رواية صراع الجبابرة للكاتبة روز الفياض الفصل السابع والثلاثون
ايوب.
بقيت كم يوم بعد متصلت بيها ولاهي فتحت الحظر.
كسرت خاطري، بس هم انكسر خاطري على نفسي.
عكب باجر الصبح لازم اروح علمود موعد الجرعة.
مااكدر اخذها قبل مااراضيها.
هالمره طول زعلنه.
كله منك ايوب اذيتها هوايه.
خليتها تخاف منك.
الكل جانوا يتجمعون قبل يومين من كل جرعة.
يخافون اموت من اخذ الجرعة على كدما هي قوية.
لذلك يتجمعون يشوفوني قبلها.
بس كلهم بكفة وهي بكفة.
معقولة اهون عليها؟
معقولة تخليني اروح وهي محاجيه وياي؟
قبل ماانام بالليل فتحت التليفون بعدها حاضرتني..
معقولة شمه؟
هيجي اني مااستاهل تتنازلين علمودي؟
مع الاسف والله.
نمت مقهور حيل.
كان بأمكاني اخذ تليفون امل او نور واتصل واحجي وياها.
بس اتمنيتها هي تبادر.
حتى لو اني الغلطان. هالمره الوضع مختلف. هالمره بيها حياة او موت.
وموت اكثر من الحياة.
ليش هيجي.
---
---
شمه.
عكب باجر آخر جرعة لايوب.
ياربي عديها سلامات..
ردت الغي الحظر الصبح بس خفت من امي لان ادري بس الغي الحظر يتصل.
بقيت لليل منتظرتها تنام حتى الغيه.
على حظي اليوم مجايلها نوم.
بالوحده يالله استسلمت ونامت.
تأكدت منها نامت واني رحت لغرفتي لغيت الحظر..
وبقيت مكابله صفحته اتصل لو لا؟
اويلي صعبه.
لازم اتصل شلون يروح ياخذ الجرعة واني ممصالحته.
حتى اذا اني غلطانه المفروض هو يتنازل شوية شصار عليه.
زيالله مو مهم المهم احجي وياه ونتصالح.
اول شي دزيتله مسج كلت خل يعرف فتحت الحظر. ،
كتبتله: شدعوه عليك هيجي كلبك قاسي؟
مجاوبني رجعت كتبتله: جاوب ليش ساكت؟
لو الا تشلع كلبي؟
هم ماكو خاف نايم؟
حتى لو نايم راح اتصل كافي هيجي متت مااتحمل هلكد ميحجي وياي.
اتصلت.
دك هواي يالله شاله ومبين من صوته جان نايم كال: الو؟
شمه: الو
ايوب: منو؟
شمه: تره والله ارجع الحظر، شنو منو؟
كم وحده تعرف غيري؟
ضحك على كيف كلي: هههه ممكن نأجل العركة هالمره بعد الجرعة؟
سكتت وابتسمت كتله: لا، اريد اتعارك هسه واخذ حقي منك.
ايوب: وانتي لهسه مماخذه حقج؟
شمه: لا
ايوب: ماشي، تردين فصل يعني؟
شمه: شكو بيها.
مااستاهل فصل مربع.
ايوب: مربع كلتي؟
شمه: اهاا
ايوب: ماشي.
احبج.
اموت عليج..
ومشتاقلج.
ومااكدر اعيش بدونج.
هاا زين هيجي؟
يعجبج هيج فصل؟
استحيت وسكتت بس الابتسامة العريضة شگت حلكي.
شمه: واني هم.
ايوب: انتي هم شنو؟
شمه: كلهن
بقينه ساكتين شويه لدرجة عبالي رجع غفى كتله: الو؟ ايوب نمت؟
سمعت صوته اخذ نفس وكلي: عبالي مراح تتصلين؟ ولاتفتحين الحظر.
شمه: مااكدر.
ردت افتحه من الصبح بس خفت تتصل وامي موجوده هسه يالله نامت.
ايوب: امم، يعني افهم من كلامج تحبيني؟
شمه: يكولون.
ايوب: بس مو بكدي.
شمه: لا والله مو بكدي
ايوب: اثبتيلي هالشي.
شمه: شلون؟
ايوب: اريد اشوفج هسه..
ظليت مخلوسه..
ايوب: وينج؟
شمه: وين تشوفني هسه؟ انت تدري هسه بيش الساعة؟
ايوب: مو مهم، المهم اشوفج.
شمه: شبيك ايوب حبيبي وين تشوفني؟ الناس نايمه واحنه نص الليل. وتيسير هالايام شاك بأمرك ومسوي دورية حراسات على بيتنه هههه
ايوب: لخاطر كلمة حبيبي اللي اول مره تكوليها راح اتنازل واقبل بصورتج. بس منو تيسير؟
ضحكت كتله: شتسوي بصورتي مشايفني؟
تيسير جيرانه واحد يوميه سكران وشافك ذاك اليوم من اجت خالتي ونور بالباب واجه يسأل منو هذا الجان ابابكم البارحة ههههه كلتله امي خطيب شمه.
ايوب: صورتج حتى اشوفها قبل ماادخل اخذ الجرعة.
شفتي شلون هذا الحجي العدل خالتي تفتهم خطيب شمه..
حجايته قهرتني، كتله: معناها ليش تاخذ الصورة؟
اني اجيلك اروح وياك للمستشفى.
مااخليك وحدك.
ايوب: لا وين جايه.
محد يروح وياي بس مؤيد وايهاب..
مااريد احد يشوفني من اخذها..
من ارجع عود يصير خير.
شمه: واني شيصبرني لحد مترجع؟
ايوب: تحبيني شمه؟
شمه: تره بعد وكت على سؤالك مو؟ جان اجلته بعد فد سنه سنتين..
ضحك كال: احب مزاجج من يتغير فجأة من العصبيه للزعل للضحك كل ساعة بحال، جنت احب اضوجج هههه.
شمه: احبك
ايوب: هاا؟
شمه: اهوو صار ميسمع هسه.
ايوب: هههههه اسمع بس مااصدك
شمه: هذا كله ومتصدك؟
ايوب: اثبتيلي خوما بس حجي.
شمه: ادري شلون اثبتلك هذا كله وتريد بعد اثباتات.
ايوب: اذا صدك تحبيني تثبتيلي هالشي.
شمه: دكول شلون بالله؟
ايوب: نلبس الحلقات باجر.
اتفاجأت كتله: باجر؟!
ايوب: اي اني باجر لازم ابات بالمستشفى حتى الصبح آخذ الجرعة بس اريد قبل مااروح انتي صايرة صدك إلى. خطيبتي ولوما الوضع والظرف جان كتلج مرتي.
شمه: ادري بس باجر مانلحك.
ايوب: انتي وافقي ومالج علاقة، مااريد عقد وناس وحفلة اني وانتي وامي وامج ونلبس الحلقات بس..
سكتت، كال: هاا؟ شكلتي.
شمه: اوك. بكيفك.
ايوب: يعني انتي قابله؟ عاجبج هالشي لو بس علمودي؟
شمه: لا. علمودك وعلمودي. اني هم اريدك تصير خطيبي حتى بعد متهددني بمنى.
ضحك.
ايوب: تروحلج فدووة منى وكل وحده مثلها..
شمه: ايي..
هسه. ذاك اليوم تتحسر عليها.
ايوب: انتي ليش عقلج زغير..
اني لو مثل متكولين جان مطلكتها، بس اني جنت عصبي ويجوز ردتج تغارين شويه علي يعني. شدعوه عليج.
شمه: هاي حجايه مال اغار شويه عليها. قهرتني. وحركت كلبي.
ايوب: غير احبج. بعدين انتي هم قهرتيني بسبب هذا الكلب سرمد.
شمه: خيولي، كافي لتفتح علينه مواضيع وبعدين نتعارك.
ايوب: هههههه لا بعد ماكو مشاكل ان شاءالله سبحان الله يمكن كل اللي صار صار لسبب بس احنه مفهمناه من وقت.
شمه: شنو؟
ايوب: انكشفت الناس الزينة والناس المو زينة.
مثلاً هبة. وسرمد. مو صديقتج هبه جانت وسرمد هم جان صديقي. بس مواقفهم كشفت نسبة الحسد والحقارة عدهم اعلى من محبتهم ووفائهم. مو صح؟
شمه: صح.
ايوب: وبالمقابل اني اتعرفت على صديق جديد يسوه راس سرمد، ومؤيد برغم كل شي صار بيني وبين اخته اثبتلي انه هو فعلاً اخوي وحزام ظهري مو بس ابن عمي. وحتى ايهاب زوج نور.
شمه: واني اتعرفت على لمياء وطلعت هم تسوه هبه..
ايوب: وعرفتيني وحبيتيني ومتي علي هههه.
شمه: متضحك تره. انت هم متت علي.
ايوب: منو يكول؟
شمه: انت. مو توك تريد نلبس الحلقات.
ايوب: امج راح تقبل؟ مااريد اضغط عليها، هي ضايجة مني هسه.
شمه: بالعكس هههه من اجه تيسير تكولي خطيبج مو كلج متفتحين الباب لاحد بعد كتلها منو كال خطيبي بعدني موافقت تكولي اي صحيح اكص ايدي اذا مو هسه من الفرحة تردين هههههههههه
ايوب: ههههه شنو؟ تردين شنو؟
شمه: اكص ايدي اذا مو هسه من الفرحة تردين تتحزمين وتركصين هههههه
ايوب: هههههههههههههههههههههه زين تسوي بيج ههههه مموافقه هاا؟
شمه: اي هسه غير واحد يتعزز يتدلع شبيكم متنطون مجال.
ايوب: ماكو بعد ميحقلج تتعززين ولاتدلعين هيج دلع، مااقبل. انتي هسه خطيبتي حتى تيسير يدري مو صح هههههه.
شمه: ايوب؟
ايوب: همم؟
شمه: معقولة يعني باجر نلبس الحلقات وينتهي كل هذا العذاب؟
ايوب: ان شاءالله.
شمه: وبعد متحجي امي وترزلني، ولااكو حسام ولا غيره؟ ولااخاف احجي وياك بالتليفون ولا اخاف واستحي من اصعد وياك بالسيارة؟
ايوب: ماكو، بعد متخافين من شي لان انتي راح تصيرين حرم الاستاذ ايوب. محد اله عدنه شي بعد.
شمه: بس اكو اشياء لازم نحجي بيها.
ايوب: كل إلى تردين تحجين بي اعرفه بس مو هسه، بعدين من تطلع نتيجة الفحص ان شاءالله.
شمه: ان شاءالله..
ايوب: باجر اخلي امي تتصل بأمج علمود الحلقات وتحجي وياها.
شمه: يعني اجهز نفسي؟
ايوب: شتجهزين. لتجهزين اي شي اريد اشوفج مثل ماانتي بس، البسج الحلقة واروح للمستشفى.
انعصر كلبي من حجايته كتله: الله لايحرمني منك. ياريتني اني بمكانك.
ايوب: اسم الله عليج، قابل اتحمل اني اشوفج هيج.
شمه: يصير تستخدم التليفون هناك؟
سكت شويه بعدين كلي: مااكدر، بعد الجرعة اكون شبه ميت..
شمه: اسم الله عليك. لتكول هيج ايوب لترعبني.
ايوب: ماارعبج بس بعد هذا الصدك، لهذا السبب مااقبل احد يشوفني او يروح وياي..
شمه: حبيبي لتفكر هيج فكر بيها ساعات.
ساعات تتعب بيها صحيح والله يعينك ويقويك ولو اكدر انطيك من صحتي وعافيتي والله مااتردد بس مع الاسف مااكدر.
ساعات تخلص وان شاءالله يكون الفحص نظيف بعدها وترتاح للابد..
ايوب: هذا الشي الوحيد إلى مخليني متحمل وصابر، ساعات وينتهي كل شي.
شمه: بخير.
ايوب: شنو؟
شمه: كول ساعات وينتهي كل شي بخير.
ايوب: ان شاءالله. ينتهي كل شي بخير.
شمه: ياارب.
بقينه نحجي للصبح..
الصبح كله بقيت نايمه.
كعدتني امي: شمه. شمه، لج كعدي ياماما الناس راح يجون وانتي نايمه.
اسمعها بس نعسااانه مابيه حيل اكوم، بس بعدين من كالت الناس راح يجون كعدت كتلها: ياناس؟
امي: ام ايوب خابرتني تريد يلبسج الحلقة اليوم.
بقيت ساكته لان ادري بس استغربت امي عادي عدها.
شمه: وسلام؟
امي اتصلت بي وحجيتله كلي: بكيفها. واذا بس حلقات بدون عقد ميخالف. واني هم من رأيه.
شمه: اشمعنه يعني؟
امي: الاعمار بيد الله وان شاءالله سالم ومعافى بس الولد وضعه الصحي مو تمام وبعده مينعرف شراح تكون النتيجة بعد الفحص الجاي، منريد شي رسمي وتنحسب عليج زواجه.
شمه: حتى لو طلع الفحص مو نظيف، مااعوفه.
التفتت امي باوعتلي بعدين كالت: ان شاءالله ماكو شي..
دمعت عيوني كتلها: ماما شلون بيه اذا صارله شي.
امي: استغفر الله، منين تجيبن هذا القهر متكوليلي..
ماكو شي ماما لتفكرين خليها على الله لتحركين كلبي على حظج البيه مكفيني.
كومي يالله بسرعة شوفي شنو تردين تسوين تسبحين تسشورين تره ماكو وقت ولو هو محد بس اني وياج ووديت على ام تيسير عيب تعرف من الناس الغريبه.
وامه كالت بس هو وهي وخواته محد بعد يجي بس هيجي يردون حتى يفرحوه وهو الولد يعني يريد يأكد حسن نيته.
كمت سبحت ادم وسبحت وسشورت شعري ولو اني راح ابقى بالحجاب بس خاف كل شي يصير.
وظليت صافنه عالكنتور شلبس؟
دك التليفون اتصلت امل سمعت بس صوت الهلهوله طورشت اذني: كللللللللللللللللللللوووووووووششششش.
ضحكت. كالت: مبروك حبيبتي شمحتاجه شنو تردين نجيب ويانه غير الكيك والعصاير؟
شمه: ولاشي. مو حفلة هي بس احنه وانتو ميحتاج تجيبون اي شي.
امل: يااا لا عيني من الصبح راح اشتره ملابس جديدة حتى يجيلج بأخر شياكة شلون بعد ميحتاج.
شمه: هاي خيانه كلي ماكو حفلة ولاتسوين اي بس البس الحلقة واروح، .
ظليت افكر هذا رايح مشتري ملابس جديدة وهسه يجي كاشخ واني لاا ياا شلون شسوي؟
رحت لامي اركض كالت: اني شمعرفني خابري بنات ام تيسير يجون وياج يساعدوج ويختارون وياج.
اتصلت.
وره شويه اجت ام تيسير هي وبناتها وجايبات الكنتور كله.
مباقي فستان ولاباقي قميص.
شمه: مااريد فستان زحمه مو شي رسمي هو. بس اريد شي انيق ومرتب.
ام تيسير: والله قبل على ايامنه جانت الكوستمات تخبل هسه البنات ماادري شبيها لاتريد كوستم لاتريد شي مدري شيلبسن.
شمه: هو حظي باقيله بس الكوستم ويكمل ههههههه.
امي: استعجلي تره الناس يجون من وكت لان وراهم طلعة للمستسفى.
لبست فستان اسود وبي ذهبي..
وخليت كحل وشويه حمره لون وردي..
ام تيسير وبناتها جزاهم الله خير مقصروا بشي وبقوا ويانه لحدما اجوا ايوب وامه وخواته.
اندك الجرس كمت وكفت البس الكعب وكلبي يدك.
اجت امي كالت: يالله العالم اجوا.
شمه: ماما. بطني توجعني.
امي: صلي على نبيج وكومي.
شمه: اللهم صل على محمد وال محمد.
اندك الباب دخلت امل: السلام عليكم
شمه: وعليكم السلام.
امل: صلاوات. صلاوات شطالعة عيوني اليوم ابنه يطيب هههه.
امي: ان شاءالله.
امل: يالله حبيبتي لتستحين قابل مشايفه ايوب قبل لو محاجيه وياه.
دخلوا قبلي للصالة وبس دخلت ام تيسير طكتها هلهوله..
امي: ياا ام تيسير على بختج بعده مالبسها الحلقة ههههه.
ظلوا يضحكون.
سلمت وكعدت يم امي.
هو جان مموجود. كالت امه: بره واكف يم مؤيد وايهاب حتى بعد متلبسون الحلقات يطلعون للمستشفى ان شاءالله.
طلعت امل صاحتله ورجعت.
دخل وسلم وكعد كبالي استحيت درت وجهي سهاد كالت: ادري اشو واحد كاعد بالشرق وواحد بالغرب لعد منو يلبس الحلقات امي وامها بس هن كاعدات وحده يم الثانية هههههه.
ظلينه نضحك كال هو: لا اني اروح يمها.
امه وامي كاموا غيروا مكانهم وهو كعد بصفي..
ام تيسير كل شويه تكمزنه بهلهوله ههههه.
طلعت امل الحلقات كالت: الحلقات هاي هسه تمشية امور عالسريع اشتريتهم انتو عود بعدين طلعوا سوا واشتروا على ذوقكم.
ايوب: ميخالف حتى لو سيم هم قابلين هههه.
وسط ضحكات خواته.
ودموع امي وامه.
لزم ايدي ولبسني الحلقة.
وانطتني امل الحلقة الثانية. لبسته حلقته.
امل: كللووووووشششش
ام ايوب: صحيح الاجواء مو مال خطوبه ومهر بس ميخالف هالفرحة جبيرة والله وتسوه الدنيا عندي.
دنك باس راسي كلي: اليوم كاطعة الحجي
شمة: شحجي؟
ايوب: اي شي.
شمه: ممصدكه.
ابتسم ولزم ايدي: وفيت بوعدي؟
شمه: وفيت.
استحيت كدام امي.
سهاد: متكومون ناخذلكم صور.
اتدنه يمي وصورتنه سهاد واحنه كاعدين ومن كطعنه الكيك.
ايوب: اكره هاي الفقرة؟
شمه: اي فقرة مال الكيك؟
ايوب: لا. مال الخطوبه.
شمه: ليش؟
ايوب: لو متزوجين كبل مو احسن ههههه.
شمه: تره انت طماع، شنو فرهود متزوجين كبل.
ايوب: ههههه مرات الطمع زين.
شمه: تره بعدني زعلانه منك.
ايوب: متكدرين.
شمه: هسه راح تطلعون منا للمستسفى لو للبيت اول وبعدين.
ايوب: لا ايهاب ياخذ امي والبنات للبيت واني ومؤيد نروح للمستسفى.
شمه: واني؟
ايوب: انت تنتظريني..
عندج ارقام البنات وهمه راح يطمنونج عني.
دمعت عيوني. بلعت ريكي كتله: ايوب.
هز راسه يسألني شنو؟
شمه: شكد تبقى؟، شكد تختفي؟
ابتسم كلي: شوكت تردين ارجع؟
شمه: باسرع وقت.
ايوب: خلص. معناها باسرع وقت.
اول ماافتح عيوني اجي بس اخاف امج متقبل هههه.
لتخافين البنات راح يطمنوج لتخافين..
طبيعي اول ايام راح اكون تعبان ولازم ابقى مرتاح ونايم لان جسمي يكون ضعيف وماعندي مقاومة وقوة..
بس بعدين شوية شوية ترجع صحتي وعافيتي واول وحده انتي راح اتصل بيج.
زين هيجي؟
شمه: لا مو زين.
ايوب: وبعدين وياج هاي مثلما جنت اروحلج للبصرة هم تبجين وتخليني محتار لاكادر ابقى ولاكادر اروح، تتذكرين؟.
شمه: احبك.
التفت علي باوعلي كلي: اليوم ثبتلي فعلاً تحبيني حتى لو جنت متأكد من هالشي.
قبل مااجاوبه كالت نور: ايوب.
ايهاب يكول يالله.
ام تيسير: خالة شعدكم مستعجلين بعدهم ماحجوا شي لاكالوا.
ايوب: هميالله.
امي: الله وياك ماما معافى ان شاءالله طمنه تره شمه بعد متنام ولا تشوف النوم.
باوعلي وكل لامي: لا بعد اني حجيت وياها وفهمتها هي كم يوم ان شاءالله وتخلص.
امي: ان شاءالله. ان شاءالله.
ظلوا يسولفون وهمه طالعين وهو بقى واكف بصفي ساكت بعدين كلي: لمياء متدري مو؟
هزيت راسي كتله: لا. لو تدري جان خبصتنه.
لزم ايدي حيل كلي: تره اني رايح بس مخلي خالتي مراقب عليج هي وتيسير ههههه اي شي يصير يبلغوني.
شمه: ههههه امي بالنهار وتيسير بالليل.
اتنهد كلي: يالله خل اروح زحمه واكفين ينتظرون.
لزمت ايده حيل وبجيت.
حسيته انقهر واتأفف مكدر يحجي شي
باس راسي وطلع.
بقيت متحنطة بمكاني.
شوية ورجعت امل كالت: شمه حبيبتي تليفونج خليه يمج حتى نتواصل ونطمنج على ايوب، زين عيني؟
هزيت راسي اي. كالت: لتضوجين، اعتبريه مسافر، هاي انتي جرعة وحده لحكتي عليها احنه شنكول هاي التاسعة..
طاحت دموعي اجت حضنتني كلتلي: لاعفيه لا احنه اقلمنه نفسنه منبجي كدامه ولاكدام امي لان هو يتأذه وامي هم تتأذه.
مسحت دموعي كتلها: عفيه شتسمعون من خبر كوليلي فدوة لتخلين كلبي مشتعل.
امل: الله كريم..
الله يباوعله ويباوعلنه لحالنه من دونه ويباوعلج انتي هم ويانه.
شمه: يارب.