رواية صراع الجبابرة للكاتبة روز الفياض الفصل السابع

رواية صراع الجبابرة للكاتبة روز الفياض الفصل السابع

بخوف وترقب اتوجه الى عملي الجديد.
فلا اعلم كيف سيكون مديري الجديد. اخشى ان يكون كالسابق. يصطاد كل من اضنتها الظروف واجبرتها الحياة على العمل. مستغلا ضعفها وظروفها لتحقيق مآرب خسيسه واشباع رغبات حيوانية. عسى ان يكون هذه المره مختلفا. انسانا قبل ان يكون اي شيء آخر.
عله يقدر عملي ولايستغل وضعي.
عله يكون رحيما.
بثوبي الارجواني اتبختر هنا وهناك فرحة بمكتبي. فأضع ورودا هنا.
واضع لوحة هناك.

وعطر الياسمين يفوح في المكان.
وتلك النرجسة الجميلة. ملئت روحي تفاؤلا ورضا.
نظرات يملؤها الفضول تطل علي بين الفنية والفنية.
تعارف لطيف وترحيب حار من زملاء جدد..
---
رتبت المكتب وضفت عليه لمساتي مزهرية وورد ولوحة زغيرة وكعدت ارتب الفايلات والاوراق حسب الحروف الابجدية وخليت الاوراق كل صفقة ومشروع بفايل وكل مجموعة تخص نفس الموضوع او المشروع استخدم نفس لون الفايلات.

بديت من الصبح مخلصت الا بنهاية الدوام كل شي موجود رجعت اعدت ترتيبه وتنظيمه. بعدين جبت لصقات لصقتها تحت كل مجموعة وكتبت عليها اسم المشروع او الصفقة حتى مااتعب من ادور احتاج شي.
بيومها المدير مااجه وللظهر الموظفين رادوا نطلع نتغدا بالمطعم كبال الشركة بس عبرة شارع بس بصراحة اني خفت مااعرف المدير الجديد ووضعه شنو. يجوز يطلع مثل ايوب صخوم ويكعدي عالزله.

كتلهم: اتمنى بس تعذروني والله بديت ارتب المكتب وانضم الملفات والفايلات واذا اطلع اكيد مراح اكدر اكمل الشغل قبل نهاية الدوام واني جديدة مااريد تصير عند المدير نظرة علي انه اني مو نظاميه وفوضويه ولامبالية.
جانوا كلهم حبابين وطيبين. جان اكو ولد هو وزوجته يداومون بالشركة ارتاحيتلهم. بعدهم شباب وشكلهم لطيف.
---
اليوم إلى بعده من داومت هم المدير ماكو بعده مااجه واتأخر للساعة عشرة يالله اجه.

اول مدخل للمكتب اتفاجأ بترتيبي ظل واكف وصافن يباوع على كل شي بالمكتب.
ابتسم بعدين كلي: هسه يالله طلع وجه المكتب عاشت ايدج. وصباح الخير.
شمه: شكرا. وصباح النور ههه.
اتجه لمكتبه بس وكف كبال المكتبة إلى بيها الفايلات والاوراق اخذله صفنه بعدين دار علي كلي: شسويتي؟

شمه: رجعت رتبتهم حسب التسلسل الابجدي وكل موضوع جمعته بلون وخليت كل فايلات كل مشروع بنفس اللون حتى يسهل على إلى يدور عليهم يلكاهم وكتبت تحت كل لون محتوياته ولصقتها على حافة الرف للسهولة.
الفتت علي متعجب ومبتسم ابتسامة عريضة كلي: والله عفيه عليج. شاطره وذكية. بعد منرجعج لهناك حتى لو همه طلبوا ههههه.
ابتسمت كتله: واني هم ماارجع حتى لو مقابليني هنا.

اتنهد وكأنه يعرف الشي إلى صاير لان لاسألني ليش ولا كلي شلون وحتى سألني ليش بطلت ولا وين جنت اشتغل.
يجوز هبه حاجيتله. اي تسويها هالثوله متفكر ممكن هالشي يأثر بسمعتي وممكن تخلي مديري الجديد ياخذ عني نظرة مو حلوة.
ثوله مو بيدها..
هز راسه كلي: لا شلون منقبلج انتي موصين عليج واسطتج قوية هههه. لا مبين عليج شاطرة وذكية وان شاءالله ترتاحين بالشغل ويانه ونشوف نشاطج واجتهادج.
شمه: ان شاءالله.
مؤيد: اخذي راحتج.

فات لمكتبه وبديت نشاطي وهو كذلك.
وانتبهت من اول يوم انه من لحظة دخوله للشركة يصير نشاط وحركة وكل ساعة ساعتين يكوم يطلع يطل عالموظفين ويسولف ويضحك ويتشاقه وياهم. عود مثل ايوب مال الثول يفتر بس وراي حتى يرزلني وجماله مبوز وكالب خلقته وجهه ميكصه السيف.
هذا مدير وايوب مدير. حرام.
مشت الايام حلوه ولطيفه بدوامي الجديد لكن إلى ضوجني هو مكالمات ومسجات وائل.
يوميا يتصل بيه ومااجاوبه ومع ذلك ميبطل.

واذا اتصل ومشاف جواب يدز مسج واثنين وتلاثه.
الى ان قررت ارد عليه هالمره لهنا وكافي.
بيوم لكيته دازلي مسج: هلو شمه شلونج مشتاقلج. يابه شدعوه لاتسألين لاتكولين اشوفه شلونه شخباره؟ اتصل متجاوبين هاي عرفناها متجاوبين عالاتصالات بس عالاقل ردي عالمسجات. شدعوه عليج؟

لكيت نفسي مجبرة ارد عليه فكتبتله: ( هلو وائل شلونك شخبارك؟ اني الحمدلله زينه بس انت تعرفي اني اتصالات مااجاوب ولاحتى المسجات. لان مو حلوه ارد على مسجاتك اني مره ارمله زوجي مصارله هواي من اتوفى وماعندي استعداد ادخل بعلاقات ولاحتى افكر ابدي صفحة جديدة واتزوج. حاليا ماعندي استعداد لاي شي ولاافكر بأي شي غير شلون اربي ابني واعيشه عيشه زينه.

حملي جبير ومااعتقد اكو احد عاقل ممكن يورط نفسه بهيج وضع. اتمنى تفهم وضعي وكلامي زين. انت خوش انسان لكن اني ماافيدك.
ومااريدك تزعل مني لكن اتمنى متتصل بعد لان اتصالات دتحرجني مع والدتي. تبقى صديق واخ عزيز وافتخر واتشرف بمعرفتك بس اكثر من هيج تعذرني. )
رجعت قريت الرسالة قبل ماادزها ماردت اكون وقحه او ماعندي اسلوب واجرحه مهما كان هو مااذاني بشي.
من شفتها مناسبة وواضحة دزيتها اله.

لكن ثاني يوم من كعدت الصبح لكيت راد علي رد وكف عقلي ظليت ادك على خدودي..
معقولة اني هيج؟ معقولة ماخذ عني هيج فكرة؟ يمه شلون اذا طلع مو بس هو مفكر هالتفكير بيه؟
عزا. صخام الصخم وجهج شمه.
حسيت كلبي انمرد من الصبح. ومعدتي مااعرف شصار بيها.
كوه كمت لبست ورحت للدوام.
اخذت الطريق كله ساكته مع العلم كل الموظفين والموظفات إلى وياي يسولفون ويضحكون.
واني طول الطريق كل شويه اطلع التليفون واقره المسج مالته.

اني هيجي يفكر بيه! هذا الحصلتيه من ايوب بس الاذيه والمشاكل ساعة السودة إلى اشتغلت بيها عدهم.
حسبي الله ونعم الوكيل.
كاتبلي: ( متفكرين بالزواج لو استاذ ايوب دخل عالخط وكطع علي الطريق وغيرتي رأيج؟ بس تره الفلوس مو كل شي خليها ابالج ).

كلت لازم ارد عليه مايصير اسكتله على هيج حجي رجعت طلعت التليفون وكتبتله: ( مااسمحلك ولا اسمح لاي واحد يحجي ويايه هيجي. ويا ايوب صخوم هذا إلى دخل عالخط؟ واي خط اصلا؟ تره مابيني وبينك اي شي حتى ينطيك الحق تتجاوز حدودك ويايه وتحجي ويايه بهالطريقة مفهوم؟ ولاايوب ولا ابو ايوب إلى ممكن يخليني ابيع نفسي علمود الفلوس. مع الاسف عليك جنت متصورتك غير شكل ).

اتنفست من العصبية حيل وغلقت التليفون وخليته بالجنطه انتبهت للبنية اليمي تحجي وياي كتلها: نعم؟
سرى: بعد وكت ههه شبيج اليوم صافنه صار ساعة نحجي وياج وانتي ماادري وين بالج.
شمه: اسفه بس مسمعتكم ماانتبهت.
سرى: سلامات؟
شمه: الله يسلمج. ماكو شي بس رقم غريب ازعجني لحد ما سويتله حظر وارتاحيت.
بديت يومي بالشغل اريد الهي نفسي لان كلما اتذكر المسج مال هذا الحيوان وائل اموت من القهر.

حسبي الله عليك نكدت علي من الصبح الله ينكد عليك.
ايوب: بعد كل الهوسه إلى سوتها هاي الموظفه واخيرا راحت. طلعت من الشركه.
رغم اني إلى غيرت وظيفتها من مندوبه الى ادارية حتى تكون تحت عيني طول النهار لكن إلى صار العكس الحجي الظاهر بدا يتحرك اتجاهها بقوة وبصورة واضحة وعلنية.
البنيه مشفت منها شي مو زين لكن اني شمدريني شنو طبيعة علاقتها بالحجي.

يجوز هي منطيته وجه وريك حلو مثل القبلها وتمثل كدام الكل المسكنه والادب.
بس الصدك انقهرت عليها بعدين من شفتها بجت. واتأكدت هي مو من هالنوع لان من حجايتين زعلت وبجت واعترضت. صح لسانها طويل بس اذا هي شريفة ومؤدبه ومتربية معناها حقها. ولازم ترد هيج.
بس الخبيثه تكلي بخيل. لا يابت ال، هههه والله بلوه هالبنات.
انبني ضميري لان كطعت رزقها بس هي عنيده شسويلها بس.

بعد ماطلعت وبطلت شلت التليفون واتصلت على مؤيد ابن عمي هم عنده شركة واعرف محتاج سكرتيرة فكتله: حبيبي مؤيد حصلت سكرتيرة لو لا؟
مؤيد: لا. ليش عندك وحده؟
ايوب: اي اكو بنيه جانت عدنه هنا بس بطلت. خطيه وضعها تعبان وارمله وعدها طفل.
مؤيد: ليش بطلت اذا وضعها تعبان؟
ايوب: اني بطلتها.
مؤيد: ليش شسوت؟
ايوب: لا والله ماسوت البنيه فقيرة بس بعد تعرف عمك وسوالفه بدا يدكلها ناعم.

مؤيد: اهوو شنو ميبطل لخاطر الله؟ متعب مجزع؟
ايوب: شيتعبه اني تعبت وجزعت وهو لا.
مؤيد: الله يساعدك. والله بلوه هسه كله انت كبرت المثلك هسه ماله غير الصلاة والدعاء ادري قابل دترجع مراهق.
ايوب: مليت من الحجي كلها ملت منه شنسويله بعد اكثر من إلى سوت الحجيه.
مؤيد: لا حقها. حقها. وزين تسوي من لغت الوكالة احسن ميروح يضيع هذا الحلال كله عالنسوان والسوالف التعبانه.

ايوب: ليش هو قصر. مو ذيج القبل اتزوجها بالسر اشترالها بيت بأسمها منين قابل اشتراه. نتعب ونركض وهو يذبهن بدون وجع كلب.
مؤيد: الحمدلله من بطل من سوالف الزواج بالسر يوميه وحده تقشمره وتاخذ المقسوم وتروح.
ايوب: اووف
مؤيد: حبيبي ايوب خليها تجي البنية وتدلل.

ايوب: بس طبعا مو اني وصيتك عليها ولاانت ابن عمي راح اخلي صاحبتها إلى جابتها هنا هي تتصل بيها وعلى اساس هي تعرفك ووصتك عليها. لان خاف متقبل بالشغل اذا تعرف عن طريقي.
مؤيد: صار تدلل
ايوب: هسه اخليهم يدزولك السي في مالتها وتتصل بيك صاحبتها إلى عدنه.
مؤيد: اوك.
سديت التليفون من مؤيد وصحت لهبه وفهمتها شنو تحجي وشنو تكول لصديقتها وكتلها تدز السي في لمؤيد وتتصل بي تشرحله.

وره يومين راحت قابلوها ومؤيد خابرني كلي: لك شنو هاي.
ايوب: شبيها؟
مؤيد: لك شنو هاي.
ايوب: حلوه؟
مؤيد: ياحلوه. تنكط ورد
ايوب: لا مو لهدرجة. حلوة يعني بس مو لهدرجة
مؤيد: وربي تخبل. باربي عبالك شنو من طول وشنو من جسم انوب وجها يكولك وجه طفل.
ايوب: على كيفك. باربي. شالقصه. تره والله اذا سمعتك نوارس الا تذبحك ههههه.
مؤيد: ياا تذبحني هههه الا تكطعني وصل. بس لك والله اختك اذا تشوفها هسه تكولي بطلها.

ايوب: لااا شنو بطلها شنو نمشي بكيفهن احنه. بعدين وين تشوفها.
مؤيد: اكولك خاف انت خفت من منيوه ودزيتها علي ههههههه لان العندك مخبله اكثر من العندي هههههههههههه.
ايوب: اعوذ بالله. هو خبال بعقل يروحن فدوه للمخبل هههه.
مؤيد: بس هالمره حقه عمي يزحف معذور شافها كتكوته ههههه
ايوب: لك. مو تروح تضوج البنيه تره مو من هالنوع وتريد تعيش مو مال سوالف تعبانه.

مؤيد: لا افه عليك بهالركبة. لتخافك اتشاقه وياك خوش بنية والنعم منها بس حلوه ههههههه.
اطمئنيت من قبلها مؤيد وداومت حسيت هسه ارتاح ضميري.
بس ظليت كاعد واريد اتذكر ملامحها زين. مااتذكر. معقولة لهدرجة حلوه واني ممنتبه؟
اتذكر هي حلوة بيضا وطويلة وضعيفه بس يعني عاديه بس الصدك عيونها حلوه.
حرامات هيجي بنيه اتكسرت وهي زغيرة خطيه. بس اني هم شلون سكتلها من كلتلي مريض؟ لاياملعونه اني بخيل ومريض!

اي بس الحمدلله لحكت اعتذر عالجفصات الجفصتها وياها وحده ثانية جان كلبت الدنيا وجابت اهلها وعشيرتها وكعدوني على بساطهم وخسروني ذاك الفصل المرتب، لا يافصل جان ورطوني بيها الا تتزوجها بس هاي غير ماعدها احد ويتيمة.
ولو هي، تستاهل تره ههههه.
الله يستر عليها خوش بنية ام لسان. ان شاءالله ماتخيب ظني بيها ومتفشلني.
---
ذلك الفراغ الذي يؤلم روحي متى يمتلئ
متى اشعر واحس؟
بذلك الشعور الذي طالما سمعت عنه.

هل هو محرم علي؟
ربما هو كذلك. لكني سأصبر فولدي في الطريق.
سوف يرى النور قريبا وسوف اخذه بين ذراعي واطير به نحو السماء.
اتشوق ان احضنه. احترق شوقا للمس تلك اليد الصغيرة اللطيفة وتلك الاصابع التي لايليق بها الا التقبيل.
وتلك النظرات البريئة.
---
منى: هلو اني منى مواليد ( 85 ) متزوجة ابن عمي ايوب.

خطبوني بيت عمي بس مااتزوجنه بسرعة بقينه مخطوبين ( 3 ) سنوات لان جدو اتوفى وبس دارت السنة مالته اتوفت بيبي وجنت احس ايوب ابن عمي جامد محبيته جنت اتمنى اتزوج واحد احبه ويحبني جنت اتمنى اعيش قصة مثل قصص الاميرات ادخل كلية واتعرف على شاب وسيم ويحبني واحبه وبعدين نتزوج.
بس مع الاسف اني جنت مااحب المدرسة والدراسة جنت كل صف ارسب واعيده مرتين.

شكلي كولش حلو جميلة وجنت دائما اتعرض لمضايقات وحجي بطريق الرجعة من المدرسة.
مدرستي جانت قريبة على بيت اهلي لذلك اروح مشي وارجع مشي ومرات اخوي مؤيد اذا موجود بالبيت هو يجي علي بالحله حتى يرجعني للبيت لان جنت ضخمة وجماله راسبة مدري كم سنة فجانوا ميحبون طلعتي من البيت وحدي.

مره جنت راجعة من المدرسة وجانوا اكو شلة شباب يتجمعون يم المدرسة فواحد منهم ذبي الرقم بجية اخويه مؤيد وصارت مشكلة وعركة جبيرة ونهايتها بطلوني من المدرسة.
ظليت محبوسة بالبيت فترة وبعدين سمعت امي تكول عمي حاجي علي يريدني لابنه ايوب.
عبالي بسرعة راح يخطبوني بس طولوا.
من طولوا حسيت بي مرايدني. واني هم مالي رغبه بي.
انخطبه بس مااتذكر يوم اتصل بيه لو اشتاقلي.

جنت اسمع من صاحباتي إلى ينخطبن شنو من حجي حلو يحجن كل وحده هي وخطيبها بس لا بالعكس الا اني اتصل بي.
اني اتصل واني اسأل عنه وكل مااتصل يكلي مشغول مااكدر احجي وياج هسه. لو طالع لو يمي ناس.
طكت روحي الى ان كلت لاهلي مااريده بس اهلي مقبلوا وامي خيرتني لو هو لو ابن خالي.
اضطريت ابقى واقبل بأيوب لان ابن خالي واحد زعطوط وممخلي وحده بالمنطقه تعتب عليه.
عالاقل ايوب رزن وكل وقته شغل.

عودت نفسي على وضعه وغيرت طريقة تفكيري.
بعد الزواج استمر الوضع مثلما هو بس اني قررت اعيش وانسى وجوده لان ماهاويته ولاهاويني.
مرت سنه واثنين وتلاثه ومصار عندي حمل.
حياتنه جانت فارغة بس المشاكل بيها عمتي تريدني اشتغل ( 24 ) ساعة واني لامي مشتغلت.
لو نتعارك عالشغل لو عالطلعة يكولي هواي تطلعين وتفرفرين لو عالمصرف لان بصراحة اني مصرفي هواي ماانكر.

عشت لنفسي دللت نفسي ليش احرم نفسي من الحياة فوكما اني محرومه من المشاعر الحلوه. عالاقل اونس نفسي.
بس جنت اراقبه لايوب. ماانطيه مجال ياخذ راحته اخاف يصير مثل عمي إلى هو ابوه.
كل فترة اكصكص ريشه. حتى ميطير لغيري.
اتعودت عليه واتعود علي.
اخر فترة من حملت حسيت شوية بتحسن بعلاقتنه ميلح وياي عالطبه والطلعة والمصرف. ولا حتى عالشغل.
للامانة عمتي متخليني اشتغل بالبيت اهم شي عدها ابنها ميصير عصبي.

جانت تشتغل ومتحجي بس تكولي زوجج عليج ملابسه اكله شربه مسؤوليتج.
اني هم اتعلمت من يجي للبيت اكوم واتحرك واساعد عمتي كدامه حتى ميكول متسوين شي بالبيت وعيب من امي.
واذا طلع عادي ارتاح. انام. اطلع. عمتي متحجي مالها خلك المشاكل كافي عليها مشاكل عمي وفضايحه.
هسه اني منتظرة اجيب واكوله لايوب نطلع ابيت وحدنه لان اريد اخذ راحتي ابيتي اريد اخذ حريتي.
ميصير خواته يوميه وحده منهن جايه هي وجعولتها.
لانوم لاراحة.

دخل يجي الولد اول حتى الزمه من ايده التوجعه.
هو يتمنى طفل بعد كل هالسنوات.
شمه.
مر شهر من داومت بهاي الشركة ولحد الان.
الحمد لله مرتاحة بشغلي ودوامي عالاقل ماكو احد مضايقني ولااكو احد محسسني بمنيه وفضل.
ولااكو احد عينه وصخة ويلمحلي تلميحات مو حلوه.
مديري صح شاب لكن مؤدب. ابد ميتعامل بعصبية مع الموظفين واسلوبه حلو ودائما مبتسم.
كل الموظفين يحبوه.

راتبي نعمه احسن من راتبي قبل هذا اول شهر استلم راتب وانطيته كله لامي كتلها: هاج ماما هذا الراتب. انتي بعد شوفي شلون تقسميه وترتبين وضعنه.
امي: صلاوات. بسم الله الرحمن الرحيم الله يديم هالنعمة ويوفقج ويبعد عنج اولاد الحرام.
شمه: اييي هي هاي الدعوه إلى اريدها
امي: ليش اكو احد مضايقج بالدوام؟
شمه: لا ماما لا هذا مديري فد مؤدب. حباب خطيه مو من هالنوع وبقية الموظفين متزوجين والسايق رجال جبير من اهل الله.

امي: الحمدلله قابل احنه شنريد من الله اكثر. نريد الستروالرزق الحلال حتى محد اله عدنه حاجه ولااحد يجيبلنه حجاية.
شمه: اتذكرت هباوي.
امي: شبيها؟
شمه: مابيها بس كلتلي اطلبج عزيمه من تستلمين الراتب.
امي: عزيمة شنو؟ شنو المناسبة؟
شمه: هاا. مو. مو هي إلى اتوسطتلي وخلتهم يرقوني وينقلوني للفرع الجديد.

امي: هاا اي لعد تستاهل. مطلبت الا حقها. كيفج بعد تردين تعزميها بالبيت وسويلكم اني الاكلات إلى تحبوها او تطلعون انتي وياها لمكان قريب بس بشرط مااريد تأخير. احنه بس نسوان وانتي شابة عيب الناس تشوف طالعة طابه وحدج وبوقت متأخر.
شمه: الله كريم ماما خل اتصل بيها واشوفها ونتفق واكولج.
وائل بعد ما رزلته انكطعت اخباره لاظل يتصل ولايدز مسجات والحمدلله مرتاحه.

اتصالي بقى ويه هبه لكن اقل من قبل وخوله دائما تراسلني وتسأل عني. حبيتها وانقهر عليها لان جانوا يقلدون عليها ويكولون معقده وجنها عجوز ومدري شنو.
وبالدوام الجديد كلهم تقريبا اصدقائي لكن اكثر شي هاي البنية إلى بالريسبشن هههه.
طلعت حبابة حيل وفقيرة بس ماادري ليش تحجي هيجي.
كلما تجي يمي تكعد ونسولف اظل اضحك وهي تصير عصبيه وبعدين تظل تضحك وياي: لمياء: على شنو تضحكين متفهميني؟

شمه: هههههههه. ماكو شي ههههههههه
لمياء: اكيد علي موو كولي كولي لتستحين مال اروح للاوستاذ هسه واكوله عليج.
شمه: هههههههههه
لمياء: اهاا
شمه: فدوه احجي إلى يعجبج بس كلمة الاوستاذ لاا هههههه كولي المدير احسن ههههه
لمياء: صوج اليكعود يمج.
زعلت وراحت ووره ساعة رجعت: اكوولج شمه الاوستاذ منو يمه؟
شمه: هههههه خرب يومج ماعندج احساس انتي ابد ههههه
لمياء: اهووو
شمه: خلص. خلص محد يمه فوتي.

لمياء: لا مااريد منه شي بس ردت اتحرش بيج ههههه
شمه: ايا خبله هههههه
---
وره كم يوم اتواعدنه اني وهبه نطلع نتغدا بساعة الغدا نلتقي بالمطعم المقابل للشركة إلى اني اشتغل بيها.
اجه وقت الغدا اترخصت من استاذ مؤيد وطلعت بعدما رمشت علي هبة.
طلعت من باب الشركة شفت سيارة واكفة بس ماانتبهت منو بيها.
اجيت اريد اعبر الشارع شفت واحد نزل من السيارة التفتت عليه طلع وائل!
غلست كلي: شدعوه؟ تره السلام لله.
مجاوبته.

اتحركت اريد اعبر كلي: شمه اريد احجي وياج.
شمه: مابيناتنه حجي.
وائل: دقيقة والله مااطول.
شمه: شتحجي بعد وائل مبقيت شي ينحجي و ينكال.
وائل: لا اني اجيت حتى اوضح سوء الفهم إلى صار. اني غلطت بس مجنت فاهم الموضوع صح. الغيرة جانت عاميتني. وانتي هم باعدتني عن حياتج فمااعرف شنو افهم وشنو استنتج.
باوعتله كتله: وهسه يالله اتذكرت صار شهر؟
ومن شوكت انت دخلت لحياتي حتى ابعدك؟ تره انت دتخيل اشياء مموجودة اصلا.

وائل: اي انتي شرحيلي ووضحيلي. شمه اني احبج.
شمه: ششرحلك شوضحلك؟ وليش اشرحلك واوضحلك بصفتك شنو ابوي. اخوي. ابن عمي. ابن خالي. خطيبي؟ اي واحد منهم انت؟
وائل: هسه ليش عصبيه؟ دخلي نكعد ونتفاهم.
بهاللحظة وكفت يمنه سيارة ونزل استاذ ايوب!
من الصدمة والارتباك بلعت لساني. بسرعة درت وجهي منه بس هو شافني واكيد عرفني وعرف وائل.
سكتت اني لان مردت احد يسمع حجينه.
عبر علينه وسلم على وائل بس: شلونك وائل؟

وهو ماشي، رد وائل عليه.
حكرني الخبيث. ظل يمشي ويلتفت كل شوية علينه. شكد كريه هالرجال.