رواية صراع الجبابرة للكاتبة روز الفياض الفصل الخامس والثلاثون

رواية صراع الجبابرة للكاتبة روز الفياض الفصل الخامس والثلاثون

ايوب..
بعدما دزيت المسج لشمه وقرته مجاوبتني..
بعدها زعلانه.
ماادري شلون اراضيها.
طلبت من نور تنطيني اسم محل ورد ردت ادز لشمه بس فاجأتني كلتلي طلبت طلبيتين وحده ريوك ووحده ورد بس شكتب بالبطاقة.
ايوب: تردين اكولج حتى ترحين تبثين النشرة يم امج وخواتج مو؟
نور: هههه طبعاً هو لو النشرة والسادة المشاهدين نكدر عليك هههه.
طلبت نور الطلبيه ودزتها.

العصر اجتنه نور وسمعتها تحجي لامي عالمشكلة الصايرة بين ايهاب وسرمد علمود شمه.
احترك كلبي.
من حجيت قبل يومين زعلت مني..
هسه احسن من طلعها بلا شرف كدام الناس والموظفين.
اذا اروح اطيح حظه ممكن يحقر اكثر ويروح يشهر بيها ويسوي قصص حتى يبرأ نفسه.
وراح يطلع الحق علي وراح يكولي بأي صفه انت تحجي.
بس الحجي الها هي..
رحت لبيتهم طلعتلي امها: اتفضل؟
ايوب: خاله شلونج؟
شمه موجوده؟
ام شمه: وليش تريدها؟

ايوب: اريد اعرف منها شصاير بالدوام شمسويه؟
ام شمه: شمسويه؟
ايوب: صيحيها هسه وراح يصير الحجي كدامج.
راح صاحتلها واجت بس حسيتها اتفاجأت من شافتني واتفاجأت من عرفت اني اعرف بالموضوع.
باول رد منها فقدت اعصابي.
ضربتها..
ظلت تبجي وامها زعلت ومقبلت علي وطلعت كل الحجي البكلبها عبالك اني جنت متقصد اعوف بتها.
يمكن حقها.
غلطان واعترف بس مجان قصدي كل إلى صار قصدي جان احميها..

كلبي احترك من ضربتها وبجت. بس حتى تعرف حجم المشكلة والموقف المرت بي.
ايهاب الرجال الغريب مكدر يستحمل حجي سرمد عليها واتعارك واتضارب وياه..
لعد لو اني سامع الحجي شيصير بيه..
اذا هذا صديقي ومأمن بي مو بس طعني وخاني لا هسه بعد من رفضته ظل يشوه سمعتها بكل وقاحة.
راحت وبقيت احجي ويه امها كتلها: مباقي شي ايام اصبريلي اذا الفحص نظيف والله بنفس الاسبوع اخطبها..

بقت ساكته امها بعدين كالت: خاله تره انت تعبتها وتعبتني..
بتي متلكه مثلها لو تروح لاخر الدنيا..
اذا هي قبلت بيك بعد اللي صار هسه فهذا من حظك، انت هسه إلى سويته شي جبير انت هسه فشلتها وكسرت خاطرها..
بتي مغلطانه بشي طالعة على باب الله ولو اني بيه حيل اشتغل جان مخليتها تتبهذل هالبهذله كلها لو اعرف اشتغل عاملة بمدرسة بس مابيه حيل ولاعندي صحة وهي اتحملت البهذله والاهانه والحجي علمود العيشة مو بطر..

ايوب: ادري.
ولو مااحبها ومحترك كلبي عليها مااجي لهنا بهالوقت وجاي مناك لهنا لو مااحبها ومااقبل احد يحجي بحقها كلمة مو زينه.
صاحبي طلع مو صاحبي طلع واحد خسيس..
شلون اقبل تروح تشتغل هناك بعد؟
غير اخاف عليها واغار عليها..
خالة اني بتج اريدها.
هاي من الاخير تردين هسه اذا تقبلين اجيب الشيخ واجي بس انتي قبلي.
ام شمه: هذا شلون حجي شنو تجيب الشيخ هسه وتجي وين كاعدين؟
اصبر ماما اصبر خلص علاجك والله كريم.

ايوب: هاا شفتي مقبلتي الا اخلص علاجي معناها لاتلوموني لان تركتها ادري محد يقبل ينطي بته لواحد بحالتي.
ام شمة: الله كريم خالة. خلص علاجك ويصير خير.
ايوب: بس متطلع بعد متروح للشغل.
ام شمه: لا تره هاي واكفه. هاي زايده منك شنو يعني يوميه بشغل هي الناس لاكيه شغل؟ شناكل شنشرب؟
ايوب: خل تعتبر نفسها تشتغل عندي..
ترجع عندي تشتغل جوه عيني..

متريد بعد احسن تبقى هنا بالبيت واني اجيبلها راتبها. شكد متريد من عيني. زين؟
ام شمه: لا ميصير هالحجي مو اصول، مالك حكم عليها هسه من تصير من نصيبك ذيج الساعة اتحكم بيها بس هسه لا، واذا عالشغل اني هم بعد مااريدها تشتغل الشغل إلى مجاب لبتي بس القهر والمرض مااريده..
كافي على ساعة بتي يصير بيها شي ربحي بيمن؟
مليت من الفره عالطباء وياها صار ثمن شهور هسه يالله جرت نفس وصارت زينه.

تجي هسه انت تضربها وتفشلها وصديقك ماادري شمسوي اليوم وياها؟
ايوب: حقج..
ماازعل ولا الومج بس انتي هم قدري موقفي كل إلى صار خارج عن ارادتي مو بكيفي.
عموماً اني هسه منفعل جنت وعصبي علمودها وطلعت عصبيتي عليها بس اني اراضيها ان شاءالله..
انتي هسه هم لتحجين وياها خليها تهدأ وبعدين اني اعرف شلون احل الموضوع..
ام شمه: خاله على كيفك انت وياها..
بتي من عرفتك لليوم مهمومه وضايجة ويومية واكعة مريضه من قهرها..

اني ماعندي غيرها بس هالبنية اروح افلس منها انوب، خلص بعد لتحجي وياها ولتوصلها منا لحد متجيب اهلك وتجي مريض صاحي ميهمني المهم بتي ترتاح تره تعبتها.
ايوب: ان شاءالله..
ان شاءالله..
ماشي.
رجعت للبيت اتلكتني امي هي ونور: شصار؟
شسويت؟
ايوب: ماكو، مصار شي.
نور: وين رحت؟
رحت لسرمد لو لشمه؟
ايوب: نور عوفيني هسه مالي خلك.
نور: والله شكلك رحتلها وجفصت لان اتصل عليها متجاوب تليفونها مغلق..

اكيد هسه تكول هاي نقلت لاخوها الحجي شكد عيب..
ايوب بداعة اموري كول شصار؟
اتنهدت كتلها: ضربتها..
نور: يمه!
ايوب شبيك اتخبلت؟
ماليش تضرب بت الناس؟
بأي صفة؟
ابن عمها ابن خالها؟
شسويت يمعود اكو واحد عاقل رجال طول بعرض يروح لبنية لبيتهم ويضربها؟
ايوب؟
والله راح تخبلنه، الله يستر..
ايوب: كافي عاد. دوختيني.
تردينها ترجع هم تشتغل بنفس المكان كدام عينه حتى يروح هالمره يحجي عليها حجي ماانزل الله به من سلطان؟

نور: لااا سوي مثل مكالت هي عوف الموضوع المهم والزك بخ، ه سرمد..
انت لو تحبها نص ماهي تحبك جان مخليتها معلكه وياك لابالسما ولا بالكاع..
ايوب: روحي لامج هسه احجيلها.
نور: طبعاً احجيلها طبعاً يمكن تعرف تسوي شي وتتصرف تصلح الموقف لان ابنها طلع مثل ابوه يفكر بس بنفسه.
ايوب: اطلعي نور..
عوفيني هسه.
اسمع صياح امي جوه.
شويه وصعدتلي فوك كلتلي: هاا يمه اتسودنت؟
اتسودنت وكعدت؟
اروح ارجعلك منى ترجعلك عقلك؟

مجاوبتها كالت: كوم وديني الهم.
هم مجاوبتها كالت: كووووم..
ايوب: منو؟
وين اوديج؟
امي: لبيت البنيه.
ايوب: شتسوين؟
امي: مالك علاقة انت.
كووم كووم بسرعة وديني.
اخلص من الحجي يطلعلي ايوب يتسودن ويكعد يومية يجيبلي القهر.
يمه انت متفهمني شتريد؟
فهمني بس راح امووت من قهرك.
سكتت وجريت حسره.
نزلت امي وبقيت اني محتار..
نزلت لامي هي ونور: يالله.
نور: شكو؟
ايوب: خل اوديكم لبيت اهل شمه.

امي جانت تسفط ملابس. ذبت الملابس ودارت على نور كلتلها: هاي شوفي..
مو اكولج اتسودن من وره شمه مدري الكيمياوي صعد على راسه.
ضحكت. كتلها: يمه والله احبها..
من حركت كلبي ضربتها.
نور: اويلي. خرب يومك ايهاب فد راشدي وبعدين عود راضيني هههههه.
امي: ديالله بالله هههه حتى هاي الثانية طلع عقلها مضروب.
ظلينه نضحك بعدين اخذتهم ورحنه لبيت ام شمه.
---
شمه..
هالمرة اول فكرة اجت ابالي اقطع علاقتي نهائياً بأيوب.

لان عبالك ماخذني فصليه حتى يطلع طناكيره وعصبيته علي.
هاي بعده مصاير شي رسمي بينه ووصلت للغلط وللضرب.
اااخخخ.
تمنيت اني من هذن البنات الملعبات واعوفه واروح لصاحبة حتى اكسر كلبه بس صاحبة حقير ووصخ.
بمنو اقارنك واكول احسن منك؟
وائل؟.
وائل ماعنده شخصية من البداية خاف يكول لاهله عندي طفل..
منو سرمد اوصخ خلق الله.
بيمن اقارنك اكول احسن منك.
بحسام؟.
حسام اللي داير على بنات الجامعة اللي بعمر بناته يضحك عليهم.

ماكو.
هو العيب مو بيك العيب بحظي..
كل هاللوم ويه روحي ومنتظرة امي بعد.
بس محجت شي.
سوت عشا واجت دكت باب الغرفة مجاوبتها كالت: عود انتي الزعلانه هسه؟
تعبت اني منج ومن هذا..
كومي طلعي اتعشي مابيه حيل اركض بيج للاطباء.
منين طلعلي هذا يوميه جايبلي القهر.
كلها بنات الناس حبت واتزوجت بستر لامشاكل ولاقصص بس شمه لازم يومية قصة.
حجيها يقهر وهي مكالت شي غلط.
خليت راسي عالمخده وكلت ياربي كون مااكوم. تعبت.

غمضت عيوني اريد انام.
كافي تفكير تعبت.
اتمنيت انام بس هسه لان اذا ابقى كاعدة اموت من التفكير.
نمت بعد عناء كلفني كوومه دموع.
وره شوية حسيت امي تحاجيني ماادري شتكول بقيت نايمة مااريد اكعد مااريد لاعشا ولاغيره.
وره شوية سمعت صوت بجي.
عبالي اتحلم كعدت. رحت اسمع صوت البجي هذا منين آدم نايم وامي مو يمه منو يمها بالصالة؟
كلت يمكن ام تيسير يمها واكيد جاي تشتكي من تيسير لان يشرب ويضرب خواته كالمعتاد.

رجعت لغرفتي مناقصة قهر.
فكرت افتح التليفون اشوفه يمكن اعتذر بس كلت لا اني خلص لازم اصير قوية لازم انهي كل شي.
رجعت نمت..
بس غفيت كعدت على صوت احد يمي يكعدني فزيت ظليت اباوع هاي منو؟
شنو هالاحلام اليوم..
هاي نور.
نور: صح النوم. شنو كل هذا نوم لعد المن جايين احنه.
بقيت اباوعلها عبالي حلم رجعت غمضت كالت: ياا شمه صدك عود؟
كعدي يمعوده الدنيا مشتعله بره تليفونات ومسجات وحب واعتذرات وانتي نايمه.

رفعت راسي كتلها: انتي مو نور؟
نور: ههههه لا اختها
شمه: هذا مو بيتنه؟
نور: اي بيتكم ههههه
شمه: لعد انتي شتسوين هنا؟
نور: هههههه والله جايين اني وامي جابنه الحبيب بهالليل علمود يصالحج.
كعدت عدل هذا مو حلم هاي نور اخت ايوب صدك عدنه..
شمه: بيش الساعة هسه؟
نهار لو ليل؟
نور: ليل، مبين بعدج نايمه ممستوعبه.
شمه: شستوعب اخوج خله براسي عقل..
نور: هو اصلا مباقي براسه عقل على كولت امي تكول الكيمياوي صاعد لراسه.

شمه: لا اسم الله
نور: اويلي هههه ماهذا العشق هههه
شمه: هذا مو عشق هذا واحد يطيح حظه بيده هاي اني.
نور: لا حبي حشاج بس هو حظكم ماادري شلونه منين متنطون وجهكم اكو احد كاعدلكم يخرب عليكم.
شمه: اني بس اريد اعرف شلون عرف؟
نور: سمعني احجي لامي.
شمه: والله خدي لهسه يوجعني شوفي.
نور: والله اتخبل من سمع لعب لعب انوب يسوي السالفة ويتندم عاد امي هالمره مقصرت بي كلتله هسه توديني اطيب خاطرها هي امها لان انت اتسودنت.

شمه: يعني خالتي هسه هنا؟
نور: اي متسمعيها هي وامج يبجن على حظج وحظه ههههه.
شمه: هو ناقص بجي حظي.
اتنهدت ودمعت عيوني كتلها: المره ميكسرها اي واحد.
المره يكسرها دائما الشخص المستنده عليه. واني ايوب كسرني الف مره مو مره وحده.
ينطي لنفسه يحاسبني وهو محاطني اصلاً بقائمة اولوياته، ينطي لنفسه الحق بكل تصرفاته بس اني اتعاقب واترزل وانضرب وانهان علمود تصرفات غيري الزباله.

بقت ساكته نور بعدين كالت: تره الرجال قسوته وعصبيته من غيرته..
لو عرفتي هو عرف باللي صار وعبره جان انقهرتي.
جان حسيتي هو ميغار عليج ولامهتم بيج ولاتعنيله اي شي، مو صح؟
شمه: وهو هسه مهتم؟
نور: لو ممهتم مجابنه لهنا لان خايف عليج وميريدج تزعلين منه.
بعدها تحجي دك تليفونها كالت: شوفي.
هاي ثالث مره يتصل من اجينه يريد يحجي وياج يكول تليفونها مغلق.
شمه: وراح يبقى مغلق.
نور: حرام عليج شمه.

شمه: لاء حرام اللي يصيرلي..
كل يوم قصة جديدة.
ردت عليه كلتله: هاا ايوب؟
اي
لاكعدت.
اي اني كعدتها بس زعلانه.
اوك.
انطتني التليفون كلتلي: يريد يحجي وياج.
هزيت راسي لا
نور: لخاطري عفية.
هزيت راسي لا.
رجعت كلتله: بعدين خليها ايوب.
خل ترتاح وبعدين تحجي وياك.
لا لا مابيها شي.
يعني قصدي توها كاعده من النوم مالها خلك مو تعبانه وتريد ترتاح لا اسم الله عليها جنها ورده ولاعبالك كاعده من النوم ههههه يالله حبيبي باي.

سدته كلتلي: اه شفتي خاف لان كتله ترتاح وتحجي وياك.
شبيج ياحظي هو اكو وحده لاكيه هيج حب هالايام دشوفوا الناس شلون عايشه وانتو خلصتوها متعاركين وزعلانين.
شمه: وهذا مؤشر انه هالعلاقة مو ناجحة..
مو صحيحه.
نور: هااا..
طلعتي صدك تعبانه ومحتاجه ترتاحين.
سكتت مالي خلك اجادل واحجي بعدين كالت: كومي خلي امي تشوفج ذابحتنه تريد تشوفج حلوه لو لا هههه.

كمت رحت وراها للصالة دخلت شفت امه كاعده بس دخلت انتبهت علي شافتني ظلت تباوعلي كتلها: السلام عليكم
ام ايوب: وعليكم السلام، شمه؟
شمه: اي خالة شمه.
ام ايوب: صلاوات على محمد. تعاي خل ابوسج تعاي.
رحت بوستها وكعدت كالت: شلونج خاله؟
شمه: الحمدلله خاله.
ام ايوب: اني مااريد اعيد الحجي..
حجيت الاول والتالي لامج..
بس حبيبتي ايوب مريض.
واعصابه تعبانه هو على هالحال من صارت سالفة خطبتكم اتفشكلت واليوم هذا حاله..

بعد متتعود على رجعتج لحياته وخايف خاف ميطيب وترحين من ايده..
لخاطر خالتج اتحمليه..
واذا على اللي سواه اني مقبلت عليه وسألي نور وكتله هسه توديني الها اخذ خاطرها وخاطر الحجيه امها ونتعذر منكم على كل اللي صار من اول لاخره..
من اول يوم لليوم..
احنه ناس لامتعافين ولا نحب المشاكل ولاعدنه تكبر بالعكس نحب الناس بس هي الناس اتغيرت متحب الخير لغيرها بعد..

يعني من حجتلي نور اليوم والله متت من القهر على هذا الحقير سرمد..
يعني صاحبك الروح بالروح دنت نفسك على خطيبة صاحبك..
مشايفة اني هيجي.
بلعت ريكي من كالت خطيبة صاحبة.
شمه: صحيح
ام ايوب: هسه احنه بعد نعتبرج جنتنه اني هسه خطبتج من امج وبس يطلع فحصه سليم نجي نخطب رسمي هي خطبة وهو زواج.
كافي نريد نفرح تعبنه من وراكم، ها لو شتكولين حجيه هههه؟
ام شمه: والله صدك تعبنه..

يومية جايتني تبجي للصبح تظل يوميه ارزلها واحجي عليها وميفيد احبه ماما..
يومية واكعة وماخذيها للدكتور متاكل زعلانه من ايوب..
ايوب زعلان هم وكعت وهاي اني متخبله مثلي مثلج واكثر.
ام ايوب: اي والله شعدنه غيرهم الله يفرحنه بيهم ان شاءالله.
بقيت ساكته، ابد مالي خلك احجي.
مو هذا اليوم اللي جنت اتمناه؟
موجنت اتمنى اهله يجون ويحجون ويه امي؟
هاي اجوا ليش مفرحانه؟
طولوا بكعدتهم سوالف امي وامه ونور وياهم.

رحت سويتلهم عصير اجت وراي كالت: يريد يحجي وياج.
شمه: تؤ
نور: عفيه شمه. كلمة وحده بس؟
شمه: لاء
نور: والله مينام اليوم، مريض شمه مريض شبيج.
ظلت تتوسل كتلها: اني بعدين احاجيه هسه مالي خلك.
نور: اي عفيه عفيه خطيه.
شربوا العصير وطلعوا.
طلعت امي وياهم.
من رجعت كالت: مااوصيج هسه مادام اجت امه حجت وكالت ظلي وياه بالتليفون ( 24 ) ساعة..
شمه: اصلا غلقت التليفون لتخافين.
ماوراي راحة.
امي: نشوف، وشغل ماكو تره بعد.

شمه: بعد احسن..
كافي القهر الحصلته من الشغل..
التقاعد مبقاله شي كافي علينه.
سكتت.
راحت نامت واني بقيت كاعده احوس..
رحت فتحت التليفون وسويتله حظر..
هسه خل يجرب ايوب شعوري من يتصرف وياي هيجي.
بقيت الليل كله سهرانه من فلم لفلم وشبعت بجي حتى لو الفلم ميبجي.
اخر شي راسلت لمياء كالت: لا ماله حق يضربج ولو اني هسه حتى من الضربه غرت لان حتى ضرب محد قابل يضربني.
شمه: ههههههه عابتلج.

لمياء: تره مرات الضرب نعمة وانتي هسه بنعمة بس ممتعوده على النعمة.
شمه: بطرانه انتي.
لمياء: اي صح بطرانه بس انتي متعافية.
ياعمي خل يجي يضربني قابله بس غير يجي.
شمه: منو؟
لمياء: خطيبي.
شمه: كرهت الخطوبة كلها وكرهت الشغل وكرهت كل شي اله علاقة بايوب.
لمياء: جيبيه
شمه: شنو هو؟
لمياء: ايوب مو متردينه انطينياه ازوجه لامي امي صايره مثل امج الظاهر لازم ازوجها واخلص منها.
شمه: ههههههههههه لاياخبله..

ماانطي لاحد شنو انطيجياه.
لمياء: ادري هسه احتارينه وياج لاقابله عالضربه لاقابله عالرزاله لاقابله على الزعل تره هو هذا.
شمه: شنو هو هذا؟
لمياء: هوو، مااريد اكول اسمه تصير عدي كرشة نفس.
شمه: لج شنو هو؟
لمياء: الكلمة المتكونه من حرفين ( ح. ب ).
شمه: الحب؟
لمياء: تف تف تف لتكوليها كاملة لج هاي بس تنكال كاملة تجيب السعادة واحنه مو شكول سعاده طاح حظي بامريكا وماحصلتلي زلمه ينعجب بيه.

شمه: ههههههههههههه رجعي واقبلي بالمنتوج الوطني احسن.
لمياء: لا مااريد ابو كرش اريده اشقر وعيونه زرك.
شمه: وائل.
لمياء: لا مااريده..
شنو وائل الخواف يخاف من اهله اريد واحد جسور يحارب الدنيا علمودي ولو هو مايحتاج يحارب لان ينطوني اله بلاش وفوكي فلوس بعد بس حتى يخلصون مني هههههه.
شمه: هسه شسوي؟
لمياء: لتسوين اي شي..
ابقي هيج اطحني بروحج وهو هناك هم نفس الحالة لحد منتموت احنه من القهر مو انتو.
شمه: عابت.

لمياء: انتي مو تكولين حظرتيه؟
شمه: اي، حظرته.
لمياء: خلص خليه شويه يتعذب يوم يومين شصار ولو هو ساعتين مصبر دز امه انوب يومين بس ميخالف يحتاج ينضب اوبي هالايام فالت بغيابي جنت ضابته الج شلون ضبه..
مع الاسف عالوكت خلاني هنا محد يقدر مهاراتي وخبرتي.
شمه
: زين لميااااء لمياء عفيه، تكدرين..
لمياء: اهووووووووووو المن حبابة مخليه الحظر اذا تردين لمياء تجسسلج ها؟

فتحي الحظر وهو يتأسف ويعتذر وانتي تركضين ترمين نفسج بين احضانه.
شمه: رميت.
كتلها بصوت ناصي. كالت: هااا؟
شمه: رميت؟
لمياء: شرميتي؟
شمه: نفسي بين احضانه..
كتلها بصوت ناصي وهي اتخبلت: عاااااااااا عااااااا يمه منج يمه شوكت؟
شلون؟
متى؟
اين؟
احجي ليش اني اخر من يعلم..
لانعل ابو امريكا لابو اليجيلها لج شنو هاي من وراي؟ احجي؟
شمه: بيوم الانفجار..
لمياء: اي؟ اي؟
غردي غردي لتسكتين؟
شمه: اي، احم.

يعني هو صارالانفجار وهو يعني..
لمياء: اي؟
شمه: اي
لمياء: ووجعي كولي الكلمة خل استمتع بيها شسوه.
شمه: حضني.
لمياء: هااا؟
شمه: ح ض ن ي
لمياء: عيديها عليج الله خل استوعب تدرين عندي جفاف وهيج كلام يأثر..
شمه: حضني لج حضني..
لمياء: الله الله الله، عظمه على عظمه ياست..
شمه: ادري على كيفج تره حضني اني مو انتي على كيفج ام كلثوم شهالانفعالات الخنفشاريه.

لمياء: بعيد عنج هاي من الاثار الجانبية للجفاف العاطفي. المهم اني هسه رايحة شتردين اجيبلج من اخبار؟
شمه: مو توه مسويه نفسج متكدرين تتجسسين؟
لمياء: امري لله بعد..
ادري بيكم تغرگون بدون لمياء وخطط لمياء وافكار لمياء. لمياء ابتلت صارت سفيرة النوايا الحسنة بعد.
شمه: هههههه احلى سفيرة.
---
---
اي تلك العيون الساهرة
تصبحين على قلبي. ??.