رواية صراع الجبابرة للكاتبة روز الفياض الفصل الرابع والثلاثون
الى من ملكت قلبي وكل الشعور.
اهديكِ باقة من رحيق مشاعري. وعبير محبتي. وعطر اشواقي.
علها تكون عربون صادق من قلب معذب لبداية جديدة.
علنا نكون قد اكتفينا من الفراق.
وعلنا نكون اكتفينا من الالم.
---
ايوب.
يومين اختفت مرجعت اتصلت ولاحاولت تحجي وياي بعدما سمعتها تحجي ويه نور واخذت التليفون منها واتعاركت وياها.
نور من سمعتني ظلت تضرب على خدها ولازمه ايدي عبالك شمه يمي وراح اضربها هههه.
بس بعدها اتحسفت واتندمت عالحجي الحجيته.
نور: ايوب شنو هالحجي صدك جذب؟
تره البنية ذلت نفسها علمودك شدعوه عليك هيجي حجيك ناشف وياها واسلوبك خشن؟
يعني ذيج جانت تدبج عالسطح متحاجيها وهاي لان رايدتك ومتحمله وياك رغم إلى صار مشبعها رزاله؟
سكتت، اعرف حجيها صحيح..
نور: والله حرام عليك وخطيتها بركبتك، هسه المثلك يطير من الفرحة برجتعها الك..
من باب تكول احبها ومتندم واتسرعت.
ومن باب كلما تشوفها لو تحجي وياها ترزلها..
اني منها اتزوج واعوفك عيشتيش هاي..
راحت نور وهي تدردم راحت تحجي لامي ولخواتها المتجمعات عدنه من البارحة بعد الانفجار ومؤتمر وره مؤتمر همه وامي وكل شويه وحده تسوي علي غاره للغرفة تسألني شحجيت وشكلت وشلون شفت شمه..
قهرني حجي نور هالمره رغم هو صحيح بس غثني.
طلعت من البيت كله ماادري وين اروح مااشتهي اروح للشغل.
محسيت بنفسي الا بشارعهم..
عبرت على بابهم يمكن عشر مرات كلت يمكن تطلع واشوفها واراضيها، بس مطلعت..
خلصت اليوم ضايج وبس رجعت للبيت امي استلمتني تحقيق لان نور ممقصره شاحنتها ورايحة..
امي: ليش هيجي سويت بالبنية؟
مو ذابح نفسك عليها
؟ احتارت تره وياك تعوفك متقبل ترجعلك متقبل تحجي وياك هم متقبل شتسويلك يعني؟
متريدها كول حتى اني احجي وياها واكولها صرفي نظر ياخاله ابني ميفيدج..
اتنهدت كتلها: بسرعة انطوج الموجز والنشره؟
امي: اي بسرعة، لعد نبقى على مزاجك شوكت ميعجبك؟
البارحة جان متت علمودها وتريد الا توصلها للبيت اليوم شبيك رجعت على سوالفك؟
ايوب: مو وكته هالحجي يمه.
امي: لعد شوكت وكته؟
من تنخطب بت الناس؟
لعبالك تبقى تنتظرك لاخر عمرها؟
ولاحتى تنتظرك لحد متتازل وتقرر تخطبها تره ابن ادم عنده كرامته فوك كل شي.
ايوب: اهوو لو ادري مرجعت للبيت.
امي: هسه فشلتنه الصبح نحجي وياها شكل ونتعذر وللظهر تروح تحجي حجي مابي خير شبيك متفهمني قابل بس انت مريض؟
احمد ربك ياماما مو مثل غيرك غيرك ماله حل وماله علاج.
سكتت شويه وكلت بكلبي الحمدلله بعدين كتلها: اريد جاي بغرفتي.
صعدت للغرفة بدلت وكعدت مكابل التليفون مااكدر اتصل بس كلبي مينطني ازعلها اكثر وكلام امي ونور خوفني.
خفت اخسرها وتروح من ايدي.
كافي مكابره وعناد. اني الغلطان واستحق ردها.
هي مجبوره عالشغل وطبيعي تروح لسرمد لاتكدر تجيلي ولاتروح لمؤيد وهبه علاقتها بيها انتهت.
ماكو غير سرمد.
اففف.
باوعت للساعة كلت خاف نايمه؟
لا متنام اليوم مغثوثه مني.
لو تشوف فلم عربي لو كاعده تبجي.
فتحت التلفزيون دورت فلم عربي قديم.
باوعتله شويه عجبني..
اتشجعت وطلعت رقمها وفتحت الحظر..
مو حظر إلى انفتح كلبي يمكن..
احس حتى الهوا اختلف نفسيتي اختلفت.
لاشعوريا ابتسمت..
كتبتلها: اكو فلم حلو على قناة، شوفيه. راح يعجبج..
ظليت متردد ادزها بالبداية بس بعدين كلت: كافي ايوب هلكد بعد عيش وخليها على الله وين متريد توصل خل توصل وانت تحبها ورايدها بالحلال وحاشاه ربي يخيب مساعيك وياها..
دزيت المسج واني كلبي يدك مشتاقلها. ولحجيها، ولبرائتها، ولخبالاتها.
مشتاق لسهرنه وطلعاتنه واشواقنه.
مشتاق اغفى واني اسمع صوتها.
مشتاق اكوللها اشتاقيتلج كد رحمة الله..
اتمنيت لو اكدر اتصل بس ادري امها متقبل وعاذرها.
هسه انتظر ردها علي يمكن تقبل تلين.
---
---
شمه..
شيجيب الليل حتى اصفن بحالي..
الليل بس يفهمني من ابجي..
الكآبه جانت عندي فووول..
اتورطت حبيت. ،
لاكادر يخطبني ولامن راد يخطبني اتسهلت..
ولا اني ناسيته ولامن نويت انساه بقى مختفي..
شيريد مني البخت.
غمضت عيوني شوية عيوني توجعني من البجي..
استحيت احجي للمياء كافي ضوجتها هواي بأخباري ومشاكلي.
اتحسرت على شبابي المفتهمت منه شي..
صار سنتين من عرفت ايوب انشلع كلبي بيها..
عمري راح يصير ( 29 ) سنة واني ماادري شنو تاليتي لا تعيين حكومي اضمن بي راتب ثابت وارتاح من الذله لسرمد وامثاله.
لا زواج..
لا حتى من حبيت مثل البنات اتهنيت..
شسوي ووين اروح..
وين انطي وجهي؟
يعني اخلص عمري يوميه بمكان مثل ام البزازين؟
لشوكت يوميه شركة؟
شلون اعيش ابني؟
منو إلى لو امي صارلها شي؟
اخخخ ياربي حرت واحتاريت، ومنك الفرج يارب.
مالي غيرك.
سمعت صوت مسج وصلني اتصورت لمياء فرحت.
محتاجه انسى القهر شويه واضحك.
مديت ايدي اخذت التليفون فتحته شفت صدمه..
مسج من ايوب..
هذا رقمه.
فاتح الحظر مراسلني كاتبلي: اكو فلم حلو على قناة، شوفيه. راح يعجبج..
ظليت لدقائق ماخذتني الصفنه. هذا صدك رقمه وهو مراسلني لو مو هو؟
ظليت اباوع عالرقم اريد اتأكد ظليت اشك بعيوني..
لا يمكن اتخيل. اي.
بس هذا الكلام القديم موجود بعده وهذا رقمه والمسج هذا توه وصلني بنفس الصفحة بس التاريخ شكد فررررق.
!
ضحكت بس دمعت عيوني..
معقولة هو؟
اخاف بالغلط دازه.
لا مو بالغلط لان فتح الحظر..
كلما اتذكر صارله سنة حاظر رقمي اموت من القهر..
اشوفه متصل وهو هم يشوفني متصله بس مااكدر اجاوبه..
اذاني ايوب هواي.
كافي خلاني بالملامة كل هالاشهر امي تلوم بيه واني الوم بنفسي لان صدكته.
خلاني اعتبر نفسي غبيه.
اشهر واني كلما صفنت الوم نفسي.
كلما حجت امي ولامتني ابقى آكل بروحي..
وصلت لحافة الجنون بسببه.
شخسران لو كايلي السبب حتى الملامه تقل..
حتى مااعيش بعذاب وذل وعيني مكسوره من نفسي مو بس من امي..
اخخ ياايوب. فوك عذاب فراكك اكل الهم..
تموتني من تعوف كل شي وتلتهي بالامور الثانويه. حتى لو دليل حبك وغيرتك وحرصك..
بس تخليني اخر شي.
اخر شي تفكر تشرحلي وتبررلي من تصير بالوقت الضايع.
لو من ينتهي كل شي بمصيبه جديدة.
ردت ارد عليه بس مكدرت.
اكو شي بكلبي مكسور..
كل مره من يحجي بوائل لو سرمد لو حسام يحسسني اني متونسه وعاجبني تصرفاتهم وياي..
رحت فتحت التلفزيون اشوف الفلم الكال عنه.
بقى متصل بس اني لا.
سديت التليفون كلت: خليه..
خليه يمكن من يشوفني هالمره ماخذه موقف يتنازل ويفكر يمكن يخسرني..
يمكن يخاف من خسارتي ويرجع من صدك.
يمكن يقبل يخليني اكون قريبة منه مثل قبل.
لازم اكون هالمره صاحبة موقف جاد لمصلحتي ومصلحته، بس غير كون هالگلب يطاوعني ويتحمل..
اووف.
بقيت متمدده بالصالة وافكر لاشفت الفلم ولاسمعت منه شي.
الافكار إلى براسي متخليني اركز بشي..
غفيت بمكاني.
مكعدت الا على صوت السايق بره، يبووو تأخرت.
ركض ركض غسلت وبدلت ماادري شنو لبست..
بالطريق انتبهت اني شلابسه.
عزاااااا!
بنطرون جينز قميص طويل اسود. حجاب وردي.
وشحاطة البيت!
خرررب وشلون شحاطة تخزي..
حتى لون مباقي بيها جنها حظي!
يافشلتي شلون انزل كدام الموظفين هسه..
نزلت مستحيه بسرعة كتلهم السلام عليكم وفتت ركض لمكاني بقيت متحنطه وره المكتب.
متحركت بعد.
للساعة عشرة.
دك تليفوني رقم غريب.
مجاوبت ظل يدك اكثر من مره.
وره شوية اتصلت نور كالت: شمه ليش متجاوبين عالتليفون؟
شمه: يارقم؟
نور: مااتصل عليج رقم غريب.
شمه: اي اتصل اكثر من مره بس مجاوبته لان غريب.
نور: جاوبي عفيه.
شمه: ليش؟ منو ايوب؟ اذا ايوب عذريني مراح ارد.
نور: ياا ليش؟ بعدكم متصالحتوا؟
شمه: لا
نور: اوك عود بعدين اتصالحوا هسه ردي عالتليفون تره مو ايوب.
شمه: منو؟
نور: والله العظيم مو ايوب جاوبي.
شمه: اوك.
سديته من نور رجع نفس الرقم اتصل.
جاوبت صوت ولد كلي: خويه عندي طلبيه لهذا الرقم.
شمه: طلبيتيش اني مطالبة شي؟
كال: لا مو انتي طالبه اكو رقم اتصل طلب سلة ريوك لصاحبة هذا الرقم اللي هي انتي.
شمه: إلى! منو؟
كال: ماادري. اني هسه جاي قريب عالعنوان بس ارمش عليج طلعيلي.
رمش علي طلعت انطاني سلة شكلها حلو ومرتبة وبيها وجبة ريوك كاملة. مربى وعسل وگيمر ومجموعة اجبان وحليب وخبز..
اخذتها ودخلت كلها ظلت تباوع وتسأل.
منو ومنين ووهاي شنو؟
كتلهم مااعرف منين.
التموا عالسلة وبدا الفرهود واني لهسه معرفت منو داز السلة.
شلت البطاقة وكعدت على مكتبي نسيت شحاطتي الفضيحة ونسيت الريوك ردت اشوف شنو المكتوب بالبطاقة لان اكيد نور دازتها مادام اتصلت.
فتحت البطاقة مكتوب بيها: الى امل حياتي. وحبيبتي حتى آخر العمر.
ايوب.
ابتسمت ابتسامة عريضة مثل الجهال نسيت كل الضوجة بكلمتين منه.
بس فشله من نور.
لا اخاف هي دازتها؟
التفتت كلولي ها منو؟
شمه: صديقتي.
سوولي سندويج صغير وانطونياه والباقي همه اكلوه.
وره شويه اتصل رقم غريب ثاني.
جاوبت كلت يمكن نفس الرقم قبل شويه بس طلع مو هو: السلام عليكم؟
شمه: وعليكم السلام
كلي: خويه عدنه طلبيه لازم تتستلم لهذا الرقم.
شمه: اليوم يوم الطلبيات. شنو هالمره؟
كال: اني بالباب لو تطلعين تستلميها.
طلعت انطاني باقة ورد طبيعي تجنن.
فرحت بيها حيل تجنن.
اكيد المصدر نفسه.
فتحت الكارت مكتوب: انتِ مني وبي والى قلبي انتمائُك.
ايوب.
ظليت ساعة كاملة صافنه بالكارت..
ليش تشلع كلبي اذا تحبني هلكد.
وليش تحاسبني على اخطاء مو بيدي مجبوره عليها.
مجبورة علمود العيشه اشتغل عد سرمد وعد غيره واتحمل. الشي الوحيد اللي اكدر اسويه هو احاول احافظ على نفسي قدر الامكان..
وره شوية وصلني مسج فتحته من سرمد كلت اهووو منين طلعلي هذا هسه؟
شيريد بعد مو جان مختفي ومرتاحه منه.
كاتب: هلو شمه شلونج شخبارج؟
مداومه اليوم؟
اريد احجي وياج؟
كتله: لا ممداومه مريضة وبقيت بالبيت.
مالي خلكه وخلك مواضيعه السخيفه مثله.
قبل نهاية الدوام اجه سرمد..
وشلون موقف من شافني موجوده ومداومه.
ظل بالبداية متفاجأ وبعدين اجه غاير علي كلي بنتر كدام الموظفين: شدعوه عليج اريد احجي وياج تكولين ممداومه متردين تحجين وياي تره مميت عليج اني.
حالج حال اي وحده بالشارع عجبتني.
لو اشمرلها الرقم لو لا.
واذا اذا شمرتلها الرقم عود افكر اتصل بيها من يصير عندي مزاج..
مو انتي إلى تشوفين نفسج على سرمد انتي حدج ايوب يلعب عليج يومين ويشمرج.
المثلج ظالت يتوسلن بس حتى نقبل نتزوجهن بالسر..
ومنقبل بيهن..
ظليت متخشبة اريد استوعب الحجي إلى كاله وكدام الموظفين..
وكله يهون بس اخر شي من كلي المثلج يتوسلن حتى نتزوجهن بالسر ومنقبل..
اتمنيت روحي ميته ولا انهان هيجي اهانه وكدام الناس.
بهالاثناء طلع مدير المكتب كال: شكو؟
شبيكم؟
شصار؟
راد يرد هو على مديري بس اني كمت من مكاني كتله: تخسا..
وتخسا.
مرتين اني شمه انت واهلك وكل عشيرتك يحلمون يوصلون لنظافة ذيل ثوبي.
اني الزلم.
الزلم يحلفون بأسمي وبأخلاقي مو انت..
انت شنو؟ هم محسوب من الزلم؟
انت منو اصلاً وجاي لهنا حتى تغلط وتتهجم علي؟
بس لانك وصخ وهذا مستواك الوصخات المثلك طبعا تجي هنا تطلع اخلاقك الزباله وتستعرض قذارتك كدام الناس عبالك يمكن ماعندي لسان وارد عليك.
سرمد: اكص لسانج تره.
شمه: اذا انت رجال وبيك خير واني اعرفك لارجال ولابيك خير سويها واتدنه علي شوف.
راد يغلط بس الموظفين كاموله ومقبلوا عليه والمدير هم كله عيب ومن هالحجي.
سرمد: وحده ادبسز مال شوارع هاي بطلوها.
شمه: محد مال شوارع غيرك ياطايح الحظ..
ولو ماانت هيج جان مااجيت من وره صديقك تكول اتزوجيني بالسر هسه تريد تسوي نفسك عليه رجال.
صارت هوسه هو يصيح واني اصيح والموظفين كلهم يحجون والمدير.
طلعوه بره المكتب والبنية الوياي كعدت يمي تهديني لان ظليت ابجي ياربي وين اشرد من هاي الناس وين انطي وجهي.
اريد اعيش بحالي مطالبه شي اكثر.
فجأة رفعت راسي باوعتلهم شفت واحد ظهره إلى لابس كاسكيته يحجي ويه سرمد ووياهم بره.
رأساً طفرت من مكاني رحت اشوفه منو؟
عبالي ايوب نشف دمي كلت اليوم انذبح عالقبله اني وسرمد مابيها مجال.
شويه وشفت نور دخلت كالت: شكو شصاير بره؟
شبي سرمد يعيط بره على منو يغلط؟
شمه: علي.
نور: يااا ليش شكو شصاير؟
شمه: حقير واحد واطي ووصخ.
نور: دفهميني ليش تبجين شكلج؟
شمه: خل يولي طايح الحظ.
بعدنه نحجي وصارت هوسه وعركة بره ايهاب زوج نور وسرمد والدنيا انكلبت بره.
طلعنه نركض نريد نحجز بينهم بس منكدر كلهم رياجيل واحنه نسوان زحمة ندخل بينهم.
ظليت ادك والطم وبس اصرخ.
انفضحت الله ينطيك سرمد.
بالكوه فضت وراح سرمد.
دخلوا ايهاب جوه هو ونور وجابولهم مي.
ظل ايهاب خطيه يحجي عليه.
طلع جاي يريد يحجز للبصرة ونور كايلتله اروح وياك حتى اشوف شمه.
شبعت بجي..
بعدما حجزولهم وراحوا صاحلي المدير كلي: شنو الموضوع يصير نفهم؟
شمه: واحد حقير ووصخ.
قبل فتره جنت اشتغل بشركة ثانية ومديري اتقدملي يعني خطبه وزواج بس مصارت لان اسم الله طلع مريض بي ذاك المرض وانتهى الموضوع هو الولد من يمه اتراجع بسبب مرضه.
سرمد يصير صديقه حيل ويعرفه.
من شاف موضوعنه اني وصديقه انتهى اجه هو كلي اريد اخطبج بس نتزوج بالسر.
اني مقبلت..
شبيه اتزوج بالسر.
يعني الانسان من يحترم نفسه يصير موزين اطلع بت شوارع والمثلي يركضن وره الزلم حتى يقبلون يتزوجوهن بالسر يعني بالعكس؟
ظل المدير ساكت لاياخذ ولاينطي..
واني ظليت محتاره هم هالمره ابطل؟
وين اروح ووين اولي بعد؟
ووين انطي وجهي؟
فشلتي شكبرها كدام الموظفين والمدير شيكولون عني..
اكيد هسه المدير يبطلني لان سرمد صديقة.
حسبي الله ونعم الوكيل.
رجعت للبيت روحي طالعة مااكدر احجي لامي تتخبل.
بقيت محترك كلبي من حجي سرمد. للعصر اتصل ايوب مجاوبته.
دك اكثر من مره غلست.
دزلي مسج: انتي وين؟
هم غلست لان كل اللي صار بيه من تحت راسه.
وره نص ساعة اندك الباب.
طلعت امي تفتح الباب ودخلت وجها ينطي الوان.
جنت كاعدة على سجادة الصلاة توني مخلصه صلاتي كتلها: منو؟
امي: كومي امشي كدامي.
شمه: وين؟
امي: للمصيبه الطاحت علينه.
عافتني وطلعت طلعت وراها اركض ماادري شكو، شفت ايوب.
كلبي ظل يدك. خفت منا امي ومنا هو ماادري شخبله وشجابه لبيتنه.
شمه: ايوب!
شكو؟
ايوب: هم بعد تسألين؟
امي: شصاير اليوم؟ شمسويه؟
شمه: شمسويه ياستار؟
كلبي كرصني كلت يمكن عرف بموضوع سرمد. ومخاب ظني كلي: طيحان الحظ الصار اليوم بالدوام شنو؟
شمه: اني مو طايحة حظ حتى تجي تحاسبني طيحان حظ صاحبك. رجاءاً من تحجي ثمن كلامك.
هي كلمة كلتها وهو كف حسيته شلع خدي.
امي صرخت كلتله: ايدك اكسرها ذا تمدها على بتي.
بتي مرتبة ومتربية احسن تربية منو انت التجي تحاسبها واني موجوده.
اذا تغلط اني احاسبها مو انت.
انت بصفتك شنو جاي لهنا تحاسبها وتمد ايدك عليها؟
ايوب: بتج قبل يومين كتلها بطلي من شغلج هذا لان صاحبي على كولتها جاي عارض عليها الزواج وهو يدري بيه اريدها ومع ذلك بقت تشتغل هناك..
امي: وخير ياطير.
كل البنات تنخطب قابل بس هي وليش ميخطبها مخطوبه لو محجوزه يعني انت عفتها ورحت بدون متحجي وهم جاي تحاسبها على إلى يخطبها تبقى بدون زواج يعني وانت لا ترحم ولاتقبل رحمة الله تنزل؟
ظلت دموعي تصب مثل المطر وبقيت ساكته كلمة بعد محجيت.
هو هم حاول يهدأ لان شاف امي كللش صارت عصبيه.
ايوب: يمه.
افتهميني اني عفتها لمصلحتها شوفي شكلي شلون صاير. شوفي هذا من الكيمياوي.
تريدين بتج تتزوج يومين واموت وترجعلج ارمله من جديد؟
اني ماعندي مانع مادام طلعت ماارحم هسه اعقد عليها. هسه اجيب الشيخ واعقد عليها.
تقبلين؟
تقبلين اذا اخطبها واني بعدني مريض؟
بس متطلع بعد من هذا الباب..
راتبها يوصلها للبيت شكد راتبها اني انطيهياه بس متعتب عتبة هذا الباب. زين؟
هي جرعة بعد كم يوم متت قبلها وراها هي مرتي والها حق تورثني.
اني مو ظالم ولاجذاب ولالعبت عليها اني اجيت الكم من الباب بس الله مااراد شسوي؟
ماردت ابهذلها وياي واليوم وباجر وعكبه احبها واريدها بس جنت منتظر اخلص علاجي اذا الله كاتبلي عمر بعد اجي واخطبها..
مااريدها تتبهذل مااكدر اشوفها يوميه بمكان والف عين عليها.
غلطان اذا اخاف على عرضي غلطان؟
امي هم من سمعت حجيه اتحسرت وكلتله: بس مو هيجي التفاهم ولاتجي تضربها بوجودي..
مااقبل لو صارت مرتك الك الحق انت وياها تتجازون بس مادامها ابيت ابوها وتحت وصايتي مالك حكم عليها.
وهي مطالعة للشغل بطرانه وانت عرفتها وعرفت اخلاقها.
ايوب: كله اعرفه وعلى عيني وعلى راسي بس اني رجال مااتحمل اشوف مرتي تشتغل وعيون الزلم عليها.
امي: هسه غير بالاول تصير مرتك.
ايوب: تصير، ان شاءالله تصير.
دار علي كلي: هاي كدام خالتي الباب هذا متفتحيه اذا يندك. زين؟
اختنكت بعبرتي..
محاجيته، عفته ودخلت للبيت.
دخلت للغرفة وقفلت الباب..
لان ادري وراي امي بعد هسه تجي تكمل الناقصات المحجاهن ايوب..
كعدت عالجربايه شبعت بجي، الحرارة مال الراشدي لهسه بوجهي.
كمت شفت خدي احمر من الضربه.
استهضمت..
ليش انضرب وانهان؟
شسويت اني؟
دكت نور مجاوبتها كله منها، شلون تروح تحجيله..
غلقت التليفون وكعدت اتوسل للموت كون يجي كون ياخذني واخلص..
كلما اسمع صوت اكول اجت امي تستلمني قاط رزاله ثاني..
مرت اكثر من نص ساعة وامي ماكو. بس صوت ادم يلعب يم باب غرفتي.
امي مالها صوت.
بعدها اكيد تاخذ تفاصيل عن الحادثه من ايوب حتى الرزاله تكعد وزن.
لو اعرف حظي وين نايم!
---
---
انت الذي كنت احلى احلامي واغلاها.
اليوم اصبحت كابوساً اشتاق لعيشه كل يوم..
اغفو لاجدك تنتظرني. لاستيقظ فأجدك قد اختفيت. ولم يبقى منك سوى الالم.
انت الوحيد الذي تقدر على ايلامي.
واتحرق شوقاً لجرحك قائلةً هل من مزيد؟