رواية صراع الجبابرة للكاتبة روز الفياض الفصل التاسع والثلاثون
باجر نروح نعقد اليوم رحت للصالون الصبح وخوات ايوب اتسوكولي الاشياء الضرورية فقط وبعدين ااني اشتري الباقي بعد الزواج.
بالليل حجيت ويه لمياء كالت: مااصدك. وين الدليل اليثبت صحة كلامج؟
شمه: ماكو دليل حتى الصور العندي وحدي بيهم ايوب ماكو وياي.
لمياء: معناها مااصدك.
شمه: كيفج، باجر نتزوج.
لمياء: جذابببه؟
شمه: تردين دليل؟
لمياء: لا مااريد منكم شي بس اتزوجوا يمكن من تتزوجون الله يلتفتلي ويجيني واحد يخطبني.
شمه: ههههههههه قابل كاطعين قسمتج
لمياء: طبعاً كاطعين قسمتي اذا اربعة وعشرين ساعة اخططلكم شوكت اخطط لروحي شوكت اشوف مستقبلي.
شمه: مو ماكو غيرج نشتكيله انتي غير صديقتنه وحبيبتنه.
لمياء: لا لا رحمه لابوج عوفي سوالف الحبيات للعريس المصخم هو يحبني انتو حدكم للصداقة وبس لتسدوها بوجهي.
شمه: ههههههههههههههه عابت اي والله.
لمياء: عود من تتزوجون دزيلي مسج حتى اعلكها هنا دك ورگص للصبح ههههههه.
شمه: هههههههههههه ان شاءالله.
بقينه نسولف اني ولمياء لنص الليل لحدما تعبت وغفيت.
الصبح من الساعة بالخمسة كعدتني امي حتى نجهز ونروح نعقد.
ورحنه عقدنه ويانه امي وامل.
رجعنه بس لبيتهم.
لان هذا جان الاتفاق على اعتبار اليوم اتزوجنه.
جان وضع غريب رغم اني عرفت اهله وحبيتهم بس اليوم احس نفسي غريبة.
استحي اتحرك استحي اخذ راحتي.
بس فتنه للبيت اشتغلت الهلاهل والجكليت امه وخواته.
صعدنه للغرفة دلاني غرفتنه وكل شي بيها ونزل.
بقيت كاعده صافنه مستغربة. ،
معقولة اتزوجنه؟
معقولة هسه ايوب زوجي؟
شعور غريب.
بعد الغدا امي خطية عبرت لبيتنه لان سووا باب او بالاحرى كسروا السياج بين البيتين وبقى هيج بدون باب.
كلبي ظل معصور على امي خطية اليوم وحشة عليها.
ايوب جان كاعد يمي هم ضايج ماادري شبي بعدين كلي: اذا تردين ترحين لبيتكم علمود امج روحي. عادي.
شمه: شلون يعني عادي؟
ايوب: يعني روحي وتعاي بعدين، مو عبالج تباتين هناك هههه.
شمه: لا خليها هسه هي تعبانه وكاعده من الصبح هسه تنام، روحتي بدون فايدة، انت هم اذا تريد اصعد نام.
ايوب: وانتي؟
شمه: اساعد خالتي والبنات واصعد لان هم نعست كاعده من الصبح.
ايوب: ماشي.
صعد واني والبنات غسلنه المواعين ونظفنه المطبخ وسولفنه شوية وبعدين اترخصت وصعدت.
دخلت الغرفة شفته نايم.
اني هم نعسانه نمت.
العصر كعدت ايوب ماكو بالغرفة..
مبدل ملابسه يمكن طالع.
شلت ملابسه وكع باكيت جكاير منها.
ذبيته بالزبالة، شيسوي بي هو مو بطل تدخين علمود العلاج.
نزلت جوه شفته كاعد يحجي بالتليفون.
محد بالبيت خواته رايحات وخالتي يمكن نايمه بس اني وهو.
كعدت يمه خلص حجي بالتليفون ودار علي كلي: صح النوم.
شمه: يصح بدنك.
ايوب: شلونج؟
شمه: الحمدلله. شنو طالع؟
ايوب: لا جنت طالع بشغلة ورجعت.
لزم ايدي كلي: ليش ضايجه؟
شمه: مضايجة، بس يعني مكان جديد وناس جدد طبيعي.
ايوب: تردين نطلع؟
شمه: صدك والله؟
ايوب: يالله، روحي لبسي واني انتظرج.
رحت ركض لبست ونزلت دخل هو لامه كللها طالعين.
طلعنه طول الطريق ساكتين بعدين كتله: ادري شبينه ساكتين عبالك ماخذينه صخره؟
ضحك كال: اي والله قبل الزواج مااستحينه هلكد من بعض هههه.
شمه: لا احجي عن نفسك، اني جنت استحي ولازلت.
ايوب: واني مااستحي عيني بس انتي؟ هههه
شمه: على طاري المستحة ذكرني ادز كم صورة للمياء.
ايوب: اي. لمياء الله يذكرها بالخير لو موجوده.
شمه: البارحة احجيلها تكول ممصدكته هههههه.
ايوب: اي حقها، هو احنه اهسه ممصدكين..
وين تردين نروح؟
شمه: اي مكان.
ايوب: معناها راح اخذج لمكان.
رحنه للمطعم اللي جنه نلتقي بي قبل..
دخلنه وهو لازم ايدي وكعدنه على نفس الطاولة اللي جنه نكعد عليها اغلب الاحيان..
ايوب: هاا نشرب لو ناكل؟
شمه: لا شناكل انت مو عندك حمية. لتخربط رجاءاً التزم بالاكل بالشرب بالنوم. منا وهيج اني لازم اكون مشرفة على اكلك وشربك. انت مو ثقة.
سكتت محجه كتله: اشو جنه معاجبك الحجي؟ بعدين شنو هذا باكيت الجكاير اللي لكيته بملابسك؟
صدك جذب احنه مصدكنه الله فكنه من هالمرض وخلصنه من القلق والتفكير شلون ترجع اتدخن تره بعدك حتى شهر ونص ممكمل على اخر جرعة لاعبالك تاخذ راحتك..
هم بقى ساكت بعدين كلي: شتشربين؟
شمه: جنه ماعجبك الحجي؟
ايوب: هسه شتشربين؟
صار عصبي، انقهرت كتله: شبيك؟ على كيفك.
اتنهد كلي: هسه شتشربين؟
شمه: مااريد شربت سم.
بقى ساكت واني ساكته بعدين كلي: كومي خل نرجع للبيت.
صعدنه بالسيارة بس مرجعنه للبيت.
بقى يفتر بالسيارة ساكت واني ساكته بعدين كتله: تره دخت من الفره، شيسموها هاي بالله؟
ايوب: اكو شي اريد اكولجياه بس مااعرف شلون، محتار مااعرف منين ابدي. بس لازم احجيه.
شمه: كول.
بقى شوية ساكت بعدين كال: هالحجي راح يبقى بيني وبينج مااريد امي ولا البنات يعرفون. زين؟
شمه: غير اعرف بالاول.
ايوب: شمه، متحجين لاحد ابد؟
شمه: والله مااكول ولااحجي بس كول شكو؟
هم رجع سكت كتله: شكو؟ تره خوفتني.
ايوب: خل نركن السيارة هنا وننزل نتمشى.
نزلنه.
لازم ايدي وساكت بعدين كلي: مااكدر احجي بالبيت هنااحسن.
شمه: ايوب تره خلص صبري احجي موتتني.
ايوب: المرض ماراح.
بقيت ساكته حسيت نفسي بحلم بفلم بفد شي يمكن مسمعت عدل يمكن فهمت غلط كتله: اي مرض؟
ايوب: مرضي. المرض العندي.
وكفت بالشارع وهو لازم ايدي، شافني بقيت واكفة وصافنه ممستوعبة كال: بس شوية. خطوتين هناك نروح نكعد..
سحبني من ايدي ورحنه كعدنه بكوفي شوب.
كعد كبالي يباوعلي.
ايوب: احجي.
بقيت ساكته بس دمعتي بطرف عيني.
ايوب: كوليلج كلمة؟
شمه: دتختبرني؟ مو صح؟
تره مو حلوه هيجي مواضيع ومالها داعي. احنه اتزوجنه خلص.
ايوب: لا مااختبرج. خلصنه مرحلة الاختبارات هسه انتي زوجتي وابيتي.
شمه: ايوب والله كوه لازمة نفسي حتى لاابجي، اذا مو صدك لتخبلني.
طلع تليفونه وراواني المراسلات بينه وبين الدكتور كاتبله: للاسف المرض لازال موجود صح بنسبة اقل لكن موجود ولازم تكمل العلاج الكيمياوي.
اختنكت بعبرتي ظلت بس دموعي تنزل.
بقى هو ساكت بعدين كلي: كافي بجي.
زدت بالبجي من كلي كافي كتله: والله كلبي جان حاس، من مجاوبتني ولارديت على مسجاتي واتصالاتي.
بس انجبيت وسكتت كلت هسه بس احجي نتعارك ويطلع الحق علي.
ايوب: شتردين اكولج يعني؟ شتردين اكول كدام امي المقتنعه انه هاي جانت اخر جرعة وابنها خلص صار زين وطاب؟ امي اذا تعرف تموت.
شمه: واني هم اموت، اني هم انت ليش دائماً تخليني آخر شي؟ ليش متحسب حسابي وتفكر بيه مثل متفكر بالبقية؟ حتى من جذبت وكتلهم التحليل نظيف من وصلت يمي لاكلت ولاحجيت ماهان عليك تجذب علي مثلهم وتتصل لو تجاوب علي وتكول نظيف، ليش؟
ايوب: اششش. الناس منا. صوتج.
وهالحجي ميطلع لاحد. زين؟
شمه: المن حجيتلي؟ ليش حجيتلي؟ بس بالقهر تجي لشمه.
ايوب: لعد المن اروح..
تردين اروح لوحده من بنات الشوارع لو اروح لمنى؟ مو زوجتي انتي؟
ظل يصيح علي وماادري منو بينه الغلطان، بقيت ابجي وهو ساكت.
طلع باكيت جكاير من جيبه راساً كمت اخذته كتله: والله اسوي بروحي شي وانت المسؤول، اني محترك كلبي وانت بكل برود كاعد تحجي وتدخن؟
ايوب: اتخبلتي؟
شمه: اي اتخبلت، مثلما انت اتخبلت. لان تصرفاتك من طبيعية. هو هذا موضوع ينظم؟
هذا موضوع تغلس ومتحجي بي؟
ايوب: انتي مو كلتلي قابله بيه شنو ماتكون النتيجة؟
مو كلتي تبقين وياي؟
مو كلتي متعوفيني؟
شمه: اي كلت، ومااتغير من كلامي شي.
كتلك ابقى وياك لاخر عمري اذا المانع جان بس المرض ميهمني..
اليهمني انت.
ايوب: زين وهسه شتغير؟
شمه: انت اتغيرت.
اني مثلما اني انت متحجي الصدك انت ضميت علي اهم موضوع..
وهم ياريت بس ضميته لا ضارب كل شي بعرض الحايط ورجعت تدخن ومتاكل ومدري شنو..
بقى ساكت.
شمه: شوكت الجرعة الجايه؟
ايوب: مااخذها.
شمه: لتخبلني. ايوب لتخبلني شوكت الجرعة الجاية؟
ايوب: كتلج مااخذها. كافي تعبت.
شمه: لا مو بكيفك. مو لعب هو كافي المصيبه السويتها.
ايوب: مصيبه؟
شمه: لعد شتسميها؟
شتسمي هذا إلى سويته؟
فهمني؟
ايوب: تعبت يسموه تعبت ماعندي بعد قدرة على تحمل العلاج، انتي متدرين شيسوي بيه..
متعرفين شيصيربيه..
محد يحس باللي احس بي غيري.
شمه: لا مو بس انت تحس كل احنه وياك نحس ونعيش ونتعذب بس انت تفكر بنفسك احنه مو مهم.
اني مو مهم.
امك هم مو مهم.
المهم انت تعبت بعد كافي.
اموت احسن حتى لااتعب وانتو يطبكم مرض.
ايوب: كافي
شمه: لا مو كافي. تروح وتاخذ الجرعة بموعدها لان اذا مااخذتها والله والله قسم يمين علي ياايوب ارجع منين مااجيت ويكولون اسمك متزوج وعندك مره اسمها شمه بعد.
بقى ساكت ويجر حسرات واني نفس الشي..
رجعنه البيت ساكتين واني ابجي كلما احاول اهدأ واسكت ارجع اتذكر وارجع ابجي من جديد.
من وصلنه كلي: كافي بجي واذا امي سألتج شكو كولي صيحت عليج..
شمه: شوكت الجرعة الجاية؟
ايوب: كافي شمه لتلحين.
شمه: واني حلفت..
نزلنه من السيارة خالتي ماكو بالمطبخ عبرت كبل لبيتنه.
امي جانت كاعدة تقرا قران كالت: هاا شبيج؟
دخلت للغرفة وسديت الباب.
اجت امي كالت: شكو؟ شبيج؟ شنو اتعاركتوا بعدكم بسم الله اليوم الصبح عقدتوا؟
شمه: ماكو شي ماما
امي: لعد شبيها عيونج مورمه من البجي؟
شمه: بعدني ممتعودة عليهم احس روحي غريبة.
مااعرف انام بمكان وانتي وادم بمكان.
امي: يااا شهالحجي متستحين بالله عمرج راح يصير تلاثين سنه وانتي تردين امج وياج؟
مو عيب شيكول عليج الولد بالله من اول ليلة رجعت لاهلها متستحين والله العظيم.
فضحتينه..
هسه امه شتكول عليج؟
شمه: عوفيني ماما االله يرضى عليج ميكولون شي هو يدري.
امي: حتى لويدري عيب متستحين شنو اول مره تتزوجين انتي حتى تردين اهلج؟ اعرف اني ميجي من وراج غير بس القهر عبالي تتزوجين واخلص من سوالفج.
انوب رجعتي عليه. ،
دك تليفوني باوعت شفته ايوب مجاوبته..
كمت بدلت ملابسي وغسلت وكمت اسوي لامي عشا وسمعت الباب اندك.
الباب إلى ينفتح على الحديقة الخلفية. عرفته هو.
فتحتله امي الباب كللها: هاا خالة شلونج؟
امي: هلا خاله حبيبي انت شلونك؟
ايوب: الحمد لله، وين شمه؟
امي: هاا اجيت وراها؟ بالمطبخ تسوي عشا.
اجه هو وامي كالت امي: ايوب يدور عليج..
بقيت ساكته كالت: متحجين؟ عوفي العشا وروحي ويه زوجج.
شمه: مااروح.
امي: امشي. متروح هو بكيفج متستحين انتي؟
مو متزوجه قبل؟
وعندج طفل بعد شنو هاللعب هذا بيتج تتعودين عليه شوية شوية وهاي اني وراج بس عبرة الحايط شتردين بعد؟
بنات زغار تتزوج متبجي على اهلها وانتي مره شكبرج ومجلبه بيه.
ظلت امي ساعة كامله تحجي واني وهو ساكتين.
بعدين من سكتت كال: يالله كومي.
شمه: اني حلفت.
ايوب: اوك، امشي هسه وهناك نحجي.
رحت للغرفة كعدت اجه وراي دخل وسد الباب لان امي رجعت تحجي علي وتصيح.
ايوب: يالله كومي. امشي.
شمه: مااروح
ايوب: شمه وبعدين وياج؟
شمه: شنو شمسويه؟
تريد احجيلهم واخذ رأيهم ونشوف منو الصح ومنو الغلط؟
ايوب: تعباان افتهمتي تعبت.
شمه: عجيب والله انت عجيب..
عبالك رايح سفرة مو علاج واذا متاخذه تموت، شهالبرود؟ شهالبرود؟
المن اتزوجت اذا تريد تموت؟
المن سكتت؟
ايوب: صوتج كتلج مااريد احد يعرف، افتهمي.
سكتت وهو كعد يمي وحضني..
خليت راسي بحضنه واختنكت من البجي.
ايوب: هن يومين ردت اعيشهن وياج بدون تعبت وشلعان كلب، ميصير؟
شمه: يومين واني المن ابقى اذا انت بس تريد تعيش يومين؟
المن ابقى؟
ايوب: خلص. كافي بجي، اليوم اتزوجنه كلبتيها نكد.
وخرت كتله: واني حلفت، اذا متاخذ الجرعة تطلكني ايوب.
ايوب: شوف هاي، شنو هالحجي هذا؟
شنو تطلكني المن طاح حظنه صار سنتين اذا اعقد عليج الصبح واطلكج العصر؟
شمه: وروح ابوي ماارجع..
كيفك تطلك متطلك ماارجع، اختار..
ايوب: انت الظاهر شفتيني احبج ظليتي تتعززين.
شمه: واضح شكد تحبني اصلاً كلش واضح..
ايوب: جذب يعني مااحبج؟
شمه: اي جذب. جذب..
تحبني وينها محبتك؟
تحبني كول اخذ الجرعة مو كتلي اثبتيلي تحبيني؟
انت هسه انت اثبتلي اذا تحبني صدك ايوب الله عليك بداعة امك تروح تاخذ الجرعة..
انت اذا يصيرلك شي اني المن ابقى فهمني؟
رجع حضني كلي: كافي، اخذها.
اخذها.
شمه: كول والله العظيم اخذها؟
ايوب: خلص كتلج اخذها.
شمه: كول والله العظيم اخذها؟
ايوب: والله العظيم اخذها، ارتاحيتي.
شمه: لاا. لان بعد ماعندي ثقة بيك اذا مااشوف بعيني مااصدك.
ايوب: كومي يالله كدامي للبيت خوش حجة لكيتيلج حتى تجين هنا خالتي تره حجيها طلع كله صحيح. هههه.
شمه: بداعتي ايوب الله عليك بداعة امير تاخذها.
ايوب: صدك جذب مو كتلج والله العظيم. كافي.!
طلعنه من الغرفة نريد نروح للبيت امي كالت: مرة الثانية اذا اجت اكسر رجلها.
ضحك هو كللها: والله ياخاله بتج شلعت كلبي.
امي: ادري بيها اعرف تعلمني بيها.
عبرنه للبيت جانت خالتي واكفة عالمغسلة شافتنه كالت: شبيكم؟
ايوب: ماكو شي شمه تبجي على امها عبالك زغيرونه.
بقيت ساكته صعد للغرفة واني وراه كالت خالتي: شمه يمه بدلي وتعالي حتى نسوي عشا اليوم خواتج ميجون بس اني وانتي.
شمه: ان شاءالله.
صعدت ابدل ملابسي لكيته واكف يحجي بالتليفون ويه مؤيد.
بدلت ونزلت.
لكيت خالتي بالمطبخ كالت: تعالي هنا يمي خل اراويج ايوب شنو ياكل.
بدت ترتب صينيته وتخلي بيها الاكل مالته واني ساكته والف سالفة اسولف بكلبي.
دارت علي كلتلي: شمه..
ايوب بعده تعبان لتزعلين من عنده اذا صار عصبي..
انتي المفروض تعرفيه مو اني اكولج شلون تتعاملين وياه، انتي اكثر وحده بينه تعرف تتعامل وياه لهذا السبب هو اصر عليج لان يعرف انتي فاهمته. زين يمه؟
هزيت راسي اي كالت: اريد اسألج عن شي بس استحي خاف تكولين خالتي من هسه تدخل بيناتنه.
شمه: لاخاله سألي؟
ام ايوب: شبيج ضايجه؟
كلج شي هو مثلا علمود الليله؟
استغربت كتلها: لا لا بس هو على كولتج عصبي واني هم بعدني افكر بامي وادم صعبة علي انام بغير مكان وهمه بغير مكان.
ام ايوب: اعتبريني امج اذا اكو شي كولي حتى اني احاجيه.
شمه: لا والله ماكو شي.
ام ايوب: احنه جنه متفقين نسويلكم حفلة بيناتنه احنه وخواتج وازواجهم بس اشوفكم مالكم خلك هسه.
شمه: مو هسه خاله خلي ايوب يطيب كلش ونرتاح وترجعله عافيته وبعدين الله كريم.
ام ايوب: اي اني هم هيجي اكول..
خواتج على اساس يجيبولج فستان وياخذوكم للاستوديو يفرحون بيكم يردون.
واني هم اريد افرح بيكم.
شمه: ان شاءالله خالة ان شاءالله.
دخل ايوب للمطبخ كال: هاا؟ اجتماع مغلق؟
ام ايوب: اي هههه اجاني حليف جديد هههه.
ايوب: عفيه ايوب كلها متحالفه عليه، وين اروح.
باوعتله كتله: هو جايب التعب لنفسه ايوب ومتعبنه وياه.
ام ايوب: اي والله شالع كلبي ميسمع الكلام ولايتفاهم ولايتنازل.
شمه: صحيح.
ايوب: صحيح ها؟
ههههه استاهل اني جبتها لنفسي..
ام ايوب: شمه تكملين العشا واروح اصلي؟
شمه: روحي خاله اني اكمله.
راحت تصلي هو سحب كرسي وكعد كال: زعلانه؟
مجاوبته، كال: خلص مو كتلج راح اخذها.
شمه: من تاخذها عود الله كريم.
ايوب: والله اتصلت بمؤيد وكتله يمر علي حتى نروح للمستشفى.
شمه: شوكت الموعد؟
ايوب: باجر.
درت عليه باوعتله ردت احجي بس خفت ابجي وامه تسمعنه..
اجه حضني كلي: خلص الترديه راح يصير.
شمه: بعديش. بعدما حركت دمي؟
ايوب: كافي، خلينه شوية نحجي بشي زين..
شمه: عفيه ايوب عوفني. مالي خلك هسه بعدين تجي خالتي مااريدها تسمع.
عافني وراح كعد بالصالة.
خلصت العشا واخذته يمه.
رجعت اجهز عشانه اني وخالتي.
كملته كالت: انتو مو عرسان؟ المفروض اصلاً تتعشون بحدكم مو وياي اني المره العجوز.
شمه: لاخالة عرسانيش هههه.
خصلنه العشا غسلت المواعين ونظفت المطبخ خالتي كالت: اني اترخص اروح انام..
تصبحون على خير.
دخلت نامت بقينه كاعدين بالصالة هو يباوع عالتلفزيون واني اباوعله.
ايوب: شبيج هيجي تباوعيلي هههه
شمه: شلون تروح باجر ومنو يروح وياك؟
ايوب: مؤيد يروح وياي.
شمه: وخالتي؟
ايوب: خالتج راح اكوللها هذا اجراء طبيعي لازم ابقى اروح وهاي جرعة وقائية.
سكتت واتحسرت حيل كلي: ضجتي مو؟
شمه: لا ليش اضوج اكو شي يضوج؟
ماكو مجرد وحده ثوله مثل شمه دائماً اخر من يعلم شنو الجديد يعني.
ايوب: هسه انتي ضايجة لان مكتلج من الاول لو لان اتزوجنه واني لهسه مريض لوشنو بالضبط.
شمه: رحمه لمدري المن ايوب لتحاجيني لتحجي بعد وياي لان كل حجيك قهر بقهر.
بقى كاعد يباوع عالتلفزيون بعدين اجه كعد يمي وحضني كلي: ماادري شكد احبج..
وجنت اكول اني احبج اكثر بس اليوم اتضحلي العكس.
لو شكدما احبج مو مثل حبج إلى.
شمه: مااريدك تحبني بس حجي..
مااريد بس حجي اذا صارلك شي اني وين اروح انت متفكر بيه؟
مااكسر خاطرك؟
الله يخليك والله عليك بغلاتي عندك اذا صدك تحبني تاخذ الجرعة لان حتى لو كتلي اروح بعد مااكدر اصدكك، مااكدر اثق بيك.
تصرفاتك راح تموتني.
ايوب: اففففففففففف، مو كلنه خلص كتلج باجر مؤيد يمر علي وياخذني والله والله والله.
خلص كافي.
شمه: والله راسي ظل يوجعني، كله منك.
ايوب: كله مني؟
كله منج انتي بس تبجين وعلى كل شي تصيرين عصبيه.
شمه: بطرانه شسوي..
خل اروح اسويلي جاي احسن، تريد جاي؟
يصير تشرب جاي؟
ايوب: لا مااريد.
اريد شي ثاني.
شمه: شنو؟ نسكافية؟
ايوب: اي نسكافية، ??????
شمه: ايوب كافي عيب خالتي هسه تطلع من غرفتها شتكول؟
ايوب: تكول ناس اليوم متزوجين شتكول بعد.
ضحكت كتله: باجر وراك كيمياوي وينك ووين هالسوالف هسه.
ايوب: ههههههههه والله لو مو كيمياوي وراي مالج مفر.
---
---
هل تمنيتم يوماً ان تكونوا جزءاً من قصة جميلة؟
هل تمنيتم ان تعيشوا قصة حب لاتنسى؟
هل تخيلتم يوماً تمروا بتجربة عذبة بالرغم من كل المرارات التي تخللتها؟
كلا بالتأكيد..
هكذا انا.
لم اكن يوماً سوى انسانة عادية لم تمتلك من الحظ شيئاً
حتى احببته وتغير ذلك الحظ فجأة.
واصبح كل العذاب له طعم لذيذ.