رواية صراع الجبابرة للكاتبة روز الفياض الفصل السادس

رواية صراع الجبابرة للكاتبة روز الفياض الفصل السادس

اشرلي بيده اسكت.
ايوب: اذا متصوره انه الحجي يكدر يتصرف بكيفه ومزاجه فأنتي غلطانه. واذا متصوره انه هذا حلاله وملكه فأنتي هم غلطاانه.
شمه: ممتصوره اي شي عيب هالكلام. الحجي بكد ابويه!

قاطع كلامي واتجاهلني ولاعبالك احجي: واذا متصوره الحجي ميت عليج ويحبج فأنتي هم غلطانه. الحجي من يوم يومه منو تجي جديدة ولوكيه تركض وره جم الف لو هديه يكيف بيها، يعنننيي يكضي وياها وكت ويتونس براسها وتالي يشمرها من يمل. افتهمتي؟
شمه: انت.
ايوب: خليني اكمل. هسه طبعا تكولين هذا شنو من ابن إلى يحجي على ابوه هيجي ويشوه سمعته؟ لكن للاسف هذا الشي معروف هنا كل الموظفين يعرفوه.

ماله داعي تصيرين عصبيه وتزعلين لان اني هسه نصحتج وبينتلج الحقيقة إلى يمكن تكون غايبه عنج.
ديري بالج على نفسج ولتنغرين بكلامه ووعوده تره كلها يومين يشوف غيرج ويكلج بيباي.
قبلج حاولن وياه هواي بس هو هذا حده هديه. زياده عالراتب. سفره. قطعة ذهب. طلعات ومطاعم. كلها اشياء تافهههة متسوه المهم توصله للي يريده..
بعدج زغيره والف واحد يتمناج حرامات تمشين بهالطريق.

ظليت فاتحه حلكي بعد هالكلام مااعرف احجي شي. هذا شيحجي؟ شعباله اني شنو؟
ظليت متحنطة مااعرف شلون ابدي وارد.
باوعلي كلي: خلص حجيت كل الحجي العندي. بقت يمج. انتي حره بنفسج عسى متذبيها بجهنم. اني ريحت ضميري يمكن تكونين متعرفين حقيقة الموقف.
هم بقيت بمكاني شرد عليه.
مشى هو باتجاه مكتبه يريد يكعد والتفت علي: خلص تكدرين ترحين لمكتبج. الحجي العندي كلته مبقى شي.

شمه: بس اني بعدني محجيت شي. انت منو انطاك الحق تقيمني وتقيم اخلاقي وتحكم علي عندي شي ويه ابوك؟ شعرفت عني يعني؟
هاا؟ شنو شفت علي بلا زحمة؟
ايوب: بصراحه مشفت شي. بس انتي وجودج هنا راح يسبب مشاكل. هاي من الاخير جبتلجياها.

شمه: مراح ارد عالكلام إلى كلته لان مو انت إلى تقيم اخلاقي اني شمه اسأل هبه عني. ووجودي يسبب لمنو مشاكل؟ تره انت إلى سببتلي مشاكل اني اروح وارجع بحالي وانت إلى تتقصد تغثني وتهيني بدون سبب. اعرف انت مرايدني بالشركة هذا الشي مبين للكل ومع ذلك اتحملت اسلوبك وحجيك واهاناتك. بس مال تجي وتريد تتهمني بشرفي لا لهنا وكافي غلطت المره الفاتت وسمعت كلام هبه ورجعت بس هسه لا. جان لغيت الزيادة من يمك بدون هالقصة والغلط بس هو الانسان البخيل هيجي معذور مو بيدك هذا مرض.

عفته وطلعت.
رحت لمكتبي ظليت ارجف من العصبيه كعدت شويه قبل مااطلع من هالشركة الزفت. اريد ارتاح شبيه هيجي ارجف. اصلا شلون سمحتله هالحقير يحجي وياي هالحجي. ثوله شلون تسمعين وتسكتين غير ترزليه رزاله غسل ولبس.
ادب سز.
اخذت جنطتي وطلعت من المكتب لاكاني بالباب كلي: اوكفي شويه اريد احجي وياج.
شمه: وخر.
ايوب: يابه اني غلطان اعتذر بس اوكفي خل احجي وياج.
اشرلي بيده عالمكتب.

بقيت واكفه مطنكره شويه وهو واكف منتظرني افوت.
دخلت للمكتب دخل وراي وسد الباب وبقى واكف كبالي.
درت وجهي واتجتفت وبقيت واكفة منتظرته يغرد.
ايوب: اني آسف. واعتذر.
مجاوبته.
ايوب: اعترف انتي مغلطتي بأي شي. ومااريد اكطع رزقج. اني هم عندي عائلة. واعرف وضعج كللش زين لذلك.
من كلي اعرف وضعج ماادري ليش انقهرت على روحي يمكن. ويمكن حسيت بالذل.
ايوب: يابه مو اعتذرنه بعد ليش البجي؟ اففف. شمه
استمريت بالبجي.

ايوب: شمه. اسف. بس اكو اشياء هواي انتي متعرفيها مضطر والله العظيم مضطر اتصرف وياج هيج غصباً عني. شمه؟
كافي. خلص كتلج اني راح اشغلج بغير مكان. مكان احسن وويه ناس ثقة وبراتب احسن بعد شتردين؟
شمه: مااريد شي منك. الله لايعوزني.
عفته وطلعت من مكتبي رحت لهبه حتى متطلع وراي مثل كل مره ولا تتفاجأ بالي صار دخلت لهبه لكيتها ماكو. بقيت واكفه منتظرتها يمكن رايحه للحمام. اجه وراي ايوب.

دخل وسد الباب درت عليه كتله: رجاءا اطلع.
ابتسم كلي: تره هاي شركتي ههه.
مجاوبته.
ايوب: اهدأي شويه خل نحجي.
شمه: ماكو حجي بينه.
ايوب: لا اكو. بس الله يخليج بدون عصبيه وبجي وصياح. عيب كدام الموظفين.
بقيت ساكته وامسح بدموعي.
ايوب: اني مااريد اطردج. ولا اريد اكطع رزقج. انتي موظفة جيده.

باوعتله بطرف عيني كتله: موظفة جيده! من شوكت؟ قبل كم يوم سويتلي قصة لان جنت مريضة وارتاحيتلي خمس دقايق ويوميه وكتلي الف وحده تتمنى تجي بمكانج بعد شوكت صرت موظفة جيدة؟
ماله داعي تبرر وتدور اعذار إلى تريده وصلتله.
كعد عالكرسي كبالي ورجع ليوره كلي: شنو هو إلى اريده؟

شمه: عفيه عوفني بحالي مالي خلك فلسفتك وتسوي نفسك بريء، من داومت لهذا اليوم وانت منكد علي ومحاربني. ماادري ليش معاديني ماادري شمسويتلك ومضايقك وجودي؟
ايوب: مو حجينه وكلنه قبل شويه.
شمه: شحجيت وشكلت؟ كلت تره الحجي يريد يتونس وياج يومين ويعوفج. مو صح؟
سكت محجه شي.
دخلت هبه اتفاجأت بينه موجودين بغرفتها: هاا. شصاير؟ شتسوون هنا؟ شبيكم؟
ايوب: هلو هبه. ماكو بس صديقتج متتفاهم كله بجي.

شمه: ماكو شي بس مريت حتى اكولج اني بطلت حتى متتفاجأين ولاتطلعين تركضين وراي. ماله داعي لان هالمره ماارجع.
هبه: ياا شصار؟ شبيج؟
ايوب: ادري. هسه مو اعتذرنه وكلنه مو قصدنه. كتلج مو غلطج ماعندج غلط بس وجودج هنا ميصير.
هبه: ليش؟
رجعت بجيت كتله: واني هم ماميته عالشغل هنا.
هبه: فهموني شكو؟
ايوب: خلص معناها اكعدي واسمعي شنو اكول.
شمه: كافي إلى سمعته. طلعتني وحده سمعتها بالوحل.
ايوب: لا رجاءا اني مكلت هيج شي.

هبه: ياا عزا منو حجه عليج هو منو مثلج ومثل سمعتج.
التفت على هبه كللها: شسمج. هبه. دوختينه تره كلمتين منكدر نحجي. طلعي بلا زحمه وخلينه نحجي.
ظلت هبه مصفنه بوجهي. بس حصرتني الضحكه متوقعت هالطلعه منه.
هبه: اي صار. من رخصتكم. شمه مو تطلعين بدون مااعرف.
مجاوبتها طلعت ورادت تسد الباب كتلها: عوفي الباب.
هبه: شنو؟
ايوب: ماكو شي هبه روحي وسدي الباب مفاتحينها هنا شاشة للفرجه.
سكتت.
ايوب: اكعدي شمه.

كعدت لان فعلا تعبت.
ايوب: شوفي ادري اني عاملتج معامله مو زينه وسمعتج كلام قاسي بس عندي اسبابي. يمكن الاسباب العندي متنطيني الحق اتصرف وياج هيج واحكم عليج بس المهم اني مو قصدي اذيتج. اعتذرت قبل شويه وهسه هم اكولج اسف واعتذر. اني مو انسان سيء مثلما انتي متصوره بس الظروف مرات تخلي الانسان يسوي شغلات هو ضدها. وحتى تصدكين اني راح انقلج لغير مكان وبراتب اكثر من راتبج هنا وهم مواصلات وكذا.

شمه: مشكور. بس اني بعد مااريد اشتغل كافي ذل.
كمت اريد اطلع وعفته كال: هذا آخر كلام.
مباوعتله ولاجاوبته.
ايوب: براحتج. اني سويت العلي.
طلعت شفت هبه سلمت عليها وطلعت بسرعة مااتحمل ابقى بعد.
طلعت بس ماادري وين اروح.
هالمره مرجعت للبيت.
ارجع شسوي وبيا وجه؟ شكول لامي ليش بطلوني؟
حسبي الله ونعم الوكيل.
اخذت الشارع مشي وين مااشوف شركة او محل ادخل اسألهم اذا محتاجين موظفه او حتى عاملة هم ميخالف.

بقيت امشي والشمس اتدك براسي متت من الحر ومن العطش رجليه احسها صارت خيوط من المشي وماكو محصلت شغل.
مضطره ارجع البيت بس شكول لامي؟
المره الفاتت مريضة هسه شكول شبيه؟
رحت اتمشيت بعد للمكان إلى توكف بي الكيات. هم اضيع وقت لان مااريد اوصل من وكت وهم راتبي عشتوا مو مال تكسيات.
بقيت واكفه والسيارات التي تعبر هذا يدك هرن وهذا يأشر ولازم اليعبر يباوع.
شويه اجت وكفت مره جبيره يمي هم تنتظر.

فرحت وكفت بصفها خفت لان واكفه وحدي. اجت كيه وصعدنه محد بالسيارة بس اني والمره وجان اكو رجال كاعد كدام.
مشت بينه السيارة ظليت استرجع كلام ايوب. اذا ابوه هيجي وكلها تعرف سوالفه ادري هبه الثوله ليش جابتني بهالوظيفة وخلتني شبعت حجي ورزاله واخر شي طلعني هالمريض عندي شي ويه ابوه.
حسبي الله ونعم الوكيل.
بعدني بالطريق اتصلت هبه كطعته.
نزلت عالشارع الشمس حركتني حرك. غطيت وجهي بالجنطة.

كل شويه هبه تتصل ومااجاوبه. بيا حال هسه بهالحر وارد عليج.
وصلت للبيت دكيت الجرس وافكر ياعذر عندي.
احيانا يهديك الله وجعا وألما. فتندب حظك وتيأس وتضيق بك السبل.
فلا يعرف الضحك طريقا الى مبسمك.
ولا يعرف النوم كيف يتسلل الى عينك.
فلا مواساة تنفع ولا صديق يرفع.
لكن ربك من يدفع. يدفع عنك سوءا لم تكن تتوقعه. وبلاءا لم تكن لتقدر عليه. ووجعا اكبر من ان تحتمله.
فالله سبحانه له حكمة في مجريات الامور.

بيومها من رجعت للبيت تحججت كدام امي بأنه البناية إلى نداوم بيها تعبانه ومن زمان يردون يرمموها واليوم اجوا العمال لذلك رجعونه قبل نهاية الدوام ونحتاج كم يوم لحدما ينقلون اثاثنه واغراضنه لغير مكان.
امي: يعني وين راح تداومون؟
شمه: مااعرف ماما لحد الان محد كال وين بس همه اكيد عدهم مكان ثاني.
امي: يعني باجر اتداومون لو لا؟
شمه: لا.
امي: الله كريم. ارتاحي كم يوم.
شمه: اي هو.

بالليل اتصلت علي هبه: خرب غيرتج اذا عندج غيرة.
شمه: اهوو
هبه: بروح ابوج كم مره اتصلت بيج؟ هاا؟ بس هو مو صوجج صوجي اني بالي يمج وخايفة عليج من الطريق اكول خااف متدبرها ترجع للبيت وحدها واريد اتطمن عليج عشتوا كولي ارد عليها اكوللها وصلت واسده. صعبه هاي؟ بس خبيثة مو بيدج.
شمه: خلصتي لغوه؟
هبه: ووجع.
شمه: المفروض اني الازعل مو انتي.

هبه: ليش بالله تزعلين قابل اني اخت ايوب لو ابوه انتي اتعاركتي ويه ايوب اني شكو؟
شمه: لان تعرفين كلش زين ابو ايوب شنو وتعرفين ابنه ماراح يخليني بحالي بسبب ابوه ومع ذلك جبتيني يمهم وخليتيني شبعت حجي واهانات.
هبه: اي اعرف ابو ايوب وسوالفه وحجيتلج عنه بس الحجي مسوالج شي ولا اذاج.
شمه: وابنه؟
هبه: كتلج اني ابنه لتحسبيله حساب وكلج الحجي مو كلج اذا يحاجيج كوليلي واني اتصرف وياه. بعد شنو؟
شمه: هذا مو حل.

هبه: والله بعد هذا الحل الموجود.
شمه: حقج. مسمعتي الحجي إلى سمعته لو حاجين على سمعتج وشرفج جان مكلتي هيج.
هبه: يابه دطيري. سمعتي وشرفي. لو كلما واحد يحجيله كلمة نبطل من الشغل معناها نكعد بالبيت احسن لو نطلع نكدي هههه والله يالله.
شمه: ماادري انتي شلون متقبله الموضوع وتضحكين؟
هبه: مااحب النكد عفته الج. المهم لتدوخيني وتنسيني شنو جنت اريد احجي.
شمه: خير.

هبه: اصبريلي كم يوم واني اشوفلج شغل لتضوجين قابل بس ايوب عنده شركة. هههه كلما اتذكر شلون حابسج بالغرفة وشلون اني خفت وراح بالي وووويين اشبع ضحك.
شمه: عابت. شنو راح بالج مدري وين؟
هبه: ههههه والله فكرت افكار اعوذ بالله. خفت عليج شبيج كلت ايوب صار مثل ابوه هههه.

شمه: لوما امي نايمه جان عرفت شلون اغرد وارد عليج بس مااريد امي تسمعني كتلها غير مكان شغلنه لان البناية بيها ترميم ومن يحصلون مكان يالله نداوم. ديري بالج مو تجفصين كدامها.
هبه: لا افه عليج. المهم ردي عالتليفون عود خاف احصلج شغل وصيت جماعتي اي واحد يسمع محتاجين موظفة ينطوني خبر. اوك؟
شمه: اوووف. اوك.
وره تلث تيام رجعت اتصلت هبه وانطتني عنوان شركة محتاجين موظفة.

شنو طبيعة الوظيفة مااعرف بس كلتلي من توصلين كوليلهم اني من طرف هبة بشركة ابو ايوب.
فرحت وظليت للصبح ادعي واتوسل بس كون انقبل.
مااريد يجي راس الشهر واني كاعدة بدون شغل لاراتب ولامصرف.
ثاني يوم الصبح كعدت من وكت كويت ملابس وجهزت نفسي وكعدت اتريكت.
امي: وين رايحة؟
شمه: ماما عدنه افتتاح الفرع الجديد لشركتنه.
امي: وين صاير؟
شمه: بنفس المنطقة بس وره 3 شوارع. ادعيلي ماما.

امي: الله يوفقج ويحميج ماما. السايق يجي عليج لو منو يوديج؟
شمه: هاا. اي اي كلي من اوصل لراس الشارع ارمشلج وطلعيلي حتى منتأخر.
امي: تمام.
طلعت من البيت ركض خاف يكعد آدم ويشوفني مبدله ويجلب بيه ويظل يبجي الا يروح وياي.
وكفت عالشارع صعدت بالكيه واتوكلت على الله ورحت للعنوان.
وصلت للشركة جانت عبارة عن بيت عالشارع العام ومسويه شركة.

دخلت جانت اكو بنيه كللش كشخه ومكياج فوول كاعده بالريسبشن سلمت وكتلها: اني جايه علمود الوظيفة الشاغره.
باوعتلي من فوك ليجوه كلتلي: كووعدي استريحي. هسه يجي الاوستاذ ويشوفج.
كعدت واني اباوعلها هاي شبيها تعوج بحلكها هيجي خاف متعجبه عبالها بس هي تعرف تحجي.
بقيت كاعدة واهز برجلي من التوتر وكلما ادور لو ارفع راسي الزم هاي البنية متلبسة بتهمة المراقبه.
جانت تباوعلي كل شوية ماادري شبيها.

ورة تقريبا نص ساعة دخل رجال سلم: السلام عليكم
فات كبل والبنية ردت عليه: وعليكم السلام هلو اوستاذ
معناها يشتغل وياهم.
كامت راحت جوه وره شوية رجعت كلتلي: حبيبتي الاوستاذ دينتظرج.
كمت وراها مشيت وصلتني للغرفة إلى هي مكتب الاوستاذ هههه.
دخلت شفته نفس الشخص إلى دخل قبل شوية وسلم.
سلمت وهو رد السلام وكلي: اتفضلي ست.

كعدت وبيدي السي ?ي مالتي قدمته بس كلي: ميحتاج سي ?ي احنه راح نقبلج عالضمان هههه، وصلنه السي ?ي مالتج قبلج انتي مو صديقة هبة؟
شمه: اي نعم
حسيته خوش انسان وحباب واستغربت هيجي هبه شخصية معروفة؟
ست انتي راح تشتغلين سكرتيرة لان السكرتيرة السابقة صار عدها طفل ومتكدر اتداوم بعد. الدوام للساعة اربعة اذا يعجبج حتى تبدين من باجر حتى تكونين جاهزة.
كلي بأبتسامة
شمه: اوك. ان شاءالله.

اندك الباب دخلت البنيه بالريسبشن كالت: اوستاذ مؤيد. ابو توفيق اتصل وكال احجزله.
مؤيد: مكلج شكد؟
هزت راسها لا.
مؤيد: اوك اني اتصل بي هسه واشوف شكد يريد.
راحت البنيه رجع التفت علي كلي: ست راتبج راح ينحسب من اليوم حتى تستلمين ويه بقية الموظفين. تمام هيج؟
شمه: تمام استاذ. شكرا
رجع ابتسم كلي: وعلى شنو الشكر ممنطيج اني راتب بدون مقابل راح تشتغلين ههه.
شمه: اكيد.

طلعت من عنده واني فرحانه شوف الفرق بينه وبين ايوب مبتسم واسلوبه محترم وكلي ممنطيج راتب بدون مقابل لا راتبج مقابل شغلج مو ايوب عبالك متفضل علي لو عبالك كاعدة ومنطيني صدقه الثول لهيج نفسيات.
رحت اشتريت رصيد واتصلت على هبه بشرتها واتشكرت منها: شمه: اي قابلني. خوش رجال
هبه: رجال لو ولد؟
شمه: ليش هو الولد مو رجال.
هبه: شكلج؟
شمه: كلي باجر اداوم وسألني انتي صديقة هبه؟ طلعتي معروفة.

هبه: لعد شعبالج. اني هبه على سن ورمح.
شمه: ايبااخ. مادام تعرفين هيجي ناس مؤدبة ونظيفه ليش من الاول مااتوسطتيلي يمهم؟ ليش خليتيني يم ايوب ابو العقد هو وابوه؟
هبه: غير ردتج يمي ووياي.
شمه: اووف منج
هبه: شتردين بعد هاي حصلتلج وظيفة احسن سكرتيرة واكيد الراتب اكثر مو؟
شمه: مااعرف استحيت اسأل على الراتب.
هبه: اي المهم هسه ضمنتي الشغل الراتب اذا مو اكثر من راتبج هنا فأكيد مو اقل.
شمه: بس انتي وين تعرفيه؟

هبه: منو؟
شمه: هو هذا الولد مدري الرجال بهاي الشركة.
هبة: هاا، مو عدهم شغل ويه شركتنه فجان يجي مرات لهنا واتعرفت عليه.
شمه: امم. اي هيج اتعرفي على ناس زينه. والله لو تحجين وياه وتجين هنا وياي مو احسنلج؟
هبه: لا عيني اني شغلي مرتاحه بي. الحجي ممأذيني وايوب نفس الشي.
شمه: احسج صايره لوتيه مااعرف ليش.
هبه: ههههههه اي احسن.
شمه: ادعيلي هباوي الله يهديلي هذا المدير وميطلع مثل الحجي ولا مثل ابنه التحفه.

هبه: لا لا لا بضمانتي. بس تره ايوب فعلا تحفة هههه هيج تحسيه انتيكه لاتقدر بثمن. اووف انوب لو لبس النظارة غير يجنن.
شمه: ووع. شيجنن بي متكوليلي. واحد انفه وشايف نفسه واكص ايدي اذا مطلع مثل ابوه.
هبه: لااا مستحيل. شنو سوالج شي؟
شمه: خل يطير هو يكدر اصلا.
هبه: لعد شلون حكمتي عليه مثل ابوه؟
شمه: ماادري بس تصرفاته هيج معناها احسه جان يريد يلزك بس ميعرف شلون.

هبه: لاا لج. هو هذا طبعه ويه البنات ناشف ميعرف يتعامل ويه البنات.
شمه: قصدج ماعنده اسلوب مو ناشف.
هبه: المهم شوكت تعزميني؟
شمه: على شنو؟
هبه: غير اتوسطتلج وشغلتج هههه اريد عزيمه.
شمه: خلص استلم راتب واتدللي.
هبه: حبيبتي
شمه: هباوي راح يخلص الرصيد. خابرتج حتى ابشرج واتشكر منج.
هبه: دطيري تتشكر مني
شمه: والله لو ماانتي مااعرف شسوي ولااعرف اتصرف انتي تعرفيني على كولتج فاهيه.

هبه: هههههههههههه احلى مابيج فهاوتج.
شمه: عابت عبالي تكولين حشاج
هبه: هههههههههههههههه.
رجعت للبيت فرحانه بس محجيت شي لامي كلت خل اداوم وبعدين اكوللها مااريد احجي وخاف تالي متضبط واحتار شلون اركع السالفة.
بليلتها اتصل وائل كطعته لان امي جانت كاعدة. خليت التليفون صامت.
اتصل اكثر من مره مجاوبته.

بعد ما امي نامت شفت التليفون لكيته دازلي مسج: هلوو شمه شلونج؟ شخبارج؟ طبعا مالي خلك الشغل لان انتي ماكو لدرجة الصبح لازم مريت على بابكم واني اعرف مراح اتداومين بس كلت يمكن اشوفج. اتفاجات كالت خوله بطلتي. خوماكو شي؟ شتحتاجين اتصلي علي رقمي يمج. باي وقت حاضر.
ظليت صافنه هذا يوم وره يوم يزيد هسه غير عرفت بيه بطلت انت هم بطل بعد لتتصل ولاتدز مسجات.

لاهو غلطي انقهرت عليه ومحبيته افشله واكوله لاا من الاول. بس لامتصور اني هم معجبه بي.
يسويها حظي الحلو.