رواية صراع الجبابرة للكاتبة روز الفياض الفصل الثامن والثلاثون
بقى ايوب مختفي خمس تيام.
اتصل على خواته وخواته يتصلون علي.
نور: والله بعده تعبان بس ياالله هانت ان شاءالله.
شمه: شوكت مو متت.
نور: ههههه هاي وين جانتلك ايوب.
شمه: شنو هي؟
نور: كل هالدلال والاهتمام وين لاكيه ههههه.
اشوف اخوي لزك لو هالمركب لوما اركب.
شمه: احبه غير احبه.
نور: اويلي يابه. حبيه عيني حبيه ليش احنه شنريد احنه نريدج تحبيه ويحبج ههههه.
شمه: زين كل مره شكد ويتحسن؟ شكم يوم ويكوم ويرجع طبيعي؟
نور: هي كل مره تصير اقوى. لان الجسم يتعب.
شمه: لا عفيه اني ميته من الخوف والتفكير والقلق متصله اريدج تطمنيني مو تزيدين علي..
نور: هسه بس يصير زين يجي يكولج خل نتزوج ههههه.
شمه: اووف انتي الظاهر اليوم تردين تشلعين كلبي.
نور: لا والله لا اريد اشلع كلبج ولاشي بس اريد اضحكج..
هو كل مياخذ الجرعه هيجي لتخافين واحنه نمنع التليفون والخطار حتى من نجي منجيب جهالنه ويانه منريد نزعجه..
هو بعدين شويه شويه ياكل ويشرب ويتحرك.
اول ايام ميصير يختلط بالناس مو زين لاعليه ولا على الناس إلى يمه.
شمه: واني شسوي هسه ابقى كاعده وحاطة ايدي على خدي لحد ميصير زين؟
نور: لعد شتسوين؟
احنه هم كاعدين وخالين ايدنه على خدنه.
وره يومين اتصلت ام ايوب كالت: اليوم احسن الحمدلله طلع من غرفته وحجه وسولف شوية. بس اني عندي طلب يمج..
شمه: يمي اني ههه؟ كولي خاله عيوني الج؟
ام ايوب: اني كلت بالبداية اكولج انتي وبعدين احجي ويه الحجيه اذا قبلتي..
شمه: شنو؟
ام ايوب: نريد نعزمكم باجر يمنه عالغدا شتكولين؟
شمه: والله مااعرف خاله هاي بعد يم امي.
ام ايوب: خوش حجي، هسه اتصل بيها واحجي وياها.
ماادري ام ايوب اتصلت لولا بس للعصر وامي مكالت اي شي.
بالليل قبل متنام اجت كلتلي: تره باجر معزومين احنه على غدا. كعدي من وكت.
شمه: وين؟
امي: ام ايوب اتصلت بيه اليوم وعزمتنه، يردون يتعرفون علينه ونتعرف عليهم.
شمه: وهسه يالله حجيتي ياماما؟
امي: شعندج هي ملابسج تلبسيها وتلبسين حجابج وابوج الله يرحمه.
شمه: بهالبساطه؟
امي: اي والله بهالبساطة قابل مثلنه قبل امي الله يرحمها جانت تحني شعري قبل ميجون اهل ابوج وطبعاً ممنوع اروحلهم قبل الزواج ولاهو يجي الا وياه امه. بيبتج الله يرحمها جانت تجي وتكعد على كلبنه لانكدر نحجي ولانتنفس.
شمه: بيبتي منو بيهم امج لو ام ابويه الله يرحمها؟
امي: لا ام ابوج الله يرحمها.
ردت ابسمرها واحجيها كتلها: الحمدلله انتي طالعة على امج مو على امه هههه.
باوعتلي بنظرة وحده فاهمتني بس غلست هههه.
شينومني الليل..
شيجيب باجر واصبر شلون.
الليل كله البس وانزع عبالك اول مره راح يشوفني.
الصبح الساعة بهدعش اتصلت نور كالت راح نمر عليكم اني وايهاب ناخذكم.
اجوا علينه عالساعة ثنعش ورحنه.
اول موصلنه آدم انطلق بالبيت عادة ماله صوت يلعب بمنتهى الهدوء بس هنا لا عبالك داخل مدينة العاب.
يركض ويلعب ويضحك بصوت عالي.
رحبوا بينه امه وخواته جانوا موجودات.
بس هو ماكو.
كعدنه نسولف واني عيني عالباب. هسه يجي يسلم بعد شويه يجي يسلم.
ماكو.
ام ايوب كعدت هي وامي يباوعون البومات الصور وبعدين انتقلوا للمطبخ في تجربة لاثبات مهارات الطبخ المتعدده.
بقينه كاعدين اني وامل ونهى ونور وسهاد.
شوية وراحت نور هي وزوجها.
بقينه بس احنه.
امل: اشو مسألتي عن ايوب؟
شمه: اسأل بكلبي منتظرته يجي. تأخر.
امل: ههههه لا سألي شنسوي بالسؤال إلى بكلبج.
لاهو موجود مو طالع بره.
بس نايم. ميدري بيكم اليوم هنا.
شمه: اكول..
امل: اي عيني حقج تكولين هههه لو يدري جان نزل يركض بكامل الحيوية والنشاط.
بدوا يصبون الاكل واني والبنات نرتب السفره.
كال آدم: عمو.
التفتت شفته وراي.
حسيته متفاجأ ظل صافن علي شويه بعدين كال: هاي شنو؟
امل: هاي جنتنه هههه شنو متعرفها.
ابتسم واني هم ابتسمت كال: شوكت اجيتوا؟ ليش محد كلي؟
امل: ردنه نسويلك مفاجأة، شلونها؟
ايوب: خوش مفاجأة بس يمكن لو باقي نايم محد راح يكولي هههه.
امل: لا جان عندي خطة اخليها تصعدلك الغدا فوك بس انت خربت الخطة ونزلت وحدك.
ايوب: زين. ماكو مشكلة ارجع اصعد؟
شمه: هههه لا بعد ميفيد.
طلعت امل وبقينه اني وياه.
لزم ايدي ومشى راح كعد.
كعدت يمه كتله: الحمدلله عالسلامة.
ايوب: الله يسلمج.
شمه: شلونك هسه؟
ايوب: هسه؟ كلش زين. بس جنت تعبان.
شمه: اسم الله عليك من التعب.
ايوب: منو جابكم؟
شمه: خالتي اتصلت على امي عزمتنه عالغدا. واجوا علينه نور وايهاب جابونه.
ابتسم حيل كتله: شبيك؟
ايوب: مااردي. فرحان يمكن ممتوقع اكعد واشوفج عدنه بالبيت.
فد شي غريب شويه هههه.
شمه: اروح يعني؟
ايوب: روحي اذا تكدرين.
شمه: اي طبعاً معتمد تعرفني مااكدر.
ايوب: ههههه.
دخلت امه شافتنه كاعدين كالت: انتو هنا؟ تردون تتغدون ويانه لو اصبلكم بحدكم؟
ايوب: اني مااكدر اكل هسه. انتو اتغدوا.
شمه: واني هم.
ام ايوب: كولوا نريد نبقى كاعدين بحدنه لتكولون منريد غدا هههه.
ايوب: ههههه واضح علينه يعني؟
ام ايوب: كللش واضح.
صبوا الاكل وفعلاً امل سوتها كلتلي كدام امي: شمه انتي وزوجج روحوا كعدوا بحدكم لان هو يستحي يكعد يمنه.
اخذت الاكل ورحت كال: مو كتلهم مااريد.
شمه: مو اذا راح الاكل اروح وياه وتبقى كاعد هنا وحدك واني ارجع اكعد هناك يمهم.
ايوب: معناها تعاي احنه ناس جوعانين.
ضحكت كتله: ماكو عيني واغاتي الا بالتهديد يالله.
كعدنه نسولف شويه بعدين كال: ميخالف اتمدد، اتعب من ابقى كاعد.
شمه: اي اتمدد ارتاح.
كمت غيرت مكاني كلي: اول جرعة احسها سهل ومتعبت بيها ذاك التعب.
شمه: وان شاءالله الاخيرة ومتتعب بعد.
ايوب: اذا طلعت نتيجة الفحص جيدة ونظيفة نروح نعقد..
شمه: ان شاءالله
ايوب: ثاني يوم
شمه: وليش العجله؟
ايوب: وليش ننتظر؟ تره حتى لو طلع الفحص نظيف ابقى تعبان فتره واحتاج فترة نقاهه ومتابعة حتى استرجع صحتي.
شمه: ان شاءالله
ايوب: واحتاجج وياي، ميخالف؟
شمه: اكيد اني وياك شنو ماتكون النتيجة لتفكر.
ايوب: انتي فهمتي قصدي؟
شمه: اي. شنو المافهمته يعني؟ نعقد مو مشكلة.
ايوب: هو عقد وهو زواج..
التفت علي باوعلي.
شمه: عبالي تقصد بس عقد كتلك عادي.
ايوب: اكو شي يمنع زواجنه اذا ردنه نتزوج بسرعة وبدون حفلة وعرس؟
شمه: مو شغلة حفلة وعرس، مااريد لاحفلة ولاعرس بس مومعقولة نتزوج ثاني يوم هيجي غير ارتب اموري اهيئ نفسي اخوي يكون عنده علم وامي بعدنه لهسه محجينه بأمي امك..
ايوب: شبيهم؟
شمه: شلون اتزوج واعوف امي وابني وادور وجهي واروح؟ وانت هم متكدر تسوي هيج طبيعي. زين والحل؟
ايوب: اني عندي حل بس ماادري امج راح توافق لو لا.
شمه: اذا ابالك نجيبها هنا فمراح تقبل واصلاً عيب لان هذا مو بيتي حتى بكيفي استضيف امي او احد من اهلي زحمة وهي مترتاح.
ايوب: اعرف هالشي. تفكيرج صحيح. لذلك عندي فكرة واريد اخذ رأيج بيها.
شمه: شنو؟
ايوب: انتو يعني محد عدكم بس انتي وامج وبحدكم ومحد يمكم ليش متبيعون البيت وتجون هنا تشترون بيت هنا مو احسن؟
صفنت.
شمه: وين نشتري؟ هنا يمكم قصدك؟
ايوب: اي هنا هذا يمنه بيت حلو وكافي عليكم يحتاج بس ترميم.
شمه: والله ماادري.
ايوب: الله كريم لكل حادثٍ حديث. بعدين نشوف بس هاي الفكرة العندي حتى امج تكون قريبة متعوفيها وحدها ولا تبتعدين عنها.
شمه: الله كريم.
العصر من ردنه نروح كلي وهو يضحك: كرريها.
شمه: اي ماكو مشكلة باجر الصبح اجي.
ايوب: تستهزئين مو؟
شمه: هههه ادري يعني اكررها شلون؟ شكول وين رايحه وين جايه هههه..
خله ايده وره ظهري فزيت حسيت اتكهربت ماادري اتدغدغت ضحك كال: شبيج؟
شمه: لا اتدغدغ. منا امي وامك والبنات شيكولون زحمه.
ضحك حيل كلي: ادري شمسويلج.
رجعنه للبيت العصر وعفته كال راح يرجع ينام ويرتاح.
بعدها بأيام رجع ايوب لشغله وللحياة.
جنت اغسل الطارمة واندك الباب صحت: منووو؟
ايوب: ايوب. ايوب.
ركضت غسلت وجهي بالمغسلة ورتبت شعري عالمراية وفتحت الباب: حياك. منين طالعة الشمس؟
ايوب: من بيتنه هههه.
فات للحديقة كلي: شتسوين بره؟
شمه: غسلت الطارمة جنت انشفها.
دقيقة بس ابدل ملابسي وارجعلك، فوت من باب الصالة مفتوح.
دخلت ركض غيرت ملابسي ومشطت وخليت عطر ورحتله للصالة ملكيته.
مديت راسي شفته بعده بالحديقة يباوع بتليفونه.
شمه: اوبي. وينك؟
ايوب: اوبي منو؟
شمه: ههههه دلع ايوب.
دخل للصاله كال: خالتي وين؟
شمه: تصلي هسه تخلص.
ايوب: آدم؟
شمه: يلعب ويه جهال الجيران.
شعجب اجيت؟
ايوب: مترديني اجي؟
شمه: لااا قصدي يعني مكلت جاي؟
ايوب: مفاجأة، بس انتي تسوين مفاجآت.
اجيت حتى احجي ويه خالتي.
شمه: بشنو؟
ايوب: علمود البيت.
رحت سويتله عصير وگلت لامي ايوب هنا يريد يحجي وياها.
خلصت صلاتها واجت.
ايوب: خالة احنه فكرنه بحل. حتى متبقين وحدج من تتزوج شمه.
امي: حليش؟
ايوب: اني هذا رأيي طبعاً وبالنهاية القرار الكم، اني اكول لو تبيعون البيت وتجون تشترون يمنه مو احسن؟
امي: نبيع بيتنه؟
ايوب: مو معقولة يعني شمه تتزوج وتبقين وحدج وشمه تكول امي مترتاح ولاراح تقبل تجي ويانه. ولااني اكدر اعوف امي فالحل الاحسن والانسب تبيعون هالبيت وتشترون يمنه. شتكولين؟
امي: ماادري، فاجأتوني. صعبه نبيع بيتنه..
ايوب: مو راح تشترون بيت ثاني بفلوسه.
امي: اي ماما بس هاي سالفة طويلة لان البيت بعتبر بيت ورثة شمه وسلام واني واني وشمه موجودين هنا بس سلام شلون؟ سالفة طويلة ودوخة راس، لا مينفع هالحل.
ايوب: زين شنو الحل نتزوج وتبقى هنا واني هناك؟
هم ميصير.
امي: الله كريم هسه شوفوا نتيجة الفحص وبعدين نشوف، سوي الفحص بالاول.
حسيته ضاج بس محجه شي هو كلامه صحيح وامي هم كلامها صحيح.
من راد يطلع طلعت كتله: وين راح تروح هسه؟
ايوب: اريد اروح اشوف اموري.
شمه: اوك.
ايوب: اكولج عندي فكره.
شمه: شنو؟
ايوب: بالاول خل نشوف يجوز امج تغير رأيها واذا مصارت شغلة بيع البيت نستأجلكم بيت هناك وهذا اجروه. مو خوش حل؟
شمه: اي خوش حل.
ايوب: ماشي. نحجي بعدين.
راح، وعلى اساس خلال ايام يروح يسوي الفحص ونبقى ننتظر النتيجة.
مر على الجرعة شهر تقريباً وسوه الفحص المفروض هسه تطلع النتيجة بس ماكو منه خبر.
ظل بالي من البارحة لليوم ايوب ماكو لامسج لااتصال.
اراسله ميجاوب.
اتصلت على امل كالت: مااعرف مرايحتلهم مشغولة باجر اروح.
اتصلت على نور كالت: يمكن مطالعة لان ايهاب مكال شي..
زين وين راح.
بقيت للمغرب محتاره شبي ليش ميجاوبني معقولة المرض بعده!
لا اسم الله.
رجعت اتصلت يكطعه..
ضجت انقبض كلبي.
اتصلت على امه كالت: بالليل نجيكم ان شاءالله.
شمه: هلا بيكم خاله بس فهميني طلعت النتيجة؟
ام ايوب: من نجي نحجي.
من كلتلي هيجي اتخبلت، معناها المرض بعده موجود بجسمه.
ظلمت الدنيا بعيني.
لا اكدر احجي لامي ولااكدر ابقى شايله الهم بحدي.
خلصتها بجي بغرفتي.
بالليل اندك الباب طلعت فتحته، امل وامها.
بدوا يحجون عن امور الحياة وشلونكم وشخباركم واني ساكته.
بعدين امه كالت: احنه اليوم جايين نحدد موعد للزواج.
اتفاجأت.
ام ايوب: كيفكم تردون كعدة زلم ورياجيل وخطبة كدام الناس لو تردوها مثلما هي ويعقدون ويتزوجون. بكيف شمه.
امي: والله ياام ايوب هي الاصول تكول لازم بس انتي تدرين احنه اهلنه مو يمنه كل واحد بمحافظة يعني هم لازم ننطيهم خبر خوما تتزوج البنية بدون علم احد. واذا عالعرس بعد العرس هو على كولت اهلنه للولد اذا يريد يسوي عرس كيفه. احنه منشرط ولانطلب كل شي بس يكون ضمن الاصول والباقي كله انتو اتصرفوا بي هي راح تكون مرته وهو وياها يتفقون.
ام ايوب: خوش حجي. معناها انطوا خبر لاهلكم حتى نخلص من هاي الرسميات بعد.
امي: هي طلعت نتيجة الفحص؟
ام ايوب وامل: اي طلعت. الحمدلله الفحص نظيف والمرض منتهي.
امي: ايييي صلاوات. صلاوات الله يبرد كلبكم من الصبح لهسه احنه على اعصابنه.
امل: شمه ساكته؟
امي: من الصبح لهسه ساكته وقلقه ولااكل ولاشرب منتظرة النتيجة.
امل: شعجب ايوب متصل بيج؟
شمه: لا لااتصل ولاجاوب.
امل: مو يمه ناس واهلنه كلها واصدقائه فيجوز التليفون مو يمه.
سكتت بديت اهدأ لان جنت اغلي من عرفت طالعة النتيجة ومخليني اطحن بروحي.
بعدها بكم يوم سلام اخوي من حجتله امي كللها هو راح يتصل على كرايبنه وعمام ابوي حتى يحظرون الخطبة.
تم الاتفاق على يوم الاربعاء كموعد للخطبة.
هذه المرة كانت مختلفة فانت اختياري الذي اصررت عليه واخترته رغم كل المعوقات والظروف التي مرتت بها.
انت ذلك الرجل الذي لطالما حلمت به.
وها قد جاءت هذه اللحظة اخيراً..
طلعت للسوك اشتريت طقم ماروني تنورة قصيرة وسترة بس مال مناسبات وسشورت شعري ورفعته شويه وخليت مكياج عادي مو غامق ميلوكلي.
تمت الخطبة سلامات ومصدكت لحد مسمعت صوت الهلاهل من دخل يمي للصاله..
اول مكعد يمي باس راسي.
محد غريب موجود مثل المره الفاتت بس هالمره بنات خالتهم موجودات.
مااتفقنه وياهم على اي شي المقدم والمؤخر جان شي رمزي وحتى الذهب امي كلتلهم انتو جيبوا على ذوقكم.
هالمره امل كالت: والله اختارينه احلى طقم بالمحل بس كون يعجبج.
شمه: عاش ذوقج.
لبسني الذهب واشتغلت الهلاهل ونهى وسهاد يرگصن وامي خطية مره تضحك مره تبجي.
دنك يم اذني كلي: شرايج نطلع ونخليهم يحتفلون بحدهم؟
شمه: وين نروح؟
ايوب: بحجة نجيبلهم عشا.
شمه: فشلة. عيب مبينه جذب عالاقل كول للمصور.
ايوب: هههه لا المصور مبينه جذب لان شكلي مو مال صور خطوبة من يطلعلي شعر ناخذ صور.
بقينه نسولف ونضحك مره بعدين كال: شوكت نروح للعقد؟
شمه: كيفك.
ايوب: اذا كيفي باجر. موافقة؟
شمه: باجر شنو بالايام؟
ايوب: خميس، خوش يوم لان احنه متفقين هو عقد وهو زواج شگلتي؟
شمه: لا ايوب لا مو من كل عقلك..
ايوب: لا والله من كل عقلي، ليش التاخير يعني؟
شمه: ياا ايوب عالاقل انطيني مجال اجهز نفسي ارتب وضعي اشوف حل لموضوع امي.
اتنهد وضاج بقى ساكت.
غلست كلت مااريد احجي وبعدين نتعارك، بس بعدين كلي: خلص اني اجي احجي ويه خالتي نخليها عالاحد، عندج خميس وجمعة وسبت طلعي للسوك..
شمه: ادري ليش العجلة؟
ايوب: تردين عرس؟
شمه: مااريد شي، والله مااريد شي اريدك انت وبس، بس عفيه لتخبصني وتخليني ارتبك لان اصير عصبيه وبعدين نتعارك..
يوم او يومين تأخير مراح تأثر على شي لكن تأثر على نفسيتي، احنه مثل العنده سباق نركض ميصير.
ايوب: مو تعبت.
شمه: واني هم بس حلاتها هيج.
ايوب: خلص، خل نشوف خالتي شتكول وبعدين نحجي. ماشي؟
شمه: ماشي.
ايوب: بس اذا قبلت انتي متعترضين.
شمه: ايبااه. انت وياها يعني تحجون وتقررون واني شنو باقية اطرش بالزفة؟
ثاني يوم هم اجه الصبح حجه ويه امي علمود موضوع البيت واتفقنه انه نستأجر البيت اللي بظهر بيتهم لان شارعهم مابي بيت للايجار بس للبيع.
وبالنسبة للعقد امي وافقت نعقد بالمحكمة عالاحد ويعتبر هو عقد وهو زواج لان احنه منريد عرس.
العصر اتصل كال: خلص اني حجيت ويه ابو البيت ووافق البيت حيل زغير نص قطعة بس كافي وراح نسوي باب بين البيتين بالحديقة الخلفية حتى بأي وقت تكدرين تشوفين امج وترحين يمها او هي تجي يمج.
شمه: اشو خفت؟
ايوب: منين خفتي؟ مني؟
شمه: ماادري اشو ركض ركض.
ايوب: اخاف نأجل بعد اسبوع لو اثنين وتطلعلنه شغلة جديدة.
شمه: لااسم الله ان شاءالله ماكو شي.
ايوب: مبين ممشتاقتلي؟
شمه: حرام عليك.
ايوب: مااكدر انتظر بعد شمه. كافي انتظار تعبت.
شمه: اللي تشوفه. بس شلون نلحك ننقل اغراض بيتنه ونعقد ونتزوج.
يعني احتار بنفسي احتار بأمي وآدم لو احتار اشيل واحط.
ايوب: لتجيبون بس الاشياء الضرورية. الباقي نشتري جديد.
شمه: والله ماادري دخت وتعبت من التفكير.
ايوب: خلص لتفكرين خلي الموضوع علي.
وفعلاً استأجرنه البيت وانتقلنه نقلنه الاثاث على يومين.
خلال هاليومين ملحكت اطلع للسوك ولااجهز اي شي.
بقيت محتاره.
واستحي اروح بنفس ملابسي عيب شيكولون عني.
اتصلت على نور كتلها كالت: باجر سبت بس باجر يعني؟
شمه: غير اخوج ميقبل يأجل كم يوم هسه لو يخليها للخميس عالاقل، حتى البيت بعده هوسه ملحكنه نرتب كل شي.
نور: لا لتخافين باجر نروح للسوك اني والبنات ونشتريلج شنو تردين ومن نرجع نساعدكم بترتيب البيت اهم شي تتزوجون عالموعد مادام اخوي مستعجل ههههه.
شمه: حتى شكلي مو مال عروس اركض منا ومنا وكلي تراب.
نور: شوفي احنه الصبح نمر عليج ناخذج نذبج عالصالون حفي وصبغي وسوي اللي يعجبج ومن نرجع من السوك نمر عليج. ماشي؟
شمه: افففف والله شده.
من كلت لامي كالت: بعد احنه وافقنه ميصير نتراجع روحي وياهن للصالون واني هنا ارتب على كيفي واذا ملحكنه انتي قابل وين رايحة هو البيت بظهر البيت، يومية تعاي رتبي وعزلي ونظفي براحتج، هو مو كال راح يسوي باب بين البيتين؟
شمه: اي هو على اساس باجر الصبح.
امي: هاي هي، فضت راحت بس انتي معقده الامور.
بالليل متمدده بفراشي وصافنة عالسكف بعدني ممتعوده على هذا البيت وافكر لازم اجي بعدين اسعف الحيطان.
دك تليفوني ايوب: الو
شمه: الو
ايوب: شمتي؟
شلونج؟
ضحكت كتله: شمتك تعبانه ونعسانه وصايره عبالك متسوله.
ضحك كال: ليش؟
شمه: جنت ارتب واعزل هسه كعدت ارتاح لان ناموا مااكدر اشتغل بعد.
ايوب: زين تعاي طلعي خل اشوفج.
شمه: وين؟ بالباب؟
ايوب: لا. وره البيت.
ضحكت كتله: صاير مثل الحرامية.
ايوب: بعمري مجاي وره البيت وشايفة شلونه هسه من وراج ماادري شوكعت وماادري شنو يمشي على رجلي ههههه.
شمه: يمه، ايوب ليكون حيه؟ اوكف اني جايه.
ايوب: هههههههههه كليندايزر مو مره هههههه هسه حتى لو حية شتسويلها يعني؟
شمه: انقذك غير، هاي فوكاها؟
ايوب: باقي بس باجر وانقذيني..
ساعات هي مايفصلني ويبعدني عنك.
دقائق تباعد بيننا وجدار.
اعدها ساعة ساعة ودقيقة دقيقة لكي تنتهي. كأنني في سباق مع نفسي لاثبت لك في كل مرة منزلتك عندي وحبي لك.
او ربما لاثبت لنفسي.
المهم اني احبك واريد ان اكون معك.