسوي بالله؟
اتصل على وائل احذره؟ لو اغلس؟
لا لا لتصيرين غبيه خليج بعيده عن الكل، عوفيهم نارهم تاكل حطبهم.
ظليت بقلق خاف يصير شي وبعدين اتطيح براسي.
بس بقيت مقهوره يعني لاحاول يبرر لاحاول يطلعله عذر حتى لو بالجذب.
محاول يبنلي هو متمسك بيه حتى لو بس حجي.
اكره نفسي كلما اتذكر حبيتك.
شلون حبيتك هيجي بمنتهى الغباء؟ شلون جنت عميه لهدرجة؟
كلما اتذكر حجاياتنه سوه اكره الساعة إلى عرفتك وشفتك بيها..
بقيت يومين مره مقهوره ومره خايفة بس بكل الحالات مشتاقتله.
تمنيت مثل زمان قبل من جان اكو عدنه تليفون ارضي.
جان اتصلت بي اسمع صوته بدون مااحجي وياه. ولا يعرف منو المتصل.
تمنيت يتخبل مثل المره الفاتت من اختفيت اسبوع ومكدر يعرف اخباري واجالي للبيت بحجة يوصل امي.
تعبت من الامنيات وماكو شي.
ثاني يوم رحت لسرمد اسأله عالتذكره واني مستحية. يعني هو منطيني تذكره مجانية وهم اتشرط.
دخلت عليه للمكتب جان يحجي بالتليفون والظاهر ويه بنية لان بصوت ناصي وابتسامة عريضة ومن شافني دخلت كللها: دقيقة بس من رخصتج.
رجع التفتلي كلي: هلو شمه. اكو شي؟
شمه: خليها بعدين ماادري بيك مشغول اسفه.
سرمد: لا لا اتفضلي مو مشغول. كطع الخط وكعد عدل كلي كولي يابه شرايده؟
شمه: علمود التذكره المجانية
سرمد: اي شبيها؟
شمه: يصير ابدلها
سرمد: لا ميصير هي تذكره الى لبنان ليش تبدليها؟
شمه: لان مااكدر اروح وحدي صعبة واصلا اكيد احتاج مصاريف السفر مو بس تذكره
سرمد: امم. صحيح وخصوصا لبنان غاليه
شمه: يصير ابدلها بتذكره لاربيل
سرمد: واربيل شلون ترحيلها وحدج؟
شمه: لا مو وحدي امي وياي
سرمد: اممم، اوك براحتج اربيل. اربيل.
شمه: شكرا. دوختك ويايه.
سرمد: لاااا افه عليج لادوخة ولاشي اني ردتج تتونسين وتنسين إلى صار وتنسين المغثة بس يالله حتى اربيل حلوه.
شمه: شنسوي بعد كلمن يمد رجليه على كد لحافة.
سرمد: بالعكس الانسان لازم يجرب يعيش.
شمه: يعيش على كد وضعه وامكانيته.
سرمد: لاهاي معناها ميعيش اذا على كد امكانيته. خليج طموحة ودائما اختاري احسن شي لتخلين شي بنفسج
شمه: هههه ومنين ادفع اذا مااخلي شي بنفسي منين اجيب.
سرمد: هالركبة سدادة شتردين شتحتاجين كولي تره مو بس ايوب عنده ويدلل احنه هم نقدر ونعرف الخامه.
شمه: خامتيش؟
سرمد: خامة البشر.
شمه: اهاا.
طلعت من سرمد واني افكر بكلبي هذا تلميحاته كل فتره تصير اقوى من إلى قبلها. شنو مو بس ايوب يدلل؟ شنو احنه هم نقدر؟ اي هو اذا انت صديق ايوب شتوقع يعني منك. صحيح لحل الان انت ممتجاوز بس مو حلو اسلوبك.
رجعت لمكاني دك تليفوني امي كالت: هاا ماما شلونج؟
شمه: هلو ماما.
امي: اذا تكدرين تطلعين من وكت اليوم؟
شمه: ليش؟ شكو؟
امي: اريد اروح لبيت ام علي هاي سارة يكولون مريضة حيل وبالمستشفى.
شمه: خطيه شبيها؟
امي: اسم الله يكولون طالع عدها ورم بالقولون وميكدرون يشيلوه
شمه: اسم الله ياربي دخيلك شنو فجاة طلع؟
امي: لا هي دائما امها تكول متأذية بس تعرفين دكاترتنه شلون دكاتره يجربون كل الادوية براس المريض لحد ميلكون العلة عاي اذا لكوها.
شمه: اي والله.
امي: همزين الله سخرلنه ذاك الولد من اتمرض آدم خوش الله ينطيه
شمه: يا ولد؟
امي: مديرج مدري وياج جان يشتغل بوقتها؟
عرفت قصدها على ايوب كتلها: هاا. ابو امير
امي: هو اسمه ابو امير؟
شمه: يكولون
امي: يالله شوفي اذا يقبل تطلعين وانطيني خبر حتى اجهز نفسي.
شمه: تردين اروح وياج؟
امي: لا لا ابنج يخاف ويظل يبجي ويخبصني مااكدر لااحجي ولااسولف.
شمه: اوك. خل اشوف المدير وارجع اتصل بيج.
ضجت على سارة خطيه هالمسكينه.
رحت اريد اترخص من سرمد لكيت يمه ناس رجعت لمكتبي.
بقوا تقريبا ساعة يمه وطلعوا.
بهالاثناء رجعت امي اتصلت: الوو؟
شمه: الو هاا ماما هسه رايحه للمدير جانوا يمه ناس.
امي: لج ماتت
شمه: منو؟
امي تبجي جانت خوفتني.
امي: سارة بت ام علي ماتت.
شمه: يااء، شوكت مو قبل شويه كلتي بالمستشفى؟
امي: هسه سمعت خواتها يصرخون وطلعت لكيت تيسير وولد الشارع ملتمين ابابهم.
سديت التليفون ويه امي وظلت دموعي تصب. انقهرت على سارة حيل لان جانت بشر نقي مامخلوط مثل باقي الناس.
لاأذت احد ولا ضايقة احد.
وآخر ايامها جنت دوم اجي على بالها واحس جان عدها حجي إلى بس متعرف تحجيه.
ترخصت من سرمد حتى اطلع للبيت لان امي تريد تروح للعزا.
طلعت ووكفت عالشارع اخذ تكسي مااريد اتأخر لان امي تنتظرني الظرف مو مال ارجع بالكيه.
وكفت تكسي وشفت سيارة ايوب وكفت. صعدت مباوعتله.
وصلت البيت لكيت امي گاضيه نفسها من البجي. بس وصلت لبست عبايتها وراحت لبيت ام علي.
بقيت يم آدم بالبيت وره شوية سمعت صوت البجي والصراخ عد بيت ام علي رحت وكفت وره الباب الخارجيه اباوع شكو شفتهم جابوا التابوت واشوف ام علي شلون تصرخ وتبجي على بتها الله يرحمها.
سبحان الله رغم هالبنية مو بعقلها بس الضنه عزيز شميكون.
اتذكرت من اتوفى ابوي الله يرحمها وظلت عيوني تصب وآدم يمي يباوعلي ويبجي على بجيي.
كتله: ابجي على جدو بالله انت مالحكت على ابوك ولا اني ودعته.
وره شوية اتصلت لمياء كالت: شبيج اليوم صوتج مدري شبي؟
شمه: والله مالي خلك
لمياء: شصاير خو ماكو شي؟
شمه: جيرانه خطيه اتوفت واضطريت اطلع من الدوام وارجع للبيت.
لمياء: الله يرحمها. جبيره لو زغيره؟
شمه: لا جبيره خطيه بس مريضه
لمياء: انا لله وانا اليه راجعون
لمياء: اگولج شصار على سفرة اربيل؟
شمه: اي اوك حاجيت سرمد وكال اوك
لمياء: يعني نروح بالباص؟
شمه: اي طبعاً بالباصات ويه شركتنه.
لمياء: انطيني خبر من تصير حتى احجز.
شمه: اوك. ان شاءالله
---
---
منى.
اتفقنه اني ونوارس نحط حد لهاي صاحبة ايوب.
نوارس كالت نخابر ونطيح حظها بس اني كتلها لا هاي ماكو اسهل منها تنطينه حظر وترجع تحجي وياه بكل صلافه.
بقيت اني افكر وهي تفكر لحدما اتصلت علي وره يومين واتفقنه على خطة. لكن تتفيذ هالخطة لازم يكون على موعد سفر مؤيد او يكون طالع ومتأكدة منه يتأخر بالرجعة.
اتفقنه نروحلها ونحجي وياها وجهاً لوجه احسن.
ظليت محتارة الرقم إلى بتليفونه يختلف عن الرقم إلى بالسي ?ي إلى لكيته بالاستوديو مال تليفونه.
اخاف تطلع مو نفسها وفشلة لو اتصلت بالرقم إلى بالسي ?ي..
شلون اتأكد هي هاي نفسها.
نوارس تگول سامعة هذا الاسم بس ممتذكر وين؟
المشكلة الصورة مو واضحة بالسي ?ي.
وره كم يوم نوارس اتصلت بيه وكلتلي: هاا منى يالله جهزي نفسج يالله.
منى: هاا طلع؟
نوارس: اي طلع راح.
منى: يتأخر؟
نوارس: اي اي يتأخر رايح هو وايوب لفاتحة مال واحد يشتغل وياهم ابوه متوفي.
منى: خاف يعزون ويرجعون بسرعة؟
نوارس: لا لا متشوفيهم طلعوا مستعجلين راح يبقون لليل ويرجعون لان صديقهم وعيب يرجعون بسرعة. الصديق وقت الضيق.
منى: ياعمي ياصديق هو وكت اصدقاء. يالله خل اروح اجهز نفسي على متجين.
نوارس: اكولج بس اخاف امي متكدر عالجهال بحدها جهالي وابنج؟
منى: لعد وين توديهم مااكدر اخذ امير وجهالج لازم يبقون خاف يرحون يفتنون علينه.
نوارس: هههههه يالله اوك.
بدلت وكشخت لازم من تشوفني تشوفني بكامل اناقتي.
من خلصت اتذكرت اني مكايله لايوب راح اطلع واذا طلع خاف يسويلي مشكلة مثل ذيج المره واخاف يعرف من عمتي المشكلة مااريد اتنازل واحجي وياه لان هو هسه مشغول بغيري وبس تبتعد عنه راح يرجع يحجي وياي.
ظليت واكفة عالدرج محتاره اطلع واغلس لو اتصل بي او شسوي؟
بعدين كلت هسه هي نوارس طالعة بدون علم مؤيد بقت علي واذا حجه اگوله اختك هم طلعت من وره اخوي.
اگول لعمتي بس.
نزلت لعمتي كتلها: عمه؟
عمتي: هاا عمه؟
منى: عمه راح تمر علي نوارس حتو نطلع سوه للسوك اجيب كم شغله لامير.
عمتي: خوش بس مو تتأخرين خاف ايوب يزعل.
منى: لا لا ان شاءالله منتأخر عالسريع نشتري ونرجع.
وره شوية سمعت صوت سيارة نوارس بره كلت لعمتي: اجت نوارس يالله اني رايحة.
عمتي: مو تتأخرين يمه.
نوارس نزلت جهالها يم عمتي وانطلقنه.
العنوان إلى عندي مو بعيد لكن ازدحامات بغداد مزعجة.
منى: ماكو غير هذا الطريق؟
نوارس: نفس الشي كلها ازدحام هسه.
منى: تره راح يصير المغرب واني كلت لعمتي بسرعة نرجع.
نوارس: يالله مبقى شي بس هالتقاطع.
دخلنه لمنطقتهم فعلا المغرب. وبقينه وراها اكثر من نص ساعة نفتر بالشوارع منعرف بالضبط وين عنوان البيت لحدما وصلنه لمحل زغير كناله: ندور على ناس هنا اذا تعرفهم؟
ابو المحل: منو؟
نوارس: منعرف بيت منو بس عدهم بنية اسمها شمه؟
ابو المحل: مااعرف
جان اكو ولد شاب واكف يشتري گال: خاف بيت ابو سلام؟ عدهم بنية اسمها شمه. مو هم العدهم ولد سافر هو وعائلته للخارج؟ وابوهم مات قبل فتره؟
نوارس: منعرفهم بس البنيه نعرفها
كال: زين هي زوجها متوفي قبل سنتين مدري تلاثه؟ وعدها ولد؟
نوارس: ماادري انت بس دليني وين بيتهم واني اعرف الباقي.
كال: مو هذا الشارع لا الوراه فوتي عاليمنه مو اول بيت ولاثاني بيت ثالث بيت بيتهم.
شكرناه ورحنه.
منى: اريدج تطيحين حظها. زين؟
نوارس: لتخافين العبلج بيها لعب خرابت البيوت هاي. بس انتي هم لتسكتيلها.
منى: اني مااعرف اصيح واعيط تعرفيني.
نوارس: اي خطيه تكسرين الخاطر. القط ياكل عشاج من الطيبه والادب.
منى: ههههههه محسيتني اني شريرة.
دخلنه للشارع إلى كال عليه الولد ووگفة اباب البيت الثالث على حسب الوصف.
شفنه سيارة نزلت منها بنية ودخلت لنفس البيت.
نوارس: يمكن هاي هي؟
منى: دنزلي خلي نصيحلها.
نزلنه بس هي دخلت للبيت وسدت الباب.
دكينه الباب رجعت طلعت كالت: نعم اتفضلوا؟
منى: مرحبا عيني؟
شمه: اهلا وسهلا
منى: انتي شمه؟
شمه: اي اني. اتفضلي؟
منى: عدنه شغلة وياج. فد موضوع خاص.
شمه: اوك اتفضلوا مو عالباب نحجي.
منى: لا لا مو مال ندخل ونتضايف. نحجي هنا احسن.
بهالاثناء طلعت مره جبيرة من جوه من البيت گالت: ها ماما شمه منو؟
دارت عليها شمه كلتلها: مااعرف ماما خطار.
المره: هلا بيهم خل يتفضلون ليش واكفين بالباب
شمه: ميقبلون يفوتون گتلهم مقبولوا.
بقت الحجية واگفه واني گتلها: عندج تليفون؟
شمه: اي عندي ليش؟
حتى اتأكد هي منو بيهم هل هي صاحبة السي ?ي نفسها لو هي ام رقم ( ايوب خاص ) دكيت على الرقم إلى بالسي ?ي رأساً دك عدها
رادت تطلع التليفون كتلها: لا لا لتطلعيه اني إلى داتصل بيج. بس اريد اتأكد من الرقم.
ظلت عي واكفة متعرف شكو.
وحتى اتأكد هي نفسها صاحبة الرقمين لو لا رجعت اتصلت على الرقم الثاني ( ايوب خاص ) وهنا المصيبة هم دك عدها..
يعني هي نفسها شمه صاحبة ايوب.
كالت: شكو؟ ومنين تعرفين ارقامي؟
نوارس: اني ماادري وين شايفتج؟
شمه: واني هم مشبهه عليج
منى: عوفج من التشبيه ركزي وياي، تعرفين اني منو؟
شمه: لا والله لاصغرا بيج.
منى: اني زوجة ايوب حبيب الگلب.
---
---
شمه.
ايهما اصعب؟
الشعور بالصدمة ام الشعور بالخوف؟
هكذا احسست بكلا الشعورين عندما فاجأتني تلك الفتاة الجميلة بمن تكون.
حجزت لاربيل إلى ولامي ولآدم حتى نروح نتونس ويه لمياء واهلها وباجر موعد سفرتنه ان شاءالله.
خلصنه اليوم تليفونات اني ولمياء طول النهار نحجي عالسفرة ونخطط.
رجعت جانت الدنيا ظلمة لان بداية شتا وتظلم الدنيا من وكت.
دخلت البيت وصلت لباب المطبخ شفت امي تشتغل بالمطبخ سلمت واندك الباب.
رجعت طلعت الباب فتحته شفت بنات اثنين.
مااعرف منو همه بس اتفاجأت وحده منهم تعرف ارقامي!
طلعت امي وراي تريد تشوف منو عالباب وويامن احجي.
وهنا الصدمة الجبيرة من كالت: اني زوجة ايوب حبيب الگلب.
بقيت لاآخذ ولاانطي بس اباوع وساكتة.
كل تفكيري يم امي.
امي واكفة وتسمع الحجي.
منى: شوفي حبيبتي اني اگدر اسويلج فضيحة وقصة بالمنطقة وافضحج واخلي الميشتري يتفرج عليج، بس اني لان بت اصول واعرف العيب گلت احجي وياج بأسلوب محترم يمكن تأخذين الحجي والنصيحة.
الحجيه: شكو؟
منى: خالة انتي خليج على صفحة الحجي مو الج.
شمه: شتردين؟
منى: ابتعدي عن زوجي احسنلج. ماكو تره والله اندمج. واذا عالفلوس تره هوايه عدهم فلوس مو بس هو شوفيلج واحد غيره يصرف عليج.
شمه: انتي شدتحجين؟
منى: ولاكلمة زين تره محادثاتج انتي وياه عندي مصورتها ومحتفظه بيها. زين؟ هالمره هذا تنبيه الج المره الثانية اذا بقيتي لازكتله والله اشهرج والعب بيج لعب مو عبالج اخاف من امثالج طايحات الحظ إلى شكو واحد متزوج يركضن وراه، صاير موديل منو يموت زوجها متخلي رجال متجلب بي. طاح حظجن حتى طاح حظجن. رجال متزوووج شعندج مجلبه بي؟
شمه: اولا احترمي نفسج. ثانياً مابيني وبينه شي.
منى: ايوووه والمحادثات عيني هاي شنو؟
شمه: حجه وياي ومجنت اعرف بي متزوج واول ماعرفت ابتعدت وسويتله حظر اصلا.
منى: عفيه عليج. هيجي اريدج تصيرين. بس الحظر ميكفيني اريدج تبدلين ارقامج كولها. افتهمتي؟
بهااللحظة سمعت صوت وراي وكف گلبي..
الحزن والالم عنصران وفيان لذوي القلوب النقية.
فلا الحزن يقوى على فراقهم.
ولا الالم يستطيع تركهم.
اعان الله قلباً ابتلاه الله بهذا النوع من الوفاء..
اعان الله قلبي، ??.