رواية صراع الجبابرة للكاتبة روز الفياض الفصل الخامس
هبة: اي احسن تحترين وتعركين معناها اتحسنتي. خوفتينه عليج يمعودة.
ايوب: ها هسه للبيت لو للمستشفى؟
شمه: لا مااروح مستشفى. نزلوني هنا واني اروح للبيت ماله داعي التعب.
ايوب: تعبتينه وخلص.
حسيت بالفشله من جوابه. جاي موصلني على اعصابه.
حقه. الرجال ميشوفني بالصراط المستقيم ويكوني بحجاية ويكعدني بحجاية انوب هسه يوصلني بهالحر والشمس للبيت.
بقيت طول الطريق دايره وجهي لو مدنكة مستحية وفشلانه. شلون شسوي هسه من انزل؟
اتشكر منه لو اغلس؟
بس عيب اغلس مو صح؟
اي بس هو ميستاهل واحد يشكره لان ماعنده اسلوب ولايحترم ولايفكر بمشاعر المقابل من يحجي.
وصلنه للبيت ونزلت هبه قبلي.
ردت اغلس وانزل بس استحيت مو اخلاقي حتى لو هو ميستاهل.
بعدين سترته عندي.
اتحركت اريد انزل ومديت ايدي انطيه السترة هو جان يباوع بتليفونه: هاي السترة.
التفت علي ومد ايده اخذها بدون كلام.
شمه: شكرا
جاوبني واحرجني: شبي العطر؟
التفتت عليه كتله: نعم؟
شفته يشم السترة طلع سامعني من حجيت عالعطر مفوتها إلى.
ايوب: معقولة العطر مو حلو؟
شمه: هاا.
ظليت ابلعم مااعرف شرد ساعة السودة الحجيت بيها احس وجهي ظل ينطي الوان: ها لا لا بس قوي شويه.
ايوب: اممم. الحمد لله عالسلامة
شمه: الله يسلمك
نزلت من السيارة بسرعة من فشلتي وهبه واكفة ومتخوصره وتخزر بيه ماادري شبيها.
دكيت الجرس بعدما سلمت على هبه وطلبت منهم يتفضلون للبيت بس مقبلوا.
صعدت هبه بالسيارة يم استاذ ايوب بس بقوا واكفين متحركوا الا من دخلت للبيت.
ماما فتحت الباب واستغربت من شافتني: ها اشو رجعتي؟ خوماكو شي؟
شمه: لا ماكو شي. بس الفلاونزا موتتني.
درت على هبه اشرتلها وراحوا واحنه دخلنه البيت.
من كد متعبانه بس خليت راسي عالمخده نمت ورحت بسابع نومة.
كعدت وره ساعتين من اتصلت هبه: هلو
شمه: هلو هباوي.
هبه: بشريني شلون صرتي؟
شمه: الحمدلله احسن
هبه: اكول حب ايوب استاذ ايوب يكول باجر لتجي خل ترتاح كم يوم لحد متصيرين زينه داومي.
شمه: منو هذا؟ معرفته؟ منه من الشيطان؟
هبه: هههه لا ياناكره. مو احتار بيج اليوم وطلع ورانه ورجعج للشركة وبعدين وصلج لباب البيت من صخنتي وحتى عصير طلبلج حرام عليج.
شمه: اهوو مو على اساس مو هو السبب. هسه خليني ساكته لاتخليني احجي عليه كلبي متحمل.
هبه: عمي الرجال بس حس بنفسه غلط بحقج اجه بنفسه اخذ العصير ووداه الج للمكتب وبعدين وصلج شتردين بعد؟ هسه اله يعتذر اعتذار صريح؟
شمه: المفروض
هبه: حرام عليج
شمه: اهوو خلص. خلص لاتنكدين عليه بطاريه.
هبه: هسه شنو تداومين باجر لو لا؟
شمه: لا اجي يمعوده بعدين يطلع مسويلي فخ حتى انطرد. ماعندي ثقه بي.
هبه: ههههههه شدعوه
شمه: كل إلى يسوي وياي وتكولين شدعوة؟
ايوب.
شفتها اجت وسلمت على الموجودين وراحت لمكتبها.
مااريد اطردها كبل لان الحجي راح يظل وراها بالعناد. لازم الزم عليها حجج حتى ابين مو متعمد طردها.
باوعت للساعة جانت ب( 8 ) وخمس دقايق خاف متسوه ارزلها على خمس دقايق تأخير؟
قدمت ساعتي بعد خمس دقايق ورحتلها للمكتب.
رزلتها بس الحجي اجه وخرب الشغل.
وراح من بالي هي تجي ويه السايق مال الشركة يعني مو بكيفها متأخره.
ثاني يوم اجت ماادري شنو اختلقتلي من عذر ضدها رحت وراها.
شفتها نايمه عالمكتب كلت الله وكعها بيدي هم البارحة متأخره وهم نايمه جنابها بالدوام.
المشكلة من حجيت وياها لسانها شطوله وترد الكلمة بعشر كلمات. متوقعتها هيج. مبينه فقيرة طلع بيها البلا.
وارتاحيت من طلعت وراحت ولت من كيفها الحمد لله هم وانزاح هسه لازم اشغل الحجي واطلعلي حجه اذا سأل عنها.
بس يافرحه ماتمت طلعت اشوف هبه حتى اوصيلها تجذب من يسألها الحجي عن صديقتها بس ملكيتها.
اتصلت بيها كالت طالعه وره صديقتها الزعلانه والثانية واكعة بالشارع.
اففف.
رحت وراهم لكيتها صدك واكعه وتبجي وحالتها حاله.
كسرت خاطري.
ماادري ليش مصدكتها من كالت مريضة.
رجعناها للشركة بس ضميري انبني من شفتها كاعده وتمسح دموعها..
يمكن زودتها هالمره واسلوبي كان مو حلو.
المشكلة مكدامي حل لازم تطلع من الشركة لان اذا بقت ابوي مراح يتركها بحالها.
ويجوز هي هم متصدك واحد عنده فلوس ينطيها مجال ويركض وراها.
حاولت ابينلها اسفي اخذتلها كلاص عصير ورحت قدمته الها بس رفضت..
وره شوية وكعت مرة ثانية بالدوام واخذناها لبيتهم.
الموظفات ماوراهن غير بس التعب ودوخة الراس.
فوكما موصلها تعيب جنابها معاجبها عطري من شمته بالسترة شككتني بذوقي ظليت اليوم كله من اشوفه اسأله شنو رأيك بالعطر.
انطيتها اجازة لحد متصير زينه هم اخلص منها وهم اسمي صرت زين وياها.
ماادري داظلمها بتصرفي لو هذا التصرف الصحيح؟
يجوز فعلا تكون محتاجه للشغل بس مااكدر اخليها تبقى.
لو بيدي اخلي بس موظفين ماكو موظفات بس مو بيدي. مااكدر اكطع رزق كل هالناس التشتغل عدنه..
رجعت للبيت لكيت خواتي كلهن جايات عدنه والجهال صايرة مدرسة.
خواتي وامي ومنى كاعدات بالصالة والجهال كاعدين يباوعون على فلم بغرفة اختي سابقا.
ايوب: السلام عليكم
امي وخواتي: وعليكم السلام.
ساعة مباوس خمسة خواتي وعدكم الحساب.
ايوب: خير شنو سبب هذا التجمع النسووي؟
امي: ههههه اني عاقده ندوة
ايوب: هاا ههههه
اختي امل: جايين نشوفكم انت متسأل كلنه احنه نسأل عنك وعن مرتك.
ايوب: والله ماعندي مجال هاي كدامج بيش الساعة هسه توني راجع ساعة وراجع طالع.
اختي سهاد: الله يساعدك بس حتى مرتك كطعيه عليك متسأل ولاعبالك بنات عمها.
منى: اهووو مرته غير حامل وتعبانه.
امل: اي بس من توصل النه تعبانه بس بالطلعات اول وحده بالاعراس اول وحده بالسوك اول وحده. مري علينه فد يوم شصار.
اختي نوارس: كافي دوختووه توه راجع تعبان. ها حبيبي تتغدا؟
ايوب: لا مااريد متغدي
امي: يفوتك الغدا والله اليوم نوارس ونهى سوولنه شلون دولمة تخبل. ونور سوتلك تبوله كالت يحبها وهسه اسويلك صحن ركي بارد ونعمة من الله.
منى: وين اتغديت؟
ايوب: بالشغل وين بعد.
منى: ويامن؟
ايوب: صاحبتي.
منى: ههههه هو انت بكيفك تصاحب
ايوب: لا بكيفج
منى: سويها وشوف
ايوب: ششوف؟ لاعفيه خفت هههه دكومي طلعلي ملابس خل افوت للحمام.
منى: مااكدر تعبانه والله.
ايوب: تعبانه من الفراره والطلعات مشايف حامل تطلع بكدج.
منى: اهووو.
ايوب: وجعوا. كومي بسرعه خلصيني مستعجل.
رحت كدامها للحمام واسمع امي وخواتي يحجون عليها.
امي: كومي عمه شنو تعبانه شمتعبج شغل البيت كله اني اشتغله مااريد اتعبج بس ايوب لا مااقبل هو ساعة بس يرجع يرتاح وميطلب شي بس ملابسه حتى اكل مياكل بالبيت صيري سباعية وقبل ميجي اجهز حمام وملابسه.
سهاد: منيوه شوكت تتغيرين صارلكم كم سنه متزوجين عشرة لو سبعة؟
منى: سبعة.
سهاد: سبعة وهو يومية يجي يريد شغلاته ملابسه وحمامه جاهزه وانتي ولا يمج شالقصة؟
كامت منى وراي بعدما ضاجت من حجي امي وسهاد.
منى بت عمي من جنه زغار جان ابوي يكول منى لايوب وايوب لمنى وفعلا من كبرنه خطبلياها.
ماكو مشاعر حب ولهفة بينه يعني جنت احس هي زواجه والسلام قابل شنو اريد من مواصفات بالزواج هي بت عمي وحلوه واكيد على كولة امي راح تهتم بيه وتوكف وياي وتداريني واحسن من الغريبة إلى منعرف عنها شي.
وبنفس الوقت ابن عمي مؤيد اخو منى خطب اختي نوارس.
---
مجنت احب وحده ولا ابالي اي وحده لذلك اقتنعت بكلام امي خطبت منى حلوه وجميلة بس عيبها تغار وكسوله عجوزيه بشكل وعدها انانية.
هواي صارت مشاكل بينه بسبب شغل البيت امي جبيرة بالعمر وتعبانه وخواتي كلهن متزوجات يعني بس هي وامي بالبيت امي تشتغل وهي كاعدة.
الف مره حجيت وياها والف مره نبهتها ومليون مره حجن خواتي لكن ماكو فايدة تشتغل يوم وترجع.
حالتنه المادية ممتازة الحمدلله وفكرت اجيب خدامة لكن امي مقبلت والسبب معروف ( الحجي ).
اما مشكلة الغيرة فغريب عجيب موضوع لان احسها مثلي حاسه انه زواجنه بارد مو مثل المتزوجين احسها تغار وقت إلى يعجبها تغار ووكت الميعجبها متغار يعني مثلا وكت إلى انطيها فلوس لو القصة بيها سفر تغار بس باقي الوقت متهتم.
اغلب وقتي بالشغل فمو مهمة هالمواضيع.
اخر سنتين ابتعدنه اكثرعن بعض بسبب عنادها وعنادي اعترف اني يمكن عنيد اكثر منها.
ماكان بينه غير سلام. وعليكم السلام تقريبا.
الى ان صارت حامل من بعد سبع سنوات زواج احنه مجان عدنه بيها اطفال.
هنا اني جنت مسافر ومن رجعت جنت ناوي انهي هالموضوع واطلك. لكن امي من عرفت اتخبلت.
امي: شنو هالحجي ايوب؟ شنو تطلكها؟
ايوب: يمه مليت. بارده.
امي: هاا ايوب خاف تريد تصير مثل ابوك؟
ايوب: يمه يامثل ابوي لخاطر ربج. رجلج كرهتي بالنسوان اصلا يوميه مسويله قصة وتعال ياايوب حلها.
امي: لعد شكو؟ شعندك؟
ايوب: ماعندي شي والله. بس كافي مليت يوميه نفس المشاكل ويوميه نفس الحجي وتعرفيني مااحب المره ام لسان طويل زين واتحملتها هلكد.
امي: طلاك ماكو افتهمت. اتبره منك اذا سويتها.
ايوب: هسه منو الاهم ابنج لو بت حماج؟
امي: لا ابني اهم. بس ميعرف يتصرف. دومك متسرع مرتك حامل تدري لو لا؟
ظليت متفاجأ.
امي: شفت شلون متسرع دكوم روح شوف مرتك ودير بالك عليها قبل جنت تكول ماكو شي مشترك هسه صار اكو. هاي فرصة حتى تبدون من جديد.
---
كالمعتاد سمعت كلام امي ورحت لغرفتنه واني ناوي انسى موضوع الطلاك. ونسيته.
دائما جنت مطيع مااحب اعصي امي ولا اناقشها امي تعبت علي حيل واتحملت لخاطري هوايه اشياء اولها ابوي لذلك مااكدر ارد لها كلمة اواعصيها.
شمه
---
ثاني يوم داومت.
طول الطريق وائل يباوعلي واني مغلسة. آخر شي: الحمدلله عالسلامة شمه. كالوا مريضة وواكعة البارحة؟
شمه: الله يسلمك. اي والله افلاونزا قوية.
وائل: اي جان اتصلتي بيه واجي اوصلج للبيت. ليش ترجعين بتكسي؟
شمه: مشكور. بس استاذ ايوب مقصر وصلني.
التفت علي كلي: منوو؟
شمه: استاذ ايوب.
سكت بس طول الطريق يخزرني ويذب حسرات.
غلست هذا الناقصني واحد يكعدلي ركبه ونص ويغار علي ويمثل دور العاشق ولازم اواسيه وابررله.
وصلنه نزلت كبل كملت شغلي المتعطل من البارحة.
شويه وشفت ابو ايوب اجه.
دقايق واجت ام ستار كالت: ست شمه الحجي يريدج كلي يصيحيلها.
هزيت راسي وكلت بكلبي: اهوو بدت الزناخة.
رحت على اعصابي دكيت باب المكتب وفتحته على كيف وفتت.
دخلت وبقيت الباب مفتوح.
شمه: مرحبا استاذ؟
ابو ايوب: اهلاااً وسهلاً. هلوو هلو شمه.
شمه: ام ستار كالت رايدني.
ابو ايوب: اي صحيح.
شمه: خير استاذ؟
ابو ايوب: خير. كل خير بس كعدي.
ردت اكعد: سدي الباب بالاول.
رجعت وكفت استغربت باوعت للباب ورجعت باوعتله كتله: ليش؟
ابو ايوب: حتى نحجي براحتنه.
ظليت متحنطه شويه بعدين اتحركت بأتجاه الباب بخطوات بطيئة ومتردده.
سديت الباب بس مطبكته خليته مردود لان هذا العجوز مو امان حسب حجي هبه ونظراته.
رجعت كعدت بأبعد نقطة بالمكتب وظليت اتلفت عبالك مخطوفه.
ظليت كاعده واهز برجلي منتظرته يحجي بس ماكو محجه شي بس صافن علي.
يباوعلي ومبتسم عبالك واحد مراهق مااعرف اضحك لو ابجي على حظي اذا صدك طلع حاط عينه علي.
حاولت ابتسم جذب بلكي يحس ويحجي.
ابتسم حيل وكلي: اي شمه؟
شمه: اي استاذ؟
ابو ايوب: شلونج؟ شخبارج؟ شلون الشغل هنا؟
شمه: الحمد لله. نشكر الله.
ابو ايوب: اي. عفيه. شلون الوالده وابنج؟
شمه: الحمدلله زينين.
ابو ايوب: اني سألت هبه عنج وهي حجتلي وضعج وحجتلي شويه عن حياتج.
هزيت راسي اي بدون كلام ماادري شيريد ووين يريد يوصل بكلامه هذا.
شعندك تسأل عني وعن حياتي؟
احجي بكلبي.
ابو ايوب: ميضايقج اذا اسأل عنج مو؟
شمه: لا استاذ شدعوه. انت مثل والدي الله يرحمه وطولت العمر إلك.
كتله بهدوء والي قصد باللي كلته رغم كله جذب. بس اشو هذا سكت.
اكيد معجبه الكلام إلى كلته.
وره شويه اتنفس حيل وخله السبحه من ايده وكلي: اي. شمه. اني اريد اشيل عنج الحمل والمسؤوليه شويه.
يعني قدر الامكان.
معجبني حجيه بس بقيت ساكته مااريد استبق الاحداث.
ابو ايوب: اني حجيت ويه استاذ سلمان ووصيته وراح ازيد راتبج حتى يكفيج. اكيد ميكفيج هسه مو صح؟
اتفاجأت من كلي يزيد راتبي بس خفت ماادري ليش.
شمه: نعمه استاذ احسن من الماكو.
ابو ايوب: لاا لاا اريده يكفيج ويزود. ماكو احسن من الماكو شتحتاجين تعاليلي كولي حجي محتاجه فلان شي. محتاجه هلكد لتستحين ولتخافين. اي شي تحتاجينه انتي او اهلج اتدللي.
ظليت مفهييه معرفت شكول وشحجي العجوز هذا مسوالي اي شي مو زين بس كل حجيه يكول كلام هبه صحيح.
بلعت ريكي كتله: اشكرك استاذ.
ابو ايوب: اشو جنج مفرحانه؟ اكو وحده يزودون راتبها ومتفرح ههههه.
شمه: لا بالعكس فرحانه. بس ممتوقعه ومتفاجأة.
ابو ايوب: ههههه ليش متفاجأة. هههه يالله حقج حقج بعدج متعرفيني. اني احب اساعد اي واحد محتاج مادام هو زين وياي انطيه شيريد انطيه. ادلله. انتي بعدج متعرفيني هسه تشوفين وتعرفين ابو ايوب شنو.
ظليت مخلوسه. هذا العجوز الشايب العايب هم عاجبته نفسه. طاح حظج شمه ولو هو طايح من كاعه شباقي بي.
ظليت افكر يعني شنو اليصير زين وياي؟
شيقصد؟ اني شسويتله وصرت زينه وياه؟
---.
اتشكرت منه وطلعت واني من صفنه لصفنه حتى من كد التفكير رحت لام ستار كتلها: ماما. اريد جاي بلا زحمه.
ام ستار: ماما؟ يالله اني هم امج خالتج بكيفج هههه.
شمه: اهوو والله ولامنتبهه ام ستار حبيبتي خاله اريد استكانة جاي مهيل فدوة.
ام ستار: صار.
رجعت لمكتبي وكعدت افكر. فرحت بالزياده فعلا محتاجتها حيل.
خلص راتبي وامي صار يومين بلا علاج وماعندي شي ابيعه حتى الكم قطعة ذهب الجانت عندي بعتها وره وفاة والدي قبل مااشتغل لان ماعدنه لاتقاعد ولاوارد ولااي مصدر للدخل.
الحمدلله مابطلت وورطت اهلي وياي.
اول مرجعت للبيت اخذت امي وابني ورحنه للسوك.
اشتريتلها علاج وكم دشداشة للبيت حبيت افرحها حتى لو بشي بسيط وطوبه لادم وبعدين رحنه كعدنه اكلنه لفات ورجعنه للبيت.
جنت اتمنى اعشيهم بمطعم بس مقبلت كالت: الفلس إلى يزود عندج ضميه لباجر. اتعلمي تصيرين حريصه محد دايملج انتي وابنج ما الكم احد.
هالحجي خلاني الليل كله كاعده منو إلى ووين اروح اذا امي صارلها شي؟ منو يوكفلي؟
ثاني يوم من داومت وائل جان وجهه ثكيل مااعرف شبي بس كلت احسن.
داومت عادي وطول النهار هدوء صار يومين ايوب افندي ماكو الدوام من اروع مايكون.
للظهر جنت كاعدة منتظرة هبه حتى نتغدا واجه استاذ سلمان السكرتير: السلام عليكم
شمه: وعليكم السلام
سلمان: ست شمه. استاذ ايوب رايدج بالمكتب.
شمه: ان شاءالله.
انقبض كلبي مااريد اشوفه ولااريد اشوف خلقته. الظاهر يريد يعتذر على سوايته واسلوبه ذاك اليوم.
قليل ادب.
عباله بهالبساطه يحجي ويغلط وبعدين عادي حتى ميعتذر.
والله شنو. جابلج كلاص عصير. صدك ثوله هاي هبه، وكرامتي بالله؟ شيسويلها العصير؟
ثول.
رحت واحجي بكلبي اسأل واجاوب واتخيل نفسي ارزله من جديد.
دخلت لمكتبه جان كاعد وكدامه اوراق يباوع عليها ولابس نظاره طبية: السلام عليكم
ايوب: وعليكم السلام.
رد علي بدون ميرفع راسه. بعدين رفع راسه باوعلي وكلي: سدي الباب وياج.
شمه: ليش؟
ايوب: شنو ليش؟ سديه اريد احجي وياج عالشغل.
خفت ورحت سديت بس مو كللش خليت مردود مثلما سويت من كلي ابوه سدي الباب.
شيريد هذا بس لايريد يطردني؟
يافرحه ماتمت مالحكت افرح بزيادة الراتب.
رجعت وكفت كباله باوعلي كلي: منو صرفلج الزيادة عالراتب؟
شمه: الوالد زاد راتبي واستاذ سلمان صرفلياها؟
ايوب: الوالد؟ وشنو المناسبة؟
شمه: مااعرف. ماكو مناسبة.
ايوب: اذن على اي اساس تستلميها؟ اشمعنه انتي دون بقية الموظفين ينطيج زيادة وانت مصارلج كم شهر؟ وماكو مناسبة اصلا.
بالبداية اتخردلت مااعرف اجاوبه ومليت منه ومن شوفته كل ميشوفني لازم يسمعني موشح اليوم عن الراتب.
شمه: مااعرف. هالسؤال المفروض توجهه للوالد مو إلى اني لاطالبه زياده ولا اعرف سببها. الحجي الله يسلمه هو حب يساعدني ويزيد راتبي.
ايوب: حب يساعدج؟! والله؟ بشنو حب يساعدج؟ كل الموظفين هنا محتاجين مساعدة اغلبهم متزوجين وعدهم مسؤوليات وعوائل ليش بس انتي حب يساعدج؟
شمه: روح سأله كوله ليش زودت راتبها. مو تسألني. حالي حال اي موظف من تجيه زيادة عالراتب او مكافأة يكول شكرا وانعم الله ويحمد الله ويشكره مو اكعد احقق ليش وشنو المناسبة واشمعنه اني من دون الموظفين.
رديت بعصبيه.
رفع حاجبه وباوعلي بنظره حسيته معجبه كلامي.
فجأة كام وكف.
نزيت وخفت بس حاولت ابين شجاعة.
راح بأتجاه الباب وطبكه واني اباوع عليه والف فكرة براسي اتخيلته يريد يضربني او يهددني رغم ماكو سبب لهيج تصرف بس خيالي دبرلي قصص حتى يرعبني.
يجوز خاف صوتنه يعله. معناها ناوي على عركه ومشكلة.
الله يصبرني عليك واتحملك.
اجه وكف على راسي خفت ارفع راسي واباوعله.
بقى واكف واسمعه يتنهد. خوفني بس بقيت متحنطه وساكته منتظرة منه يبدي الفلسفه او يجوز غلط واهانه لان هي هاي اخلاقه.
وره شويه كلي بصوت هادئ وحاد كأنما ميريد احد يسمعنه بس يريد يخوفني: شنو بينج وبين الحجي؟
ماادري بلحظتها عبالي مسمعته عدل رفعت راسي باوعتله كتله: نعم؟ مسمعتك شنو كلت؟
ايوب: سمعتيني.
بقيت ساكته إلى سمعته اكيد غلط. شجاوبه اخاف اجاوبه حسب الشي السمعته واتفشل اطلع سامعه غلط.
خل ابقى ساكته احسن لحدما يصدك مسمعته ويعيد حجيه يالله اجاوبه.
ايوب: احجي؟
شمه: شنو؟ شحجي؟
ايوب: جاوبي على سؤالي.
شمه: غير اسمع السؤال بالاول مو كتلك مسمعت شنو كلت.
بقى صافن بوجهي بعدين كال: شعندج ويه الحجي؟ شبينج وبينه؟
شمه: شنو يعني شعندي وياه؟ وشبيني وبينه؟ شقصدك؟
بديت اترجم كلامه بمخي هذا الحقير شيحجي!
ايوب: سمعتيني زين.
بديت افور ردت اكوم ارزله بس رأسا اشرلي اسكت.
احسست بقلبي يكاد مني ان ينزلق.
اهدأ. اهدأ.
فلا شيء يستحق ان تختتق.
اهدأ. فلست بأول مرة فيها تحترق
اهدأ وتعقل فأنت في حضرة جبار حذق.