رواية صراع الجبابرة للكاتبة روز الفياض الفصل التاسع

رواية صراع الجبابرة للكاتبة روز الفياض الفصل التاسع

ظليت ابجي حيل.
ايوب: سلامته. شبي؟
شمه: من الليل لهسه بس يتقيئ وكل شي ميكعد بمعدته.
ايوب: وديتيه للمستشفى؟
شمه: احنه هسه بالمستشفى بس من الصبح لهسه ولادكتور خاف ربه وكال اجي اشوف هالاطفال شبيهم وشصايرلهم.
ايوب: اي مستشفى؟
كتله اسم المستشفى كلي: مستشفى حكومي. طبعا محد يجي ومحد يشوف شبي. غير تاخذيه لمستشفى اهلي.
بقيت ساكته استحي اكوله ماعندي امكانية صعبه.

شمه: اسفة اعذرني غبت بدون اجازة. بس والله العظيم راح من بالي اتصل مظل عندي عقل من البارحه لليوم واني حايرة شسوي لابني ومابيدي شي.
ايوب: ياشغل هسه وكته. ابنج مريض. يالله اوك جايلكم اني هسه راح الف واجيكم انتظريني.
شمه: وين؟
سد التليفون واني ماادري امسح دموعي لو اروح اكول لامي راح يجي استاذ ايوب.
رحت كعدت يم امي وكتلها مديري اتصل وراح يجي.
امي: وين يجي؟
شمه: هنا للمستشفى اتصور. هيجي افتهمت من كلامه.

امي: يعني ليش يجي؟ علمودج يعني لو عنده شي بالمستشفى؟
شمه: والله ماما مااعرف.
وره نص ساعة اتصل استاذ ايوب: الو؟
ايوب: هلو شمه اني هنا بالمستشفى انتي وين؟
شمه: بالطوارئ.
ايوب: اوك.
طلعت بره الردهه شفته جاي بأتجاهي.
ايوب: السلام عليكم
شمه: وعليكم السلام
ايوب: ها شلونه؟
بجيت كتله: مثلما هو، ابني ديموت كدامي ومابيدي شي اسويه مااعرف شبي.
ايوب: اذكري الله. هسه ناخذه لغير مستشفى او دكتور ويصير زين لتبجين.

مكدرت اسكت بقيت ابجي. راح هو دخل يم السستر وصاحلها وراح هو وياها للردهه.
مسحت عيوني ورحت وراهم.
ايوب: شمه وينه ابنج؟
اشرتله على امي وآدم.
راح سلم على امي وصاح للسستر تشيل المغذي حتى نطلع آدم.
من ردنه نطلع صاحوا عليه كلوله: انت ابوه؟ لان اذا تطلعه منا لازم توقع على مسؤوليتك يطلع.
ايوب: اي اني ابوه. اوقع ليش مااوقع يعني هو هنا شمستفاد وانتو شمسويله.
وقع وشال آدم وطلع واني وامي نمشي وراه.
امي: وين ماخذنه؟

شمه: علمي علمج ماما بس اتوقع للدكتور
امي: كون يطلع دكتور زين ويعرف شبي. سوده عليه يابيبي شجاك.
شمه: ماما شلون اذا الفلوس العندي ماكفت؟
امي: لا ان شاءالله تكفي.
شمه: خل نوصل واتصل على هبه تجيبلي فلوس اذا احتاجينه.
امي: عندي مية ضامتها جمعتها من راتبج.
شمه: نعمه من الله.
امشي وامسح دموعي واني اشوف ابني نايم مسنح والكانونه بيده والدموع ناشفه على خدوده.

وصلنه للسيارة واخذت آدم منه شفت قميصه متوصخ من آدم قيئ ودم من ايده من الكانونه.
استحيت وماعرفت شحجي.
فتح الباب الامامي لامي كعدت ووبعدين فتحلي الباب واخذ آدم: لا هاي وصخ ملابسك خليه اكدر اصعد وهو بيدي.
ايوب: ياملابس يمعوده. انطينياه لان متكدرين تكعدين ولاتصعدين وهو بيدج.
كعدت بالسيارة ودنك هو انطاني آدم.
شغل السيارة وطلع بينه.
حضنت ابني وعيوني مابطلت دموع.

امي: كافي ماما. كافي بجي ان شاءالله مابي غير العافية.
شمه: ان شاءالله.
امي دارت على ايوب كلتله: انت مديرها لشمه؟
باوعلي هو بالمراية وكل لامي: اي يمه مديرها.
امي: الله يوفقك ياماما. مااوصيك على شمه يمه. احسبها مثل اختك الزغيرة ودير بالك عليها تره كل شي متعرف تتصرف مطفيه مثل متكول.
كمزت من مكاني جنها امي جفصت وفشلتني كدامه؟
من فشلتي غلست وسويت نفسي امسح بوجه آدم.
ايوب: تدللين يوم وميحتاج توصين.

امي: تعبناك ويانه حبيبي ماما عفت شغلك واجيت.
ايوب: كل تعب ماكو. ماعندي شغل لتفكرين. اني هم والدتي بالمستشفى وجنت راجع من عدها من كلتلي شمه.
امي: لااا سلامتها قهرتني والله.
فتحت عيوني شبيها امي هم صايره لوتيه عود. وين عرفتيها وانقهرتي عليها.
امي: مريضه؟
ايوب: وكعت وانكسر حوضها.
امي: لااا مو خوش خبر. سلامتها الف سلامة.
ايوب: الله يسلمج. ادعيلها يمه.

امي: الله يكومها بالسلامة ان شاءالله لتخاف ماما خليها يم الله.
ايوب: ونعم بالله.
شوف سؤال امي. مريضة؟ ادري لعد شتسوي بالمستشفى قابل رايحة تقضي اجازتها هناك.
خليتهم يحجون هو وامي واني بديت اقرا آيات على راس آدم لحدما وصلنه للمستشفى.
نزلوا واجت امي تريد تاخذ آدم حتى انزل بس ايوب مقبل وشاله هو.
دخلنه للطوارئ اجه الدكتور فحصه كال افضل تدخلونه لدكتور اطفال اختصاص.

رحنه كصينه تكت وصعدنه للدكتور لكينه الناس الجايه ماادري شكد بحيث ماكو مكان بغرفة الانتظار ولا بالممر.
شفت مكان لامي كعدتها خاف هي هم توكع علي واحير بيها.
دخلنه حتى ناخذ رقم طلع رقمنه (57) والدكتور بعده ماجاي اصلا.
وره تقريبا ثلث ساعة اجه الدكتور.
السكرتير كال: اول شي يدخلون المحافظات إلى جايين من المحافظات هسه ندخلهم حتى يلحكون يرجعون.
شمه: الله اكبر. راح يموت ابني على مايوصله السره.

ايوب: اششش. تعالي وراي.
مشى بين الناس ووصل للسكرتير كله: احنه جايين من غير محافظة.
باوعلنه السكرتير كال: من يامحافظة؟
ايوب: من الحلة
السكرتير: هسه اسجل اسمكم.
شمه: الله يخليك ابني تعبان راح يموت بسرعة فوتنه الله يخليك.
صبت دموعي.
ماادري شبي السكرتير جان يباوعلي.
يمكن حس ايوب ديجذب بعدين كلي: بالسره اختي كلمن يفوت بسراه.
شمه: رقمنه ( 57 ) يعني شوكت يوصلنه السر!

ايوب مد ايده بجيبه وطلع (25) وخلاها بيد السكرتير والتفت علي اشرلي حتى ابقى ساكته.
السكرتير: اوكفوا يم الباب حتى من تطلع العائلة الجوه انتو تدخلون وراهم. ابنكم خطيه مبين تعبان ووجهه اصفر.
وره دقايق طلعت العائلة إلى جانت يم الدكتور واشرلنه السكرتير ندخل للدكتور.
دخلنه للدكتور سلم عليه ايوب وكعدنه كال: هاا شبي الحلو؟

التفت علي ايوب حتى احجي الدكتور شبي ابني: دكتور بس يتقيئ من البارحة بالليل اليوم حتى العلاج يذبه حتى المي كل شي ميكعد بمعدته.
الدكتور: وهاي شنو الكانونه بايده؟
شمه: مو الصبح اخذته للمستشفى كالوا التهاب بالامعاء وخلوله مغذي.
الدكتور: خلي هنا حتى افحصه.
كام ايوب خله ادم عالسديه. ادم جان نايم وكعد من شاف ايوب والدكتور ظل يبجي.
كمت اني بسرعة وكفت يمه كتله: حبيبي ماما اني يمك لتخاف ميسوولك شي.

من شافني موجوده سكت.
الدكتور التفت باوع لايوب كله: انت ابوه؟
ايوب استحى الظاهر يكوله لا فكله: اي.
الدكتور: مادام تعرف انت ابوه ليش هيجي مخليها تاخذه للمستشفى الحكومي من البداية جيبه هنا ليش مخليهم يعذبون ابنك بالكانونه. متخاف عليه مو هاي ممكن اذا دخلوها غلط تسببله مشاكل جبيره.
ايوب: جنت بالدوام ماادري بيها ماخذته.

الدكتور: ماتدري لو جنت نايم مو يمك السالفة. شوفه هسه حتى ميريدك يريد بس امه لان ميحس بيك ابوه. جيل تعبان ملتهي بأشياء تعبانه وينكم ووين الزواج ومسؤولياته.
حصرتني الضحكة بس بقيت ساكته وايوب جان متماسك زين والله لارد عالدكتور ولاجاوبه خلاه يحجي براحته.
الدكتور: هذا منو الاثول الكللكم التهاب بالامعاء؟ مو التهاب هذا صدره مقبط. عنده ربو هو؟
شمه: لا ماعنده. عنده حساسية بالقصبات.
الدكتور: اي هو ربو.

شمه: لا يعني ميختنك ولاياخذ علاج.
الدكتور: هاا. يالله هسه راح اكتبله علاج صدره كله بلغم.
باوع على اايوب خزره كله: روح جيبله هاي الابره وتعال بسرعة يمكن يحبك ويحس انت ابوه.
ايوب: صار.
طلعنه اخذت آدم ورحت لامي اشوفها وايوب خطيه راح يجيب العلاج.
وره شوية رجع واخذنه آدم بزوه الابره وشالوا الكانونه.
هو يبجي واني ابجي على بجيه.
ايوب لازمه حتى ميتحرك.
خلصنه وطلعنه.
ايوب: هسه يصير زين ان شاءالله لتخافين.
شمه: يارب.

وصلنه السيارة كتله: استاذ. تعبناك وعطلناك احنه ناخذ تكسي انت هم جنت راجع من الوالده وتعبان.
فتح السيارة كال: ماكو تعب. مو مال تكسي بهالشمس والحر هذا الطفل وين يكدر يتحمل. صعدوا صعدوا. صعدي يوم.
صعدت امي وانطيتها ادم واني رحت كعدت وره.
لان سهرانه الليل كله وتعبانه غفيت بالسيارة. حسيت من وصلنه للبيت وكفت السيارة وكعدت.
نزل هو اخذ آدم من امي ونزلت امي فتحت الباب.

نزلت اني واخذته من عنده: مشكور استاذ. تعبناك ويانه.
ايوب: ماكو شي. سهله.
لحت امي عليه حتى يدخل للبيت بس مقبل اتشكرنه منه وراح.
جنت خايفة اوكل آدم اي شي بس لازم اخليه ياكل. جربت انطيته مي اول شي لان شفت شفايفه يابسة عبالك صارله ايام مشارب مي مو عبالك من البارحة بالليل.
بقيت كاعدة اراقبه وبيدي منشفه خاف يتقيأ بس الحمدلله ماتقيئ.
امي خلصت صلاتها وسوتله شوربة بعدين كعدت اوكله شوية شويه.

امي: هذا الولد هو مديرج؟
شمه: مديري القديم
امي: ليش؟ بطل؟
شمه: جان مديري بالفرع القديم
امي: لعد شعنده متصل بيج؟
شمه: لان مدير الفرع الجديد مسافر وهو بمكانه فأكيد من يحتاج شي يتصل بيه.
امي: هاا. خوش ولد الله يخليه لامه ويخليها اله
شمه: يارب
امي: هو حاسب مو؟
شمه: اي وماادري شلون ارجعله الفلوس.
امي: هو موظف عد اصحاب الشركة لو هو صاحبها؟
شمه: هو صاحبها.

امي: معناها عيب ترجعين الفلوس بس اذا يعجبج ناخذله شي واسويلج هم كيكة واطبخلج طبخه هو يحبها ودزيله غدا مو احسن؟
شمه: والله ماما مااعرف بس مو مال اجيبله شي استحي احسها زحمه الغدا احسن اني اشوف بس خل يصير آدم زين وبعدين الله كريم.

امي: لا صلاوات غده شره ان شاءالله غده شره هاي اكل حبيبي وهسه بس يخلص غسليله وجيبي ابدل ملابسه وانومه. فدوه لعينك يابيبي اشتاقيت لريحتك هسه تجي تنام بحضن بيبي واشمك واحطك على كلبي.
امي جانت تحب آدم حب فضيع. احسها تحبه اكثر مما اني احبه.
العصر بعدما ناموا امي وآدم كمت غسلت الفراش المتوصخ وشغلت الغسالة ذبيت بيها ملابسنه. كعدت انتظر الغسالة تخلص واني بقمة التعب والنعاس كل شوية تغفى عيني وارجع افز.

طلعت تليفوني وخليته صامت وكعدت اكلب بي حتى لاانام.
اتذكرت موقف ايوب اليوم والي سواه لابني.
موقفه هذا مااكدر انساه ولو شكد مااشكره راح يكون قليل بحقه.
غريب هالانسان جان خانكني ومنكد علي ومن اشتغلت بغير مكان اتغير ( 180 ) درجة عبالك مو هو.
جنت افكر وصافنه بامره الغريب ودك التليفون وهو عالهزاز بس غير كمزت. طفر كلبي من مكانه من شفت المتصل استاذ ايوب. يمه دخيلك الهي شنو يقرا افكاري هذا!
ايوب.

انقهرت على شمه من سمعتها تبجي على ابنها. اني انحرمت سنين من نعمة الابناء وافهم شنو يعني ام خايفة تفقد ابنها. خصوصا انه هي فقدت ابوه من قبل وابوها. مو سهله ام تفقد ابنها.
رحت واخذته لغير مستشفى وجان عندي استعداد اتحمل التكاليف شكد متكون. يمكن من اساعدها هالمره اكون كفرت عن ذنبي وياها وتبريني الذمه.
بعدما وصلت شمه واهلها لبيتهم رجعت لشركة مؤيد شفت الشغل بقيت كاعد للساعة بالاربعة بالشغل.

طلعوا كل الموظفين.
من خلصت شغلي اتذكرت شمه خطيه كلت خل اشوف ابنها شلون صار.
اتصلت عليها.
دك التليفون.
شمه: الو
ايوب: السلام عليكم
شمه: وعليكم السلام هلو استاذ
ايوب: شلونج شمه؟
شمه: الحمد لله
ايوب: هاا شلون صار ابنج؟
شمه: لا الحمد لله نعمه من الله اكل شوية ونام
ايوب: يعني اتحسن ان شاءالله؟
شمه: ان شاءالله
ايوب: اوك. ممحتاجه شي؟ متردين شي؟
شمه: الف شكر مقصرت اريد سلامتك
ايوب: الله يسلمج. يالله مع السلامة.

شمه: الله يسلمك
سديت التليفون بس حبيت عبارة اريد سلامتك. عجبتني.
رجعت للبيت غسلت ورحت اشوف امي. طبعا امي لان عدها ضغط مكدرنه نطلعها للبيت.
وصلت للمستشفى لكيت خواتي سهاد ونهى يمها.
ايوب: ها يمه شلونج اليوم؟
امي: اريد اموت يمه ايوب. ادعيلي اموت واخلص.
ايوب: اسم الله عليج يومي قبل يومج ان شاءالله
امي: اسم الله عليك ايوب يمه. ايوب تعبت.

ايوب: صلي على محمد يمه بعد مصارلج اسبوع الكسر ياخذ وقت وانتي كسرج مو ايد ولارجل بالحوض يعني يطول. اتحملي فدوه لكلبج.
بقيت كاعد يمها واحاول الهيها واسولف وياها لحدما اجوا انطوها العلاج والمسكنات ونامت.
سهاد: ايوب حبيبي متغدي؟
جريت حسره كتلها: لا والله قبل ساعه طلعت من الشغل للبيت غسلت وبدلت واجيتكم.
سهاد: لعد خل اخليك شوية اكل ويانه اني ونهى عالواهس عمي ومرت عمي جانوا هنا وجابوا وياهم لفات وعصاير.

انطتني لفة وعصير. بديت اكل كالت نهى: شلونها منى؟
ايوب: ماادري
نهى: ليش مو تكول جنت بالبيت؟
ايوب: جانت نايمة
نهى: عفيه نوم صدك جذب.
محجيت كملت اكل واني بكلبي غصه.
سهاد: نوم الظالم عبادة.
رأسا ضحكت وضحكت نهى.
سهاد: والله. شكد كرهتها. لوما خاطر ايوب والله جان رحت طيحت حظها. الله يقبل امي بهالعمر وتنظفلها وهي نايمه لو طالعة السنيوره.

نهى: والله ماادري شگول وشحجي. امي وابوي همه بلونه بيها وبلو ايوب كلما كال مااريدها جانت امي تزعل.
كمت مردت اسمع هالحجي. اعرفه كلش زين ممحتاج احد يذكرني بي.
ايوب: يالله اني رايح اشوف الحجي وين اذا ردتوا شي خابروني. ماشي؟
طلعت من المستشفى بقيت افتر بالسيارة. اكو شي احسه كاعد على كلبي وكاتم انفاسي.
ماادري وين اروح.
بعدين رحت يم ولد صديقي عنده شركة مال سياحة وسفر.

بقيت كاعد يمه لليل وبعدين رجعت للبيت لكيت عمي ومرته عدنه ومن راحوا منى رادت تروح وياهم.
ايوب: وكته هسه؟
منى: مو احسن مما ابقى وحدي بالبيت؟
بكلبي كلت هم صح خاف هم هاي يروح يصير عليها شي وهي بحدها بالبيت.
راحوا.
بقينه اني والحجي. سويت عشا بسيط إلى واله. اتعشى ونام.
بعدين ضجت كاعد وحدي كلت خل انام احسن.
بس قبل ماانام دزيت مسج لشمه كتلها: شمه باجر لتجين. من يصير ابنج زين داومي.
مجاوبت يمكن نايمه.
شمه.

بالليل نمت مثل القتيل.
كعدت الصبح حتى اروح للدوام بس لكيت استاذ ايوب دازلي مسج يكولي لتجين اليوم.
والله محتاجه ابقى اليوم بالبيت بعدني نعسانه.
رجعت نمت ومكعدت الا الساعة ب (10 ).
كعدت البيت هدوووء باوعت للساعة شفتها بالعشره طفرت من الجرباية ركض لابني وامي مو من عوايدهم يتأخرون لهسه بالنوم بس ماكو بغرفة امي.
سمعت صوت امي بالحديقة. طلعت لكيتها كاعده هي وآدم يلعبون ويه البزونه الرمادية.

ارتاح كلبي من شفته يضحك ويلعب.
خلصت اليوم اجهز غدا لاستاذ ايوب كلت شوكت ميكمل الاكل اخذه واروح اوديه اله حتى لو الظهر واروح بتكسي.
كعدنه سوينه محشي. حشينه الكوسا والفلفل الاخضر والبتيته وسويت زلاطه بس هالمره مخليت عليها ليمون خاف يكول حامضة وسويت للبقية لفات صاج زحمة اخذ بس اله والبقية موجودين.
الساعة بالوحدة كمل الاكل.
اتصلت على لمياء: اكولج استاذ ايوب موجود؟
لمياء: لا الاوستاذ ماكو اليوم بعده مااجه.

ظليت محتاره اتصل بيه واسأله هو وين لو عيب؟ بعدين كلت لا مو عيب غير اريد اشكره.
اتشجعت واتصلت بي اول رنه والثانية جاوب: الو
شمه: الو هلو استاذ
ايوب: هلو شمه
شمه: استاذ انت وين؟
ايوب: شنو؟!
شمه: انت وين؟ لان اتصلت على لمياء كالت ممداوم اليوم عدهم.
ايوب: اي مصارلي مجال اروح فد شويه ورايح ليش اكو شي؟
شمه: لا سلامتك ماكو شي بس انت متغدي؟
ايوب: شنو؟ لا هههه شعندج اليوم مسويه استجواب؟

شمه: مو اني راح اجي هسه واجيبلك غدا بس ردت اتاكد بالاول.
ايوب: غدا إلى؟! شنو المناسبة؟
شمه: ماكو مناسبة. بس وكفتك ويايه البارحه وركضتك ويايه وويه ابني مااعرف شلون اردلكياها.
ايوب: شتردين. تحجين صدك. تره مسويت شي مجرد وصلتكم للدكتور بعد ليش مكلفه نفسج.
شمه: لا مو مجرد وصلتنه. عموما اني هسه راح اطلع اجيبلكم الغدا قبل ميبرد.
ايوب: يعني اليوم نتغدا من ايدج. بس ياريت لو الزلاطه مو حامضة هههه.

شمه: لا هالمره اطمئن مخليت ليمون عليها هههه.
سديت التليفون ورحت.
اجرت تكسي حتى يوديني ويرجعني.
وصلت ونزلت الاكل والولد السايق وياي يساعدني.
سلمت عالكل وكلهم اتحمدوا السلامة لابني وعرفت جانوا ناوين يمرون علي للبيت من يطلعون من الدوام حتى يشوفون ادم ويتحمدوله السلامة.
نحجي ونسولف لدرجة نسيت نفسي ونسيت السايق ونسيت اسأل على استاذ ايوب.
---
ايوب.

بعدما اتصلت بيه شمه رحت لشركتهم. جانت بعدها مواصله من فتت للمكتب وبديت اشتغل.
وره شويه اجت.
شفتها بالكاميرا نزلت وشايله الاكل ووياها واحد نزل من السياره منو هذا مو وائل!
اتجمعوا البقية عليها وسوالف وضحك وهذا الوياها كعد شنو القصة؟
انتظرتها تجي. تسلم. مااجت مندمجه ويه الجماعة..
شعور غريب مزعج شنو هو ماادري بس محبيت إلى ديصير.
شلت التليفون واتصلت عليها.
شمه: الو هلو استاذ اني وصلت.

ايوب: ادري بيج وصلتي صار ساعة اشوفج واكفة تضحكين وتسولفين ويه الجماعة. مو المفروض بالاول تجين هنا؟
شمه: وين هنا؟
ايوب: اقصد إلى للمكتب مو المفروض باالاول تسلمين عالمدير؟
شمه: هاا ليش؟ يالله جايه.
وره شويه دكت الباب ودخلت كالت: السلام عليكم
ايوب: وعليكم السلام هلو شمه
شمه: ها استاذ خوما زعلت مني؟
ايوب: ليش؟
شمه: لان مفتت كبل سلمت عليك بالاول.
ايوب: منو هذا الوياج وائل؟
باوعتلي مستغربه كالت: ياوائل؟

ايوب: السايق بشركتنه القبل كم يوم جنتي واكفة وياه بره.
اتغيرت ملامح وجها وكلتلي: لا مو وائل. ليش وائل يجيبني يعني؟
ايوب: ماادري عبالي هو لان كتلج شفتج واكفه وياه
حسيت عيونها اتغيرت. بين على عيونها الزعل.
شمه: واذا شفتني واكفة وياه؟ واكفة بشارع عام جنت وكدام الشركة يعني كدام الناس واصلا اني اتفاجأت من شفته ماعندي شي وياه بس هو لزك.
ايوب: اني مسألتج شبينج وبينه.

شمه: مرات الانسان يسأل بصوره غير مباشرة. وسالتني هم شيريد منج بنفس الساعة وجاوبتك. فبعد مالها داعي هالتلميحات المو حلوه.
ايوب: مااقصد المح لاي شي ليش فهمتي كلامي هيج؟

شمه: على العموم اني اجيت حتى اشكرك على إلى سويته ويايه البارحة جميلك مراح انساه وجنت ناويه ارجعلك المصاريف إلى صرفتها بس امي مقبلت وكالت عيب الغدا افضل. الاكل بالمطبخ شوكت ميعجبك تكدر تضغط عالجرس. اني اترخص بعد لازم ارجع وان شاءالله باجر اداوم.
دارت ومشت باتجاه الباب صحت عليها بس طلعت مجاوبت.
اني شجفصت!
ماادري شبيه وياها. مااعرف ليش احب اضوجها لو هو شنو مااعرف ماادري. اسلوبي وياها مختلف.

ادري بأي حق اني اسألها هيجي اسئلة واتوقع منها تتقبلها وتجاوب عادي؟
ان تكونَ وحيداً خيراً لكَ من ان تكونَ محاطاً بذئابٍ جائعة.
هكذا احسست نفسي فريسة. بين ذئاب جائعة.
هناك فريسة تقتل من اجل نهش لحمها.
من اجل اكلها.
وهناك فريسة تقتل فقط من اجل متعة الصيد. احس انني من النوع الثاني فهذا هو الصياد يتمتع بقتلي بالكلمات كما تعود.