رواية صراع الجبابرة للكاتبة روز الفياض الفصل السادس والثلاثون
رسالة الى ذلك الصباح الذي سيجمعني بك..
متى ستأتي؟
---
ايوب..
بعد موصلت امي ونور لبيت اهل شمه بقيت كاعد بالسيارة برة منتظرهم.
مقبلت تحجي وياي بالتليفون حتى لخاطر نور.
بقى تليفونها مغلق.
الليل كله اتصل مغلق.
اففف.
قبل جنت من اضوج عالاقل ادخن هسه حتى التدخين ممنوع..
ثاني يوم الصبح رحت للدوام شفت سرمد جاي..
محاجيته ردته هو يفتح الموضوع.
محجه ولافتح الموضوع فكتله: اريد اروح اخطب شمه..
شوكت عندك مجال حتى تروح ويانه؟
حسيته اتفاجأ كلي: وانت مو مريض وينك ووين الزواج ووين شمه؟
ايوب: حتى لو مريض انت تدري اني رايدها من الاول مااكدر بعد.
سرمد: ادري دصير زين بالاول.
ايوب: مااكدر، صبرت هواي.
سرمد: مو وكته هسه..
خلص علاجك واني اجيبلك مره معدله لامنى ولاشمه. شمه شنو؟
ايوب: ليش؟ شبيها شمه؟
شايف عليها شي؟ سامع شي؟
سرمد: لا لا بس يعني مو من ثوبك..
وحده بت فگر شوفلك وحده بت ناس عليهم العين.
ايوب: شبيها بت فگر بالعكس اشوفها عدها عزة نفس..
ومنى شجانت هم بت فگر مو بت خير وشايفه وعايفه؟ وشسوت بيه وشحصلت منها.
سرمد: لا لا اني اشوفلك وحده مرتبه بس صير زين بالاول.
ايوب: لا خلص مااريد غير شمه..
البارحة رحت حاجيت اهلها.
وجهه ظل ينطي الوان بعدين كال: اهووو شجلبت انت شلزكت شمه وشمه شدعوه هيج ذابح نفسك عليها شنو بس هي حلوه تره اكو احلى منها بالف مره.
ايوب: وانت هسه ليش صرت عصبي؟
بعدين انت تدري اني البنيه احبها ورايدها من الاول مو مسألة احلى منها واجمل منها.
اني احبها ورايدها.
مو تتذكر جبتها عندك شغلتها وامنتها؟
ليش؟
مو لان احبها ورايدها؟
سرمد: اهوو هسه الا تخلينه نحجي.
ايوب: شكو؟ احجي مو سألتك اني اذا شايف عليها شي او سامع كتلي لا؟
سرمد: اكو شي مردتك تعرفه؟
ايوب: شنو؟
سرمد: تره شمه هنا بغداد.
رجعت لبغداد ودتشتغل.
ايوب: شمدريك؟ ووين تشتغل؟
سرمد: صار فتره.
اتصلت بيه حتى اشوفلها شغل بس بشرط انت متعرف.
ايوب: وتالي؟
سرمد: شفتلها شغل يم ولد صديقي هم عنده مكتب طيران بس فشلتني وياه..
ظل يشتكي منها تنطي مجال للشباب الموجودين بالمكتب. وطلعات وطبات.
حتى البارحة رحت حتى احجي وياها شسوت بيه وانت مالك علاقة وانت متستحي وانت وانت كلبت الدنيا وطلعتني اني الغلطان واني الموزين وسوتلي قصة حتى ايهاب اجه بالصدفة ومن سمعني احجي زعل عباله اني الغلطان بحقها وصار بينه حجي وصياح وهي ولاعبالك..
ايوب: كل هذا يصير واني ماادري؟
سرمد: مو كتلك البنية متفيدك انت مجلب بيها..
تولي اصرف نظر عنها واني اجيبلك العروس التستاهلك.
ايوب: بس ايهاب كال انت متحرش بيها؟
سرمد: ااني؟ اي طبعاً يكول هيج لان هو ميعرف الموضوع شنو اجه بالنهاية وحكم من حجيها.
ايوب: مو مشكلة اول وتالي راح اعرف بس هسه اريد اعرف انت شلون تضم علي كل هالحجي؟
سرمد: شضام عليك ادري انت مو صرفت نظر عنها؟
ايوب: حتى ولو، صرفت نظر بس اني احبها..
المفروض تكولي برجعتها حتى لو هي متقبل. مو صح؟
سرمد: وترجع من جديد الدوخة والاذيه وانت تعبان ومريض؟
لا اخذها مني نصيحة هاي البنية متفيدك.
ايوب: ماكو واحد يبقى مصر على هيج رأي الا اذا شايف شي او مجرب وياها وصادته.
سرمد: لا مشايف شي بس كتلك الولد صديقي كلي البارحة عليها ومستحيل هو يكون محاول وياها يعني.
لان هو اصلاً رجال متزوج ويحب مرته ومقتنع بيها.
وماعنده هيج سوالف.
ايوب: امم، مو مشكلة اني راح اعرف شمسويه متصعب علي.
سرمد: تريد الصدك اني هم حاولت اجسلك نبضها من جانت عندي وحسيتها مو مضبوطه.
ايوب: شلون يعني؟
سرمد: يعني بس واحد يضغط عليها ترخه.
تنطي مجال.
رأساً اتصلت على نور على اساس شمه كتلها: هلو شمه شلونج؟
شصاير بينج وبين سرمد؟
ظل هو متفاجأ لان المفروض اني ماعندي تواصل مع شمه ولااعرف بيها راجعة لبغداد.
ايوب: هاا يعني هو كايلج اتزوجيني؟
اي؟
وانتي شجاوبتيه؟
احجي ويه نور ونور متعرف شنو الفلم: يااايوب شبيك؟
ايوب خويه؟
شبيك شصاير؟
ياشمه اني نور. شبيك متيهه.
عفتها تحجي وكملت تمثيليتي.
سديته منها كال: ختولي قابل صدك اتزوجها، بس ردت اجربها.
ايوب: وجربتها؟
سرمد: معجبتني بصراحة كتلك طلعت بس ضغطت عليها رخت.
ايوب: شلون رخت وهي تكول مقابله بيك؟
سرمد: ادري قابل اني خطبتها صدك حتى مقبلت.
ايوب: سرمد، جنت معتبرك اخوي وحزام ظهري مثلك مثل مؤيد وايهاب، بس شجازيتني؟
سرمد: اي؟ شجازيتك بالله؟
ايوب: خنت ثقتي بيك ورحت تريد تخطبها لنفسك من وراي، عالاقل جان انتظرتني اموت وروح اخطبها..
سرمد: طلعتني خاين علمود وحده مثل هاي؟ انعم الله عليك عمي كله هذا علمود مره؟
ايوب: جذب؟ مرحت خطبتها من وراي؟
مرحت سويتلها قصه وفضيحه لان مشفت منها تجاوب وياك؟ بعدين هاي مو مره.
مو اي مره..
هاي خطيبتي وقريباً راح تصير مرتي..
اسويها اني واروح..
مكدرت اجيب طاري مرته وادخلها بنص الموضوع لان عيب ومو اخلاقي ولان مرته انسانة محترمه بشكل وميحصل مثلها.
ايوب: انت حتى مسألتني شلون عرفت بيها راجعة وشلون رحت حجيت ويه اهلها؟ شفت شلون حبل الجدب كصير؟
وسفه عليك.
صارت مني حجاية ومنه حجاية وعلا صوتنه اتعاركنه وراح.
كان بأمكاني اكبر الموضوع اكثر او اضربه لكن هالشي مو بصالح شمه لان ممكن تصير السالفة اكبر وبيها عشاير وحجي ومو حلوه يجي اسمها كدام الزلم ويحجون بيها علمود واحد مثل سرمد.
صعبة..
بقيت كاعد بالمكتب ضايج.
اتصلت على شمه تليفونها بعد مغلق.
ادري شلون احجي وياها اذا تليفونها مغلق؟
زين لااكدر احجي وياها ولااكدر اشوفها هاي شلون ورطة..
رجعت للبيت لكيت الفوج الثاني موجود امل وسهاد ونهى..
دخلت كلت: السلام عليكم
امل: وعليكم السلام هلا هلا والله
ايوب: ياستار، هاا وصلتلكم نشرة الاخبار؟
نهى: هههههه النشرة والموجز بعد تعرف خواتك هههههه.
سهاد: شعرفنه معرفنه شي لعد المن جايين احنه نريد نعرف منك.
باوعت لامي كتلها: حجيه.
امي رايح اناملي شوية مو تخلين بناتج يجن وراي.
امي: ياا والغدا؟
ايوب: من اكعد اتغدا
امل: يااا ومنو يحجيلنه؟
ايوب: ههههه هو انتي لوما عندج كل الاخبار اول بأول جان مااجيتي.
سهاد: تره هم صدك احنه اليوم جايين نتداوم بالموضوع مو اكثر هههههه.
ايوب: هاا عفيه انتو اتداولوا واني رايح انام من تخلصون كعدوني. زين؟
صعدت بعدني عالدرج صاحت نهى: عود سلملنه عليها.
ايوب: منو؟
نهى: امي، الرايح تحجي وياها هسه بحجة نايم.
وتغمزلي، ضحكت كتلها: لا شوف الثقة بعد تغمرين.
نهى: يعني الله عليك صدك تريد تنام لو راح تحجي وياها؟
امل: لج تعاي عوفي الولد يحجي شتدرين منه؟
نهى: شريد كتله سلملي عليها.
ايوب: ابشرج لهسه محظور.
نهى: أخخخ. ايووووب على سن ورمح محظور؟
والله طيحتك هالمره قوية هههه.
ايوب: بيج خير بدل اللغوة هاي روحي حاجيها خل تفتح الحظر.
امل: روح حبيبي روح ارتاح مالك علاقة بنهيوه تغار محد حاظرها قبلها ههههههه روح اني اخليها تفتح الحظر اتدلل حبيب اختك.
درت على نهى كتلها: شوفي. كعدي يمها واتعلمي.
امي: ههههههههه شتتعلم هي هاي مال تعلوم مطفية من دون خواتك.
نهى: يمه. كلبوا عليه اهليش ذوله.
امل: هههههههههه دتعاي تعاي خليه يروح يرتاح تعبان.
رحت صعدت بس صدك منطاني كلبي انام بدون مااجرب اراسلها واتصل بس مغلق.
---
---
شمه.
بالرغم من كمية الالم والصراعات التي تحصل داخل قلبي الان الا اني في حالة ذهول.
ألهذه الدرجة يحبني؟ هلا حقاً اصبحت حبيبته بصورة رسمية. هل اصبح شيئاً معلناً للملأ؟
هل بدأ ضباب الحزن والصراعات أخيراً ينقشع؟
بكل الانكسار الذي احس به بداخلي. ( أُحِبُكْ ).
وادعوا لك بالشفاء من كل قلبي. ربي اشفه لي، اللهي لاتدعه يرحل ليتركني وحدي.
مولاي يامن يقول للشيء كُنْ فيكون، قل لشفائه كُنْ..
نمت مثقلةً بالالام، فلا شيء الان يثير سعادتي غير جرعة امل من صوتك. يخبرني انك شُفيت.
وانك لم تستطع ترك يدي.
حبيبي.
ذلك الذي ذقت منه من المرار والالم حتى اكتفيت، ومااحلى مرارك ان كنت فقط معي.
راضيتٌ انا قانعةٌ بكل شيء منك حتى الالم.
فمجرد التفكير بألم فقدانك يفقدني عقلي.
يفقدني روحي..
ثاني يوم الصبح امي كعدتني طالعة للسوك كعدت ريكت آدم وبعدين طلعتله العاب يلعب واني كمت انظف..
لحد هسه ممصدكة البارحة جاب امه واخته. معقولة صدك؟ لو اني اتخبلت وظليت اهلوس؟
نظفت وخلصت وخليت الغدا عالنار لان امي تإخرت.
كاعده العب ويه آدم بالميكانو واندك الباب.
لبست حجابي وطلعت: منو؟
سمعت صوت تيسير كال: اني. اني تيسير
فتحت الباب كتله: ها تيسير؟
تيسير: هلو شمه شلونج؟
شمه: بخير الله يسلمك.
تيسير: خالتي هنا؟
شمه: لا والله مو هنا بالسوك. خير اكو شي؟
تيسير: لا بس ردت اكوللها البارحة بالليل جان واحد ابابكم واكف عنده سيارة سوده.
شمه: اي شبي؟
تيسير: لا ماكو شي مابي شي بس ظل بالي عبالي عنده شي ظليت واكف اراقبه.
شمه: وعلى شنو تراقبه؟ يعني ميجيونه خطار؟
تيسير: لا بس كلت خاف يعني واكف يريد يتحارش.
شمه: بيمن يتحارش بأمي مثلاً؟ اذا هو الباب مسدود ومحد طالع بره بعد بيمن يتحارش؟
عموماً مشكور بس ناس جايينه خطار وابنهم بقى بره لان احنه بس نسوان بالبيت.
بهالاثناء اجت امي كلتله: هاا خاله تيسير شلونك؟
تيسير: بخير خاله الحمدلله
امي: شلونها امك؟
تيسير: زينه.
امي: هاا شكو؟
تيسير: لا ماكو شي توني جنت اكول لشمه شفت واحد بالليل يم بابكم واكف بسيارته ووكفت اراقبه عبالي اكو شي.
امي: اي؟
تيسير: اي بس طلعوا خطار جاييكم.
امي: لتخاف محد يجينه غريب هذا خطيب شمه واهله.
تيسير: خطيب شمه؟
امي: اي شبيك متعجب؟
تيسير: لا بس اتفأجات ماادري بيها مخطوبة.
امي: لامخطوبة.
تيسير: اوك مادام مو غريب طلع اني اترخص مع السلامة.
امي: الله وياك.
دخلت امي وسدت الباب كالت: شنو هذا بعد؟
شمه: شفتي وسمعتي بعينج بعد.
امي: هذا العايزني تيسير السكير يطلع رايدج حتى اكعد ادك والطم للصبح.
شمه: هو هذا حظي.
امي: بعدين خطيبج شكلج مو كلج الباب متفتحينه؟
شمه: والله احتاريت وياكم، لو جايبه اسمه هسه جان كلبتي الدنيا هسه خطيبج كال.
امي: لا لا هذاك قبل هسه لا مو ذابحه روحج عليه خلص هاي اني وافقت وقبلت وبصمت بالعشرة بس تتحملين غيرته وعصبيته مو تجين بعدين تشتكين؟
شمه: مو عصبي هو اصلاً
امي: لا مو عصبي.
شمه: هسه على كيفج خل اوافق بالاول.
امي: ايباااه، وهاي صار سنتين شنو تلعبين علي؟ خلص بعد مالج عذر، خل توافق بالاول اكص ايدي اذا مو من الفرحة هسه تردين تتحزمين وتركصين.
ضحكت وسكتت..
بس بيني وبين نفسي فرحت. خطيبي واخيراً الله يعديها على خير بس ويصير صدك خطيبي..
وره شوية اتصلت امل اخت ايوب سلمت وحجت شويه على موضوع سرمد ووصلت للزعل البيني وبين ايوب كالت: زين مناويه تفتحين الحظر عن رقمه؟
شمه: لا
امل: ينطيج كلبج؟
وهو هلكد يحبج.
شمه: هلكد يحبني وحظرني شكد عشر شهور يمكن، مستصعبه احظره كم يوم يعني؟
امل: يعني هي بالتناوب؟
واحد يلغي الحظر والثاني يخليه تره انتو مو جهال.
شمه: بعدني مستهضمه من إلى سواه وياي..
علمود واحد مثل سرمد.
امل: حقج، بس هو مسوه هيج علمود سرمد لا الانسان المو زين محد ينقهر عليه بس ننقهر عالزين وهو انقهر وضاج علمودج مكدر يتحمل احد يجيب اسمج بحجي مو زين.
سكتت. كالت: هو هسه راح نام بس من يكعد اريدج تحجين وياه وتنسون كل شي. زين؟ كافي زعل.
شمه: الله كريم.
---
---
ايوب.
كعدت من النوم اتغديت وطلعت عندي شغلة ويه فراس صديقي الولد إلى دعمت سيارته مره.
من رجعت على اساس اوصل امل لبيتهم بس كالت راح تبات.
بقية الفوج كلمن راحت لبيتها.
بالليل بعد العشا طلعت اشرب جاي بالحديقة واتصلت على شمه بعدني محظور..
مصختها..
شجاها من البارحة لليوم حاظرتني.
ضجت.
وره شوية اجت امل جانت تحجي بالتليفون ويه شمه وكعدت يمي تحجي وكلتلها: يالله حبيبتي مو احنه شاتفقنه شحجينه مساع مو كلنه كافي زعل ونلغي الحظر، مو بعدين اني ازعل عليج.
يالله عمري هذا هو احجي وياه.
انطتني التليفون.
واشرتلها روحي.
امل: ياا بعد فوكما اني المتصله ومخليتها تحجي وياك انوب تريدني اروح؟
ايوب: يعني انتي المتصله شنو تكعدين على كلبنه؟ شلون نحجي يعني وانتي كاعدة يمنه؟
امل: هههههه هاا هيجي صارت، يالله ميخالف المهم النتيجة تكون ايجابية.
راحت دخلت للبيت واني كلت: الوو؟
مجاوبتي.
ايوب: الو؟ شمه؟
هم بقت ساكته..
ايوب: ادري وبعدين يعني؟
تبقين حاظرتني ومخلصتها عالصامت؟
شمه: مااريد احجي وياك هي كوه؟
ايوب: ايبااه، متريد تحجي لعد المن متصله؟
شمه: مو اني متصله. امل اتصلت بيه واترجتني احجي وياك..
ايوب: هاا اترجتج حتى تحجين وياي؟
وانتي متريدين تحجين يعني؟
شمه: لا
ايوب: يعني تجاوبين امل ونور والبنات بس اني متجاوبيني؟ متردين تحجين وياي؟
مو عيب كدام خواتي بالله؟
شمه: يعني من اجيت ومديت ايدك علي كدام امي مو عيب بس من مااجاوبك عيب؟
ايوب: ادري شلزكتي مو اجيت البارحة وجبت امي وحجت ويه امج وانتهى كل شي وانحل الموضوع وهسه خلص احنه مخطوبين تره باقي بس الشكليات كدام الناس.
شمه: يعني لان اجيت وحجيت عادي انسى مدت ايدك علي؟
بعدين شنو مخطوبين منو كال؟
تره اني لهسه موافقت حتى تكول مخطوبين.
ايوب: هيجي صارت؟
شمه: هي هيجي..
اليخطب ينتظر الجواب.
اتنرفزت من كلامها كتلها: لو مرجع منى متتشرط مثلج..
شمه: معناها روح رجعها احسن..
ايوب: اي مو هو لعب طلك وانوب رجعها.
شمه: اني مكتلك طلكها، ولاادري بيك مطلكها. انت اصلاً إلى كلت طلكتها بيوم الانفجار..
واذا متحسف تره هي بت عمك مو غريبة واكيد ترجعلك مااتصور متزوجة لهسه.
ايوب: اوك. وانتي؟ لو بعدج مصره مو مخطوبين؟
شمه: شنو وانتي؟
تريد مرتك رجعها. لتطلع حججك بيه.
واذا عالخطوبه اصرف نظر..
واعتبر نفسك لاحجيت ولاكلت قبلك جنت عايشة الحمدلله وبعدك هم مراح ينقصني شي.
ايوب: شكلج بايعة؟
شمه: مالكيت المشتريني.
ايوب: ماشي. ماشي شمه. كل هذا وممشتريج؟
شمه: انت كلمة اعتذار ميهون عليك تكولها وتعتذر.
ايوب: اعتذر عن شنو عن سوء تصرفج؟
عن تصرفاتج الغير مسؤوله وغير محسوبه؟
اعتذر عن شنو عن اخطائج انتي؟
شمه: ماكو فايدة، ماعندي بعد استعداد لهيج تهجم واصرار عالغلط، مع السلامة.
ايوب: اوكفي شنو مع السلامة بكيفج هو؟
شمه: اي بكيفي. بكيفي لان انت مو ايوب. انت واحد ثاني ماادري شيريد محتار شيسوي حتى بس يأذيني ويذلني.
ايوب: اذلج؟
شمه: اي تذلني وتهيني وتأذيني واتحمل اكول تعبان اكول مضغوط اكول مريض بس انت ميوكف بعينك هالشي وتزيد كل يوم، وتعرف نفسك غلطان بس تجي بكل..
بكل ماادري هي كوات عين لو شنو تنسى اغلاطك او تتناساها تغلس عليها وحتى اعتذار ميهون عليك تعتذر بس اني حتى اذا انت غلطان بحقي لازم اسكت واقدم فروض الطاعة.
بقيت ساكت. فترة طويلة.
بعدين كتلها: آسف، زين هيجي؟
شمه: لا موزين..
صرت عصبي كتلها: لعد شتردين؟ تلعبين علي انتي؟
كتلج اسف شتردين اكثر.
شمه: يعني هاي الاسف شنو كفيان شر لو تريد تاخذني على كد عقلي؟
ايوب: اهووو، اخلص من دوخة منى تطلعلي شمه..
شمه: لادوخه ولاشي..
ماله داعي تدوخ بعدنه عالبر..
اني عد اهلي وانت هم ابيت اهلك. ومنى هم عد اهلها، روح رجعها وارتاح.
ايوب: هذا آخر حجي؟
شمه: طبعاً.
ايوب: ماشي شمه. الله يوفقج.
مجاوبتني.
سديت التليفون وركعت كلاص الجاي وكسرته.
وين يالله كدرت اهدأ وبديت استرجع احنه شحجينه..
اني شبيه هيج اسوي؟
اني شرايد منها بالضبط؟
مو اريدها؟
هاي صارت إلى. بعد شبيه متوتر وعصبي عليها؟
زين منى شجابها بالنص؟
هسه شيخلصها بالله؟
ضجت واختنكت.
فتت للبيت اخذت السويج وطلعت افتر او يمكن اروح يم جماعتي لان اذا ابقى اتخبل.
---
---
شمه.
حجت وياي امل حتى احجي ويه ايوب بس ماادري شبي عصبي..
بعد فوك إلى سواه مينطي بنفسه ولايعترف بغلطه وكل كلمة والثانية منى.
اذا متحسف عليها ليش مرجعتها.
جان رجعتها بدل مااجيت دكيت بابي.
قهرني. متت من القهر.
امي يمكن حجيها صحيح.
يمكت ايوب من النوع العصبي وهسه بدا يبين.
ليش هيجي اتغير؟
اذا عينه لهسه بمرته ليش مجلب بيه.
جان بقى حاضرني ليش رجع لحياتي وخلاني هسه مثل بلاع الموس كدام امي.
لااكدر اقبل ولااكدر ابطل وارفض.
آخ ياايوب.
تعبتني ومرمرتني..
احتاريت وياك.
انوب خواته يكولون ضايج ومينام الليل لان حاظرته.
بالله اسلوب واحد ضايج على زعلي ولان حاظرته؟
هذا اسلوب واحد يدور حجج حتى يبطل.
اتنهدت وظليت غركانه بأفكاري.
لانمت ولاشفت النوم.
شسوي ياربي؟
نص الليل واني كاعدة اقرا قران حتى شويه نفسيتي تتحسن.
دك تليفوني.
امل تتصل..
بالبداية ضجت. اكيد حجالها ويجوز طلعني اني الغلطانه كدامها.
نالي خلك الملامة والحجي وارجع اعيد القصة الها من جديد.
كلت مراح اجاوبها احسن.
على اساس نايمة.
بس وره شوية اتذكرت.
خاف صار لايوب شي؟
معقولة اتخربط لو صارله شي بسببي؟
لا اسم الله.
اي يجوز. نص المرض الحالة النفسية ابويه الله يرحمه جان يكول.
وهو نفسيته زفت واني اجيت اكحلها عميتها.
يمه.
اني هيجي اذيته. فعلاً اذيته.
هسه اني شبيه هيجي عصبيه وياه وافقد اعصابي بسرعة.
اصلاً اني اعرفه هو ميكدر على زعلي وميتحمل.
ادري لعد شبيه اتخبل من احجي وياه؟
مو هو يدوس ببطني.
هسه شسوي اتصل على امل لو اغلس؟
وشلون بالحجي إلى حجاه على منى؟
اوووف.
---
---
ايوب.
بقيت افتر بالسيارة لحدما تعبت ودخت.
تليفون امل بقى عندي اتصلت على شمه بس مجاوبت يمكن نايمة.
ولو ادري بيها بعد الحجي الكلته مستحيل تنام.
ماادري شسوي.
مااعرف شلون اسيطر على اعصابي.
كلما اتذكر الجرعة الاخيرة اخاف.
افكر يمكن هاي آخر ايامي.
لالحكت احب ولالحكت اتزوج. ولالحكت اعيش.
اووف ياشمه.
وبعدين بينه معقولة بعد كل هذا منكون لبعض والموت يفرقنه؟
معقولة اموت وتبقين بكلبي.
معقولة ربي، اموت واني احبها ومترزقنياها..
استغفر الله.
استغفر الله.
الحب ميزان الجنون.
من منا من لم يفقد عقله عندما اصابه جنون الحب؟
من منا من لم يخف من فقد الحبيب؟
من منا من لم يصطنع المشكلات ثأراً لكرامته وكبريائه؟
ومن منا من لم يندم بعد ذلك؟