رواية صراع الجبابرة للكاتبة روز الفياض الفصل الثامن
حظي الاسود. حظي الاغبر.
يافشلتي. يافضيحتي. الله جاب هذا الفكر هسه. منين طلع!
دخل الشركة وهو كل شوية يندار يباوع علينه.
منين طلعلي هذا بهاليوم الاسود هذا!
اول مدخل للشركة درت على وائل كتله بتعب: وائل كافي تره البيه مكفيني مالي خلك المشاكل روح عفية كافي الموقف الحطيتني بي هسه.
وائل: مرايد شي منج والله بس اريد احجي وياج.
اتنهدت حيل فوك الحر هذا لزك خليت الجنطة على راسي حتى اغطي وجهي من الشمس لان احس وجهي انطبخ.
شمه: نحجي بشنو؟ نسيت المسج الدزيته هو بعد الحجي الكلته هم اكو حجي ينحجي؟
وائل: هسه دخل نكعد وخليني افهمج وافتهم منج.
شمه: هم رجع يكولي افتهم منج، شتفتهم؟ انت اصلا متريد تفتهم انت اكو ابالك شي ومقتنع بي المشكلة ماادري منين جبت هالقناعة شلون انزرع بدماغك هيج شي مااعرف. الله يسامحك.
روح وائل. ميفيد الحجي. اصلا اني طالعة لان عندي موعد وتأخرت. تعذرني مااكدر اتاخر اكثر.
بهالاثناء دك تليفوني هبه. رفعت التليفون كتله: هاي شوف. تاخرت. من رخصتك.
وائل: زين شوكت اكدر اشوفج واحجي وياج؟
التفتت عليه ماادري شجاوبه هذا شاخط. اجيبه منا يرجع منا.
حسيت خطوات وراي التفتت شفت ايوب جاي باتجاهنه كلت بكلبي اهووو. شطلعت هاي.
---.
ايوب: رحت لمؤيد للشركة حتى نطلع نتغدا لان وراها لازم اروح اوصله للمطار عنده سفرة لدبي.
وصلت شفت ولد وبنية واكفين بره بالشمس. نزلت شفت وائل هذا سايق عدنه. شيسوي هنا؟
باوعت للبنية. هاي شمه!
شعدها واكفة بهالشمس والحر ويه هذا؟
فتت للشركة بس شوية ورجعت طلعت حتى اشوف شنو فلمهم ذوله الاثنين.
بعدهم واكفين ويحجون وهي مبينه تريد تروح لمكان بس هو شنو فلمه؟ يجوز يعرفها؟ اخاف ديصارحها؟ يجوز شافها ارملة كلك العب عليها يومين لحدما اخطب واتزوج.
رحت اتمشيت بأتجاهم ردت افهم شنو الفلم.
حسيتها ارتبكت مدري استحت.
ايوب: هاا وائل اليوم هنا؟ شعندك ههه؟
وائل: هلو استاذ. سلامتك بس جان اكو شغلة ردت احجيها لشمه.
ايوب: اه، هاي شمه؟ ولاعرفتها. شلونج شمه؟
اتعمدت احرجها هههه.
دارت وجها باوعتلي ووجها احمر هههه كالت: بخير الحمدلله.
دك تليفونها وجاوبت ومن كلامها تحجي ويه بنيه كلتلها: هلو. اي يالله هسه جايه تأخرت عليج.
سدت التليفون وهذا وائل من يمه كمز ماادري شبي كال: يالله اني اترخص مع السلامة. شمه اذا تردين اوصلج بطريقي؟
شمه: لا شكرا اروح مشي مو بعيد المكان.
راح وائل وهي رادت تعبر الشارع صحت عليها: شمه؟
التفتت علي كالت: نعم؟ صحتني؟
هزيت راسي وكتلها: اي
شمه: شكو؟
ايوب: شبي وائل وياج؟
شمه: مابي شي. واصلا ليش السؤال؟
ايوب: هيج. مجرد سؤال اتصورته ديضايقج. خلص تكدرين ترحين.
باوعتلي وفرت ايدها وراحت. اباوعلها عبرت الشارع ودخلت للمطعم الكبالنه.
رجعت لمؤيد اخذته ورحنه لنفس المطعم ردت اشوف ويه منو متواعده.
مؤيد: لا يمعود مو مشتهين مندي.
ايوب: يامندي غير وراك سفر. هنا ناكل ونطلع.
دخلنه للمطعم شفتها هي وهبه كاعدات يحجن.
رحنه كعدنه اني ومؤيد وشافتنه هبه اجت سلمت علينه كتلها: ها هبه اليوم هنا شعندج؟
هبه: اي استاذ شمه عازمتني لان اتوسطتلها بالشغل هههه.
كالت هالجملة وغمزت وضحكت. رجعت يم صاحبتها إلى بس باوعت علينه ورجعت دارت وجهها.
مؤيد: يااخي ولااحب هالبنية هاي.
ايوب: منو؟ شمه؟ ليش شفت عليها شي؟
مؤيد: لا اقصد الثانية إلى اجت سلمت علينه. لا شمه فقيرة. وحلوه هههه.
ايوب: اشو منو يشوفها يحبها شنو الفلم بالله ليش اني مااشوفها حلوة؟
مؤيد: عندك عمى الوان هههههه لا حلوه واحلى مابيها فقيرة ومؤدبه.
باوعتلها كتله: ثكيلة.
مؤيد: اي عفيه. شنو قصتها بالله متحجيلي؟
ايوب: اشوفك مهتم بيها؟
مؤيد: هههه ادري غير انت موصيني عليها.
ايوب: موصيك عليها بس مو تكعد تتغزل بيها وحلوه ومدري شنو؟
مؤيد: ان الله جميل يحب الجمال ههههه.
خلصنه غدا ورحت ادفع الحساب. دفعت حسابنه وحساب شمه وهبه.
كسرت خاطري هو راتبها قابل شكد وتعزم هبه. وهبه شكد حقيرة لدرجة مخليتها تعزمها بحجة اتوسطتلها وشغلتها.
دفعت الحساب وطلعنه.
مؤيد جان مثل تفكيري: لك هاي صاحبتها شكد حقيره هو مو انت جبتها البنيه؟ وهاي عايشة الدور ومخليه البنية تعزمها هههه والله بشر؟
فتحت باب السيارة وكتله: استغلالية.
مؤيد: مرتزقه.
سافر مؤيد ولازم اني اروح كل يوم اشوف الوضع وارجع.
رحت ثاني يوم دخلت لكيت الكل كاعدين فارشين عالارضية سفرة وحاطين اشكال والوان الاكل وكاعدين يتغدون.
ايوب: السلام عليكم
التفت الكل علي وردوا السلام.
محمد: اتفضل استاذ ويانه.
ايوب: شنو عدكم اليوم؟
محمد: ماكو سلامتك بس حبينه نسوي تغيير بدل الروتين وكلمن يجيب وياه وجبه من البيت إلى جاب دولمة وشمه سوت برياني وزلاطة وسرى سوت كبة ونواشف واني رحت جبت الخبز الحار والطرشي هههه. اتفضل اتفضل.
حبيت الفكرة وعجبتني اللمه وكعدت وياهم اتغدا.
شمه.
دخل علينه استاذ ايوب وكعد يتغدا ويانه اهووو.
والله احس اللكمه توكف على كلبي متنبلع.
كلما اتذكر شلون شافني واني واكفة ويه وائل اموت من الفشلة والف فكرة تجي براسي.
بقيت ساكته طول الوقت مفتحت حلكي بكلمة.
سرى: عاشت ايدج كولش طيب.
شمه: بالعافية
محمد: اي والله طيب فعلا. عاشت ايدج.
شمه: بالعافية.
ايوب: كل الاكل طيب عاشت اديكم. بس الزلاطة شوية حامضة اكثر من اللازم.
بهاللحظة اني جنت صافنة وافكر وبغير عالم سمعته حجه بس مفرزنت شنو كال.
لمياء: شمه وين صافنة الاوستاذ ديجحي وياج.
باوعت على لمياء كتلها: هاا؟
لمياء: اوستاذ ايوب يكول الزلاطة حامضة هواي.
شمه: بالعافية
انتبهتلهم كلهم ضحكوا مااعرف على شنو.
شمه: شكو؟
ايوب: هههه سلامتج ماكو شي.
محمد: الرجال يكولج الزلاطة حامضة حيل وانتي تكوليله بالعافية ههههه.
شمه: ماانتبهت. والله كلت هيج؟
لمياء: هههههه هسه اني اضحك عليج ههههه.
كرصتها حسيت بالاحراج
ايوب: عادي عادي. شمه تمون متعود على حجيها.
حسيته بسمار. شنو يقصد متعود على حجيها؟
شمه: ياحجي؟
ايوب: حجي قديم. يالله سفرة دايمة انعم الله عليكم.
بقيت ساكته هذا شيحجي ياحجي قديم؟ هسه عبالهم اعرفه وبيني وبينه شي. معرفة السودة.
خلصنه اكل وكلمن راح لمكتبه وشغله وايوب فات لمكتب استاذ مؤيد.
ظليت صافنه هذا شيسوي فات المكتب؟ وبأي حق؟ معقولة شريك استاذ مؤيد؟ لا مااظن كل الاوراق عليها بس توقيع مؤيد هو ماله ذكر.
زين معقولة كرايبه؟
هم لا لان مو نفس الاسم واللقب.
زين باي صفه يدخل لمكتبه؟
والعجيبه محد استغرب من الموظفين؟!
بس اني اطرش بالزفة احس نفسي!
بقيت كاعدة على اعصابي مالي خلك فلسفته هسه يبدي الخباثة عاد.
شويه وطلع كال: شمه اذا ممكن استكان جاي؟
كمت على اعصابي لان هذا مو شغلي جاي وكهوة.
رحت جبتله استكان جاي ورجعت دكيت الباب وفتت خليت الجاي كدامه كتله: اكو جرس بطرف المكتب هذا كبل للمطبخ خاف تريد استكان ثاني.
ردت اطلع كلي: بخيل ومريض ومااتذكر اذا اكو بعد كلمة يجوز ناسيها.
رجعت درت كتله: نعم؟
ايوب: ماكو شي. اتفضلي.
شمه: عادي اتفضل طبيعي يعني مو الا تكلي كلما تشوفني. بس شنو حجيي المتعود عليه؟
ايوب: هو هذا مره انت بخيل ومره مريض ومره مدري شنو.
صفنت لان مااتذكر شوكت حجيت هالحجي.
شمه: اني كلت هالحجي مستحيل.
ايوب: اتبلى عليج يعني؟ ياالله سوالف قديمة هاي متسوه.
شمه: بنظرك متسوه. اكيد اكو سبب خلاني اكول هالحجي مو صح؟
سكت. بعدين كلي: آخر مره من اتعاركتي وياي.
شمه: اي هنا الحجي مو كتلك لازم اكو سبب. يالله الله يسامحك.
رفع حواجبه مثل المعجبه كلامي وضحك على كيف وهز راسه.
شمه: هاا اتذكرت. اشكرك علمود البارحة.
شرب شوية جاي وخله الاستكان وبعدين باوعلي: البارحة شنو؟ شصار؟
شمه: دفعت حسابنه اني وهبة بالمطعم.
ايوب: هاا. عادي تدللين بس مالها داعي هالعزيمة.
شمه: ياعزيمة؟
ايوب: انتي مو عازمة هبه؟
شمه: اي المفروض بس بعد انت حاسبت فبقت تطلبني غدا.
ابتسمت لااراديا.
ايوب: متطلبج شي. خلص هي مرة وحدة ومو مهم منو دفع الحساب.
ظليت اباوعله هذا شبي. اشو الحجي ماادري شنو. معقولة شارب شي؟
هو اصلا مو صاحي.
ايوب: شبيج صافنه؟
شمه: مافهمت شي؟
ايوب: احسن..
بقى ساكت شوية بعدين كلي: مالها شي عندج. لتعزميها بعد.
شمه: اي ليش؟
ايوب: هيج بدون سبب اذا سألتج كوليلها استاذ ايوب كلي هيج.
شمه: هو شنو البدون سبب. غيراعرف ليش؟ بعدين استاذ مؤيد مسافر.
ايوب: وشدخل استاذ مؤيد؟
شمه: يعني ميجوز تكعد بمكتبه وهو مموجود لو موجود تكدر تنتظره بس مسافر ومااعرف شوكت يرجع.
ايوب: ادري بي مسافر. اني البارحة موصله للمطار.
شمه: اي؟
ايوب: اي، لتخافين يدري بيه كاعد بمكتبه وبمكانه هو موصيني اخلص الشغل بغيابه. تردين اتصل بي كدامج وتسألينه حتى ترتاحين وتصدكين؟
شمه: لا على شنو. اكو كاميرات بكل مكان بالشركة تصور اكيد من يرجع راح يعرف منو دخل لمكتبة.
ضحك حيل..
بقيت ساكته بعدين كلي: شمه كعدي شوية بلا زحمة.
كعدت واني بكلبي اكول اشتغلت الغثاثه بس امري لله.
ايوب: صدك خل نحجي.
شمه: هاا يابه؟ بدينه؟
ايوب: شبدينه؟
شمه: هم هنا وجودي يسبب مشاكل؟
ايوب: ههههه اتمنى لا هههه لاصدك خو مزعلانه مني؟
شمه: وعلى شنو ازعل؟
ايوب: على إلى صار. اسلوبي جان وياج مو حلو. بس اني شرحتلج الاسباب ولو انتي مطلعتي متفهمة.
شمه: وعسى ان تكرهوا شيئا وهو خير لكم. الحمدلله بطلت من عدكم اشتغلت هنا استاذ مؤيد خوش انسان.
ايوب: اي ميراقبج ولا كل يوم يغثج.
بقيت ساكته زين من يعرف نفسه شمسوي.
ايوب: مبين بعدج حاقده علي؟
شمه: لوما اللي صار ماجان هبه حصلتلي هالوظيفة. المفروض اشكرك.
ايوب: تمام. اهم شي مرتاحه هنا منريد شي منج بعد.
شمه: يالله من رخصتك. محتاج مني شي بعد؟
ايوب: لاشكرا
رجعت لمكتبي واني متضايقة. مسوي نفسه لطيف هسه على اساس. شيخلصها لحدما يرجع استاذ مؤيد.
---
ايوب.
حجيت ويه شمه حسيتها خوش بنيه. وره شوية اتصلوا بيه من البيت امي واكعة ومتكدر تكوم.
طلعت بسرعة: شمه اني طالع للبيت اي شي يصير اتصلي بيه. مفهوم؟
طلعت بسرعة كبل للبيت وبالطريق اتصلت عالاسعاف.
وصلت للبيت واجت الاسعاف ونقلناها المستشفى.
زالكة وهي تغسل بالمطبخ وواكعة والظاهر حوضها مكسور.
بقيت طول اليوم بالمستشفى مكابل امي هي تبجي واني ابجي.
اجن البنات خواتي كل وحده هي وزوجها.
بقينه وياها لحدما انطوها ابرة ونامت.
اتفقن البنات يومية يجن اثنين الصبح ويبقن وياها لليل وبالليل يجن اثنين ثانيات وذني يروحن للبيت يرتاحن.
بيومها بالليل رجعت اني والحجي للبيت جان بي بس منى ويمها مبقين الجهال.
منى: هاا عمو شلونها عمه؟
ابو ايوب: تعبانه والله. ذابحه نفسها بهالشغل مره جبيرة عوفي الشغل يولي وانتي ارتاحي.
جان اكو حجي بكلبي كللش هواي بس محبيت احجيه لان الموقف مو متحمل حجي من احد.
مااريد ابدي شرارة لمشكلة جديدة بيني وبين ابوي.
هواي صارت مشاكل بيني وبينه بسبب تصرفاته من يوم ماامي لغت الوكالة إلى جانت مسويتها اله وحولتها بأسمي.
مااريد اتذكر ذيج الايام. اختنك من اتذكرها.
وصلت للسلاح بيناتنه.
ابوي رفع علي السلاح.
عفتهم هي وابوي وصعدت اسبح وارتاح شوية.
طلعت من الحمام لكيتها كاعدة بالغرفة ولازمه التليفون.
ايوب: العشا جاهز؟
منى: ليش انتو ممتعشين؟
ايوب: وين نتعشى يعني بالمستشفى؟
منى: جان اتعشيتوا وياهم مو اخذولكم عشا؟
ايوب: بيا حال حتى نكعد ونتعشى والله بطرانه انتي.
منى: بطرانه. تره اني هم تعبانه مو بس انتو تعبتوا جهال خواتك يكمزون على راسي من العصر لهسه عبالك قروده.
ايوب: تره هذا بيت ابوهن يعني اكيد يجن ويجيبن جهالهن وشصار عليج من كعدتي يم الجهال كم ساعة غير حالة طارئة بس احساس ماكو ولاحتى حجي تعرفين تحجين.
منى: وشدعوه عليك هلكد عصبي؟ قابل اني وكعتها لعمتي؟
جريت نفس مااريد اصير عصبي اكثر مااريد افقد اعصابي كتلها: روحي عشي الحجي والجهال وكافي حجي مصاخ ودلع مال زعاطيط.
نزلت وهي تدردم.
كعدت صليت ولاول مره بجيت بصلاتي، كلما اتذكر امي شلون تبجي يضيك صدري.
اجو اخذوا الجهال وراحوا والحجي نام.
منى هم نامت.
بقيت وحدي الليل كله كاعد كل شوية اتصل بخواتي اسأل عن امي شلون صارت، كعدت، نامت، اكلت، شربت.
طار النوم من عيني.
كمت رحت سويتلي ناركيلة وكعدت بالحديقة ماادري كم فكرة مرت براسي.
من فكرة لفكرة. مره امي مره الحجي مره هاي النايمة جوه واحس نفسي مااعرفها ولاتعرفني رغم حافظها على كلبي بس هيهات تحس بيه واحس بيها.
كل واحد من عدنه بوادي.
اوووف.
اتذكرت اليوم سوالفي ويه شمه. ضحكت. هالبنية هم نكته مره يعجبها تبسمر وتحجي ومره تغلس وتحكر وتسوي نفسها متدري عن شنو الحجي.
بس اني اذيتها الظاهر هواي. اليوم بين على وجها من كلتلي الله يسامحك.
معقولة إلى صار بأمي هاي لان اذيتها؟ معقولة الله اذاني بأمي؟
اي. لان هبه كالت امها جبيرة ومريضة وهي تشتغل علمودها وعلمود الولد ابنها.
ظليت الليل بطوله افتر بالبيت محتار شسوي ووين اروح وشلون اخليها تسامحني. كل شي ولاامي يصير بيها شي.
صار الصبح واني كاعد لو اشرب جاي لو ادخن ناركيلة وراسي ظل يوجعني من التفكير.
منمت الا الساعة بالستة الصبح ودك المنبة الساعة بالسبعة ونص.
كعدت بدلت وطلعت للمستشفى عالسريع.
---
اليوم مر مثل اليوم القبله. تعب وركض وناس تروح وناس ترجع.
بقيت بالمستشفى للساعة بالعشرة ونص من شفت امي واطمئنيت عليها يالله ارتاح كلبي.
رحت مريت عالمشروع ورجعت للشركة. اتذكرت شمه صحت على هبة: هبه اريد تدزيلي رقم شمه بسرعة.
هبه: منو؟
ايوب: رقم شمه صديقتج.
هبه: خوماكو شي؟
التفتت عليها كتلها: انتي خوماكو شي؟ عندي شغلة وياها مو ضروري تعرفين كل شي.
سكتت ودزتلي الرقم.
رجعت لمكتبي وسديت الباب واني افكر بكلام مؤيد هالبنية فعلا مو مريحة.
اصلا هي الوحيدة إلى الحجي محط عينه عليها. اشمعنه هي؟
هم مرتبة ومهتمه بنفسها واحسها ممكن تنطي مجال اذا اكو فلوس. اذن ليش هي استثناء؟
شعجب فلتت من ايدين الحجي!
اووف خل اخلص من هالوضع وامي تصير زينه واتفرغلها.
حفظت رقم شمه بتليفوني واتصلت عليها.
دك بس مجاوبت. يجوز لان شافته رقم غريب.
رجعت لهبة كتلها: هبه. اتصلي على شمه كوليلها خل ترد عالتليفون.
باوعتلي باستغراب واتصلت على شمه وكلتلها.
رجعت لمكتبي واتصلت من جديد: الو. شمه؟
شمه: اي شمه
ايوب: هلو شمه شلونج؟ اني ايوب.
شمه: هلو بيك استاذ اي عرفتك كلتلي هبه.
ايوب: شمه. اعرف انتي ضايجه مني وحاقده علي بسبب إلى صار وهالشي مخليني ممرتاح. اني مو انسان سيء صدكيني مااعرف شلون اعوضج بس اهم شي تسامحيني اريدج تبريني الذمة.
بقت ساكته.
ايوب: شمه؟ تسمعيني؟
شمه: اسمعك. مبري الذمة استاذ شغله صارت وانتهت والحمدلله طلع بيها صالح إلى.
ايوب: اكيد؟ من كلبج هالكلام؟
شمه: اكيد.
ايوب: يعني موحاقدة علي؟
شمه: شوية
ضحكت شويه واتشكرت منها وسديت التليفون.
بقيت تلث تيام اروح وارجع على امي للمستشفى.
شمه.
طلع مستعجل مااعرف شصاير وكلي اذا صار شي اتصلي بيه.
زين اشلون اتصل بي واني مااعرف رقمه؟
مو اكول مو صاحي.
ثاني يوم مااجه للشركة كلت فكه. بس بعدين محمد كال: يكولون امه مريضة
كلت بكلبي الله يعينها شلون متتمرض اذا هذا ابنها وابوه زوجها اثنينهم يجلطون.
ثاني يوم اتصلت بيه هبه كالت استاذ ايوب ديتصل عليج جاوبي.
اتعجبت. والصدك خفت بس مضطره اجاوب.
طلعت التليفون من جنطتي شفت رقم غريب يتصل جاوبت طلع هو.
مكالمته غريبة اتصل حتى يكولي سامحيني وابريني الذمة. شبي هذا؟ شاخط يمكن؟
لو ديمثل علي دور المؤمن وصاحب الضمير الحي لو مو صاحي.
كل مجال ماكو.
كتله مبري الذمه شيتوقع ارد عليه يعني.
---
بالليل جنت نايمة وحسيت ادم بجه.
كعدت مااشوف شي بس اسمعه يبجي خبصني.
فتحت اللايت ركض شفت متقيئ وخايف ويبجي.
انرعبت.
حاولت اسكته واخذته للحمام حتى اغسله وابدل ملابسه.
شمه: حبيبي لتبجي لتخاف مابيك شي ياماما.
وديته يم امي ورجعت شلت الفراش كله للحمام حتى الصبح اغسلة.
رجعت فرشت غير فراش ورحت جبته يمي.
حسيته مصخن شوية. انطيته خافض حرارة وبديت انومه.
دقايق وكعد واتقيئ الدوه كله.
وكلب الدنيا بالبجي.
امي اجت تركض واني احتاريت اسكته لو اخذه للحمام لو اشيل الفراش الوصخ.
امي: شبيك حبييي. شبيك بيبي سوده عليه
شمه: ماادري شبي بس مصخن.
امي: هاي مستبرد. بروده هاي.
بقينه للصبح كاعدين اني وامي لان كل شوية يتقيئ.
اول مصارت الساعة بالسبعة اخذناه المستشفى.
خلوله مغذي كالوا التهاب بالامعاء.
جنت احاول اتماسك لان امي انتهت من البجي ومااريد ابجي كدامه لان طفل ويخاف.
بقينه للظهر بالمستشفى بس محد اجه شافه. اروح وارجع اسأل عالدكتور يكولون مموجود طلع.
آخر شي كلولي والله الدكتور بس الصبح يجي لازم تنتظرين لباجر.
ظليت ادك على وجهي واني اشوف ابني من الليل لهسه حتى المي ميكعد ابطنه.
وين اروح؟ وين اوديه؟ هاي امكانيتي مستشفى حكومي مااكدر اوديه مستشفى اهلي.
وشلون اذا ابني بقى هيج اليوم كله؟
وين يتحمل يبقى لباجر بدون اكل ولاشرب ولاعلاج؟
يمه ابني. ابني راح يموت واني مابيدي شي اسوي.
طلعت بره الردهه كلها وكعدت عالكاع وبجيت بجي لحدما دخت وتعبت.
دك تليفوني شفته استاذ ايوب مجاوبته.
اني بيا حال.
رجع اتصل هم ردت مااجاوبه بس اتذكرت يمكن اجه للشركة بمكان استاذ مؤيد وشافني ماكو خل اجاوبه لايروح يكول لاستاذ مؤيد ويخليه يبطلني..
جاوبته واني امسح دموعي: الو
ايوب: شمه. صباح الخير
شمه: صباح النور استاذ.
ايوب: اسف عالاتصال بس اني راح اتأخر شويه فاذا اجه ابو حيدر خليه ينتظرني واني هسه جاي بالطريق بس خاف اتأخر بالازدحام. اوك؟
شمه: اني ممداومة اليوم ابني مريض.
بجيت مابين خوفي على ابني وقهرتي عليه ومابين خوفي من رد فعل هالايوب من يعرف اني ممداومه وغايبه بدون اجازة.
---
ولدي يابضعة مني. يا جزء من قلبي وكل روحي.
ربي يكفيني وجعاً. فلم يبقى لي سوى امي وصغيري.
فلا تحرمني من احد منهم يارب.
ولاتكسر قلبي بفراق احدهم. ولاتفجعني بفقدهم ولاتألم روحي بأي الم يصيبهم.
ربي ان كان هذا ابتلاءا فابتليني في نفسي وجسدي ليس في احد منهم يارب..
---.
هكذا تمضي ايامي مابين ألم وألم وها انا اضع يدي على قلبي فانا اعرف القدر جيدا لم يرحني يوما الا ليكسر قلبي دوماً.