رواية صراع الجبابرة للكاتبة روز الفياض الفصل الرابع
بطريق الرجعة بعدما نزل الكل وكلمن راح لبيته انتبهت على وائل يباوعلي بالمراية.
غلست.
وكف السيارة بالطريق ورفع راسه للمراية. باوعتله كتله: ليش وكفت؟ شكو؟
وائل: شمه اريد احجي وياج بموضوع.
شمه: خير. شنو الموضوع؟
وائل: ميخالف نروح نكعد بفد مكان؟
شمه: لا طبعا شنو نروح نكعد بفد مكان. مااكدر تعذرني.
وائل: منطول هن كلمتين احجيهن ونطلع للبيت.
شمه: لا مااكدر اعتذر.
كتله بعصبيه ودرت وجهي. حس بيه هو ضجت كال: تره مو قصدي شي هن كلمتين ردت احجيهن الج مو اكثر.
شمه: شلون تقبلها إلى اكعد ويه رجال غريب كدام الناس بالله احد شافني وياك شيكول عني؟
وائل: اففف، والحل؟
شمه: احجي هنا ميحتاج كعده ومكان. كول هنا مو هاي دنحجي هسه شنو الفرق؟
سكت شوية وبقى يباوعلي بالمراية بعدين دار علي كلي: زين عالاقل تعاي كعدي كدام حتى اكدر احجي وياج براحتي.
شمه: كول وائل. شعندك اسمعك؟
ماانطيته مجال لان جنت حاسه باللي يريد يكوله وكلبي مقبوض مااريده يكوله.
متوقعه نوع الكلام والحوارالي راح يدور بينه وماجنت اتمنى انحط بهيج موقف اكره هالمواقف.
تأففف وبقى ساكت وصافن ماادري وين بعدين رجع دار علي كلي بأرتباك: شمه.
شمه اني معجب بيج.
رغم جنت متوقعه كلامه لكن من سمعته كلبي ظل يدك حيل واستحيت وارتبكت وبقيت ساكته..
ماعندي شي اكوله ولاعندي رد يرضيه.
اصلا ماعندي كل رد.
وائل: انتي خوش بنيه. عجبتيني حبيت اخلاقج وتصرفاتج. هدوئج. حلوه شكل واخلاق.
بلعت ريكي من الفشله ودنكت.
هو من ارتباكه وخجله هم دار وجهه رجع يباوعلي بالمرايه.
بقيت ساكته.
يمكن شاف سكوتي طول وماسمع الجواب إلى يريده ولا اي جواب كال: اتمنى متفهميني غلط. اني نيتي صادقة وقصدي شريف لان اعرف انتي مو مال علاقات وسوالف حب، اريد اتقدملج بس اريد اتعرف عليج اكثر عن قرب لان مااريد اخسرج.
شمه: مااعرف شكول.
وائل: لتكولين شي. لتكولين اي شي. فكري بالاول وبعدين نحجي. والله العظيم نيتي زواج.
اني هم خريج معهد تقني بس تعرفين ماكو تعيين لذلك اشتغل سايق تكسي بس عدنه بيت ملك واخواني كلهم متزوجين وطالعين بس واحد بالبيت متزوج وباقي واني والحجيه. واذا قبلتي احطج بعيوني. فكري براحتج.
بقيت ساكته ماادري هذا صدك قصده شريف لو هم يشوفني فرصة المهم مردت اكسر بخاطره فبقيت ساكته فتره بعدين اجبرت نفسي ارد عليه: الله كريم.
عفيه خل نروح للبيت لان تاخرت وهسه ماما تقلق عليه.
حسيت عنده بعد حجي بس مالي خلك اجامل ولااعرف ارد بهيجي مواضيع.
مكال شي هز راسه وشغل السيارة.
ماان تحركت السيارة حتى تنفست الصعداء واحسست بالراحة.
كم هي مزعجة مرحلة المواجهة.
يضيع فيها الكلام فلا انت تستطيع الرفض ولا القبول.
اطرقت راسي على الزجاج وانا احاول التهرب من تلك العيون الزرقاء الصافية.
ماذا عساني ارد؟
ليس لي الا ولدي. هو صمام الامان.
لطالما تحججت به كلما مررت بموقف مشابه.
فأنا ارملة وام لطفل.
هذا كان دوما جوابي.
عله ينقذني هذه المرة ايضا.
شيخلص الطريق.
اول موصلت لشارعنه ارتاحيت كلت الحمدلله.
وصلت للبيت واول مدخلت البيت غلقت التليفون حتى لايراسلني او يتصل بيه.
مرت فترة وائل مفتح الموضوع بعد ولا سألني عن قراري.
وبصراحة اني جنت مرتاحة من سكوته هذا.
الحجي ابو ايوب بعد مااجه للشركة. بس بقى العله ابنه على كلبي كل يومين يجي يخلي النهار اسود بعيني من كد ميتفلسف وينتقد ويراقب.
وبيوم جنت مصخنه وافلاونزا كوه داومت لان ادري اذا ردت اجازة مراح ينطيني بحجة الشغل هوايه.
كوه اتحرك ومالي خلك شي حتى الشغل مابيه حيل اخلصه. كلما اخلص شغلة اخلي راسي عالمكتب واغمض عيوني.
عيوني تطلع منها حرارة وخشمي مسدود وراسي يفتر وبردااانه..
اريد اغمض عيوني واتغطه واناام.
باوعت للاوراق كدامي كلبتها ورجعت حطيت ايديه عالمكتب وخليت راسي عليهم وغمضت.
اتذكرت ابوي الله يرحمه جنت من اصخن يكابلني ويكعد يسويلي كمادات ويجيبلي علاج ويحسب الدقايق للعلاج لازم بوقته بالضبط.
طاحت دمعتي. احس حتى دموعي حاره ماادري من الحزن والقهر ماادري لان مصخنه.
شويه حسيت اكو صوت بالغرفة. بقيت مغمضه مالي خلك.
ايوب: اذا مالج خلك الشغل المن هازه طولج وجايه. جان بقيتي كاعده بالبيت مكابلة اهلج وشفنه وحده غيرج حريصة على شغلها ووظيفتها ومحتاجه للراتب اكثر منج.
مااتفاجات بكلامه ولا حتى بدخوله لان من داومت لليوم يوميه نفس الموشح وعبالك ماكو موظفين غيري يرزلهم ويراقب شغلهم.
رفعت راسي ومسحت دموعي مالي خلكه مو وكته هسه يتفلسف براسي.
ايوب: صح النوم.
مسحت وجهي بأيديه وكتله بصوت ناصي: منايمه. بس مخليه راسي شويه لان الفلاونزا اذتني.
ايوب: لا. سلامتج بس مااشوف بيج شي وجهج منور ماشاءالله؟
مااكدر اتحمل استهزاءه والحاحه وياي كل هذا وميشوفني مريضه لو هو مرض مال انتقاد وحجي.
طاحت دمعه مني مسحت خدي كتله: افلاونزا ومصخنه وجايه بالكوه علمود الشغل.
ايوب: هذا يسموا دلع بنات. جان اخذتيلج بندوله وصرتي زينه. لان لو مريضه صدك جان اتصلتي واخذتي اجازه وجان خلينه غيرج يخلص شغلج.
شمه: ممتريكه هسه ان شاءالله اكلي حاجه واشرب علاج.
ايوب: بعد تريد تتريك.
حسيت وصلت حدها مكدرت اتحمل اسلوبه اكثر رديت عليه: تره هي كم دقيقه خليت راسي عالمكتب شصار؟
يايوم اني مقصره بشغلي من داومت لليوم لو هي سوله مال حجي بس تريد تحجي علي وتفشلني؟ شنو مشتريني انت لو مشتريني؟
شنو متفضل علي لان موظفه عدكم مثلا؟ الله الغني عن هيج وظيفة اذا كل هالاذيه والذله وراها قابل الشغل بس عدكم لو بس انتو عدكم شركة كل كلمة والثانية وكتلي نجيب غيرج والف وحده غيرج ومدري شنو، تره طرزز.
جنت كلللش عصبية لدرجة راسي حسيته راح ينفجر. ماادري منين اجتني القوه واني بحالتي هاي ورديت عليه ورزلته.
راد يحجي ويرد بس منطيته مجال كتله: شنو ماكو موظفين غيري تفتر وراهم وتراقبهم؟ لو بس اني حاط نكرك من نكري وعلى كل شي تجيني تهيني وتتفلسف على راسي تره اني اشتغل والراتب اللي تنطونياه مو فضل منكم هذا الراتب مقابل عملي وشغلي المأديته وشغل غيري هم. وخليه الك جيب وحده من الالف إلى يتمنون يجون بمكاني وخليها تشتغل كل هالشغل بهذا الراتب عود.
ماكدرت اسيطر على نفسي وعلى اعصابي ظلت دموعي تصب والموظفين كلهم يباوعون كلمن من مكانه واجت هبه تركض من بعيد.
اخذت جنطتي وطلعت.
هبه تركض وراي: شمه؟ شمه؟ اوكفي لج شكو؟ شصار؟ شمه شبيج اوكفي؟
عفتها وطلعت.
مشيت شوية ووكفت اريد اسكت من البجي استحيت السيارات تعبر علي والناس تباوعلي.
كوه مشيت كل جسمي يوجعني عظامي عبالك مكسره على كولت امي صخونتج بالعظم.
المشكلة مااكدر ارجع للبيت مااريد امي تشوفيني ابجي ولااريد اقهرها واكول بطلت خاف تنقهر.
مشيت شويه وسمعت صوت هبه تصيح وراي. التفتت شفتها جايه بأتجاهي حسيت راسي يفتر وصلت كوه للركن مالت الشركة وكفت بالظل.
اجت هبه كالت: شبيج اوكفي مو داصيح عليج؟ اصبري خل احجي وياج افتهم الموضوع وين رايحه؟
مكدرت ارد عليها رجعت بجيت مقهوره على نفسي حيل شبعت اهانات بدون سبب.
هبه: ياا. هاي صدوك؟ شمه صدوك جذب لتبجين فهميني شصار شكلج شسوالج؟
كعدت بالكاع وخليت راسي عالحايط وسكتت حاولت اهدأ لان راسي وعيوني وجسمي كله يأذيني اريد ارتاح شوية حتى اكدر اروح للبيت.
هبه: شمه حبيبتي شبيج مو داحجي وياج؟ احجي فهميني؟
جاوبتها كوه: مابيه شي. بس دايخه احس نفسي وتعبانه.
رجعت بجيت بس هالمره بهدوء بسكته بس دموعي تصب غصبن عني.
هبه: دكومي كومي خل نرجع للشركة ارتاحي هناك.
هزيت راسي لا واني مغمضه عيوني.
هبه: كومي كومي ماكو لا ادخلج بمكتبي مالج علاقه بايوب تبقين يمي.
حاولت تسحبني بس ماكدرت كتلها: عوفيني هبه، الله يخليج عوفيني اني ارتاح شويه واهدا واروح للبيت، رجعي انتي حتى ميسويلج هالحقير مشكلة.
هبه: لج كومي الدنيا حاره تسمط سمط شترتاحين هنا بالشارع وجماله مريضه شلون اعوفج واروح بالله صارلج شي؟
شمه: روحي هبه عفيه مااكدر احجي تعبانه روحي.
هبه: كومي كومي بلا دلع تصير زينه وتروح للبيت هو انتي شايفه شكلج شصاير بيج وين تكدرين ترحين للبيت؟
شمه: عوفيني هبه عوفيني.
هالمره بجيت حيل وطلعت قهري كله وهي كاعده كبالي وتباوعلي: شمه شبيج؟ هذا الشغل بالقطاع الخاص ومرات حتى بالحكومي بس الفرق بالحكومي مو بكيفه يطردج لو يغلطج. تره مشايفه شي انتي لهسه اللي يتحرش بيج والي يشد وياج والي يخليج بوضع مقايضة وغيره وغيره، شمتوقعه انتي؟ انتي اكثر وحده اتعرضتي لهالمواقف اكثر وحده جنتي محط انتباه الزين رالمو زين. إلى يتغزل بيج والي يسمعج حجي والي يسمعج كلام جارح والي والي والي شفتي اشكال النفسيات بالمدرسة وبالكلية واتحملتي.
شنو الجديد هسه؟ شنو يعني ايوب سمعج كلمتين. حكريه هو اصلا واحد شايف نفسه. المهم ابوه راضي عنج وطاير بيج مو مهم هو اصلا لتحسبيله حساب.
ردت ارد عليها بس شهكاتي خانكتني. بقيت ساكته شويه وهي تحجي بين كتلها: ال. الحجي. سه. ل.
هبه: والفعل اسهل. خلص يالله كومي خل نرجع اصلا مو مقبوله تبطيلتج لان إلى وظفج هو الحجي ابوه مو هو. هو مو مسؤول عنج.
بهالاثناء دك تليفون هبه: اهوو. هذا ديتصل. دكومي حبيبتي. يالله مو تأخرنه، هاي كطعته.
رجع دك تليفونها: اهوو. خل ارد امري لله: الوو. هلو استاذ. اي استاذ جايه هسه. آسفه طلعت من الشركة بس لان جنت مستعجلة طلعت اركض وره شمه بس مااكدر..
: هبه: لا مااتأخر جايه، بس هاي وكعت اتخربطت. شمه غير.
: هبه: وين بعد بالشارع. ماادري شسوي متكدر تكوم مريضه هي اصلا.
: هبه: خاف نسوي عليك زحمة؟ اوك. اوك استاذ. اي اي بالشارع بصف الشركة بالركن احنه كعدتها بالفي ترتاح. اوك يالله.
شمه: روحي هبه.
هبه: اششش لتحجين بعد ارتاحي.
شمه: اني ارتاح واروح، روحي.
هبه: اششش كافي. روحي شلون اروح واعوفج هسه اخذج ارجعج مو بكيفج. هذا اجه الكيك. صدقه لله.
شمه: منو؟
-السلام عليكم. هاا شنو شبيها وكعت؟
اول مسمعت صوته درت وجهي وغمضت عيوني خاف ابجي.
هبه: وعليكم السلام. داخت وتعبت منا حاره الدنيا ومنا هي افلاونزا ومصخنه.
ايوب: امم. سلامتها.
هبه: الله يسلمك استاذ.
مرديت السلام عدلت كعدتي وحاولت اكوم بدون مااحاجيهم. ردت اتجاهل وجوده.
اتسندت عالحايط ووكفت ومشيت خطوه كدام بس لزمتني هبه من ايدي كتلها: روحي هبه. رجعي لشغلج. مابيه شي.
هبه: اوكفي يمعوده وين رايحه وحدج. بالله وكعتي مو تكولين دايخه.
ردت اجيب جنطتي دنكت شويه مديت ايدي والايد الثانية لزمت بيها راسي لان احس اكو عبالك مي براسي يتحرك من اتحرك.
اكو ثكل براسي. بس دنك هو بسرعة وشال جنطتي قبل ماالحك اشيلها ومد ايده انطانياها.
اخذتها ودرت وجهي حتى مكتله شكرا.
هبه: دتعاي يمعودة انتي ليش عنيده متفهميني؟ امشي خلينه نرجع.
شمه: ماارجع. روحي انتي.
فجأة حسيت ايد لزمتني من ايدي الثانيه. نزيت.
ايوب: لزميها هبه عدل وامشي خل نرجع.
هبه: اي يالله لزمتها.
سحبت ايدي منه وباوعته كتله: لو سمحت ايدك.
راسا ابتعد.
درت على هبه وانطيته ظهري كتلها: ماارجع. رجعي انتي.
سمعت صوته وراي كال: مو مهم ترجعين. المهم هسه ترتاحين. لزميها زين هبه.
طاحت دموعي كتله ومبين من صوتي ابجي: مابيه شي. الحمدلله مرتاحه اهم شي انت هسه ارتاحيت.
مجاوبني ولاعلق بس حسيته يأشر لهبه لان شفتها تباوعله وتهز راسها.
سحبتني هبه من ايدي وبدت تمشي على كيف وتمشيني: ديالله ياعيني امشي شويه على كيفج ليروح يصير بيج شي بعدين خاله تنقهر وتتمرض على مرضج متتحمل تشوفج تعبانه تره فكري بأدومي حبيبي اثنينهم بركبتج اذا يصيرلج شي منو الهم.
ظلت تحجي وتمشي واني ابجي على كيف وامسح بدموعي ادري بيها ماخذتني للشركة بس مابيه حيل اعترض لدرجة جنت اشوف كل شي كدامي يتحرك ماكو شي ثابت.
ايوب جان يمشي ورانه بدون كلام لحد مدخلنه للشركة راساً مشى كدامي سحبلي كرسي واشرلي براسه اكعد. بعدين راح اختفى.
هبه: ارتاحي حبيبتي. ارتاحي خل اجيبلج شي تاكليه حتى تشربين علاج عندج بندول؟
اتنهدت حيل وكتلها: اريد اغسل وجهي.
هبه: ارتاحي شويه واخذج غسلي وجهج.
بقيت كاعدة شويه هبة شغلت التكييف ورجعت كعدت كبالي: شبيج شمه؟ اتحملي. من شوكت انتي تهزج كلمه؟ هاي الوظيفه احسن من غيرها راتب حتى لو قليل وبتعب بس احسن من الماكو ابقي واتحملي عالاقل لحد متحصلين مكان ثاني مو كبل تبطلين.
مجاوبتها. كمت اريد اروح للحمام اغسل وجهي لان احس صرت فلم، شفت ايوب واكف اباب مكتبه ويباوع علينه.
درت وجهي ورحت للحمام.
غسلت ورجعت واول مكعدت اجت العاملة جابتلي كلاص عصير وكلاص مي.
شمه: مشكورة خاله بس اني مطلبت شي ليش تعبتي نفسج.
ام ستار: هذا من استاد ايوب هو كلي عصريلها كلاص برتقالي. شربي خوش عصير وانتي مبين عليج مريضه اليوم شربي بلكي تصيرين زينه.
شمه: كلها من وجهي عرفتني مريضه الا استاد ايوب هسه يالله عرف مساع جان دلع بنات.
ام ستار: هاا؟ شبي وياج؟ تره خوش وليد هو بس مدري حظج هذا مدري هو ميعرفج.
شمه: منو هو الخوش وليد؟
ام ستار: الاستاد غير. استاد ايوب.
هبه: ههههههه والله ياام ستار استاد واستاد اسمها استاذ ام ستار شبيج ههههه.
ام ستار: استاد استاذ شمدريني ياخاله المهم هو هههه.
خلت الصينية كدامي وراحت.
بقيت كاعده وصافنه على كلاص العصير كدامي واتأمل قطرات المي المتكثفه عليه من بره لان بداخلة اكو ثلج.
هبه تحجي وتنصح وتدردم بس مااسمع شتكول كل تركيزي عالكلاص شلون قطرات المي تصير ثكيلة وتنزل وحده وره اللخ وهكذا.
اكيد هبه دتعيد نفس نصيحتها نفس الحجي بس صعب.
افكر بكلامها صحيح ميصير ابطل قبل مااحصل وظيفة ثانية. بس صعب. صعب ابقى. صعب ادوس على كرامتي علمود وظيفة.
كرامة الانسان اغلى مايملك.
يلعن ابو الظروف إلى تخلي الانسان يقبل ينهان وينذل علمود العيشة.
اخذ وانطي ويه نفسي بالحجي بس بعدين: اخذت نفس عميق وكمت اخذت جنطتي ورحت اسحل بنفسي كوه لمكتبي..
كلام هبه صحيح. شنو ذنب امي وابني يتبهذلون بسببي. لازم اتحمل لحدما احصل شغل بمكان ثاني.
امري لله.
دخلت للمكتب ماادري ليش مخليني وحدي بهالمكتب محد وياي كعدت اكلب بالاوراق الكدامي لازم اخلص شغلي ومااسمح لاحد يهزني.
اتذكرت اسلوب ايوب الصبح دمعت عيوني.
مسحت دموعي وانحطت الصينية كدامي فجاة: نسيتي تشربين عصيرج؟
رفعت راسي باوعتله بس محجيت شي ومجاوبته. رجعت دنكت وسحبت القلم وبديت اراجع المكتوب بالاوراق.
ايوب: شربيه قبل ميحتر.
شمه: شكرا. مااريد.
ايوب: جايبه الج بنفسي!
هم مجاوبته. غلست ودنكت عالاوراق قبل متخوني دموعي واتفشل.
ايوب: براحتج.
طلع..
بديت اشتغل بس تعبانه. ميته من التعب. وحسيت بالجوع مماكله شي من الصبح لهسه.
اريد اشرب دوه بس لازم اكل شي بالاول.
يالله خل اخلص بالاول.
بس مكدرت اكمل تعبت فد مره. طلعت التليفون اتصلت بهبه: هبه. الحكيني. راح اموت.
اجت هبه تركض: ياا يمه عزا شبيج حبيبتي؟
شمه: تعبانه والله مااكدر ابقى بعد راح اطلع للبيت.
طاحت دموعي لان مو افلاونزا احسها عبالك سياره وداعمتني.
هبه: ياا شصارلج؟ شوفي وجهج شلون صار احمر من الصخونه. شلون بيج بالله؟ اوديج للبيت؟
شمه: اني اروح بس روحي لهذا كوليله فدوه.
هبه: منو؟ استاذ ايوب؟
شمه: صخوم.
هبه: هههههههههه لج انتي بيا حال هسه.
شمه: ياالله راح اروح مااكدر بعد والله بردااانه ومااكدر افتح عيوني.
هبه: اي. هسه راح احاجيه وارجع اوديج للبيت متروحين وحدج باالله اغمى عليج بالطريق لو خطفج السايق. انتظريني.
راحت وعافتني مخليه راسي عالكرسي ومغمضة عيوني.
رجعت وره شوية: يالله حبي كومي اوديج.
كمت كوه وهبه لازمتني وشايلة جنطتي: لج هبه راح اموت من البرد.
هبه: اسم الله عليج عيوني كل هالحر وانتي بردانه.
طلعنه للشارع حتى ناخذ تكسي.
وكفت سيارة كبالنه كالت هبه: يالله حبي صعدي.
باوعت عالسيارة مو تكسي استغربت: وين اصعد سيارتمن؟
هبه: هسه دصعدي وبعدين تعرفين سيارتمن.
شمه: هاي مو تكسي.
هبه: اللهم طولج ياروح انتي بيا حال هسه دصعدي.
دفعتني على كيف باتجاه السيارة حتى اصعد. فتحت الباب مديت راسي شفت استاذ ايوب انصدمت. رجعت ليوره درت على هبه كتلها: شنو هذا؟ هاي سيارة هذا؟ مااصعد وياه.
دفعتني حيل وكعت عالكشن: يمعوده صعدي هسه وكتها. صعدي مو انتي مريضة احسن توكعين بالشارع عود بعدين نتحاسب.
سمعته كال: ها صعدتوا؟
مجاوبته كعدت عدل وكعدت يمي هبه خليت راسي على جتفها وغمضت. اريد انام. وبنفس الوقت احس كاعده على اعصابي بس بالنهاية غفيت شويه بس فزيت على صوتهم هو وهبه: مصخنه؟
هبه: اي بعدها مصخنه. هسه اذا مريضة جان اتصلتي بيه وكلتيلي اخذج اجازه.
شفته يباوع بالمراية رجعت غمضت وكشيت بحضن هبه من البرد.
هبه: شبيج ترجفين؟ بردانه؟
حسيت هبه تريد تسمعه ماادري ليش كل حجيها وياي كدامه احسه مقصود.
وره شويه كالت: استاذ من رخصتك اذا متصير زحمه راح اخذ سترتك اغطيها بيها راح تموت من البرد خطيه.
جفلت من يمي شنو هالجرأه العدها منين جابتها.
مسمعته جاوبها بس حسيت من غطتني الستره ماادري السترة جانت يمه وانطاها الها لو جانت وين؟
المهم هسه بديت ادفه.
ايوب: نطلع للمستشفى احسن؟
هبه: والله ماادري.
فتحت عيوني واشرتلهم بأيدي لاا.
ايوب: لعد شلون تبقين هيج؟
هبه: ناخذها للبيت هسه واذا مصارت زينه اخذها اني للمستشفى ينطوها ابره شوف شنو.
مجاوب هبه.
حسيت نفسي وره شوية بديت اعرك واحتر.
وخرت الستره شويه وكفختني ريحة العطر إلى بيها.
حسيتها قوية مو حلوه راسا بعدت السترة وكلت بتذمر بس بصوت ناصي: افف. شنوهالعطر.
رفع راسه باوعلي بالمراية معقولة سمعني؟
انخلست.
هبه: ها حبيبتي شلون صرتي؟
هزيت راسي: الحمدلله. بس احتريت.
غريبة هي الحياة حين تهديك وجعا ً.
والاغرب حين تذيقك فرحاً.
فيبقى الاول اقوى واعنف مهما عشت من افراح ومسرات.
فالحزن لاينسى وان طال الزمن والالم لايمحى وان اعتذرنا.
والكلمة المؤذيه لاتبارح مكانها في الذاكرة مهما بلغنا من الطيبة ونقاء القلب. ومهما كانت المبررات.